| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. மஹாஅஸ்ஸபுரஸுத்தவண்ணனா
9. Mahāassapurasuttavaṇṇanā
415. ஏவங் மே ஸுதந்தி மஹாஅஸ்ஸபுரஸுத்தங். தத்த² அங்கே³ஸூதி அங்கா³ நாம ஜானபதி³னோ ராஜகுமாரா, தேஸங் நிவாஸோ ஏகோபி ஜனபதோ³ ருள்ஹீஸத்³தே³ன ‘‘அங்கா³’’தி வுச்சதி, தஸ்மிங் அங்கே³ஸு ஜனபதே³. அஸ்ஸபுரங் நாம அங்கா³னங் நிக³மோதி அஸ்ஸபுரந்தி நக³ரனாமேன லத்³த⁴வோஹாரோ அங்கா³னங் ஜனபத³ஸ்ஸ ஏகோ நிக³மோ, தங் கோ³சரகா³மங் கத்வா விஹரதீதி அத்தோ². ப⁴க³வா ஏதத³வோசாதி ஏதங் ‘‘ஸமணா ஸமணாதி வோ, பி⁴க்க²வே, ஜனோ ஸஞ்ஜானாதீ’’திஆதி³வசனமவோச.
415.Evaṃme sutanti mahāassapurasuttaṃ. Tattha aṅgesūti aṅgā nāma jānapadino rājakumārā, tesaṃ nivāso ekopi janapado ruḷhīsaddena ‘‘aṅgā’’ti vuccati, tasmiṃ aṅgesu janapade. Assapuraṃ nāma aṅgānaṃ nigamoti assapuranti nagaranāmena laddhavohāro aṅgānaṃ janapadassa eko nigamo, taṃ gocaragāmaṃ katvā viharatīti attho. Bhagavā etadavocāti etaṃ ‘‘samaṇā samaṇāti vo, bhikkhave, jano sañjānātī’’tiādivacanamavoca.
கஸ்மா பன ஏவங் அவோசாதி. தஸ்மிங் கிர நிக³மே மனுஸ்ஸா ஸத்³தா⁴ பஸன்னா பு³த்³த⁴மாமகா த⁴ம்மமாமகா ஸங்க⁴மாமகா, தத³ஹுபப்³ப³ஜிதஸாமணேரம்பி வஸ்ஸஸதிகத்தே²ரஸதி³ஸங் கத்வா பஸங்ஸந்தி; புப்³ப³ண்ஹஸமயங் பி⁴க்கு²ஸங்க⁴ங் பிண்டா³ய பவிஸந்தங் தி³ஸ்வா பீ³ஜனங்க³லாதீ³னி க³ஹெத்வா கெ²த்தங் க³ச்ச²ந்தாபி, ப²ரஸுஆதீ³னி க³ஹெத்வா அரஞ்ஞங் பவிஸந்தாபி தானி உபகரணானி நிக்கி²பித்வா பி⁴க்கு²ஸங்க⁴ஸ்ஸ நிஸீத³னட்டா²னங் ஆஸனஸாலங் வா மண்ட³பங் வா ருக்க²மூலங் வா ஸம்மஜ்ஜித்வா ஆஸனானி பஞ்ஞபெத்வா அரஜபானீயங் பச்சுபட்டா²பெத்வா பி⁴க்கு²ஸங்க⁴ங் நிஸீதா³பெத்வா யாகு³க²ஜ்ஜகாதீ³னி த³த்வா கதப⁴த்தகிச்சங் பி⁴க்கு²ஸங்க⁴ங் உய்யோஜெத்வா ததோ தானி உபகரணானி ஆதா³ய கெ²த்தங் வா அரஞ்ஞங் வா க³ந்த்வா அத்தனோ கம்மானி கரொந்தி, கம்மந்தட்டா²னேபி நேஸங் அஞ்ஞா கதா² நாம நத்தி². சத்தாரோ மக்³க³ட்டா² சத்தாரோ ப²லட்டா²தி அட்ட² புக்³க³லா அரியஸங்கோ⁴ நாம; தே ‘‘ஏவரூபேன ஸீலேன, ஏவரூபேன ஆசாரேன, ஏவரூபாய படிபத்தியா ஸமன்னாக³தா லஜ்ஜினோ பேஸலா உளாரகு³ணா’’தி பி⁴க்கு²ஸங்க⁴ஸ்ஸேவ வண்ணங் கதெ²ந்தி. கம்மந்தட்டா²னதோ ஆக³ந்த்வா பு⁴த்தஸாயமாஸா க⁴ரத்³வாரே நிஸின்னாபி, ஸயனிக⁴ரங் பவிஸித்வா நிஸின்னாபி பி⁴க்கு²ஸங்க⁴ஸ்ஸேவ வண்ணங் கதெ²ந்தி. ப⁴க³வா தேஸங் மனுஸ்ஸானங் நிபச்சகாரங் தி³ஸ்வா பி⁴க்கு²ஸங்க⁴ங் பிண்ட³பாதாபசாயனே நியோஜெத்வா ஏதத³வோச.
Kasmā pana evaṃ avocāti. Tasmiṃ kira nigame manussā saddhā pasannā buddhamāmakā dhammamāmakā saṅghamāmakā, tadahupabbajitasāmaṇerampi vassasatikattherasadisaṃ katvā pasaṃsanti; pubbaṇhasamayaṃ bhikkhusaṅghaṃ piṇḍāya pavisantaṃ disvā bījanaṅgalādīni gahetvā khettaṃ gacchantāpi, pharasuādīni gahetvā araññaṃ pavisantāpi tāni upakaraṇāni nikkhipitvā bhikkhusaṅghassa nisīdanaṭṭhānaṃ āsanasālaṃ vā maṇḍapaṃ vā rukkhamūlaṃ vā sammajjitvā āsanāni paññapetvā arajapānīyaṃ paccupaṭṭhāpetvā bhikkhusaṅghaṃ nisīdāpetvā yāgukhajjakādīni datvā katabhattakiccaṃ bhikkhusaṅghaṃ uyyojetvā tato tāni upakaraṇāni ādāya khettaṃ vā araññaṃ vā gantvā attano kammāni karonti, kammantaṭṭhānepi nesaṃ aññā kathā nāma natthi. Cattāro maggaṭṭhā cattāro phalaṭṭhāti aṭṭha puggalā ariyasaṅgho nāma; te ‘‘evarūpena sīlena, evarūpena ācārena, evarūpāya paṭipattiyā samannāgatā lajjino pesalā uḷāraguṇā’’ti bhikkhusaṅghasseva vaṇṇaṃ kathenti. Kammantaṭṭhānato āgantvā bhuttasāyamāsā gharadvāre nisinnāpi, sayanigharaṃ pavisitvā nisinnāpi bhikkhusaṅghasseva vaṇṇaṃ kathenti. Bhagavā tesaṃ manussānaṃ nipaccakāraṃ disvā bhikkhusaṅghaṃ piṇḍapātāpacāyane niyojetvā etadavoca.
யே த⁴ம்மா ஸமணகரணா ச ப்³ராஹ்மணகரணா சாதி யே த⁴ம்மா ஸமாதா³ய பரிபூரிதா ஸமிதபாபஸமணஞ்ச பா³ஹிதபாபப்³ராஹ்மணஞ்ச கரொந்தீதி அத்தோ². ‘‘தீணிமானி, பி⁴க்க²வே, ஸமணஸ்ஸ ஸமணியானி ஸமணகரணீயானி . கதமானி தீணி? அதி⁴ஸீலஸிக்கா²ஸமாதா³னங், அதி⁴சித்தஸிக்கா²ஸமாதா³னங் , அதி⁴பஞ்ஞாஸிக்கா²ஸமாதா³ன’’ந்தி (அ॰ நி॰ 3.82) எத்த² பன ஸமணேன கத்தப்³ப³த⁴ம்மா வுத்தா. தேபி ச ஸமணகரணா ஹொந்தியேவ. இத⁴ பன ஹிரொத்தப்பாதி³வஸேன தே³ஸனா வித்தா²ரிதா. ஏவங் நோ அயங் அம்ஹாகந்தி எத்த² நோதி நிபாதமத்தங். ஏவங் அயங் அம்ஹாகந்தி அத்தோ². மஹப்ப²லா மஹானிஸங்ஸாதி உப⁴யம்பி அத்த²தோ ஏகமேவ. அவஞ்ஜா²தி அமோகா⁴. ஸப²லாதி அயங் தஸ்ஸேவ அத்தோ². யஸ்ஸா ஹி ப²லங் நத்தி², ஸா வஞ்ஜா² நாம ஹோதி. ஸஉத்³ரயாதி ஸவட்³டி⁴, இத³ங் ஸப²லதாய வேவசனங். ஏவஞ்ஹி வோ, பி⁴க்க²வே, ஸிக்கி²தப்³ப³ந்தி, பி⁴க்க²வே, ஏவங் தும்ஹேஹி ஸிக்கி²தப்³ப³ங். இதி ப⁴க³வா இமினா எத்தகேன டா²னேன ஹிரொத்தப்பாதீ³னங் த⁴ம்மானங் வண்ணங் கதே²ஸி. கஸ்மா? வசனபத²பச்சி²ந்த³னத்த²ங். ஸசே ஹி கோசி அசிரபப்³ப³ஜிதோ பா³லபி⁴க்கு² ஏவங் வதெ³ய்ய – ‘‘ப⁴க³வா ஹிரொத்தப்பாதி³த⁴ம்மே ஸமாதா³ய வத்ததா²தி வத³தி, கோ நு கோ² தேஸங் ஸமாதா³ய வத்தனே ஆனிஸங்ஸோ’’தி? தஸ்ஸ வசனபத²பச்சி²ந்த³னத்த²ங். அயஞ்ச ஆனிஸங்ஸோ, இமே ஹி த⁴ம்மா ஸமாதா³ய பரிபூரிதா ஸமிதபாபஸமணங் நாம பா³ஹிதபாபப்³ராஹ்மணங் நாம கரொந்தி, சதுபச்சயலாப⁴ங் உப்பாதெ³ந்தி, பச்சயதா³யகானங் மஹப்ப²லதங் ஸம்பாதெ³ந்தி, பப்³ப³ஜ்ஜங் அவஞ்ஜ²ங் ஸப²லங் ஸஉத்³ரயங் கரொந்தீதி வண்ணங் அபா⁴ஸி. அயமெத்த² ஸங்கே²போ. வித்தா²ரதோ பன வண்ணகதா² ஸதிபட்டா²னே (தீ³॰ நி॰ அட்ட²॰ 2.373; ம॰ நி॰ அட்ட²॰ 2.373) வுத்தனயேனேவ வேதி³தப்³பா³.
Ye dhammā samaṇakaraṇā ca brāhmaṇakaraṇā cāti ye dhammā samādāya paripūritā samitapāpasamaṇañca bāhitapāpabrāhmaṇañca karontīti attho. ‘‘Tīṇimāni, bhikkhave, samaṇassa samaṇiyāni samaṇakaraṇīyāni . Katamāni tīṇi? Adhisīlasikkhāsamādānaṃ, adhicittasikkhāsamādānaṃ , adhipaññāsikkhāsamādāna’’nti (a. ni. 3.82) ettha pana samaṇena kattabbadhammā vuttā. Tepi ca samaṇakaraṇā hontiyeva. Idha pana hirottappādivasena desanā vitthāritā. Evaṃ no ayaṃ amhākanti ettha noti nipātamattaṃ. Evaṃ ayaṃ amhākanti attho. Mahapphalā mahānisaṃsāti ubhayampi atthato ekameva. Avañjhāti amoghā. Saphalāti ayaṃ tasseva attho. Yassā hi phalaṃ natthi, sā vañjhā nāma hoti. Saudrayāti savaḍḍhi, idaṃ saphalatāya vevacanaṃ. Evañhi vo, bhikkhave, sikkhitabbanti, bhikkhave, evaṃ tumhehi sikkhitabbaṃ. Iti bhagavā iminā ettakena ṭhānena hirottappādīnaṃ dhammānaṃ vaṇṇaṃ kathesi. Kasmā? Vacanapathapacchindanatthaṃ. Sace hi koci acirapabbajito bālabhikkhu evaṃ vadeyya – ‘‘bhagavā hirottappādidhamme samādāya vattathāti vadati, ko nu kho tesaṃ samādāya vattane ānisaṃso’’ti? Tassa vacanapathapacchindanatthaṃ. Ayañca ānisaṃso, ime hi dhammā samādāya paripūritā samitapāpasamaṇaṃ nāma bāhitapāpabrāhmaṇaṃ nāma karonti, catupaccayalābhaṃ uppādenti, paccayadāyakānaṃ mahapphalataṃ sampādenti, pabbajjaṃ avañjhaṃ saphalaṃ saudrayaṃ karontīti vaṇṇaṃ abhāsi. Ayamettha saṅkhepo. Vitthārato pana vaṇṇakathā satipaṭṭhāne (dī. ni. aṭṭha. 2.373; ma. ni. aṭṭha. 2.373) vuttanayeneva veditabbā.
