| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
5. மஹாமொக்³க³ல்லானஸுத்தவண்ணனா
5. Mahāmoggallānasuttavaṇṇanā
25. பஞ்சமே காயக³தாய ஸதியாதி காயானுபஸ்ஸனாவஸேன காயே க³தாய காயாரம்மணாய ஸதியா, இத்த²ம்பூ⁴தலக்க²ணே இத³ங் கரணவசனங் . அஜ்ஜ²த்தந்தி இத⁴ அஜ்ஜ²த்தங் நாம நியகஜ்ஜ²த்தங், தஸ்மா அத்தனி அத்தஸந்தானேதி அத்தோ². அத² வா யஸ்மா கம்மட்டா²னபூ⁴தோ கேஸாதி³கோ த்³வத்திங்ஸகொட்டா²ஸஸமுதா³யோ இத⁴ காயோதி அதி⁴ப்பேதோ, தஸ்மா அஜ்ஜ²த்தந்தி பத³ஸ்ஸ கோ³சரஜ்ஜ²த்தந்தி அத்தோ² வேதி³தப்³போ³. ஸூபட்டி²தாயாதி நியகஜ்ஜ²த்தபூ⁴தே கோ³சரஜ்ஜ²த்தபூ⁴தே வா காயே ஸுட்டு² உபட்டி²தாய. கா பனாயங் ஸதி, யா ‘‘அஜ்ஜ²த்தங் ஸூபட்டி²தா’’தி வுத்தா? ய்வாயங் ப⁴க³வதா ‘‘அத்தி² இமஸ்மிங் காயே கேஸா லோமா’’திஆதி³னா (தீ³॰ நி॰ 2.377; ம॰ நி॰ 1.110; கு²॰ பா॰ 3.த்³வத்திங்ஸாகார) அஜ்ஜ²த்தகேஸாதி³கோ த்³வத்திங்ஸாகாரோ காயோ வுத்தோ, தத்த² யா படிகூலமனஸிகாரங் பவத்தெந்தஸ்ஸ உபசாரப்பனாவஸேன காயே உபட்டி²தா ஸதி, ஸா ‘‘காயக³தா ஸதீ’’தி வுச்சதி. யதா² சாயங், ஏவங் ஆனாபானசதுஇரியாபத²ஸதிஸம்பஜஞ்ஞானங் வஸேன உத்³து⁴மாதகவினீலகாதி³வஸேன ச மனஸிகாரங் பவத்தெந்தஸ்ஸ யதா²ரஹங் உபசாரப்பனாவஸேன காயே உபட்டி²தா ஸதி ‘‘காயக³தா ஸதீ’’தி வுச்சதி. இத⁴ பன அஜ்ஜ²த்தங் காயக³தா ஸதி பத²வீஆதி³கா சதஸ்ஸோ தா⁴துயோ ஸஸம்பா⁴ரஸங்கே²பாதீ³ஸு சதூஸு யேன கேனசி ஏகேனாகாரேன வவத்த²பெத்வா தேஸங் அனிச்சாதி³லக்க²ணஸல்லக்க²ணவஸேன உபட்டி²தா விபஸ்ஸனாஸம்பயுத்தா ஸதி ‘‘காயக³தா ஸதீ’’தி அதி⁴ப்பேதா. தே²ரோ பன ததா² விபஸ்ஸித்வா அத்தனோ ப²லஸமாபத்திமேவ ஸமாபஜ்ஜித்வா நிஸீதி³. இதா⁴பி கா³தா²ய ஏவங் இமஸ்ஸ அத்த²ஸ்ஸ விஞ்ஞாதப்³ப³தா ‘‘ந சாயங் நிஸஜ்ஜா’’திஆதி³னா வுத்தனயானுஸாரேன யோஜேதப்³பா³.
