| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. மஹாகச்சானப⁴த்³தே³கரத்தஸுத்தவண்ணனா
3. Mahākaccānabhaddekarattasuttavaṇṇanā
279. ஏவங் மே ஸுதந்தி மஹாகச்சானப⁴த்³தே³கரத்தஸுத்தங். தத்த² தபோதா³ராமேதி தத்தோத³கஸ்ஸ ரஹத³ஸ்ஸ வஸேன ஏவங்லத்³த⁴னாமே ஆராமே. வேபா⁴ரபப்³ப³தஸ்ஸ கிர ஹெட்டா² பூ⁴மட்ட²கனாகா³னங் பஞ்சயோஜனஸதிகங் நாக³ப⁴வனங் தே³வலோகஸதி³ஸங் மணிமயேன தலேன ஆராமஉய்யானேஹி ச ஸமன்னாக³தங், தத்த² நாகா³னங் கீளனட்டா²னே மஹாஉத³கரஹதோ³, ததோ தபோதா³ நாம நதீ³ ஸந்த³தி குதி²தா உண்ஹோத³கா. கஸ்மா பனேஸா ஏதி³ஸா ஜாதா? ராஜக³ஹங் கிர பரிவாரெத்வா மஹா பேதலோகோ, தத்த² த்³வின்னங் மஹாலோஹகும்பி⁴னிரயானங் அந்தரேன அயங் தபோதா³ ஆக³ச்ச²தி, தஸ்மா ஸா குதி²தா ஸந்த³தி. வுத்தம்பி சேதங் – ‘‘யதாயங், பி⁴க்க²வே, தபோதா³ ஸந்த³தி, ஸோ த³ஹோ அச்சோ²த³கோ ஸீதோத³கோ ஸாதோத³கோ ஸேதோத³கோ ஸுப்பதித்தோ² ரமணீயோ பஹூதமச்ச²கச்ச²போ, சக்கமத்தானி ச பது³மானி புப்ப²ந்தி . அபிசாயங், பி⁴க்க²வே, தபோதா³ த்³வின்னங் மஹானிரயானங் அந்தரிகாய ஆக³ச்ச²தி, தேனாயங் தபோதா³ குதி²தா ஸந்த³தீ’’தி (பாரா॰ 231). இமஸ்ஸ பன ஆராமஸ்ஸ அபி⁴ஸம்முக²ட்டா²னே ததோ மஹாஉத³கரஹதோ³ ஜாதோ, தஸ்ஸ நாமவஸேனாயங் விஹாரோ தபோதா³ராமோதி வுச்சதி.
279.Evaṃme sutanti mahākaccānabhaddekarattasuttaṃ. Tattha tapodārāmeti tattodakassa rahadassa vasena evaṃladdhanāme ārāme. Vebhārapabbatassa kira heṭṭhā bhūmaṭṭhakanāgānaṃ pañcayojanasatikaṃ nāgabhavanaṃ devalokasadisaṃ maṇimayena talena ārāmauyyānehi ca samannāgataṃ, tattha nāgānaṃ kīḷanaṭṭhāne mahāudakarahado, tato tapodā nāma nadī sandati kuthitā uṇhodakā. Kasmā panesā edisā jātā? Rājagahaṃ kira parivāretvā mahā petaloko, tattha dvinnaṃ mahālohakumbhinirayānaṃ antarena ayaṃ tapodā āgacchati, tasmā sā kuthitā sandati. Vuttampi cetaṃ – ‘‘yatāyaṃ, bhikkhave, tapodā sandati, so daho acchodako sītodako sātodako setodako suppatittho ramaṇīyo pahūtamacchakacchapo, cakkamattāni ca padumāni pupphanti . Apicāyaṃ, bhikkhave, tapodā dvinnaṃ mahānirayānaṃ antarikāya āgacchati, tenāyaṃ tapodā kuthitā sandatī’’ti (pārā. 231). Imassa pana ārāmassa abhisammukhaṭṭhāne tato mahāudakarahado jāto, tassa nāmavasenāyaṃ vihāro tapodārāmoti vuccati.
280. ஸமித்³தீ⁴தி தஸ்ஸ கிர தே²ரஸ்ஸ அத்தபா⁴வோ ஸமித்³தோ⁴ அபி⁴ரூபோ பாஸாதி³கோ, தஸ்மா ஸமித்³தி⁴த்வேவ ஸங்க²ங் க³தோ. ஆதி³ப்³ரஹ்மசரியகோதி மக்³க³ப்³ரஹ்மசரியஸ்ஸ ஆதி³ புப்³ப³பா⁴க³ப்படிபத்திபூ⁴தோ. இத³ங் வத்வான ஸுக³தோ உட்டா²யாஸனாதி மது⁴பிண்டி³கஸுத்தே (ம॰ நி॰ 1.199 ஆத³யோ) வுத்தனயேனேவ வித்தா²ரேதப்³ப³ங்.
280.Samiddhīti tassa kira therassa attabhāvo samiddho abhirūpo pāsādiko, tasmā samiddhitveva saṅkhaṃ gato. Ādibrahmacariyakoti maggabrahmacariyassa ādi pubbabhāgappaṭipattibhūto. Idaṃ vatvāna sugato uṭṭhāyāsanāti madhupiṇḍikasutte (ma. ni. 1.199 ādayo) vuttanayeneva vitthāretabbaṃ.
