| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. மஹாசத்தாரீஸகஸுத்தவண்ணனா
7. Mahācattārīsakasuttavaṇṇanā
136. ஏவங் மே ஸுதந்தி மஹாசத்தாரீஸகஸுத்தங். தத்த² அரியந்தி நித்³தோ³ஸங் லோகுத்தரங், நித்³தோ³ஸஞ்ஹி ‘‘அரிய’’ந்தி வுச்சதி. ஸம்மாஸமாதி⁴ந்தி மக்³க³ஸமாதி⁴ங். ஸஉபனிஸந்தி ஸபச்சயங். ஸபரிக்கா²ரந்தி ஸபரிவாரங்.
136.Evaṃme sutanti mahācattārīsakasuttaṃ. Tattha ariyanti niddosaṃ lokuttaraṃ, niddosañhi ‘‘ariya’’nti vuccati. Sammāsamādhinti maggasamādhiṃ. Saupanisanti sapaccayaṃ. Saparikkhāranti saparivāraṃ.
பரிக்க²தாதி பரிவாரிதா. ஸம்மாதி³ட்டி² புப்³ப³ங்க³மா ஹோதீதி த்³விதா⁴ ஸம்மாதி³ட்டி² புப்³ப³ங்க³மா ஹோதி புரேசாரிகா விபஸ்ஸனாஸம்மாதி³ட்டி² ச மக்³க³ஸம்மாதி³ட்டி² ச. விபஸ்ஸனாஸம்மாதி³ட்டி² தேபூ⁴மகஸங்கா²ரே அனிச்சாதி³வஸேன பரிவீமங்ஸதி; மக்³க³ஸம்மாதி³ட்டி² பன பரிவீமங்ஸனபரியோஸானே பூ⁴மிலத்³த⁴ங் வட்டங் ஸமுக்³கா⁴டயமானா வூபஸமயமானா ஸீதுத³கக⁴டஸஹஸ்ஸங் மத்த²கே ஆஸிஞ்சமானா விய உப்பஜ்ஜதி. யதா² ஹி கெ²த்தங் குருமானோ கஸ்ஸகோ பட²மங் அரஞ்ஞே ருக்கே² சி²ந்த³தி, பச்சா² அக்³கி³ங் தே³தி, ஸோ அக்³கி³ பட²மங் சி²ன்னே ருக்கே² அனவஸேஸே ஜா²பேதி, ஏவமேவ விபஸ்ஸனாஸம்மாதி³ட்டி² பட²மங் அனிச்சாதி³வஸேன ஸங்கா²ரே வீமங்ஸதி, மக்³க³ஸம்மாதி³ட்டி² தாய வீமங்ஸனத்த²ங் ஸங்கா²ரே புன அப்பவத்திவஸேன ஸமுக்³கா⁴டயமானா உப்பஜ்ஜதி, ஸா து³விதா⁴பி இத⁴ அதி⁴ப்பேதா.
Parikkhatāti parivāritā. Sammādiṭṭhipubbaṅgamā hotīti dvidhā sammādiṭṭhi pubbaṅgamā hoti purecārikā vipassanāsammādiṭṭhi ca maggasammādiṭṭhi ca. Vipassanāsammādiṭṭhi tebhūmakasaṅkhāre aniccādivasena parivīmaṃsati; maggasammādiṭṭhi pana parivīmaṃsanapariyosāne bhūmiladdhaṃ vaṭṭaṃ samugghāṭayamānā vūpasamayamānā sītudakaghaṭasahassaṃ matthake āsiñcamānā viya uppajjati. Yathā hi khettaṃ kurumāno kassako paṭhamaṃ araññe rukkhe chindati, pacchā aggiṃ deti, so aggi paṭhamaṃ chinne rukkhe anavasese jhāpeti, evameva vipassanāsammādiṭṭhi paṭhamaṃ aniccādivasena saṅkhāre vīmaṃsati, maggasammādiṭṭhi tāya vīmaṃsanatthaṃ saṅkhāre puna appavattivasena samugghāṭayamānā uppajjati, sā duvidhāpi idha adhippetā.
