| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
11. மஹாகப்பினஸுத்தவண்ணனா
11. Mahākappinasuttavaṇṇanā
245. மஹாகப்பினோதி பூஜாவசனமேதங் யதா² ‘‘மஹாமொக்³க³ல்லானோ’’தி. ததா²ரூபந்தி ‘‘பு³த்³தோ⁴ த⁴ம்மோ’’திஆதி³கங் கு³ணவிஸேஸவந்தபடிப³த்³த⁴ங். ஸாஸனந்தி தே³ஸந்தரதோ ஆக³தவசனங். ஜங்க⁴வாணிஜாதி ஜங்க⁴சாரினோ வாணிஜா. கிஞ்சி ஸாஸனந்தி அபுப்³ப³பவத்திதீ³பகங் கிஞ்சி வசனந்தி புச்சி². பீதி உப்பஜ்ஜி யதா² தங் ஸுசிரங் கதாபி⁴னீஹாரதாய பரிபக்கஞாணஸ்ஸ. அபரிமாணங் கு³ணஸ்ஸ அபரிமாணதோ ஸப்³ப³ஞ்ஞுகு³ணபரிதீ³பனதோ, ஸேஸரதனத்³வயே நிய்யானிகபா⁴வதீ³பனதோ தி³ட்டி²ஸீலஸாமஞ்ஞேன ஸங்ஹதபா⁴வதீ³பனதோதி வத்தப்³ப³ங். யதா²னுஸிட்ட²ங் படிபஜ்ஜமானே அபாயது³க்க²தோ ஸங்ஸாரது³க்க²தோ ச அபதந்தே தா⁴ரேதீதி த⁴ம்மோ. ஸுபரிஸுத்³த⁴தி³ட்டி²ஸீலஸாமஞ்ஞேன ஸங்ஹதோதி ஸங்கோ⁴தி. ரதனத்தோ² பன திண்ணம்பி ஸதி³ஸோ ஏவாதி.
245.Mahākappinoti pūjāvacanametaṃ yathā ‘‘mahāmoggallāno’’ti. Tathārūpanti ‘‘buddho dhammo’’tiādikaṃ guṇavisesavantapaṭibaddhaṃ. Sāsananti desantarato āgatavacanaṃ. Jaṅghavāṇijāti jaṅghacārino vāṇijā. Kiñci sāsananti apubbapavattidīpakaṃ kiñci vacananti pucchi. Pīti uppajji yathā taṃ suciraṃ katābhinīhāratāya paripakkañāṇassa. Aparimāṇaṃ guṇassa aparimāṇato sabbaññuguṇaparidīpanato, sesaratanadvaye niyyānikabhāvadīpanato diṭṭhisīlasāmaññena saṃhatabhāvadīpanatoti vattabbaṃ. Yathānusiṭṭhaṃ paṭipajjamāne apāyadukkhato saṃsāradukkhato ca apatante dhāretīti dhammo. Suparisuddhadiṭṭhisīlasāmaññena saṃhatoti saṅghoti. Ratanattho pana tiṇṇampi sadiso evāti.
நவஸதஸஹஸ்ஸானி அதா³ஸி தே³வீ. தும்ஹேதி ராஜினிங் கா³ரவேன ப³ஹுவசனேன வத³தி. ராகோ³தி அனுக³ச்ச²ந்தராகோ³.
Navasatasahassāni adāsi devī. Tumheti rājiniṃ gāravena bahuvacanena vadati. Rāgoti anugacchantarāgo.
