| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. மஹாகம்மவிப⁴ங்க³ஸுத்தவண்ணனா
6. Mahākammavibhaṅgasuttavaṇṇanā
298. ஏவங் மே ஸுதந்தி மஹாகம்மவிப⁴ங்க³ஸுத்தங். தத்த² மோக⁴ந்தி துச்ச²ங் அப²லங். ஸச்சந்தி தத²ங் பூ⁴தங். இத³ஞ்ச ஏதேன ந ஸம்முகா² ஸுதங், உபாலிஸுத்தே (ம॰ நி॰ 2.56) பன – ‘‘மனோகம்மங் மஹாஸாவஜ்ஜதரங் பஞ்ஞபேமி பாபஸ்ஸ கம்மஸ்ஸ கிரியாய பாபஸ்ஸ கம்மஸ்ஸ பவத்தியா, நோ ததா² காயகம்மங் நோ ததா² வசீகம்ம’’ந்தி ப⁴க³வதா வுத்தங் அத்தி², ஸா கதா² தித்தி²யானங் அந்தரே பாகடா ஜாதா, தங் க³ஹெத்வா ஏஸ வத³தி. அத்தி² ச ஸா ஸமாபத்தீதி இத³ங் – ‘‘கத²ங் நு கோ², போ⁴, அபி⁴ஸஞ்ஞானிரோதோ⁴ ஹோதீ’’தி பொட்ட²பாத³ஸுத்தே (தீ³॰ நி॰ 1.406 ஆத³யோ) உப்பன்னங் அபி⁴ஸஞ்ஞானிரோத⁴கத²ங் ஸந்தா⁴ய வத³தி. ந கிஞ்சி வேதி³யதீதி ஏகவேத³னம்பி ந வேதி³யதி. அத்தி² ச கோ²தி தே²ரோ நிரோத⁴ஸமாபத்திங் ஸந்தா⁴ய அனுஜானாதி. பரிரக்கி²தப்³ப³ந்தி க³ரஹதோ மோசனேன ரக்கி²தப்³ப³ங். ஸஞ்சேதனா அஸ்ஸ அத்தீ²தி ஸஞ்சேதனிகங், ஸாபி⁴ஸந்தி⁴கங் ஸஞ்சேதனிககம்மங் கத்வாதி அத்தோ². து³க்க²ங் ஸோதி தே²ரோ ‘‘அகுஸலமேவ ஸந்தா⁴ய பரிப்³பா³ஜகோ புச்ச²தீ’’தி ஸஞ்ஞாய ஏவங் வத³தி.
298.Evaṃme sutanti mahākammavibhaṅgasuttaṃ. Tattha moghanti tucchaṃ aphalaṃ. Saccanti tathaṃ bhūtaṃ. Idañca etena na sammukhā sutaṃ, upālisutte (ma. ni. 2.56) pana – ‘‘manokammaṃ mahāsāvajjataraṃ paññapemi pāpassa kammassa kiriyāya pāpassa kammassa pavattiyā, no tathā kāyakammaṃ no tathā vacīkamma’’nti bhagavatā vuttaṃ atthi, sā kathā titthiyānaṃ antare pākaṭā jātā, taṃ gahetvā esa vadati. Atthi ca sā samāpattīti idaṃ – ‘‘kathaṃ nu kho, bho, abhisaññānirodho hotī’’ti poṭṭhapādasutte (dī. ni. 1.406 ādayo) uppannaṃ abhisaññānirodhakathaṃ sandhāya vadati. Na kiñci vediyatīti ekavedanampi na vediyati. Atthi ca khoti thero nirodhasamāpattiṃ sandhāya anujānāti. Parirakkhitabbanti garahato mocanena rakkhitabbaṃ. Sañcetanā assa atthīti sañcetanikaṃ, sābhisandhikaṃ sañcetanikakammaṃ katvāti attho. Dukkhaṃ soti thero ‘‘akusalameva sandhāya paribbājako pucchatī’’ti saññāya evaṃ vadati.
த³ஸ்ஸனம்பி கோ² அஹந்தி ப⁴க³வா சதுரங்கே³பி அந்த⁴காரே ஸமந்தா யோஜனட்டா²னே திலமத்தம்பி ஸங்கா²ரங் மங்ஸசக்கு²னாவ பஸ்ஸதி, அயஞ்ச பரிப்³பா³ஜகோ ந தூ³ரே கா³வுதமத்தப்³ப⁴ந்தரே வஸதி, கஸ்மா ப⁴க³வா ஏவமாஹாதி? ஸமாக³மத³ஸ்ஸனங் ஸந்தா⁴யேவமாஹ.
