| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. மஹாத⁴ம்மஸமாதா³னஸுத்தவண்ணனா
6. Mahādhammasamādānasuttavaṇṇanā
473. ஏவங் மே ஸுத்தந்தி மஹாத⁴ம்மஸமாதா³னஸுத்தங். தத்த² ஏவங்காமாதி ஏவங்இச்சா². ஏவங்ச²ந்தா³தி ஏவங்அஜ்ஜா²ஸயா. ஏவங்அதி⁴ப்பாயாதி ஏவங்லத்³தி⁴கா. தத்ராதி தஸ்மிங் அனிட்ட²வட்³ட⁴னே சேவ இட்ட²பரிஹானே ச. ப⁴க³வங்மூலகாதி ப⁴க³வா மூலங் ஏதேஸந்தி ப⁴க³வங்மூலகா. இத³ங் வுத்தங் ஹோதி – இமே, ப⁴ந்தே, அம்ஹாகங் த⁴ம்மா புப்³பே³ கஸ்ஸபஸம்மாஸம்பு³த்³தே⁴ன உப்பாதி³தா, தஸ்மிங் பரினிப்³பு³தே ஏகங் பு³த்³த⁴ந்தரங் அஞ்ஞோ ஸமணோ வா ப்³ராஹ்மணோ வா இமே த⁴ம்மே உப்பாதே³துங் ஸமத்தோ² நாம நாஹோஸி, ப⁴க³வதா பன நோ இமே த⁴ம்மா உப்பாதி³தா. ப⁴க³வந்தஞ்ஹி நிஸ்ஸாய மயங் இமே த⁴ம்மே ஆஜானாம படிவிஜ்ஜா²மாதி ஏவங் ப⁴க³வங்மூலகா நோ, ப⁴ந்தே, த⁴ம்மாதி. ப⁴க³வங்னெத்திகாதி ப⁴க³வா ஹி த⁴ம்மானங் நேதா வினேதா அனுனேதாதி. யதா²ஸபா⁴வதோ பாடியேக்கங் பாடியேக்கங் நாமங் க³ஹெத்வா த³ஸ்ஸிதா த⁴ம்மா ப⁴க³வங்னெத்திகா நாம ஹொந்தி. ப⁴க³வங்படிஸரணாதி சதுபூ⁴மகா த⁴ம்மா ஸப்³ப³ஞ்ஞுதஞ்ஞாணஸ்ஸ ஆபாத²ங் ஆக³ச்ச²மானா ப⁴க³வதி படிஸரந்தி நாமாதி ப⁴க³வங்படிஸரணா. படிஸரந்தீதி ஓஸரந்தி ஸமோஸரந்தி. அபிச மஹாபோ³தி⁴மண்டே³ நிஸின்னஸ்ஸ ப⁴க³வதோ படிவேத⁴வஸேன ப²ஸ்ஸோ ஆக³ச்ச²தி, அஹங் ப⁴க³வா கின்னாமோதி? த்வங் பு²ஸனட்டே²ன ப²ஸ்ஸோ நாம. வேத³னா, ஸஞ்ஞா, ஸங்கா²ரா, விஞ்ஞாணங் ஆக³ச்ச²தி. அஹங் ப⁴க³வா கின்னாமந்தி? த்வங் விஜானநட்டே²ன விஞ்ஞாணங் நாமாதி ஏவங் சதுபூ⁴மகத⁴ம்மானங் யதா²ஸபா⁴வதோ பாடியேக்கங் பாடியேக்கங் நாமங் க³ண்ஹந்தோ ப⁴க³வா த⁴ம்மே படிஸரதீதிபி ப⁴க³வங்படிஸரணா. ப⁴க³வந்தஞ்ஞேவ படிபா⁴தூதி ப⁴க³வதோயேவ ஏதஸ்ஸ பா⁴ஸிதஸ்ஸ அத்தோ² உபட்டா²து, தும்ஹேயேவ நோ கதெ²த்வா தே³தா²தி அத்தோ².
