| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. மஹாது³க்க²க்க²ந்த⁴ஸுத்தவண்ணனா
3. Mahādukkhakkhandhasuttavaṇṇanā
163. ஏவங் மே ஸுதந்தி மஹாது³க்க²க்க²ந்த⁴ஸுத்தங். தத்த² வினயபரியாயேன தயோ ஜனா ஸம்ப³ஹுலாதி வுச்சந்தி, ததோ பரங் ஸங்கோ⁴. ஸுத்தந்தபரியாயேன தயோ தயோ ஏவ, ததோ உத்³த⁴ங் ஸம்ப³ஹுலாதி வுச்சந்தி. இத⁴ ஸுத்தந்தபரியாயேன ஸம்ப³ஹுலாதி வேதி³தப்³பா³. பிண்டா³ய பாவிஸிங்ஸூதி பவிட்டா², தே பன ந தாவ பவிட்டா², பவிஸிஸ்ஸாமாதி நிக்க²ந்தத்தா பன பவிஸிங்ஸூதி வுத்தா. யதா² கா³மங் க³மிஸ்ஸாமீதி நிக்க²ந்தபுரிஸோ தங் கா³மங் அப்பத்தோபி ‘‘குஹிங் இத்த²ன்னாமோ’’தி வுத்தே ‘‘கா³மங் க³தோ’’தி வுச்சதி, ஏவங். பரிப்³பா³ஜகானங் ஆராமோதி ஜேதவனதோ அவிதூ³ரே அஞ்ஞதித்தி²யானங் பரிப்³பா³ஜகானங் ஆராமோ அத்தி², தங் ஸந்தா⁴ய ஏவமாஹங்ஸு. ஸமணோ, ஆவுஸோதி, ஆவுஸோ, தும்ஹாகங் ஸத்தா² ஸமணோ கோ³தமோ. காமானங் பரிஞ்ஞந்தி காமானங் பஹானங் ஸமதிக்கமங் பஞ்ஞபேதி. ரூபவேத³னாஸுபி ஏஸேவ நயோ.
163.Evaṃme sutanti mahādukkhakkhandhasuttaṃ. Tattha vinayapariyāyena tayo janā sambahulāti vuccanti, tato paraṃ saṅgho. Suttantapariyāyena tayo tayo eva, tato uddhaṃ sambahulāti vuccanti. Idha suttantapariyāyena sambahulāti veditabbā. Piṇḍāya pāvisiṃsūti paviṭṭhā, te pana na tāva paviṭṭhā, pavisissāmāti nikkhantattā pana pavisiṃsūti vuttā. Yathā gāmaṃ gamissāmīti nikkhantapuriso taṃ gāmaṃ appattopi ‘‘kuhiṃ itthannāmo’’ti vutte ‘‘gāmaṃ gato’’ti vuccati, evaṃ. Paribbājakānaṃ ārāmoti jetavanato avidūre aññatitthiyānaṃ paribbājakānaṃ ārāmo atthi, taṃ sandhāya evamāhaṃsu. Samaṇo, āvusoti, āvuso, tumhākaṃ satthā samaṇo gotamo. Kāmānaṃ pariññanti kāmānaṃ pahānaṃ samatikkamaṃ paññapeti. Rūpavedanāsupi eseva nayo.
தத்த² தித்தி²யா ஸகஸமயங் ஜானந்தா காமானங் பரிஞ்ஞங் பஞ்ஞபெய்யுங் பட²மஜ்ஜா²னங் வத³மானா, ரூபானங் பரிஞ்ஞங் பஞ்ஞபெய்யுங் அரூபப⁴வங் வத³மானா, வேத³னானங் பரிஞ்ஞங் பஞ்ஞபெய்யுங் அஸஞ்ஞப⁴வங் வத³மானா. தே பன ‘‘இத³ங் நாம பட²மஜ்ஜா²னங் அயங் ரூபப⁴வோ அயங் அரூபப⁴வோ’’திபி ந ஜானந்தி. தே பஞ்ஞபேதுங் அஸக்கொந்தாபி கேவலங் ‘‘பஞ்ஞபேம பஞ்ஞபேமா’’தி வத³ந்தி. ததா²க³தோ காமானங் பரிஞ்ஞங் அனாகா³மிமக்³கே³ன பஞ்ஞபேதி, ரூபவேத³னானங் அரஹத்தமக்³கே³ன . தே ஏவங் மஹந்தே விஸேஸே விஜ்ஜமானேபி இத⁴ நோ, ஆவுஸோ, கோ விவேஸோதிஆதி³மாஹங்ஸு.
Tattha titthiyā sakasamayaṃ jānantā kāmānaṃ pariññaṃ paññapeyyuṃ paṭhamajjhānaṃ vadamānā, rūpānaṃ pariññaṃ paññapeyyuṃ arūpabhavaṃ vadamānā, vedanānaṃ pariññaṃ paññapeyyuṃ asaññabhavaṃ vadamānā. Te pana ‘‘idaṃ nāma paṭhamajjhānaṃ ayaṃ rūpabhavo ayaṃ arūpabhavo’’tipi na jānanti. Te paññapetuṃ asakkontāpi kevalaṃ ‘‘paññapema paññapemā’’ti vadanti. Tathāgato kāmānaṃ pariññaṃ anāgāmimaggena paññapeti, rūpavedanānaṃ arahattamaggena . Te evaṃ mahante visese vijjamānepi idha no, āvuso, ko vivesotiādimāhaṃsu.
