| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. மஹாமாலுக்யஸுத்தவண்ணனா
4. Mahāmālukyasuttavaṇṇanā
129. ஏவங் மே ஸுதந்தி மஹாமாலுக்யஸுத்தங். தத்த² ஓரம்பா⁴கி³யானீதி ஹெட்டா² கொட்டா²ஸிகானி காமப⁴வே நிப்³ப³த்திஸங்வத்தனிகானி. ஸங்யோஜனானீதி ப³ந்த⁴னானி. கஸ்ஸ கோ² நாமாதி கஸ்ஸ தே³வஸ்ஸ வா மனுஸ்ஸஸ்ஸ வா தே³ஸிதானி தா⁴ரேஸி, கிங் த்வமேவேகோ அஸ்ஸோஸி, ந அஞ்ஞோ கோசீதி? அனுஸேதீதி அப்பஹீனதாய அனுஸேதி. அனுஸயமானோ ஸங்யோஜனங் நாம ஹோதி.
129.Evaṃme sutanti mahāmālukyasuttaṃ. Tattha orambhāgiyānīti heṭṭhā koṭṭhāsikāni kāmabhave nibbattisaṃvattanikāni. Saṃyojanānīti bandhanāni. Kassakho nāmāti kassa devassa vā manussassa vā desitāni dhāresi, kiṃ tvameveko assosi, na añño kocīti? Anusetīti appahīnatāya anuseti. Anusayamāno saṃyojanaṃ nāma hoti.
எத்த² ச ப⁴க³வதா ஸங்யோஜனங் புச்சி²தங், தே²ரேனபி ஸங்யோஜனமேவ ப்³யாகதங். ஏவங் ஸந்தேபி தஸ்ஸ வாதே³ ப⁴க³வதா தோ³ஸோ ஆரோபிதோ. ஸோ கஸ்மாதி சே? தே²ரஸ்ஸ ததா²லத்³தி⁴கத்தா. அயஞ்ஹி தஸ்ஸ லத்³தி⁴ ‘‘ஸமுதா³சாரக்க²ணேயேவ கிலேஸேஹி ஸங்யுத்தோ நாம ஹோதி, இதரஸ்மிங் க²ணே அஸங்யுத்தோ’’தி. தேனஸ்ஸ ப⁴க³வதா தோ³ஸோ ஆரோபிதோ. அதா²யஸ்மா ஆனந்தோ³ சிந்தேஸி – ‘‘ப⁴க³வதா பி⁴க்கு²ஸங்க⁴ஸ்ஸ த⁴ம்மங் தே³ஸெஸ்ஸாமீதி அத்தனோ த⁴ம்மதாயேவ அயங் த⁴ம்மதே³ஸனா ஆரத்³தா⁴, ஸா இமினா அபண்டி³தேன பி⁴க்கு²னா விஸங்வாதி³தா. ஹந்தா³ஹங் ப⁴க³வந்தங் யாசித்வா பி⁴க்கூ²னங் த⁴ம்மங் தே³ஸெஸ்ஸாமீ’’தி. ஸோ ஏவமகாஸி. தங் த³ஸ்ஸேதுங் ‘‘ஏவங் வுத்தே ஆயஸ்மா ஆனந்தோ³’’திஆதி³ வுத்தங்.
Ettha ca bhagavatā saṃyojanaṃ pucchitaṃ, therenapi saṃyojanameva byākataṃ. Evaṃ santepi tassa vāde bhagavatā doso āropito. So kasmāti ce? Therassa tathāladdhikattā. Ayañhi tassa laddhi ‘‘samudācārakkhaṇeyeva kilesehi saṃyutto nāma hoti, itarasmiṃ khaṇe asaṃyutto’’ti. Tenassa bhagavatā doso āropito. Athāyasmā ānando cintesi – ‘‘bhagavatā bhikkhusaṅghassa dhammaṃ desessāmīti attano dhammatāyeva ayaṃ dhammadesanā āraddhā, sā iminā apaṇḍitena bhikkhunā visaṃvāditā. Handāhaṃ bhagavantaṃ yācitvā bhikkhūnaṃ dhammaṃ desessāmī’’ti. So evamakāsi. Taṃ dassetuṃ ‘‘evaṃ vutte āyasmā ānando’’tiādi vuttaṃ.