473.Evaṃme suttanti mahādhammasamādānasuttaṃ. Tattha evaṃkāmāti evaṃicchā. Evaṃchandāti evaṃajjhāsayā. Evaṃadhippāyāti evaṃladdhikā. Tatrāti tasmiṃ aniṭṭhavaḍḍhane ceva iṭṭhaparihāne ca. Bhagavaṃmūlakāti bhagavā mūlaṃ etesanti bhagavaṃmūlakā. Idaṃ vuttaṃ hoti – ime, bhante, amhākaṃ dhammā pubbe kassapasammāsambuddhena uppāditā, tasmiṃ parinibbute ekaṃ buddhantaraṃ añño samaṇo vā brāhmaṇo vā ime dhamme uppādetuṃ samattho nāma nāhosi, bhagavatā pana no ime dhammā uppāditā. Bhagavantañhi nissāya mayaṃ ime dhamme ājānāma paṭivijjhāmāti evaṃ bhagavaṃmūlakā no, bhante, dhammāti. Bhagavaṃnettikāti bhagavā hi dhammānaṃ netā vinetā anunetāti. Yathāsabhāvato pāṭiyekkaṃ pāṭiyekkaṃ nāmaṃ gahetvā dassitā dhammā bhagavaṃnettikā nāma honti. Bhagavaṃpaṭisaraṇāti catubhūmakā dhammā sabbaññutaññāṇassa āpāthaṃ āgacchamānā bhagavati paṭisaranti nāmāti bhagavaṃpaṭisaraṇā. Paṭisarantīti osaranti samosaranti. Apica mahābodhimaṇḍe nisinnassa bhagavato paṭivedhavasena phasso āgacchati, ahaṃ bhagavā kinnāmoti? Tvaṃ phusanaṭṭhena phasso nāma. Vedanā, saññā, saṅkhārā, viññāṇaṃ āgacchati. Ahaṃ bhagavā kinnāmanti? Tvaṃ vijānanaṭṭhena viññāṇaṃ nāmāti evaṃ catubhūmakadhammānaṃ yathāsabhāvato pāṭiyekkaṃ pāṭiyekkaṃ nāmaṃ gaṇhanto bhagavā dhamme paṭisaratītipi bhagavaṃpaṭisaraṇā. Bhagavantaññeva paṭibhātūti bhagavatoyeva etassa bhāsitassa attho upaṭṭhātu, tumheyeva no kathetvā dethāti attho.
474. ஸேவிதப்³பே³தி நிஸ்ஸயிதப்³பே³. ப⁴ஜிதப்³பே³தி உபக³ந்தப்³பே³. யதா² தங் அவித்³த³ஸுனோதி யதா² அவிது³னோ பா³லஸ்ஸ அந்த⁴புது²ஜ்ஜனஸ்ஸ. யதா² தங் வித்³த³ஸுனோதி யதா² விது³னோ மேதா⁴வினோ பண்டி³தஸ்ஸ.
474.Sevitabbeti nissayitabbe. Bhajitabbeti upagantabbe. Yathā taṃ aviddasunoti yathā aviduno bālassa andhaputhujjanassa. Yathā taṃ viddasunoti yathā viduno medhāvino paṇḍitassa.
475. அத்தி², பி⁴க்க²வே, த⁴ம்மஸமாதா³னந்தி புரிமஸுத்தே உப்படிபாடிஆகாரேன மாதிகா ட²பிதா , இத⁴ பன யதா²த⁴ம்மரஸேனேவ ஸத்தா² மாதிகங் ட²பேஸி. தத்த² த⁴ம்மஸமாதா³னந்தி பாணாதிபாதாதீ³னங் த⁴ம்மானங் க³ஹணங்.
475.Atthi, bhikkhave, dhammasamādānanti purimasutte uppaṭipāṭiākārena mātikā ṭhapitā , idha pana yathādhammaraseneva satthā mātikaṃ ṭhapesi. Tattha dhammasamādānanti pāṇātipātādīnaṃ dhammānaṃ gahaṇaṃ.
476. அவிஜ்ஜாக³தோதி அவிஜ்ஜாய ஸமன்னாக³தோ.
