| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
3. மஹாகோ³பாலகஸுத்தங்
3. Mahāgopālakasuttaṃ
346. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
346. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ஏகாத³ஸஹி, பி⁴க்க²வே, அங்கே³ஹி ஸமன்னாக³தோ கோ³பாலகோ அப⁴ப்³போ³ கோ³க³ணங் பரிஹரிதுங் பா²திங் காதுங் 1. கதமேஹி ஏகாத³ஸஹி? இத⁴, பி⁴க்க²வே, கோ³பாலகோ ந ரூபஞ்ஞூ ஹோதி, ந லக்க²ணகுஸலோ ஹோதி, ந ஆஸாடிகங் ஹாரேதா 2 ஹோதி, ந வணங் படிச்சா²தே³தா ஹோதி, ந தூ⁴மங் கத்தா ஹோதி, ந தித்த²ங் ஜானாதி, ந பீதங் ஜானாதி, ந வீதி²ங் ஜானாதி, ந கோ³சரகுஸலோ ஹோதி அனவஸேஸதோ³ஹீ ச ஹோதி. யே தே உஸபா⁴ கோ³பிதரோ கோ³பரிணாயகா தே ந அதிரேகபூஜாய பூஜேதா ஹோதி. இமேஹி கோ², பி⁴க்க²வே, ஏகாத³ஸஹி அங்கே³ஹி ஸமன்னாக³தோ கோ³பாலகோ அப⁴ப்³போ³ கோ³க³ணங் பரிஹரிதுங் பா²திங் காதுங். ஏவமேவ கோ², பி⁴க்க²வே, ஏகாத³ஸஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிதுங். கதமேஹி ஏகாத³ஸஹி? இத⁴, பி⁴க்க²வே, பி⁴க்கு² ந ரூபஞ்ஞூ ஹோதி, ந லக்க²ணகுஸலோ ஹோதி, ந ஆஸாடிகங் ஹாரேதா ஹோதி, ந வணங் படிச்சா²தே³தா ஹோதி, ந தூ⁴மங் கத்தா ஹோதி, ந தித்த²ங் ஜானாதி, ந பீதங் ஜானாதி, ந வீதி²ங் ஜானாதி, ந கோ³சரகுஸலோ ஹோதி, அனவஸேஸதோ³ஹீ ச ஹோதி. யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந அதிரேகபூஜாய பூஜேதா ஹோதி.
‘‘Ekādasahi, bhikkhave, aṅgehi samannāgato gopālako abhabbo gogaṇaṃ pariharituṃ phātiṃ kātuṃ 3. Katamehi ekādasahi? Idha, bhikkhave, gopālako na rūpaññū hoti, na lakkhaṇakusalo hoti, na āsāṭikaṃ hāretā 4 hoti, na vaṇaṃ paṭicchādetā hoti, na dhūmaṃ kattā hoti, na titthaṃ jānāti, na pītaṃ jānāti, na vīthiṃ jānāti, na gocarakusalo hoti anavasesadohī ca hoti. Ye te usabhā gopitaro gopariṇāyakā te na atirekapūjāya pūjetā hoti. Imehi kho, bhikkhave, ekādasahi aṅgehi samannāgato gopālako abhabbo gogaṇaṃ pariharituṃ phātiṃ kātuṃ. Evameva kho, bhikkhave, ekādasahi dhammehi samannāgato bhikkhu abhabbo imasmiṃ dhammavinaye vuddhiṃ virūḷhiṃ vepullaṃ āpajjituṃ. Katamehi ekādasahi? Idha, bhikkhave, bhikkhu na rūpaññū hoti, na lakkhaṇakusalo hoti, na āsāṭikaṃ hāretā hoti, na vaṇaṃ paṭicchādetā hoti, na dhūmaṃ kattā hoti, na titthaṃ jānāti, na pītaṃ jānāti, na vīthiṃ jānāti, na gocarakusalo hoti, anavasesadohī ca hoti. Ye te bhikkhū therā rattaññū cirapabbajitā saṅghapitaro saṅghapariṇāyakā te na atirekapūjāya pūjetā hoti.