தத்த² ஸக்காயதி³ட்டி²பரியுட்டி²தேனாதி ஸக்காயதி³ட்டி²யா க³ஹிதேன அபி⁴பூ⁴தேன. ஸக்காயதி³ட்டி²பரேதேனாதி ஸக்காயதி³ட்டி²யா அனுக³தேன. நிஸ்ஸரணந்தி தி³ட்டி²னிஸ்ஸரணங் நாம நிப்³பா³னங், தங் யதா²பூ⁴தங் நப்பஜானாதி. அப்படிவினீதாதி அவினோதி³தா அனீஹடா. ஓரம்பா⁴கி³யங் ஸங்யோஜனந்தி ஹெட்டா²பா⁴கி³யஸங்யோஜனங் நாம ஹோதி. ஸேஸபதே³ஸுபி ஏஸேவ நயோ. ஸுக்கபக்கோ² உத்தானத்தோ²யேவ. ‘‘ஸானுஸயா பஹீயதீ’’தி வசனதோ பனெத்த² ஏகச்சே ‘‘அஞ்ஞங் ஸங்யோஜனங் அஞ்ஞோ அனுஸயோ’’தி வத³ந்தி. ‘‘யதா² ஹி ஸப்³யஞ்ஜனங் ப⁴த்த’’ந்தி வுத்தே ப⁴த்ததோ அஞ்ஞங் ப்³யஞ்ஜனங் ஹோதி, ஏவங் ‘‘ஸானுஸயா’’தி வசனதோ பரியுட்டா²னஸக்காயதி³ட்டி²தோ அஞ்ஞேன அனுஸயேன ப⁴விதப்³ப³ந்தி தேஸங் லத்³தி⁴. தே ‘‘ஸஸீஸங் பாருபித்வா’’திஆதீ³ஹி படிக்கி²பிதப்³பா³. ந ஹி ஸீஸதோ அஞ்ஞோ புரிஸோ அத்தி². அதா²பி ஸியா – ‘‘யதி³ ததே³வ ஸங்யோஜனங் ஸோ அனுஸயோ, ஏவங் ஸந்தே ப⁴க³வதா தே²ரஸ்ஸ தருணூபமோ உபாரம்போ⁴ து³ஆரோபிதோ ஹோதீ’’தி. ந து³ஆரோபிதோ, கஸ்மா? ஏவங்லத்³தி⁴கத்தாதி வித்தா²ரிதமேதங். தஸ்மா ஸோயேவ கிலேஸோ ப³ந்த⁴னட்டே²ன ஸங்யோஜனங், அப்பஹீனட்டே²ன அனுஸயோதி இமமத்த²ங் ஸந்தா⁴ய ப⁴க³வதா ‘‘ஸானுஸயா பஹீயதீ’’தி ஏவங் வுத்தந்தி வேதி³தப்³ப³ங்.
Tattha sakkāyadiṭṭhipariyuṭṭhitenāti sakkāyadiṭṭhiyā gahitena abhibhūtena. Sakkāyadiṭṭhiparetenāti sakkāyadiṭṭhiyā anugatena. Nissaraṇanti diṭṭhinissaraṇaṃ nāma nibbānaṃ, taṃ yathābhūtaṃ nappajānāti. Appaṭivinītāti avinoditā anīhaṭā. Orambhāgiyaṃ saṃyojananti heṭṭhābhāgiyasaṃyojanaṃ nāma hoti. Sesapadesupi eseva nayo. Sukkapakkho uttānatthoyeva. ‘‘Sānusayā pahīyatī’’ti vacanato panettha ekacce ‘‘aññaṃ saṃyojanaṃ añño anusayo’’ti vadanti. ‘‘Yathā hi sabyañjanaṃ bhatta’’nti vutte bhattato aññaṃ byañjanaṃ hoti, evaṃ ‘‘sānusayā’’ti vacanato pariyuṭṭhānasakkāyadiṭṭhito aññena anusayena bhavitabbanti tesaṃ laddhi. Te ‘‘sasīsaṃ pārupitvā’’tiādīhi paṭikkhipitabbā. Na hi sīsato añño puriso atthi. Athāpi siyā – ‘‘yadi tadeva saṃyojanaṃ so anusayo, evaṃ sante bhagavatā therassa taruṇūpamo upārambho duāropito hotī’’ti. Na duāropito, kasmā? Evaṃladdhikattāti vitthāritametaṃ. Tasmā soyeva kileso bandhanaṭṭhena saṃyojanaṃ, appahīnaṭṭhena anusayoti imamatthaṃ sandhāya bhagavatā ‘‘sānusayā pahīyatī’’ti evaṃ vuttanti veditabbaṃ.