Dassanampi kho ahanti bhagavā caturaṅgepi andhakāre samantā yojanaṭṭhāne tilamattampi saṅkhāraṃ maṃsacakkhunāva passati, ayañca paribbājako na dūre gāvutamattabbhantare vasati, kasmā bhagavā evamāhāti? Samāgamadassanaṃ sandhāyevamāha.
299. உதா³யீதி லாலுதா³யீ. தங் து³க்க²ஸ்மிந்தி ஸப்³ப³ங் தங் து³க்க²மேவ. இதி இமங் வட்டது³க்க²ங் கிலேஸது³க்க²ங் ஸங்கா²ரது³க்க²ங் ஸந்தா⁴ய ‘‘ஸசே பா⁴ஸிதங் ப⁴வெய்ய ப⁴க³வா’’தி புச்ச²தி.
299.Udāyīti lāludāyī. Taṃ dukkhasminti sabbaṃ taṃ dukkhameva. Iti imaṃ vaṭṭadukkhaṃ kilesadukkhaṃ saṅkhāradukkhaṃ sandhāya ‘‘sace bhāsitaṃ bhaveyya bhagavā’’ti pucchati.
300. உம்மங்க³ந்தி பஞ்ஹாஉம்மங்க³ங். உம்முஜ்ஜமானோதி ஸீஸங் நீஹரமானோ. அயோனிஸோ உம்முஜ்ஜிஸ்ஸதீதி அனுபாயேன ஸீஸங் நீஹரிஸ்ஸதி. இத³ஞ்ச பன ப⁴க³வா ஜானந்தோ நேவ தி³ப்³ப³சக்கு²னா ந சேதோபரியஞாணேன ந ஸப்³ப³ஞ்ஞுதஞாணேன ஜானி, அதி⁴ப்பாயேனேவ பன அஞ்ஞாஸி. கதெ²ந்தஸ்ஸ ஹி அதி⁴ப்பாயோ நாம ஸுவிஜானோ ஹோதி, கதே²துகாமோ கீ³வங் பக்³க³ண்ஹாதி, ஹனுகங் சாலேதி, முக²மஸ்ஸ ப²ந்த³தி, ஸன்னிஸீதி³துங் ந ஸக்கோதி. ப⁴க³வா தஸ்ஸ தங் ஆகாரங் தி³ஸ்வா ‘‘அயங் உதா³யீ ஸன்னிஸீதி³துங் ந ஸக்கோதி, யங் அபூ⁴தங், ததே³வ கதெ²ஸ்ஸதீ’’தி ஓலோகெத்வாவ அஞ்ஞாஸி. ஆதி³ங் யேவாதிஆதி³ம்ஹியேவ. திஸ்ஸோ வேத³னாதி ‘‘கிங் ஸோ வேதி³யதீ’’தி? புச்ச²ந்தேன ‘‘திஸ்ஸோ வேத³னா புச்சா²மீ’’தி ஏவங் வவத்த²பெத்வாவ திஸ்ஸோ வேத³னா புச்சி²தா. ஸுக²வேத³னியந்தி ஸுக²வேத³னாய பச்சயபூ⁴தங். ஸேஸேஸுபி ஏஸேவ நயோ.
300.Ummaṅganti pañhāummaṅgaṃ. Ummujjamānoti sīsaṃ nīharamāno. Ayoniso ummujjissatīti anupāyena sīsaṃ nīharissati. Idañca pana bhagavā jānanto neva dibbacakkhunā na cetopariyañāṇena na sabbaññutañāṇena jāni, adhippāyeneva pana aññāsi. Kathentassa hi adhippāyo nāma suvijāno hoti, kathetukāmo gīvaṃ paggaṇhāti, hanukaṃ cāleti, mukhamassa phandati, sannisīdituṃ na sakkoti. Bhagavā tassa taṃ ākāraṃ disvā ‘‘ayaṃ udāyī sannisīdituṃ na sakkoti, yaṃ abhūtaṃ, tadeva kathessatī’’ti oloketvāva aññāsi. Ādiṃ yevātiādimhiyeva. Tisso vedanāti ‘‘kiṃ so vediyatī’’ti? Pucchantena ‘‘tisso vedanā pucchāmī’’ti evaṃ vavatthapetvāva tisso vedanā pucchitā. Sukhavedaniyanti sukhavedanāya paccayabhūtaṃ. Sesesupi eseva nayo.