தத்த² இதா⁴தி இமஸ்மிங் பஞ்ஞாபனே. த⁴ம்மதே³ஸனாய வா த⁴ம்மதே³ஸனந்தி யதி³த³ங் ஸமணஸ்ஸ வா கோ³தமஸ்ஸ த⁴ம்மதே³ஸனாய ஸத்³தி⁴ங் அம்ஹாகங் த⁴ம்மதே³ஸனங், அம்ஹாகங் வா த⁴ம்மதே³ஸனாய ஸத்³தி⁴ங் ஸமணஸ்ஸ கோ³தமஸ்ஸ த⁴ம்மதே³ஸனங் ஆரப்³ப⁴ நானாகரணங் வுச்சேத², தங் கின்னாமாதி வத³ந்தி. து³தியபதே³பி ஏஸேவ நயோ . இதி வேமஜ்ஜே² பி⁴ன்னஸுவண்ணங் விய ஸாஸனேன ஸத்³தி⁴ங் அத்தனோ லத்³தி⁴வசனமத்தேன ஸமது⁴ரங் ட²பயிங்ஸு. நேவ அபி⁴னந்தி³ங்ஸூதி ஏவமேதந்தி ந ஸம்படிச்சி²ங்ஸு. நப்படிக்கோஸிங்ஸூதி நயித³ங் ஏவந்தி நப்படிஸேதே⁴ஸுங். கஸ்மா? தே கிர தித்தி²யா நாம அந்த⁴ஸதி³ஸா, ஜானித்வா வா அஜானித்வா வா கதெ²ய்யுந்தி நாபி⁴னந்தி³ங்ஸு, பரிஞ்ஞந்தி வசனேன ஈஸகங் ஸாஸனக³ந்தோ⁴ அத்தீ²தி நப்படிக்கோஸிங்ஸு. ஜனபத³வாஸினோ வா தே ஸகஸமயபரஸமயேஸு ந ஸுட்டு² குஸலாதிபி உப⁴யங் நாகங்ஸு.
Tattha idhāti imasmiṃ paññāpane. Dhammadesanāya vā dhammadesananti yadidaṃ samaṇassa vā gotamassa dhammadesanāya saddhiṃ amhākaṃ dhammadesanaṃ, amhākaṃ vā dhammadesanāya saddhiṃ samaṇassa gotamassa dhammadesanaṃ ārabbha nānākaraṇaṃ vuccetha, taṃ kinnāmāti vadanti. Dutiyapadepi eseva nayo . Iti vemajjhe bhinnasuvaṇṇaṃ viya sāsanena saddhiṃ attano laddhivacanamattena samadhuraṃ ṭhapayiṃsu. Neva abhinandiṃsūti evametanti na sampaṭicchiṃsu. Nappaṭikkosiṃsūti nayidaṃ evanti nappaṭisedhesuṃ. Kasmā? Te kira titthiyā nāma andhasadisā, jānitvā vā ajānitvā vā katheyyunti nābhinandiṃsu, pariññanti vacanena īsakaṃ sāsanagandho atthīti nappaṭikkosiṃsu. Janapadavāsino vā te sakasamayaparasamayesu na suṭṭhu kusalātipi ubhayaṃ nākaṃsu.
165. ந சேவ ஸம்பாயிஸ்ஸந்தீதி ஸம்பாதெ³த்வா கதே²துங் ந ஸக்கி²ஸ்ஸந்தி. உத்தரிஞ்ச விகா⁴தந்தி அஸம்பாயனதோ உத்தரிம்பி து³க்க²ங் ஆபஜ்ஜிஸ்ஸந்தி. ஸம்பாதெ³த்வா கதே²துங் அஸக்கொந்தானங் நாம ஹி து³க்க²ங் உப்பஜ்ஜதி. யதா² தங், பி⁴க்க²வே, அவிஸயஸ்மிந்தி எத்த² யதா²தி காரணவசனங், தந்தி நிபாதமத்தங். யஸ்மா அவிஸயே பஞ்ஹோ புச்சி²தோ ஹோதீதி அத்தோ². ஸதே³வகேதி ஸஹ தே³வேஹி ஸதே³வகே. ஸமாரகாதீ³ஸுபி ஏஸேவ நயோ. ஏவங் தீணி டா²னானி லோகே பக்கி²பித்வா த்³வே பஜாயாதி பஞ்சஹிபி ஸத்தலோகமேவ பரியாதி³யித்வா ஏதஸ்மிங் ஸதே³வகாதி³பே⁴தே³ லோகே தங் தே³வங் வா மனுஸ்ஸங் வா ந பஸ்ஸாமீதி தீ³பேதி. இதோ வா பன ஸுத்வாதி இதோ வா பன மம ஸாஸனதோ ஸுத்வா அததா²க³தோபி அததா²க³தஸாவகோபி ஆராதெ⁴ய்ய பரிதோஸெய்ய. அஞ்ஞதா² ஆராத⁴னங் நாம நத்தீ²தி த³ஸ்ஸேதி.
165.Na ceva sampāyissantīti sampādetvā kathetuṃ na sakkhissanti. Uttariñca vighātanti asampāyanato uttarimpi dukkhaṃ āpajjissanti. Sampādetvā kathetuṃ asakkontānaṃ nāma hi dukkhaṃ uppajjati. Yathā taṃ, bhikkhave, avisayasminti ettha yathāti kāraṇavacanaṃ, tanti nipātamattaṃ. Yasmā avisaye pañho pucchito hotīti attho. Sadevaketi saha devehi sadevake. Samārakādīsupi eseva nayo. Evaṃ tīṇi ṭhānāni loke pakkhipitvā dve pajāyāti pañcahipi sattalokameva pariyādiyitvā etasmiṃ sadevakādibhede loke taṃ devaṃ vā manussaṃ vā na passāmīti dīpeti. Ito vā pana sutvāti ito vā pana mama sāsanato sutvā atathāgatopi atathāgatasāvakopi ārādheyya paritoseyya. Aññathā ārādhanaṃ nāma natthīti dasseti.
