| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. மது⁴ரஸுத்தவண்ணனா
4. Madhurasuttavaṇṇanā
317. ஏவங் மே ஸுதந்தி மது⁴ரஸுத்தங். தத்த² மஹாகச்சானோதி கி³ஹிகாலே உஜ்ஜேனிகரஞ்ஞோ புரோஹிதபுத்தோ அபி⁴ரூபோ த³ஸ்ஸனீயோ பாஸாதி³கோ ஸுவண்ணவண்ணோ ச. மது⁴ராயந்தி ஏவங்னாமகே நக³ரே. கு³ந்தா³வனேதி கண்ஹககு³ந்தா³வனே . அவந்திபுத்தோதி அவந்திரட்டே² ரஞ்ஞோ தீ⁴தாய புத்தோ. வுத்³தோ⁴ சேவ அரஹா சாதி த³ஹரங் அரஹந்தம்பி ந ததா² ஸம்பா⁴வெந்தி யதா² மஹல்லகங், தே²ரோ பன வுத்³தோ⁴ சேவ அஹோஸி அரஹா ச. ப்³ராஹ்மணா, போ⁴ கச்சானாதி ஸோ கிர ராஜா ப்³ராஹ்மணலத்³தி⁴கோ, தஸ்மா ஏவமாஹ. ப்³ராஹ்மணோவ ஸெட்டோ² வண்ணோதிஆதீ³ஸு ஜாதிகொ³த்தாதீ³னங் பஞ்ஞாபனட்டா²னே ப்³ராஹ்மணாவ ஸெட்டா²தி த³ஸ்ஸேதி. ஹீனோ அஞ்ஞோ வண்ணோதி இதரே தயோ வண்ணா ஹீனா லாமகாதி வத³தி. ஸுக்கோதி பண்ட³ரோ. கண்ஹோதி காளகோ. ஸுஜ்ஜ²ந்தீதி ஜாதிகொ³த்தாதி³பஞ்ஞாபனட்டா²னேஸு ஸுஜ்ஜ²ந்தி. ப்³ரஹ்முனோ புத்தாதி மஹாப்³ரஹ்முனோ புத்தா. ஓரஸா முக²தோ ஜாதாதி உரே வஸித்வா முக²தோ நிக்க²ந்தா, உரே கத்வா ஸங்வத்³தி⁴தாதி வா ஓரஸா. ப்³ரஹ்மஜாதி ப்³ரஹ்மதோ நிப்³ப³த்தா. ப்³ரஹ்மனிம்மிதாதி ப்³ரஹ்முனா நிம்மிதா. ப்³ரஹ்மதா³யாதா³தி ப்³ரஹ்முனோ தா³யாதா³. கோ⁴ஸோயேவ கோ² ஏஸோதி வோஹாரமத்தமேவேதங்.
317.Evaṃme sutanti madhurasuttaṃ. Tattha mahākaccānoti gihikāle ujjenikarañño purohitaputto abhirūpo dassanīyo pāsādiko suvaṇṇavaṇṇo ca. Madhurāyanti evaṃnāmake nagare. Gundāvaneti kaṇhakagundāvane . Avantiputtoti avantiraṭṭhe rañño dhītāya putto. Vuddho ceva arahā cāti daharaṃ arahantampi na tathā sambhāventi yathā mahallakaṃ, thero pana vuddho ceva ahosi arahā ca. Brāhmaṇā, bho kaccānāti so kira rājā brāhmaṇaladdhiko, tasmā evamāha. Brāhmaṇova seṭṭho vaṇṇotiādīsu jātigottādīnaṃ paññāpanaṭṭhāne brāhmaṇāva seṭṭhāti dasseti. Hīno añño vaṇṇoti itare tayo vaṇṇā hīnā lāmakāti vadati. Sukkoti paṇḍaro. Kaṇhoti kāḷako. Sujjhantīti jātigottādipaññāpanaṭṭhānesu sujjhanti. Brahmuno puttāti mahābrahmuno puttā. Orasā mukhato jātāti ure vasitvā mukhato nikkhantā, ure katvā saṃvaddhitāti vā orasā. Brahmajāti brahmato nibbattā. Brahmanimmitāti brahmunā nimmitā. Brahmadāyādāti brahmuno dāyādā. Ghosoyeva kho esoti vohāramattamevetaṃ.
318. இஜ்ஜெ²ய்யாதி ஸமிஜ்ஜெ²ய்ய, யத்தகானி த⁴னாதீ³னி பத்தெ²ய்ய, தத்தகேஹிஸ்ஸ மனோரதோ² பூரெய்யாதி அத்தோ². க²த்தியோபிஸ்ஸாஸ்ஸாதி க²த்தியோபி அஸ்ஸ இஸ்ஸரியஸம்பத்தஸ்ஸ புப்³பு³ட்டா²யீ அஸ்ஸ. நேஸங் எத்த² கிஞ்சீதி ந ஏதேஸங் எத்த² கிஞ்சி.