எத்த² ச காமாவசரகுஸலதோ ஸோமனஸ்ஸஸஹக³தசித்தஸம்பயுத்தா சதஸ்ஸோ சேதனா, ஹெட்டா² திகஜ்ஜா²னசேதனாதி ஏவங் படிஸந்தி⁴பவத்தேஸு ஸுக²வேத³னாய ஜனநதோ ஸுக²வேத³னியங் கம்மங் நாம. காமாவசரஞ்செத்த² படிஸந்தி⁴யங்யேவ ஏகந்தேன ஸுக²ங் ஜனேதி, பவத்தே இட்ட²மஜ்ஜ²த்தாரம்மணே அது³க்க²மஸுக²ம்பி.
Ettha ca kāmāvacarakusalato somanassasahagatacittasampayuttā catasso cetanā, heṭṭhā tikajjhānacetanāti evaṃ paṭisandhipavattesu sukhavedanāya jananato sukhavedaniyaṃ kammaṃ nāma. Kāmāvacarañcettha paṭisandhiyaṃyeva ekantena sukhaṃ janeti, pavatte iṭṭhamajjhattārammaṇe adukkhamasukhampi.
அகுஸலசேதனா படிஸந்தி⁴பவத்தேஸு து³க்க²ஸ்ஸேவ ஜனநதோ து³க்க²வேத³னியங் கம்மங் நாம. காயத்³வாரே பவத்தேயேவ சேதங் ஏகந்தேன து³க்க²ங் ஜனேதி, அஞ்ஞத்த² அது³க்க²மஸுக²ம்பி, ஸா பன வேத³னா அனிட்டா²னிட்ட²மஜ்ஜ²த்தேஸுயேவ ஆரம்மணேஸு உப்பஜ்ஜனதோ து³க்கா²த்வேவ ஸங்க²ங் க³தா.
Akusalacetanā paṭisandhipavattesu dukkhasseva jananato dukkhavedaniyaṃ kammaṃ nāma. Kāyadvāre pavatteyeva cetaṃ ekantena dukkhaṃ janeti, aññattha adukkhamasukhampi, sā pana vedanā aniṭṭhāniṭṭhamajjhattesuyeva ārammaṇesu uppajjanato dukkhātveva saṅkhaṃ gatā.
காமாவசரகுஸலதோ பன உபெக்கா²ஸஹக³தசித்தஸம்பயுத்தா சதஸ்ஸோ சேதனா, ரூபாவசரகுஸலதோ சதுத்த²ஜ்ஜா²னசேதனாதி ஏவங் படிஸந்தி⁴பவத்தேஸு ததியவேத³னாய ஜனநதோ அது³க்க²மஸுக²வேத³னியங் கம்மங் நாம. எத்த² ச காமாவசரங் படிஸந்தி⁴யங்யேவ ஏகந்தேன அது³க்க²மஸுக²ங் ஜனேதி, பவத்தே இட்டா²ரம்மணே ஸுக²ம்பி. அபிச ஸுக²வேத³னியகம்மங் படிஸந்தி⁴பவத்திவஸேன வட்டதி, ததா² அது³க்க²மஸுக²வேத³னியங், து³க்க²வேத³னியங் பவத்திவஸேனேவ வட்டதி. ஏதஸ்ஸ பன வஸேன ஸப்³ப³ங் பவத்திவஸேனேவ வட்டதி.
Kāmāvacarakusalato pana upekkhāsahagatacittasampayuttā catasso cetanā, rūpāvacarakusalato catutthajjhānacetanāti evaṃ paṭisandhipavattesu tatiyavedanāya jananato adukkhamasukhavedaniyaṃ kammaṃ nāma. Ettha ca kāmāvacaraṃ paṭisandhiyaṃyeva ekantena adukkhamasukhaṃ janeti, pavatte iṭṭhārammaṇe sukhampi. Apica sukhavedaniyakammaṃ paṭisandhipavattivasena vaṭṭati, tathā adukkhamasukhavedaniyaṃ, dukkhavedaniyaṃ pavattivaseneva vaṭṭati. Etassa pana vasena sabbaṃ pavattivaseneva vaṭṭati.