476.Avijjāgatoti avijjāya samannāgato.
477. விஜ்ஜாக³தோதி விஜ்ஜாய ஸமன்னாக³தோ பஞ்ஞவா.
477.Vijjāgatoti vijjāya samannāgato paññavā.
478. ஸஹாபி து³க்கே²னாதி எத்த² மிச்சா²சாரோ அபி⁴ஜ்ஜா² மிச்சா²தி³ட்டீ²தி இமே தாவ தயோ புப்³ப³சேதனாய ச அபரசேதனாய சாதி த்³வின்னங் சேதனானங் வஸேன து³க்க²வேத³னா ஹொந்தி. ஸன்னிட்டா²பகசேதனா பன ஸுக²ஸம்பயுத்தா வா உபெக்கா²ஸம்பயுத்தா வா ஹோதி. ஸேஸா பாணாதிபாதாத³யோ ஸத்த திஸ்ஸன்னம்பி சேதனானங் வஸேன து³க்க²வேத³னா ஹொந்தி. இத³ங் ஸந்தா⁴ய வுத்தங் – ‘‘ஸஹாபி து³க்கே²ன ஸஹாபி தோ³மனஸ்ஸேனா’’தி. தோ³மனஸ்ஸமேவ செத்த² து³க்க²ந்தி வேதி³தப்³ப³ங். பரியெட்டி²ங் வா ஆபஜ்ஜந்தஸ்ஸ புப்³ப³பா⁴க³பரபா⁴கே³ஸு காயிகங் து³க்க²ம்பி வட்டதியேவ.
478.Sahāpi dukkhenāti ettha micchācāro abhijjhā micchādiṭṭhīti ime tāva tayo pubbacetanāya ca aparacetanāya cāti dvinnaṃ cetanānaṃ vasena dukkhavedanā honti. Sanniṭṭhāpakacetanā pana sukhasampayuttā vā upekkhāsampayuttā vā hoti. Sesā pāṇātipātādayo satta tissannampi cetanānaṃ vasena dukkhavedanā honti. Idaṃ sandhāya vuttaṃ – ‘‘sahāpi dukkhena sahāpi domanassenā’’ti. Domanassameva cettha dukkhanti veditabbaṃ. Pariyeṭṭhiṃ vā āpajjantassa pubbabhāgaparabhāgesu kāyikaṃ dukkhampi vaṭṭatiyeva.
479. ஸஹாபி ஸுகே²னாதி எத்த² பாணாதிபாதோ ப²ருஸவாசா ப்³யாபாதோ³தி இமே தாவ தயோ புப்³ப³சேதனாய ச அபரசேதனாய சாதி த்³வின்னங் சேதனானங் வஸேன ஸுக²வேத³னா ஹொந்தி. ஸன்னிட்டா²பகசேதனா பன து³க்க²ஸம்பயுத்தாவ ஹோதி. ஸேஸா ஸத்த திஸ்ஸன்னம்பி சேதனானங் வஸேன ஸுக²வேத³னா ஹொந்தியேவ. ஸஹாபி ஸோமனஸ்ஸேனாதி ஸோமனஸ்ஸமேவ செத்த² ஸுக²ந்தி வேதி³தப்³ப³ங். இட்ட²பொ²ட்ட²ப்³ப³ஸமங்கி³னோ வா புப்³ப³பா⁴க³பரபா⁴கே³ஸு காயிகங் ஸுக²ம்பி வட்டதியேவ.
479.Sahāpisukhenāti ettha pāṇātipāto pharusavācā byāpādoti ime tāva tayo pubbacetanāya ca aparacetanāya cāti dvinnaṃ cetanānaṃ vasena sukhavedanā honti. Sanniṭṭhāpakacetanā pana dukkhasampayuttāva hoti. Sesā satta tissannampi cetanānaṃ vasena sukhavedanā hontiyeva. Sahāpi somanassenāti somanassameva cettha sukhanti veditabbaṃ. Iṭṭhaphoṭṭhabbasamaṅgino vā pubbabhāgaparabhāgesu kāyikaṃ sukhampi vaṭṭatiyeva.
