| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. மது⁴பிண்டி³கஸுத்தவண்ணனா
8. Madhupiṇḍikasuttavaṇṇanā
199. ஏவங் மே ஸுதந்தி மது⁴பிண்டி³கஸுத்தங். தத்த² மஹாவனந்தி ஹிமவந்தேன ஸத்³தி⁴ங் ஏகாப³த்³த⁴ங் அரோபிமங் ஜாதிவனங், ந யதா² வேஸாலியங் ரோபிதாரோபிதமிஸ்ஸகங். தி³வாவிஹாராயாதி தி³வா படிஸல்லானத்தா²ய. பே³லுவலட்டி²காயாதி தருணபே³லுவருக்க²ஸ்ஸ. த³ண்ட³பாணீதி ந ஜராது³ப்³ப³லதாய த³ண்ட³ஹத்தோ². அயஞ்ஹி தருணோ பட²மவயே டி²தோ, த³ண்ட³சித்ததாய பன ஸுவண்ணத³ண்ட³ங் க³ஹெத்வா விசரதி, தஸ்மா த³ண்ட³பாணீதி வுத்தோ. ஜங்கா⁴விஹாரந்தி ஜங்கா⁴கிலமத²வினோத³னத்த²ங் ஜங்கா⁴சாரங். அனுசங்கமமானோ அனுவிசரமானோதி ஆராமத³ஸ்ஸன-வனத³ஸ்ஸன-பப்³ப³தத³ஸ்ஸனாதீ³னங் அத்தா²ய இதோ சிதோ ச விசரமானோ. அதி⁴ச்சனிக்க²மனோ கிரேஸ கதா³சி தே³வ நிக்க²மித்வா ஏவங் விசரதி. த³ண்ட³மோலுப்³பா⁴தி த³ண்ட³ங் ஓலும்பி⁴த்வா கோ³பாலகதா³ரகோ விய த³ண்ட³ங் புரதோ ட²பெத்வா த³ண்ட³மத்த²கே த்³வே ஹத்தே² பதிட்டா²பெத்வா பிட்டி²பாணிங் ஹனுகேன உப்பீளெத்வா ஏகமந்தங் அட்டா²ஸி.
199. Evaṃ me sutanti madhupiṇḍikasuttaṃ. Tattha mahāvananti himavantena saddhiṃ ekābaddhaṃ aropimaṃ jātivanaṃ, na yathā vesāliyaṃ ropitāropitamissakaṃ. Divāvihārāyāti divā paṭisallānatthāya. Beluvalaṭṭhikāyāti taruṇabeluvarukkhassa. Daṇḍapāṇīti na jarādubbalatāya daṇḍahattho. Ayañhi taruṇo paṭhamavaye ṭhito, daṇḍacittatāya pana suvaṇṇadaṇḍaṃ gahetvā vicarati, tasmā daṇḍapāṇīti vutto. Jaṅghāvihāranti jaṅghākilamathavinodanatthaṃ jaṅghācāraṃ. Anucaṅkamamāno anuvicaramānoti ārāmadassana-vanadassana-pabbatadassanādīnaṃ atthāya ito cito ca vicaramāno. Adhiccanikkhamano kiresa kadāci deva nikkhamitvā evaṃ vicarati. Daṇḍamolubbhāti daṇḍaṃ olumbhitvā gopālakadārako viya daṇḍaṃ purato ṭhapetvā daṇḍamatthake dve hatthe patiṭṭhāpetvā piṭṭhipāṇiṃ hanukena uppīḷetvā ekamantaṃ aṭṭhāsi.
200. கிங்வாதீ³தி கிங்தி³ட்டி²கோ. கிமக்கா²யீதி கிங் கதே²தி. அயங் ராஜா ப⁴க³வந்தங் அவந்தி³த்வா படிஸந்தா²ரமத்தகமேவ கத்வா பஞ்ஹங் புச்ச²தி. தம்பி ந அஞ்ஞாதுகாமதாய, அசித்தீகாரேன புச்ச²தி. கஸ்மா? தே³வத³த்தஸ்ஸ பக்கி²கோ கிரேஸ. தே³வத³த்தோ அத்தனோ ஸந்திகங் ஆக³ச்ச²மானே ததா²க³தே பி⁴ந்த³தி. ஸோ கிர ஏவங் வதே³தி ‘‘ஸமணோ கோ³தமோ அம்ஹாகங் குலேன ஸத்³தி⁴ங் வேரீ, ந நோ குலஸ்ஸ வுத்³தி⁴ங் இச்ச²தி. ப⁴கி³னீபி மே சக்கவத்திபரிபோ⁴கா³, தங் பஹாய ‘நஸ்ஸதேஸா’தி நிக்க²மித்வா பப்³ப³ஜி. பா⁴கி³னெய்யோபி மே சக்கவத்திபீ³ஜந்தி ஞத்வா அம்ஹாகங் குலஸ்ஸ வட்³டி⁴யா அதுஸ்ஸந்தோ ‘நஸ்ஸதேத’ந்தி தம்பி த³ஹரகாலேயேவ பப்³பா³ஜேஸி. அஹங் பன தேன வினா வத்திதுங் அஸக்கொந்தோ அனுபப்³ப³ஜிதோ. ஏவங் பப்³ப³ஜிதம்பி மங் பப்³ப³ஜிததி³வஸதோ பட்டா²ய ந உஜுகேஹி அக்கீ²ஹி ஓலோகேதி. பரிஸமஜ்ஜே² பா⁴ஸந்தோபி மஹாப²ரஸுனா பஹரந்தோ விய ஆபாயிகோ தே³வத³த்தோதிஆதீ³னி பா⁴ஸதீ’’தி. ஏவங் அயம்பி ராஜா தே³வத³த்தேன பி⁴ன்னோ, தஸ்மா ஏவமகாஸி.