347. ‘‘கத²ஞ்ச, பி⁴க்க²வே, பி⁴க்கு² ந ரூபஞ்ஞூ ஹோதி? இத⁴, பி⁴க்க²வே, பி⁴க்கு² யங் கிஞ்சி ரூபங் ஸப்³ப³ங் ரூபங் ‘சத்தாரி மஹாபூ⁴தானி, சதுன்னஞ்ச மஹாபூ⁴தானங் உபாதா³யரூப’ந்தி யதா²பூ⁴தங் நப்பஜானாதி. ஏவங் கோ², பி⁴க்க²வே, பி⁴க்கு² ந ரூபஞ்ஞூ ஹோதி.
347. ‘‘Kathañca, bhikkhave, bhikkhu na rūpaññū hoti? Idha, bhikkhave, bhikkhu yaṃ kiñci rūpaṃ sabbaṃ rūpaṃ ‘cattāri mahābhūtāni, catunnañca mahābhūtānaṃ upādāyarūpa’nti yathābhūtaṃ nappajānāti. Evaṃ kho, bhikkhave, bhikkhu na rūpaññū hoti.
‘‘கத²ஞ்ச, பி⁴க்க²வே, பி⁴க்கு² ந லக்க²ணகுஸலோ ஹோதி? இத⁴, பி⁴க்க²வே, பி⁴க்கு² ‘கம்மலக்க²ணோ பா³லோ, கம்மலக்க²ணோ பண்டி³தோ’தி யதா²பூ⁴தங் நப்பஜானாதி. ஏவங் கோ², பி⁴க்க²வே, பி⁴க்கு² ந லக்க²ணகுஸலோ ஹோதி.
‘‘Kathañca, bhikkhave, bhikkhu na lakkhaṇakusalo hoti? Idha, bhikkhave, bhikkhu ‘kammalakkhaṇo bālo, kammalakkhaṇo paṇḍito’ti yathābhūtaṃ nappajānāti. Evaṃ kho, bhikkhave, bhikkhu na lakkhaṇakusalo hoti.
‘‘கத²ஞ்ச, பி⁴க்க²வே, பி⁴க்கு² ந ஆஸாடிகங் ஹாரேதா ஹோதி? இத⁴, பி⁴க்க²வே, பி⁴க்கு² உப்பன்னங் காமவிதக்கங் அதி⁴வாஸேதி, நப்பஜஹதி ந வினோதே³தி ந ப்³யந்தீ கரோதி ந அனபா⁴வங் க³மேதி. உப்பன்னங் ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்…பே॰… உப்பன்னுப்பன்னே பாபகே அகுஸலே த⁴ம்மே அதி⁴வாஸேதி, நப்பஜஹதி ந வினோதே³தி ந ப்³யந்தீ கரோதி ந அனபா⁴வங் க³மேதி. ஏவங் கோ², பி⁴க்க²வே, பி⁴க்கு² ந ஆஸாடிகங் ஹாரேதா ஹோதி.
‘‘Kathañca, bhikkhave, bhikkhu na āsāṭikaṃ hāretā hoti? Idha, bhikkhave, bhikkhu uppannaṃ kāmavitakkaṃ adhivāseti, nappajahati na vinodeti na byantī karoti na anabhāvaṃ gameti. Uppannaṃ byāpādavitakkaṃ…pe… uppannaṃ vihiṃsāvitakkaṃ…pe… uppannuppanne pāpake akusale dhamme adhivāseti, nappajahati na vinodeti na byantī karoti na anabhāvaṃ gameti. Evaṃ kho, bhikkhave, bhikkhu na āsāṭikaṃ hāretā hoti.
‘‘கத²ஞ்ச, பி⁴க்க²வே, பி⁴க்கு² ந வணங் படிச்சா²தே³தா ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா நிமித்தக்³கா³ஹீ ஹோதி அனுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய ந படிபஜ்ஜதி, ந ரக்க²தி சக்கு²ந்த்³ரியங், சக்கு²ந்த்³ரியே ந ஸங்வரங் ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய நிமித்தக்³கா³ஹீ ஹோதி அனுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய ந படிபஜ்ஜதி, ந ரக்க²தி மனிந்த்³ரியங், மனிந்த்³ரியே ந ஸங்வரங் ஆபஜ்ஜதி. ஏவங் கோ², பி⁴க்க²வே, பி⁴க்கு² ந வணங் படிச்சா²தே³தா ஹோதி.
