| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
8-10. மஹாதி³ட்டி²ஸுத்தாதி³வண்ணனா
8-10. Mahādiṭṭhisuttādivaṇṇanā
213-215. அகதாதி ஸமேன வா விஸமேன வா கேனசி ஹேதுனா ந கதா ஏவ. கேனசி கதங் கரணங் விதா⁴னங் நத்தி² ஏதேஸந்தி அகதவிதா⁴னா. பத³த்³வயேனபி லோகே கேனசி ஹேதுபச்சயேன நேஸங் அபி⁴னிப்³ப³த்திதாபா⁴வங் த³ஸ்ஸேதி. இத்³தி⁴யாபி ந நிம்மிதாதி கஸ்ஸசி இத்³தி⁴மதோ தே³வஸ்ஸ ப்³ரஹ்முனோ வா இத்³தி⁴யாபி ந நிம்மிதா. அனிம்மிதாதி வா கஸ்ஸசி அனிம்மாபகா. அஜனகாதி ஏதேன பத²வீகாயாதீ³னங் ரூபாதி³ஜனகபா⁴வங் படிக்கி²பதி. ரூபஸத்³தா³த³யோ ஹி பத²வீகாயாதீ³ஹி அப்படிப³த்³த⁴வுத்திகாதி தஸ்ஸ லத்³தி⁴. யதா² பப்³ப³தகூடங் கேனசி அனிப்³ப³த்திதங் கஸ்ஸசி ச அனிப்³ப³த்தகங், ஏவமேதேபீதி ஆஹ ‘‘கூடட்டா²’’தி. யமித³ங் ‘‘பீ³ஜாதி³தோ அங்குராதி³ ஜாயதீ’’தி வுச்சதி, தஞ்ச விஜ்ஜமானமேவ ததோ நிக்க²மதி, நாவிஜ்ஜமானங், அஞ்ஞதா² யதோ குதோசி யஸ்ஸ கஸ்ஸசி உப்பத்தி ஸியாதி அதி⁴ப்பாயோ. டி²தாதி நிப்³பி³காரபா⁴வேன டி²தா. ந சலந்தீதி ந விகாரங் ஆபஜ்ஜந்தி. விகாராபா⁴வேன ஹி தேஸங் ஸத்தன்னங் காயானங் ஏஸிகட்டா²யிட்டி²ததா. அனிஞ்ஜனஞ்ச அத்தனோ பகதியா அவட்டா²னமேவ. தேனாஹ ‘‘ந விபரிணமந்தீ’’தி. அவிபரிணாமத⁴ம்மத்தா ஏவ ச நே அஞ்ஞமஞ்ஞங் ந ப்³யாபா³தெ⁴ந்தி. ஸதி ஹி விகாரங் ஆபாதே³தப்³ப³தாய ப்³யாபா³த⁴கதாபி ஸியா, ததா² அனுக்³க³ஹேதப்³ப³தாய அனுக்³கா³ஹகதாதி தத³பா⁴வங் த³ஸ்ஸேதுங் பாளியங் ‘‘நால’’ந்திஆதி³ வுத்தங். பத²வீ ஏவ காயேகதே³ஸத்தா பத²விகாயோ. ஜீவஸத்தமானங் காயானங் நிச்சதாய நிப்³பி³காராபா⁴வதோ ந ஹந்தப்³ப³தா, ந கா⁴டேதப்³ப³தா சாதி நேவ கோசி ஹந்தா கா⁴தேதா வா. தேனாஹ ‘‘ஸத்தன்னந்த்வேவா’’திஆதி³. யதி³ கோசி ஹந்தா நத்தி², கத²ங் ஸத்த²ப்பஹாரோதி ஆஹ ‘‘யதா² முக்³க³ராஸிஆதீ³ஸூ’’திஆதி³. கேவலங் ஸஞ்ஞாமத்தமேவ ஹோதி, ந கா⁴தனாதி³, பரமத்த²தோ ஸத்தன்னந்த்வேவ காயானங் அவிகோபனீயபா⁴வதோதி அதி⁴ப்பாயோ.