200.Kiṃvādīti kiṃdiṭṭhiko. Kimakkhāyīti kiṃ katheti. Ayaṃ rājā bhagavantaṃ avanditvā paṭisanthāramattakameva katvā pañhaṃ pucchati. Tampi na aññātukāmatāya, acittīkārena pucchati. Kasmā? Devadattassa pakkhiko kiresa. Devadatto attano santikaṃ āgacchamāne tathāgate bhindati. So kira evaṃ vadeti ‘‘samaṇo gotamo amhākaṃ kulena saddhiṃ verī, na no kulassa vuddhiṃ icchati. Bhaginīpi me cakkavattiparibhogā, taṃ pahāya ‘nassatesā’ti nikkhamitvā pabbaji. Bhāgineyyopi me cakkavattibījanti ñatvā amhākaṃ kulassa vaḍḍhiyā atussanto ‘nassateta’nti tampi daharakāleyeva pabbājesi. Ahaṃ pana tena vinā vattituṃ asakkonto anupabbajito. Evaṃ pabbajitampi maṃ pabbajitadivasato paṭṭhāya na ujukehi akkhīhi oloketi. Parisamajjhe bhāsantopi mahāpharasunā paharanto viya āpāyiko devadattotiādīni bhāsatī’’ti. Evaṃ ayampi rājā devadattena bhinno, tasmā evamakāsi.
அத² ப⁴க³வா யதா² அயங் ராஜா மயா பஞ்ஹே புச்சி²தே ந கதே²தீதி வத்துங் ந லப⁴தி, யதா² ச பா⁴ஸிதஸ்ஸ அத்த²ங் ந ஜானாதி, ஏவமஸ்ஸ கதெ²ஸ்ஸாமீதி தஸ்ஸானுச்ச²விகங் கதெ²ந்தோ யதா²வாதீ³ கோ²திஆதி³மாஹ.
Atha bhagavā yathā ayaṃ rājā mayā pañhe pucchite na kathetīti vattuṃ na labhati, yathā ca bhāsitassa atthaṃ na jānāti, evamassa kathessāmīti tassānucchavikaṃ kathento yathāvādī khotiādimāha.
தத்த² ந கேனசி லோகே விக்³க³ய்ஹ திட்ட²தீதி லோகே கேனசி ஸத்³தி⁴ங் விக்³கா³ஹிககத²ங் ந கரோதி ந விவத³தி. ததா²க³தோ ஹி லோகேன ஸத்³தி⁴ங் ந விவத³தி; லோகோ பன ததா²க³தேன ஸத்³தி⁴ங் அனிச்சந்தி வுத்தே நிச்சந்தி வத³மானோ, து³க்க²ங், அனத்தா, அஸுப⁴ந்தி வுத்தே ஸுப⁴ந்தி வத³மானோ விவத³தி. தேனேவாஹ ‘‘நாஹங், பி⁴க்க²வே, லோகேன விவதா³மி, லோகோவ கோ², பி⁴க்க²வே, மயா விவத³தி, ததா² ந, பி⁴க்க²வே, த⁴ம்மவாதீ³ கேனசி லோகஸ்மிங் விவத³தி, அத⁴ம்மவாதீ³வ கோ², பி⁴க்க²வே, விவத³தீ’’தி (ஸங்॰ நி॰ 3.94). யதா²தி யேன காரணேன. காமேஹீதி வத்து²காமேஹிபி கிலேஸகாமேஹிபி. தங் ப்³ராஹ்மணந்தி தங் கீ²ணாஸவங் ப்³ராஹ்மணங். அகத²ங்கதி²ந்தி நிப்³பி³சிகிச்ச²ங். சி²ன்னகுக்குச்சந்தி விப்படிஸாரகுக்குச்சஸ்ஸ சேவ ஹத்த²பாத³குக்குச்சஸ்ஸ ச சி²ன்னத்தா சி²ன்னகுக்குச்சங். ப⁴வாப⁴வேதி புனப்புனப்³ப⁴வே, ஹீனபணீதே வா ப⁴வே, பணீதோ ஹி ப⁴வோ வுத்³தி⁴ப்பத்தோ அப⁴வோதி வுச்சதி. ஸஞ்ஞாதி கிலேஸஸஞ்ஞா. கிலேஸாயேவ வா இத⁴ ஸஞ்ஞானாமேன வுத்தா, தஸ்மா யேன காரணேன காமேஹி விஸங்யுத்தங் விஹரந்தங் தங் லோகே நின்னாவாதி³ங் கீ²ணாஸவப்³ராஹ்மணங் கிலேஸஸஞ்ஞா நானுஸெந்தி, தஞ்ச காரணங் அஹங் வதா³மீதி அயமெத்த² அத்தோ². இதி ப⁴க³வா அத்தனோ கீ²ணாஸவபா⁴வங் தீ³பேதி. நில்லாளெத்வாதி நீஹரித்வா கீளாபெத்வா. திவிஸாக²ந்தி திஸாக²ங். நலாடிகந்தி வலிப⁴ங்க³ங் நலாடே திஸ்ஸோ ராஜியோ த³ஸ்ஸெந்தோ வலிப⁴ங்க³ங் வுட்டா²பெத்வாதி அத்தோ². த³ண்ட³மோலுப்³பா⁴தி த³ண்ட³ங் உப்பீளெத்வா. ‘‘த³ண்ட³மாலுப்³பா⁴’’திபி பாடோ², க³ஹெத்வா பக்காமீதி அத்தோ².