166. இதா³னி அத்தனோ தேஸங் பஞ்ஹானங் வெய்யாகரணேன சித்தாராத⁴னங் த³ஸ்ஸெந்தோ கோ ச, பி⁴க்க²வேதிஆதி³மாஹ. காமகு³ணாதி காமயிதப்³ப³ட்டே²ன காமா. ப³ந்த⁴னட்டே²ன கு³ணா. ‘‘அனுஜானாமி, பி⁴க்க²வே, அஹதானங் வத்தா²னங் த்³விகு³ணங் ஸங்கா⁴டி’’ந்தி (மஹாவ॰ 348) எத்த² ஹி படலட்டோ² கு³ணட்டோ². ‘‘அச்செந்தி காலா தரயந்தி ரத்தியோ, வயோகு³ணா அனுபுப்³ப³ங் ஜஹந்தீ’’தி (ஸங்॰ நி॰ 1.4) எத்த² ராஸட்டோ² கு³ணட்டோ². ‘‘ஸதகு³ணா த³க்கி²ணா பாடிகங்கி²தப்³பா³’’தி (ம॰ நி॰ 3.379) எத்த² ஆனிஸங்ஸட்டோ² கு³ணட்டோ². ‘‘அந்தங் அந்தகு³ணங் (கு²॰ பா॰ 3 த்³வத்திங்ஸாகாரே; தீ³॰ நி॰ 2.377) கயிரா மாலாகு³ணே ப³ஹூ’’தி (த⁴॰ ப॰ 53) எத்த² ப³ந்த⁴னட்டோ² கு³ணட்டோ². இதா⁴பி ஏஸேவ அதி⁴ப்பேதோ, தேன வுத்தங் ‘‘ப³ந்த⁴னட்டே²ன கு³ணா’’தி. சக்கு²விஞ்ஞெய்யாதி சக்கு²விஞ்ஞாணேன பஸ்ஸிதப்³பா³. ஏதேனுபாயேன ஸோதவிஞ்ஞெய்யாதீ³ஸுபி அத்தோ² வேதி³தப்³போ³. இட்டா²தி பரியிட்டா² வா ஹொந்து மா வா, இட்டா²ரம்மணபூ⁴தாதி அத்தோ². கந்தாதி கமனீயா. மனாபாதி மனவட்³ட⁴னகா. பியரூபாதி பியஜாதிகா. காமூபஸங்ஹிதாதி ஆரம்மணங் கத்வா உப்பஜ்ஜமானேன காமேன உபஸங்ஹிதா. ரஜனீயாதி ரஜ்ஜனியா, ராகு³ப்பத்திகாரணபூ⁴தாதி அத்தோ².
166. Idāni attano tesaṃ pañhānaṃ veyyākaraṇena cittārādhanaṃ dassento ko ca, bhikkhavetiādimāha. Kāmaguṇāti kāmayitabbaṭṭhena kāmā. Bandhanaṭṭhena guṇā. ‘‘Anujānāmi, bhikkhave, ahatānaṃ vatthānaṃ dviguṇaṃ saṅghāṭi’’nti (mahāva. 348) ettha hi paṭalaṭṭho guṇaṭṭho. ‘‘Accenti kālā tarayanti rattiyo, vayoguṇā anupubbaṃ jahantī’’ti (saṃ. ni. 1.4) ettha rāsaṭṭho guṇaṭṭho. ‘‘Sataguṇā dakkhiṇā pāṭikaṅkhitabbā’’ti (ma. ni. 3.379) ettha ānisaṃsaṭṭho guṇaṭṭho. ‘‘Antaṃ antaguṇaṃ (khu. pā. 3 dvattiṃsākāre; dī. ni. 2.377) kayirā mālāguṇe bahū’’ti (dha. pa. 53) ettha bandhanaṭṭho guṇaṭṭho. Idhāpi eseva adhippeto, tena vuttaṃ ‘‘bandhanaṭṭhena guṇā’’ti. Cakkhuviññeyyāti cakkhuviññāṇena passitabbā. Etenupāyena sotaviññeyyādīsupi attho veditabbo. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasaṃhitāti ārammaṇaṃ katvā uppajjamānena kāmena upasaṃhitā. Rajanīyāti rajjaniyā, rāguppattikāraṇabhūtāti attho.
167. யதி³ முத்³தா³யாதிஆதீ³ஸு முத்³தா³தி அங்கு³லிபப்³பே³ஸு ஸஞ்ஞங் ட²பெத்வா ஹத்த²முத்³தா³. க³ணனாதி அச்சி²த்³த³க³ணனா. ஸங்கா²னந்தி பிண்ட³க³ணனா. யாய கெ²த்தங் ஓலோகெத்வா இத⁴ எத்தகா வீஹீ ப⁴விஸ்ஸந்தி , ருக்க²ங் ஓலோகெத்வா இத⁴ எத்தகானி ப²லானி ப⁴விஸ்ஸந்தி, ஆகாஸங் ஓலோகெத்வா இமே ஆகாஸே ஸகுணா எத்தகா நாம ப⁴விஸ்ஸந்தீதி ஜானந்தி.
167.Yadi muddāyātiādīsu muddāti aṅgulipabbesu saññaṃ ṭhapetvā hatthamuddā. Gaṇanāti acchiddagaṇanā. Saṅkhānanti piṇḍagaṇanā. Yāya khettaṃ oloketvā idha ettakā vīhī bhavissanti , rukkhaṃ oloketvā idha ettakāni phalāni bhavissanti, ākāsaṃ oloketvā ime ākāse sakuṇā ettakā nāma bhavissantīti jānanti.