213-215.Akatāti samena vā visamena vā kenaci hetunā na katā eva. Kenaci kataṃ karaṇaṃ vidhānaṃ natthi etesanti akatavidhānā. Padadvayenapi loke kenaci hetupaccayena nesaṃ abhinibbattitābhāvaṃ dasseti. Iddhiyāpi na nimmitāti kassaci iddhimato devassa brahmuno vā iddhiyāpi na nimmitā. Animmitāti vā kassaci animmāpakā. Ajanakāti etena pathavīkāyādīnaṃ rūpādijanakabhāvaṃ paṭikkhipati. Rūpasaddādayo hi pathavīkāyādīhi appaṭibaddhavuttikāti tassa laddhi. Yathā pabbatakūṭaṃ kenaci anibbattitaṃ kassaci ca anibbattakaṃ, evametepīti āha ‘‘kūṭaṭṭhā’’ti. Yamidaṃ ‘‘bījādito aṅkurādi jāyatī’’ti vuccati, tañca vijjamānameva tato nikkhamati, nāvijjamānaṃ, aññathā yato kutoci yassa kassaci uppatti siyāti adhippāyo. Ṭhitāti nibbikārabhāvena ṭhitā. Na calantīti na vikāraṃ āpajjanti. Vikārābhāvena hi tesaṃ sattannaṃ kāyānaṃ esikaṭṭhāyiṭṭhitatā. Aniñjanañca attano pakatiyā avaṭṭhānameva. Tenāha ‘‘na vipariṇamantī’’ti. Avipariṇāmadhammattā eva ca ne aññamaññaṃ na byābādhenti. Sati hi vikāraṃ āpādetabbatāya byābādhakatāpi siyā, tathā anuggahetabbatāya anuggāhakatāti tadabhāvaṃ dassetuṃ pāḷiyaṃ ‘‘nāla’’ntiādi vuttaṃ. Pathavī eva kāyekadesattā pathavikāyo. Jīvasattamānaṃ kāyānaṃ niccatāya nibbikārābhāvato na hantabbatā, na ghāṭetabbatā cāti neva koci hantā ghātetā vā. Tenāha ‘‘sattannantvevā’’tiādi. Yadi koci hantā natthi, kathaṃ satthappahāroti āha ‘‘yathā muggarāsiādīsū’’tiādi. Kevalaṃ saññāmattameva hoti, na ghātanādi, paramatthato sattannantveva kāyānaṃ avikopanīyabhāvatoti adhippāyo.
