| Library / Tipiṭaka / તિપિટક • Tipiṭaka / પઞ્ચપકરણ-અટ્ઠકથા • Pañcapakaraṇa-aṭṭhakathā |
૧૮. મગ્ગપચ્ચયનિદ્દેસવણ્ણના
18. Maggapaccayaniddesavaṇṇanā
૧૮. મગ્ગપચ્ચયનિદ્દેસે મગ્ગઙ્ગાનીતિ અહેતુકચિત્તુપ્પાદવજ્જેસુ સેસચિત્તેસુ ઉપ્પન્નાનિ પઞ્ઞા, વિતક્કો, સમ્માવાચાકમ્મન્તાજીવા, વીરિયં, સતિ, સમાધિ, મિચ્છાદિટ્ઠિ, મિચ્છાવાચાકમ્મન્તાજીવાતિ ઇમાનિ દ્વાદસઙ્ગાનિ. મગ્ગસ્સ પન હેતુપચ્છિમકત્તા અહેતુકચિત્તેસુ મગ્ગઙ્ગાનિ ન ઉદ્ધટાનિ. તંસમુટ્ઠાનાનન્તિ ઇધાપિ કટત્તારૂપં સઙ્ગહિતમેવ. વુત્તઞ્હેતં પઞ્હાવારે – ‘‘પટિસન્ધિક્ખણે વિપાકાબ્યાકતાનિ મગ્ગઙ્ગાનિ સમ્પયુત્તકાનં ખન્ધાનં કટત્તા ચ રૂપાનં મગ્ગપચ્ચયેન પચ્ચયો’’તિ. અયં તાવેત્થ પાળિવણ્ણના.
18. Maggapaccayaniddese maggaṅgānīti ahetukacittuppādavajjesu sesacittesu uppannāni paññā, vitakko, sammāvācākammantājīvā, vīriyaṃ, sati, samādhi, micchādiṭṭhi, micchāvācākammantājīvāti imāni dvādasaṅgāni. Maggassa pana hetupacchimakattā ahetukacittesu maggaṅgāni na uddhaṭāni. Taṃsamuṭṭhānānanti idhāpi kaṭattārūpaṃ saṅgahitameva. Vuttañhetaṃ pañhāvāre – ‘‘paṭisandhikkhaṇe vipākābyākatāni maggaṅgāni sampayuttakānaṃ khandhānaṃ kaṭattā ca rūpānaṃ maggapaccayena paccayo’’ti. Ayaṃ tāvettha pāḷivaṇṇanā.
અયં પન મગ્ગપચ્ચયો દ્વાદસન્નં મગ્ગઙ્ગાનં વસેન ઠિતોપિ જાતિભેદતો કુસલાદિવસેન ચતુધા, કુસલાદીનઞ્ચ કામાવચરાદિભૂમિભેદતો દ્વાદસધા ભિજ્જતીતિ એવમેત્થ નાનપ્પકારભેદતો વિઞ્ઞાતબ્બો વિનિચ્છયો . એવં ભિન્ને પનેત્થ ચતુભૂમકમ્પિ કુસલમગ્ગઙ્ગં પઞ્ચવોકારે સમ્પયુત્તધમ્માનઞ્ચેવ ચિત્તસમુટ્ઠાનરૂપસ્સ ચ, ઠપેત્વા રૂપાવચરં અવસેસં આરુપ્પે સમ્પયુત્તધમ્માનઞ્ઞેવ મગ્ગપચ્ચયેન પચ્ચયોતિ સબ્બં ઝાનપચ્ચયે વિય વિત્થારેતબ્બન્તિ એવમેત્થ પચ્ચયુપ્પન્નતોપિ વિઞ્ઞાતબ્બો વિનિચ્છયોતિ.
Ayaṃ pana maggapaccayo dvādasannaṃ maggaṅgānaṃ vasena ṭhitopi jātibhedato kusalādivasena catudhā, kusalādīnañca kāmāvacarādibhūmibhedato dvādasadhā bhijjatīti evamettha nānappakārabhedato viññātabbo vinicchayo . Evaṃ bhinne panettha catubhūmakampi kusalamaggaṅgaṃ pañcavokāre sampayuttadhammānañceva cittasamuṭṭhānarūpassa ca, ṭhapetvā rūpāvacaraṃ avasesaṃ āruppe sampayuttadhammānaññeva maggapaccayena paccayoti sabbaṃ jhānapaccaye viya vitthāretabbanti evamettha paccayuppannatopi viññātabbo vinicchayoti.
મગ્ગપચ્ચયનિદ્દેસવણ્ણના.
Maggapaccayaniddesavaṇṇanā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / પટ્ઠાનપાળિ • Paṭṭhānapāḷi / (૨) પચ્ચયનિદ્દેસો • (2) Paccayaniddeso