416. ஹிரொத்தப்பேனாதி ‘‘யங் ஹிரீயதி ஹிரீயிதப்³பே³ன, ஒத்தப்பதி ஒத்தப்பிதப்³பே³னா’’தி (த⁴॰ ஸ॰ 1331) ஏவங் வித்தா²ரிதாய ஹிரியா சேவ ஒத்தப்பேன ச. அபிசெத்த² அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னங் ஒத்தப்பங். அத்தாதி⁴பதெய்யா ஹிரீ, லோகாதி⁴பதெய்யங் ஒத்தப்பங். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தங் ஒத்தப்பங், வித்தா²ரகதா² பனெத்த² ஸப்³பா³காரேன விஸுத்³தி⁴மக்³கே³ வுத்தா. அபிச இமே த்³வே த⁴ம்மா லோகங் பாலனதோ லோகபாலத⁴ம்மா நாமாதி கதி²தா. யதா²ஹ – ‘‘த்³வேமே, பி⁴க்க²வே, ஸுக்கா த⁴ம்மா லோகங் பாலெந்தி. கதமே த்³வே? ஹிரீ ச ஒத்தப்பஞ்ச . இமே கோ², பி⁴க்க²வே, த்³வே ஸுக்கா த⁴ம்மா லோகங் பாலெந்தி. இமே ச கோ², பி⁴க்க²வே, த்³வே ஸுக்கா த⁴ம்மா லோகங் ந பாலெய்யுங், நயித⁴ பஞ்ஞாயேத², ‘மாதா’தி வா, ‘மாதுச்சா²’தி வா, ‘மாதுலானீ’தி வா, ‘ஆசரியப⁴ரியா’தி வா, ‘க³ரூனங் தா³ரா’தி வா, ஸம்பே⁴த³ங் லோகோ அக³மிஸ்ஸ, யதா² அஜேளகா குக்குடஸூகரா ஸோணஸிங்கா³லா’’தி (அ॰ நி॰ 2.9). இமேயேவ ஜாதகே ‘‘தே³வத⁴ம்மா’’தி கதி²தா. யதா²ஹ –
416.Hirottappenāti ‘‘yaṃ hirīyati hirīyitabbena, ottappati ottappitabbenā’’ti (dha. sa. 1331) evaṃ vitthāritāya hiriyā ceva ottappena ca. Apicettha ajjhattasamuṭṭhānā hirī, bahiddhāsamuṭṭhānaṃ ottappaṃ. Attādhipateyyā hirī, lokādhipateyyaṃ ottappaṃ. Lajjāsabhāvasaṇṭhitā hirī, bhayasabhāvasaṇṭhitaṃ ottappaṃ, vitthārakathā panettha sabbākārena visuddhimagge vuttā. Apica ime dve dhammā lokaṃ pālanato lokapāladhammā nāmāti kathitā. Yathāha – ‘‘dveme, bhikkhave, sukkā dhammā lokaṃ pālenti. Katame dve? Hirī ca ottappañca . Ime kho, bhikkhave, dve sukkā dhammā lokaṃ pālenti. Ime ca kho, bhikkhave, dve sukkā dhammā lokaṃ na pāleyyuṃ, nayidha paññāyetha, ‘mātā’ti vā, ‘mātucchā’ti vā, ‘mātulānī’ti vā, ‘ācariyabhariyā’ti vā, ‘garūnaṃ dārā’ti vā, sambhedaṃ loko agamissa, yathā ajeḷakā kukkuṭasūkarā soṇasiṅgālā’’ti (a. ni. 2.9). Imeyeva jātake ‘‘devadhammā’’ti kathitā. Yathāha –
‘‘ஹிரிஒத்தப்பஸம்பன்னா , ஸுக்கத⁴ம்மஸமாஹிதா;
‘‘Hiriottappasampannā , sukkadhammasamāhitā;
ஸந்தோ ஸப்புரிஸா லோகே, தே³வத⁴ம்மாதி வுச்சரே’’தி. (ஜா॰ 1.1.6);
Santo sappurisā loke, devadhammāti vuccare’’ti. (jā. 1.1.6);
மஹாசுந்த³த்தே²ரஸ்ஸ பன கிலேஸஸல்லேக²னபடிபதா³தி கத்வா த³ஸ்ஸிதா. யதா²ஹ – ‘‘பரே அஹிரிகா ப⁴விஸ்ஸந்தி, மயமெத்த² ஹிரிமனா ப⁴விஸ்ஸாமாதி ஸல்லேகோ² கரணீயோ. பரே அனொத்தாபீ ப⁴விஸ்ஸந்தி, மயமெத்த² ஒத்தாபீ ப⁴விஸ்ஸாமாதி ஸல்லேகோ² கரணீயோ’’தி (ம॰ நி॰ 1.83). இமேவ மஹாகஸ்ஸபத்தே²ரஸ்ஸ ஓவாதூ³பஸம்பதா³தி கத்வா த³ஸ்ஸிதா. வுத்தஞ்ஹேதங் – ‘‘தஸ்மா திஹ தே, கஸ்ஸப, ஏவங் ஸிக்கி²தப்³ப³ங், திப்³ப³ங் மே ஹிரொத்தப்பங் பச்சுபட்டி²தங் ப⁴விஸ்ஸதி தே²ரேஸு நவேஸு மஜ்ஜி²மேஸூதி. ஏவஞ்ஹி தே, கஸ்ஸப, ஸிக்கி²தப்³ப³’’ந்தி (ஸங்॰ நி॰ 2.154). இத⁴ பனேதே ஸமணத⁴ம்மா நாமாதி த³ஸ்ஸிதா.
Mahācundattherassa pana kilesasallekhanapaṭipadāti katvā dassitā. Yathāha – ‘‘pare ahirikā bhavissanti, mayamettha hirimanā bhavissāmāti sallekho karaṇīyo. Pare anottāpī bhavissanti, mayamettha ottāpī bhavissāmāti sallekho karaṇīyo’’ti (ma. ni. 1.83). Imeva mahākassapattherassa ovādūpasampadāti katvā dassitā. Vuttañhetaṃ – ‘‘tasmā tiha te, kassapa, evaṃ sikkhitabbaṃ, tibbaṃ me hirottappaṃ paccupaṭṭhitaṃ bhavissati theresu navesu majjhimesūti. Evañhi te, kassapa, sikkhitabba’’nti (saṃ. ni. 2.154). Idha panete samaṇadhammā nāmāti dassitā.
யஸ்மா பன எத்தாவதா ஸாமஞ்ஞத்தோ² மத்த²கங் பத்தோ நாம ஹோதி, தஸ்மா அபரேபி ஸமணகரணத⁴ம்மே த³ஸ்ஸேதுங் ஸியா கோ² பன, பி⁴க்க²வே, தும்ஹாகந்திஆதி³மாஹ. தத்த² ஸாமஞ்ஞத்தோ²தி ஸங்யுத்தகே தாவ, ‘‘கதமஞ்ச, பி⁴க்க²வே, ஸாமஞ்ஞங்? அயமேவ அரியோ அட்ட²ங்கி³கோ மக்³கோ³. ஸெய்யதி²த³ங், ஸம்மாதி³ட்டி²…பே॰… ஸம்மாஸமாதி⁴, இத³ங் வுச்சதி, பி⁴க்க²வே, ஸாமஞ்ஞங். கதமோ ச, பி⁴க்க²வே, ஸாமஞ்ஞத்தோ²? யோ, பி⁴க்க²வே, ராக³க்க²யோ தோ³ஸக்க²யோ மோஹக்க²யோ, அயங் வுச்சதி, பி⁴க்க²வே, ஸாமஞ்ஞத்தோ²’’தி (ஸங்॰ நி॰ 5.36) மக்³கோ³ ‘‘ஸாமஞ்ஞ’’ந்தி, ப²லனிப்³பா³னானி ‘‘ஸாமஞ்ஞத்தோ²’’தி வுத்தானி. இமஸ்மிங் பன டா²னே மக்³க³ம்பி ப²லம்பி ஏகதோ கத்வா ஸாமஞ்ஞத்தோ² கதி²தோதி வேதி³தப்³போ³. ஆரோசயாமீதி கதே²மி. படிவேத³யாமீதி ஜானாபேமி.
Yasmā pana ettāvatā sāmaññattho matthakaṃ patto nāma hoti, tasmā aparepi samaṇakaraṇadhamme dassetuṃ siyā kho pana, bhikkhave, tumhākantiādimāha. Tattha sāmaññatthoti saṃyuttake tāva, ‘‘katamañca, bhikkhave, sāmaññaṃ? Ayameva ariyo aṭṭhaṅgiko maggo. Seyyathidaṃ, sammādiṭṭhi…pe… sammāsamādhi, idaṃ vuccati, bhikkhave, sāmaññaṃ. Katamo ca, bhikkhave, sāmaññattho? Yo, bhikkhave, rāgakkhayo dosakkhayo mohakkhayo, ayaṃ vuccati, bhikkhave, sāmaññattho’’ti (saṃ. ni. 5.36) maggo ‘‘sāmañña’’nti, phalanibbānāni ‘‘sāmaññattho’’ti vuttāni. Imasmiṃ pana ṭhāne maggampi phalampi ekato katvā sāmaññattho kathitoti veditabbo. Ārocayāmīti kathemi. Paṭivedayāmīti jānāpemi.
417. பரிஸுத்³தோ⁴ நோ காயஸமாசாரோதி எத்த² காயஸமாசாரோ பரிஸுத்³தோ⁴ அபரிஸுத்³தோ⁴தி து³விதோ⁴. யோ ஹி பி⁴க்கு² பாணங் ஹனதி அதி³ன்னங் ஆதி³யதி, காமேஸு மிச்சா² சரதி, தஸ்ஸ காயஸமாசாரோ அபரிஸுத்³தோ⁴ நாம, அயங் பன கம்மபத²வஸேனேவ வாரிதோ. யோ பன பாணினா வா லெட்³டு³னா வா த³ண்டே³ன வா ஸத்தே²ன வா பரங் போதே²தி விஹேடே²தி, தஸ்ஸ காயஸமாசாரோ அபரிஸுத்³தோ⁴ நாம, அயம்பி ஸிக்கா²பத³ப³த்³தே⁴னேவ படிக்கி²த்தோ. இமஸ்மிங் ஸுத்தே உப⁴யம்பேதங் அகதெ²த்வா பரமஸல்லேகோ² நாம கதி²தோ. யோ ஹி பி⁴க்கு² பானீயக⁴டே வா பானீயங் பிவந்தானங், பத்தே வா ப⁴த்தங் பு⁴ஞ்ஜந்தானங் காகானங் நிவாரணவஸேன ஹத்த²ங் வா த³ண்ட³ங் வா லெட்³டு³ங் வா உக்³கி³ரதி, தஸ்ஸ காயஸமாசாரோ அபரிஸுத்³தோ⁴. விபரீதோ பரிஸுத்³தோ⁴ நாம. உத்தானோதி உக்³க³தோ பாகடோ. விவடோதி அனாவடோ அஸஞ்ச²ன்னோ. உப⁴யேனாபி பரிஸுத்³த⁴தங்யேவ தீ³பேதி. ந ச சி²த்³த³வாதி ஸதா³ ஏகஸதி³ஸோ அந்தரந்தரே சி²த்³த³ரஹிதோ. ஸங்வுதோதி கிலேஸானங் த்³வார பித³ஹனேன பித³ஹிதோ, ந வஜ்ஜபடிச்சா²த³னத்தா²ய.
