| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. லோமஸகங்கி³யப⁴த்³தே³கரத்தஸுத்தவண்ணனா
4. Lomasakaṅgiyabhaddekarattasuttavaṇṇanā
286. ஏவங் மே ஸுதந்தி லோமஸகங்கி³யப⁴த்³தே³கரத்தஸுத்தங். தத்த² லோமஸகங்கி³யோதி அங்க³தே²ரோ கிர நாமேஸ, காயஸ்ஸ பன ஈஸகலோமஸாகாரதாய லோமஸகங்கி³யோதி பாகடோ ஜாதோ. சந்த³னோ தே³வபுத்தோதி கஸ்ஸபஸம்மாஸம்பு³த்³த⁴காலே கிரேஸ சந்த³னோ நாம உபாஸகோ அட்³டோ⁴ மஹத்³த⁴னோ தீணி ரதனானி சதூஹி பச்சயேஹி பூஜெத்வா தே³வலோகே நிப்³ப³த்தோ, புரிமனாமேன சந்த³னோ தே³வபுத்தொத்வேவ ஸங்க²ங் க³தோ. பண்டு³கம்ப³லஸிலாயந்தி ரத்தகம்ப³லஸிலாயங். தஸ்ஸா கிர ரத்தகம்ப³லஸ்ஸேவ ஜயஸுமனபுப்ப²ராஸி விய வண்ணோ, தஸ்மா ‘‘பண்டு³கம்ப³லஸிலா’’தி வுச்சதி.
286.Evaṃme sutanti lomasakaṅgiyabhaddekarattasuttaṃ. Tattha lomasakaṅgiyoti aṅgathero kira nāmesa, kāyassa pana īsakalomasākāratāya lomasakaṅgiyoti pākaṭo jāto. Candanodevaputtoti kassapasammāsambuddhakāle kiresa candano nāma upāsako aḍḍho mahaddhano tīṇi ratanāni catūhi paccayehi pūjetvā devaloke nibbatto, purimanāmena candano devaputtotveva saṅkhaṃ gato. Paṇḍukambalasilāyanti rattakambalasilāyaṃ. Tassā kira rattakambalasseva jayasumanapuppharāsi viya vaṇṇo, tasmā ‘‘paṇḍukambalasilā’’ti vuccati.
கதா³ பன தத்த² ப⁴க³வா விஹாஸீதி? போ³தி⁴பத்திதோ ஸத்தமே ஸங்வச்ச²ரே ஸாவத்தி²யங் ஆஸாள்ஹீமாஸபுண்ணமாய த்³வாத³ஸயோஜனாய பரிஸாய மஜ்ஜே² யமகபாடிஹாரியங் கத்வா ஓருய்ஹ கண்ட³ம்ப³மூலே பஞ்ஞத்தவரபு³த்³தா⁴ஸனே நிஸீதி³த்வா த⁴ம்மதே³ஸனாய மஹாஜனங் மஹாவிது³க்³க³தோ உத்³த⁴ரித்வா பு³த்³தா⁴ நாம யஸ்மா பாடிஹாரியங் கத்வா மனுஸ்ஸபதே² ந வஸந்தி, தஸ்மா பஸ்ஸமானஸ்ஸேவ தஸ்ஸ ஜனஸ்ஸ பத³வீக்கமங் கத்வா தாவதிங்ஸப⁴வனே பாரிச்ச²த்தகமூலே பண்டு³கம்ப³லஸிலாயங் வஸ்ஸங் உபக³தோ, தஸ்மிங் ஸமயே விஹாஸி.
Kadā pana tattha bhagavā vihāsīti? Bodhipattito sattame saṃvacchare sāvatthiyaṃ āsāḷhīmāsapuṇṇamāya dvādasayojanāya parisāya majjhe yamakapāṭihāriyaṃ katvā oruyha kaṇḍambamūle paññattavarabuddhāsane nisīditvā dhammadesanāya mahājanaṃ mahāviduggato uddharitvā buddhā nāma yasmā pāṭihāriyaṃ katvā manussapathe na vasanti, tasmā passamānasseva tassa janassa padavīkkamaṃ katvā tāvatiṃsabhavane pāricchattakamūle paṇḍukambalasilāyaṃ vassaṃ upagato, tasmiṃ samaye vihāsi.