480. ததியத⁴ம்மஸமாதா³னே இதே⁴கச்சோ மச்ச²ப³ந்தோ⁴ வா ஹோதி, மாக³விகோ வா, பாணுபகா⁴தங்யேவ நிஸ்ஸாய ஜீவிகங் கப்பேதி. தஸ்ஸ க³ருட்டா²னியோ பி⁴க்கு² அகாமகஸ்ஸேவ பாணாதிபாதே ஆதீ³னவங், பாணாதிபாதவிரதியா ச ஆனிஸங்ஸங் கதெ²த்வா ஸிக்கா²பத³ங் தே³தி. ஸோ க³ண்ஹந்தோபி து³க்கி²தோ தோ³மனஸ்ஸிதோவ ஹுத்வா க³ண்ஹாதி. அபரபா⁴கே³ கதிபாஹங் வீதினாமெத்வா ரக்கி²துங் அஸக்கொந்தோபி து³க்கி²தோவ ஹோதி, தஸ்ஸ புப்³பா³பரசேதனா து³க்க²ஸஹக³தாவ ஹொந்தி. ஸன்னிட்டா²பகசேதனா பன ஸுக²ஸஹக³தா வா உபெக்கா²ஸஹக³தா வாதி ஏவங் ஸப்³ப³த்த² அத்தோ² வேதி³தப்³போ³ . இதி புப்³ப³பா⁴க³பரபா⁴க³சேதனாவ ஸந்தா⁴ய இத³ங் வுத்தங் – ‘‘ஸஹாபி து³க்கே²ன ஸஹாபி தோ³மனஸ்ஸேனா’’தி. தோ³மனஸ்ஸமேவ செத்த² து³க்க²ந்தி வேதி³தப்³ப³ங்.
480. Tatiyadhammasamādāne idhekacco macchabandho vā hoti, māgaviko vā, pāṇupaghātaṃyeva nissāya jīvikaṃ kappeti. Tassa garuṭṭhāniyo bhikkhu akāmakasseva pāṇātipāte ādīnavaṃ, pāṇātipātaviratiyā ca ānisaṃsaṃ kathetvā sikkhāpadaṃ deti. So gaṇhantopi dukkhito domanassitova hutvā gaṇhāti. Aparabhāge katipāhaṃ vītināmetvā rakkhituṃ asakkontopi dukkhitova hoti, tassa pubbāparacetanā dukkhasahagatāva honti. Sanniṭṭhāpakacetanā pana sukhasahagatā vā upekkhāsahagatā vāti evaṃ sabbattha attho veditabbo . Iti pubbabhāgaparabhāgacetanāva sandhāya idaṃ vuttaṃ – ‘‘sahāpi dukkhena sahāpi domanassenā’’ti. Domanassameva cettha dukkhanti veditabbaṃ.
481. சதுத்த²த⁴ம்மஸமாதா³னே த³ஸஸுபி பதே³ஸு திஸ்ஸோபி புப்³ப³பா⁴கா³பரபா⁴க³ஸன்னிட்டா²பகசேதனா ஸுக²ஸம்பயுத்தா ஹொந்தியேவ, தங் ஸந்தா⁴ய இத³ங் வுத்தங் – ‘‘ஸஹாபி ஸுகே²ன ஸஹாபி ஸோமனஸ்ஸேனா’’தி. ஸோமனஸ்ஸமேவ செத்த² ஸுக²ந்தி வேதி³தப்³ப³ங்.
481. Catutthadhammasamādāne dasasupi padesu tissopi pubbabhāgāparabhāgasanniṭṭhāpakacetanā sukhasampayuttā hontiyeva, taṃ sandhāya idaṃ vuttaṃ – ‘‘sahāpi sukhena sahāpi somanassenā’’ti. Somanassameva cettha sukhanti veditabbaṃ.