‘‘Kathañca, bhikkhave, bhikkhu na vaṇaṃ paṭicchādetā hoti? Idha, bhikkhave, bhikkhu cakkhunā rūpaṃ disvā nimittaggāhī hoti anubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya na paṭipajjati, na rakkhati cakkhundriyaṃ, cakkhundriye na saṃvaraṃ āpajjati. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya nimittaggāhī hoti anubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya na paṭipajjati, na rakkhati manindriyaṃ, manindriye na saṃvaraṃ āpajjati. Evaṃ kho, bhikkhave, bhikkhu na vaṇaṃ paṭicchādetā hoti.
‘‘கத²ஞ்ச, பி⁴க்க²வே, பி⁴க்கு² ந தூ⁴மங் கத்தா ஹோதி? இத⁴, பி⁴க்க²வே, பி⁴க்கு² யதா²ஸுதங் யதா²பரியத்தங் த⁴ம்மங் ந வித்தா²ரேன பரேஸங் தே³ஸேதா ஹோதி. ஏவங் கோ², பி⁴க்க²வே, பி⁴க்கு² ந தூ⁴மங் கத்தா ஹோதி.
‘‘Kathañca, bhikkhave, bhikkhu na dhūmaṃ kattā hoti? Idha, bhikkhave, bhikkhu yathāsutaṃ yathāpariyattaṃ dhammaṃ na vitthārena paresaṃ desetā hoti. Evaṃ kho, bhikkhave, bhikkhu na dhūmaṃ kattā hoti.
‘‘கத²ஞ்ச, பி⁴க்க²வே, பி⁴க்கு² ந தித்த²ங் ஜானாதி? இத⁴, பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா, தே காலேன காலங் உபஸங்கமித்வா ந பரிபுச்ச²தி, ந பரிபஞ்ஹதி – ‘இத³ங், ப⁴ந்தே, கத²ங்? இமஸ்ஸ கோ அத்தோ²’தி? தஸ்ஸ தே ஆயஸ்மந்தோ அவிவடஞ்சேவ ந விவரந்தி, அனுத்தானீகதஞ்ச ந உத்தானீ கரொந்தி, அனேகவிஹிதேஸு ச கங்கா²டா²னீயேஸு த⁴ம்மேஸு கங்க²ங் ந படிவினோதெ³ந்தி. ஏவங் கோ², பி⁴க்க²வே, பி⁴க்கு² ந தித்த²ங் ஜானாதி.
‘‘Kathañca, bhikkhave, bhikkhu na titthaṃ jānāti? Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā, te kālena kālaṃ upasaṅkamitvā na paripucchati, na paripañhati – ‘idaṃ, bhante, kathaṃ? Imassa ko attho’ti? Tassa te āyasmanto avivaṭañceva na vivaranti, anuttānīkatañca na uttānī karonti, anekavihitesu ca kaṅkhāṭhānīyesu dhammesu kaṅkhaṃ na paṭivinodenti. Evaṃ kho, bhikkhave, bhikkhu na titthaṃ jānāti.
‘‘கத²ஞ்ச, பி⁴க்க²வே, பி⁴க்கு² ந பீதங் ஜானாதி? இத⁴, பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே தே³ஸியமானே ந லப⁴தி அத்த²வேத³ங், ந லப⁴தி த⁴ம்மவேத³ங், ந லப⁴தி த⁴ம்மூபஸங்ஹிதங் பாமோஜ்ஜங். ஏவங் கோ², பி⁴க்க²வே, பி⁴க்கு² ந பீதங் ஜானாதி.
‘‘Kathañca, bhikkhave, bhikkhu na pītaṃ jānāti? Idha, bhikkhave, bhikkhu tathāgatappavedite dhammavinaye desiyamāne na labhati atthavedaṃ, na labhati dhammavedaṃ, na labhati dhammūpasaṃhitaṃ pāmojjaṃ. Evaṃ kho, bhikkhave, bhikkhu na pītaṃ jānāti.