417.Parisuddho no kāyasamācāroti ettha kāyasamācāro parisuddho aparisuddhoti duvidho. Yo hi bhikkhu pāṇaṃ hanati adinnaṃ ādiyati, kāmesu micchā carati, tassa kāyasamācāro aparisuddho nāma, ayaṃ pana kammapathavaseneva vārito. Yo pana pāṇinā vā leḍḍunā vā daṇḍena vā satthena vā paraṃ potheti viheṭheti, tassa kāyasamācāro aparisuddho nāma, ayampi sikkhāpadabaddheneva paṭikkhitto. Imasmiṃ sutte ubhayampetaṃ akathetvā paramasallekho nāma kathito. Yo hi bhikkhu pānīyaghaṭe vā pānīyaṃ pivantānaṃ, patte vā bhattaṃ bhuñjantānaṃ kākānaṃ nivāraṇavasena hatthaṃ vā daṇḍaṃ vā leḍḍuṃ vā uggirati, tassa kāyasamācāro aparisuddho. Viparīto parisuddho nāma. Uttānoti uggato pākaṭo. Vivaṭoti anāvaṭo asañchanno. Ubhayenāpi parisuddhataṃyeva dīpeti. Na ca chiddavāti sadā ekasadiso antarantare chiddarahito. Saṃvutoti kilesānaṃ dvāra pidahanena pidahito, na vajjapaṭicchādanatthāya.
418. வசீஸமாசாரேபி யோ பி⁴க்கு² முஸா வத³தி, பிஸுணங் கதே²தி, ப²ருஸங் பா⁴ஸதி, ஸம்ப²ங் பலபதி, தஸ்ஸ வசீஸமாசாரோ அபரிஸுத்³தோ⁴ நாம. அயங் பன கம்மபத²வஸேன வாரிதோ. யோ பன க³ஹபதிகாதி வா தா³ஸாதி வா பெஸ்ஸாதி வா ஆதீ³ஹி கு²ங்ஸெந்தோ வத³தி, தஸ்ஸ வசீஸமாசாரோ அபரிஸுத்³தோ⁴ நாம. அயங் பன ஸிக்கா²பத³ப³த்³தே⁴னேவ படிக்கி²த்தோ. இமஸ்மிங் ஸுத்தே உப⁴யம்பேதங் அகதெ²த்வா பரமஸல்லேகோ² நாம கதி²தோ. யோ ஹி பி⁴க்கு² த³ஹரேன வா ஸாமணேரேன வா, ‘‘கச்சி, ப⁴ந்தே, அம்ஹாகங் உபஜ்ஜா²யங் பஸ்ஸதா²’’தி வுத்தே, ஸம்ப³ஹுலா, ஆவுஸோ, பி⁴க்கு²பி⁴க்கு²னியோ ஏகஸ்மிங் பதே³ஸே விசதி³ங்ஸு, உபஜ்ஜா²யோ தே விக்காயிகஸாகப⁴ண்டி³கங் உக்கி²பித்வா க³தோ ப⁴விஸ்ஸதீ’’திஆதி³னா நயேன ஹஸாதி⁴ப்பாயோபி ஏவரூபங் கத²ங் கதே²தி, தஸ்ஸ வசீஸமாசாரோ அபரிஸுத்³தோ⁴. விபரீதோ பரிஸுத்³தோ⁴ நாம.
418.Vacīsamācārepi yo bhikkhu musā vadati, pisuṇaṃ katheti, pharusaṃ bhāsati, samphaṃ palapati, tassa vacīsamācāro aparisuddho nāma. Ayaṃ pana kammapathavasena vārito. Yo pana gahapatikāti vā dāsāti vā pessāti vā ādīhi khuṃsento vadati, tassa vacīsamācāro aparisuddho nāma. Ayaṃ pana sikkhāpadabaddheneva paṭikkhitto. Imasmiṃ sutte ubhayampetaṃ akathetvā paramasallekho nāma kathito. Yo hi bhikkhu daharena vā sāmaṇerena vā, ‘‘kacci, bhante, amhākaṃ upajjhāyaṃ passathā’’ti vutte, sambahulā, āvuso, bhikkhubhikkhuniyo ekasmiṃ padese vicadiṃsu, upajjhāyo te vikkāyikasākabhaṇḍikaṃ ukkhipitvā gato bhavissatī’’tiādinā nayena hasādhippāyopi evarūpaṃ kathaṃ katheti, tassa vacīsamācāro aparisuddho. Viparīto parisuddho nāma.
419. மனோஸமாசாரே யோ பி⁴க்கு² அபி⁴ஜ்ஜா²லு ப்³யாபன்னசித்தோ மிச்சா²தி³ட்டி²கோ ஹோதி, தஸ்ஸ மனோஸமாசாரோ அபரிஸுத்³தோ⁴ நாம. அயங் பன கம்மபத²வஸேனேவ வாரிதோ. யோ பன உபனிக்கி²த்தங் ஜாதரூபரஜதங் ஸாதி³யதி, தஸ்ஸ மனோஸமாசாரோ அபரிஸுத்³தோ⁴ நாம. அயம்பி ஸிக்கா²பத³ப³த்³தே⁴னேவ படிக்கி²த்தோ. இமஸ்மிங் ஸுத்தே உப⁴யம்பேதங் அகதெ²த்வா பரமஸல்லேகோ² நாம கதி²தோ. யோ பன பி⁴க்கு² காமவிதக்கங் வா ப்³யாபாத³விதக்கங் வா விஹிங்ஸாவிதக்கங் வா விதக்கேதி, தஸ்ஸ மனோஸமாசாரோ அபரிஸுத்³தோ⁴. விபரீதோ பரிஸுத்³தோ⁴ நாம.
419.Manosamācāre yo bhikkhu abhijjhālu byāpannacitto micchādiṭṭhiko hoti, tassa manosamācāro aparisuddho nāma. Ayaṃ pana kammapathavaseneva vārito. Yo pana upanikkhittaṃ jātarūparajataṃ sādiyati, tassa manosamācāro aparisuddho nāma. Ayampi sikkhāpadabaddheneva paṭikkhitto. Imasmiṃ sutte ubhayampetaṃ akathetvā paramasallekho nāma kathito. Yo pana bhikkhu kāmavitakkaṃ vā byāpādavitakkaṃ vā vihiṃsāvitakkaṃ vā vitakketi, tassa manosamācāro aparisuddho. Viparīto parisuddho nāma.
420. ஆஜீவஸ்மிங் யோ பி⁴க்கு² ஆஜீவஹேது வேஜ்ஜகம்மங் பஹிணக³மனங் க³ண்ட³பா²லனங் கரோதி, அருமக்க²னங் தே³தி, தேலங் பசதீதி ஏகவீஸதிஅனேஸனாவஸேன ஜீவிகங் கப்பேதி. யோ வா பன விஞ்ஞாபெத்வா பு⁴ஞ்ஜதி, தஸ்ஸ ஆஜீவோ அபரிஸுத்³தோ⁴ நாம. அயங் பன ஸிக்கா²பத³ப³த்³தே⁴னேவ படிக்கி²த்தோ. இமஸ்மிங் ஸுத்தே உப⁴யம்பேதங் அகதெ²த்வா பரமஸல்லேகோ² நாம கதி²தோ. யோ ஹி பி⁴க்கு² ஸப்பினவனீததேலமது⁴பா²ணிதாதீ³னி லபி⁴த்வா, ‘‘ஸ்வே வா புனதி³வஸே வா ப⁴விஸ்ஸதீ’’தி ஸன்னிதி⁴காரகங் பரிபு⁴ஞ்ஜதி, யோ வா பன நிம்ப³ங்குராதீ³னி தி³ஸ்வா ஸாமணேரே வத³தி – ‘‘அங்ங்குரே கா²த³தா²’’தி, ஸாமணேரா தே²ரோ கா²தி³துகாமோதி கப்பியங் கத்வா தெ³ந்தி, த³ஹரே பன ஸாமணேரே வா பானீயங் பிவத², ஆவுஸோதி வத³தி, தே தே²ரோ பானீயங் பிவிதுகாமோதி பானீயஸங்க²ங் தோ⁴வித்வா தெ³ந்தி, தம்பி பரிபு⁴ஞ்ஜந்தஸ்ஸ ஆஜீவோ அபரிஸுத்³தோ⁴ நாம ஹோதி. விபரீதோ பரிஸுத்³தோ⁴ நாம.
420. Ājīvasmiṃ yo bhikkhu ājīvahetu vejjakammaṃ pahiṇagamanaṃ gaṇḍaphālanaṃ karoti, arumakkhanaṃ deti, telaṃ pacatīti ekavīsatianesanāvasena jīvikaṃ kappeti. Yo vā pana viññāpetvā bhuñjati, tassa ājīvo aparisuddho nāma. Ayaṃ pana sikkhāpadabaddheneva paṭikkhitto. Imasmiṃ sutte ubhayampetaṃ akathetvā paramasallekho nāma kathito. Yo hi bhikkhu sappinavanītatelamadhuphāṇitādīni labhitvā, ‘‘sve vā punadivase vā bhavissatī’’ti sannidhikārakaṃ paribhuñjati, yo vā pana nimbaṅkurādīni disvā sāmaṇere vadati – ‘‘aṃṅkure khādathā’’ti, sāmaṇerā thero khāditukāmoti kappiyaṃ katvā denti, dahare pana sāmaṇere vā pānīyaṃ pivatha, āvusoti vadati, te thero pānīyaṃ pivitukāmoti pānīyasaṅkhaṃ dhovitvā denti, tampi paribhuñjantassa ājīvo aparisuddho nāma hoti. Viparīto parisuddho nāma.
422. மத்தஞ்ஞூதி பரியேஸனபடிக்³க³ஹணபரிபோ⁴கே³ஸு மத்தஞ்ஞூ, யுத்தஞ்ஞூ, பமாணஞ்ஞூ.
422.Mattaññūti pariyesanapaṭiggahaṇaparibhogesu mattaññū, yuttaññū, pamāṇaññū.
423. ஜாக³ரியமனுயுத்தாதி ரத்திந்தி³வங் ச² கொட்டா²ஸே கத்வா ஏகஸ்மிங் கொட்டா²ஸே நித்³தா³ய ஓகாஸங் த³த்வா பஞ்ச கொட்டா²ஸே ஜாக³ரியம்ஹி யுத்தா பயுத்தா. ஸீஹஸெய்யந்தி எத்த² காமபோ⁴கி³ஸெய்யா, பேதஸெய்யா, ஸீஹஸெய்யா, ததா²க³தஸெய்யாதி சதஸ்ஸோ ஸெய்யா. தத்த² ‘‘யேபு⁴ய்யேன, பி⁴க்க²வே, காமபோ⁴கீ³ ஸத்தா வாமேன பஸ்ஸேன ஸெந்தீ’’தி (அ॰ நி॰ 4.246) அயங் காமபோ⁴கி³ஸெய்யா, தேஸு ஹி யேபு⁴ய்யேன த³க்கி²ணபஸ்ஸேன ஸயானோ நாம நத்தி².
423.Jāgariyamanuyuttāti rattindivaṃ cha koṭṭhāse katvā ekasmiṃ koṭṭhāse niddāya okāsaṃ datvā pañca koṭṭhāse jāgariyamhi yuttā payuttā. Sīhaseyyanti ettha kāmabhogiseyyā, petaseyyā, sīhaseyyā, tathāgataseyyāti catasso seyyā. Tattha ‘‘yebhuyyena, bhikkhave, kāmabhogī sattā vāmena passena sentī’’ti (a. ni. 4.246) ayaṃ kāmabhogiseyyā, tesu hi yebhuyyena dakkhiṇapassena sayāno nāma natthi.
‘‘யேபு⁴ய்யேன, பி⁴க்க²வே, பேதா உத்தானா ஸெந்தீ’’தி (அ॰ நி॰ 4.246) அயங் பேதஸெய்யா, பேதா ஹி அப்பமங்ஸலோஹிதத்தா அட்டி²ஸங்கா⁴தஜடிதா ஏகேன பஸ்ஸேன ஸயிதுங் ந ஸக்கொந்தி, உத்தானாவ ஸெந்தி.
‘‘Yebhuyyena, bhikkhave, petā uttānā sentī’’ti (a. ni. 4.246) ayaṃ petaseyyā, petā hi appamaṃsalohitattā aṭṭhisaṅghātajaṭitā ekena passena sayituṃ na sakkonti, uttānāva senti.