ஜனிதேதி கம்மகிலேஸேஹி நிப்³ப³த்திதே. கம்மகிலேஸேஹி பஜாதத்தா பஜாதி பஜாஸத்³தோ³ ஜனிதஸத்³தே³ன ஸமானத்தோ²தி ஆஹ – ‘‘ஜனிதே, பஜாயாதி அத்தோ²’’தி. அட்ட²ஹி விஜ்ஜாஹீதி அம்ப³ட்ட²ஸுத்தே (தீ³॰ நி॰ 1.278) ஆக³தனயேன. தத்த² ஹி விபஸ்ஸனாஞாணமனோமயித்³தீ⁴ஹி ஸஹ ச² அபி⁴ஞ்ஞா ‘‘அட்ட² விஜ்ஜா’’தி ஆக³தா . தபதி படிபக்க²வித⁴மனேன விஜ்ஜோததி, தங் ஸூரியஸ்ஸ விரோசனந்தி ஆஹ – ‘‘தபதீதி விரோசதீ’’தி. ஜா²னங் ஸமாபஜ்ஜித்வா ஸமாஹிதேன சித்தேன விபஸ்ஸனங் வட்³டெ⁴த்வா ப²லஸமாபத்திங் ஸமாபஜ்ஜித்வா நிஸின்னோதி ஆஹ – ‘‘து³விதே⁴ன ஜா²னேன ஜா²யமானோ’’தி. ஸப்³ப³மங்க³லகா³தா²தி ஸப்³ப³மங்க³லாவிரோதீ⁴ கா³தா²தி வத³ந்தி. ததா² ஹி வத³ந்தி –
Janiteti kammakilesehi nibbattite. Kammakilesehi pajātattā pajāti pajāsaddo janitasaddena samānatthoti āha – ‘‘janite, pajāyāti attho’’ti. Aṭṭhahi vijjāhīti ambaṭṭhasutte (dī. ni. 1.278) āgatanayena. Tattha hi vipassanāñāṇamanomayiddhīhi saha cha abhiññā ‘‘aṭṭha vijjā’’ti āgatā . Tapati paṭipakkhavidhamanena vijjotati, taṃ sūriyassa virocananti āha – ‘‘tapatīti virocatī’’ti. Jhānaṃ samāpajjitvā samāhitena cittena vipassanaṃ vaḍḍhetvā phalasamāpattiṃ samāpajjitvā nisinnoti āha – ‘‘duvidhena jhānena jhāyamāno’’ti. Sabbamaṅgalagāthāti sabbamaṅgalāvirodhī gāthāti vadanti. Tathā hi vadanti –
‘‘மங்க³லங் ப⁴க³வா பு³த்³தோ⁴, த⁴ம்மோ ஸங்கோ⁴ ச மங்க³லங்;
‘‘Maṅgalaṃ bhagavā buddho, dhammo saṅgho ca maṅgalaṃ;
ஸப்³பே³ஸம்பி ச ஸத்தானங், ஸ புஞ்ஞவிதமங்க³ல’’ந்தி.
Sabbesampi ca sattānaṃ, sa puññavitamaṅgala’’nti.
பூஜங் காரெத்வா ஏகங் அகா³ரிகத⁴ம்மகதி²கங் உபாஸகங் ஆஹ. எத்த² ச ‘‘ஜா²யீ தபதீ’’தி இமினா ஆரம்மணூபனிஜ்ஜா²னானங் க³ஹிதத்தா த⁴ம்மரதனங் க³ஹிதமேவ. ‘‘ப்³ராஹ்மணோ’’தி இமினா ஸங்க⁴ரதனங் க³ஹிதமேவ. பு³த்³த⁴ரதனங் பன ஸரூபேனேவ க³ஹிதந்தி.
Pūjaṃ kāretvā ekaṃ agārikadhammakathikaṃ upāsakaṃ āha. Ettha ca ‘‘jhāyī tapatī’’ti iminā ārammaṇūpanijjhānānaṃ gahitattā dhammaratanaṃ gahitameva. ‘‘Brāhmaṇo’’ti iminā saṅgharatanaṃ gahitameva. Buddharatanaṃ pana sarūpeneva gahitanti.
மஹாகப்பினஸுத்தவண்ணனா நிட்டி²தா.
Mahākappinasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 11. மஹாகப்பினஸுத்தங் • 11. Mahākappinasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11. மஹாகப்பினஸுத்தவண்ணனா • 11. Mahākappinasuttavaṇṇanā