‘‘கத²ஞ்ச, பி⁴க்க²வே, பி⁴க்கு² ந வீதி²ங் ஜானாதி? இத⁴, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் யதா²பூ⁴தங் நப்பஜானாதி. ஏவங் கோ², பி⁴க்க²வே, பி⁴க்கு² ந வீதி²ங் ஜானாதி.
‘‘Kathañca, bhikkhave, bhikkhu na vīthiṃ jānāti? Idha, bhikkhave, bhikkhu ariyaṃ aṭṭhaṅgikaṃ maggaṃ yathābhūtaṃ nappajānāti. Evaṃ kho, bhikkhave, bhikkhu na vīthiṃ jānāti.
‘‘கத²ஞ்ச, பி⁴க்க²வே, பி⁴க்கு² ந கோ³சரகுஸலோ ஹோதி? இத⁴, பி⁴க்க²வே, பி⁴க்கு² சத்தாரோ ஸதிபட்டா²னே யதா²பூ⁴தங் நப்பஜானாதி. ஏவங் கோ², பி⁴க்க²வே , பி⁴க்கு² ந கோ³சரகுஸலோ ஹோதி.
‘‘Kathañca, bhikkhave, bhikkhu na gocarakusalo hoti? Idha, bhikkhave, bhikkhu cattāro satipaṭṭhāne yathābhūtaṃ nappajānāti. Evaṃ kho, bhikkhave , bhikkhu na gocarakusalo hoti.
‘‘கத²ஞ்ச, பி⁴க்க²வே, பி⁴க்கு² அனவஸேஸதோ³ஹீ ஹோதி? இத⁴, பி⁴க்க²வே, பி⁴க்கு²ங் ஸத்³தா⁴ க³ஹபதிகா அபி⁴ஹட்டு²ங் பவாரெந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி, தத்ர பி⁴க்கு² மத்தங் ந ஜானாதி படிக்³க³ஹணாய. ஏவங் கோ², பி⁴க்க²வே, பி⁴க்கு² அனவஸேஸதோ³ஹீ ஹோதி.
‘‘Kathañca, bhikkhave, bhikkhu anavasesadohī hoti? Idha, bhikkhave, bhikkhuṃ saddhā gahapatikā abhihaṭṭhuṃ pavārenti cīvarapiṇḍapātasenāsanagilānappaccayabhesajjaparikkhārehi, tatra bhikkhu mattaṃ na jānāti paṭiggahaṇāya. Evaṃ kho, bhikkhave, bhikkhu anavasesadohī hoti.
‘‘கத²ஞ்ச, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந அதிரேகபூஜாய பூஜேதா ஹோதி ? இத⁴, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா, தேஸு ந மெத்தங் காயகம்மங் பச்சுபட்டா²பேதி ஆவி சேவ ரஹோ ச; ந மெத்தங் வசீகம்மங் பச்சுபட்டா²பேதி ஆவி சேவ ரஹோ ச; ந மெத்தங் மனோகம்மங் பச்சுபட்டா²பேதி ஆவி சேவ ரஹோ ச. ஏவங் கோ², பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே ந அதிரேகபூஜாய பூஜேதா ஹோதி.
‘‘Kathañca, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā te na atirekapūjāya pūjetā hoti ? Idha, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, tesu na mettaṃ kāyakammaṃ paccupaṭṭhāpeti āvi ceva raho ca; na mettaṃ vacīkammaṃ paccupaṭṭhāpeti āvi ceva raho ca; na mettaṃ manokammaṃ paccupaṭṭhāpeti āvi ceva raho ca. Evaṃ kho, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā te na atirekapūjāya pūjetā hoti.
‘‘இமேஹி கோ² பி⁴க்க²வே ஏகாத³ஸஹி த⁴ம்மேஹி ஸமன்னாக³தோ பி⁴க்கு² அப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிதுங்.