கஸீதி கஸிகம்மங். வணிஜ்ஜாதி ஜங்க⁴வணிஜ்ஜத²லவணிஜ்ஜாதி³வணிப்பதோ². கோ³ரக்க²ந்தி அத்தனோ வா பரேஸங் வா கா³வோ ரக்கி²த்வா பஞ்சகோ³ரஸவிக்கயேன ஜீவனகம்மங். இஸ்ஸத்தோ² வுச்சதி ஆவுத⁴ங் க³ஹெத்வா உபட்டா²னகம்மங். ராஜபோரிஸந்தி ஆவுதே⁴ன ராஜகம்மங் கத்வா உபட்டா²னங். ஸிப்பஞ்ஞதரந்தி க³ஹிதாவஸேஸங் ஹத்தி²அஸ்ஸஸிப்பாதி³. ஸீதஸ்ஸ புரக்க²தோதி லக்க²ங் விய ஸரஸ்ஸ ஸீதஸ்ஸ புரதோ, ஸீதேன பா³தீ⁴யமானோதி அத்தோ². உண்ஹேபி ஏஸேவ நயோ. ட³ங்ஸாதீ³ஸு ட³ங்ஸாதி பிங்க³லமக்கி²கா. மகஸாதி ஸப்³ப³மக்கி²கா, ஸரீஸபாதி யே கேசி ஸரித்வா க³ச்ச²ந்தி. ரிஸ்ஸமானோதி ருப்பமானோ, க⁴ட்டியமானோ. மீயமானோதி மரமானோ. அயங், பி⁴க்க²வேதி, பி⁴க்க²வே, அயங் முத்³தா³தீ³ஹி ஜீவிககப்பனங் ஆக³ம்ம ஸீதாதி³பச்சயோ ஆபா³தோ⁴. காமானங் ஆதீ³னவோதி காமேஸு உபத்³த³வோ, உபஸ்ஸக்³கோ³தி அத்தோ². ஸந்தி³ட்டி²கோதி பச்சக்கோ² ஸாமங் பஸ்ஸிதப்³போ³. து³க்க²க்க²ந்தோ⁴தி து³க்க²ராஸி. காமஹேதூதிஆதீ³ஸு பச்சயட்டே²ன காமா அஸ்ஸ ஹேதூதி காமஹேது. மூலட்டே²ன காமா நிதா³னமஸ்ஸாதி காமனிதா³னோ. லிங்க³விபல்லாஸேன பன காமனிதா³னந்தி வுத்தோ. காரணட்டே²ன காமா அதி⁴கரணங் அஸ்ஸாதி காமாதி⁴கரணோ. லிங்க³விபல்லாஸேனேவ பன காமாதி⁴கரணந்தி வுத்தோ. காமானமேவ ஹேதூதி இத³ங் நியமவசனங், காமபச்சயா உப்பஜ்ஜதியேவாதி அத்தோ².
Kasīti kasikammaṃ. Vaṇijjāti jaṅghavaṇijjathalavaṇijjādivaṇippatho. Gorakkhanti attano vā paresaṃ vā gāvo rakkhitvā pañcagorasavikkayena jīvanakammaṃ. Issattho vuccati āvudhaṃ gahetvā upaṭṭhānakammaṃ. Rājaporisanti āvudhena rājakammaṃ katvā upaṭṭhānaṃ. Sippaññataranti gahitāvasesaṃ hatthiassasippādi. Sītassa purakkhatoti lakkhaṃ viya sarassa sītassa purato, sītena bādhīyamānoti attho. Uṇhepi eseva nayo. Ḍaṃsādīsu ḍaṃsāti piṅgalamakkhikā. Makasāti sabbamakkhikā, sarīsapāti ye keci saritvā gacchanti. Rissamānoti ruppamāno, ghaṭṭiyamāno. Mīyamānoti maramāno. Ayaṃ, bhikkhaveti, bhikkhave, ayaṃ muddādīhi jīvikakappanaṃ āgamma sītādipaccayo ābādho. Kāmānaṃ ādīnavoti kāmesu upaddavo, upassaggoti attho. Sandiṭṭhikoti paccakkho sāmaṃ passitabbo. Dukkhakkhandhoti dukkharāsi. Kāmahetūtiādīsu paccayaṭṭhena kāmā assa hetūti kāmahetu. Mūlaṭṭhena kāmā nidānamassāti kāmanidāno. Liṅgavipallāsena pana kāmanidānanti vutto. Kāraṇaṭṭhena kāmā adhikaraṇaṃ assāti kāmādhikaraṇo. Liṅgavipallāseneva pana kāmādhikaraṇanti vutto. Kāmānameva hetūti idaṃ niyamavacanaṃ, kāmapaccayā uppajjatiyevāti attho.
உட்ட²ஹதோதி ஆஜீவஸமுட்டா²பகவீரியேன உட்ட²ஹந்தஸ்ஸ. க⁴டதோதி தங் வீரியங் புப்³பே³னாபரங் க⁴டெந்தஸ்ஸ. வாயமதோதி வாயாமங் பரக்கமங் பயோக³ங் கரொந்தஸ்ஸ. நாபி⁴னிப்ப²ஜ்ஜந்தீதி ந நிப்ப²ஜ்ஜந்தி, ஹத்த²ங் நாபி⁴ருஹந்தி. ஸோசதீதி சித்தே உப்பன்னப³லவஸோகேன ஸோசதி. கிலமதீதி காயே உப்பன்னது³க்கே²ன கிலமதி. பரிதே³வதீதி வாசாய பரிதே³வதி. உரத்தாளிந்தி உரங் தாளெத்வா. கந்த³தீதி ரோத³தி. ஸம்மோஹங் ஆபஜ்ஜதீதி விஸஞ்ஞீ விய ஸம்மூள்ஹோ ஹோதி. மோக⁴ந்தி துச்ச²ங். அப²லோதி நிப்ப²லோ. ஆரக்கா²தி⁴கரணந்தி ஆரக்க²காரணா. கிந்தீதி கேன நு கோ² உபாயேன. யம்பி மேதி யம்பி மய்ஹங் கஸிகம்மாதீ³னி கத்வா உப்பாதி³தங் த⁴னங் அஹோஸி. தம்பி நோ நத்தீ²தி தம்பி அம்ஹாகங் இதா³னி நத்தி².
Uṭṭhahatoti ājīvasamuṭṭhāpakavīriyena uṭṭhahantassa. Ghaṭatoti taṃ vīriyaṃ pubbenāparaṃ ghaṭentassa. Vāyamatoti vāyāmaṃ parakkamaṃ payogaṃ karontassa. Nābhinipphajjantīti na nipphajjanti, hatthaṃ nābhiruhanti. Socatīti citte uppannabalavasokena socati. Kilamatīti kāye uppannadukkhena kilamati. Paridevatīti vācāya paridevati. Urattāḷinti uraṃ tāḷetvā. Kandatīti rodati. Sammohaṃ āpajjatīti visaññī viya sammūḷho hoti. Moghanti tucchaṃ. Aphaloti nipphalo. Ārakkhādhikaraṇanti ārakkhakāraṇā. Kintīti kena nu kho upāyena. Yampi meti yampi mayhaṃ kasikammādīni katvā uppāditaṃ dhanaṃ ahosi. Tampi no natthīti tampi amhākaṃ idāni natthi.