பமுக²யோனீனந்தி மனுஸ்ஸதிரச்சா²னாதீ³ஸு க²த்தியப்³ராஹ்மணாதி³ஸீஹப்³யக்³கா⁴தி³வஸேன பதா⁴னயோனீனங். ஸட்டி²ஸதானி ச²ஸஹஸ்ஸானி. ‘‘பஞ்ச ச கம்முனோ ஸதானீ’’தி பத³ஸ்ஸ அத்த²த³ஸ்ஸனங் ‘‘பஞ்ச கம்மஸதானி சா’’தி . ஏஸேவ நயோதி இமினா ‘‘கேவலங் தக்கமத்தேன நிரத்த²கதி³ட்டி²ங் தீ³பேதீ’’தி இமமேவ அத்த²ங் அதிதி³ஸதி. எத்த² ச தக்கமத்தகேனாதி இமினா யஸ்மா தக்கிகா நிரங்குஸதாய பரிகப்பனஸ்ஸ யங் கிஞ்சி அத்தனோ பரிகப்பிதங் ஸாரதோ மஞ்ஞமானா ததே²வ அபி⁴னிவிஸ்ஸ தக்கதி³ட்டி²கா³ஹங் க³ண்ஹந்தி, தஸ்மா ந தேஸங் தி³ட்டி²வத்தூ²ஸு விஞ்ஞூஹி விசாரணா காதப்³பா³தி த³ஸ்ஸேதி. கேசீதி உத்தரவிஹாரவாஸினோ. தே ஹி ‘‘பஞ்ச கம்மானீதி சக்கு²ஸோதகா⁴னஜிவ்ஹாகாயா, இமானி பஞ்சிந்த்³ரியானி ‘பஞ்ச கம்மானீதி பஞ்ஞாபெந்தீ’’தி வத³ந்தி. கம்மந்தி லத்³தீ⁴தி ஓளாரிகபா⁴வதோ பரிபுண்ணகம்மந்தி லத்³தி⁴. மனோகம்மங் அனோளாரிகத்தா உபட்³ட⁴கம்மந்தி லத்³தீ⁴தி யோஜனா. ‘‘த்³வாஸட்டி²படிபதா³’’தி வத்தப்³பே³ ஸபா⁴வனிருத்திங் அஜானந்தா ‘‘த்³வட்டி²படிபதா³’’தி வத³ந்தி. ஏகஸ்மிங் கப்பேதி ஏகஸ்மிங் மஹாகப்பே. தத்தா²பி ச விவட்டட்டா²யிஸஞ்ஞிதே ஏகஸ்மிங் அஸங்க்²யெய்யகப்பே.
Pamukhayonīnanti manussatiracchānādīsu khattiyabrāhmaṇādisīhabyagghādivasena padhānayonīnaṃ. Saṭṭhisatāni chasahassāni. ‘‘Pañca ca kammuno satānī’’ti padassa atthadassanaṃ ‘‘pañca kammasatāni cā’’ti . Eseva nayoti iminā ‘‘kevalaṃ takkamattena niratthakadiṭṭhiṃ dīpetī’’ti imameva atthaṃ atidisati. Ettha ca takkamattakenāti iminā yasmā takkikā niraṅkusatāya parikappanassa yaṃ kiñci attano parikappitaṃ sārato maññamānā tatheva abhinivissa takkadiṭṭhigāhaṃ gaṇhanti, tasmā na tesaṃ diṭṭhivatthūsu viññūhi vicāraṇā kātabbāti dasseti. Kecīti uttaravihāravāsino. Te hi ‘‘pañca kammānīti cakkhusotaghānajivhākāyā, imāni pañcindriyāni ‘pañca kammānīti paññāpentī’’ti vadanti. Kammanti laddhīti oḷārikabhāvato paripuṇṇakammanti laddhi. Manokammaṃ anoḷārikattā upaḍḍhakammanti laddhīti yojanā. ‘‘Dvāsaṭṭhipaṭipadā’’ti vattabbe sabhāvaniruttiṃ ajānantā ‘‘dvaṭṭhipaṭipadā’’ti vadanti. Ekasmiṃ kappeti ekasmiṃ mahākappe. Tatthāpi ca vivaṭṭaṭṭhāyisaññite ekasmiṃ asaṅkhyeyyakappe.