‘‘Imehi kho bhikkhave ekādasahi dhammehi samannāgato bhikkhu abhabbo imasmiṃ dhammavinaye vuddhiṃ virūḷhiṃ vepullaṃ āpajjituṃ.
348. ‘‘ஏகாத³ஸஹி , பி⁴க்க²வே, அங்கே³ஹி ஸமன்னாக³தோ கோ³பாலகோ ப⁴ப்³போ³ கோ³க³ணங் பரிஹரிதுங் பா²திங் காதுங். கதமேஹி ஏகாத³ஸஹி? இத⁴, பி⁴க்க²வே , கோ³பாலகோ ரூபஞ்ஞூ ஹோதி, லக்க²ணகுஸலோ ஹோதி, ஆஸாடிகங் ஹாரேதா ஹோதி, வணங் படிச்சா²தே³தா ஹோதி, தூ⁴மங் கத்தா ஹோதி, தித்த²ங் ஜானாதி, பீதங் ஜானாதி, வீதி²ங் ஜானாதி, கோ³சரகுஸலோ ஹோதி, ஸாவஸேஸதோ³ஹீ ச ஹோதி. யே தே உஸபா⁴ கோ³பிதரோ கோ³பரிணாயகா தே அதிரேகபூஜாய பூஜேதா ஹோதி. இமேஹி கோ², பி⁴க்க²வே, ஏகாத³ஸஹி அங்கே³ஹி ஸமன்னாக³தோ கோ³பாலகோ ப⁴ப்³போ³ கோ³க³ணங் பரிஹரிதுங் பா²திங் காதுங். ஏவமேவ கோ², பி⁴க்க²வே, ஏகாத³ஸஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிதுங். கதமேஹி ஏகாத³ஸஹி? இத⁴, பி⁴க்க²வே, பி⁴க்கு² ரூபஞ்ஞூ ஹோதி, லக்க²ணகுஸலோ ஹோதி, ஆஸாடிகங் ஹாரேதா ஹோதி, வணங் படிச்சா²தே³தா ஹோதி, தூ⁴மங் கத்தா ஹோதி, தித்த²ங் ஜானாதி, பீதங் ஜானாதி, வீதி²ங் ஜானாதி, கோ³சரகுஸலோ ஹோதி, ஸாவஸேஸதோ³ஹீ ச ஹோதி. யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே அதிரேகபூஜாய பூஜேதா ஹோதி.
348. ‘‘Ekādasahi , bhikkhave, aṅgehi samannāgato gopālako bhabbo gogaṇaṃ pariharituṃ phātiṃ kātuṃ. Katamehi ekādasahi? Idha, bhikkhave , gopālako rūpaññū hoti, lakkhaṇakusalo hoti, āsāṭikaṃ hāretā hoti, vaṇaṃ paṭicchādetā hoti, dhūmaṃ kattā hoti, titthaṃ jānāti, pītaṃ jānāti, vīthiṃ jānāti, gocarakusalo hoti, sāvasesadohī ca hoti. Ye te usabhā gopitaro gopariṇāyakā te atirekapūjāya pūjetā hoti. Imehi kho, bhikkhave, ekādasahi aṅgehi samannāgato gopālako bhabbo gogaṇaṃ pariharituṃ phātiṃ kātuṃ. Evameva kho, bhikkhave, ekādasahi dhammehi samannāgato bhikkhu bhabbo imasmiṃ dhammavinaye vuddhiṃ virūḷhiṃ vepullaṃ āpajjituṃ. Katamehi ekādasahi? Idha, bhikkhave, bhikkhu rūpaññū hoti, lakkhaṇakusalo hoti, āsāṭikaṃ hāretā hoti, vaṇaṃ paṭicchādetā hoti, dhūmaṃ kattā hoti, titthaṃ jānāti, pītaṃ jānāti, vīthiṃ jānāti, gocarakusalo hoti, sāvasesadohī ca hoti. Ye te bhikkhū therā rattaññū cirapabbajitā saṅghapitaro saṅghapariṇāyakā te atirekapūjāya pūjetā hoti.
