| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. மச்ச²ரிஸுத்தவண்ணனா
2. Maccharisuttavaṇṇanā
32. பமஜ்ஜனாகாரேன பவத்தா அனுபலத்³தி⁴ பமாதோ³. தேன ஏகந்ததோ ஸதிரஹிதா ஹொந்தீதி வுத்தங் ‘‘ஸதிவிப்பவாஸலக்க²ணேனா’’தி. தி³ட்டி²விசிகிச்சா²த³யோ செத்த² பமாதே³னேவ ஸங்க³ஹிதா. இதா³னி யதா² மச்ச²ரியனிமித்தஞ்ச பமாத³னிமித்தஞ்ச தா³னங் ந தீ³யதி, தங் த³ஸ்ஸேதுங் ‘‘ஏகச்சோ ஹீ’’திஆதி³ வுத்தங். பரிக்க²யங் க³மிஸ்ஸதீதி போ⁴க³பரிஹானிங் க³மிஸ்ஸதி. கி²ட்³டா³தீ³தி ஆதி³-ஸத்³தே³ன மண்ட³னவிபூ⁴ஸனச²ணனக்க²த்தகிச்சப்³யஸனாதி³ங் ஸங்க³ண்ஹாதி. யஸதா³யகந்தி கித்தியஸஸ்ஸ பரிவாரயஸஸ்ஸ ச தா³யகங். ஸிரீதா³யகந்தி ஸோப⁴க்³க³தா³யகங். ஸம்பத்திதா³யகந்தி குலபோ⁴க³ரூபபோ⁴க³ஸம்பதா³ஹி ஸம்பத்திதா³யகங். புஞ்ஞந்தி வா இத⁴ புஞ்ஞப²லங் த³ட்ட²ப்³ப³ங் ‘‘ஏவமித³ங் புஞ்ஞங் பவட்³ட⁴தீ’’திஆதீ³ஸு (தீ³॰ நி॰ 3.80) விய. அத்தி² தா³னஸ்ஸ ப²லந்தி எத்த² தெ³ய்யத⁴ம்மஸ்ஸ அனவட்டி²ததங் ப³ஹுலஸாதா⁴ரணதங், தங் பஹாய க³மனீயதங் , தப்³பி³ஸயாய பீதியா ஸாவஜ்ஜதங், தா³னத⁴ம்மஸ்ஸ அனஞ்ஞஸாதா⁴ரணதங் அனுகா³மிகதங், தப்³பி³ஸயாய பீதியா அனவஜ்ஜதங், லோபா⁴தி³பாபத⁴ம்மானங் வினோத³னங், ஸேஸபுஞ்ஞானங் உபனிஸ்ஸயஞ்ச ஜானந்தேனாதி வத்தப்³ப³ங்.
32. Pamajjanākārena pavattā anupaladdhi pamādo. Tena ekantato satirahitā hontīti vuttaṃ ‘‘sativippavāsalakkhaṇenā’’ti. Diṭṭhivicikicchādayo cettha pamādeneva saṅgahitā. Idāni yathā macchariyanimittañca pamādanimittañca dānaṃ na dīyati, taṃ dassetuṃ ‘‘ekacco hī’’tiādi vuttaṃ. Parikkhayaṃ gamissatīti bhogaparihāniṃ gamissati. Khiḍḍādīti ādi-saddena maṇḍanavibhūsanachaṇanakkhattakiccabyasanādiṃ saṅgaṇhāti. Yasadāyakanti kittiyasassa parivārayasassa ca dāyakaṃ. Sirīdāyakanti sobhaggadāyakaṃ. Sampattidāyakanti kulabhogarūpabhogasampadāhi sampattidāyakaṃ. Puññanti vā idha puññaphalaṃ daṭṭhabbaṃ ‘‘evamidaṃ puññaṃ pavaḍḍhatī’’tiādīsu (dī. ni. 3.80) viya. Atthi dānassa phalanti ettha deyyadhammassa anavaṭṭhitataṃ bahulasādhāraṇataṃ, taṃ pahāya gamanīyataṃ , tabbisayāya pītiyā sāvajjataṃ, dānadhammassa anaññasādhāraṇataṃ anugāmikataṃ, tabbisayāya pītiyā anavajjataṃ, lobhādipāpadhammānaṃ vinodanaṃ, sesapuññānaṃ upanissayañca jānantenāti vattabbaṃ.
தங்யேவ பா³லந்தி யோ மச்ச²ரீ, தமேவ. அதா³னஸீலா பா³லா. ஏகச்சோ த⁴னஸ்ஸ பரிபோ⁴க³பரிக்க²யப⁴யேன அத்தனாபி ந பரிபு⁴ஞ்ஜதி அதிலோப⁴ஸெட்டி² வியாதி ஆஹ ‘‘இத⁴லோகபரலோகேஸூ’’தி.