ஏதஸ்ஸ ப⁴க³வாதி தே²ரோ ததா²க³தேன மஹாகம்மவிப⁴ங்க³கத²னத்த²ங் ஆலயோ த³ஸ்ஸிதோ, ததா²க³தங் யாசித்வா மஹாகம்மவிப⁴ங்க³ஞாணங் பி⁴க்கு²ஸங்க⁴ஸ்ஸ பாகடங் கரிஸ்ஸாமீதி சிந்தெத்வா அனுஸந்தி⁴குஸலதாய ஏவமாஹ. தத்த² மஹாகம்மவிப⁴ங்க³ந்தி மஹாகம்மவிப⁴ஜனங். கதமே சத்தாரோ…பே॰… இதா⁴னந்த³, ஏகச்சோ புக்³க³லோ…பே॰… நிரயங் உபபஜ்ஜதீதி இத³ங் ந மஹாகம்மவிப⁴ங்க³ஞாணபா⁴ஜனங், மஹாகம்மவிப⁴ங்க³ஞாணபா⁴ஜனத்தா²ய பன மாதிகாட்ட²பனங்.
Etassa bhagavāti thero tathāgatena mahākammavibhaṅgakathanatthaṃ ālayo dassito, tathāgataṃ yācitvā mahākammavibhaṅgañāṇaṃ bhikkhusaṅghassa pākaṭaṃ karissāmīti cintetvā anusandhikusalatāya evamāha. Tattha mahākammavibhaṅganti mahākammavibhajanaṃ. Katame cattāro…pe… idhānanda, ekacco puggalo…pe… nirayaṃ upapajjatīti idaṃ na mahākammavibhaṅgañāṇabhājanaṃ, mahākammavibhaṅgañāṇabhājanatthāya pana mātikāṭṭhapanaṃ.
301. இதா⁴னந்த³ , ஏகச்சோ ஸமணோ வாதி பாடியேக்கோ அனுஸந்தி⁴. இத³ஞ்ஹி ப⁴க³வா – ‘‘தி³ப்³ப³சக்கு²கா ஸமணப்³ராஹ்மணா இத³ங் ஆரம்மணங் கத்வா இமங் பச்சயங் லபி⁴த்வா இத³ங் த³ஸ்ஸனங் க³ண்ஹந்தீ’’தி பகாஸனத்த²ங் ஆரபி⁴. தத்த² ஆதப்பந்திஆதீ³னி பஞ்சபி வீரியஸ்ஸேவ நாமானி. சேதோஸமாதி⁴ந்தி தி³ப்³ப³சக்கு²ஸமாதி⁴ங். பஸ்ஸதீதி ‘‘ஸோ ஸத்தோ குஹிங் நிப்³ப³த்தோ’’தி ஓலோகெந்தோ பஸ்ஸதி. யே அஞ்ஞதா²தி யே ‘‘த³ஸன்னங் குஸலானங் கம்மபதா²னங் பூரிதத்தா நிரயங் உபபஜ்ஜதீ’’தி ஜானந்தி, மிச்சா² தேஸங் ஞாணந்தி வத³தி. இமினா நயேன ஸப்³ப³வாரேஸு அத்தோ² வேதி³தப்³போ³. விதி³தந்தி பாகடங். தா²மஸாதி தி³ட்டி²தா²மேன. பராமாஸாதி தி³ட்டி²பராமாஸேன. அபி⁴னிவிஸ்ஸ வோஹரதீதி அதி⁴ட்ட²ஹித்வா ஆதி³யித்வா வோஹரதி.
301.Idhānanda, ekacco samaṇo vāti pāṭiyekko anusandhi. Idañhi bhagavā – ‘‘dibbacakkhukā samaṇabrāhmaṇā idaṃ ārammaṇaṃ katvā imaṃ paccayaṃ labhitvā idaṃ dassanaṃ gaṇhantī’’ti pakāsanatthaṃ ārabhi. Tattha ātappantiādīni pañcapi vīriyasseva nāmāni. Cetosamādhinti dibbacakkhusamādhiṃ. Passatīti ‘‘so satto kuhiṃ nibbatto’’ti olokento passati. Ye aññathāti ye ‘‘dasannaṃ kusalānaṃ kammapathānaṃ pūritattā nirayaṃ upapajjatī’’ti jānanti, micchā tesaṃ ñāṇanti vadati. Iminā nayena sabbavāresu attho veditabbo. Viditanti pākaṭaṃ. Thāmasāti diṭṭhithāmena. Parāmāsāti diṭṭhiparāmāsena. Abhinivissa voharatīti adhiṭṭhahitvā ādiyitvā voharati.