25. Pañcame kāyagatāya satiyāti kāyānupassanāvasena kāye gatāya kāyārammaṇāya satiyā, itthambhūtalakkhaṇe idaṃ karaṇavacanaṃ . Ajjhattanti idha ajjhattaṃ nāma niyakajjhattaṃ, tasmā attani attasantāneti attho. Atha vā yasmā kammaṭṭhānabhūto kesādiko dvattiṃsakoṭṭhāsasamudāyo idha kāyoti adhippeto, tasmā ajjhattanti padassa gocarajjhattanti attho veditabbo. Sūpaṭṭhitāyāti niyakajjhattabhūte gocarajjhattabhūte vā kāye suṭṭhu upaṭṭhitāya. Kā panāyaṃ sati, yā ‘‘ajjhattaṃ sūpaṭṭhitā’’ti vuttā? Yvāyaṃ bhagavatā ‘‘atthi imasmiṃ kāye kesā lomā’’tiādinā (dī. ni. 2.377; ma. ni. 1.110; khu. pā. 3.dvattiṃsākāra) ajjhattakesādiko dvattiṃsākāro kāyo vutto, tattha yā paṭikūlamanasikāraṃ pavattentassa upacārappanāvasena kāye upaṭṭhitā sati, sā ‘‘kāyagatā satī’’ti vuccati. Yathā cāyaṃ, evaṃ ānāpānacatuiriyāpathasatisampajaññānaṃ vasena uddhumātakavinīlakādivasena ca manasikāraṃ pavattentassa yathārahaṃ upacārappanāvasena kāye upaṭṭhitā sati ‘‘kāyagatā satī’’ti vuccati. Idha pana ajjhattaṃ kāyagatā sati pathavīādikā catasso dhātuyo sasambhārasaṅkhepādīsu catūsu yena kenaci ekenākārena vavatthapetvā tesaṃ aniccādilakkhaṇasallakkhaṇavasena upaṭṭhitā vipassanāsampayuttā sati ‘‘kāyagatā satī’’ti adhippetā. Thero pana tathā vipassitvā attano phalasamāpattimeva samāpajjitvā nisīdi. Idhāpi gāthāya evaṃ imassa atthassa viññātabbatā ‘‘na cāyaṃ nisajjā’’tiādinā vuttanayānusārena yojetabbā.
ஏதமத்த²ந்தி ஏதங் தே²ரஸ்ஸ சதுதா⁴துவவத்தா²னமுகே²ன காயானுபஸ்ஸனாஸதிபட்டா²னேன விபஸ்ஸனங் ஓகா³ஹெத்வா ப²லஸமாபத்திஸமாபஜ்ஜனஸங்கா²தங் அத்த²ங் விதி³த்வா. இமங் உதா³னந்தி இமங் ஸதிபட்டா²னபா⁴வனாய நிப்³பா³னாதி⁴க³மதீ³பகங் உதா³னங் உதா³னேஸி.
Etamatthanti etaṃ therassa catudhātuvavatthānamukhena kāyānupassanāsatipaṭṭhānena vipassanaṃ ogāhetvā phalasamāpattisamāpajjanasaṅkhātaṃ atthaṃ viditvā. Imaṃ udānanti imaṃ satipaṭṭhānabhāvanāya nibbānādhigamadīpakaṃ udānaṃ udānesi.
தத்த² ஸதி காயக³தா உபட்டி²தாதி புப்³பே³ வுத்தலக்க²ணா ஸதி ஸத்³தா⁴புப்³ப³ங்க³மானங் ஸமாதி⁴வீரியபஞ்ஞானங் யதா²ஸகங் கிச்சனிப்பா²த³னேன ஸஹாயபா⁴வங் ஆபன்னத்தா பஹீனப்படிபக்கா² ததோ ஏவ திக்க²விஸத³பூ⁴தா ச யதா²வுத்தகாயஸங்வரணவஸேன ஏகத்த²ஸமோஸரணவஸேன ச அவிபரீதஸபா⁴வங் ஸல்லக்கெ²ந்தீ உபக³ந்த்வா டி²தா ஹோதி, ஏதேன காயஸங்கா²தானங் சதுன்னங் தா⁴தூனங் தன்னிஸ்ஸிதானஞ்ச உபாதா³ரூபானங் ஸல்லக்க²ணவஸேன, பச்சயே வவத்த²பெத்வா ததோ பரங் தேஸங் அனிச்சாதி³லக்க²ணஸல்லக்க²ணவஸேன ச பவத்தங் ஞாணபரம்பராக³தங் ஸதிங் த³ஸ்ஸேதி, ஸதிஸீஸேன வா தங்ஸம்பயுத்தங் பரிஞ்ஞாத்தயபரியாபன்னஞாணபரம்பரமேவ த³ஸ்ஸேதி. ச²ஸு ப²ஸ்ஸாயதனேஸு ஸங்வுதோதி யதா²வுத்தாய காயே உபட்டி²தாய ஸதியா ஸமன்னாக³தோ சக்கா²தீ³ஸு ப²ஸ்ஸஸ்ஸ காரணபூ⁴தேஸு ச²ஸு த்³வாரேஸு காயானுபஸ்ஸனாய அபா⁴விதாய உப்பஜ்ஜனாரஹானங் அபி⁴ஜ்ஜா²தீ³னங் தஸ்ஸா பா⁴விதத்தா ஞாணப்பவத்திங் படிவேதெ⁴ந்தோ தே பித³ஹந்தோ ‘‘தத்த² ஸங்வுதோ’’தி வுச்சதி, ஏதேன ஞாணஸங்வரங் த³ஸ்ஸேதி.