Tattha na kenaci loke viggayha tiṭṭhatīti loke kenaci saddhiṃ viggāhikakathaṃ na karoti na vivadati. Tathāgato hi lokena saddhiṃ na vivadati; loko pana tathāgatena saddhiṃ aniccanti vutte niccanti vadamāno, dukkhaṃ, anattā, asubhanti vutte subhanti vadamāno vivadati. Tenevāha ‘‘nāhaṃ, bhikkhave, lokena vivadāmi, lokova kho, bhikkhave, mayā vivadati, tathā na, bhikkhave, dhammavādī kenaci lokasmiṃ vivadati, adhammavādīva kho, bhikkhave, vivadatī’’ti (saṃ. ni. 3.94). Yathāti yena kāraṇena. Kāmehīti vatthukāmehipi kilesakāmehipi. Taṃ brāhmaṇanti taṃ khīṇāsavaṃ brāhmaṇaṃ. Akathaṃkathinti nibbicikicchaṃ. Chinnakukkuccanti vippaṭisārakukkuccassa ceva hatthapādakukkuccassa ca chinnattā chinnakukkuccaṃ. Bhavābhaveti punappunabbhave, hīnapaṇīte vā bhave, paṇīto hi bhavo vuddhippatto abhavoti vuccati. Saññāti kilesasaññā. Kilesāyeva vā idha saññānāmena vuttā, tasmā yena kāraṇena kāmehi visaṃyuttaṃ viharantaṃ taṃ loke ninnāvādiṃ khīṇāsavabrāhmaṇaṃ kilesasaññā nānusenti, tañca kāraṇaṃ ahaṃ vadāmīti ayamettha attho. Iti bhagavā attano khīṇāsavabhāvaṃ dīpeti. Nillāḷetvāti nīharitvā kīḷāpetvā. Tivisākhanti tisākhaṃ. Nalāṭikanti valibhaṅgaṃ nalāṭe tisso rājiyo dassento valibhaṅgaṃ vuṭṭhāpetvāti attho. Daṇḍamolubbhāti daṇḍaṃ uppīḷetvā. ‘‘Daṇḍamālubbhā’’tipi pāṭho, gahetvā pakkāmīti attho.
201. அஞ்ஞதரோதி நாமேன அபாகடோ ஏகோ பி⁴க்கு². ஸோ கிர அனுஸந்தி⁴குஸலோ, ப⁴க³வதா யதா² த³ண்ட³பாணீ ந ஜானாதி, ததா² மயா கதி²தந்தி வுத்தே கிந்தி நு கோ² ப⁴க³வதா அவிஞ்ஞெய்யங் கத்வா பஞ்ஹோ கதி²தோதி அனுஸந்தி⁴ங் க³ஹெத்வா த³ஸப³லங் யாசித்வா இமங் பஞ்ஹங் பி⁴க்கு²ஸங்க⁴ஸ்ஸ பாகடங் கரிஸ்ஸாமீதி உட்டா²யாஸனா ஏகங்ஸங் உத்தராஸங்க³ங் கரித்வா த³ஸனக²ஸமுஜ்ஜலங் அஞ்ஜலிங் பக்³க³ய்ஹ கிங்வாதீ³ பன, ப⁴ந்தே ப⁴க³வாதிஆதி³மாஹ.
201.Aññataroti nāmena apākaṭo eko bhikkhu. So kira anusandhikusalo, bhagavatā yathā daṇḍapāṇī na jānāti, tathā mayā kathitanti vutte kinti nu kho bhagavatā aviññeyyaṃ katvā pañho kathitoti anusandhiṃ gahetvā dasabalaṃ yācitvā imaṃ pañhaṃ bhikkhusaṅghassa pākaṭaṃ karissāmīti uṭṭhāyāsanā ekaṃsaṃ uttarāsaṅgaṃ karitvā dasanakhasamujjalaṃ añjaliṃ paggayha kiṃvādī pana, bhante bhagavātiādimāha.
யதோனிதா³னந்தி பா⁴வனபுங்ஸகங் ஏதங், யேன காரணேன யஸ்மிங் காரணே ஸதீதி அத்தோ². பபஞ்சஸஞ்ஞாஸங்கா²தி எத்த² ஸங்கா²தி கொட்டா²ஸோ. பபஞ்சஸஞ்ஞாதி தண்ஹாமானதி³ட்டி²பபஞ்சஸம்பயுத்தா ஸஞ்ஞா , ஸஞ்ஞானாமேன வா பபஞ்சாயேவ வுத்தா. தஸ்மா பபஞ்சகொட்டா²ஸாதி அயமெத்த² அத்தோ². ஸமுதா³சரந்தீதி பவத்தந்தி. எத்த² சே நத்தி² அபி⁴னந்தி³தப்³ப³ந்தி யஸ்மிங் த்³வாத³ஸாயதனஸங்கா²தே காரணே ஸதி பபஞ்சஸஞ்ஞாஸங்கா² ஸமுதா³சரந்தி, எத்த² ஏகாயதனம்பி சே அபி⁴னந்தி³தப்³ப³ங் அபி⁴வதி³தப்³ப³ங் அஜ்ஜோ²ஸிதப்³ப³ங் நத்தீ²தி அத்தோ². தத்த² அபி⁴னிந்தி³தப்³ப³ந்தி அஹங் மமந்தி அபி⁴னந்தி³தப்³ப³ங். அபி⁴வதி³தப்³ப³ந்தி அஹங் மமாதி வத்தப்³ப³ங். அஜ்ஜோ²ஸிதப்³ப³ந்தி அஜ்ஜோ²ஸித்வா கி³லித்வா பரினிட்ட²பெத்வா க³ஹேதப்³ப³யுத்தங். ஏதேனெத்த² தண்ஹாதீ³னங்யேவ அப்பவத்திங் கதே²தி. ஏஸேவந்தோதி அயங் அபி⁴னந்த³னாதீ³னங் நத்தி²பா⁴வோவ ராகா³னுஸயாதீ³னங் அந்தோ. ஏஸேவ நயோ ஸப்³ப³த்த².