‘‘யேபு⁴ய்யேன , பி⁴க்க²வே, ஸீஹோ மிக³ராஜா நங்கு³ட்ட²ங் அந்தரஸத்தி²ம்ஹி அனுபக்கி²பித்வா த³க்கி²ணேன பஸ்ஸேன ஸேதீ’’தி (அ॰ நி॰ 4.246) அயங் ஸீஹஸெய்யா. தேஜுஸ்ஸத³த்தா ஹி ஸீஹோ மிக³ராஜா த்³வே புரிமபாதே³ ஏகஸ்மிங் டா²னே பச்சி²மபாதே³ ஏகஸ்மிங் ட²பெத்வா நங்கு³ட்ட²ங் அந்தரஸத்தி²ம்ஹி பக்கி²பித்வா புரிமபாத³பச்சி²மபாத³னங்கு³ட்டா²னங் டி²தோகாஸங் ஸல்லக்கெ²த்வா த்³வின்னங் புரிமபாதா³னங் மத்த²கே ஸீஸங் ட²பெத்வா ஸயதி . தி³வஸம்பி ஸயித்வா பபு³ஜ்ஜ²மானோ ந உத்ராஸந்தோ பபு³ஜ்ஜ²தி. ஸீஸங் பன உக்கி²பித்வா புரிமபாதா³னங் டி²தோகாஸங் ஸல்லக்கே²தி. ஸசே கிஞ்சி டா²னங் விஜஹித்வா டி²தங் ஹோதி, ‘‘நயித³ங் துய்ஹங் ஜாதியா, ந ஸூரபா⁴வஸ்ஸ ச அனுரூப’’ந்தி அனத்தமனோ ஹுத்வா தத்தே²வ ஸயதி, ந கோ³சராய பக்கமதி. அவிஜஹித்வா டி²தே பன ‘‘துய்ஹங் ஜாதியா ஸூரபா⁴வஸ்ஸ ச அனுரூபமித³’’ந்தி ஹட்ட²துட்டோ² உட்டா²ய ஸீஹவிஜம்பி⁴தங் விஜம்பி⁴த்வா கேஸரபா⁴ரங் விது⁴னித்வா திக்க²த்துங் ஸீஹனாத³ங் நதி³த்வா கோ³சராய பக்கமதி. சதுத்த²ஜ்ஜா²னஸெய்யா பன ததா²க³தஸெய்யாதி வுச்சதி. தாஸு இத⁴ ஸீஹஸெய்யா ஆக³தா. அயஞ்ஹி தேஜுஸ்ஸத³இரியாபத²த்தா உத்தமஸெய்யா நாம. பாதே³ பாத³ந்தி த³க்கி²ணபாதே³ வாமபாத³ங். அச்சாதா⁴யாதி அதிஆதா⁴ய ஈஸகங் அதிக்கம்ம ட²பெத்வா, கொ³ப்ப²கேன ஹி கொ³ப்ப²கே, ஜாணுனா வா ஜாணும்ஹி ஸங்க⁴ட்டியமானே அபி⁴ண்ஹங் வேத³னா உப்பஜ்ஜதி, சித்தங் ஏகக்³க³ங் ந ஹோதி, ஸெய்யா அபா²ஸுகா ஹோதி. யதா² பன ந ஸங்க⁴ட்டேதி, ஏவங் அதிக்கம்ம ட²பிதே வேத³னா நுப்பஜ்ஜதி, சித்தங் ஏகக்³க³ங் ஹோதி, ஸெய்யா பா²ஸுகா ஹோதி, தஸ்மா ஏவமாஹ.
‘‘Yebhuyyena , bhikkhave, sīho migarājā naṅguṭṭhaṃ antarasatthimhi anupakkhipitvā dakkhiṇena passena setī’’ti (a. ni. 4.246) ayaṃ sīhaseyyā. Tejussadattā hi sīho migarājā dve purimapāde ekasmiṃ ṭhāne pacchimapāde ekasmiṃ ṭhapetvā naṅguṭṭhaṃ antarasatthimhi pakkhipitvā purimapādapacchimapādanaṅguṭṭhānaṃ ṭhitokāsaṃ sallakkhetvā dvinnaṃ purimapādānaṃ matthake sīsaṃ ṭhapetvā sayati . Divasampi sayitvā pabujjhamāno na utrāsanto pabujjhati. Sīsaṃ pana ukkhipitvā purimapādānaṃ ṭhitokāsaṃ sallakkheti. Sace kiñci ṭhānaṃ vijahitvā ṭhitaṃ hoti, ‘‘nayidaṃ tuyhaṃ jātiyā, na sūrabhāvassa ca anurūpa’’nti anattamano hutvā tattheva sayati, na gocarāya pakkamati. Avijahitvā ṭhite pana ‘‘tuyhaṃ jātiyā sūrabhāvassa ca anurūpamida’’nti haṭṭhatuṭṭho uṭṭhāya sīhavijambhitaṃ vijambhitvā kesarabhāraṃ vidhunitvā tikkhattuṃ sīhanādaṃ naditvā gocarāya pakkamati. Catutthajjhānaseyyā pana tathāgataseyyāti vuccati. Tāsu idha sīhaseyyā āgatā. Ayañhi tejussadairiyāpathattā uttamaseyyā nāma. Pāde pādanti dakkhiṇapāde vāmapādaṃ. Accādhāyāti atiādhāya īsakaṃ atikkamma ṭhapetvā, gopphakena hi gopphake, jāṇunā vā jāṇumhi saṅghaṭṭiyamāne abhiṇhaṃ vedanā uppajjati, cittaṃ ekaggaṃ na hoti, seyyā aphāsukā hoti. Yathā pana na saṅghaṭṭeti, evaṃ atikkamma ṭhapite vedanā nuppajjati, cittaṃ ekaggaṃ hoti, seyyā phāsukā hoti, tasmā evamāha.
425. அபி⁴ஜ்ஜ²ங் லோகேதிஆதி³ சூளஹத்தி²பதே³ வித்தா²ரிதங்.
425.Abhijjhaṃ loketiādi cūḷahatthipade vitthāritaṃ.
426. யா பனாயங் ஸெய்யதா²பி, பி⁴க்க²வேதி உபமா வுத்தா. தத்த² இணங் ஆதா³யாதி வட்³டி⁴யா த⁴னங் க³ஹெத்வா. ப்³யந்தீ கரெய்யாதி விக³தந்தானி கரெய்ய. யதா² தேஸங் காகணிகமத்தோபி பரியந்தோ நாம நாவஸிஸ்ஸதி, ஏவங் கரெய்ய, ஸப்³ப³ஸோ படினிய்யாதெய்யாதி அத்தோ². ததோனிதா³னந்தி ஆணண்யனிதா³னங். ஸோ ஹி அணணொம்ஹீதி ஆவஜ்ஜந்தோ ப³லவபாமோஜ்ஜங் லப⁴தி, ப³லவஸோமனஸ்ஸமதி⁴க³ச்ச²தி. தேன வுத்தங் – ‘‘லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸ’’ந்தி.
426. Yā panāyaṃ seyyathāpi, bhikkhaveti upamā vuttā. Tattha iṇaṃ ādāyāti vaḍḍhiyā dhanaṃ gahetvā. Byantī kareyyāti vigatantāni kareyya. Yathā tesaṃ kākaṇikamattopi pariyanto nāma nāvasissati, evaṃ kareyya, sabbaso paṭiniyyāteyyāti attho. Tatonidānanti āṇaṇyanidānaṃ. So hi aṇaṇomhīti āvajjanto balavapāmojjaṃ labhati, balavasomanassamadhigacchati. Tena vuttaṃ – ‘‘labhetha pāmojjaṃ, adhigaccheyya somanassa’’nti.
விஸபா⁴க³வேத³னுப்பத்தியா ககசேனேவ சதுஇரியாபத²ங் சி²ந்த³ந்தோ ஆபா³த⁴தீதி ஆபா³தோ⁴, ஸ்வாஸ்ஸ அத்தீ²தி ஆபா³தி⁴கோ. தங்ஸமுட்டா²னேன து³க்கே²ன து³க்கி²தோ. அதி⁴மத்தகி³லானோதி பா³ள்ஹகி³லானோ. நச்சா²தெ³ய்யாதி அதி⁴மத்தப்³யாதி⁴பரேததாய ந ருச்செய்ய. ப³லமத்தாதி ப³லமேவ, ப³லஞ்சஸ்ஸ காயே ந ப⁴வெய்யாதி அத்தோ². ததோனிதா³னந்தி ஆரொக்³யனிதா³னங், தஸ்ஸ ஹி அரோகொ³ம்ஹீதி ஆவஜ்ஜயதோ தது³ப⁴யங் ஹோதி. தேன வுத்தங் – ‘‘லபே⁴த² பாமோஜ்ஜங், அதி⁴க³ச்செ²ய்ய ஸோமனஸ்ஸ’’ந்தி. ந சஸ்ஸ கிஞ்சி போ⁴கா³னங் வயோதி காகணிகமத்தம்பி போ⁴கா³னங் வயோ ந ப⁴வெய்ய. ததோனிதா³னந்தி ப³ந்த⁴னாமொக்க²னிதா³னங், ஸேஸங் வுத்தனயேனேவ ஸப்³ப³பதே³ஸு யோஜேதப்³ப³ங். அனத்தாதீ⁴னோதி ந அத்தனி அதீ⁴னோ, அத்தனோ ருசியா கிஞ்சி காதுங் ந லப⁴தி. பராதீ⁴னோதி பரேஸு அதீ⁴னோ, பரஸ்ஸேவ ருசியா பவத்ததி. ந யேன காமங் க³மோதி யேன தி³ஸாபா⁴கே³னஸ்ஸ காமோ ஹோதி. இச்சா² உப்பஜ்ஜதி க³மனாய, தேன க³ந்துங் ந லப⁴தி. தா³ஸப்³யாதி தா³ஸபா⁴வா. பு⁴ஜிஸ்ஸோதி அத்தனோ ஸந்தகோ . ததோனிதா³னந்தி பு⁴ஜிஸ்ஸனிதா³னங். கந்தாரத்³தா⁴னமக்³க³ந்தி கந்தாரங் அத்³தா⁴னமக்³க³ங், நிருத³கங் தீ³க⁴மக்³க³ந்தி அத்தோ². ததோனிதா³னந்தி கே²மந்தபூ⁴மினிதா³னங்.
Visabhāgavedanuppattiyā kakaceneva catuiriyāpathaṃ chindanto ābādhatīti ābādho, svāssa atthīti ābādhiko. Taṃsamuṭṭhānena dukkhena dukkhito. Adhimattagilānoti bāḷhagilāno. Nacchādeyyāti adhimattabyādhiparetatāya na rucceyya. Balamattāti balameva, balañcassa kāye na bhaveyyāti attho. Tatonidānanti ārogyanidānaṃ, tassa hi arogomhīti āvajjayato tadubhayaṃ hoti. Tena vuttaṃ – ‘‘labhetha pāmojjaṃ, adhigaccheyya somanassa’’nti. Nacassa kiñci bhogānaṃ vayoti kākaṇikamattampi bhogānaṃ vayo na bhaveyya. Tatonidānanti bandhanāmokkhanidānaṃ, sesaṃ vuttanayeneva sabbapadesu yojetabbaṃ. Anattādhīnoti na attani adhīno, attano ruciyā kiñci kātuṃ na labhati. Parādhīnoti paresu adhīno, parasseva ruciyā pavattati. Na yena kāmaṃ gamoti yena disābhāgenassa kāmo hoti. Icchā uppajjati gamanāya, tena gantuṃ na labhati. Dāsabyāti dāsabhāvā. Bhujissoti attano santako . Tatonidānanti bhujissanidānaṃ. Kantāraddhānamagganti kantāraṃ addhānamaggaṃ, nirudakaṃ dīghamagganti attho. Tatonidānanti khemantabhūminidānaṃ.
இமே பஞ்ச நீவரணே அப்பஹீனேதி எத்த² ப⁴க³வா அப்பஹீனங் காமச்ச²ந்த³னீவரணங் இணஸதி³ஸங், ஸேஸானி ரோகா³தி³ஸதி³ஸானி கத்வா த³ஸ்ஸேதி. தத்ராயங் ஸதி³ஸதா – யோ ஹி பரேஸங் இணங் க³ஹெத்வா வினாஸேதி. ஸோ தேஹி இணங் தே³ஹீதி வுச்சமானோபி ப²ருஸங் வுச்சமானோபி ப³ஜ்ஜ²மானோபி பஹரியமானோபி கிஞ்சி படிபா³ஹிதுங் ந ஸக்கோதி, ஸப்³ப³ங் திதிக்க²தி, திதிக்க²காரணஞ்ஹிஸ்ஸ தங் இணங் ஹோதி. ஏவமேவங் யோ யம்ஹி காமச்ச²ந்தே³ன ரஜ்ஜதி, தண்ஹாக³ணேன தங் வத்து²ங் க³ண்ஹாதி, ஸோ தேன ப²ருஸங் வுச்சமானோபி ப³ஜ்ஜ²மானோபி பஹரியமானோபி ஸப்³ப³ங் திதிக்க²தி. திதிக்க²காரணஞ்ஹிஸ்ஸ ஸோ காமச்ச²ந்தோ³ ஹோதி க⁴ரஸாமிகேஹி வதீ⁴யமானானங் இத்தீ²னங் வியாதி. ஏவங் இணங் விய காமச்ச²ந்தோ³ த³ட்ட²ப்³போ³.