மிச்சா²தி³ட்டீ²தி பஜானாதீதி மிச்சா²தி³ட்டி²ங் அனிச்சங் து³க்க²ங் அனத்தாதி லக்க²ணபடிவேதே⁴ன ஆரம்மணதோ பஜானாதி, ஸம்மாதி³ட்டி²ங் கிச்சதோ அஸம்மோஹதோ பஜானாதி. ஸாஸ்ஸ ஹோதி ஸம்மாதி³ட்டீ²தி ஸா ஏவங் பஜானநா அஸ்ஸ ஸம்மாதி³ட்டி² நாம ஹோதி.
Micchādiṭṭhīti pajānātīti micchādiṭṭhiṃ aniccaṃ dukkhaṃ anattāti lakkhaṇapaṭivedhena ārammaṇato pajānāti, sammādiṭṭhiṃ kiccato asammohato pajānāti. Sāssa hoti sammādiṭṭhīti sā evaṃ pajānanā assa sammādiṭṭhi nāma hoti.
த்³வாயங் வதா³மீதி த்³வயங் வதா³மி, து³வித⁴கொட்டா²ஸங் வதா³மீதி அத்தோ². புஞ்ஞபா⁴கி³யாதி புஞ்ஞகொட்டா²ஸபூ⁴தா. உபதி⁴வேபக்காதி உபதி⁴ஸங்கா²தஸ்ஸ விபாகஸ்ஸ தா³யிகா.
Dvāyaṃ vadāmīti dvayaṃ vadāmi, duvidhakoṭṭhāsaṃ vadāmīti attho. Puññabhāgiyāti puññakoṭṭhāsabhūtā. Upadhivepakkāti upadhisaṅkhātassa vipākassa dāyikā.
பஞ்ஞா பஞ்ஞிந்த்³ரியந்திஆதீ³ஸு விப⁴ஜித்வா விப⁴ஜித்வா அமதத்³வாரங் பஞ்ஞபேதி த³ஸ்ஸேதீதி பஞ்ஞா. தஸ்மிங் அத்தே² இந்த³த்தங் கரோதீதி பஞ்ஞிந்த்³ரியங். அவிஜ்ஜாய ந கம்பதீதி பஞ்ஞாப³லங். பொ³ஜ்ஜ²ங்க³ப்பத்தா ஹுத்வா சதுஸச்சத⁴ம்மே விசினாதீதி த⁴ம்மவிசயஸம்பொ³ஜ்ஜ²ங்கோ³. மக்³க³ஸம்பத்தியா பஸட்டா² ஸோப⁴னா தி³ட்டீ²தி ஸம்மாதி³ட்டி². அரியமக்³க³ஸ்ஸ அங்க³ந்தி மக்³க³ங்க³ங். ஸோதி ஸோ பி⁴க்கு². பஹானாயாதி பஜஹனத்தா²ய. உபஸம்பதா³யாதி படிலாப⁴த்தா²ய. ஸம்மாவாயாமோதி நிய்யானிகோ குஸலவாயாமோ. ஸதோதி ஸதியா ஸமன்னாக³தோ ஹுத்வா. அனுபரிதா⁴வந்தி அனுபரிவத்தந்தீதி ஸஹஜாதா ச புரேஜாதா ச ஹுத்வா பரிவாரெந்தி. எத்த² ஹி ஸம்மாவாயாமோ ச ஸம்மாஸதி ச லோகுத்தரஸம்மாதி³ட்டி²ங் ஸஹஜாதா பரிவாரெந்தி ராஜானங் விய ஏகரதே² டி²தா அஸிக்³கா³ஹச²த்தக்³கா³ஹா. விபஸ்ஸனாஸம்மாதி³ட்டி² பன புரேஜாதா ஹுத்வா பரிவாரேதி ரத²ஸ்ஸ புரதோ பத்திகாத³யோ விய. து³தியபப்³ப³தோ பட்டா²ய பன ஸம்மாஸங்கப்பாதீ³னங் தயோபி ஸஹஜாதபரிவாராவ ஹொந்தீதி வேதி³தப்³பா³.