132. தசங் செ²த்வாதிஆதீ³ஸு இத³ங் ஓபம்மஸங்ஸந்த³னங் – தசச்சே²தோ³ விய ஹி ஸமாபத்தி த³ட்ட²ப்³பா³, பெ²க்³கு³ச்சே²தோ³ விய விபஸ்ஸனா, ஸாரச்சே²தோ³ விய மக்³கோ³. படிபதா³ பன லோகியலோகுத்தரமிஸ்ஸகாவ வட்டதி. ஏவமேதே த³ட்ட²ப்³பா³தி ஏவரூபா புக்³க³லா ஏவங் த³ட்ட²ப்³பா³.
132.Tacaṃ chetvātiādīsu idaṃ opammasaṃsandanaṃ – tacacchedo viya hi samāpatti daṭṭhabbā, pheggucchedo viya vipassanā, sāracchedo viya maggo. Paṭipadā pana lokiyalokuttaramissakāva vaṭṭati. Evamete daṭṭhabbāti evarūpā puggalā evaṃ daṭṭhabbā.
133. உபதி⁴விவேகாதி உபதி⁴விவேகேன. இமினா பஞ்சகாமகு³ணவிவேகோ கதி²தோ. அகுஸலானங் த⁴ம்மானங் பஹானாதி இமினா நீவரணப்பஹானங் கதி²தங். காயது³ட்டு²ல்லானங் படிப்பஸ்ஸத்³தி⁴யாதி இமினா காயாலஸியபடிப்பஸ்ஸத்³தி⁴ கதி²தா. விவிச்சேவ காமேஹீதி உபதி⁴விவேகேன காமேஹி வினா ஹுத்வா. விவிச்ச அகுஸலேஹீதி அகுஸலானங் த⁴ம்மானங் பஹானேன காயது³ட்டு²ல்லானங் படிப்பஸ்ஸத்³தி⁴யா ச அகுஸலேஹி வினா ஹுத்வா. யதே³வ தத்த² ஹோதீதி யங் தத்த² அந்தோஸமாபத்திக்க²ணேயேவ ஸமாபத்திஸமுட்டி²தஞ்ச ரூபாதி³த⁴ம்மஜாதங் ஹோதி. தே த⁴ம்மேதி தே ரூபக³தந்திஆதி³னா நயேன வுத்தே ரூபாத³யோ த⁴ம்மே. அனிச்சதோதி ந நிச்சதோ. து³க்க²தோதி ந ஸுக²தோ. ரோக³தோதிஆதீ³ஸு ஆபா³த⁴ட்டே²ன ரோக³தோ, அந்தோதோ³ஸட்டே²ன க³ண்ட³தோ, அனுபவித்³த⁴ட்டே²ன து³க்க²ஜனநட்டே²ன ச ஸல்லதோ, து³க்க²ட்டே²ன அக⁴தோ, ரோக³ட்டே²ன ஆபா³த⁴தோ, அஸகட்டே²ன பரதோ, பலுஜ்ஜனட்டே²ன பலோகதோ, நிஸ்ஸத்தட்டே²ன ஸுஞ்ஞதோ, ந அத்தட்டே²ன அனத்ததோ. தத்த² அனிச்சதோ, பலோகதோதி த்³வீஹி பதே³ஹி அனிச்சலக்க²ணங் கதி²தங், து³க்க²தோதிஆதீ³ஹி ச²ஹி து³க்க²லக்க²ணங், பரதோ ஸுஞ்ஞதோ அனத்ததோதி தீஹி அனத்தலக்க²ணங்.