Ime pañca nīvaraṇe appahīneti ettha bhagavā appahīnaṃ kāmacchandanīvaraṇaṃ iṇasadisaṃ, sesāni rogādisadisāni katvā dasseti. Tatrāyaṃ sadisatā – yo hi paresaṃ iṇaṃ gahetvā vināseti. So tehi iṇaṃ dehīti vuccamānopi pharusaṃ vuccamānopi bajjhamānopi pahariyamānopi kiñci paṭibāhituṃ na sakkoti, sabbaṃ titikkhati, titikkhakāraṇañhissa taṃ iṇaṃ hoti. Evamevaṃ yo yamhi kāmacchandena rajjati, taṇhāgaṇena taṃ vatthuṃ gaṇhāti, so tena pharusaṃ vuccamānopi bajjhamānopi pahariyamānopi sabbaṃ titikkhati. Titikkhakāraṇañhissa so kāmacchando hoti gharasāmikehi vadhīyamānānaṃ itthīnaṃ viyāti. Evaṃ iṇaṃ viya kāmacchando daṭṭhabbo.
யதா² பன பித்தரோகா³துரோ மது⁴ஸக்கராதீ³ஸுபி தி³ன்னேஸு பித்தரோகா³துரதாய தேஸங் ரஸங் ந விந்த³தி, தித்தகங் தித்தகந்தி உக்³கி³ரதியேவ. ஏவமேவங் ப்³யாபன்னசித்தோ ஹிதகாமேஹி ஆசரியுபஜ்ஜா²யேஹி அப்பமத்தகம்பி ஓவதீ³யமானோ ஓவாத³ங் ந க³ண்ஹாதி, ‘‘அதி விய மே தும்ஹே உபத்³த³வேதா²’’திஆதீ³னி வத்வா விப்³ப⁴மதி. பித்தரோகா³துரதாய ஸோ புரிஸோ மது⁴ஸக்கராதி³ரஸங் விய, கோதா⁴துரதாய ஜா²னஸுகா²தி³பே⁴த³ங் ஸாஸனரஸங் ந விந்த³தீதி. ஏவங் ரோகோ³ விய ப்³யாபாதோ³ த³ட்ட²ப்³போ³.
Yathā pana pittarogāturo madhusakkarādīsupi dinnesu pittarogāturatāya tesaṃ rasaṃ na vindati, tittakaṃ tittakanti uggiratiyeva. Evamevaṃ byāpannacitto hitakāmehi ācariyupajjhāyehi appamattakampi ovadīyamāno ovādaṃ na gaṇhāti, ‘‘ati viya me tumhe upaddavethā’’tiādīni vatvā vibbhamati. Pittarogāturatāya so puriso madhusakkarādirasaṃ viya, kodhāturatāya jhānasukhādibhedaṃ sāsanarasaṃ na vindatīti. Evaṃ rogo viya byāpādo daṭṭhabbo.
யதா² பன நக்க²த்ததி³வஸே ப³ந்த⁴னாகா³ரே ப³த்³தோ⁴ புரிஸோ நக்க²த்தஸ்ஸ நேவ ஆதி³ங், ந மஜ்ஜ²ங், ந பரியோஸானங் பஸ்ஸதி. ஸோ து³தியதி³வஸே முத்தோ, ‘‘அஹோ ஹிய்யோ நக்க²த்தங் மனாபங், அஹோ நச்சங், அஹோ கீ³த’’ந்திஆதீ³னி ஸுத்வாபி படிவசனங் ந தே³தி. கிங் காரணா? நக்க²த்தஸ்ஸ அனநுபூ⁴தத்தா. ஏவமேவங் தி²னமித்³தா⁴பி⁴பூ⁴தோ பி⁴க்கு² விசித்தனயேபி த⁴ம்மஸ்ஸவனே பவத்தமானே நேவ தஸ்ஸ ஆதி³ங், ந மஜ்ஜ²ங், ந பரியோஸானங் ஜானாதி. ஸோ உட்டி²தே த⁴ம்மஸ்ஸவனே, ‘‘அஹோ த⁴ம்மஸ்ஸவனங், அஹோ காரணங், அஹோ உபமா’’தி த⁴ம்மஸ்ஸவனஸ்ஸ வண்ணங் ப⁴ணமானானங் ஸுத்வாபி படிவசனங் ந தே³தி. கிங் காரணா? தி²னமித்³த⁴வஸேன த⁴ம்மகதா²ய அனநுபூ⁴தத்தாதி. ஏவங் ப³ந்த⁴னாகா³ரங் விய தி²னமித்³த⁴ங் த³ட்ட²ப்³ப³ங்.
Yathā pana nakkhattadivase bandhanāgāre baddho puriso nakkhattassa neva ādiṃ, na majjhaṃ, na pariyosānaṃ passati. So dutiyadivase mutto, ‘‘aho hiyyo nakkhattaṃ manāpaṃ, aho naccaṃ, aho gīta’’ntiādīni sutvāpi paṭivacanaṃ na deti. Kiṃ kāraṇā? Nakkhattassa ananubhūtattā. Evamevaṃ thinamiddhābhibhūto bhikkhu vicittanayepi dhammassavane pavattamāne neva tassa ādiṃ, na majjhaṃ, na pariyosānaṃ jānāti. So uṭṭhite dhammassavane, ‘‘aho dhammassavanaṃ, aho kāraṇaṃ, aho upamā’’ti dhammassavanassa vaṇṇaṃ bhaṇamānānaṃ sutvāpi paṭivacanaṃ na deti. Kiṃ kāraṇā? Thinamiddhavasena dhammakathāya ananubhūtattāti. Evaṃ bandhanāgāraṃ viya thinamiddhaṃ daṭṭhabbaṃ.
யதா² பன நக்க²த்தங் கீளந்தோபி தா³ஸோ, ‘‘இத³ங் நாம அச்சாயிகங் கரணீயங் அத்தி², ஸீக⁴ங், தத்த² க³ச்ச², நோ சே க³ச்ச²ஸி, ஹத்த²பாத³ங் வா தே சி²ந்தா³மி கண்ணனாஸங் வா’’தி வுத்தோ ஸீக⁴ங் க³ச்ச²தியேவ, நக்க²த்தஸ்ஸ ஆதி³மஜ்ஜ²பரியோஸானங் அனுப⁴விதுங் ந லப⁴தி. கஸ்மா? பராதீ⁴னதாய. ஏவமேவங் வினயே அப்பகதஞ்ஞுனா விவேகத்தா²ய அரஞ்ஞங் பவிட்டே²னாபி கிஸ்மிஞ்சிதே³வ அந்தமஸோ கப்பியமங்ஸேபி அகப்பியமங்ஸஸஞ்ஞாய உப்பன்னாய விவேகங் பஹாய ஸீலவிஸோத⁴னத்த²ங் வினயத⁴ரஸ்ஸ ஸந்திகே க³ந்தப்³ப³ங் ஹோதி. விவேகஸுக²ங் அனுப⁴விதுங் ந லப⁴தி. கஸ்மா? உத்³த⁴ச்சகுக்குச்சாபி⁴பூ⁴ததாயாதி, ஏவங் தா³ஸப்³யங் விய உத்³த⁴ச்சகுக்குச்சங் த³ட்டப்³ப³ங்.
Yathā pana nakkhattaṃ kīḷantopi dāso, ‘‘idaṃ nāma accāyikaṃ karaṇīyaṃ atthi, sīghaṃ, tattha gaccha, no ce gacchasi, hatthapādaṃ vā te chindāmi kaṇṇanāsaṃ vā’’ti vutto sīghaṃ gacchatiyeva, nakkhattassa ādimajjhapariyosānaṃ anubhavituṃ na labhati. Kasmā? Parādhīnatāya. Evamevaṃ vinaye appakataññunā vivekatthāya araññaṃ paviṭṭhenāpi kismiñcideva antamaso kappiyamaṃsepi akappiyamaṃsasaññāya uppannāya vivekaṃ pahāya sīlavisodhanatthaṃ vinayadharassa santike gantabbaṃ hoti. Vivekasukhaṃ anubhavituṃ na labhati. Kasmā? Uddhaccakukkuccābhibhūtatāyāti, evaṃ dāsabyaṃ viya uddhaccakukkuccaṃ daṭṭabbaṃ.
யதா² பன கந்தாரத்³தா⁴னமக்³க³படிபன்னோ புரிஸோ சோரேஹி மனுஸ்ஸானங் விலுத்தோகாஸங் பஹதோகாஸஞ்ச தி³ஸ்வா த³ண்ட³கஸத்³தே³னபி ஸகுணஸத்³தே³னபி சோரா ஆக³தாதி உஸ்ஸங்கிதபரிஸங்கிதோ ஹோதி, க³ச்ச²திபி, திட்ட²திபி, நிவத்ததிபி, க³தட்டா²னதோ ஆக³தட்டா²னமேவ ப³ஹுதரங் ஹோதி. ஸோ கிச்சே²ன கஸிரேன கே²மந்தபூ⁴மிங் பாபுணாதி வா, ந வா பாபுணாதி. ஏவமேவங் யஸ்ஸ அட்ட²ஸு டா²னேஸு விசிகிச்சா² உப்பன்னா ஹோதி. ஸோ ‘‘பு³த்³தோ⁴ நு கோ², ந நு கோ² பு³த்³தோ⁴’’திஆதி³னா நயேன விசிகிச்ச²ந்தோ அதி⁴முச்சித்வா ஸத்³தா⁴ய க³ண்ஹிதுங் ந ஸக்கோதி. அஸக்கொந்தோ மக்³க³ங் வா ப²லங் வா ந பாபுணாதீதி யதா² கந்தாரத்³தா⁴னமக்³கே³ ‘‘சோரா அத்தி² நத்தீ²’’தி புனப்புனங் ஆஸப்பனபரிஸப்பனங் அபரியோகா³ஹனங் ச²ம்பி⁴தத்த சித்தஸ்ஸ உப்பாதெ³ந்தோ கே²மந்தபத்தியா அந்தராயங் கரோதி, ஏவங் விசிகிச்சா²பி ‘‘பு³த்³தோ⁴ நு கோ² ந பு³த்³தோ⁴’’திஆதி³னா நயேன புனப்புனங் ஆஸப்பனபரிஸப்பனங் அபரியோகா³ஹனங் ச²ம்பி⁴தத்தங் சித்தஸ்ஸ உப்பாத³யமானா அரியபூ⁴மிப்பத்தியா அந்தராயங் கரோதீதி கந்தாரத்³தா⁴னமக்³கோ³ விய த³ட்ட²ப்³பா³.
Yathā pana kantāraddhānamaggapaṭipanno puriso corehi manussānaṃ viluttokāsaṃ pahatokāsañca disvā daṇḍakasaddenapi sakuṇasaddenapi corā āgatāti ussaṅkitaparisaṅkito hoti, gacchatipi, tiṭṭhatipi, nivattatipi, gataṭṭhānato āgataṭṭhānameva bahutaraṃ hoti. So kicchena kasirena khemantabhūmiṃ pāpuṇāti vā, na vā pāpuṇāti. Evamevaṃ yassa aṭṭhasu ṭhānesu vicikicchā uppannā hoti. So ‘‘buddho nu kho, na nu kho buddho’’tiādinā nayena vicikicchanto adhimuccitvā saddhāya gaṇhituṃ na sakkoti. Asakkonto maggaṃ vā phalaṃ vā na pāpuṇātīti yathā kantāraddhānamagge ‘‘corā atthi natthī’’ti punappunaṃ āsappanaparisappanaṃ apariyogāhanaṃ chambhitatta cittassa uppādento khemantapattiyā antarāyaṃ karoti, evaṃ vicikicchāpi ‘‘buddho nu kho na buddho’’tiādinā nayena punappunaṃ āsappanaparisappanaṃ apariyogāhanaṃ chambhitattaṃ cittassa uppādayamānā ariyabhūmippattiyā antarāyaṃ karotīti kantāraddhānamaggo viya daṭṭhabbā.