உரப்³பே⁴ ஹனந்தீதி ஓரப்³பி⁴கா. ஏவங் ஸூகரிகாத³யோ வேதி³தப்³பா³. லுத்³தா³தி அஞ்ஞேபி யே கேசி மாக³விகனேஸாதா³த³யோ, தே பாபகம்மபஸுததாய கண்ஹாபி⁴ஜாதீதி வத³ந்தி. பி⁴க்கூ²தி பு³த்³த⁴ஸாஸனே பி⁴க்கூ². தே கிர ‘‘ஸச்ச²ந்த³ராகா³ பரிபு⁴ஞ்ஜந்தீ’’தி அதி⁴ப்பாயேன சதூஸு பச்சயேஸு கண்டகே பக்கி²பித்வா கா²த³ந்தீதி வத³ந்தி. கஸ்மாதி சே? யஸ்மா தே பணீதபணீதே பச்சயே படிஸேவந்தீதி தஸ்ஸ மிச்சா²கா³ஹோ. ஞாயலத்³தே⁴பி பச்சயே பரிபு⁴ஞ்ஜமானா ஆஜீவகஸமயஸ்ஸ விலோமகா³ஹிதாய பச்சயேஸு கண்டகே பக்கி²பித்வா கா²த³ந்தி நாமாதி வத³ந்தீதி அபரே. ஏகே பப்³ப³ஜிதா, யே விஸேஸதோ அத்தகிலமதா²னுயோக³மனுயுத்தா. ததா² ஹி தே கண்டகே வத்தந்தா விய ஹொந்தீதி கண்டகவுத்திகாதி வுத்தா. ட²த்வா பு⁴ஞ்ஜனநஹானபடிக்கே²பாதி³வதஸமாயோகே³ன பண்ட³ரதரா. அசேலகஸாவகாதி ஆஜீவகஸாவகே வத³தி. தே கிர ஆஜீவகஸமயே ஆஜீவகலத்³தி⁴யா த³ள்ஹகா³ஹிதாய நிக³ண்டே²ஹிபி பண்ட³ரதரா. நந்தா³த³யோ கிர ததா²ரூபங் ஆஜீவகபடிபத்திங் உக்கங்ஸங் பாபெத்வா டி²தா, தஸ்மா நிக³ண்டே²ஹி ஆஜீவகஸாவகேஹி ச பண்ட³ரதரா வுத்தா. பரமஸுக்காபி⁴ஜாதீதி அயங் தேஸங் லத்³தி⁴.
Urabbhe hanantīti orabbhikā. Evaṃ sūkarikādayo veditabbā. Luddāti aññepi ye keci māgavikanesādādayo, te pāpakammapasutatāya kaṇhābhijātīti vadanti. Bhikkhūti buddhasāsane bhikkhū. Te kira ‘‘sacchandarāgā paribhuñjantī’’ti adhippāyena catūsu paccayesu kaṇṭake pakkhipitvā khādantīti vadanti. Kasmāti ce? Yasmā te paṇītapaṇīte paccaye paṭisevantīti tassa micchāgāho. Ñāyaladdhepi paccaye paribhuñjamānā ājīvakasamayassa vilomagāhitāya paccayesu kaṇṭake pakkhipitvā khādanti nāmāti vadantīti apare. Eke pabbajitā, ye visesato attakilamathānuyogamanuyuttā. Tathā hi te kaṇṭake vattantā viya hontīti kaṇṭakavuttikāti vuttā. Ṭhatvā bhuñjananahānapaṭikkhepādivatasamāyogena paṇḍaratarā. Acelakasāvakāti ājīvakasāvake vadati. Te kira ājīvakasamaye ājīvakaladdhiyā daḷhagāhitāya nigaṇṭhehipi paṇḍaratarā. Nandādayo kira tathārūpaṃ ājīvakapaṭipattiṃ ukkaṃsaṃ pāpetvā ṭhitā, tasmā nigaṇṭhehi ājīvakasāvakehi ca paṇḍaratarā vuttā. Paramasukkābhijātīti ayaṃ tesaṃ laddhi.
புரிஸபூ⁴மியோதி பதா⁴னபுக்³க³லேன நித்³தே³ஸோ. இத்தீ²னம்பேதா பூ⁴மியோ இச்ச²ந்தேவ. பி⁴க்கு² ச பன்னகோதிஆதி³ தேஸங் பாளி ஏவ. தத்த² பன்னகோதி பி⁴க்கா²ய விசரணகோ, தேஸங் வா படிபத்தியா படிபன்னகோ. ஜினோதி ஜிண்ணோ ஜராவஸேன ஹீனதா⁴துகோ, அத்தனோ வா படிபத்தியா படிபக்கே² ஜினித்வா டி²தோ. ஸோ கிர ததா²பூ⁴தோ த⁴ம்மம்பி கஸ்ஸசி ந கதே²தி. தேனாஹ ‘‘ந கிஞ்சி ஆஹா’’தி. நிட்டு²ஹனாதி³விப்பகாரே கேனசி கதேபி க²மனவஸேன ந கிஞ்சி வத³தீதி வத³ந்தி. அலாபி⁴ந்தி ‘‘ஸோ ந கும்பி⁴முகா² படிக்³க³ண்ஹாதீ’’திஆதி³னா (தீ³॰ நி॰ 1.394) நயேன வுத்தஅலாப⁴ஹேதுஸமாயோகே³ன அலாபி⁴ங். ததோ ஏவ ஜிக⁴ச்சா²து³ப்³ப³ல்யபரேததாய ஸயனபராயணங் ஸமணங் பன்னபூ⁴மீதி வத³ந்தி.