282. இதி மே சக்கு²ந்தி இமஸ்மிங் கிர ஸுத்தே ப⁴க³வா த்³வாத³ஸாயதனவஸேனேவ மாதிகங் ட²பேஸி. தே²ரோபி ‘‘ப⁴க³வதா ஹெட்டா² த்³வீஸு, உபரி சதுத்தே² சாதி இமேஸு தீஸு ஸுத்தேஸு பஞ்சக்க²ந்த⁴வஸேன மாதிகா ச விப⁴ங்கோ³ ச கதோ, இத⁴ பன த்³வாத³ஸாயதனவஸேனேவ விப⁴ஜனத்த²ங் மாதிகா ட²பிதா’’தி நயங் படிலபி⁴த்வா ஏவமாஹ. இமங் பன நயங் லப⁴ந்தேன தே²ரேன பா⁴ரியங் கதங், அபதே³ பத³ங் த³ஸ்ஸிதங், ஆகாஸே பத³ங் கதங், தேன நங் ப⁴க³வா இமமேவ ஸுத்தங் ஸந்தா⁴ய – ‘‘ஏதத³க்³க³ங் , பி⁴க்க²வே, மம ஸாவகானங் பி⁴க்கூ²னங் ஸங்கி²த்தேன பா⁴ஸிதஸ்ஸ வித்தா²ரேன அத்த²ங் விப⁴ஜந்தானங் யதி³த³ங் மஹாகச்சானோ’’தி (அ॰ நி॰ 1.197) ஏதத³க்³கே³ ட²பேஸி. எத்த² பன சக்கூ²தி சக்கு²பஸாதோ³. ரூபாதி சதுஸமுட்டா²னிகரூபா. இமினா நயேன ஸேஸாயதனானிபி வேதி³தப்³பா³னி. விஞ்ஞாணந்தி நிகந்திவிஞ்ஞாணங். தத³பி⁴னந்த³தீதி தங் சக்கு²ஞ்சேவ ரூபஞ்ச தண்ஹாதி³ட்டி²வஸேன அபி⁴னந்த³தி. அன்வாக³மேதீதி தண்ஹாதி³ட்டீ²ஹி அனுக³ச்ச²தி.
282.Iti me cakkhunti imasmiṃ kira sutte bhagavā dvādasāyatanavaseneva mātikaṃ ṭhapesi. Theropi ‘‘bhagavatā heṭṭhā dvīsu, upari catutthe cāti imesu tīsu suttesu pañcakkhandhavasena mātikā ca vibhaṅgo ca kato, idha pana dvādasāyatanavaseneva vibhajanatthaṃ mātikā ṭhapitā’’ti nayaṃ paṭilabhitvā evamāha. Imaṃ pana nayaṃ labhantena therena bhāriyaṃ kataṃ, apade padaṃ dassitaṃ, ākāse padaṃ kataṃ, tena naṃ bhagavā imameva suttaṃ sandhāya – ‘‘etadaggaṃ , bhikkhave, mama sāvakānaṃ bhikkhūnaṃ saṃkhittena bhāsitassa vitthārena atthaṃ vibhajantānaṃ yadidaṃ mahākaccāno’’ti (a. ni. 1.197) etadagge ṭhapesi. Ettha pana cakkhūti cakkhupasādo. Rūpāti catusamuṭṭhānikarūpā. Iminā nayena sesāyatanānipi veditabbāni. Viññāṇanti nikantiviññāṇaṃ. Tadabhinandatīti taṃ cakkhuñceva rūpañca taṇhādiṭṭhivasena abhinandati. Anvāgametīti taṇhādiṭṭhīhi anugacchati.
இதி மே மனோ அஹோஸி அதீதமத்³தா⁴னங் இதி த⁴ம்மாதி எத்த² பன மனோதி ப⁴வங்க³சித்தங். த⁴ம்மாதி தேபூ⁴மகத⁴ம்மாரம்மணங்.
Iti me mano ahosi atītamaddhānaṃ iti dhammāti ettha pana manoti bhavaṅgacittaṃ. Dhammāti tebhūmakadhammārammaṇaṃ.
283. பணித³ஹதீதி பத்த²னாவஸேன ட²பேஸி. பணிதா⁴னபச்சயாதி பத்த²னாட்ட²பனகாரணா. ஸேஸங் ஸப்³ப³த்த² உத்தானமேவாதி.
283.Paṇidahatīti patthanāvasena ṭhapesi. Paṇidhānapaccayāti patthanāṭṭhapanakāraṇā. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாகச்சானப⁴த்³தே³கரத்தஸுத்தவண்ணனா நிட்டி²தா.
Mahākaccānabhaddekarattasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மஹாகச்சானப⁴த்³தே³கரத்தஸுத்தங் • 3. Mahākaccānabhaddekarattasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. மஹாகச்சானப⁴த்³தே³கரத்தஸுத்தவண்ணனா • 3. Mahākaccānabhaddekarattasuttavaṇṇanā