Tattha sati kāyagatā upaṭṭhitāti pubbe vuttalakkhaṇā sati saddhāpubbaṅgamānaṃ samādhivīriyapaññānaṃ yathāsakaṃ kiccanipphādanena sahāyabhāvaṃ āpannattā pahīnappaṭipakkhā tato eva tikkhavisadabhūtā ca yathāvuttakāyasaṃvaraṇavasena ekatthasamosaraṇavasena ca aviparītasabhāvaṃ sallakkhentī upagantvā ṭhitā hoti, etena kāyasaṅkhātānaṃ catunnaṃ dhātūnaṃ tannissitānañca upādārūpānaṃ sallakkhaṇavasena, paccaye vavatthapetvā tato paraṃ tesaṃ aniccādilakkhaṇasallakkhaṇavasena ca pavattaṃ ñāṇaparamparāgataṃ satiṃ dasseti, satisīsena vā taṃsampayuttaṃ pariññāttayapariyāpannañāṇaparamparameva dasseti. Chasu phassāyatanesu saṃvutoti yathāvuttāya kāye upaṭṭhitāya satiyā samannāgato cakkhādīsu phassassa kāraṇabhūtesu chasu dvāresu kāyānupassanāya abhāvitāya uppajjanārahānaṃ abhijjhādīnaṃ tassā bhāvitattā ñāṇappavattiṃ paṭivedhento te pidahanto ‘‘tattha saṃvuto’’ti vuccati, etena ñāṇasaṃvaraṃ dasseti.
ஸததங் பி⁴க்கு² ஸமாஹிதோதி ஸோ பி⁴க்கு² ஏவங் உபட்டி²தஸ்ஸதி ஸப்³ப³த்த² ச ஸங்வுதோ புது²த்தாரம்மணே சித்தங் அவிஸ்ஸஜ்ஜெத்வா அனிச்சாதி³வஸேன ஸம்மஸந்தோ விபஸ்ஸனங் உஸ்ஸுக்காபெத்வா ஞாணே திக்கே² ஸூரே வஹந்தே விபஸ்ஸனாஸமாதி⁴னா தாவ ஸததங் நிரந்தரங் ஸமாஹிதோ அனுலோமஞாணானந்தரங் கொ³த்ரபு⁴ஞாணோத³யதோ பட்டா²ய. ஜஞ்ஞா நிப்³பா³னமத்தனோதி அஞ்ஞேஸங் புது²ஜ்ஜனானங் ஸுபினந்தேபி அகோ³சரபா⁴வதோ, அரியானங் பன தஸ்ஸ தஸ்ஸேவ ஆவேணிகத்தா அத்தஸதி³ஸத்தா ச ‘‘அத்தா’’தி லத்³த⁴வோஹாரஸ்ஸ மக்³க³ப²லஞாணஸ்ஸ ஸாதிஸயவிஸயபா⁴வதோ ஏகந்தஸுகா²வஹங் நிப்³பா³னங் அஸங்க²ததா⁴து ‘‘அத்தனோ’’தி வுத்தங், தங் நிப்³பா³னங் ஜஞ்ஞா ஜானெய்ய, மக்³க³ப²லஞாணேஹி படிவிஜ்ஜெ²ய்ய, ஸச்சி²கரெய்யாதி அத்தோ². ஏதேன அரியானங் நிப்³பா³னே அதி⁴முத்ததங் த³ஸ்ஸேதி. அரியா ஹி அதி⁴சித்தப்பவத்திகாலேபி ஏகந்தேனேவ நிப்³பா³னே நின்னபோணபப்³பா⁴ரபா⁴வேன விஹரந்தி. எத்த² ச யஸ்ஸ ஸதி காயக³தா உபட்டி²தா, ஸோ பி⁴க்கு² ச²ஸு ப²ஸ்ஸாயதனேஸு ஸங்வுதோ, ததோ ஏவ ஸததங் ஸமாஹிதோ அத்தபச்சக்க²கரணேன நிப்³பா³னங் அத்தனோ ஜானெய்யாதி ஏவங் கா³தா²பதா³னங் ஸம்ப³ந்தோ⁴ வேதி³தப்³போ³. ஏவங் காயானுபஸ்ஸனாஸதிபட்டா²னமுகே²ன யாவ அரஹத்தா ஏகஸ்ஸ பி⁴க்கு²னோ நிய்யானமக்³க³ங் த³ஸ்ஸேதி த⁴ம்மராஜா.