இதா³னி ஸெய்யதா²பி, பி⁴க்க²வே, ஆணண்யந்தி எத்த² ப⁴க³வா பஹீனகாமச்ச²ந்த³னீவரணங் ஆணண்யஸதி³ஸங், ஸேஸானி ஆரொக்³யாதி³ஸதி³ஸானி கத்வா த³ஸ்ஸேதி. தத்ராயங் ஸதி³ஸதா – யதா² ஹி புரிஸோ இணங் ஆதா³ய கம்மந்தே பயோஜெத்வா ஸமித்³த⁴கம்மந்தோ, ‘‘இத³ங் இணங் நாம பலிபோ³த⁴மூல’’ந்தி சிந்தெத்வா ஸவட்³டி⁴கங் இணங் நிய்யாதெத்வா பண்ணங் பா²லாபெய்ய. அத²ஸ்ஸ ததோ பட்டா²ய நேவ கோசி தூ³தங் பேஸேதி, ந பண்ணங், ஸோ இணஸாமிகே தி³ஸ்வாபி ஸசே இச்ச²தி, ஆஸனா உட்ட²ஹதி, நோ சே, ந உட்ட²ஹதி. கஸ்மா? தேஹி ஸத்³தி⁴ங் நில்லேபதாய அலக்³க³தாய. ஏவமேவ பி⁴க்கு², ‘‘அயங் காமச்ச²ந்தோ³ நாம பலிபோ³த⁴மூல’’ந்தி ஸதிபட்டா²னே வுத்தனயேனேவ ச² த⁴ம்மே பா⁴வெத்வா காமச்ச²ந்த³னீவரணங் பஜஹதி. தஸ்ஸேவங் பஹீனகாமச்ச²ந்த³ஸ்ஸ யதா² இணமுத்தஸ்ஸ புரிஸஸ்ஸ இணஸாமிகே தி³ஸ்வா நேவ ப⁴யங் ந ச²ம்பி⁴தத்தங் ஹோதி. ஏவமேவ பரவத்து²ம்ஹி நேவ ஸங்கோ³ ந ப³ந்தோ⁴ ஹோதி. தி³ப்³பா³னிபி ரூபானி பஸ்ஸதோ கிலேஸோ ந ஸமுதா³சரதி. தஸ்மா ப⁴க³வா ஆணண்யமிவ காமச்ச²ந்த³ப்பஹானமாஹ.
Idāni seyyathāpi, bhikkhave, āṇaṇyanti ettha bhagavā pahīnakāmacchandanīvaraṇaṃ āṇaṇyasadisaṃ, sesāni ārogyādisadisāni katvā dasseti. Tatrāyaṃ sadisatā – yathā hi puriso iṇaṃ ādāya kammante payojetvā samiddhakammanto, ‘‘idaṃ iṇaṃ nāma palibodhamūla’’nti cintetvā savaḍḍhikaṃ iṇaṃ niyyātetvā paṇṇaṃ phālāpeyya. Athassa tato paṭṭhāya neva koci dūtaṃ peseti, na paṇṇaṃ, so iṇasāmike disvāpi sace icchati, āsanā uṭṭhahati, no ce, na uṭṭhahati. Kasmā? Tehi saddhiṃ nillepatāya alaggatāya. Evameva bhikkhu, ‘‘ayaṃ kāmacchando nāma palibodhamūla’’nti satipaṭṭhāne vuttanayeneva cha dhamme bhāvetvā kāmacchandanīvaraṇaṃ pajahati. Tassevaṃ pahīnakāmacchandassa yathā iṇamuttassa purisassa iṇasāmike disvā neva bhayaṃ na chambhitattaṃ hoti. Evameva paravatthumhi neva saṅgo na bandho hoti. Dibbānipi rūpāni passato kileso na samudācarati. Tasmā bhagavā āṇaṇyamiva kāmacchandappahānamāha.
யதா² பன ஸோ பித்தரோகா³துரோ புரிஸோ பே⁴ஸஜ்ஜகிரியாய தங் ரோக³ங் வூபஸமெத்வா ததோ பட்டா²ய மது⁴ஸக்கராதீ³னங் ரஸங் விந்த³தி. ஏவமேவங் பி⁴க்கு², ‘‘அயங் ப்³யாபாதோ³ நாம அனத்த²காரகோ’’தி ச² த⁴ம்மே பா⁴வெத்வா ப்³யாபாத³னீவரணங் பஜஹதி. ஸோ ஏவங் பஹீனப்³யாபாதோ³ யதா² பித்தரோக³விமுத்தோ புரிஸோ மது⁴ஸக்கராதீ³னி மது⁴ரானி ஸம்பியாயமானோ படிஸேவதி. ஏவமேவங் ஆசாரபண்ணத்திஆதீ³னி ஸிக்கா²பியமானோ ஸிரஸா ஸம்படிச்சி²த்வா ஸம்பியாயமானோ ஸிக்க²தி. தஸ்மா ப⁴க³வா ஆரொக்³யமிவ ப்³யாபாத³ப்பஹானமாஹ.
Yathā pana so pittarogāturo puriso bhesajjakiriyāya taṃ rogaṃ vūpasametvā tato paṭṭhāya madhusakkarādīnaṃ rasaṃ vindati. Evamevaṃ bhikkhu, ‘‘ayaṃ byāpādo nāma anatthakārako’’ti cha dhamme bhāvetvā byāpādanīvaraṇaṃ pajahati. So evaṃ pahīnabyāpādo yathā pittarogavimutto puriso madhusakkarādīni madhurāni sampiyāyamāno paṭisevati. Evamevaṃ ācārapaṇṇattiādīni sikkhāpiyamāno sirasā sampaṭicchitvā sampiyāyamāno sikkhati. Tasmā bhagavā ārogyamiva byāpādappahānamāha.
யதா² ஸோ நக்க²த்ததி³வஸே ப³ந்த⁴னாகா³ரங் பவேஸிதோ புரிஸோ அபரஸ்மிங் நக்க²த்ததி³வஸே, ‘‘புப்³பே³பி அஹங் பமாத³தோ³ஸேன ப³த்³தோ⁴ தங் நக்க²த்தங் நானுப⁴வாமி, இதா³னி அப்பமத்தோ ப⁴விஸ்ஸாமீ’’தி யதா²ஸ்ஸ பச்சத்தி²கா ஓகாஸங் ந லப⁴ந்தி. ஏவங் அப்பமத்தோ ஹுத்வா நக்க²த்தங் அனுப⁴வித்வா – ‘‘அஹோ நக்க²த்தங் அஹோ நக்க²த்த’’ந்தி உதா³னங் உதா³னேஸி. ஏவமேவ பி⁴க்கு², ‘‘இத³ங் தி²னமித்³த⁴ங் நாம மஹாஅனத்த²கர’’ந்தி ச² த⁴ம்மே பா⁴வெத்வா தி²னமித்³த⁴னீவரணங் பஜஹதி. ஸோ ஏவங் பஹீனதி²னமித்³தோ⁴ யதா² ப³ந்த⁴னா முத்தோ புரிஸோ ஸத்தாஹம்பி நக்க²த்தஸ்ஸ ஆதி³மஜ்ஜ²பரியோஸானங் அனுப⁴வதி. ஏவமேவங் பி⁴க்கு² த⁴ம்மனக்க²த்தஸ்ஸ ஆதி³மஜ்ஜ²பரியோஸானங் அனுப⁴வந்தோ ஸஹ படிஸம்பி⁴தா³ஹி அரஹத்தங் பாபுணாதி. தஸ்மா ப⁴க³வா ப³ந்த⁴னா மொக்க²மிவ தி²னமித்³த⁴ப்பஹானமாஹ.
Yathā so nakkhattadivase bandhanāgāraṃ pavesito puriso aparasmiṃ nakkhattadivase, ‘‘pubbepi ahaṃ pamādadosena baddho taṃ nakkhattaṃ nānubhavāmi, idāni appamatto bhavissāmī’’ti yathāssa paccatthikā okāsaṃ na labhanti. Evaṃ appamatto hutvā nakkhattaṃ anubhavitvā – ‘‘aho nakkhattaṃ aho nakkhatta’’nti udānaṃ udānesi. Evameva bhikkhu, ‘‘idaṃ thinamiddhaṃ nāma mahāanatthakara’’nti cha dhamme bhāvetvā thinamiddhanīvaraṇaṃ pajahati. So evaṃ pahīnathinamiddho yathā bandhanā mutto puriso sattāhampi nakkhattassa ādimajjhapariyosānaṃ anubhavati. Evamevaṃ bhikkhu dhammanakkhattassa ādimajjhapariyosānaṃ anubhavanto saha paṭisambhidāhi arahattaṃ pāpuṇāti. Tasmā bhagavā bandhanā mokkhamiva thinamiddhappahānamāha.
யதா² பன தா³ஸோ கஞ்சிதே³வ மித்தங் உபனிஸ்ஸாய ஸாமிகானங் த⁴னங் த³த்வா அத்தானங் பு⁴ஜிஸ்ஸங் கத்வா ததோ பட்டா²ய யங் இச்ச²தி, தங் கரெய்ய. ஏவமேவ பி⁴க்கு², ‘‘இத³ங் உத்³த⁴ச்சகுக்குச்சங் நாம மஹாஅனத்த²கர’’ந்தி ச² த⁴ம்மே பா⁴வெத்வா உத்³த⁴ச்சகுக்குச்சங் பஜஹதி. ஸோ ஏவங் பஹீனுத்³த⁴ச்சகுக்குச்சோ யதா² பு⁴ஜிஸ்ஸோ புரிஸோ யங் இச்ச²தி, தங் கரோதி. ந தங் கோசி ப³லக்காரேன ததோ நிவத்தேதி. ஏவமேவங் பி⁴க்கு² யதா²ஸுக²ங் நெக்க²ம்மபடிபத³ங் படிபஜ்ஜதி, ந நங் உத்³த⁴ச்சகுக்குச்சங் ப³லக்காரேன ததோ நிவத்தேதி. தஸ்மா ப⁴க³வா பு⁴ஜிஸ்ஸங் விய உத்³த⁴ச்சகுக்குச்சப்பஹானமாஹ.
Yathā pana dāso kañcideva mittaṃ upanissāya sāmikānaṃ dhanaṃ datvā attānaṃ bhujissaṃ katvā tato paṭṭhāya yaṃ icchati, taṃ kareyya. Evameva bhikkhu, ‘‘idaṃ uddhaccakukkuccaṃ nāma mahāanatthakara’’nti cha dhamme bhāvetvā uddhaccakukkuccaṃ pajahati. So evaṃ pahīnuddhaccakukkucco yathā bhujisso puriso yaṃ icchati, taṃ karoti. Na taṃ koci balakkārena tato nivatteti. Evamevaṃ bhikkhu yathāsukhaṃ nekkhammapaṭipadaṃ paṭipajjati, na naṃ uddhaccakukkuccaṃ balakkārena tato nivatteti. Tasmā bhagavā bhujissaṃ viya uddhaccakukkuccappahānamāha.
யதா² ப³லவா புரிஸோ ஹத்த²ஸாரங் க³ஹெத்வா ஸஜ்ஜாவுதோ⁴ ஸபரிவாரோ கந்தாரங் படிபஜ்ஜெய்ய. தங் சோரா தூ³ரதோவ தி³ஸ்வா பலாயெய்யுங். ஸோ ஸொத்தி²னா தங் கந்தாரங் நித்த²ரித்வா கே²மந்தங் பத்தோ ஹட்ட²துட்டோ² அஸ்ஸ. ஏவமேவங் பி⁴க்கு², ‘‘அயங் விசிகிச்சா² நாம அனத்த²காரிகா’’தி ச² த⁴ம்மே பா⁴வெத்வா விசிகிச்ச²ங் பஜஹதி. ஸோ ஏவங் பஹீனவிசிகிச்சோ² யதா² ப³லவா ஸஜ்ஜாவுதோ⁴ ஸபரிவாரோ புரிஸோ நிப்³ப⁴யோ சோரே திணங் விய அக³ணெத்வா ஸொத்தி²னா நிக்க²மித்வா கே²மந்தபூ⁴மிங் பாபுணாதி. ஏவமேவங் து³ச்சரிதகந்தாரங் நித்த²ரித்வா பரமகே²மந்தபூ⁴மிங் அமதங் நிப்³பா³னங் பாபுணாதி. தஸ்மா ப⁴க³வா கே²மந்தபூ⁴மிங் விய விசிகிச்சா²பஹானமாஹ.