302. தத்ரானந்தா³தி இத³ம்பி ந மஹாகம்மவிப⁴ங்க³ஞாணஸ்ஸ பா⁴ஜனங், அத² க்²வாஸ்ஸ மாதிகாட்ட²பனமேவ. எத்த² பன ஏதேஸங் தி³ப்³ப³சக்கு²கானங் வசனே எத்தகா அனுஞ்ஞாதா, எத்தகா அனநுஞ்ஞாதாதி இத³ங் த³ஸ்ஸிதங். தத்த² தத்ராதி தேஸு சதூஸு ஸமணப்³ராஹ்மணேஸு. இத³மஸ்ஸாதி இத³ங் வசனங் அஸ்ஸ. அஞ்ஞதா²தி அஞ்ஞேனாகாரேன. இதி இமேஸங் ஸமணப்³ராஹ்மணானங் வாதே³ த்³வீஸு டா²னேஸு அனுஞ்ஞாதா, தீஸு அனநுஞ்ஞாதாதி ஏவங் ஸப்³ப³த்த² அனுஞ்ஞா நானுஞ்ஞா வேதி³தப்³பா³.
302.Tatrānandāti idampi na mahākammavibhaṅgañāṇassa bhājanaṃ, atha khvāssa mātikāṭṭhapanameva. Ettha pana etesaṃ dibbacakkhukānaṃ vacane ettakā anuññātā, ettakā ananuññātāti idaṃ dassitaṃ. Tattha tatrāti tesu catūsu samaṇabrāhmaṇesu. Idamassāti idaṃ vacanaṃ assa. Aññathāti aññenākārena. Iti imesaṃ samaṇabrāhmaṇānaṃ vāde dvīsu ṭhānesu anuññātā, tīsu ananuññātāti evaṃ sabbattha anuññā nānuññā veditabbā.
303. ஏவங் தி³ப்³ப³சக்கு²கானங் வசனே அனுஞ்ஞா ச அனநுஞ்ஞா ச த³ஸ்ஸெத்வா இதா³னி மஹாகம்மவிப⁴ங்க³ஞாணங் விப⁴ஜந்தோ தத்ரானந்த³, ய்வாயங் புக்³க³லோதிஆதி³மாஹ.
303. Evaṃ dibbacakkhukānaṃ vacane anuññā ca ananuññā ca dassetvā idāni mahākammavibhaṅgañāṇaṃ vibhajanto tatrānanda, yvāyaṃ puggalotiādimāha.
புப்³பே³ வாஸ்ஸ தங் கதங் ஹோதீதி யங் இமினா தி³ப்³ப³சக்கு²கேன கம்மங் கரொந்தோ தி³ட்டோ², ததோ புப்³பே³ கதங். புப்³பே³ கதேனபி ஹி நிரயே நிப்³ப³த்ததி, பச்சா² கதேனபி நிப்³ப³த்ததி, மரணகாலே வா பன – ‘‘க²ந்தோ³ ஸெட்டோ² ஸிவோ ஸெட்டோ², பிதாமஹோ ஸெட்டோ², இஸ்ஸராதீ³ஹி வா லோகோ விஸட்டோ²’’திஆதி³னா மிச்சா²த³ஸ்ஸனேனபி நிப்³ப³த்ததேவ. தி³ட்டே²வ த⁴ம்மேதி யங் தத்த² தி³ட்ட²த⁴ம்மவேத³னீயங் ஹோதி, தஸ்ஸ தி³ட்டே²வ த⁴ம்மே, யங் உபபஜ்ஜவேத³னீயங், தஸ்ஸ உபபஜ்ஜித்வா, யங் அபராபரியவேத³னீயங், தஸ்ஸ அபரஸ்மிங் பரியாயே விபாகங் படிஸங்வேதே³தி.
