| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. மஹாமொக்³க³ல்லானஸுத்தங்
7. Mahāmoggallānasuttaṃ
167. அத² கோ² ஆயஸ்மா ஸாரிபுத்தோ யேனாயஸ்மா மஹாமொக்³க³ல்லானோ தேனுபஸங்கமி; உபஸங்கமித்வா ஆயஸ்மதா மஹாமொக்³க³ல்லானேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ . ஏகமந்தங் நிஸின்னோ கோ² ஆயஸ்மா ஸாரிபுத்தோ ஆயஸ்மந்தங் மஹாமொக்³க³ல்லானங் ஏதத³வோச –
167. Atha kho āyasmā sāriputto yenāyasmā mahāmoggallāno tenupasaṅkami; upasaṅkamitvā āyasmatā mahāmoggallānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi . Ekamantaṃ nisinno kho āyasmā sāriputto āyasmantaṃ mahāmoggallānaṃ etadavoca –
‘‘சதஸ்ஸோ இமா, ஆவுஸோ மொக்³க³ல்லான, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³ . இமாஸங், ஆவுஸோ, சதுன்னங் படிபதா³னங் 1 கதமங் தே படிபத³ங் ஆக³ம்ம அனுபாதா³ய ஆஸவேஹி சித்தங் விமுத்த’’ந்தி?
‘‘Catasso imā, āvuso moggallāna, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā . Imāsaṃ, āvuso, catunnaṃ paṭipadānaṃ 2 katamaṃ te paṭipadaṃ āgamma anupādāya āsavehi cittaṃ vimutta’’nti?
‘‘சதஸ்ஸோ இமா, ஆவுஸோ ஸாரிபுத்த, படிபதா³. கதமா சதஸ்ஸோ? து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா. இமா கோ², ஆவுஸோ, சதஸ்ஸோ படிபதா³ . இமாஸங், ஆவுஸோ, சதுன்னங் படிபதா³னங் யாயங் படிபதா³ து³க்கா² கி²ப்பாபி⁴ஞ்ஞா, இமங் மே படிபத³ங் ஆக³ம்ம அனுபாதா³ய ஆஸவேஹி சித்தங் விமுத்த’’ந்தி. ஸத்தமங்.
‘‘Catasso imā, āvuso sāriputta, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā. Imā kho, āvuso, catasso paṭipadā . Imāsaṃ, āvuso, catunnaṃ paṭipadānaṃ yāyaṃ paṭipadā dukkhā khippābhiññā, imaṃ me paṭipadaṃ āgamma anupādāya āsavehi cittaṃ vimutta’’nti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. மஹாமொக்³க³ல்லானஸுத்தவண்ணனா • 7. Mahāmoggallānasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-8. மஹாமொக்³க³ல்லானஸுத்தாதி³வண்ணனா • 7-8. Mahāmoggallānasuttādivaṇṇanā