482. தித்தகாலாபூ³தி தித்தகரஸஅலாபு³. விஸேன ஸங்ஸட்டோ²தி ஹலாஹலவிஸேன ஸம்பயுத்தோ மிஸ்ஸிதோ லுளிதோ. நச்சா²தெ³ஸ்ஸதீதி ந ருச்சிஸ்ஸதி ந துட்டி²ங் கரிஸ்ஸதி. நிக³ச்ச²ஸீதி க³மிஸ்ஸஸி. அப்படிஸங்கா²ய பிவெய்யாதி தங் அப்பச்சவெக்கி²த்வா பிவெய்ய.
482.Tittakālābūti tittakarasaalābu. Visena saṃsaṭṭhoti halāhalavisena sampayutto missito luḷito. Nacchādessatīti na ruccissati na tuṭṭhiṃ karissati. Nigacchasīti gamissasi. Appaṭisaṅkhāya piveyyāti taṃ appaccavekkhitvā piveyya.
483. ஆபானீயகங்ஸோதி ஆபானீயஸ்ஸ மது⁴ரபானகஸ்ஸ ப⁴ரிதகங்ஸோ. வண்ணஸம்பன்னோதி பானகவண்ணாதீ³ஹி ஸம்பன்னவண்ணோ, கங்ஸே பக்கி²த்தபானகவஸேன பானககங்ஸோபி ஏவங் வுத்தோ. சா²தெ³ஸ்ஸதீதி தஞ்ஹி ஹலாஹலவிஸங் யத்த² யத்த² பக்கி²த்தங் ஹோதி, தஸ்ஸ தஸ்ஸேவ ரஸங் தே³தி. தேன வுத்தங் ‘‘சா²தெ³ஸ்ஸதீ’’தி.
483.Āpānīyakaṃsoti āpānīyassa madhurapānakassa bharitakaṃso. Vaṇṇasampannoti pānakavaṇṇādīhi sampannavaṇṇo, kaṃse pakkhittapānakavasena pānakakaṃsopi evaṃ vutto. Chādessatīti tañhi halāhalavisaṃ yattha yattha pakkhittaṃ hoti, tassa tasseva rasaṃ deti. Tena vuttaṃ ‘‘chādessatī’’ti.
484. பூதிமுத்தந்தி முத்தமேவ. யதா² ஹி மனுஸ்ஸபா⁴வோ ஸுவண்ணவண்ணோ பூதிகாயொத்வேவ, தத³ஹுஜாதாபி க³லோசிலதா பூதிலதாத்வேவ வுச்சதி. ஏவங் தங்க²ணங் க³ஹிதங் தருணம்பி முத்தங் பூதிமுத்தமேவ. நானாபே⁴ஸஜ்ஜேஹீதி ஹரீதகாமலகாதீ³ஹி நானோஸதே⁴ஹி. ஸுகீ² அஸ்ஸாதி அரோகோ³ ஸுவண்ணவண்ணோ ஸுகீ² ப⁴வெய்ய.
484.Pūtimuttanti muttameva. Yathā hi manussabhāvo suvaṇṇavaṇṇo pūtikāyotveva, tadahujātāpi galocilatā pūtilatātveva vuccati. Evaṃ taṅkhaṇaṃ gahitaṃ taruṇampi muttaṃ pūtimuttameva. Nānābhesajjehīti harītakāmalakādīhi nānosadhehi. Sukhī assāti arogo suvaṇṇavaṇṇo sukhī bhaveyya.
485. த³தி⁴ ச மது⁴ சாதி ஸுபரிஸுத்³த⁴ங் த³தி⁴ ச ஸுமது⁴ரங் மது⁴ ச. ஏகஜ்ஜ²ங் ஸங்ஸட்ட²ந்தி ஏகதோ கத்வா மிஸ்ஸிதங் ஆலுளிதங். தஸ்ஸ தந்தி தஸ்ஸ தங் சதுமது⁴ரபே⁴ஸஜ்ஜங் பிவதோ ருச்செய்ய. இத³ஞ்ச யங் ப⁴க³ந்த³ரஸங்ஸட்ட²ங் லோஹிதங் பக்க²ந்த³தி, ந தஸ்ஸ பே⁴ஸஜ்ஜங், ஆஹாரங் த²ம்பெ⁴த்வா மக்³க³ங் அவலஞ்ஜங் கரோதி. யங் பன பித்தஸங்ஸட்ட²ங் லோஹிதங், தஸ்ஸேதங் பே⁴ஸஜ்ஜங் ஸீதலகிரியாய பரியத்தபூ⁴தங்.
