| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. மச்ச²ரிஸுத்தவண்ணனா
9. Maccharisuttavaṇṇanā
49. மச்ச²ரினோதி மச்சே²ரவந்தோ மச்சே²ரஸமங்கி³னோதி ஆஹ ‘‘மச்சே²ரேன ஸமன்னாக³தா’’தி. மச்சே²ரங் மச்ச²ரியந்தி அத்த²தோ ஏகங். ந வந்த³தீதி வந்த³னமத்தம்பி ந கரோதி, குதோ தா³னந்தி அதி⁴ப்பாயோ. உபட்டா²னங் காதுந்தி மது⁴ரபடிஸந்தா²ரங் கரோதீதி யோஜனா. இத³ங் தாவ முது³மச்ச²ரியங் ந ஹத³யங் விய அத்தானங் த³ஸ்ஸெந்தஸ்ஸ மச்ச²ரியந்தி கத்வா. கிங் துய்ஹங் பாதா³ ருஜ்ஜந்தி நனு துய்ஹங்யேவ ஆக³தக³மனேஸு பாதா³ ருஜ்ஜந்தி, கிந்தே இமே சி²ந்த³ந்தீதி அதி⁴ப்பாயோ. ஸாமீசிம்பி ந கரோதி குதோ தா³னந்தி அதி⁴ப்பாயோ. யதா²கம்மங் தங்தங்க³தியோ அரந்தி உபக³ச்ச²ந்தீதி அரியா, ஸத்தா. இமே பன குச்சி²தா அரியாதி கத³ரியா, த²த்³த⁴மச்ச²ரினோ. மச்ச²ரியஸதி³ஸஞ்ஹி குச்சி²தங் ஸப்³ப³ஹீனங் நத்தி² ஸப்³ப³கு³ணாபி⁴பூ⁴தத்தா போ⁴க³ஸம்பத்திஆதி³ஸப்³ப³ஸம்பத்தீனங் மூலபூ⁴தஸ்ஸ தா³னஸ்ஸ நிஸேத⁴தோ. இதிஆதீ³ஹி வசனேஹி. அத்தனோ உபகா⁴தகோதி மச்ச²ரியானுயோகே³ன குஸலத⁴ம்மானங் க³திஸம்பத்தியா ச வினாஸகோ.
49.Maccharinoti maccheravanto maccherasamaṅginoti āha ‘‘maccherena samannāgatā’’ti. Maccheraṃ macchariyanti atthato ekaṃ. Na vandatīti vandanamattampi na karoti, kuto dānanti adhippāyo. Upaṭṭhānaṃ kātunti madhurapaṭisanthāraṃ karotīti yojanā. Idaṃ tāva mudumacchariyaṃ na hadayaṃ viya attānaṃ dassentassa macchariyanti katvā. Kiṃ tuyhaṃ pādā rujjanti nanu tuyhaṃyeva āgatagamanesu pādā rujjanti, kinte ime chindantīti adhippāyo. Sāmīcimpi na karoti kuto dānanti adhippāyo. Yathākammaṃ taṃtaṃgatiyo aranti upagacchantīti ariyā, sattā. Ime pana kucchitā ariyāti kadariyā, thaddhamaccharino. Macchariyasadisañhi kucchitaṃ sabbahīnaṃ natthi sabbaguṇābhibhūtattā bhogasampattiādisabbasampattīnaṃ mūlabhūtassa dānassa nisedhato. Itiādīhi vacanehi. Attano upaghātakoti macchariyānuyogena kusaladhammānaṃ gatisampattiyā ca vināsako.
புஞ்ஞபாபவஸேன ஸம்பரேதப்³ப³தோ உபக³ந்தப்³ப³தோ ஸம்பராயோ, பரலோகோ. காமகு³ணரதீதி காமகு³ணஸன்னிஸ்ஸயோ அஸ்ஸாதோ³. கி²ட்³டா³தி காயிககி²ட்³டா³ வாசஸிககி²ட்³டா³ சேதஸிககி²ட்³டா³தி ஏவங் திவிதா⁴. ஏஸ விபாகோதி சோளாதீ³னங் கிச்ச²லாபோ⁴தி ஏஸ ஏவரூபோ விபாகோ. யமலோகந்தி பரலோகங். உபபஜ்ஜரேதி எத்த² இதி-ஸத்³தோ³ பகாரத்தோ². தேன பாளியங் வுத்தங் நிரயங் திரச்சா²னயோனிஞ்ச ஸங்க³ண்ஹாதி.
Puññapāpavasena samparetabbato upagantabbato samparāyo, paraloko. Kāmaguṇaratīti kāmaguṇasannissayo assādo. Khiḍḍāti kāyikakhiḍḍā vācasikakhiḍḍā cetasikakhiḍḍāti evaṃ tividhā. Esa vipākoti coḷādīnaṃ kicchalābhoti esa evarūpo vipāko. Yamalokanti paralokaṃ. Upapajjareti ettha iti-saddo pakārattho. Tena pāḷiyaṃ vuttaṃ nirayaṃ tiracchānayoniñca saṅgaṇhāti.
