| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
4. மஹாசுந்த³ஸுத்தங்
4. Mahācundasuttaṃ
46. ஏவங் மே ஸுதங் – ஏகங் ஸமயங் ஆயஸ்மா மஹாசுந்தோ³ சேதீஸு விஹரதி ஸயங்ஜாதியங் 1. தத்ர கோ² ஆயஸ்மா மஹாசுந்தோ³ பி⁴க்கூ² ஆமந்தேஸி – ‘‘ஆவுஸோ பி⁴க்க²வே’’தி. ‘‘ஆவுஸோ’’தி கோ² தே பி⁴க்கூ² ஆயஸ்மதோ மஹாசுந்த³ஸ்ஸ பச்சஸ்ஸோஸுங். ஆயஸ்மா மஹாசுந்தோ³ ஏதத³வோச –
46. Evaṃ me sutaṃ – ekaṃ samayaṃ āyasmā mahācundo cetīsu viharati sayaṃjātiyaṃ 2. Tatra kho āyasmā mahācundo bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato mahācundassa paccassosuṃ. Āyasmā mahācundo etadavoca –
‘‘இதா⁴வுஸோ, த⁴ம்மயோகா³ பி⁴க்கூ² ஜா²யீ பி⁴க்கூ² அபஸாதெ³ந்தி – ‘இமே பன ஜா²யினொம்ஹா, ஜா²யினொம்ஹாதி ஜா²யந்தி பஜ்ஜா²யந்தி நிஜ்ஜா²யந்தி அவஜ்ஜா²யந்தி 3. கிமிமே 4 ஜா²யந்தி, கிந்திமே ஜா²யந்தி, கத²ங் இமே ஜா²யந்தீ’தி? தத்த² த⁴ம்மயோகா³ ச பி⁴க்கூ² நப்பஸீத³ந்தி, ஜா²யீ ச பி⁴க்கூ² நப்பஸீத³ந்தி, ந ச ப³ஹுஜனஹிதாய படிபன்னா ஹொந்தி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங்.
‘‘Idhāvuso, dhammayogā bhikkhū jhāyī bhikkhū apasādenti – ‘ime pana jhāyinomhā, jhāyinomhāti jhāyanti pajjhāyanti nijjhāyanti avajjhāyanti 5. Kimime 6 jhāyanti, kintime jhāyanti, kathaṃ ime jhāyantī’ti? Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘இத⁴ பனாவுஸோ, ஜா²யீ பி⁴க்கூ² த⁴ம்மயோகே³ பி⁴க்கூ² அபஸாதெ³ந்தி – ‘இமே பன த⁴ம்மயோக³ம்ஹா, த⁴ம்மயோக³ம்ஹாதி உத்³த⁴தா உன்னளா சபலா முக²ரா விகிண்ணவாசா முட்ட²ஸ்ஸதீ அஸம்பஜானா அஸமாஹிதா விப்³ப⁴ந்தசித்தா பாகதிந்த்³ரியா. கிமிமே த⁴ம்மயோகா³, கிந்திமே த⁴ம்மயோகா³, கத²ங் இமே த⁴ம்மயோகா³’தி? தத்த² ஜா²யீ ச பி⁴க்கூ² நப்பஸீத³ந்தி, த⁴ம்மயோகா³ ச பி⁴க்கூ² நப்பஸீத³ந்தி, ந ச ப³ஹுஜனஹிதாய படிபன்னா ஹொந்தி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங்.
‘‘Idha panāvuso, jhāyī bhikkhū dhammayoge bhikkhū apasādenti – ‘ime pana dhammayogamhā, dhammayogamhāti uddhatā unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Kimime dhammayogā, kintime dhammayogā, kathaṃ ime dhammayogā’ti? Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘இத⁴ பனாவுஸோ, த⁴ம்மயோகா³ பி⁴க்கூ² த⁴ம்மயோகா³னஞ்ஞேவ பி⁴க்கூ²னங் வண்ணங் பா⁴ஸந்தி, நோ ஜா²யீனங் பி⁴க்கூ²னங் வண்ணங் பா⁴ஸந்தி. தத்த² த⁴ம்மயோகா³ ச பி⁴க்கூ² நப்பஸீத³ந்தி, ஜா²யீ ச பி⁴க்கூ² நப்பஸீத³ந்தி, ந ச ப³ஹுஜனஹிதாய படிபன்னா ஹொந்தி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங்.