Taṃyeva bālanti yo maccharī, tameva. Adānasīlā bālā. Ekacco dhanassa paribhogaparikkhayabhayena attanāpi na paribhuñjati atilobhaseṭṭhi viyāti āha ‘‘idhalokaparalokesū’’ti.
யஸ்மா ஏகச்சோ அதா³னஸீலோ புரிஸோ அத்³தி⁴கே தி³ஸ்வா பஸ்ஸந்தோபி ந பஸ்ஸதி, தேஸங் கத²ங் ஸுணந்தோபி ந ஸுணோதி, ஸயங் கிஞ்சி ந கதே²தி, அதா³துகம்யதாத²ம்பே⁴ ப³த்³தோ⁴ ஹோதி, தஸ்மா தத்த² மதலிங்கா³னி உபலப்³ப⁴ந்தியேவாதி ஆஹ ‘‘அதா³னஸீலதாய மரணேன மதேஸூ’’தி. அட்ட²கதா²யங் பன தா³னமத்தமேவ க³ஹெத்வா மதேனஸ்ஸ ஸமதங் த³ஸ்ஸேதுங் ‘‘யதா² ஹீ’’திஆதி³ வுத்தங். தா³னஸீலஸ்ஸ பன அமதலிங்கா³னி வுத்தவிபரியாயதோ வேதி³தப்³பா³னி. வஜந்தி புது²த்தே ஏகவசனங், தஸ்மா வசனவிபல்லாஸேன வுத்தந்தி ஆஹ ‘‘ஸஹ வஜந்தா’’தி. தா³னஸீலாதி³த⁴ம்மோ புராதனோ, ந அஜ்ஜதனோதி ஸனந்தனோ, ஸோ ஏதேஸு அத்தீ²தி ஸனந்தனா, பண்டி³தா, தேஸங் த⁴ம்மாதி தேஸங் வஸேனபி த⁴ம்மோ ஸனந்தனோதி ஆஹ ‘‘ஸனந்தனானங் வா பண்டி³தானங் ஏஸ த⁴ம்மோ’’தி. அப்பஸ்மிம்பி தெ³ய்யத⁴ம்மே ஸதி ஏகே தா³னங் த³த³ந்தி, ஏகே ந த³த³ந்தி மச்ச²ரிபா⁴வா. ஸஹஸ்ஸதா³னஸதி³ஸாதி ஏகாபி த³க்கி²ணா பரிச்சாக³சேதனாய உளாரபா⁴வதோ ஸஹஸ்ஸதா³னஸதி³ஸா ஹோதி.
Yasmā ekacco adānasīlo puriso addhike disvā passantopi na passati, tesaṃ kathaṃ suṇantopi na suṇoti, sayaṃ kiñci na katheti, adātukamyatāthambhe baddho hoti, tasmā tattha mataliṅgāni upalabbhantiyevāti āha ‘‘adānasīlatāya maraṇena matesū’’ti. Aṭṭhakathāyaṃ pana dānamattameva gahetvā matenassa samataṃ dassetuṃ ‘‘yathā hī’’tiādi vuttaṃ. Dānasīlassa pana amataliṅgāni vuttavipariyāyato veditabbāni. Vajanti puthutte ekavacanaṃ, tasmā vacanavipallāsena vuttanti āha ‘‘saha vajantā’’ti. Dānasīlādidhammo purātano, na ajjatanoti sanantano, so etesu atthīti sanantanā, paṇḍitā, tesaṃ dhammāti tesaṃ vasenapi dhammo sanantanoti āha ‘‘sanantanānaṃ vā paṇḍitānaṃ esa dhammo’’ti. Appasmimpi deyyadhamme sati eke dānaṃ dadanti, eke na dadanti maccharibhāvā. Sahassadānasadisāti ekāpi dakkhiṇā pariccāgacetanāya uḷārabhāvato sahassadānasadisā hoti.