168. புன சபரங், பி⁴க்க²வே, காமஹேதூதிஆதி³னாபி காரணங் த³ஸ்ஸெத்வாவ ஆதீ³னவங் தீ³பேதி. தத்த² காமஹேதூதி காமபச்சயா ராஜானோபி ராஜூஹி விவத³ந்தி. காமனிதா³னந்தி பா⁴வனபுங்ஸகங், காமே நிதா³னங் கத்வா விவத³ந்தீதி அத்தோ². காமாதி⁴கரணந்திபி பா⁴வனபுங்ஸகமேவ, காமே அதி⁴கரணங் கத்வா விவத³ந்தீதி அத்தோ². காமானமேவ ஹேதூதி கா³மனிக³மனக³ரஸேனாபதிபுரோஹிதட்டா²னந்தராதீ³னங் காமானமேவ ஹேது விவத³ந்தீதி அத்தோ². உபக்கமந்தீதி பஹரந்தி. அஸிசம்மந்தி அஸிஞ்சேவ கே²டகப²லகாதீ³னி ச. த⁴னுகலாபங் ஸன்னய்ஹித்வாதி த⁴னுங் க³ஹெத்வா ஸரகலாபங் ஸன்னய்ஹித்வா. உப⁴தொப்³யூளந்தி உப⁴தோ ராஸிபூ⁴தங். பக்க²ந்த³ந்தீதி பவிஸந்தி. உஸூஸூதி கண்டே³ஸு. விஜ்ஜோதலந்தேஸூதி விபரிவத்தந்தேஸு. தே தத்தா²தி தே தஸ்மிங் ஸங்கா³மே.
168.Puna caparaṃ, bhikkhave, kāmahetūtiādināpi kāraṇaṃ dassetvāva ādīnavaṃ dīpeti. Tattha kāmahetūti kāmapaccayā rājānopi rājūhi vivadanti. Kāmanidānanti bhāvanapuṃsakaṃ, kāme nidānaṃ katvā vivadantīti attho. Kāmādhikaraṇantipi bhāvanapuṃsakameva, kāme adhikaraṇaṃ katvā vivadantīti attho. Kāmānameva hetūti gāmanigamanagarasenāpatipurohitaṭṭhānantarādīnaṃ kāmānameva hetu vivadantīti attho. Upakkamantīti paharanti. Asicammanti asiñceva kheṭakaphalakādīni ca. Dhanukalāpaṃ sannayhitvāti dhanuṃ gahetvā sarakalāpaṃ sannayhitvā. Ubhatobyūḷanti ubhato rāsibhūtaṃ. Pakkhandantīti pavisanti. Usūsūti kaṇḍesu. Vijjotalantesūti viparivattantesu. Te tatthāti te tasmiṃ saṅgāme.
அத்³தா³வலேபனா உபகாரியோதி செத்த² மனுஸ்ஸா பாகாரபாத³ங் அஸ்ஸகு²ரஸண்டா²னேன இட்ட²காஹி சினித்வா உபரி ஸுதா⁴ய லிம்பந்தி. ஏவங் கதா பாகாரபாதா³ உபகாரியோதி வுச்சந்தி. தா திந்தேன கலலேன ஸித்தா அத்³தா³வலேபனா நாம ஹொந்தி. பக்க²ந்த³ந்தீதி தாஸங் ஹெட்டா² திகி²ணஅயஸூலாதீ³ஹி விஜ்ஜீ²யமானாபி பாகாரஸ்ஸ பிச்சி²லபா⁴வேன ஆரோஹிதுங் அஸக்கொந்தாபி உபதா⁴வந்தியேவ. ச²கணகாயாதி குதி²தகோ³மயேன. அபி⁴வக்³கே³னாதி ஸதத³ந்தேன. தங் அட்ட²த³ந்தாகாரேன கத்வா ‘‘நக³ரத்³வாரங் பி⁴ந்தி³த்வா பவிஸிஸ்ஸாமா’’தி ஆக³தே உபரித்³வாரே டி²தா தஸ்ஸ ப³ந்த⁴னயொத்தானி சி²ந்தி³த்வா தேன அபி⁴வக்³கே³ன ஓமத்³த³ந்தி.
Addāvalepanāupakāriyoti cettha manussā pākārapādaṃ assakhurasaṇṭhānena iṭṭhakāhi cinitvā upari sudhāya limpanti. Evaṃ katā pākārapādā upakāriyoti vuccanti. Tā tintena kalalena sittā addāvalepanā nāma honti. Pakkhandantīti tāsaṃ heṭṭhā tikhiṇaayasūlādīhi vijjhīyamānāpi pākārassa picchilabhāvena ārohituṃ asakkontāpi upadhāvantiyeva. Chakaṇakāyāti kuthitagomayena. Abhivaggenāti satadantena. Taṃ aṭṭhadantākārena katvā ‘‘nagaradvāraṃ bhinditvā pavisissāmā’’ti āgate uparidvāre ṭhitā tassa bandhanayottāni chinditvā tena abhivaggena omaddanti.
169. ஸந்தி⁴ம்பி சி²ந்த³ந்தீதி க⁴ரஸந்தி⁴ம்பி சி²ந்த³ந்தி. நில்லோபந்தி கா³மே பஹரித்வா மஹாவிலோபங் கரொந்தி. ஏகாகா³ரிகந்தி பண்ணாஸமத்தாபி ஸட்டி²மத்தாபி பரிவாரெத்வா ஜீவக்³கா³ஹங் க³ஹெத்வா ஆஹராபெந்தி. பரிபந்தே²பி திட்ட²ந்தீதி பந்த²தூ³ஹனகம்மங் கரொந்தி. அட்³ட⁴த³ண்ட³கேஹீதி முக்³க³ரேஹி பஹாரஸாத⁴னத்த²ங் வா சதுஹத்த²த³ண்ட³ங் த்³வேதா⁴ செ²த்வா க³ஹிதத³ண்ட³கேஹி. பி³லங்க³தா²லிகந்தி கஞ்ஜியஉக்க²லிகம்மகாரணங், தங் கரொந்தா ஸீஸகபாலங் உப்பாடெத்வா தத்தங் அயோகு³ளங் ஸண்டா³ஸேன க³ஹெத்வா தத்த² பக்கி²பந்தி, தேன மத்த²லுங்க³ங் பக்குதி²த்வா உபரி உத்தரதி. ஸங்க²முண்டி³கந்தி ஸங்க²முண்ட³கம்மகாரணங், தங் கரொந்தா உத்தரொட்ட²உப⁴தோகண்ணசூளிகக³ளவாடபரிச்சே²தே³ன சம்மங் சி²ந்தி³த்வா ஸப்³ப³கேஸே ஏகதோ க³ண்டி²ங் கத்வா த³ண்ட³கேன வல்லித்வா உப்பாடெந்தி, ஸஹ கேஸேஹி சம்மங் உட்ட²ஹதி. ததோ ஸீஸகடாஹங் தூ²லஸக்க²ராஹி க⁴ங்ஸித்வா தோ⁴வந்தா ஸங்க²வண்ணங் கரொந்தி.
