| Library / Tipiṭaka / તિપિટક • Tipiṭaka / વજિરબુદ્ધિ-ટીકા • Vajirabuddhi-ṭīkā |
૯. મહલ્લકવિહારસિક્ખાપદવણ્ણના
9. Mahallakavihārasikkhāpadavaṇṇanā
૧૩૫. યાવ દ્વારકોસાતિ દ્વારસમીપા, યાવ ભિત્તીતિ અત્થો, તં સુવુત્તં. કવાટવિત્થારપ્પમાણોતિ હત્થપાસસ્સાધિપ્પેતત્તા, સમન્તા કવાટવિત્થારપ્પમાણઉપચારસ્સ ગહિતત્તા અપરિપૂરઉપચારાપિ હોતિ. આલોકં કરોતીતિ આલોકં સન્ધેતિ પિધેતીતિ સન્ધિ એવ આલોકસન્ધિનામકા હોન્તિ. વાતપાનકવાટલેપકમ્મે અપ્પહરિતટ્ઠાનકિચ્ચં નત્થિ.
135.Yāvadvārakosāti dvārasamīpā, yāva bhittīti attho, taṃ suvuttaṃ. Kavāṭavitthārappamāṇoti hatthapāsassādhippetattā, samantā kavāṭavitthārappamāṇaupacārassa gahitattā aparipūraupacārāpi hoti. Ālokaṃ karotīti ālokaṃ sandheti pidhetīti sandhi eva ālokasandhināmakā honti. Vātapānakavāṭalepakamme appaharitaṭṭhānakiccaṃ natthi.
૧૩૬. ઇટ્ઠકાતિ છદનકપાલાસિલાદિઇટ્ઠકા. છદનૂપરીતિ એત્થ પઠમં તાવ એકવારં અપરિસેસં છાદેત્વા પુન છાદનદણ્ડકે બન્ધિત્વા દુતિયવારં તથેવ છાદેતબ્બં. ‘‘તતિયવારચતુત્થવારે સમ્પત્તે દ્વે મગ્ગે અધિટ્ઠહિત્વા તતિયમગ્ગં આણાપેત્વા પક્કમિતબ્બ’’ન્તિ વુત્તં, તં ‘‘પુનપ્પુનં છાદાપેતી’’તિ ઇમિના યુજ્જતિ.
136.Iṭṭhakāti chadanakapālāsilādiiṭṭhakā. Chadanūparīti ettha paṭhamaṃ tāva ekavāraṃ aparisesaṃ chādetvā puna chādanadaṇḍake bandhitvā dutiyavāraṃ tatheva chādetabbaṃ. ‘‘Tatiyavāracatutthavāre sampatte dve magge adhiṭṭhahitvā tatiyamaggaṃ āṇāpetvā pakkamitabba’’nti vuttaṃ, taṃ ‘‘punappunaṃ chādāpetī’’ti iminā yujjati.
પોરાણા પન ‘‘પઠમવારેયેવ તયો મગ્ગે અધિટ્ઠાતું વટ્ટતિ, ચતુત્થતો પટ્ઠાય આપત્તિ પાચિત્તિયં, ચતુત્થલેપતો પટ્ઠાય આપત્તી’’તિ વદન્તિ. તત્થ છદને વુત્તવિધિનિદાનેન સમેતિ, લેપે વુત્તવિધિતિકચ્છેદેન સમેતિ. તથાપિ સો ન યુત્તોવ. નિદાને, અટ્ઠકથાયઞ્ચ સિદ્ધલેપત્તા સબ્બસોવાપિ અચ્છન્ને, છન્નેવાપિ અનેકસો પરિયાયસ્સ તતિયસ્સેવ અધિટ્ઠાનન્તિ નો સમેતીતિ આચરિયો. ‘‘દ્વે મગ્ગે’’તિ, ‘‘દ્વે છદને’’તિ ચ ‘‘તતિયવારતો પટ્ઠાય એવં છાદાપેહી’તિ આણાપેત્વા પક્કમિતબ્બ’’ન્તિ ચ ઉપતિસ્સત્થેરો વદતિ કિર.
Porāṇā pana ‘‘paṭhamavāreyeva tayo magge adhiṭṭhātuṃ vaṭṭati, catutthato paṭṭhāya āpatti pācittiyaṃ, catutthalepato paṭṭhāya āpattī’’ti vadanti. Tattha chadane vuttavidhinidānena sameti, lepe vuttavidhitikacchedena sameti. Tathāpi so na yuttova. Nidāne, aṭṭhakathāyañca siddhalepattā sabbasovāpi acchanne, channevāpi anekaso pariyāyassa tatiyasseva adhiṭṭhānanti no sametīti ācariyo. ‘‘Dve magge’’ti, ‘‘dve chadane’’ti ca ‘‘tatiyavārato paṭṭhāya evaṃ chādāpehī’ti āṇāpetvā pakkamitabba’’nti ca upatissatthero vadati kira.
મહલ્લકવિહારસિક્ખાપદવણ્ણના નિટ્ઠિતા.
Mahallakavihārasikkhāpadavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૨. ભૂતગામવગ્ગો • 2. Bhūtagāmavaggo
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / મહાવિભઙ્ગ-અટ્ઠકથા • Mahāvibhaṅga-aṭṭhakathā / ૯. મહલ્લકવિહારસિક્ખાપદવણ્ણના • 9. Mahallakavihārasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૯. મહલ્લકવિહારસિક્ખાપદવણ્ણના • 9. Mahallakavihārasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૯. મહલ્લકવિહારસિક્ખાપદવણ્ણના • 9. Mahallakavihārasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૯. મહલ્લકવિહારસિક્ખાપદં • 9. Mahallakavihārasikkhāpadaṃ