Yatonidānanti bhāvanapuṃsakaṃ etaṃ, yena kāraṇena yasmiṃ kāraṇe satīti attho. Papañcasaññāsaṅkhāti ettha saṅkhāti koṭṭhāso. Papañcasaññāti taṇhāmānadiṭṭhipapañcasampayuttā saññā , saññānāmena vā papañcāyeva vuttā. Tasmā papañcakoṭṭhāsāti ayamettha attho. Samudācarantīti pavattanti. Ettha ce natthi abhinanditabbanti yasmiṃ dvādasāyatanasaṅkhāte kāraṇe sati papañcasaññāsaṅkhā samudācaranti, ettha ekāyatanampi ce abhinanditabbaṃ abhivaditabbaṃ ajjhositabbaṃ natthīti attho. Tattha abhininditabbanti ahaṃ mamanti abhinanditabbaṃ. Abhivaditabbanti ahaṃ mamāti vattabbaṃ. Ajjhositabbanti ajjhositvā gilitvā pariniṭṭhapetvā gahetabbayuttaṃ. Etenettha taṇhādīnaṃyeva appavattiṃ katheti. Esevantoti ayaṃ abhinandanādīnaṃ natthibhāvova rāgānusayādīnaṃ anto. Eseva nayo sabbattha.
த³ண்டா³தா³னாதீ³ஸு பன யாய சேதனாய த³ண்ட³ங் ஆதி³யதி, ஸா த³ண்டா³தா³னங். யாய ஸத்த²ங் ஆதி³யதி பராமஸதி, ஸா ஸத்தா²தா³னங். மத்த²கப்பத்தங் கலஹங். நானாகா³ஹமத்தங் விக்³க³ஹங். நானாவாத³மத்தங் விவாத³ங். துவங் துவந்தி ஏவங் பவத்தங் துவங் துவங். பியஸுஞ்ஞகரணங் பேஸுஞ்ஞங். அயதா²ஸபா⁴வங் முஸாவாத³ங் கரோதி, ஸா முஸாவாதோ³தி வேதி³தப்³பா³. எத்தே²தேதி எத்த² த்³வாத³ஸஸு ஆயதனேஸு ஏதே கிலேஸா. கிலேஸா ஹி உப்பஜ்ஜமானாபி த்³வாத³ஸாயதனானி நிஸ்ஸாய உப்பஜ்ஜந்தி, நிருஜ்ஜ²மானாபி த்³வாத³ஸஸு ஆயதனேஸுயேவ நிருஜ்ஜ²ந்தி. ஏவங் யத்து²ப்பன்னா, தத்தே²வ நிருத்³தா⁴ ஹொந்தி. ஸ்வாயமத்தோ² ஸமுத³யஸச்சபஞ்ஹேன தீ³பேதப்³போ³ –
Daṇḍādānādīsu pana yāya cetanāya daṇḍaṃ ādiyati, sā daṇḍādānaṃ. Yāya satthaṃ ādiyati parāmasati, sā satthādānaṃ. Matthakappattaṃ kalahaṃ. Nānāgāhamattaṃ viggahaṃ. Nānāvādamattaṃ vivādaṃ. Tuvaṃ tuvanti evaṃ pavattaṃ tuvaṃ tuvaṃ. Piyasuññakaraṇaṃ pesuññaṃ. Ayathāsabhāvaṃ musāvādaṃ karoti, sā musāvādoti veditabbā. Ettheteti ettha dvādasasu āyatanesu ete kilesā. Kilesā hi uppajjamānāpi dvādasāyatanāni nissāya uppajjanti, nirujjhamānāpi dvādasasu āyatanesuyeva nirujjhanti. Evaṃ yatthuppannā, tattheva niruddhā honti. Svāyamattho samudayasaccapañhena dīpetabbo –
‘‘ஸா கோ² பனேஸா தண்ஹா கத்த² உப்பஜ்ஜமானா உப்பஜ்ஜதி, கத்த² நிவிஸமானா நிவிஸதீ’’தி வத்வா – ‘‘யங் லோகே பியரூபங் ஸாதரூபங், எத்தே²ஸா தண்ஹா உப்பஜ்ஜமானா உப்பஜ்ஜதி, எத்த² நிவிஸமானா நிவிஸதி. கிஞ்ச லோகே பியரூபங் ஸாதரூபங்? சக்கு² லோகே பியரூபங் ஸாதரூப’’ந்திஆதி³னா (விப⁴॰ 203) நயேன த்³வாத³ஸஸுயேவ ஆயதனேஸு தஸ்ஸா உப்பத்தி ச நிரோதோ⁴ ச வுத்தோ. யதே²வ ச தண்ஹா த்³வாத³ஸஸு ஆயதனேஸு உப்பஜ்ஜித்வா நிப்³பா³னங் ஆக³ம்ம நிருத்³தா⁴பி ஆயதனேஸு புன ஸமுதா³சாரஸ்ஸ அபா⁴வதோ ஆயதனேஸுயேவ நிருத்³தா⁴தி வுத்தா, ஏவமிமேபி பாபகா அகுஸலா த⁴ம்மா ஆயதனேஸு நிருஜ்ஜ²ந்தீதி வேதி³தப்³பா³. அத² வா ய்வாயங் அபி⁴னந்த³னாதீ³னங் அபா⁴வோவ ராகா³னுஸயாதீ³னங் அந்தோதி வுத்தோ. எத்தே²தே ராகா³னுஸயாதீ³னங் அந்தோதி லத்³த⁴வோஹாரே நிப்³பா³னே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. யஞ்ஹி யத்த² நத்தி², தங் தத்த² நிருத்³த⁴ங் நாம ஹோதி, ஸ்வாயமத்தோ² நிரோத⁴பஞ்ஹேன தீ³பேதப்³போ³. வுத்தஞ்ஹேதங் ‘‘து³தியங் ஜா²னங் ஸமாபன்னஸ்ஸ விதக்கவிசாரா வசீஸங்கா²ரா படிப்பஸ்ஸத்³தா⁴ ஹொந்தீ’’திஆதி³ (படி॰ ம॰ 1.83).