Paññā paññindriyantiādīsu vibhajitvā vibhajitvā amatadvāraṃ paññapeti dassetīti paññā. Tasmiṃ atthe indattaṃ karotīti paññindriyaṃ. Avijjāya na kampatīti paññābalaṃ. Bojjhaṅgappattā hutvā catusaccadhamme vicinātīti dhammavicayasambojjhaṅgo. Maggasampattiyā pasaṭṭhā sobhanā diṭṭhīti sammādiṭṭhi. Ariyamaggassa aṅganti maggaṅgaṃ. Soti so bhikkhu. Pahānāyāti pajahanatthāya. Upasampadāyāti paṭilābhatthāya. Sammāvāyāmoti niyyāniko kusalavāyāmo. Satoti satiyā samannāgato hutvā. Anuparidhāvanti anuparivattantīti sahajātā ca purejātā ca hutvā parivārenti. Ettha hi sammāvāyāmo ca sammāsati ca lokuttarasammādiṭṭhiṃ sahajātā parivārenti rājānaṃ viya ekarathe ṭhitā asiggāhachattaggāhā. Vipassanāsammādiṭṭhi pana purejātā hutvā parivāreti rathassa purato pattikādayo viya. Dutiyapabbato paṭṭhāya pana sammāsaṅkappādīnaṃ tayopi sahajātaparivārāva hontīti veditabbā.
137. மிச்சா²ஸங்கப்போதி பஜானாதீதி மிச்சா²ஸங்கப்பங் அனிச்சங் து³க்க²ங் அனத்தாதி லக்க²ணபடிவேதே⁴ன ஆரம்மணதோ பஜானாதி ஸம்மாஸங்கப்பங் கிச்சதோ அஸம்மோஹதோ பஜானாதி. இதோ அபரேஸு ஸம்மாவாசாதீ³ஸுபி ஏவமேவ யோஜனா வேதி³தப்³பா³. காமஸங்கப்பாத³யோ த்³வேதா⁴விதக்கஸுத்தே (ம॰ நி॰ 1.206) வுத்தாயேவ.
137.Micchāsaṅkappoti pajānātīti micchāsaṅkappaṃ aniccaṃ dukkhaṃ anattāti lakkhaṇapaṭivedhena ārammaṇato pajānāti sammāsaṅkappaṃ kiccato asammohato pajānāti. Ito aparesu sammāvācādīsupi evameva yojanā veditabbā. Kāmasaṅkappādayo dvedhāvitakkasutte (ma. ni. 1.206) vuttāyeva.
தக்கோதிஆதீ³ஸு தக்கனவஸேன தக்கோ. ஸ்வேவ ச உபஸக்³கே³ன பத³ங் வட்³டெ⁴த்வா விதக்கோதி வுத்தோ, ஸ்வேவ ஸங்கப்பனவஸேன ஸங்கப்போ. ஏகக்³கோ³ ஹுத்வா ஆரம்மணே அப்பேதீதி அப்பனா . உபஸக்³கே³ன பன பத³ங் வட்³டெ⁴த்வா ப்³யப்பனாதி வுத்தங். சேதஸோ அபி⁴னிரோபனாதி சித்தஸ்ஸ அபி⁴னிரோபனா. விதக்கஸ்மிஞ்ஹி ஸதி விதக்கோ ஆரம்மணே சித்தங் அபி⁴னிரோபேதி விதக்கே பன அஸதி அத்தனோயேவ த⁴ம்மதாய சித்தங் ஆரம்மணங் அபி⁴ருஹதி ஜாதிஸம்பன்னோ அபி⁴ஞ்ஞாதபுரிஸோ விய ராஜகே³ஹங். அனபி⁴ஞ்ஞாதஸ்ஸ ஹி படிஹாரேன வா தோ³வாரிகேன வா அத்தோ² ஹோதி, அபி⁴ஞ்ஞாதங் ஜாதிஸம்பன்னங் ஸப்³பே³ ராஜராஜமஹாமத்தா ஜானந்தீதி அத்தனோவ த⁴ம்மதாய நிக்க²மதி சேவ பவிஸதி ச, ஏவங்ஸம்பத³மித³ங் வேதி³தப்³ப³ங். வாசங் ஸங்க²ரோதீதி வசீஸங்கா²ரோ. எத்த² ச லோகியவிதக்கோ வாசங் ஸங்க²ரோதி, ந லோகுத்தரோ. கிஞ்சாபி ந ஸங்க²ரோதி, வசீஸங்கா²ரொத்வேவ ச பனஸ்ஸ நாமங் ஹோதி. ஸம்மாஸங்கப்பங் அனுபரிதா⁴வந்தீதி லோகுத்தரஸம்மாஸங்கப்பங் பரிவாரெந்தி. எத்த² ச தயோபி நெக்க²ம்மஸங்கப்பாத³யோ புப்³ப³பா⁴கே³ நானாசித்தேஸு லப்³ப⁴ந்தி, மக்³க³க்க²ணே பன திண்ணம்பி காமஸங்கப்பாதீ³னஞ்ச பத³ச்சே²த³ங் ஸமுக்³கா⁴தங் கரொந்தோ மக்³க³ங்க³ங் பூரயமானோ ஏகோவ ஸம்மாஸங்கப்போ உப்பஜ்ஜித்வா நெக்க²ம்மஸங்கப்பாதி³வஸேன தீணி நாமானி லப⁴தி. பரதோ ஸம்மாவாசாதீ³ஸுபி ஏஸேவ நயோ.