Satataṃ bhikkhu samāhitoti so bhikkhu evaṃ upaṭṭhitassati sabbattha ca saṃvuto puthuttārammaṇe cittaṃ avissajjetvā aniccādivasena sammasanto vipassanaṃ ussukkāpetvā ñāṇe tikkhe sūre vahante vipassanāsamādhinā tāva satataṃ nirantaraṃ samāhito anulomañāṇānantaraṃ gotrabhuñāṇodayato paṭṭhāya. Jaññā nibbānamattanoti aññesaṃ puthujjanānaṃ supinantepi agocarabhāvato, ariyānaṃ pana tassa tasseva āveṇikattā attasadisattā ca ‘‘attā’’ti laddhavohārassa maggaphalañāṇassa sātisayavisayabhāvato ekantasukhāvahaṃ nibbānaṃ asaṅkhatadhātu ‘‘attano’’ti vuttaṃ, taṃ nibbānaṃ jaññā jāneyya, maggaphalañāṇehi paṭivijjheyya, sacchikareyyāti attho. Etena ariyānaṃ nibbāne adhimuttataṃ dasseti. Ariyā hi adhicittappavattikālepi ekanteneva nibbāne ninnapoṇapabbhārabhāvena viharanti. Ettha ca yassa sati kāyagatā upaṭṭhitā, so bhikkhu chasu phassāyatanesu saṃvuto, tato eva satataṃ samāhito attapaccakkhakaraṇena nibbānaṃ attano jāneyyāti evaṃ gāthāpadānaṃ sambandho veditabbo. Evaṃ kāyānupassanāsatipaṭṭhānamukhena yāva arahattā ekassa bhikkhuno niyyānamaggaṃ dasseti dhammarājā.
அபரோ நயோ – ஸதி காயக³தா உபட்டி²தாதி ஏதேன காயானுபஸ்ஸனாஸதிபட்டா²னங் த³ஸ்ஸேதி. ச²ஸு ப²ஸ்ஸாயதனேஸு ஸங்வுதோதி ப²ஸ்ஸோ ஆயதனங் காரணங் ஏதேஸந்தி ப²ஸ்ஸாயதனானி, தேஸு ப²ஸ்ஸாயதனேஸு. ப²ஸ்ஸஹேதுகேஸு ப²ஸ்ஸபச்சயா நிப்³ப³த்தேஸு ச²ஸு சக்கு²ஸம்ப²ஸ்ஸஜாதி³வேத³யிதேஸு தண்ஹாதீ³னங் அப்பவத்தியா ஸங்வுதோ, ஏதேன வேத³னானுபஸ்ஸனாஸதிபட்டா²னங் த³ஸ்ஸேதி. ஸததங் பி⁴க்கு² ஸமாஹிதோதி ஸததங் நிச்சகாலங் நிரந்தரங் விக்கே²பாபா⁴வதோ ஸமாஹிதோ பி⁴க்கு². ஸோ சாயங் அவிக்கே²போ ஸப்³ப³ஸோ ஸதிபட்டா²னபா⁴வனாய மத்த²கப்பத்தாய ஹோதி. ஸம்மஸந்தோ ஹி அதீதாதி³பே⁴த³பி⁴ன்னேஸு பஞ்சுபாதா³னக்க²ந்தே⁴ஸு அனவஸேஸதோவ பரிக்³க³ஹெத்வா ஸம்மஸதீதி. ஏதேன ஸேஸஸதிபட்டா²னே த³ஸ்ஸேதி. ஜஞ்ஞா நிப்³பா³னமத்தனோதி ஏவங் சதுஸதிபட்டா²னபா⁴வனங் மத்த²கங் பாபெத்வா டி²தோ பி⁴ன்னகிலேஸோ பி⁴க்கு² அத்தனோ கிலேஸனிப்³பா³னங் பச்சவெக்க²ணஞாணேன ஸயமேவ ஜானெய்யாதி அத்தோ².
