| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. மஹானாமஸக்கஸுத்தங்
3. Mahānāmasakkasuttaṃ
74. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. தேன கோ² பன ஸமயேன ப⁴க³வா கி³லானாவுட்டி²தோ 1 ஹோதி அசிரவுட்டி²தோ கே³லஞ்ஞா. அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² மஹானாமோ ஸக்கோ ப⁴க³வந்தங் ஏதத³வோச – ‘‘தீ³க⁴ரத்தாஹங், ப⁴ந்தே, ப⁴க³வதா ஏவங் த⁴ம்மங் தே³ஸிதங் ஆஜானாமி – ‘ஸமாஹிதஸ்ஸ ஞாணங், நோ அஸமாஹிதஸ்ஸா’தி. ஸமாதி⁴ நு கோ², ப⁴ந்தே, புப்³பே³, பச்சா² ஞாணங்; உதா³ஹு ஞாணங் புப்³பே³, பச்சா² ஸமாதீ⁴’’தி? அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வா கோ² கி³லானவுட்டி²தோ அசிரவுட்டி²தோ கே³லஞ்ஞா . அயஞ்ச மஹானாமோ ஸக்கோ ப⁴க³வந்தங் அதிக³ம்பீ⁴ரங் பஞ்ஹங் புச்ச²தி. யங்னூனாஹங் மஹானாமங் ஸக்கங் ஏகமந்தங் அபனெத்வா த⁴ம்மங் தே³ஸெய்ய’’ந்தி.
74. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ nigrodhārāme. Tena kho pana samayena bhagavā gilānāvuṭṭhito 2 hoti aciravuṭṭhito gelaññā. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘dīgharattāhaṃ, bhante, bhagavatā evaṃ dhammaṃ desitaṃ ājānāmi – ‘samāhitassa ñāṇaṃ, no asamāhitassā’ti. Samādhi nu kho, bhante, pubbe, pacchā ñāṇaṃ; udāhu ñāṇaṃ pubbe, pacchā samādhī’’ti? Atha kho āyasmato ānandassa etadahosi – ‘‘bhagavā kho gilānavuṭṭhito aciravuṭṭhito gelaññā . Ayañca mahānāmo sakko bhagavantaṃ atigambhīraṃ pañhaṃ pucchati. Yaṃnūnāhaṃ mahānāmaṃ sakkaṃ ekamantaṃ apanetvā dhammaṃ deseyya’’nti.
அத² கோ² ஆயஸ்மா ஆனந்தோ³ மஹானாமங் ஸக்கங் பா³ஹாயங் க³ஹெத்வா ஏகமந்தங் அபனெத்வா மஹானாமங் ஸக்கங் ஏதத³வோச – ‘‘ஸேக²ம்பி கோ², மஹானாம, ஸீலங் வுத்தங் ப⁴க³வதா, அஸேக²ம்பி ஸீலங் வுத்தங் ப⁴க³வதா; ஸேகோ²பி ஸமாதி⁴ வுத்தோ ப⁴க³வதா , அஸேகோ²பி ஸமாதி⁴ வுத்தோ ப⁴க³வதா; ஸேகா²பி பஞ்ஞா வுத்தா ப⁴க³வதா, அஸேகா²பி பஞ்ஞா வுத்தா ப⁴க³வதா. கதமஞ்ச, மஹானாம , ஸேக²ங் ஸீலங்? இத⁴, மஹானாம, பி⁴க்கு² ஸீலவா ஹோதி பாதிமொக்க²ஸங்வரஸங்வுதோ விஹரதி…பே॰… ஸமாதா³ய ஸிக்க²தி ஸிக்கா²பதே³ஸு. இத³ங் வுச்சதி, மஹானாம, ஸேக²ங் ஸீலங்’’.
Atha kho āyasmā ānando mahānāmaṃ sakkaṃ bāhāyaṃ gahetvā ekamantaṃ apanetvā mahānāmaṃ sakkaṃ etadavoca – ‘‘sekhampi kho, mahānāma, sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā , asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā. Katamañca, mahānāma , sekhaṃ sīlaṃ? Idha, mahānāma, bhikkhu sīlavā hoti pātimokkhasaṃvarasaṃvuto viharati…pe… samādāya sikkhati sikkhāpadesu. Idaṃ vuccati, mahānāma, sekhaṃ sīlaṃ’’.
‘‘கதமோ ச, மஹானாம, ஸேகோ² ஸமாதி⁴? இத⁴, மஹானாம, பி⁴க்கு² விவிச்சேவ காமேஹி…பே॰… சதுத்த²ங் ஜா²னங் உபஸம்பஜ்ஜ விஹரதி. அயங் வுச்சதி, மஹானாம, ஸேகோ² ஸமாதி⁴.
‘‘Katamo ca, mahānāma, sekho samādhi? Idha, mahānāma, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, mahānāma, sekho samādhi.
‘‘கதமா ச, மஹானாம, ஸேகா² பஞ்ஞா? இத⁴, மஹானாம, பி⁴க்கு² இத³ங் து³க்க²ந்தி யதா²பூ⁴தங் பஜானாதி…பே॰… அயங் து³க்க²னிரோத⁴கா³மினீ படிபதா³தி யதா²பூ⁴தங் பஜானாதி. அயங் வுச்சதி, மஹானாம, ஸேகா² பஞ்ஞா.
‘‘Katamā ca, mahānāma, sekhā paññā? Idha, mahānāma, bhikkhu idaṃ dukkhanti yathābhūtaṃ pajānāti…pe… ayaṃ dukkhanirodhagāminī paṭipadāti yathābhūtaṃ pajānāti. Ayaṃ vuccati, mahānāma, sekhā paññā.
‘‘ஸ கோ² ஸோ, மஹானாம, அரியஸாவகோ ஏவங் ஸீலஸம்பன்னோ ஏவங் ஸமாதி⁴ஸம்பன்னோ ஏவங் பஞ்ஞாஸம்பன்னோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவங் கோ², மஹானாம, ஸேக²ம்பி ஸீலங் வுத்தங் ப⁴க³வதா, அஸேக²ம்பி ஸீலங் வுத்தங் ப⁴க³வதா; ஸேகோ²பி ஸமாதி⁴ வுத்தோ ப⁴க³வதா, அஸேகோ²பி ஸமாதி⁴ வுத்தோ ப⁴க³வதா; ஸேகா²பி பஞ்ஞா வுத்தா ப⁴க³வதா, அஸேகா²பி பஞ்ஞா வுத்தா ப⁴க³வதா’’தி. ததியங்.
‘‘Sa kho so, mahānāma, ariyasāvako evaṃ sīlasampanno evaṃ samādhisampanno evaṃ paññāsampanno āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, mahānāma, sekhampi sīlaṃ vuttaṃ bhagavatā, asekhampi sīlaṃ vuttaṃ bhagavatā; sekhopi samādhi vutto bhagavatā, asekhopi samādhi vutto bhagavatā; sekhāpi paññā vuttā bhagavatā, asekhāpi paññā vuttā bhagavatā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. மஹானாமஸக்கஸுத்தவண்ணனா • 3. Mahānāmasakkasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. மஹானாமஸக்கஸுத்தவண்ணனா • 3. Mahānāmasakkasuttavaṇṇanā