Takkotiādīsu takkanavasena takko. Sveva ca upasaggena padaṃ vaḍḍhetvā vitakkoti vutto, sveva saṅkappanavasena saṅkappo. Ekaggo hutvā ārammaṇe appetīti appanā. Upasaggena pana padaṃ vaḍḍhetvā byappanāti vuttaṃ. Cetaso abhiniropanāti cittassa abhiniropanā. Vitakkasmiñhi sati vitakko ārammaṇe cittaṃ abhiniropeti vitakke pana asati attanoyeva dhammatāya cittaṃ ārammaṇaṃ abhiruhati jātisampanno abhiññātapuriso viya rājagehaṃ. Anabhiññātassa hi paṭihārena vā dovārikena vā attho hoti, abhiññātaṃ jātisampannaṃ sabbe rājarājamahāmattā jānantīti attanova dhammatāya nikkhamati ceva pavisati ca, evaṃsampadamidaṃ veditabbaṃ. Vācaṃ saṅkharotīti vacīsaṅkhāro. Ettha ca lokiyavitakko vācaṃ saṅkharoti, na lokuttaro. Kiñcāpi na saṅkharoti, vacīsaṅkhārotveva ca panassa nāmaṃ hoti. Sammāsaṅkappaṃ anuparidhāvantīti lokuttarasammāsaṅkappaṃ parivārenti. Ettha ca tayopi nekkhammasaṅkappādayo pubbabhāge nānācittesu labbhanti, maggakkhaṇe pana tiṇṇampi kāmasaṅkappādīnañca padacchedaṃ samugghātaṃ karonto maggaṅgaṃ pūrayamāno ekova sammāsaṅkappo uppajjitvā nekkhammasaṅkappādivasena tīṇi nāmāni labhati. Parato sammāvācādīsupi eseva nayo.
138. முஸாவாதா³ வேரமணீதிஆதீ³ஸு விரதிபி சேதனாபி வட்டதி. ஆரதீதிஆதீ³ஸு வசீது³ச்சரிதேஹி ஆரகா ரமதீதி ஆரதி. வினா தேஹி ரமதீதி விரதி. ததோ ததோ படினிவத்தாவ ஹுத்வா தேஹி வினா ரமதீதி படிவிரதி. உபஸக்³க³வஸேன வா பத³ங் வட்³டி⁴தங், ஸப்³ப³மித³ங் ஓரமனபா⁴வஸ்ஸேவ அதி⁴வசனங். வேரங் மணதி வினாஸேதீதி வேரமணி. இத³ம்பி ஓரமனஸ்ஸேவ வேவசனங்.
138.Musāvādāveramaṇītiādīsu viratipi cetanāpi vaṭṭati. Āratītiādīsu vacīduccaritehi ārakā ramatīti ārati. Vinā tehi ramatīti virati. Tato tato paṭinivattāva hutvā tehi vinā ramatīti paṭivirati. Upasaggavasena vā padaṃ vaḍḍhitaṃ, sabbamidaṃ oramanabhāvasseva adhivacanaṃ. Veraṃ maṇati vināsetīti veramaṇi. Idampi oramanasseva vevacanaṃ.
139. பாணாதிபாதா வேரமணீதிஆதீ³ஸுபி சேதனா விரதீதி உப⁴யம்பி வட்டதியேவ.
139.Pāṇātipātā veramaṇītiādīsupi cetanā viratīti ubhayampi vaṭṭatiyeva.