து³ரனுக³மனோதி அஸமங்கி³னா அனுக³ந்துங் து³க்கரோ. அனநுக³மனஞ்சஸ்ஸ த⁴ம்மஸ்ஸ அபூரணமேவாதி ஆஹ ‘‘து³ப்பூரோ’’தி. ‘‘த⁴ம்மங் சரே’’தி அயங் த⁴ம்மசரியா க³ஹட்ட²ஸ்ஸ வஸேன ஆரத்³தா⁴தி ஆஹ ‘‘த³ஸகுஸலகம்மபத²த⁴ம்மங் சரதீ’’தி. தேனாஹ ‘‘தா³ரஞ்ச போஸ’’ந்தி. ஸமுஞ்ஜகந்தி கஸ்ஸகேஹி அத்தனா காதப்³ப³ங் கத்வா விஸட்ட²த⁴ஞ்ஞகரணதோ க²லே உஞ்சா²சரியவஸேன ஸமுஞ்ஜனிஆதி³னா ச²ட்³டி³தத⁴ஞ்ஞஸங்ஹரணங். தேனாஹ ‘‘யோ அபி…பே॰… ஸமுஞ்ஜகங் சரதீ’’தி. ஏதேனாதி ஸதஸஹஸ்ஸஸஹஸ்ஸயாகி³க்³க³ஹணேன த³ஸன்னம்பி பி⁴க்கு²கோடீனங் பிண்ட³பாதோ த³ஸ்ஸிதோ ஹோதி. ‘‘தி³ன்னோ’’தி பத³ங் ஆனெத்வா யோஜனா. த³ஸன்னங் வா கஹாபணகோடீனங் பிண்ட³பாதோதி த³ஸன்னங் கஹாபணகோடீனங் வினியுஞ்ஜனவஸேன ஸம்பாதி³தபிண்ட³பாதோ. தயித³ங் ஸதஸஹஸ்ஸங் ஸஹஸ்ஸயாகீ³னங் தா³னங் எத்தகங் ஹோதீதி கத்வா வுத்தங். ஸமுஞ்ஜகங் சரந்தோபீதி ஸமுஞ்ஜகங் சரித்வாபி, ஸமுஞ்ஜகசரணஹேதூதி அத்தோ². ஸேஸபத³த்³வயேபி ஏஸேவ நயோ. தா³ரங் போஸெந்தோபி த⁴ம்மங் சரதி, அப்பகஸ்மிங் த³த³ந்தோபி த⁴ம்மங் சரதீதி யோஜனா. ததா²வித⁴ஸ்ஸாதி தாதி³ஸஸ்ஸ ததா²த⁴ம்மசாரினோ யா த⁴ம்மசரியா, தஸ்ஸா கலம்பி நக்³க⁴ந்தி ஏதே ஸஹஸ்ஸயாகி³னோ அத்தனோ ஸஹஸ்ஸயாகி³தாய. யங் தேன த³லித்³தே³னாதிஆதி³ தஸ்ஸேவத்த²ஸ்ஸ விவரணங். ஸப்³பே³ஸம்பி தேஸந்தி ‘‘ஸதங்ஸஹஸ்ஸானங் ஸஹஸ்ஸயாகி³ன’’ந்தி வுத்தானங் தேஸங் ஸப்³பே³ஸம்பி. இதரேஸந்தி ‘‘ததா²வித⁴ஸ்ஸா’’தி வுத்தபுரிஸதோ அஞ்ஞேஸங். த³ஸகோடிஸஹஸ்ஸதா³னந்தி த³ஸகோடிஸங்கா²தங் ததோ அனேகஸஹஸ்ஸபே⁴த³தாய ஸஹஸ்ஸதா³னங்.
Duranugamanoti asamaṅginā anugantuṃ dukkaro. Ananugamanañcassa dhammassa apūraṇamevāti āha ‘‘duppūro’’ti. ‘‘Dhammaṃ care’’ti ayaṃ dhammacariyā gahaṭṭhassa vasena āraddhāti āha ‘‘dasakusalakammapathadhammaṃ caratī’’ti. Tenāha ‘‘dārañca posa’’nti. Samuñjakanti kassakehi attanā kātabbaṃ katvā visaṭṭhadhaññakaraṇato khale uñchācariyavasena samuñjaniādinā chaḍḍitadhaññasaṃharaṇaṃ. Tenāha ‘‘yo api…pe… samuñjakaṃ caratī’’ti. Etenāti satasahassasahassayāgiggahaṇena dasannampi bhikkhukoṭīnaṃ piṇḍapāto dassito hoti. ‘‘Dinno’’ti padaṃ ānetvā yojanā. Dasannaṃ vā kahāpaṇakoṭīnaṃ piṇḍapātoti dasannaṃ kahāpaṇakoṭīnaṃ viniyuñjanavasena sampāditapiṇḍapāto. Tayidaṃ satasahassaṃ sahassayāgīnaṃ dānaṃ ettakaṃ hotīti katvā vuttaṃ. Samuñjakaṃ carantopīti samuñjakaṃ caritvāpi, samuñjakacaraṇahetūti attho. Sesapadadvayepi eseva nayo. Dāraṃ posentopi dhammaṃ carati, appakasmiṃ dadantopi dhammaṃ caratīti yojanā. Tathāvidhassāti tādisassa tathādhammacārino yā dhammacariyā, tassā kalampi nagghanti ete sahassayāgino attano sahassayāgitāya. Yaṃ tena daliddenātiādi tassevatthassa vivaraṇaṃ. Sabbesampi tesanti ‘‘sataṃsahassānaṃ sahassayāgina’’nti vuttānaṃ tesaṃ sabbesampi. Itaresanti ‘‘tathāvidhassā’’ti vuttapurisato aññesaṃ. Dasakoṭisahassadānanti dasakoṭisaṅkhātaṃ tato anekasahassabhedatāya sahassadānaṃ.