‘‘Sā kho panesā taṇhā kattha uppajjamānā uppajjati, kattha nivisamānā nivisatī’’ti vatvā – ‘‘yaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Kiñca loke piyarūpaṃ sātarūpaṃ? Cakkhu loke piyarūpaṃ sātarūpa’’ntiādinā (vibha. 203) nayena dvādasasuyeva āyatanesu tassā uppatti ca nirodho ca vutto. Yatheva ca taṇhā dvādasasu āyatanesu uppajjitvā nibbānaṃ āgamma niruddhāpi āyatanesu puna samudācārassa abhāvato āyatanesuyeva niruddhāti vuttā, evamimepi pāpakā akusalā dhammā āyatanesu nirujjhantīti veditabbā. Atha vā yvāyaṃ abhinandanādīnaṃ abhāvova rāgānusayādīnaṃ antoti vutto. Etthete rāgānusayādīnaṃ antoti laddhavohāre nibbāne pāpakā akusalā dhammā aparisesā nirujjhanti. Yañhi yattha natthi, taṃ tattha niruddhaṃ nāma hoti, svāyamattho nirodhapañhena dīpetabbo. Vuttañhetaṃ ‘‘dutiyaṃ jhānaṃ samāpannassa vitakkavicārā vacīsaṅkhārā paṭippassaddhā hontī’’tiādi (paṭi. ma. 1.83).
202. ஸத்து² சேவ ஸங்வண்ணிதோதி ஸத்தா²ரா ச பஸங்ஸிதோ. விஞ்ஞூனந்தி இத³ம்பி கரணத்தே² ஸாமிவசனங், பண்டி³தேஹி ஸப்³ரஹ்மசாரீஹி ச ஸம்பா⁴விதோதி அத்தோ². பஹோதீதி ஸக்கோதி.
202.Satthu ceva saṃvaṇṇitoti satthārā ca pasaṃsito. Viññūnanti idampi karaṇatthe sāmivacanaṃ, paṇḍitehi sabrahmacārīhi ca sambhāvitoti attho. Pahotīti sakkoti.
203. அதிக்கம்மேவ மூலங் அதிக்கம்ம க²ந்த⁴ந்தி ஸாரோ நாம மூலே வா க²ந்தே⁴ வா ப⁴வெய்ய, தம்பி அதிக்கமித்வாதி அத்தோ². ஏவங்ஸம்பத³ந்தி ஏவங்ஸம்பத்திகங், ஈதி³ஸந்தி அத்தோ². அதிஸித்வாதி அதிக்கமித்வா. ஜானங் ஜானாதீதி ஜானிதப்³ப³மேவ ஜானாதி. பஸ்ஸங் பஸ்ஸதீதி பஸ்ஸிதப்³ப³மேவ பஸ்ஸதி. யதா² வா ஏகச்சோ விபரீதங் க³ண்ஹந்தோ ஜானந்தோபி ந ஜானாதி, பஸ்ஸந்தோபி ந பஸ்ஸதி, ந ஏவங் ப⁴க³வா. ப⁴க³வா பன ஜானந்தோ ஜானாதியேவ, பஸ்ஸந்தோ பஸ்ஸதியேவ. ஸ்வாயங் த³ஸ்ஸனபரிணாயகட்டே²ன சக்கு²பூ⁴தோ. விதி³தகரணட்டே²ன ஞாணபூ⁴தோ. அவிபரீதஸபா⁴வட்டே²ன பரியத்தித⁴ம்மப்பவத்தனதோ வா ஹத³யேன சிந்தெத்வா வாசாய நிச்சா²ரிதத⁴ம்மமயோதி த⁴ம்மபூ⁴தோ. ஸெட்ட²ட்டே²ன ப்³ரஹ்மபூ⁴தோ. அத² வா சக்கு² விய பூ⁴தோதி சக்கு²பூ⁴தோதி ஏவமேதேஸு பதே³ஸு அத்தோ² வேதி³தப்³போ³. ஸ்வாயங் த⁴ம்மஸ்ஸ வத்தனதோ வத்தா. பவத்தாபனதோ பவத்தா. அத்த²ங் நீஹரித்வா த³ஸ்ஸனஸமத்த²தாய அத்த²ஸ்ஸ நின்னேதா. அமதாதி⁴க³மாய படிபத்திங் த³தா³தீதி அமதஸ்ஸ தா³தா. அக³ருங் கத்வாதி புனப்புனங் ஆயாசாபெந்தோபி ஹி க³ருங் கரோதி நாம, அத்தனோ ஸாவகபாரமீஞாணே ட²த்வா ஸினேரூபாத³தோ வாலுகங் உத்³த⁴ரமானோ விய து³ப்³பி³ஞ்ஞெய்யங் கத்வா கதெ²ந்தோபி க³ருங் கரோதியேவ நாம. ஏவங் அகத்வா அம்ஹே புனப்புனங் அயாசாபெத்வா ஸுவிஞ்ஞெய்யம்பி நோ கத்வா கதே²ஹீதி வுத்தங் ஹோதி.