140. குஹனாதிஆதீ³ஸு திவிதே⁴ன குஹனவத்து²னா லோகங் ஏதாய குஹயந்தி விம்ஹாபயந்தீதி குஹனா. லாப⁴ஸக்காரத்தி²கா ஹுத்வா ஏதாய லபந்தீதி லபனா. நிமித்தங் ஸீலமேதேஸந்தி நேமித்திகா, தேஸங் பா⁴வோ நேமித்திகதா. நிப்பேஸோ ஸீலமேதேஸந்தி நிப்பேஸிகா, தேஸங் பா⁴வோ நிப்பேஸிகதா. லாபே⁴ன லாப⁴ங் நிஜிகீ³ஸந்தி மக்³க³ந்தி பரியேஸந்தீதி லாபே⁴ன லாப⁴ங் நிஜிகீ³ஸனா, தேஸங் பா⁴வோ லாபே⁴ன லாப⁴ங் நிஜிகீ³ஸனதா. அயமெத்த² ஸங்கே²போ, வித்தா²ரேன பனேதா குஹனாதி³கா விஸுத்³தி⁴மக்³கே³ ஸீலனித்³தே³ஸேயேவ பாளிஞ்ச அட்ட²கத²ஞ்ச ஆஹரித்வா பகாஸிதா. மிச்சா²ஆஜீவஸ்ஸ பஹானாயாதி எத்த² ந கேவலங் பாளியங் ஆக³தோவ மிச்சா²ஆஜீவோ, ஆஜீவஹேது பன பவத்திதா பாணாதிபாதாத³யோ ஸத்தகம்மபத²சேதனாபி மிச்சா²ஆஜீவோவ. தாஸங்யேவ ஸத்தன்னங் சேதனானங் பத³பச்சே²த³ங் ஸமுக்³கா⁴தங் குருமானங் மக்³க³ங்க³ங் பூரயமானா உப்பன்னா விரதி ஸம்மாஆஜீவோ நாம.
140.Kuhanātiādīsu tividhena kuhanavatthunā lokaṃ etāya kuhayanti vimhāpayantīti kuhanā. Lābhasakkāratthikā hutvā etāya lapantīti lapanā. Nimittaṃ sīlametesanti nemittikā, tesaṃ bhāvo nemittikatā. Nippeso sīlametesanti nippesikā, tesaṃ bhāvo nippesikatā. Lābhena lābhaṃ nijigīsanti magganti pariyesantīti lābhena lābhaṃ nijigīsanā, tesaṃ bhāvo lābhena lābhaṃ nijigīsanatā. Ayamettha saṅkhepo, vitthārena panetā kuhanādikā visuddhimagge sīlaniddeseyeva pāḷiñca aṭṭhakathañca āharitvā pakāsitā. Micchāājīvassa pahānāyāti ettha na kevalaṃ pāḷiyaṃ āgatova micchāājīvo, ājīvahetu pana pavattitā pāṇātipātādayo sattakammapathacetanāpi micchāājīvova. Tāsaṃyeva sattannaṃ cetanānaṃ padapacchedaṃ samugghātaṃ kurumānaṃ maggaṅgaṃ pūrayamānā uppannā virati sammāājīvo nāma.
141. ஸம்மாதி³ட்டி²ஸ்ஸாதி மக்³க³ஸம்மாதி³ட்டி²யங் டி²தஸ்ஸ புக்³க³லஸ்ஸ. ஸம்மாஸங்கப்போ பஹோதீதி மக்³க³ஸம்மாஸங்கப்போ பஹோதி, ப²லஸம்மாதி³ட்டி²ஸ்ஸபி ப²லஸம்மாஸங்கப்போ பஹோதீதி ஏவங் ஸப்³ப³பதே³ஸு அத்தோ² வேதி³தப்³போ³. ஸம்மாஞாணஸ்ஸ ஸம்மாவிமுத்தீதி எத்த² பன மக்³க³ஸம்மாஸமாதி⁴ம்ஹி டி²தஸ்ஸ மக்³க³பச்சவெக்க²ணங் ஸம்மாஞாணங் பஹோதி, ப²லஸம்மாஸமாதி⁴ம்ஹி டி²தஸ்ஸ ப²லபச்சவெக்க²ணங் ஸம்மாஞாணங் பஹோதி. மக்³க³பச்சவெக்க²ணஸம்மாஞாணே ச டி²தஸ்ஸ மக்³க³ஸம்மாவிமுத்தி பஹோதி, ப²லபச்சவெக்க²ணஸம்மாஞாணே டி²தஸ்ஸ ப²லஸம்மாவிமுத்தி பஹோதீதி அத்தோ². எத்த² ச ட²பெத்வா அட்ட² ப²லங்கா³னி ஸம்மாஞாணங் பச்சவெக்க²ணங் கத்வா ஸம்மாவிமுத்திங் ப²லங் காதுங் வட்டதீதி வுத்தங்.