485.Dadhi ca madhu cāti suparisuddhaṃ dadhi ca sumadhuraṃ madhu ca. Ekajjhaṃ saṃsaṭṭhanti ekato katvā missitaṃ āluḷitaṃ. Tassa tanti tassa taṃ catumadhurabhesajjaṃ pivato rucceyya. Idañca yaṃ bhagandarasaṃsaṭṭhaṃ lohitaṃ pakkhandati, na tassa bhesajjaṃ, āhāraṃ thambhetvā maggaṃ avalañjaṃ karoti. Yaṃ pana pittasaṃsaṭṭhaṃ lohitaṃ, tassetaṃ bhesajjaṃ sītalakiriyāya pariyattabhūtaṃ.
486. வித்³தே⁴தி உப்³பி³த்³தே⁴. மேக⁴விக³மேன தூ³ரீபூ⁴தேதி அத்தோ². விக³தவலாஹகேதி அபக³தமேகே⁴, தே³வேதி ஆகாஸே. ஆகாஸக³தங் தமக³தந்தி ஆகாஸக³தங் தமங். புது²ஸமணப்³ராஹ்மணபரப்பவாதே³தி புதூ²னங் ஸமணப்³ராஹ்மணஸங்கா²தானங் பரேஸங் வாதே³. அபி⁴விஹச்சாதி அபி⁴ஹந்த்வா. பா⁴ஸதே ச தபதே ச விரோசதே சாதி ஸரத³காலே மஜ்ஜ²ன்ஹிகஸமயே ஆதி³ச்சோவ ஓபா⁴ஸங் முஞ்சதி தபதி விஜ்ஜோததீதி.
486.Viddheti ubbiddhe. Meghavigamena dūrībhūteti attho. Vigatavalāhaketi apagatameghe, deveti ākāse. Ākāsagataṃ tamagatanti ākāsagataṃ tamaṃ. Puthusamaṇabrāhmaṇaparappavādeti puthūnaṃ samaṇabrāhmaṇasaṅkhātānaṃ paresaṃ vāde. Abhivihaccāti abhihantvā. Bhāsate ca tapate ca virocate cāti saradakāle majjhanhikasamaye ādiccova obhāsaṃ muñcati tapati vijjotatīti.
இத³ங் பன ஸுத்தங் தே³வதானங் அதிவிய பியங் மனாபங். தத்ரித³ங் வத்து² – த³க்கி²ணதி³ஸாயங் கிர ஹத்தி²போ⁴க³ஜனபதே³ ஸங்க³ரவிஹாரோ நாம அத்தி². தஸ்ஸ போ⁴ஜனஸாலத்³வாரே ஸங்க³ரருக்கே² அதி⁴வத்தா² தே³வதா ரத்திபா⁴கே³ ஏகஸ்ஸ த³ஹரஸ்ஸ ஸரப⁴ஞ்ஞவஸேன இத³ங் ஸுத்தங் ஓஸாரெந்தஸ்ஸ ஸுத்வா ஸாது⁴காரங் அதா³ஸி. த³ஹரோ கிங் ஏஸோதி ஆஹ. அஹங், ப⁴ந்தே, இமஸ்மிங் ருக்கே² அதி⁴வத்தா² தே³வதாதி. கஸ்மிங் தே³வதே பஸன்னாஸி, கிங் ஸத்³தே³, உதா³ஹு ஸுத்தேதி? ஸத்³தோ³ நாம, ப⁴ந்தே, யஸ்ஸ கஸ்ஸசி ஹோதியேவ, ஸுத்தே பஸன்னாம்ஹி. ஸத்தா²ரா ஜேதவனே நிஸீதி³த்வா கதி²ததி³வஸே ச அஜ்ஜ ச ஏகப்³யஞ்ஜனேபி நானங் நத்தீ²தி. அஸ்ஸோஸி த்வங் தே³வதே ஸத்தா²ரா கதி²ததி³வஸேதி? ஆம, ப⁴ந்தே. கத்த² டி²தா அஸ்ஸோஸீதி? ஜேதவனங், ப⁴ந்தே, க³தாம்ஹி, மஹேஸக்கா²ஸு பன தே³வதாஸு ஆக³ச்ச²ந்தீஸு தத்த² ஓகாஸங் அலபி⁴த்வா இதே⁴வ ட²த்வா அஸ்ஸோஸிந்தி. எத்த² டி²தாய ஸக்கா ஸுத்து² ஸத்³தோ³ ஸோதுந்தி? த்வங் பன, ப⁴ந்தே, மய்ஹங் ஸத்³த³ங் ஸுணஸீதி? ஆம