203.Atikkammeva mūlaṃ atikkamma khandhanti sāro nāma mūle vā khandhe vā bhaveyya, tampi atikkamitvāti attho. Evaṃsampadanti evaṃsampattikaṃ, īdisanti attho. Atisitvāti atikkamitvā. Jānaṃ jānātīti jānitabbameva jānāti. Passaṃ passatīti passitabbameva passati. Yathā vā ekacco viparītaṃ gaṇhanto jānantopi na jānāti, passantopi na passati, na evaṃ bhagavā. Bhagavā pana jānanto jānātiyeva, passanto passatiyeva. Svāyaṃ dassanapariṇāyakaṭṭhena cakkhubhūto. Viditakaraṇaṭṭhena ñāṇabhūto. Aviparītasabhāvaṭṭhena pariyattidhammappavattanato vā hadayena cintetvā vācāya nicchāritadhammamayoti dhammabhūto. Seṭṭhaṭṭhena brahmabhūto. Atha vā cakkhu viya bhūtoti cakkhubhūtoti evametesu padesu attho veditabbo. Svāyaṃ dhammassa vattanato vattā. Pavattāpanato pavattā. Atthaṃ nīharitvā dassanasamatthatāya atthassa ninnetā. Amatādhigamāya paṭipattiṃ dadātīti amatassa dātā. Agaruṃ katvāti punappunaṃ āyācāpentopi hi garuṃ karoti nāma, attano sāvakapāramīñāṇe ṭhatvā sinerūpādato vālukaṃ uddharamāno viya dubbiññeyyaṃ katvā kathentopi garuṃ karotiyeva nāma. Evaṃ akatvā amhe punappunaṃ ayācāpetvā suviññeyyampi no katvā kathehīti vuttaṃ hoti.
204. யங் கோ² நோ ஆவுஸோதி எத்த² கிஞ்சாபி ‘‘யங் கோ² வோ’’தி வத்தப்³ப³ங் ஸியா, தே பன பி⁴க்கூ² அத்தனா ஸத்³தி⁴ங் ஸங்க³ண்ஹந்தோ ‘‘யங் கோ² நோ’’தி ஆஹ. யஸ்மா வா உத்³தே³ஸோவ தேஸங் உத்³தி³ட்டோ²வ. ப⁴க³வா பன தே²ரஸ்ஸாபி தேஸம்பி ப⁴க³வாவ. தஸ்மா ப⁴க³வாதி பத³ங் ஸந்தா⁴யபி ஏவமாஹ, யங் கோ² அம்ஹாகங் ப⁴க³வா தும்ஹாகங் ஸங்கி²த்தேன உத்³தே³ஸங் உத்³தி³ஸித்வாதி அத்தோ².
204.Yaṃkho no āvusoti ettha kiñcāpi ‘‘yaṃ kho vo’’ti vattabbaṃ siyā, te pana bhikkhū attanā saddhiṃ saṅgaṇhanto ‘‘yaṃ kho no’’ti āha. Yasmā vā uddesova tesaṃ uddiṭṭhova. Bhagavā pana therassāpi tesampi bhagavāva. Tasmā bhagavāti padaṃ sandhāyapi evamāha, yaṃ kho amhākaṃ bhagavā tumhākaṃ saṃkhittena uddesaṃ uddisitvāti attho.
சக்கு²ஞ்சாவுஸோதிஆதீ³ஸு அயமத்தோ², ஆவுஸோ, நிஸ்ஸயபா⁴வேன சக்கு²பஸாத³ஞ்ச ஆரம்மணபா⁴வேன சதுஸமுட்டா²னிகரூபே ச படிச்ச சக்கு²விஞ்ஞாணங் நாம உப்பஜ்ஜதி. திண்ணங் ஸங்க³தி ப²ஸ்ஸோதி தேஸங் திண்ணங் ஸங்க³தியா ப²ஸ்ஸோ நாம உப்பஜ்ஜதி. தங் ப²ஸ்ஸங் படிச்ச ஸஹஜாதாதி³வஸேன ப²ஸ்ஸபச்சயா வேத³னா உப்பஜ்ஜதி. தாய வேத³னாய யங் ஆரம்மணங் வேதே³தி, ததே³வ ஸஞ்ஞா ஸஞ்ஜானாதி, யங் ஸஞ்ஞா ஸஞ்ஜானாதி, ததே³வ ஆரம்மணங் விதக்கோ விதக்கேதி. யங் விதக்கோ விதக்கேதி, ததே³வாரம்மணங் பபஞ்சோ பபஞ்சேதி. ததோனிதா³னந்தி ஏதேஹி சக்கு²ரூபாதீ³ஹி காரணேஹி. புரிஸங் பபஞ்சஸஞ்ஞாஸங்கா² ஸமுதா³சரந்தீதி தங் அபரிஞ்ஞாதகாரணங் புரிஸங் பபஞ்சகொட்டா²ஸா அபி⁴ப⁴வந்தி, தஸ்ஸ பவத்தந்தீதி அத்தோ². தத்த² ப²ஸ்ஸவேத³னாஸஞ்ஞா சக்கு²விஞ்ஞாணேன ஸஹஜாதா ஹொந்தி. விதக்கோ சக்கு²விஞ்ஞாணானந்தராதீ³ஸு ஸவிதக்கசித்தேஸு த³ட்ட²ப்³போ³. பபஞ்சஸங்கா² ஜவனேன ஸஹஜாதா ஹொந்தி. யதி³ ஏவங் கஸ்மா அதீதானாக³தக்³க³ஹணங் கதந்தி? ததா² உப்பஜ்ஜனதோ. யதே²வ ஹி ஏதரஹி சக்கு²த்³வாரிகோ பபஞ்சோ சக்கு²ஞ்ச ரூபே ச ப²ஸ்ஸவேத³னாஸஞ்ஞாவிதக்கே ச படிச்ச உப்பன்னோ, ஏவமேவங் அதீதானாக³தேஸுபி சக்கு²விஞ்ஞெய்யேஸு ரூபேஸு தஸ்ஸுப்பத்திங் த³ஸ்ஸெந்தோ ஏவமாஹ.