169.Sandhimpi chindantīti gharasandhimpi chindanti. Nillopanti gāme paharitvā mahāvilopaṃ karonti. Ekāgārikanti paṇṇāsamattāpi saṭṭhimattāpi parivāretvā jīvaggāhaṃ gahetvā āharāpenti. Paripanthepi tiṭṭhantīti panthadūhanakammaṃ karonti. Aḍḍhadaṇḍakehīti muggarehi pahārasādhanatthaṃ vā catuhatthadaṇḍaṃ dvedhā chetvā gahitadaṇḍakehi. Bilaṅgathālikanti kañjiyaukkhalikammakāraṇaṃ, taṃ karontā sīsakapālaṃ uppāṭetvā tattaṃ ayoguḷaṃ saṇḍāsena gahetvā tattha pakkhipanti, tena matthaluṅgaṃ pakkuthitvā upari uttarati. Saṅkhamuṇḍikanti saṅkhamuṇḍakammakāraṇaṃ, taṃ karontā uttaroṭṭhaubhatokaṇṇacūḷikagaḷavāṭaparicchedena cammaṃ chinditvā sabbakese ekato gaṇṭhiṃ katvā daṇḍakena vallitvā uppāṭenti, saha kesehi cammaṃ uṭṭhahati. Tato sīsakaṭāhaṃ thūlasakkharāhi ghaṃsitvā dhovantā saṅkhavaṇṇaṃ karonti.
ராஹுமுக²ந்தி ராஹுமுக²கம்மகாரணங், தங் கரொந்தா ஸங்குனா முக²ங் விவரித்வா அந்தோமுகே² தீ³பங் ஜாலெந்தி . கண்ணசூளிகாஹி வா பட்டா²ய முக²ங் நிகா²த³னேன க²ணந்தி. லோஹிதங் பக்³க⁴ரித்வா முக²ங் பூரேதி. ஜோதிமாலிகந்தி ஸகலஸரீரங் தேலபிலோதிகாய வேடெ²த்வா ஆலிம்பந்தி. ஹத்த²பஜ்ஜோதிகந்தி ஹத்தே² தேலபிலோதிகாய வேடெ²த்வா தீ³பங் விய ஜாலெந்தி. ஏரகவத்திகந்தி ஏரகவத்தகம்மகாரணங், தங் கரொந்தா கீ³வதோ பட்டா²ய சம்மப³த்³தே⁴ கந்தித்வா கொ³ப்ப²கே ட²பெந்தி. அத² நங் யொத்தேஹி ப³ந்தி⁴த்வா கட்³ட⁴ந்தி. ஸோ அத்தனோ சம்மப³த்³தே⁴ அக்கமித்வா அக்கமித்வா பததி. சீரகவாஸிகந்தி சீரகவாஸிககம்மகாரணங், தங் கரொந்தா ததே²வ சம்மப³த்³தே⁴ கந்தித்வா கடியங் ட²பெந்தி. கடிதோ பட்டா²ய கந்தித்வா கொ³ப்ப²கேஸு ட²பெந்தி. உபரிமேஹி ஹெட்டி²மஸரீரங் சீரகனிவாஸனநிவத்த²ங் விய ஹோதி. ஏணெய்யகந்தி ஏணெய்யககம்மகாரணங். தங் கரொந்தா உபோ⁴ஸு கப்பரேஸு ச ஜாணூஸு ச அயவலயானி த³த்வா அயஸூலானி கொட்டெந்தி. ஸோ சதூஹி அயஸூலேஹி பூ⁴மியங் பதிட்ட²ஹதி. அத² நங் பரிவாரெத்வா அக்³கி³ங் கரொந்தி. ‘‘ஏணெய்யகோ ஜோதிபரிக்³க³ஹோ யதா²’’தி ஆக³தட்டா²னேபி இத³மேவ வுத்தங். தங் காலேன காலங் ஸூலானி அபனெத்வா சதூஹி அட்டி²கோடீஹியேவ ட²பெந்தி. ஏவரூபா காரணா நாம நத்தி².
Rāhumukhanti rāhumukhakammakāraṇaṃ, taṃ karontā saṅkunā mukhaṃ vivaritvā antomukhe dīpaṃ jālenti . Kaṇṇacūḷikāhi vā paṭṭhāya mukhaṃ nikhādanena khaṇanti. Lohitaṃ paggharitvā mukhaṃ pūreti. Jotimālikanti sakalasarīraṃ telapilotikāya veṭhetvā ālimpanti. Hatthapajjotikanti hatthe telapilotikāya veṭhetvā dīpaṃ viya jālenti. Erakavattikanti erakavattakammakāraṇaṃ, taṃ karontā gīvato paṭṭhāya cammabaddhe kantitvā gopphake ṭhapenti. Atha naṃ yottehi bandhitvā kaḍḍhanti. So attano cammabaddhe akkamitvā akkamitvā patati. Cīrakavāsikanti cīrakavāsikakammakāraṇaṃ, taṃ karontā tatheva cammabaddhe kantitvā kaṭiyaṃ ṭhapenti. Kaṭito paṭṭhāya kantitvā gopphakesu ṭhapenti. Uparimehi heṭṭhimasarīraṃ cīrakanivāsananivatthaṃ viya hoti. Eṇeyyakanti eṇeyyakakammakāraṇaṃ. Taṃ karontā ubhosu kapparesu ca jāṇūsu ca ayavalayāni datvā ayasūlāni koṭṭenti. So catūhi ayasūlehi bhūmiyaṃ patiṭṭhahati. Atha naṃ parivāretvā aggiṃ karonti. ‘‘Eṇeyyako jotipariggaho yathā’’ti āgataṭṭhānepi idameva vuttaṃ. Taṃ kālena kālaṃ sūlāni apanetvā catūhi aṭṭhikoṭīhiyeva ṭhapenti. Evarūpā kāraṇā nāma natthi.