133.Upadhivivekāti upadhivivekena. Iminā pañcakāmaguṇaviveko kathito. Akusalānaṃ dhammānaṃ pahānāti iminā nīvaraṇappahānaṃ kathitaṃ. Kāyaduṭṭhullānaṃ paṭippassaddhiyāti iminā kāyālasiyapaṭippassaddhi kathitā. Vivicceva kāmehīti upadhivivekena kāmehi vinā hutvā. Vivicca akusalehīti akusalānaṃ dhammānaṃ pahānena kāyaduṭṭhullānaṃ paṭippassaddhiyā ca akusalehi vinā hutvā. Yadeva tattha hotīti yaṃ tattha antosamāpattikkhaṇeyeva samāpattisamuṭṭhitañca rūpādidhammajātaṃ hoti. Tedhammeti te rūpagatantiādinā nayena vutte rūpādayo dhamme. Aniccatoti na niccato. Dukkhatoti na sukhato. Rogatotiādīsu ābādhaṭṭhena rogato, antodosaṭṭhena gaṇḍato, anupaviddhaṭṭhena dukkhajananaṭṭhena ca sallato, dukkhaṭṭhena aghato, rogaṭṭhena ābādhato, asakaṭṭhena parato, palujjanaṭṭhena palokato, nissattaṭṭhena suññato, na attaṭṭhena anattato. Tattha aniccato, palokatoti dvīhi padehi aniccalakkhaṇaṃ kathitaṃ, dukkhatotiādīhi chahi dukkhalakkhaṇaṃ, parato suññato anattatoti tīhi anattalakkhaṇaṃ.
ஸோ தேஹி த⁴ம்மேஹீதி ஸோ தேஹி ஏவங் திலக்க²ணங் ஆரோபெத்வா தி³ட்டே²ஹி அந்தோஸமாபத்தியங் பஞ்சக்க²ந்த⁴த⁴ம்மேஹி. சித்தங் படிவாபேதீதி சித்தங் படிஸங்ஹரதி மோசேதி அபனேதி. உபஸங்ஹரதீதி விபஸ்ஸனாசித்தங் தாவ ஸவனவஸேன து²திவஸேன பரியத்திவஸேன பஞ்ஞத்திவஸேன ச ஏதங் ஸந்தங் நிப்³பா³னந்தி ஏவங் அஸங்க²தாய அமதாய தா⁴துயா உபஸங்ஹரதி. மக்³க³சித்தங் நிப்³பா³னங் ஆரம்மணகரணவஸேனேவ ஏதங் ஸந்தமேதங் பணீதந்தி ந ஏவங் வத³தி, இமினா பன ஆகாரேன தங் படிவிஜ்ஜ²ந்தோ தத்த² சித்தங் உபஸங்ஹரதீதி அத்தோ². ஸோ தத்த² டி²தோதி தாய திலக்க²ணாரம்மணாய விபஸ்ஸனாய டி²தோ. ஆஸவானங் க²யங் பாபுணாதீதி அனுக்கமேன சத்தாரோ மக்³கே³ பா⁴வெத்வா பாபுணாதி . தேனேவ த⁴ம்மராகே³னாதி ஸமத²விபஸ்ஸனாத⁴ம்மே ச²ந்த³ராகே³ன. ஸமத²விபஸ்ஸனாஸு ஹி ஸப்³ப³ஸோ ச²ந்த³ராக³ங் பரியாதா³துங் ஸக்கொந்தோ அரஹத்தங் பாபுணாதி, அஸக்கொந்தோ அனாகா³மீ ஹோதி.