யாசந்தி நாம அரியயாசனாய. வுத்தஞ்ஹேதங் ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி (ஜா॰ 1.7.59). யே ஸங்விப⁴ஜந்தி, தே வத³ஞ்ஞூ நாம ஞத்வா கத்தப்³ப³கரணதோ. விமானப்பபா⁴யாதி நித³ஸ்ஸனமத்தங், உய்யானகப்பருக்க²ப்பபா⁴ஹி தே³வதானங் வத்தா²ப⁴ரணஸரீரப்பபா⁴ஹிபி ஸக்³கே³ பகாஸெந்தியேவ. பகாஸந்தீதி வா பாகடா ஹொந்தி, ந அபாயலோகே விய அபாகடாதி அத்தோ². பரஸம்ப⁴தேஸூதி ஸயங் ஸம்ப⁴தங் அனாபஜ்ஜித்வா பரேஹேவ ஸம்ப⁴ரிதேஸு ஸுகூ²பகரணேஸு. தேனாஹ பாளியங் ‘‘வஸவத்தீவ மோத³ரே’’தி, பரனிம்மிதபோ⁴கே³ஸு வஸவத்தீ தே³வபுத்தா விய ஸுக²ஸமங்கி³தாய மோத³ந்தீதி அத்தோ². ஏவங் வுத்தஸம்பராயோதி ஏதே ஸக்³கா³தி ஏவங் ஹெட்டா² வுத்தஸம்பராயோ. உபி⁴ன்னந்தி ஏதேஸங் யதா²வுத்தானங் உபி⁴ன்னங் து³க்கடஸுகடகம்மகாரீனங். ததோ சவித்வா ததோ நிரயஸக்³கா³தி³தோ சவித்வா மனுஸ்ஸேஸு நிப்³ப³த்ததி. தேஸு யோ மச்ச²ரீ மனுஸ்ஸேஸு நிப்³ப³த்தோ, ஸோ த³லித்³தோ³ ஹுத்வா புப்³ப³சரியவஸேன மச்ச²ரீயேவ ஹொந்தோ தா³ராதி³ப⁴ரணத்த²ங் மச்ச²கச்ச²பாதீ³னி ஹந்த்வா புனபி நிரயே நிப்³ப³த்தோ. இதரோ ஸுத்³தா⁴ஸயோ ஸமித்³தோ⁴ ஹுத்வா புப்³ப³சரியாவஸேன புனபி புஞ்ஞானி கத்வா ஸக்³கே³ நிப்³ப³த்தெய்ய. தேனாஹ ‘‘புன ஸம்பராயேபி து³க்³க³திஸுக³தியேவ ஹோதீ’’தி.
Yācanti nāma ariyayācanāya. Vuttañhetaṃ ‘‘uddissa ariyā tiṭṭhanti, esā ariyāna yācanā’’ti (jā. 1.7.59). Ye saṃvibhajanti, te vadaññū nāma ñatvā kattabbakaraṇato. Vimānappabhāyāti nidassanamattaṃ, uyyānakapparukkhappabhāhi devatānaṃ vatthābharaṇasarīrappabhāhipi sagge pakāsentiyeva. Pakāsantīti vā pākaṭā honti, na apāyaloke viya apākaṭāti attho. Parasambhatesūti sayaṃ sambhataṃ anāpajjitvā pareheva sambharitesu sukhūpakaraṇesu. Tenāha pāḷiyaṃ ‘‘vasavattīva modare’’ti, paranimmitabhogesu vasavattī devaputtā viya sukhasamaṅgitāya modantīti attho. Evaṃ vuttasamparāyoti ete saggāti evaṃ heṭṭhā vuttasamparāyo. Ubhinnanti etesaṃ yathāvuttānaṃ ubhinnaṃ dukkaṭasukaṭakammakārīnaṃ. Tato cavitvā tato nirayasaggādito cavitvā manussesu nibbattati. Tesu yo maccharī manussesu nibbatto, so daliddo hutvā pubbacariyavasena maccharīyeva honto dārādibharaṇatthaṃ macchakacchapādīni hantvā punapi niraye nibbatto. Itaro suddhāsayo samiddho hutvā pubbacariyāvasena punapi puññāni katvā sagge nibbatteyya. Tenāha ‘‘puna samparāyepi duggatisugatiyeva hotī’’ti.
மச்ச²ரிஸுத்தவண்ணனா நிட்டி²தா.
Maccharisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. மச்ச²ரிஸுத்தங் • 9. Maccharisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. மச்ச²ரிஸுத்தவண்ணனா • 9. Maccharisuttavaṇṇanā