Aparo nayo – sati kāyagatā upaṭṭhitāti etena kāyānupassanāsatipaṭṭhānaṃ dasseti. Chasu phassāyatanesu saṃvutoti phasso āyatanaṃ kāraṇaṃ etesanti phassāyatanāni, tesu phassāyatanesu. Phassahetukesu phassapaccayā nibbattesu chasu cakkhusamphassajādivedayitesu taṇhādīnaṃ appavattiyā saṃvuto, etena vedanānupassanāsatipaṭṭhānaṃ dasseti. Satataṃ bhikkhu samāhitoti satataṃ niccakālaṃ nirantaraṃ vikkhepābhāvato samāhito bhikkhu. So cāyaṃ avikkhepo sabbaso satipaṭṭhānabhāvanāya matthakappattāya hoti. Sammasanto hi atītādibhedabhinnesu pañcupādānakkhandhesu anavasesatova pariggahetvā sammasatīti. Etena sesasatipaṭṭhāne dasseti. Jaññā nibbānamattanoti evaṃ catusatipaṭṭhānabhāvanaṃ matthakaṃ pāpetvā ṭhito bhinnakileso bhikkhu attano kilesanibbānaṃ paccavekkhaṇañāṇena sayameva jāneyyāti attho.
அத² வா ஸதி காயக³தா உபட்டி²தாதி அத்தனோ பரேஸஞ்ச காயஸ்ஸ யதா²ஸபா⁴வபரிஞ்ஞாதீ³பனேன தே²ரஸ்ஸ ஸதிவேபுல்லப்பத்தி தீ³பிதா. ச²ஸு ப²ஸ்ஸாயதனேஸு ஸங்வுதோதி சக்கா²தீ³ஸு ச²ஸு த்³வாரேஸு அச்சந்தஸங்வரதீ³பனேன ஸததவிஹாரிவஸேன தே²ரஸ்ஸ ஸம்பஜஞ்ஞப்பகாஸினீ பஞ்ஞாவேபுல்லப்பத்தி தீ³பிதா. ஸததங் பி⁴க்கு² ஸமாஹிதோதி ஸமாபத்திப³ஹுலதாத³ஸ்ஸனேன நவானுபுப்³ப³விஹாரஸமாபத்தியோ த³ஸ்ஸிதா. ஏவங்பூ⁴தோ பன பி⁴க்கு² ஜஞ்ஞா நிப்³பா³னமத்தனோதி கதகிச்சத்தா உத்தரி கரணீயாபா⁴வதோ கேவலங் அத்தனோ அனுபாதி³ஸேஸனிப்³பா³னமேவ ஜானெய்ய சிந்தெய்ய, அஞ்ஞம்பி தஸ்ஸ சிந்தேதப்³ப³ங் நத்தீ²தி அதி⁴ப்பாயோ.
Atha vā sati kāyagatā upaṭṭhitāti attano paresañca kāyassa yathāsabhāvapariññādīpanena therassa sativepullappatti dīpitā. Chasu phassāyatanesu saṃvutoti cakkhādīsu chasu dvāresu accantasaṃvaradīpanena satatavihārivasena therassa sampajaññappakāsinī paññāvepullappatti dīpitā. Satataṃ bhikkhu samāhitoti samāpattibahulatādassanena navānupubbavihārasamāpattiyo dassitā. Evaṃbhūto pana bhikkhu jaññā nibbānamattanoti katakiccattā uttari karaṇīyābhāvato kevalaṃ attano anupādisesanibbānameva jāneyya cinteyya, aññampi tassa cintetabbaṃ natthīti adhippāyo.
பஞ்சமஸுத்தவண்ணனா நிட்டி²தா.
Pañcamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 5. மஹாமொக்³க³ல்லானஸுத்தங் • 5. Mahāmoggallānasuttaṃ