349. ‘‘கத²ஞ்ச, பி⁴க்க²வே, பி⁴க்கு² ரூபஞ்ஞூ ஹோதி? இத⁴, பி⁴க்க²வே, பி⁴க்கு² யங் கிஞ்சி ரூபங் ஸப்³ப³ங் ரூபங் ‘சத்தாரி மஹாபூ⁴தானி , சதுன்னஞ்ச மஹாபூ⁴தானங் உபாதா³யரூப’ந்தி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² ரூபஞ்ஞூ ஹோதி.
349. ‘‘Kathañca, bhikkhave, bhikkhu rūpaññū hoti? Idha, bhikkhave, bhikkhu yaṃ kiñci rūpaṃ sabbaṃ rūpaṃ ‘cattāri mahābhūtāni , catunnañca mahābhūtānaṃ upādāyarūpa’nti yathābhūtaṃ pajānāti. Evaṃ kho, bhikkhave, bhikkhu rūpaññū hoti.
‘‘கத²ஞ்ச, பி⁴க்க²வே, பி⁴க்கு² லக்க²ணகுஸலோ ஹோதி? இத⁴, பி⁴க்க²வே, பி⁴க்கு² கம்மலக்க²ணோ பா³லோ, கம்மலக்க²ணோ பண்டி³தோதி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² லக்க²ணகுஸலோ ஹோதி.
‘‘Kathañca, bhikkhave, bhikkhu lakkhaṇakusalo hoti? Idha, bhikkhave, bhikkhu kammalakkhaṇo bālo, kammalakkhaṇo paṇḍitoti yathābhūtaṃ pajānāti. Evaṃ kho, bhikkhave, bhikkhu lakkhaṇakusalo hoti.
‘‘கத²ஞ்ச , பி⁴க்க²வே, பி⁴க்கு² ஆஸாடிகங் ஹாரேதா ஹோதி? இத⁴, பி⁴க்க²வே, பி⁴க்கு² உப்பன்னங் காமவிதக்கங் நாதி⁴வாஸேதி, பஜஹதி வினோதே³தி ப்³யந்தீ கரோதி அனபா⁴வங் க³மேதி. உப்பன்னங் ப்³யாபாத³விதக்கங்…பே॰… உப்பன்னங் விஹிங்ஸாவிதக்கங்…பே॰… உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி, பஜஹதி வினோதே³தி ப்³யந்தீ கரோதி அனபா⁴வங் க³மேதி. ஏவங் கோ², பி⁴க்க²வே, பி⁴க்கு² ஆஸாடிகங் ஹாரேதா ஹோதி.
‘‘Kathañca , bhikkhave, bhikkhu āsāṭikaṃ hāretā hoti? Idha, bhikkhave, bhikkhu uppannaṃ kāmavitakkaṃ nādhivāseti, pajahati vinodeti byantī karoti anabhāvaṃ gameti. Uppannaṃ byāpādavitakkaṃ…pe… uppannaṃ vihiṃsāvitakkaṃ…pe… uppannuppanne pāpake akusale dhamme nādhivāseti, pajahati vinodeti byantī karoti anabhāvaṃ gameti. Evaṃ kho, bhikkhave, bhikkhu āsāṭikaṃ hāretā hoti.
‘‘கத²ஞ்ச, பி⁴க்க²வே, பி⁴க்கு² வணங் படிச்சா²தே³தா ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி மனிந்த்³ரியங், மனிந்த்³ரியே ஸங்வரங் ஆபஜ்ஜதி. ஏவங் கோ², பி⁴க்க²வே, பி⁴க்கு² வணங் படிச்சா²தே³தா ஹோதி.
‘‘Kathañca, bhikkhave, bhikkhu vaṇaṃ paṭicchādetā hoti? Idha, bhikkhave, bhikkhu cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ tassa saṃvarāya paṭipajjati, rakkhati cakkhundriyaṃ, cakkhundriye saṃvaraṃ āpajjati. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ tassa saṃvarāya paṭipajjati, rakkhati manindriyaṃ, manindriye saṃvaraṃ āpajjati. Evaṃ kho, bhikkhave, bhikkhu vaṇaṃ paṭicchādetā hoti.
