| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8. மஹத்³த⁴னஸுத்தவண்ணனா
8. Mahaddhanasuttavaṇṇanā
28. நிதீ⁴யதீதி நிதா⁴னங். நிதா⁴தப்³ப³தங் க³தங் நிஹிதந்தி அத்தோ². முத்தஸாராதீ³தி முத்தாமணிவேளுரியபவாளரஜதஜாதரூபாதி³. ஸுவண்ணரஜதபா⁴ஜனாதீ³தி ஆதி³-ஸத்³தே³ன கஹாபண-த⁴ஞ்ஞகொட்ட²ப⁴ண்டா³தி³ங் ஸங்க³ண்ஹாதி. தம்பி ஹி நிச்சபரிப்³ப³யவஸேன பு⁴ஞ்ஜீயதீதி ‘‘போ⁴கோ³’’தி வுச்சதி. அஞ்ஞமஞ்ஞங் அபி⁴கி³ஜ்ஜ²ந்தீதி அஞ்ஞமஞ்ஞஸ்ஸ ஸந்தகங் அபி⁴கி³ஜ்ஜ²ந்தி. தேனாஹ ‘‘பத்தெ²ந்தீ’’தி. அனலங்கதாதி ந அலங் பரியத்தந்தி ஏவங் கதசித்தா, அத்ரிச்ச²தாமஹிச்ச²தாஹி அபி⁴பூ⁴தா. தேனாஹ ‘‘அதித்தா அபரியத்தஜாதா’’தி. உஸ்ஸுக்கஜாதேஸூதி தங்தங்கிச்சே ஸஞ்ஜாதஉஸ்ஸுக்கேஸு. நானாகிச்சஜாதேஸூதி நானாவித⁴கிச்சேஸு, ஸஞ்ஜாதனானாகிச்சேஸு வா. வட்டகா³மிகபஸுதேன வட்டஸோதங் அனுஸரந்தேஸு. தண்ஹானிவாஸதாய கே³ஹந்திபி அகா³ரந்திபி வுச்சதீதி ஆஹ ‘‘மாதுகா³மேன ஸத்³தி⁴ங் கே³ஹ’’ந்தி. விராஜியாதி ஹேதுஅத்த²தீ³பகங் பத³ந்தி ஆஹ ‘‘விராஜெத்வா’’தி, த்வா-ஸத்³தோ³பி சாயங் ஹேதுஅத்தோ²தி.
28. Nidhīyatīti nidhānaṃ. Nidhātabbataṃ gataṃ nihitanti attho. Muttasārādīti muttāmaṇiveḷuriyapavāḷarajatajātarūpādi. Suvaṇṇarajatabhājanādīti ādi-saddena kahāpaṇa-dhaññakoṭṭhabhaṇḍādiṃ saṅgaṇhāti. Tampi hi niccaparibbayavasena bhuñjīyatīti ‘‘bhogo’’ti vuccati. Aññamaññaṃ abhigijjhantīti aññamaññassa santakaṃ abhigijjhanti. Tenāha ‘‘patthentī’’ti. Analaṅkatāti na alaṃ pariyattanti evaṃ katacittā, atricchatāmahicchatāhi abhibhūtā. Tenāha ‘‘atittā apariyattajātā’’ti. Ussukkajātesūti taṃtaṃkicce sañjātaussukkesu. Nānākiccajātesūti nānāvidhakiccesu, sañjātanānākiccesu vā. Vaṭṭagāmikapasutena vaṭṭasotaṃ anusarantesu. Taṇhānivāsatāya gehantipi agārantipi vuccatīti āha ‘‘mātugāmena saddhiṃ geha’’nti. Virājiyāti hetuatthadīpakaṃ padanti āha ‘‘virājetvā’’ti, tvā-saddopi cāyaṃ hetuatthoti.
மஹத்³த⁴னஸுத்தவண்ணனா நிட்டி²தா.
Mahaddhanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. மஹத்³த⁴னஸுத்தங் • 8. Mahaddhanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. மஹத்³த⁴னஸுத்தவண்ணனா • 8. Mahaddhanasuttavaṇṇanā