So tehi dhammehīti so tehi evaṃ tilakkhaṇaṃ āropetvā diṭṭhehi antosamāpattiyaṃ pañcakkhandhadhammehi. Cittaṃ paṭivāpetīti cittaṃ paṭisaṃharati moceti apaneti. Upasaṃharatīti vipassanācittaṃ tāva savanavasena thutivasena pariyattivasena paññattivasena ca etaṃ santaṃ nibbānanti evaṃ asaṅkhatāya amatāya dhātuyā upasaṃharati. Maggacittaṃ nibbānaṃ ārammaṇakaraṇavaseneva etaṃ santametaṃ paṇītanti na evaṃ vadati, iminā pana ākārena taṃ paṭivijjhanto tattha cittaṃ upasaṃharatīti attho. So tattha ṭhitoti tāya tilakkhaṇārammaṇāya vipassanāya ṭhito. Āsavānaṃ khayaṃ pāpuṇātīti anukkamena cattāro magge bhāvetvā pāpuṇāti . Teneva dhammarāgenāti samathavipassanādhamme chandarāgena. Samathavipassanāsu hi sabbaso chandarāgaṃ pariyādātuṃ sakkonto arahattaṃ pāpuṇāti, asakkonto anāgāmī hoti.
யதே³வ தத்த² ஹோதி வேத³னாக³தந்தி இத⁴ பன ரூபங் ந க³ஹிதங். கஸ்மா? ஸமதிக்கந்தத்தா. அயஞ்ஹி ஹெட்டா² ரூபாவசரஜ்ஜா²னங் ஸமாபஜ்ஜித்வா ரூபங் அதிக்கமித்வா அரூபாவசரஸமாபத்திங் ஸமாபன்னோதி ஸமத²வஸேனபினேன ரூபங் அதிக்கந்தங், ஹெட்டா² ரூபங் ஸம்மதே³வ ஸம்மஸித்வா தங் அதிக்கம்ம இதா³னி அரூபங் ஸம்மஸதீதி விபஸ்ஸனாவஸேனபினேன ரூபங் அதிக்கந்தங். அரூபே பன ஸப்³ப³ஸோபி ரூபங் நத்தீ²தி தங் ஸந்தா⁴யபி இத⁴ ரூபங் ந க³ஹிதங்.
Yadevatattha hoti vedanāgatanti idha pana rūpaṃ na gahitaṃ. Kasmā? Samatikkantattā. Ayañhi heṭṭhā rūpāvacarajjhānaṃ samāpajjitvā rūpaṃ atikkamitvā arūpāvacarasamāpattiṃ samāpannoti samathavasenapinena rūpaṃ atikkantaṃ, heṭṭhā rūpaṃ sammadeva sammasitvā taṃ atikkamma idāni arūpaṃ sammasatīti vipassanāvasenapinena rūpaṃ atikkantaṃ. Arūpe pana sabbasopi rūpaṃ natthīti taṃ sandhāyapi idha rūpaṃ na gahitaṃ.
அத² கிஞ்சரஹீதி கிங் புச்சா²மீதி புச்ச²தி? ஸமத²வஸேன க³ச்ச²தோ சித்தேகக்³க³தா து⁴ரங் ஹோதி, ஸோ சேதோவிமுத்தோ நாம. விபஸ்ஸனாவஸேன க³ச்ச²தோ பஞ்ஞா து⁴ரங் ஹோதி, ஸோ பஞ்ஞாவிமுத்தோ நாமாதி எத்த² தே²ரஸ்ஸ கங்கா² நத்தி². அயங் ஸபா⁴வத⁴ம்மோயேவ, ஸமத²வஸேனேவ பன க³ச்ச²ந்தேஸு ஏகோ சேதோவிமுத்தோ நாம ஹோதி, ஏகோ பஞ்ஞாவிமுத்தோ. விபஸ்ஸனாவஸேன க³ச்ச²ந்தேஸுபி ஏகோ பஞ்ஞாவிமுத்தோ நாம ஹோதி, ஏகோ சேதோவிமுத்தோதி எத்த² கிங் காரணந்தி புச்ச²தி.