‘‘கத²ஞ்ச, பி⁴க்க²வே, பி⁴க்கு² தூ⁴மங் கத்தா ஹோதி? இத⁴, பி⁴க்க²வே, பி⁴க்கு² யதா²ஸுதங் யதா²பரியத்தங் த⁴ம்மங் வித்தா²ரேன பரேஸங் தே³ஸேதா ஹோதி. ஏவங் கோ², பி⁴க்க²வே, பி⁴க்கு² தூ⁴மங் கத்தா ஹோதி.
‘‘Kathañca, bhikkhave, bhikkhu dhūmaṃ kattā hoti? Idha, bhikkhave, bhikkhu yathāsutaṃ yathāpariyattaṃ dhammaṃ vitthārena paresaṃ desetā hoti. Evaṃ kho, bhikkhave, bhikkhu dhūmaṃ kattā hoti.
‘‘கத²ஞ்ச, பி⁴க்க²வே, பி⁴க்கு² தித்த²ங் ஜானாதி? இத⁴, பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா தே காலேன காலங் உபஸங்கமித்வா பரிபுச்ச²தி, பரிபஞ்ஹதி – ‘இத³ங், ப⁴ந்தே, கத²ங்? இமஸ்ஸ கோ அத்தோ²’தி? தஸ்ஸ தே ஆயஸ்மந்தோ அவிவடஞ்சேவ விவரந்தி, அனுத்தானீகதஞ்ச உத்தானீ கரொந்தி, அனேகவிஹிதேஸு ச கங்கா²டா²னீயேஸு த⁴ம்மேஸு கங்க²ங் படிவினோதெ³ந்தி. ஏவங் கோ², பி⁴க்க²வே, பி⁴க்கு² தித்த²ங் ஜானாதி.
‘‘Kathañca, bhikkhave, bhikkhu titthaṃ jānāti? Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā te kālena kālaṃ upasaṅkamitvā paripucchati, paripañhati – ‘idaṃ, bhante, kathaṃ? Imassa ko attho’ti? Tassa te āyasmanto avivaṭañceva vivaranti, anuttānīkatañca uttānī karonti, anekavihitesu ca kaṅkhāṭhānīyesu dhammesu kaṅkhaṃ paṭivinodenti. Evaṃ kho, bhikkhave, bhikkhu titthaṃ jānāti.
‘‘கத²ஞ்ச பி⁴க்க²வே, பி⁴க்கு² பீதங் ஜானாதி? இத⁴, பி⁴க்க²வே, பி⁴க்கு² ததா²க³தப்பவேதி³தே த⁴ம்மவினயே தே³ஸியமானே லப⁴தி அத்த²வேத³ங், லப⁴தி த⁴ம்மவேத³ங், லப⁴தி த⁴ம்மூபஸங்ஹிதங் பாமோஜ்ஜங். ஏவங் கோ², பி⁴க்க²வே, பி⁴க்கு² பீதங் ஜானாதி.
‘‘Kathañca bhikkhave, bhikkhu pītaṃ jānāti? Idha, bhikkhave, bhikkhu tathāgatappavedite dhammavinaye desiyamāne labhati atthavedaṃ, labhati dhammavedaṃ, labhati dhammūpasaṃhitaṃ pāmojjaṃ. Evaṃ kho, bhikkhave, bhikkhu pītaṃ jānāti.
‘‘கத²ஞ்ச , பி⁴க்க²வே, பி⁴க்கு² வீதி²ங் ஜானாதி? இத⁴, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² வீதி²ங் ஜானாதி.
‘‘Kathañca , bhikkhave, bhikkhu vīthiṃ jānāti? Idha, bhikkhave, bhikkhu ariyaṃ aṭṭhaṅgikaṃ maggaṃ yathābhūtaṃ pajānāti. Evaṃ kho, bhikkhave, bhikkhu vīthiṃ jānāti.
‘‘கத²ஞ்ச, பி⁴க்க²வே, பி⁴க்கு² கோ³சரகுஸலோ ஹோதி? இத⁴, பி⁴க்க²வே, பி⁴க்கு² சத்தாரோ ஸதிபட்டா²னே யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² கோ³சரகுஸலோ ஹோதி.