தே³வதேதி. த³க்கி²ணகண்ணபஸ்ஸே நிஸீதி³த்வா கத²னகாலோ விய, ப⁴ந்தே, ஹோதீதி. கிங் பன தே³வதே ஸத்து² ரூபங் பஸ்ஸஸீதி? ஸத்தா² மமேவ ஓலோகேதீதி மஞ்ஞமானா ஸண்டா²துங் ந ஸக்கோமி, ப⁴ந்தேதி. விஸேஸங் பன நிப்³ப³த்தேதுங் அஸக்கி²த்த² தே³வதேதி. தே³வதா தத்தே²வ அந்தரதா⁴யி. தங் தி³வஸங் கிரேஸ தே³வபுத்தோ ஸோதாபத்திப²லே பதிட்டி²தோ. ஏவமித³ங் ஸுத்தங் தே³வதானங் பியங் மனாபங். ஸேஸங் ஸப்³ப³த்த² உத்தானத்த²மேவாதி.
Idaṃ pana suttaṃ devatānaṃ ativiya piyaṃ manāpaṃ. Tatridaṃ vatthu – dakkhiṇadisāyaṃ kira hatthibhogajanapade saṅgaravihāro nāma atthi. Tassa bhojanasāladvāre saṅgararukkhe adhivatthā devatā rattibhāge ekassa daharassa sarabhaññavasena idaṃ suttaṃ osārentassa sutvā sādhukāraṃ adāsi. Daharo kiṃ esoti āha. Ahaṃ, bhante, imasmiṃ rukkhe adhivatthā devatāti. Kasmiṃ devate pasannāsi, kiṃ sadde, udāhu sutteti? Saddo nāma, bhante, yassa kassaci hotiyeva, sutte pasannāmhi. Satthārā jetavane nisīditvā kathitadivase ca ajja ca ekabyañjanepi nānaṃ natthīti. Assosi tvaṃ devate satthārā kathitadivaseti? Āma, bhante. Kattha ṭhitā assosīti? Jetavanaṃ, bhante, gatāmhi, mahesakkhāsu pana devatāsu āgacchantīsu tattha okāsaṃ alabhitvā idheva ṭhatvā assosinti. Ettha ṭhitāya sakkā sutthu saddo sotunti? Tvaṃ pana, bhante, mayhaṃ saddaṃ suṇasīti? Āma devateti. Dakkhiṇakaṇṇapasse nisīditvā kathanakālo viya, bhante, hotīti. Kiṃ pana devate satthu rūpaṃ passasīti? Satthā mameva oloketīti maññamānā saṇṭhātuṃ na sakkomi, bhanteti. Visesaṃ pana nibbattetuṃ asakkhittha devateti. Devatā tattheva antaradhāyi. Taṃ divasaṃ kiresa devaputto sotāpattiphale patiṭṭhito. Evamidaṃ suttaṃ devatānaṃ piyaṃ manāpaṃ. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாத⁴ம்மஸமாதா³னஸுத்தவண்ணனா நிட்டி²தா.
Mahādhammasamādānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. மஹாத⁴ம்மஸமாதா³னஸுத்தங் • 6. Mahādhammasamādānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. மஹாத⁴ம்மஸமாதா³னஸுத்தவண்ணனா • 6. Mahādhammasamādānasuttavaṇṇanā