Pubbe vāssa taṃ kataṃ hotīti yaṃ iminā dibbacakkhukena kammaṃ karonto diṭṭho, tato pubbe kataṃ. Pubbe katenapi hi niraye nibbattati, pacchā katenapi nibbattati, maraṇakāle vā pana – ‘‘khando seṭṭho sivo seṭṭho, pitāmaho seṭṭho, issarādīhi vā loko visaṭṭho’’tiādinā micchādassanenapi nibbattateva. Diṭṭheva dhammeti yaṃ tattha diṭṭhadhammavedanīyaṃ hoti, tassa diṭṭheva dhamme, yaṃ upapajjavedanīyaṃ, tassa upapajjitvā, yaṃ aparāpariyavedanīyaṃ, tassa aparasmiṃ pariyāye vipākaṃ paṭisaṃvedeti.
இதி அயங் ஸமணோ வா ப்³ராஹ்மணோ வா ஏகங் கம்மராஸிங் ஏகஞ்ச விபாகராஸிங் அத்³த³ஸ, ஸம்மாஸம்பு³த்³தோ⁴ இமினா அதி³ட்டே² தயோ கம்மராஸீ, த்³வே ச விபாகராஸீ அத்³த³ஸ. இமினா பன தி³ட்டே² அதி³ட்டே² ச சத்தாரோ கம்மராஸீ தயோ ச விபாகராஸீ அத்³த³ஸ. இமானி ஸத்த டா²னானி ஜானநஞாணங் ததா²க³தஸ்ஸ மஹாகம்மவிப⁴ங்க³ஞாணங் நாம. து³தியவாரே தி³ப்³ப³சக்கு²கேன கிஞ்சி ந தி³ட்ட²ங் , ததா²க³தேன பன தயோ கம்மராஸீ, த்³வே ச விபாகராஸீ தி³ட்டா²தி. இமானிபி பஞ்ச பச்சத்தட்டா²னானி ஜானநஞாணங் ததா²க³தஸ்ஸ மஹாகம்மவிப⁴ங்க³ஞாணங் நாம. ஸேஸவாரத்³வயேபி ஏஸேவ நயோ.
Iti ayaṃ samaṇo vā brāhmaṇo vā ekaṃ kammarāsiṃ ekañca vipākarāsiṃ addasa, sammāsambuddho iminā adiṭṭhe tayo kammarāsī, dve ca vipākarāsī addasa. Iminā pana diṭṭhe adiṭṭhe ca cattāro kammarāsī tayo ca vipākarāsī addasa. Imāni satta ṭhānāni jānanañāṇaṃ tathāgatassa mahākammavibhaṅgañāṇaṃ nāma. Dutiyavāre dibbacakkhukena kiñci na diṭṭhaṃ , tathāgatena pana tayo kammarāsī, dve ca vipākarāsī diṭṭhāti. Imānipi pañca paccattaṭṭhānāni jānanañāṇaṃ tathāgatassa mahākammavibhaṅgañāṇaṃ nāma. Sesavāradvayepi eseva nayo.
அப⁴ப்³ப³ந்தி பூ⁴தவிரஹிதங் அகுஸலங். அப⁴ப்³பா³பா⁴ஸந்தி அப⁴ப்³ப³ங் ஆபா⁴ஸதி அபி⁴ப⁴வதி படிபா³ஹதீதி அத்தோ². ப³ஹுகஸ்மிஞ்ஹி அகுஸலகம்மே ஆயூஹிதே ப³லவகம்மங் து³ப்³ப³லகம்மஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி இத³ங் அப⁴ப்³ப³ஞ்சேவ அப⁴ப்³பா³பா⁴ஸஞ்ச. குஸலங் பன ஆயூஹித்வா ஆஸன்னே அகுஸலங் கதங் ஹோதி, தங் குஸலஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி, இத³ங் அப⁴ப்³ப³ங் ப⁴ப்³பா³பா⁴ஸங். ப³ஹும்ஹி குஸலே ஆயூஹிதேபி ப³லவகம்மங் து³ப்³ப³லகம்மஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி, இத³ங் ப⁴ப்³ப³ஞ்சேவ ப⁴ப்³பா³பா⁴ஸஞ்ச. அகுஸலங் பன ஆயூஹித்வா ஆஸன்னே குஸலங் கதங் ஹோதி, தங் அகுஸலஸ்ஸ விபாகங் படிபா³ஹித்வா அத்தனோ விபாகஸ்ஸ ஓகாஸங் கரோதி, இத³ங் ப⁴ப்³ப³ங் அப⁴ப்³பா³பா⁴ஸங்.