Yathā balavā puriso hatthasāraṃ gahetvā sajjāvudho saparivāro kantāraṃ paṭipajjeyya. Taṃ corā dūratova disvā palāyeyyuṃ. So sotthinā taṃ kantāraṃ nittharitvā khemantaṃ patto haṭṭhatuṭṭho assa. Evamevaṃ bhikkhu, ‘‘ayaṃ vicikicchā nāma anatthakārikā’’ti cha dhamme bhāvetvā vicikicchaṃ pajahati. So evaṃ pahīnavicikiccho yathā balavā sajjāvudho saparivāro puriso nibbhayo core tiṇaṃ viya agaṇetvā sotthinā nikkhamitvā khemantabhūmiṃ pāpuṇāti. Evamevaṃ duccaritakantāraṃ nittharitvā paramakhemantabhūmiṃ amataṃ nibbānaṃ pāpuṇāti. Tasmā bhagavā khemantabhūmiṃ viya vicikicchāpahānamāha.
427. இமமேவ காயந்தி இமங் கரஜகாயங். அபி⁴ஸந்தே³தீதி தேமேதி ஸ்னேஹேதி, ஸப்³ப³த்த² பவத்தபீதிஸுக²ங் கரோதி. பரிஸந்தே³தீதி ஸமந்ததோ ஸந்தே³தி. பரிபூரேதீதி வாயுனா ப⁴ஸ்தங் விய பூரேதி. பரிப்ப²ரதீதி ஸமந்ததோ பு²ஸதி . ஸப்³பா³வதோ காயஸ்ஸாதி அஸ்ஸ பி⁴க்கு²னோ ஸப்³ப³கொட்டா²ஸவதோ காயஸ்ஸ. கிஞ்சி உபாதி³ன்னகஸந்ததிபவத்திட்டா²னே ச²விமங்ஸலோஹிதானுக³தங் அணுமத்தம்பி டா²னங் பட²மஜ்ஜா²னஸுகே²ன அபு²ட்ட²ங் நாம ந ஹோதி. த³க்கோ²தி சே²கோ படிப³லோ ந்ஹானீயசுண்ணானி காதுஞ்சேவ யோஜேதுஞ்ச ஸன்னேதுஞ்ச. கங்ஸதா²லேதி யேன கேனசி லோஹேன கதபா⁴ஜனே. மத்திகபா⁴ஜனங் பன தி²ரங் ந ஹோதி, ஸன்னெந்தஸ்ஸ பி⁴ஜ்ஜதி, தஸ்மா தங் ந த³ஸ்ஸேதி. பரிப்போ²ஸகங் பரிப்போ²ஸகந்தி ஸிஞ்சித்வா ஸிஞ்சித்வா. ஸன்னெய்யாதி வாமஹத்தே²ன கங்ஸதா²லங் க³ஹெத்வா த³க்கி²ணேன ஹத்தே²ன பமாணயுத்தங் உத³கங் ஸிஞ்சித்வா ஸிஞ்சித்வா பரிமத்³த³ந்தோ பிண்ட³ங் கரெய்ய. ஸ்னேஹானுக³தாதி உத³கஸினேஹேன அனுக³தா. ஸ்னேஹபரேதாதி உத³கஸினேஹேன பரிக³தா. ஸந்தரபா³ஹிராதி ஸத்³தி⁴ங் அந்தோபதே³ஸேன சேவ ப³ஹிபதே³ஸேன ச, ஸப்³ப³த்த²கமேவ உத³கஸினேஹேன பு²டாதி அத்தோ². ந ச பக்³க⁴ரிணீதி ந பி³ந்து³ பி³ந்து³ உத³கங் பக்³க⁴ரதி, ஸக்கா ஹோதி ஹத்தே²னபி த்³வீஹிபி தீஹிபி அங்கு³லீஹி க³ஹேதுங் ஓவட்டிகம்பி காதுந்தி அத்தோ².
427.Imameva kāyanti imaṃ karajakāyaṃ. Abhisandetīti temeti sneheti, sabbattha pavattapītisukhaṃ karoti. Parisandetīti samantato sandeti. Paripūretīti vāyunā bhastaṃ viya pūreti. Parippharatīti samantato phusati . Sabbāvato kāyassāti assa bhikkhuno sabbakoṭṭhāsavato kāyassa. Kiñci upādinnakasantatipavattiṭṭhāne chavimaṃsalohitānugataṃ aṇumattampi ṭhānaṃ paṭhamajjhānasukhena aphuṭṭhaṃ nāma na hoti. Dakkhoti cheko paṭibalo nhānīyacuṇṇāni kātuñceva yojetuñca sannetuñca. Kaṃsathāleti yena kenaci lohena katabhājane. Mattikabhājanaṃ pana thiraṃ na hoti, sannentassa bhijjati, tasmā taṃ na dasseti. Paripphosakaṃ paripphosakanti siñcitvā siñcitvā. Sanneyyāti vāmahatthena kaṃsathālaṃ gahetvā dakkhiṇena hatthena pamāṇayuttaṃ udakaṃ siñcitvā siñcitvā parimaddanto piṇḍaṃ kareyya. Snehānugatāti udakasinehena anugatā. Snehaparetāti udakasinehena parigatā. Santarabāhirāti saddhiṃ antopadesena ceva bahipadesena ca, sabbatthakameva udakasinehena phuṭāti attho. Na ca pagghariṇīti na bindu bindu udakaṃ paggharati, sakkā hoti hatthenapi dvīhipi tīhipi aṅgulīhi gahetuṃ ovaṭṭikampi kātunti attho.
428. து³தியஜ்ஜா²னஸுக²உபமாயங் உப்³பி⁴தோத³கோதி உப்³பி⁴ன்னஉத³கோ, ந ஹெட்டா² உப்³பி⁴ஜ்ஜித்வா உக்³க³ச்ச²னஉத³கோ, அந்தோயேவ பன உப்³பி⁴ஜ்ஜனஉத³கோதி அத்தோ². ஆயமுக²ந்தி ஆக³மனமக்³கோ³. தே³வோதி மேகோ⁴. காலேனகாலந்தி காலே காலே, அன்வத்³த⁴மாஸங் வா அனுத³ஸாஹங் வாதி அத்தோ². தா⁴ரந்தி வுட்டி²ங். நானுப்பவெச்செ²ய்யாதி ந பவேஸெய்ய, ந வஸ்ஸெய்யாதி அத்தோ². ஸீதா வாரிதா⁴ரா உப்³பி⁴ஜ்ஜித்வாதி ஸீதங் வாரி தங் உத³கரஹத³ங் பூரயமானங் உப்³பி⁴ஜ்ஜித்வா. ஹெட்டா² உக்³க³ச்ச²னஉத³கஞ்ஹி உக்³க³ந்த்வா உக்³க³ந்த்வா பி⁴ஜ்ஜந்தங் உத³கங் கோ²பே⁴தி. சதூஹி தி³ஸாஹி பவிஸனஉத³கங் புராணபண்ணதிணகட்ட²த³ண்ட³காதீ³ஹி உத³கங் கோ²பே⁴தி. வுட்டி²உத³கங் தா⁴ரானிபாதபுப்பு²ளகேஹி உத³கங் கோ²பே⁴தி. ஸன்னிஸின்னமேவ பன ஹுத்வா இத்³தி⁴னிம்மிதமிவ உப்பஜ்ஜமானங் உத³கங் இமங் பதே³ஸங் ப²ரதி, இமங் பதே³ஸங் ந ப²ரதீதி நத்தி². தேன அபு²டோகாஸோ நாம ந ஹோதீதி. தத்த² ரஹதோ³ விய கரஜகாயோ, உத³கங் விய து³தியஜ்ஜா²னஸுக²ங். ஸேஸங் புரிமனயேனேவ வேதி³தப்³ப³ங்.
428. Dutiyajjhānasukhaupamāyaṃ ubbhitodakoti ubbhinnaudako, na heṭṭhā ubbhijjitvā uggacchanaudako, antoyeva pana ubbhijjanaudakoti attho. Āyamukhanti āgamanamaggo. Devoti megho. Kālenakālanti kāle kāle, anvaddhamāsaṃ vā anudasāhaṃ vāti attho. Dhāranti vuṭṭhiṃ. Nānuppaveccheyyāti na paveseyya, na vasseyyāti attho. Sītā vāridhārā ubbhijjitvāti sītaṃ vāri taṃ udakarahadaṃ pūrayamānaṃ ubbhijjitvā. Heṭṭhā uggacchanaudakañhi uggantvā uggantvā bhijjantaṃ udakaṃ khobheti. Catūhi disāhi pavisanaudakaṃ purāṇapaṇṇatiṇakaṭṭhadaṇḍakādīhi udakaṃ khobheti. Vuṭṭhiudakaṃ dhārānipātapupphuḷakehi udakaṃ khobheti. Sannisinnameva pana hutvā iddhinimmitamiva uppajjamānaṃ udakaṃ imaṃ padesaṃ pharati, imaṃ padesaṃ na pharatīti natthi. Tena aphuṭokāso nāma na hotīti. Tattha rahado viya karajakāyo, udakaṃ viya dutiyajjhānasukhaṃ. Sesaṃ purimanayeneva veditabbaṃ.
429. ததியஜ்ஜா²னஸுக²உபமாயங் உப்பலானி எத்த² ஸந்தீதி உப்பலினீ. ஸேஸபத³த்³வயேஸுபி ஏஸேவ நயோ. எத்த² ச ஸேதரத்தனீலேஸு யங்கிஞ்சி உப்பலங் உப்பலமேவ, ஊனகஸதபத்தங் புண்ட³ரீகங், ஸதபத்தங் பது³மங். பத்தனியமங் வா வினாபி ஸேதங் பது³மங், ரத்தங் புண்ட³ரீகந்தி அயமெத்த² வினிச்ச²யோ. உத³கானுக்³க³தானீதி உத³கதோ ந உக்³க³தானி. அந்தோனிமுக்³க³போஸீனீதி உத³கதலஸ்ஸ அந்தோ நிமுக்³கா³னியேவ ஹுத்வா போஸீனி, வட்³டீ⁴னீதி அத்தோ². ஸேஸங் புரிமனயேனேவ வேதி³தப்³ப³ங்.
429. Tatiyajjhānasukhaupamāyaṃ uppalāni ettha santīti uppalinī. Sesapadadvayesupi eseva nayo. Ettha ca setarattanīlesu yaṃkiñci uppalaṃ uppalameva, ūnakasatapattaṃ puṇḍarīkaṃ, satapattaṃ padumaṃ. Pattaniyamaṃ vā vināpi setaṃ padumaṃ, rattaṃ puṇḍarīkanti ayamettha vinicchayo. Udakānuggatānīti udakato na uggatāni. Antonimuggaposīnīti udakatalassa anto nimuggāniyeva hutvā posīni, vaḍḍhīnīti attho. Sesaṃ purimanayeneva veditabbaṃ.
430. சதுத்த²ஜ்ஜா²னஸுக²உபமாயங் பரிஸுத்³தே⁴ன சேதஸா பரியோதா³தேனாதி எத்த² நிருபக்கிலேஸட்டே²ன பரிஸுத்³த⁴ங். பப⁴ஸ்ஸரட்டே²ன பரியோதா³தங் வேதி³தப்³ப³ங். ஓதா³தேன வத்தே²னாதி இத³ங் உதுப²ரணத்த²ங் வுத்தங். கிலிட்ட²வத்தே²ன ஹி உதுப²ரணங் ந ஹோதி, தங்க²ணதோ⁴தபரிஸுத்³தே⁴ன உதுப²ரணங் ப³லவங் ஹோதி. இமிஸ்ஸா ஹி உபமாய வத்த²ங் விய கரஜகாயோ. உதுப²ரணங் விய சதுத்த²ஜ்ஜா²னஸுக²ங். தஸ்மா யதா² ஸுன்ஹாதஸ்ஸ புரிஸஸ்ஸ பரிஸுத்³த⁴ங் வத்த²ங் ஸஸீஸங் பாருபித்வா நிஸின்னஸ்ஸ ஸரீரதோ உது ஸப்³ப³மேவ வத்த²ங் ப²ரதி, ந கோசி வத்த²ஸ்ஸ அபு²டோகாஸோ ஹோதி. ஏவங் சதுத்த²ஜ்ஜா²னஸுகே²ன பி⁴க்கு²னோ கரஜகாயஸ்ஸ ந கோசி ஓகாஸோ அபு²டோ ஹோதீதி ஏவமெத்த² அத்தோ² த³ட்ட²ப்³போ³. சதுத்த²ஜ்ஜா²னசித்தமேவ வா வத்த²ங் விய, தங்ஸமுட்டா²னரூபங் உதுப²ரணங் விய. யதா² ஹி கத்த²சி ஓதா³தவத்தே² காயங் அப்பு²ஸந்தேபி தங்ஸமுட்டா²னேன உதுனா ஸப்³ப³த்த²கமேவ காயோ பு²ட்டோ² ஹோதி. ஏவங் சதுத்த²ஜ்ஜா²னஸமுட்டி²தேன ஸுகு²மரூபேன ஸப்³ப³த்த²கமேவ பி⁴க்கு²னோ கரஜகாயோ பு²டோ ஹோதீதி ஏவமெத்த² அத்தோ² த³ட்ட²ப்³போ³.