141.Sammādiṭṭhissāti maggasammādiṭṭhiyaṃ ṭhitassa puggalassa. Sammāsaṅkappo pahotīti maggasammāsaṅkappo pahoti, phalasammādiṭṭhissapi phalasammāsaṅkappo pahotīti evaṃ sabbapadesu attho veditabbo. Sammāñāṇassasammāvimuttīti ettha pana maggasammāsamādhimhi ṭhitassa maggapaccavekkhaṇaṃ sammāñāṇaṃ pahoti, phalasammāsamādhimhi ṭhitassa phalapaccavekkhaṇaṃ sammāñāṇaṃ pahoti. Maggapaccavekkhaṇasammāñāṇe ca ṭhitassa maggasammāvimutti pahoti, phalapaccavekkhaṇasammāñāṇe ṭhitassa phalasammāvimutti pahotīti attho. Ettha ca ṭhapetvā aṭṭha phalaṅgāni sammāñāṇaṃ paccavekkhaṇaṃ katvā sammāvimuttiṃ phalaṃ kātuṃ vaṭṭatīti vuttaṃ.
142. ஸம்மாதி³ட்டி²ஸ்ஸ , பி⁴க்க²வே, மிச்சா²தி³ட்டி² நிஜ்ஜிண்ணா ஹோதீதிஆதீ³ஸு அவஸேஸனிகாயபா⁴ணகா ப²லங் கதி²தந்தி வத³ந்தி, மஜ்ஜி²மபா⁴ணகா பன த³ஸன்னங் நிஜ்ஜரவத்தூ²னங் ஆக³தட்டா²னே மக்³கோ³ கதி²தோதி வத³ந்தி. தத்த² த³ஸ்ஸனட்டே²ன ஸம்மாதி³ட்டி² வேதி³தப்³பா³, விதி³தகரணட்டே²ன ஸம்மாஞாணங், தத³தி⁴முத்தட்டே²ன ஸம்மாவிமுத்தி.
142.Sammādiṭṭhissa, bhikkhave, micchādiṭṭhi nijjiṇṇā hotītiādīsu avasesanikāyabhāṇakā phalaṃ kathitanti vadanti, majjhimabhāṇakā pana dasannaṃ nijjaravatthūnaṃ āgataṭṭhāne maggo kathitoti vadanti. Tattha dassanaṭṭhena sammādiṭṭhi veditabbā, viditakaraṇaṭṭhena sammāñāṇaṃ, tadadhimuttaṭṭhena sammāvimutti.
வீஸதி குஸலபக்கா²தி ஸம்மாதி³ட்டி²ஆத³யோ த³ஸ, ‘‘ஸம்மாதி³ட்டி²பச்சயா ச அனேகே குஸலா த⁴ம்மா’’திஆதி³னா நயேன வுத்தா த³ஸாதி ஏவங் வீஸதி குஸலபக்கா² ஹொந்தி. வீஸதி அகுஸலபக்கா²தி ‘‘மிச்சா²தி³ட்டி² நிஜ்ஜிண்ணா ஹோதீ’’திஆதி³னா நயேன வுத்தா மிச்சா²தி³ட்டி²ஆத³யோ த³ஸ, ‘‘யே ச மிச்சா²தி³ட்டி²பச்சயா அனேகே பாபகா’’திஆதி³னா வுத்தா த³ஸ சாதி ஏவங் வீஸதி அகுஸலபக்கா² வேதி³தப்³பா³. மஹாசத்தாரீஸகோதி மஹாவிபாகதா³னேன மஹந்தானங் குஸலபக்கி²கானஞ்சேவ அகுஸலபக்கி²கானஞ்ச சத்தாரீஸாய த⁴ம்மானங் பகாஸிதத்தா மஹாசத்தாரீஸகோதி.