Cakkhuñcāvusotiādīsu ayamattho, āvuso, nissayabhāvena cakkhupasādañca ārammaṇabhāvena catusamuṭṭhānikarūpe ca paṭicca cakkhuviññāṇaṃ nāma uppajjati. Tiṇṇaṃ saṅgati phassoti tesaṃ tiṇṇaṃ saṅgatiyā phasso nāma uppajjati. Taṃ phassaṃ paṭicca sahajātādivasena phassapaccayā vedanā uppajjati. Tāya vedanāya yaṃ ārammaṇaṃ vedeti, tadeva saññā sañjānāti, yaṃ saññā sañjānāti, tadeva ārammaṇaṃ vitakko vitakketi. Yaṃ vitakko vitakketi, tadevārammaṇaṃ papañco papañceti. Tatonidānanti etehi cakkhurūpādīhi kāraṇehi. Purisaṃ papañcasaññāsaṅkhā samudācarantīti taṃ apariññātakāraṇaṃ purisaṃ papañcakoṭṭhāsā abhibhavanti, tassa pavattantīti attho. Tattha phassavedanāsaññā cakkhuviññāṇena sahajātā honti. Vitakko cakkhuviññāṇānantarādīsu savitakkacittesu daṭṭhabbo. Papañcasaṅkhā javanena sahajātā honti. Yadi evaṃ kasmā atītānāgataggahaṇaṃ katanti? Tathā uppajjanato. Yatheva hi etarahi cakkhudvāriko papañco cakkhuñca rūpe ca phassavedanāsaññāvitakke ca paṭicca uppanno, evamevaṃ atītānāgatesupi cakkhuviññeyyesu rūpesu tassuppattiṃ dassento evamāha.
ஸோதஞ்சாவுஸோதிஆதீ³ஸுபி ஏஸேவ நயோ. ச²ட்ட²த்³வாரே பன மனந்தி ப⁴வங்க³சித்தங். த⁴ம்மேதி தேபூ⁴மகத⁴ம்மாரம்மணங். மனோவிஞ்ஞாணந்தி ஆவஜ்ஜனங் வா ஜவனங் வா. ஆவஜ்ஜனே க³ஹிதே ப²ஸ்ஸவேத³னாஸஞ்ஞாவிதக்கா ஆவஜ்ஜனஸஹஜாதா ஹொந்தி. பபஞ்சோ ஜவனஸஹஜாதோ. ஜவனே க³ஹிதே ஸஹாவஜ்ஜனகங் ப⁴வங்க³ மனோ நாம ஹோதி, ததோ ப²ஸ்ஸாத³யோ ஸப்³பே³பி ஜவனேன ஸஹஜாதாவ. மனொத்³வாரே பன யஸ்மா அதீதாதி³பே⁴த³ங் ஸப்³ப³ம்பி ஆரம்மணங் ஹோதி, தஸ்மா அதீதானாக³தபச்சுப்பன்னேஸூதி இத³ங் யுத்தமேவ.
Sotañcāvusotiādīsupi eseva nayo. Chaṭṭhadvāre pana mananti bhavaṅgacittaṃ. Dhammeti tebhūmakadhammārammaṇaṃ. Manoviññāṇanti āvajjanaṃ vā javanaṃ vā. Āvajjane gahite phassavedanāsaññāvitakkā āvajjanasahajātā honti. Papañco javanasahajāto. Javane gahite sahāvajjanakaṃ bhavaṅga mano nāma hoti, tato phassādayo sabbepi javanena sahajātāva. Manodvāre pana yasmā atītādibhedaṃ sabbampi ārammaṇaṃ hoti, tasmā atītānāgatapaccuppannesūti idaṃ yuttameva.
இதா³னி வட்டங் த³ஸ்ஸெந்தோ ஸோ வதாவுஸோதி தே³ஸனங் ஆரபி⁴. ப²ஸ்ஸபஞ்ஞத்திங் பஞ்ஞபெஸ்ஸதீதி ப²ஸ்ஸோ நாம ஏகோ த⁴ம்மோ உப்பஜ்ஜதீதி ஏவங் ப²ஸ்ஸபஞ்ஞத்திங் பஞ்ஞபெஸ்ஸதி, த³ஸ்ஸெஸ்ஸதீதி அத்தோ². ஏஸ நயோ ஸப்³ப³த்த². ஏவங் இமஸ்மிங் ஸதி இத³ங் ஹோதீதி த்³வாத³ஸாயதனவஸேன ஸகலங் வட்டங் த³ஸ்ஸெத்வா இதா³னி த்³வாத³ஸாயதனபடிக்கே²பவஸேன விவட்டங் த³ஸ்ஸெந்தோ ஸோ வதாவுஸோ சக்கு²ஸ்மிங் அஸதீதி தே³ஸனங் ஆரபி⁴. தத்த² வுத்தனயேனேவ அத்தோ² வேதி³தப்³போ³.
Idāni vaṭṭaṃ dassento so vatāvusoti desanaṃ ārabhi. Phassapaññattiṃ paññapessatīti phasso nāma eko dhammo uppajjatīti evaṃ phassapaññattiṃ paññapessati, dassessatīti attho. Esa nayo sabbattha. Evaṃ imasmiṃ sati idaṃ hotīti dvādasāyatanavasena sakalaṃ vaṭṭaṃ dassetvā idāni dvādasāyatanapaṭikkhepavasena vivaṭṭaṃ dassento so vatāvuso cakkhusmiṃasatīti desanaṃ ārabhi. Tattha vuttanayeneva attho veditabbo.