Abhabbanti bhūtavirahitaṃ akusalaṃ. Abhabbābhāsanti abhabbaṃ ābhāsati abhibhavati paṭibāhatīti attho. Bahukasmiñhi akusalakamme āyūhite balavakammaṃ dubbalakammassa vipākaṃ paṭibāhitvā attano vipākassa okāsaṃ karoti idaṃ abhabbañceva abhabbābhāsañca. Kusalaṃ pana āyūhitvā āsanne akusalaṃ kataṃ hoti, taṃ kusalassa vipākaṃ paṭibāhitvā attano vipākassa okāsaṃ karoti, idaṃ abhabbaṃ bhabbābhāsaṃ. Bahumhi kusale āyūhitepi balavakammaṃ dubbalakammassa vipākaṃ paṭibāhitvā attano vipākassa okāsaṃ karoti, idaṃ bhabbañceva bhabbābhāsañca. Akusalaṃ pana āyūhitvā āsanne kusalaṃ kataṃ hoti, taṃ akusalassa vipākaṃ paṭibāhitvā attano vipākassa okāsaṃ karoti, idaṃ bhabbaṃ abhabbābhāsaṃ.
அபிச உபட்டா²னாகாரேனபெத்த² அத்தோ² வேதி³தப்³போ³. இத³ஞ்ஹி வுத்தங் ஹோதி, அப⁴ப்³ப³தோ ஆபா⁴ஸதி உபட்டா²தீதி அப⁴ப்³பா³பா⁴ஸங். தத்த² ‘‘ய்வாயங் புக்³க³லோ இத⁴ பாணாதிபாதீ’’திஆதி³னா நயேன சத்தாரோ புக்³க³லா வுத்தா, தேஸு பட²மஸ்ஸ கம்மங் அப⁴ப்³ப³ங் அப⁴ப்³பா³பா⁴ஸங், தஞ்ஹி அகுஸலத்தா அப⁴ப்³ப³ங், தஸ்ஸ ச நிரயே நிப்³ப³த்தத்தா தத்த² நிப்³ப³த்திகாரணபூ⁴தங் அகுஸலங் ஹுத்வா உபட்டா²தி. து³தியஸ்ஸ கம்மங் அப⁴ப்³ப³ங் ப⁴ப்³பா³பா⁴ஸங், தஞ்ஹி அகுஸலத்தா அப⁴ப்³ப³ங். தஸ்ஸ பன ஸக்³கே³ நிப்³ப³த்தத்தா அஞ்ஞதித்தி²யானங் ஸக்³கே³ நிப்³ப³த்திகாரணபூ⁴தங் குஸலங் ஹுத்வா உபட்டா²தி. இதரஸ்மிம்பி கம்மத்³வயே ஏஸேவ நயோ. ஸேஸங் ஸப்³ப³த்த² உத்தானமேவாதி.
Apica upaṭṭhānākārenapettha attho veditabbo. Idañhi vuttaṃ hoti, abhabbato ābhāsati upaṭṭhātīti abhabbābhāsaṃ. Tattha ‘‘yvāyaṃ puggalo idha pāṇātipātī’’tiādinā nayena cattāro puggalā vuttā, tesu paṭhamassa kammaṃ abhabbaṃ abhabbābhāsaṃ, tañhi akusalattā abhabbaṃ, tassa ca niraye nibbattattā tattha nibbattikāraṇabhūtaṃ akusalaṃ hutvā upaṭṭhāti. Dutiyassa kammaṃ abhabbaṃ bhabbābhāsaṃ, tañhi akusalattā abhabbaṃ. Tassa pana sagge nibbattattā aññatitthiyānaṃ sagge nibbattikāraṇabhūtaṃ kusalaṃ hutvā upaṭṭhāti. Itarasmimpi kammadvaye eseva nayo. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாகம்மவிப⁴ங்க³ஸுத்தவண்ணனா நிட்டி²தா.
Mahākammavibhaṅgasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. மஹாகம்மவிப⁴ங்க³ஸுத்தங் • 6. Mahākammavibhaṅgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. மஹாகம்மவிப⁴ங்க³ஸுத்தவண்ணனா • 6. Mahākammavibhaṅgasuttavaṇṇanā