தத்ர ப⁴க³வாதி தத்ர விஹரந்தோ ப⁴க³வா யேபு⁴ய்யேன த³ஸஹி சக்கவாளஸஹஸ்ஸேஹி ஸன்னிபதிதாஹி தே³வதாஹி பரிவுதோ மாதரங் காயஸக்கி²ங் கத்வா அபி⁴த⁴ம்மபிடகங் கதெ²ந்தோ க³ம்பீ⁴ரங் நிபுணங் திலக்க²ணாஹதங் ரூபாரூபபரிச்சே²த³கத²ங் படிவிஜ்ஜி²துங் அஸக்கொந்தானங் தே³வானங் ஸங்வேக³ஜனநத்த²ங் அந்தரந்தரா ப⁴த்³தே³கரத்தஸ்ஸ உத்³தே³ஸஞ்ச விப⁴ங்க³ஞ்ச அபா⁴ஸி. தத்ராயங் தே³வபுத்தோ உக்³க³ண்ஹந்தோ இமா கா³தா² ஸத்³தி⁴ங் விப⁴ங்கே³ன உக்³க³ண்ஹி, தே³வத்தஸ்ஸ பன பமாதா³தி⁴ட்டா²னத்தா தி³ப்³பே³ஹி ஆரம்மணேஹி நிப்பீளியமானோ அனுபுப்³பே³ன ஸுத்தங் ஸம்முட்டோ² கா³தா²மத்தமேவ தா⁴ரேஸி. தேனாஹ ‘‘ஏவங் கோ² அஹங் பி⁴க்கு² தா⁴ரேமி ப⁴த்³தே³கரத்தியோ கா³தா²’’தி.
Tatra bhagavāti tatra viharanto bhagavā yebhuyyena dasahi cakkavāḷasahassehi sannipatitāhi devatāhi parivuto mātaraṃ kāyasakkhiṃ katvā abhidhammapiṭakaṃ kathento gambhīraṃ nipuṇaṃ tilakkhaṇāhataṃ rūpārūpaparicchedakathaṃ paṭivijjhituṃ asakkontānaṃ devānaṃ saṃvegajananatthaṃ antarantarā bhaddekarattassa uddesañca vibhaṅgañca abhāsi. Tatrāyaṃ devaputto uggaṇhanto imā gāthā saddhiṃ vibhaṅgena uggaṇhi, devattassa pana pamādādhiṭṭhānattā dibbehi ārammaṇehi nippīḷiyamāno anupubbena suttaṃ sammuṭṭho gāthāmattameva dhāresi. Tenāha ‘‘evaṃ kho ahaṃ bhikkhu dhāremi bhaddekarattiyo gāthā’’ti.
உக்³க³ண்ஹாஹி த்வந்திஆதீ³ஸு துண்ஹீபூ⁴தோ நிஸீதி³த்வா ஸுணந்தோ உக்³க³ண்ஹாதி நாம, வாசாய ஸஜ்ஜா²யங் கரொந்தோ பரியாபுணாதி நாம, அஞ்ஞேஸங் வாசெந்தோ தா⁴ரேதி நாம. ஸேஸமெத்த² உத்தானமேவாதி.
Uggaṇhāhitvantiādīsu tuṇhībhūto nisīditvā suṇanto uggaṇhāti nāma, vācāya sajjhāyaṃ karonto pariyāpuṇāti nāma, aññesaṃ vācento dhāreti nāma. Sesamettha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
லோமஸகங்கி³யப⁴த்³தே³கரத்தஸுத்தவண்ணனா நிட்டி²தா.
Lomasakaṅgiyabhaddekarattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. லோமஸகங்கி³யப⁴த்³தே³கரத்தஸுத்தங் • 4. Lomasakaṅgiyabhaddekarattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. லோமஸககங்கி³யப⁴த்³தே³கரத்தஸுத்தவண்ணனா • 4. Lomasakakaṅgiyabhaddekarattasuttavaṇṇanā