Purisabhūmiyoti padhānapuggalena niddeso. Itthīnampetā bhūmiyo icchanteva. Bhikkhu ca pannakotiādi tesaṃ pāḷi eva. Tattha pannakoti bhikkhāya vicaraṇako, tesaṃ vā paṭipattiyā paṭipannako. Jinoti jiṇṇo jarāvasena hīnadhātuko, attano vā paṭipattiyā paṭipakkhe jinitvā ṭhito. So kira tathābhūto dhammampi kassaci na katheti. Tenāha ‘‘na kiñci āhā’’ti. Niṭṭhuhanādivippakāre kenaci katepi khamanavasena na kiñci vadatīti vadanti. Alābhinti ‘‘so na kumbhimukhā paṭiggaṇhātī’’tiādinā (dī. ni. 1.394) nayena vuttaalābhahetusamāyogena alābhiṃ. Tato eva jighacchādubbalyaparetatāya sayanaparāyaṇaṃ samaṇaṃ pannabhūmīti vadanti.
ஆஜீவவுத்திஸதானீதி ஸத்தானங் ஆஜீவபூ⁴தானி ஜீவிகாவுத்திஸதானி. பஸுக்³க³ஹணேன ஏளகஜாதி க³ஹிதா, மிக³க்³க³ஹணேன ருருக³வயாதி³ஸப்³ப³மிக³ஜாதி. ப³ஹூ தே³வாதி சாதுமஹாராஜிகாதி³ப்³ரஹ்மகாயிகாதி³வஸேன தேஸங் அந்தரபே⁴த³வஸேன ப³ஹூ தே³வா. தத்த² சாதுமஹாராஜிகானங் ஏகச்சே அந்தரபே⁴தா³ மஹாஸமயஸுத்தவஸேன (தீ³॰ நி॰ 2.331 ஆத³யோ) தீ³பேதப்³பா³. மனுஸ்ஸாபி அனந்தாதி தீ³பதே³ஸகுலவங்ஸாஜீவாதி³விபா⁴கே³ன மனுஸ்ஸாபி அனந்தபே⁴தா³. பிஸாசா ஏவ பேஸாசா, தே மஹந்தமஹந்தா அஜக³ரபேதாத³யோ. ச²த்³த³ந்தத³ஹமந்தா³கினியோ குளீரமுசலிந்த³னாமேன வத³ந்தி.
Ājīvavuttisatānīti sattānaṃ ājīvabhūtāni jīvikāvuttisatāni. Pasuggahaṇena eḷakajāti gahitā, migaggahaṇena rurugavayādisabbamigajāti. Bahū devāti cātumahārājikādibrahmakāyikādivasena tesaṃ antarabhedavasena bahū devā. Tattha cātumahārājikānaṃ ekacce antarabhedā mahāsamayasuttavasena (dī. ni. 2.331 ādayo) dīpetabbā. Manussāpi anantāti dīpadesakulavaṃsājīvādivibhāgena manussāpi anantabhedā. Pisācā eva pesācā, te mahantamahantā ajagarapetādayo. Chaddantadahamandākiniyo kuḷīramucalindanāmena vadanti.