Vīsati kusalapakkhāti sammādiṭṭhiādayo dasa, ‘‘sammādiṭṭhipaccayā ca aneke kusalā dhammā’’tiādinā nayena vuttā dasāti evaṃ vīsati kusalapakkhā honti. Vīsati akusalapakkhāti ‘‘micchādiṭṭhi nijjiṇṇā hotī’’tiādinā nayena vuttā micchādiṭṭhiādayo dasa, ‘‘ye ca micchādiṭṭhipaccayā aneke pāpakā’’tiādinā vuttā dasa cāti evaṃ vīsati akusalapakkhā veditabbā. Mahācattārīsakoti mahāvipākadānena mahantānaṃ kusalapakkhikānañceva akusalapakkhikānañca cattārīsāya dhammānaṃ pakāsitattā mahācattārīsakoti.
இமஸ்மிஞ்ச பன ஸுத்தே பஞ்ச ஸம்மாதி³ட்டி²யோ கதி²தா விபஸ்ஸனாஸம்மாதி³ட்டி² கம்மஸ்ஸகதாஸம்மாதி³ட்டி² மக்³க³ஸம்மாதி³ட்டி² ப²லஸம்மாதி³ட்டி² பச்சவெக்க²ணாஸம்மாதி³ட்டீ²தி. தத்த² ‘‘மிச்சா²தி³ட்டி²ங் மிச்சா²தி³ட்டீ²தி பஜானாதீ’’திஆதி³னா நயேன வுத்தா விபஸ்ஸனாஸம்மாதி³ட்டி² நாம. ‘‘அத்தி² தி³ன்ன’’ந்திஆதி³னா நயேன வுத்தா கம்மஸ்ஸகதாஸம்மாதி³ட்டி² நாம. ‘‘ஸம்மாதி³ட்டி²ஸ்ஸ, பி⁴க்க²வே, ஸம்மாஸங்கப்போ பஹோதீ’’தி எத்த² பன மக்³க³ஸம்மாதி³ட்டி² ப²லஸம்மாதி³ட்டீ²தி த்³வேபி கதி²தா. ‘‘ஸம்மாஞாணங் பஹோதீ’’தி. எத்த² பன பச்சவெக்க²ணாஸம்மாதி³ட்டி² கதி²தாதி வேதி³தப்³பா³.
Imasmiñca pana sutte pañca sammādiṭṭhiyo kathitā vipassanāsammādiṭṭhi kammassakatāsammādiṭṭhi maggasammādiṭṭhi phalasammādiṭṭhi paccavekkhaṇāsammādiṭṭhīti. Tattha ‘‘micchādiṭṭhiṃ micchādiṭṭhīti pajānātī’’tiādinā nayena vuttā vipassanāsammādiṭṭhi nāma. ‘‘Atthi dinna’’ntiādinā nayena vuttā kammassakatāsammādiṭṭhi nāma. ‘‘Sammādiṭṭhissa, bhikkhave, sammāsaṅkappo pahotī’’ti ettha pana maggasammādiṭṭhi phalasammādiṭṭhīti dvepi kathitā. ‘‘Sammāñāṇaṃ pahotī’’ti. Ettha pana paccavekkhaṇāsammādiṭṭhi kathitāti veditabbā.
143. ஸம்மாதி³ட்டி²ங் சே ப⁴வங் க³ரஹதீதி மிச்சா²தி³ட்டி² நாமாயங் ஸோப⁴னாதி வத³ந்தோபி ஸம்மாதி³ட்டி² நாமாயங் ந ஸோப⁴னாதி வத³ந்தோபி ஸம்மாதி³ட்டி²ங் க³ரஹதி நாம. ஓக்கலாதி ஓக்கலஜனபத³வாஸினோ. வஸ்ஸப⁴ஞ்ஞாதி வஸ்ஸோ ச ப⁴ஞ்ஞோ சாதி த்³வே ஜனா. அஹேதுவாதா³தி நத்தி² ஹேது நத்தி² பச்சயோ ஸத்தானங் விஸுத்³தி⁴யாதி ஏவமாதி³வாதி³னோ. அகிரியவாதா³தி கரோதோ ந கரீயதி பாபந்தி ஏவங் கிரியபடிக்கே²பவாதி³னோ. நத்தி²கவாதா³தி நத்தி² தி³ன்னந்திஆதி³வாதி³னோ. தே இமேஸு தீஸுபி த³ஸ்ஸனேஸு ஓக்கந்தனியாமா அஹேஸுங். கத²ங் பனேதேஸு நியாமோ ஹோதீதி. யோ ஹி ஏவரூபங் லத்³தி⁴ங் க³ஹெத்வா ரத்திட்டா²னதி³வாட்டா²னே நிஸின்னோ ஸஜ்ஜா²யதி வீமங்ஸதி, தஸ்ஸ ‘‘நத்தி² ஹேது நத்தி² பச்சயோ கரோதோ ந கரீயதி பாபங், நத்தி² தி³ன்னங், காயஸ்ஸ பே⁴தா³ உச்சி²ஜ்ஜதீ’’தி தஸ்மிங் ஆரம்மணே மிச்சா²ஸதி ஸந்திட்ட²தி, சித்தங் ஏகக்³க³ங் ஹோதி, ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸு. ஸத்தமே பு³த்³தா⁴னம்பி அதேகிச்சோ² அனிவத்தீ அரிட்ட²கண்ட³கஸதி³ஸோ ஹோதி.