Atha kiñcarahīti kiṃ pucchāmīti pucchati? Samathavasena gacchato cittekaggatā dhuraṃ hoti, so cetovimutto nāma. Vipassanāvasena gacchato paññā dhuraṃ hoti, so paññāvimutto nāmāti ettha therassa kaṅkhā natthi. Ayaṃ sabhāvadhammoyeva, samathavaseneva pana gacchantesu eko cetovimutto nāma hoti, eko paññāvimutto. Vipassanāvasena gacchantesupi eko paññāvimutto nāma hoti, eko cetovimuttoti ettha kiṃ kāraṇanti pucchati.
இந்த்³ரியவேமத்ததங் வதா³மீதி இந்த்³ரியனானத்ததங் வதா³மி. இத³ங் வுத்தங் ஹோதி, ந த்வங், ஆனந்த³, த³ஸ பாரமியோ பூரெத்வா ஸப்³ப³ஞ்ஞுதங் படிவிஜ்ஜி², தேன தே ஏதங் அபாகடங். அஹங் பன படிவிஜ்ஜி²ங், தேன மே ஏதங் பாகடங். எத்த² ஹி இந்த்³ரியனானத்ததா காரணங். ஸமத²வஸேனேவ ஹி க³ச்ச²ந்தேஸு ஏகஸ்ஸ பி⁴க்கு²னோ சித்தேகக்³க³தா து⁴ரங் ஹோதி, ஸோ சேதோவிமுத்தோ நாம ஹோதி. ஏகஸ்ஸ பஞ்ஞா து⁴ரங் ஹோதி, ஸோ பஞ்ஞாவிமுத்தோ நாம ஹோதி. விபஸ்ஸனாவஸேனேவ ச க³ச்ச²ந்தேஸு ஏகஸ்ஸ பஞ்ஞா து⁴ரங் ஹோதி, ஸோ பஞ்ஞாவிமுத்தோ நாம ஹோதி. ஏகஸ்ஸ சித்தேகக்³க³தா து⁴ரங் ஹோதி, ஸோ சேதோவிமுத்தோ நாம ஹோதி. த்³வே அக்³க³ஸாவகா ஸமத²விபஸ்ஸனாது⁴ரேன அரஹத்தங் பத்தா. தேஸு த⁴ம்மஸேனாபதி பஞ்ஞாவிமுத்தோ ஜாதோ, மஹாமொக்³க³ல்லானத்தே²ரோ சேதோவிமுத்தோ. இதி இந்த்³ரியவேமத்தமெத்த² காரணந்தி வேதி³தப்³ப³ங். ஸேஸங் ஸப்³ப³த்த² உத்தானமேவாதி.
Indriyavemattataṃ vadāmīti indriyanānattataṃ vadāmi. Idaṃ vuttaṃ hoti, na tvaṃ, ānanda, dasa pāramiyo pūretvā sabbaññutaṃ paṭivijjhi, tena te etaṃ apākaṭaṃ. Ahaṃ pana paṭivijjhiṃ, tena me etaṃ pākaṭaṃ. Ettha hi indriyanānattatā kāraṇaṃ. Samathavaseneva hi gacchantesu ekassa bhikkhuno cittekaggatā dhuraṃ hoti, so cetovimutto nāma hoti. Ekassa paññā dhuraṃ hoti, so paññāvimutto nāma hoti. Vipassanāvaseneva ca gacchantesu ekassa paññā dhuraṃ hoti, so paññāvimutto nāma hoti. Ekassa cittekaggatā dhuraṃ hoti, so cetovimutto nāma hoti. Dve aggasāvakā samathavipassanādhurena arahattaṃ pattā. Tesu dhammasenāpati paññāvimutto jāto, mahāmoggallānatthero cetovimutto. Iti indriyavemattamettha kāraṇanti veditabbaṃ. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாமாலுக்யஸுத்தவண்ணனா நிட்டி²தா.
Mahāmālukyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. மஹாமாலுக்யஸுத்தங் • 4. Mahāmālukyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. மஹாமாலுக்யஸுத்தவண்ணனா • 4. Mahāmālukyasuttavaṇṇanā