‘‘கலங் நக்³க⁴தீ’’தி இத³ங் தேஸங் தா³னதோ இமஸ்ஸ தா³னஸ்ஸ உளாரதரபா⁴வேன விபுலதரபா⁴வேன விபுலதரப²லதாய வுத்தந்தி ஆஹ ‘‘கத²ங் நு கோ² ஏதங் மஹப்ப²லதரந்தி ஜானநத்த²’’ந்தி. பச்சயவிஸேஸேன மஹத்தங் க³தோதி மஹக்³க³தோ, உளாரோதி அத்தோ². தேனாஹ ‘‘விபுலஸ்ஸேதங் வேவசன’’ந்தி. ஸமேனாதி ஞாயேன, த⁴ம்மேனாதி அத்தோ². விஸமேதி ந ஸமே மச்ச²ரியலக்க²ணப்பத்தே. செ²த்வாதி பீளெத்வா. தங் பன பீளனங் போத²னந்தி த³ஸ்ஸெந்தோ ‘‘போதெ²த்வா’’தி ஆஹ. அஸ்ஸுமுகா²தி திந்தஅஸ்ஸுமுக²ஸம்மிஸ்ஸா பரங் ரோதா³பெத்வா. மஹாதா³னந்தி யதா²வுத்தங் ப³ஹுதெ³ய்யத⁴ம்மஸ்ஸ பரிச்சஜனேன மஹந்ததா³னங். உப்பத்தியா அபரிஸுத்³த⁴தாயாதி அஜ்ஜா²ஸயஸ்ஸ தெ³ய்யத⁴ம்மக³வேஸனாய ச ஸுத்³த⁴தாய மலீனத்தா. இதரங் த⁴ம்மசரியாய நிப்³ப³த்திததா³னங். பரித்ததா³னந்தி பரித்தஸ்ஸ தெ³ய்யத⁴ம்மஸ்ஸ வஸேன பரித்ததா³னங். அத்தனோ உப்பத்தியா பரிஸுத்³த⁴தாயாதி அஜ்ஜா²ஸயஸ்ஸ தெ³ய்யத⁴ம்மக³வேஸனாய ச விஸுத்³த⁴தாய. ஏவந்திஆதி³மாஹாதி ‘‘ஏவங் ஸஹஸ்ஸானங் ஸஹஸ்ஸயாகி³ன’’ந்தி அவோச. தத்த² ஸஹஸ்ஸானந்தி ஸதங்ஸஹஸ்ஸானங். கா³தா²ப³ந்த⁴ஸுக²த்த²ங் ஸதக்³க³ஹணங் ந கதங். ஸேஸங் வுத்தனயமேவ.
‘‘Kalaṃ nagghatī’’ti idaṃ tesaṃ dānato imassa dānassa uḷāratarabhāvena vipulatarabhāvena vipulataraphalatāya vuttanti āha ‘‘kathaṃ nu kho etaṃ mahapphalataranti jānanattha’’nti. Paccayavisesena mahattaṃ gatoti mahaggato, uḷāroti attho. Tenāha ‘‘vipulassetaṃ vevacana’’nti. Samenāti ñāyena, dhammenāti attho. Visameti na same macchariyalakkhaṇappatte. Chetvāti pīḷetvā. Taṃ pana pīḷanaṃ pothananti dassento ‘‘pothetvā’’ti āha. Assumukhāti tintaassumukhasammissā paraṃ rodāpetvā. Mahādānanti yathāvuttaṃ bahudeyyadhammassa pariccajanena mahantadānaṃ. Uppattiyā aparisuddhatāyāti ajjhāsayassa deyyadhammagavesanāya ca suddhatāya malīnattā. Itaraṃ dhammacariyāya nibbattitadānaṃ. Parittadānanti parittassa deyyadhammassa vasena parittadānaṃ. Attano uppattiyā parisuddhatāyāti ajjhāsayassa deyyadhammagavesanāya ca visuddhatāya. Evantiādimāhāti ‘‘evaṃ sahassānaṃ sahassayāgina’’nti avoca. Tattha sahassānanti sataṃsahassānaṃ. Gāthābandhasukhatthaṃ sataggahaṇaṃ na kataṃ. Sesaṃ vuttanayameva.
மச்ச²ரிஸுத்தவண்ணனா நிட்டி²தா.
Maccharisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. மச்ச²ரிஸுத்தங் • 2. Maccharisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. மச்ச²ரிஸுத்தவண்ணனா • 2. Maccharisuttavaṇṇanā