143.Sammādiṭṭhiṃce bhavaṃ garahatīti micchādiṭṭhi nāmāyaṃ sobhanāti vadantopi sammādiṭṭhi nāmāyaṃ na sobhanāti vadantopi sammādiṭṭhiṃ garahati nāma. Okkalāti okkalajanapadavāsino. Vassabhaññāti vasso ca bhañño cāti dve janā. Ahetuvādāti natthi hetu natthi paccayo sattānaṃ visuddhiyāti evamādivādino. Akiriyavādāti karoto na karīyati pāpanti evaṃ kiriyapaṭikkhepavādino. Natthikavādāti natthi dinnantiādivādino. Te imesu tīsupi dassanesu okkantaniyāmā ahesuṃ. Kathaṃ panetesu niyāmo hotīti. Yo hi evarūpaṃ laddhiṃ gahetvā rattiṭṭhānadivāṭṭhāne nisinno sajjhāyati vīmaṃsati, tassa ‘‘natthi hetu natthi paccayo karoto na karīyati pāpaṃ, natthi dinnaṃ, kāyassa bhedā ucchijjatī’’ti tasmiṃ ārammaṇe micchāsati santiṭṭhati, cittaṃ ekaggaṃ hoti, javanāni javanti. Paṭhamajavane satekiccho hoti, tathā dutiyādīsu. Sattame buddhānampi atekiccho anivattī ariṭṭhakaṇḍakasadiso hoti.
தத்த² கோசி ஏகங் த³ஸ்ஸனங் ஓக்கமதி, கோசி த்³வே, கோசி தீணிபி, நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மொக்க²மக்³கா³வரணஞ்ச. அப⁴ப்³போ³ தஸ்ஸ அத்தபா⁴வஸ்ஸ அனந்தரங் ஸக்³க³ம்பி க³ந்துங், பகே³வ மொக்க²ங், வட்டகா²ணு நாமேஸ ஸத்தோ பத²வீகோ³பகோ, யேபு⁴ய்யேன ஏவரூபஸ்ஸ ப⁴வதோ வுட்டா²னங் நத்தி². வஸ்ஸப⁴ஞ்ஞாபி ஏதி³ஸா அஹேஸுங். நிந்தா³ப்³யாரோஸஉபாரம்ப⁴ப⁴யாதி அத்தனோ நிந்தா³ப⁴யேன க⁴ட்டனப⁴யேன உபவாத³ப⁴யேன சாதி அத்தோ². ஸேஸங் ஸப்³ப³த்த² உத்தானமேவாதி.
Tattha koci ekaṃ dassanaṃ okkamati, koci dve, koci tīṇipi, niyatamicchādiṭṭhikova hoti, patto saggamaggāvaraṇañceva mokkhamaggāvaraṇañca. Abhabbo tassa attabhāvassa anantaraṃ saggampi gantuṃ, pageva mokkhaṃ, vaṭṭakhāṇu nāmesa satto pathavīgopako, yebhuyyena evarūpassa bhavato vuṭṭhānaṃ natthi. Vassabhaññāpi edisā ahesuṃ. Nindābyārosaupārambhabhayāti attano nindābhayena ghaṭṭanabhayena upavādabhayena cāti attho. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாசத்தாரீஸகஸுத்தவண்ணனா நிட்டி²தா.
Mahācattārīsakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. மஹாசத்தாரீஸகஸுத்தங் • 7. Mahācattārīsakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. மஹாசத்தாரீஸகஸுத்தவண்ணனா • 7. Mahācattārīsakasuttavaṇṇanā