‘‘Kathañca, bhikkhave, bhikkhu gocarakusalo hoti? Idha, bhikkhave, bhikkhu cattāro satipaṭṭhāne yathābhūtaṃ pajānāti. Evaṃ kho, bhikkhave, bhikkhu gocarakusalo hoti.
‘‘கத²ஞ்ச பி⁴க்க²வே, பி⁴க்கு² ஸாவஸேஸதோ³ஹீ ஹோதி? இத⁴, பி⁴க்க²வே, பி⁴க்கு²ங் ஸத்³தா⁴ க³ஹபதிகா அபி⁴ஹட்டு²ங் பவாரெந்தி சீவரபிண்ட³பாதஸேனாஸனகி³லானப்பச்சயபே⁴ஸஜ்ஜபரிக்கா²ரேஹி. தத்ர பி⁴க்கு² மத்தங் ஜானாதி படிக்³க³ஹணாய. ஏவங் கோ², பி⁴க்க²வே, பி⁴க்கு² ஸாவஸேஸதோ³ஹீ ஹோதி.
‘‘Kathañca bhikkhave, bhikkhu sāvasesadohī hoti? Idha, bhikkhave, bhikkhuṃ saddhā gahapatikā abhihaṭṭhuṃ pavārenti cīvarapiṇḍapātasenāsanagilānappaccayabhesajjaparikkhārehi. Tatra bhikkhu mattaṃ jānāti paṭiggahaṇāya. Evaṃ kho, bhikkhave, bhikkhu sāvasesadohī hoti.
‘‘கத²ஞ்ச, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா, தே அதிரேகபூஜாய பூஜேதா ஹோதி? இத⁴, பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தேஸு மெத்தங் காயகம்மங் பச்சுபட்டா²பேதி ஆவி சேவ ரஹோ ச; மெத்தங் வசீகம்மங் பச்சுபட்டா²பேதி ஆவி சேவ ரஹோ ச; மெத்தங் மனோகம்மங் பச்சுபட்டா²பேதி ஆவி சேவ ரஹோ ச. ஏவங் கோ², பி⁴க்க²வே, பி⁴க்கு² யே தே பி⁴க்கூ² தே²ரா ரத்தஞ்ஞூ சிரபப்³ப³ஜிதா ஸங்க⁴பிதரோ ஸங்க⁴பரிணாயகா தே அதிரேகபூஜாய பூஜேதா ஹோதி.
‘‘Kathañca, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā, te atirekapūjāya pūjetā hoti? Idha, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā tesu mettaṃ kāyakammaṃ paccupaṭṭhāpeti āvi ceva raho ca; mettaṃ vacīkammaṃ paccupaṭṭhāpeti āvi ceva raho ca; mettaṃ manokammaṃ paccupaṭṭhāpeti āvi ceva raho ca. Evaṃ kho, bhikkhave, bhikkhu ye te bhikkhū therā rattaññū cirapabbajitā saṅghapitaro saṅghapariṇāyakā te atirekapūjāya pūjetā hoti.
‘‘இமேஹி கோ², பி⁴க்க²வே, ஏகாத³ஸஹி த⁴ம்மேஹி ஸமன்னாக³தோ பி⁴க்கு² ப⁴ப்³போ³ இமஸ்மிங் த⁴ம்மவினயே வுத்³தி⁴ங் விரூள்ஹிங் வேபுல்லங் ஆபஜ்ஜிது’’ந்தி.
‘‘Imehi kho, bhikkhave, ekādasahi dhammehi samannāgato bhikkhu bhabbo imasmiṃ dhammavinaye vuddhiṃ virūḷhiṃ vepullaṃ āpajjitu’’nti.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
Idamavoca bhagavā. Attamanā te bhikkhū bhagavato bhāsitaṃ abhinandunti.
மஹாகோ³பாலகஸுத்தங் நிட்டி²தங் ததியங்.
Mahāgopālakasuttaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. மஹாகோ³பாலகஸுத்தவண்ணனா • 3. Mahāgopālakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. மஹாகோ³பாலகஸுத்தவண்ணனா • 3. Mahāgopālakasuttavaṇṇanā