‘‘Idha panāvuso, dhammayogā bhikkhū dhammayogānaññeva bhikkhūnaṃ vaṇṇaṃ bhāsanti, no jhāyīnaṃ bhikkhūnaṃ vaṇṇaṃ bhāsanti. Tattha dhammayogā ca bhikkhū nappasīdanti, jhāyī ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘இத⁴ பனாவுஸோ, ஜா²யீ பி⁴க்கூ² ஜா²யீனஞ்ஞேவ பி⁴க்கூ²னங் வண்ணங் பா⁴ஸந்தி, நோ த⁴ம்மயோகா³னங் பி⁴க்கூ²னங் வண்ணங் பா⁴ஸந்தி. தத்த² ஜா²யீ ச பி⁴க்கூ² நப்பஸீத³ந்தி, த⁴ம்மயோகா³ ச பி⁴க்கூ² நப்பஸீத³ந்தி, ந ச ப³ஹுஜனஹிதாய படிபன்னா ஹொந்தி ப³ஹுஜனஸுகா²ய ப³ஹுனோ ஜனஸ்ஸ அத்தா²ய ஹிதாய ஸுகா²ய தே³வமனுஸ்ஸானங்.
‘‘Idha panāvuso, jhāyī bhikkhū jhāyīnaññeva bhikkhūnaṃ vaṇṇaṃ bhāsanti, no dhammayogānaṃ bhikkhūnaṃ vaṇṇaṃ bhāsanti. Tattha jhāyī ca bhikkhū nappasīdanti, dhammayogā ca bhikkhū nappasīdanti, na ca bahujanahitāya paṭipannā honti bahujanasukhāya bahuno janassa atthāya hitāya sukhāya devamanussānaṃ.
‘‘தஸ்மாதிஹாவுஸோ , ஏவங் ஸிக்கி²தப்³ப³ங் – ‘த⁴ம்மயோகா³ ஸமானா ஜா²யீனங் பி⁴க்கூ²னங் வண்ணங் பா⁴ஸிஸ்ஸாமா’தி. ஏவஞ்ஹி வோ, ஆவுஸோ, ஸிக்கி²தப்³ப³ங். தங் கிஸ்ஸ ஹேது? அச்ச²ரியா ஹேதே, ஆவுஸோ, புக்³க³லா து³ல்லபா⁴ லோகஸ்மிங், யே அமதங் தா⁴துங் காயேன பு²ஸித்வா விஹரந்தி. தஸ்மாதிஹாவுஸோ, ஏவங் ஸிக்கி²தப்³ப³ங் – ‘ஜா²யீ ஸமானா த⁴ம்மயோகா³னங் பி⁴க்கூ²னங் வண்ணங் பா⁴ஸிஸ்ஸாமா’தி. ஏவஞ்ஹி வோ, ஆவுஸோ, ஸிக்கி²தப்³ப³ங். தங் கிஸ்ஸ ஹேது? அச்ச²ரியா ஹேதே, ஆவுஸோ, புக்³க³லா து³ல்லபா⁴ லோகஸ்மிங் யே க³ம்பீ⁴ரங் அத்த²பத³ங் பஞ்ஞாய அதிவிஜ்ஜ² பஸ்ஸந்தீ’’தி. சதுத்த²ங்.
‘‘Tasmātihāvuso , evaṃ sikkhitabbaṃ – ‘dhammayogā samānā jhāyīnaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ, ye amataṃ dhātuṃ kāyena phusitvā viharanti. Tasmātihāvuso, evaṃ sikkhitabbaṃ – ‘jhāyī samānā dhammayogānaṃ bhikkhūnaṃ vaṇṇaṃ bhāsissāmā’ti. Evañhi vo, āvuso, sikkhitabbaṃ. Taṃ kissa hetu? Acchariyā hete, āvuso, puggalā dullabhā lokasmiṃ ye gambhīraṃ atthapadaṃ paññāya ativijjha passantī’’ti. Catutthaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. மஹாசுந்த³ஸுத்தவண்ணனா • 4. Mahācundasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-6. இணஸுத்தாதி³வண்ணனா • 3-6. Iṇasuttādivaṇṇanā