ப³ளிஸமங்ஸிகந்தி உப⁴தோமுகே²ஹி ப³ளிஸேஹி பஹரித்வா சம்மமங்ஸன்ஹாரூனி உப்பாடெந்தி. கஹாபணிகந்தி ஸகலஸரீரங் திண்ஹாஹி வாஸீஹி கோடிதோ பட்டா²ய கஹாபணமத்தங் கஹாபணமத்தங் பாதெந்தா கொட்டெந்தி. கா²ராபதச்சி²கந்தி ஸரீரங் தத்த² தத்த² ஆவுதே⁴ஹி பஹரித்வா கொச்சே²ஹி கா²ரங் க⁴ங்ஸந்தி. சம்மஸங்ஸன்ஹாரூனி பக்³க⁴ரித்வா ஸவந்தி. அட்டி²கஸங்க²லிகாவ திட்ட²தி. பலிக⁴பரிவத்திகந்தி ஏகேன பஸ்ஸேன நிபஜ்ஜாபெத்வா கண்ணச்சி²த்³தே³ அயஸூலங் கொட்டெத்வா பத²வியா ஏகாப³த்³த⁴ங் கரொந்தி. அத² நங் பாதே³ க³ஹெத்வா ஆவிஜ்ஜ²ந்தி. பலாலபீட²கந்தி சே²கோ காரணிகோ ச²விசம்மங் அச்சி²ந்தி³த்வா நிஸத³போதேஹி அட்டீ²னி பி⁴ந்தி³த்வா கேஸேஸு க³ஹெத்வா உக்கி²பந்தி. மங்ஸராஸியேவ ஹோதி, அத² நங் கேஸேஹேவ பரியோனந்தி⁴த்வா க³ண்ஹந்தி. பலாலவட்டிங் விய கத்வா பன வேடெ²ந்தி. ஸுனகே²ஹிபீதி கதிபயானி தி³வஸானி ஆஹாரங் அத³த்வா சா²தகேஹி ஸுனகே²ஹி கா²தா³பெந்தி. தே முஹுத்தேன அட்டி²ஸங்க²லிகமேவ கரொந்தி. ஸம்பராயிகோதி ஸம்பராயே து³தியத்தபா⁴வே விபாகோதி அத்தோ².
Baḷisamaṃsikanti ubhatomukhehi baḷisehi paharitvā cammamaṃsanhārūni uppāṭenti. Kahāpaṇikanti sakalasarīraṃ tiṇhāhi vāsīhi koṭito paṭṭhāya kahāpaṇamattaṃ kahāpaṇamattaṃ pātentā koṭṭenti. Khārāpatacchikanti sarīraṃ tattha tattha āvudhehi paharitvā kocchehi khāraṃ ghaṃsanti. Cammasaṃsanhārūni paggharitvā savanti. Aṭṭhikasaṅkhalikāva tiṭṭhati. Palighaparivattikanti ekena passena nipajjāpetvā kaṇṇacchidde ayasūlaṃ koṭṭetvā pathaviyā ekābaddhaṃ karonti. Atha naṃ pāde gahetvā āvijjhanti. Palālapīṭhakanti cheko kāraṇiko chavicammaṃ acchinditvā nisadapotehi aṭṭhīni bhinditvā kesesu gahetvā ukkhipanti. Maṃsarāsiyeva hoti, atha naṃ keseheva pariyonandhitvā gaṇhanti. Palālavaṭṭiṃ viya katvā pana veṭhenti. Sunakhehipīti katipayāni divasāni āhāraṃ adatvā chātakehi sunakhehi khādāpenti. Te muhuttena aṭṭhisaṅkhalikameva karonti. Samparāyikoti samparāye dutiyattabhāve vipākoti attho.
170. ச²ந்த³ராக³வினயோ ச²ந்த³ராக³ப்பஹானந்தி நிப்³பா³னங். நிப்³பா³னஞ்ஹி ஆக³ம்ம காமேஸு ச²ந்த³ராகோ³ வினீயதி சேவ பஹீயதி ச, தஸ்மா நிப்³பா³னங் ச²ந்த³ராக³வினயோ ச²ந்த³ராக³ப்பஹானந்தி ச வுத்தங். ஸாமங் வா காமே பரிஜானிஸ்ஸந்தீதி ஸயங் வா தே காமே தீஹி பரிஞ்ஞாஹி பரிஜானிஸ்ஸந்தி. தத²த்தாயாதி தத²பா⁴வாய. யதா²படிபன்னோதி யாய படிபதா³ய படிபன்னோ.
170.Chandarāgavinayo chandarāgappahānanti nibbānaṃ. Nibbānañhi āgamma kāmesu chandarāgo vinīyati ceva pahīyati ca, tasmā nibbānaṃ chandarāgavinayo chandarāgappahānanti ca vuttaṃ. Sāmaṃ vā kāme parijānissantīti sayaṃ vā te kāme tīhi pariññāhi parijānissanti. Tathattāyāti tathabhāvāya. Yathāpaṭipannoti yāya paṭipadāya paṭipanno.