பவுடாதி ஸப்³ப³க³ண்டி²கா. பண்டி³தோபி…பே॰… உத்³த⁴ங் ந க³ச்ச²தி. கஸ்மா? ஸத்தானங் ஸங்ஸரணகாலஸ்ஸ நியதபா⁴வதோ.
Pavuṭāti sabbagaṇṭhikā. Paṇḍitopi…pe… uddhaṃ na gacchati. Kasmā? Sattānaṃ saṃsaraṇakālassa niyatabhāvato.
அபரிபக்கங் ஸங்ஸரணனிமித்தங் ஸீலாதி³னா பரிபாசேதி நாம ஸீக⁴ங்யேவ விஸுத்³தி⁴ப்பத்தியா. பரிபக்கங் கம்மங் பு²ஸ்ஸ பு²ஸ்ஸ பத்வா பத்வா காலே பரிபக்கபா⁴வாபாத³னேன ப்³யந்தீ கரோதி நாம. ஸுத்தகு³ளேதி ஸுத்தவட்டியங். நிப்³பே³டி²யமானமேவ பலேதீதி உபமாய ஸத்தானங் ஸங்ஸாரோ அனுக்கமேன கீ²யதேவ, ந தஸ்ஸ வட்³டீ⁴தி த³ஸ்ஸேதி பரிச்சி²ன்னரூபத்தா. நிப்³பே³டி²யமானமேவ ஸுத்தகு³ளங் க³ச்ச²தீதி வுச்சதி. தஞ்ச கோ² ஸுத்தபமாணேன, ஸுத்தே பன அஸதி குதோ க³ச்ச²தி ஸுத்தகு³ளங். தேனாஹ – ‘‘ஸுத்தே கீ²ணே ந க³ச்ச²தீ’’தி. தத்தே²வ திட்ட²தி ஸுத்தபரியந்தந்தி அதி⁴ப்பாயோ. காலவஸேனாதி அத்தனி வேடெ²த்வா டி²தங் ஸுக²து³க்க²ங் யதா²வுத்தஸ்ஸ காலஸ்ஸ வஸேன நிப்³பே³டி²யமானோ பா³லோ ச பண்டி³தோ ச பலேதி க³ச்ச²தி, நாதிக்கமதி ஸங்ஸாரங்.
Aparipakkaṃ saṃsaraṇanimittaṃ sīlādinā paripāceti nāma sīghaṃyeva visuddhippattiyā. Paripakkaṃ kammaṃ phussa phussa patvā patvā kāle paripakkabhāvāpādanena byantī karoti nāma. Suttaguḷeti suttavaṭṭiyaṃ. Nibbeṭhiyamānameva paletīti upamāya sattānaṃ saṃsāro anukkamena khīyateva, na tassa vaḍḍhīti dasseti paricchinnarūpattā. Nibbeṭhiyamānameva suttaguḷaṃ gacchatīti vuccati. Tañca kho suttapamāṇena, sutte pana asati kuto gacchati suttaguḷaṃ. Tenāha – ‘‘sutte khīṇe na gacchatī’’ti. Tattheva tiṭṭhati suttapariyantanti adhippāyo. Kālavasenāti attani veṭhetvā ṭhitaṃ sukhadukkhaṃ yathāvuttassa kālassa vasena nibbeṭhiyamāno bālo ca paṇḍito ca paleti gacchati, nātikkamati saṃsāraṃ.
மஹாதி³ட்டி²ஸுத்தாதி³வண்ணனா நிட்டி²தா.
Mahādiṭṭhisuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
8. மஹாதி³ட்டி²ஸுத்தங் • 8. Mahādiṭṭhisuttaṃ
9. ஸஸ்ஸததி³ட்டி²ஸுத்தங் • 9. Sassatadiṭṭhisuttaṃ
10. அஸஸ்ஸததி³ட்டி²ஸுத்தங் • 10. Asassatadiṭṭhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8-10. மஹாதி³ட்டி²ஸுத்தாதி³வண்ணனா • 8-10. Mahādiṭṭhisuttādivaṇṇanā