430. Catutthajjhānasukhaupamāyaṃ parisuddhena cetasā pariyodātenāti ettha nirupakkilesaṭṭhena parisuddhaṃ. Pabhassaraṭṭhena pariyodātaṃ veditabbaṃ. Odātena vatthenāti idaṃ utupharaṇatthaṃ vuttaṃ. Kiliṭṭhavatthena hi utupharaṇaṃ na hoti, taṅkhaṇadhotaparisuddhena utupharaṇaṃ balavaṃ hoti. Imissā hi upamāya vatthaṃ viya karajakāyo. Utupharaṇaṃ viya catutthajjhānasukhaṃ. Tasmā yathā sunhātassa purisassa parisuddhaṃ vatthaṃ sasīsaṃ pārupitvā nisinnassa sarīrato utu sabbameva vatthaṃ pharati, na koci vatthassa aphuṭokāso hoti. Evaṃ catutthajjhānasukhena bhikkhuno karajakāyassa na koci okāso aphuṭo hotīti evamettha attho daṭṭhabbo. Catutthajjhānacittameva vā vatthaṃ viya, taṃsamuṭṭhānarūpaṃ utupharaṇaṃ viya. Yathā hi katthaci odātavatthe kāyaṃ apphusantepi taṃsamuṭṭhānena utunā sabbatthakameva kāyo phuṭṭho hoti. Evaṃ catutthajjhānasamuṭṭhitena sukhumarūpena sabbatthakameva bhikkhuno karajakāyo phuṭo hotīti evamettha attho daṭṭhabbo.
431. புப்³பே³னிவாஸஞாணஉபமாயங் தங்தி³வஸங் கதகிரியா பாகடா ஹோதீதி தங்தி³வஸங் க³தகா³மத்தயமேவ க³ஹிதங். தத்த² கா³மத்தயங் க³தபுரிஸோ விய புப்³பே³னிவாஸஞாணலாபீ⁴ த³ட்ட²ப்³போ³. தயோ கா³மா விய தயோ ப⁴வா த³ட்ட²ப்³பா³. தஸ்ஸ புரிஸஸ்ஸ தீஸு கா³மேஸு தங்தி³வஸங் கதகிரியாய ஆவிபா⁴வோ விய புப்³பே³னிவாஸாய சித்தங் அபி⁴னீஹரித்வா நிஸின்னஸ்ஸ பி⁴க்கு²னோ தீஸு ப⁴வேஸு கதகிரியாய ஆவிபா⁴வோ த³ட்ட²ப்³போ³.
431. Pubbenivāsañāṇaupamāyaṃ taṃdivasaṃ katakiriyā pākaṭā hotīti taṃdivasaṃ gatagāmattayameva gahitaṃ. Tattha gāmattayaṃ gatapuriso viya pubbenivāsañāṇalābhī daṭṭhabbo. Tayo gāmā viya tayo bhavā daṭṭhabbā. Tassa purisassa tīsu gāmesu taṃdivasaṃ katakiriyāya āvibhāvo viya pubbenivāsāya cittaṃ abhinīharitvā nisinnassa bhikkhuno tīsu bhavesu katakiriyāya āvibhāvo daṭṭhabbo.
432. தி³ப்³ப³சக்கு²உபமாயங் த்³வே அகா³ராதி த்³வே க⁴ரா. ஸத்³வாராதி ஸம்முக²த்³வாரா. அனுசங்கமந்தேதி அபராபரங் ஸஞ்சரந்தே. அனுவிசரந்தேதி இதோ சிதோ ச விசரந்தே, இதோ பன கே³ஹா நிக்க²மித்வா ஏதங் கே³ஹங், ஏதஸ்மா வா நிக்க²மித்வா இமங் கே³ஹங் பவிஸனவஸேனபி த³ட்ட²ப்³பா³. தத்த² த்³வே அகா³ரா ஸத்³வாரா விய சுதிபடிஸந்தி⁴யோ, சக்கு²மா புரிஸோ விய தி³ப்³ப³சக்கு²ஞாணலாபீ⁴, சக்கு²மதோ புரிஸஸ்ஸ த்³வின்னங் கே³ஹானங் அந்தரே ட²த்வா பஸ்ஸதோ த்³வே அகா³ரே பவிஸனகனிக்க²மனகபுரிஸானங் பாகடகாலோ விய தி³ப்³ப³சக்கு²லாபி⁴னோ ஆலோகங் வட்³டெ⁴த்வா ஓலோகெந்தஸ்ஸ சவனகஉபபஜ்ஜனகஸத்தானங் பாகடகாலோ. கிங் பன தே ஞாணஸ்ஸ பாகடா, புக்³க³லஸ்ஸாதி? ஞாணஸ்ஸ. தஸ்ஸ பாகடத்தா பன புக்³க³லஸ்ஸ பாகடாயேவாதி.
432. Dibbacakkhuupamāyaṃ dve agārāti dve gharā. Sadvārāti sammukhadvārā. Anucaṅkamanteti aparāparaṃ sañcarante. Anuvicaranteti ito cito ca vicarante, ito pana gehā nikkhamitvā etaṃ gehaṃ, etasmā vā nikkhamitvā imaṃ gehaṃ pavisanavasenapi daṭṭhabbā. Tattha dve agārā sadvārā viya cutipaṭisandhiyo, cakkhumā puriso viya dibbacakkhuñāṇalābhī, cakkhumato purisassa dvinnaṃ gehānaṃ antare ṭhatvā passato dve agāre pavisanakanikkhamanakapurisānaṃ pākaṭakālo viya dibbacakkhulābhino ālokaṃ vaḍḍhetvā olokentassa cavanakaupapajjanakasattānaṃ pākaṭakālo. Kiṃ pana te ñāṇassa pākaṭā, puggalassāti? Ñāṇassa. Tassa pākaṭattā pana puggalassa pākaṭāyevāti.
433. ஆஸவக்க²யஞாணஉபமாயங் பப்³ப³தஸங்கே²பேதி பப்³ப³தமத்த²கே. அனாவிலோதி நிக்கத்³த³மோ. ஸிப்பியோ ச ஸம்பு³கா ச ஸிப்பிஸம்பு³கங். ஸக்க²ரா ச கத²லா ச ஸக்க²ரகத²லங். மச்சா²னங் கு³ம்பா³ க⁴டாதி மச்ச²கு³ம்ப³ங். திட்ட²ந்தம்பி சரந்தம்பீதி எத்த² ஸக்க²ரகத²லங் திட்ட²தியேவ, இதரானி சரந்திபி திட்ட²ந்திபி. யதா² பன அந்தரந்தரா டி²தாஸுபி நிஸின்னாஸுபி விஜ்ஜமானாஸுபி, ‘‘ஏதா கா³வோ சரந்தீ’’தி சரந்தியோ உபாதா³ய இதராபி சரந்தீதி வுச்சந்தி. ஏவங் திட்ட²ந்தமேவ ஸக்க²ரகத²லங் உபாதா³ய இதரம்பி த்³வயங் திட்ட²ந்தந்தி வுத்தங். இதரஞ்ச த்³வயங் சரந்தங் உபாதா³ய ஸக்க²ரகத²லம்பி சரந்தந்தி வுத்தங். தத்த² சக்கு²மதோ புரிஸஸ்ஸ தீரே ட²த்வா பஸ்ஸதோ ஸிப்பிஸம்பு³காதீ³னங் விபூ⁴தகாலோ விய ஆஸவானங் க²யாய சித்தங் நீஹரித்வா நிஸின்னஸ்ஸ பி⁴க்கு²னோ சதுன்னங் ஸச்சானங் விபூ⁴தகாலோ த³ட்ட²ப்³போ³.
433. Āsavakkhayañāṇaupamāyaṃ pabbatasaṅkhepeti pabbatamatthake. Anāviloti nikkaddamo. Sippiyo ca sambukā ca sippisambukaṃ. Sakkharā ca kathalā ca sakkharakathalaṃ. Macchānaṃ gumbā ghaṭāti macchagumbaṃ. Tiṭṭhantampi carantampīti ettha sakkharakathalaṃ tiṭṭhatiyeva, itarāni carantipi tiṭṭhantipi. Yathā pana antarantarā ṭhitāsupi nisinnāsupi vijjamānāsupi, ‘‘etā gāvo carantī’’ti carantiyo upādāya itarāpi carantīti vuccanti. Evaṃ tiṭṭhantameva sakkharakathalaṃ upādāya itarampi dvayaṃ tiṭṭhantanti vuttaṃ. Itarañca dvayaṃ carantaṃ upādāya sakkharakathalampi carantanti vuttaṃ. Tattha cakkhumato purisassa tīre ṭhatvā passato sippisambukādīnaṃ vibhūtakālo viya āsavānaṃ khayāya cittaṃ nīharitvā nisinnassa bhikkhuno catunnaṃ saccānaṃ vibhūtakālo daṭṭhabbo.
434. இதா³னி ஸத்தஹாகாரேஹி ஸலிங்க³தோ ஸகு³ணதோ கீ²ணாஸவஸ்ஸ நாமங் க³ண்ஹந்தோ, அயங் வுச்சதி, பி⁴க்க²வே, பி⁴க்கு² ஸமணோ இதிபீதிஆதி³மாஹ. தத்த² ஏவங் கோ², பி⁴க்க²வே, பி⁴க்கு² ஸமணோ ஹோதீதிஆதீ³ஸு, பி⁴க்க²வே, ஏவங் பி⁴க்கு² ஸமிதபாபத்தா ஸமணோ ஹோதி. பா³ஹிதபாபத்தா ப்³ராஹ்மணோ ஹோதி. ந்ஹாதகிலேஸத்தா ந்ஹாதகோ ஹோதி, தோ⁴தகிலேஸத்தாதி அத்தோ². சதுமக்³க³ஞாணஸங்கா²தேஹி வேதே³ஹி அகுஸலத⁴ம்மானங் க³தத்தா வேத³கூ³ ஹோதி, விதி³தத்தாதி அத்தோ². தேனேவ விதி³தாஸ்ஸ ஹொந்தீதிஆதி³மாஹ. கிலேஸானங் ஸுதத்தா ஸொத்தியோ ஹோதி, நிஸ்ஸுதத்தா அபஹதத்தாதி அத்தோ². கிலேஸானங் ஆரகத்தா அரியோ ஹோதி, ஹதத்தாதி அத்தோ². தேஹி ஆரகத்தா அரஹங் ஹோதி, தூ³ரீபூ⁴தத்தாதி அத்தோ². ஸேஸங் ஸப³த்த² பாகடமேவாதி.
434. Idāni sattahākārehi saliṅgato saguṇato khīṇāsavassa nāmaṃ gaṇhanto, ayaṃ vuccati, bhikkhave, bhikkhu samaṇo itipītiādimāha. Tattha evaṃ kho, bhikkhave, bhikkhu samaṇohotītiādīsu, bhikkhave, evaṃ bhikkhu samitapāpattā samaṇo hoti. Bāhitapāpattā brāhmaṇo hoti. Nhātakilesattā nhātako hoti, dhotakilesattāti attho. Catumaggañāṇasaṅkhātehi vedehi akusaladhammānaṃ gatattā vedagū hoti, viditattāti attho. Teneva viditāssa hontītiādimāha. Kilesānaṃ sutattā sottiyo hoti, nissutattā apahatattāti attho. Kilesānaṃ ārakattā ariyo hoti, hatattāti attho. Tehi ārakattā arahaṃ hoti, dūrībhūtattāti attho. Sesaṃ sabattha pākaṭamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாஅஸ்ஸபுரஸுத்தவண்ணனா நிட்டி²தா.
Mahāassapurasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. மஹாஅஸ்ஸபுரஸுத்தங் • 9. Mahāassapurasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. மஹாஅஸ்ஸபுரஸுத்தவண்ணனா • 9. Mahāassapurasuttavaṇṇanā