171. க²த்தியகஞ்ஞா வாதிஆதி³ அபரித்தேன விபுலேன குஸலேன க³ஹிதபடிஸந்தி⁴கங் வத்தா²லங்காராதீ³னி லப⁴னட்டா²னே நிப்³ப³த்தங் த³ஸ்ஸேதுங் வுத்தங். பன்னரஸவஸ்ஸுத்³தே³ஸிகாதி பன்னரஸவஸ்ஸவயா. து³தியபதே³பி ஏஸேவ நயோ. வயபதே³ஸங் கஸ்மா க³ண்ஹாதி? வண்ணஸம்பத்தித³ஸ்ஸனத்த²ங். மாதுகா³மஸ்ஸ ஹி து³க்³க³தகுலே நிப்³ப³த்தஸ்ஸாபி ஏதஸ்மிங் காலே தோ²கங் தோ²கங் வண்ணாயதனங் பஸீத³தி. புரிஸானங் பன வீஸதிவஸ்ஸகாலே பஞ்சவீஸதிவஸ்ஸகாலே பஸன்னங் ஹோதி. நாதிதீ³கா⁴திஆதீ³ஹி ச²தோ³ஸவிரஹிதங் ஸரீரஸம்பத்திங் தீ³பேதி. வண்ணனிபா⁴தி வண்ணோயேவ.
171.Khattiyakaññāvātiādi aparittena vipulena kusalena gahitapaṭisandhikaṃ vatthālaṅkārādīni labhanaṭṭhāne nibbattaṃ dassetuṃ vuttaṃ. Pannarasavassuddesikāti pannarasavassavayā. Dutiyapadepi eseva nayo. Vayapadesaṃ kasmā gaṇhāti? Vaṇṇasampattidassanatthaṃ. Mātugāmassa hi duggatakule nibbattassāpi etasmiṃ kāle thokaṃ thokaṃ vaṇṇāyatanaṃ pasīdati. Purisānaṃ pana vīsativassakāle pañcavīsativassakāle pasannaṃ hoti. Nātidīghātiādīhi chadosavirahitaṃ sarīrasampattiṃ dīpeti. Vaṇṇanibhāti vaṇṇoyeva.
ஜிண்ணந்தி ஜராஜிண்ணங். கோ³பானஸிவங்கந்தி கோ³பானஸீ விய வங்கங். பொ⁴க்³க³ந்தி ப⁴க்³க³ங், இமினாபிஸ்ஸ வங்கபா⁴வமேவ தீ³பேதி. த³ண்ட³பராயணந்தி த³ண்ட³படிஸரணங் த³ண்ட³து³தியங். பவேத⁴மானந்தி கம்பமானங். ஆதுரந்தி ஜராதுரங். க²ண்ட³த³ந்தந்தி ஜிண்ணபா⁴வேன க²ண்டி³தத³ந்தங். பலிதகேஸந்தி பண்ட³ரகேஸங். விலூனந்தி லுஞ்சித்வா க³ஹிதகேஸங் விய க²ல்லாடங். க²லிதஸிரந்தி மஹாக²ல்லாடஸீஸங். வலினந்தி ஸஞ்ஜாதவலிங். திலகாஹதக³த்தந்தி ஸேதகாளதிலகேஹி விகிண்ணஸரீரங். ஆபா³தி⁴கந்தி ப்³யாதி⁴கங். து³க்கி²தந்தி து³க்க²பத்தங்.
Jiṇṇanti jarājiṇṇaṃ. Gopānasivaṅkanti gopānasī viya vaṅkaṃ. Bhogganti bhaggaṃ, imināpissa vaṅkabhāvameva dīpeti. Daṇḍaparāyaṇanti daṇḍapaṭisaraṇaṃ daṇḍadutiyaṃ. Pavedhamānanti kampamānaṃ. Āturanti jarāturaṃ. Khaṇḍadantanti jiṇṇabhāvena khaṇḍitadantaṃ. Palitakesanti paṇḍarakesaṃ. Vilūnanti luñcitvā gahitakesaṃ viya khallāṭaṃ. Khalitasiranti mahākhallāṭasīsaṃ. Valinanti sañjātavaliṃ. Tilakāhatagattanti setakāḷatilakehi vikiṇṇasarīraṃ. Ābādhikanti byādhikaṃ. Dukkhitanti dukkhapattaṃ.
பா³ள்ஹகி³லானந்தி அதி⁴மத்தகி³லானங். ஸிவதி²காய ச²ட்³டி³தந்தி ஆமகஸுஸானே பாதிதங். ஸேஸமெத்த² ஸதிபட்டா²னே வுத்தமேவ. இதா⁴பி நிப்³பா³னங்யேவ ச²ந்த³ராக³வினயோ.
Bāḷhagilānanti adhimattagilānaṃ. Sivathikāya chaḍḍitanti āmakasusāne pātitaṃ. Sesamettha satipaṭṭhāne vuttameva. Idhāpi nibbānaṃyeva chandarāgavinayo.
173. நேவ தஸ்மிங் ஸமயே அத்தப்³யாபா³தா⁴யாதி தஸ்மிங் ஸமயே அத்தனோபி து³க்க²த்தா²ய ந சேதேதி. அப்³யாப³ஜ்ஜ²ங்யேவாதி நித்³து³க்க²மேவ .
173.Neva tasmiṃ samaye attabyābādhāyāti tasmiṃ samaye attanopi dukkhatthāya na ceteti. Abyābajjhaṃyevāti niddukkhameva .
174. யங், பி⁴க்க²வே, வேத³னா அனிச்சாதி, பி⁴க்க²வே, யஸ்மா வேத³னா அனிச்சா, தஸ்மா அயங் அனிச்சாதி³ஆகாரோவ வேத³னாய ஆதீ³னவோதி அத்தோ², நிஸ்ஸரணங் வுத்தப்பகாரமேவாதி.
174.Yaṃ, bhikkhave, vedanā aniccāti, bhikkhave, yasmā vedanā aniccā, tasmā ayaṃ aniccādiākārova vedanāya ādīnavoti attho, nissaraṇaṃ vuttappakāramevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாது³க்க²க்க²ந்த⁴ஸுத்தவண்ணனா நிட்டி²தா.
Mahādukkhakkhandhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மஹாது³க்க²க்க²ந்த⁴ஸுத்தங் • 3. Mahādukkhakkhandhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. மஹாது³க்க²க்க²ந்த⁴ஸுத்தவண்ணனா • 3. Mahādukkhakkhandhasuttavaṇṇanā