318.Ijjheyyāti samijjheyya, yattakāni dhanādīni pattheyya, tattakehissa manoratho pūreyyāti attho. Khattiyopissāssāti khattiyopi assa issariyasampattassa pubbuṭṭhāyī assa. Nesaṃ ettha kiñcīti na etesaṃ ettha kiñci.
322. ஆஸனேன வா நிமந்தெய்யாமாதி நிஸின்னாஸனங் பப்போ²டெத்வா இத⁴ நிஸீதா³தி வதெ³ய்யாம. அபி⁴னிமந்தெய்யாமபி நந்தி அபி⁴ஹரித்வா தங் நிமந்தெய்யாம. தத்த² து³விதோ⁴ அபி⁴ஹாரோ வாசாய சேவ காயேன ச. ‘‘தும்ஹாகங் இச்சி²திச்சி²தக்க²ணே மமங் சீவராதீ³ஹி வதெ³ய்யாத² யேனத்தோ²’’தி வத³ந்தோ ஹி வாசாய அபி⁴ஹரித்வா நிமந்தேதி நாம. சீவராதி³வேகல்லங் ஸல்லக்கெ²த்வா ‘‘இத³ங் க³ண்ஹதா²’’தி தானி தெ³ந்தோ பன காயேன அபி⁴ஹரித்வா நிமந்தேதி நாம. தது³ப⁴யம்பி ஸந்தா⁴ய ‘‘அபி⁴னிமந்தெய்யாமபி ந’’ந்தி ஆஹ. ரக்கா²வரணகு³த்திந்தி ரக்கா²ஸங்கா²தஞ்சேவ ஆவரணஸங்கா²தஞ்ச கு³த்திங். யா பனேஸா ஆவுத⁴ஹத்தே² புரிஸே ட²பெந்தேன ரக்கா², ஸா த⁴ம்மிகா நாம ஸங்விஹிதா ந ஹோதி. யதா² பன அவேலாய கட்ட²ஹாரிகாபண்ணஹாரிகாத³யோ விஹாரங் ந பவிஸந்தி, மிக³லுத்³த³காத³யோ விஹாரஸீமாய மிகே³ வா மச்சே² வா ந க³ண்ஹந்தி, ஏவங் ஸங்வித³ஹந்தேன த⁴ம்மிகா நாம ஸங்விஹிதா ஹோதி. தங் ஸந்தா⁴யாஹ ‘‘த⁴ம்மிக’’ந்தி.
322.Āsanena vā nimanteyyāmāti nisinnāsanaṃ papphoṭetvā idha nisīdāti vadeyyāma. Abhinimanteyyāmapi nanti abhiharitvā taṃ nimanteyyāma. Tattha duvidho abhihāro vācāya ceva kāyena ca. ‘‘Tumhākaṃ icchiticchitakkhaṇe mamaṃ cīvarādīhi vadeyyātha yenattho’’ti vadanto hi vācāya abhiharitvā nimanteti nāma. Cīvarādivekallaṃ sallakkhetvā ‘‘idaṃ gaṇhathā’’ti tāni dento pana kāyena abhiharitvā nimanteti nāma. Tadubhayampi sandhāya ‘‘abhinimanteyyāmapi na’’nti āha. Rakkhāvaraṇaguttinti rakkhāsaṅkhātañceva āvaraṇasaṅkhātañca guttiṃ. Yā panesā āvudhahatthe purise ṭhapentena rakkhā, sā dhammikā nāma saṃvihitā na hoti. Yathā pana avelāya kaṭṭhahārikāpaṇṇahārikādayo vihāraṃ na pavisanti, migaluddakādayo vihārasīmāya mige vā macche vā na gaṇhanti, evaṃ saṃvidahantena dhammikā nāma saṃvihitā hoti. Taṃ sandhāyāha ‘‘dhammika’’nti.
ஏவங் ஸந்தேதி ஏவங் சதுன்னம்பி வண்ணானங் பப்³ப³ஜிதானங் பப்³ப³ஜிதஸக்காரேன ஸமே ஸமானே. ஸேஸங் ஸப்³ப³த்த² உத்தானமேவாதி.
Evaṃsanteti evaṃ catunnampi vaṇṇānaṃ pabbajitānaṃ pabbajitasakkārena same samāne. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மது⁴ரஸுத்தவண்ணனா நிட்டி²தா.
Madhurasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. மது⁴ரஸுத்தங் • 4. Madhurasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. மது⁴ரஸுத்தவண்ணனா • 4. Madhurasuttavaṇṇanā