ஏவங் பஞ்ஹங் விஸ்ஸஜ்ஜெத்வா இதா³னி ஸாவகேன பஞ்ஹோ கதி²தோதி மா நிக்கங்கா² அஹுவத்த², அயங் ப⁴க³வா ஸப்³ப³ஞ்ஞுதஞாணதுலங் க³ஹெத்வா நிஸின்னோ, இச்ச²மானா தமேவ உபஸங்கமித்வா நிக்கங்கா² ஹோதா²தி உய்யோஜெந்தோ ஆகங்க²மானா ச பனாதிஆதி³மாஹ.
Evaṃ pañhaṃ vissajjetvā idāni sāvakena pañho kathitoti mā nikkaṅkhā ahuvattha, ayaṃ bhagavā sabbaññutañāṇatulaṃ gahetvā nisinno, icchamānā tameva upasaṅkamitvā nikkaṅkhā hothāti uyyojento ākaṅkhamānā ca panātiādimāha.
205. இமேஹி ஆகாரேஹீதி இமேஹி காரணேஹி பபஞ்சுப்பத்தியா பாடியேக்ககாரணேஹி சேவ வட்டவிவட்டகாரணேஹி ச. இமேஹி பதே³ஹீதி இமேஹி அக்க²ரஸம்பிண்ட³னேஹி. ப்³யஞ்ஜனேஹீதி பாடியேக்கஅக்க²ரேஹி. பண்டி³தோதி பண்டி³ச்சேன ஸமன்னாக³தோ. சதூஹி வா காரணேஹி பண்டி³தோ தா⁴துகுஸலோ ஆயதனகுஸலோ பச்சயாகாரகுஸலோ காரணாகாரணகுஸலோதி. மஹாபஞ்ஞோதி மஹந்தே அத்தே² மஹந்தே த⁴ம்மே மஹந்தா நிருத்தியோ மஹந்தானி படிபா⁴னானி பரிக்³க³ஹணஸமத்தா²ய மஹாபஞ்ஞாய ஸமன்னாக³தோ. யதா² தங் மஹாகச்சானேனாதி யதா² மஹாகச்சானேன ப்³யாகதங், தங் ஸந்தா⁴ய தந்தி வுத்தங். யதா² மஹாகச்சானேன ப்³யாகதங், அஹம்பி தங் ஏவமேவங் ப்³யாகரெய்யெந்தி அத்தோ².
205.Imehi ākārehīti imehi kāraṇehi papañcuppattiyā pāṭiyekkakāraṇehi ceva vaṭṭavivaṭṭakāraṇehi ca. Imehi padehīti imehi akkharasampiṇḍanehi. Byañjanehīti pāṭiyekkaakkharehi. Paṇḍitoti paṇḍiccena samannāgato. Catūhi vā kāraṇehi paṇḍito dhātukusalo āyatanakusalo paccayākārakusalo kāraṇākāraṇakusaloti. Mahāpaññoti mahante atthe mahante dhamme mahantā niruttiyo mahantāni paṭibhānāni pariggahaṇasamatthāya mahāpaññāya samannāgato. Yathā taṃ mahākaccānenāti yathā mahākaccānena byākataṃ, taṃ sandhāya tanti vuttaṃ. Yathā mahākaccānena byākataṃ, ahampi taṃ evamevaṃ byākareyyenti attho.
மது⁴பிண்டி³கந்தி மஹந்தங் கு³ளபூவங் ப³த்³த⁴ஸத்துகு³ளகங் வா. அஸேசனகந்தி அஸேசிதப்³ப³கங். ஸப்பிபா²ணிதமது⁴ஸக்கராதீ³ஸு இத³ங் நாமெத்த² மந்த³ங் இத³ங் ப³ஹுகந்தி ந வத்தப்³ப³ங் ஸமயோஜிதரஸங். சேதஸோதி சிந்தகஜாதிகோ. த³ப்³ப³ஜாதிகோதி பண்டி³தஸபா⁴வோ. கோ நாமோ அயந்தி இத³ங் தே²ரோ அதிப⁴த்³த³கோ அயங் த⁴ம்மபரியாயோ, த³ஸப³லஸ்ஸ ஸப்³ப³ஞ்ஞுதஞ்ஞாணேனேவஸ்ஸ நாமங் க³ண்ஹாபெஸ்ஸாமீதி சிந்தெத்வா ஆஹ. தஸ்மாதி யஸ்மா மது⁴பிண்டி³கோ விய மது⁴ரோ, தஸ்மா மது⁴பிண்டி³கபரியாயொத்வேவ நங் தா⁴ரேஹீதி வத³தி. ஸேஸங் ஸப்³ப³த்த² உத்தானத்த²மேவாதி.
Madhupiṇḍikanti mahantaṃ guḷapūvaṃ baddhasattuguḷakaṃ vā. Asecanakanti asecitabbakaṃ. Sappiphāṇitamadhusakkarādīsu idaṃ nāmettha mandaṃ idaṃ bahukanti na vattabbaṃ samayojitarasaṃ. Cetasoti cintakajātiko. Dabbajātikoti paṇḍitasabhāvo. Ko nāmo ayanti idaṃ thero atibhaddako ayaṃ dhammapariyāyo, dasabalassa sabbaññutaññāṇenevassa nāmaṃ gaṇhāpessāmīti cintetvā āha. Tasmāti yasmā madhupiṇḍiko viya madhuro, tasmā madhupiṇḍikapariyāyotveva naṃ dhārehīti vadati. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மது⁴பிண்டி³கஸுத்தவண்ணனா நிட்டி²தா.
Madhupiṇḍikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. மது⁴பிண்டி³கஸுத்தங் • 8. Madhupiṇḍikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. மது⁴பிண்டி³கஸுத்தவண்ணனா • 8. Madhupiṇḍikasuttavaṇṇanā
