| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
5. மஹானாமஸுத்தங்
5. Mahānāmasuttaṃ
25. ஏகங் ஸமயங் ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² மஹானாமோ ஸக்கோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² மஹானாமோ ஸக்கோ ப⁴க³வந்தங் ஏதத³வோச – ‘‘கித்தாவதா நு கோ², ப⁴ந்தே, உபாஸகோ ஹோதீ’’தி? ‘‘யதோ கோ², மஹானாம, பு³த்³த⁴ங் ஸரணங் க³தோ ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி; எத்தாவதா கோ², மஹானாம, உபாஸகோ ஹோதீ’’தி.
25. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘kittāvatā nu kho, bhante, upāsako hotī’’ti? ‘‘Yato kho, mahānāma, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ettāvatā kho, mahānāma, upāsako hotī’’ti.
‘‘கித்தாவதா பன, ப⁴ந்தே, உபாஸகோ ஸீலவா ஹோதீ’’தி? ‘‘யதோ கோ², மஹானாம , உபாஸகோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி; எத்தாவதா கோ², மஹானாம, உபாஸகோ ஸீலவா ஹோதீ’’தி.
‘‘Kittāvatā pana, bhante, upāsako sīlavā hotī’’ti? ‘‘Yato kho, mahānāma , upāsako pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjapamādaṭṭhānā paṭivirato hoti; ettāvatā kho, mahānāma, upāsako sīlavā hotī’’ti.
‘‘கித்தாவதா பன, ப⁴ந்தே, உபாஸகோ அத்தஹிதாய படிபன்னோ ஹோதி, நோ பரஹிதாயா’’தி? ‘‘யதோ கோ², மஹானாம, உபாஸகோ அத்தனாவ ஸத்³தா⁴ஸம்பன்னோ ஹோதி, நோ பரங் ஸத்³தா⁴ஸம்பதா³ய ஸமாத³பேதி 1; அத்தனாவ ஸீலஸம்பன்னோ ஹோதி, நோ பரங் ஸீலஸம்பதா³ய ஸமாத³பேதி; அத்தனாவ சாக³ஸம்பன்னோ ஹோதி, நோ பரங் சாக³ஸம்பதா³ய ஸமாத³பேதி; அத்தனாவ பி⁴க்கூ²னங் த³ஸ்ஸனகாமோ ஹோதி, நோ பரங் பி⁴க்கூ²னங் த³ஸ்ஸனே ஸமாத³பேதி; அத்தனாவ ஸத்³த⁴ம்மங் ஸோதுகாமோ ஹோதி, நோ பரங் ஸத்³த⁴ம்மஸ்ஸவனே ஸமாத³பேதி; அத்தனாவ ஸுதானங் த⁴ம்மானங் தா⁴ரணஜாதிகோ ஹோதி, நோ பரங் த⁴ம்மதா⁴ரணாய ஸமாத³பேதி; அத்தனாவ ஸுதானங் த⁴ம்மானங் அத்தூ²பபரிக்கி²தா ஹோதி, நோ பரங் அத்தூ²பபரிக்கா²ய ஸமாத³பேதி; அத்தனாவ அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி, நோ பரங் த⁴ம்மானுத⁴ம்மப்படிபத்தியா ஸமாத³பேதி. எத்தாவதா கோ², மஹானாம, உபாஸகோ அத்தஹிதாய படிபன்னோ ஹோதி, நோ பரஹிதாயா’’தி.
‘‘Kittāvatā pana, bhante, upāsako attahitāya paṭipanno hoti, no parahitāyā’’ti? ‘‘Yato kho, mahānāma, upāsako attanāva saddhāsampanno hoti, no paraṃ saddhāsampadāya samādapeti 2; attanāva sīlasampanno hoti, no paraṃ sīlasampadāya samādapeti; attanāva cāgasampanno hoti, no paraṃ cāgasampadāya samādapeti; attanāva bhikkhūnaṃ dassanakāmo hoti, no paraṃ bhikkhūnaṃ dassane samādapeti; attanāva saddhammaṃ sotukāmo hoti, no paraṃ saddhammassavane samādapeti; attanāva sutānaṃ dhammānaṃ dhāraṇajātiko hoti, no paraṃ dhammadhāraṇāya samādapeti; attanāva sutānaṃ dhammānaṃ atthūpaparikkhitā hoti, no paraṃ atthūpaparikkhāya samādapeti; attanāva atthamaññāya dhammamaññāya dhammānudhammappaṭipanno hoti, no paraṃ dhammānudhammappaṭipattiyā samādapeti. Ettāvatā kho, mahānāma, upāsako attahitāya paṭipanno hoti, no parahitāyā’’ti.
‘‘கித்தாவதா பன, ப⁴ந்தே, உபாஸகோ அத்தஹிதாய ச படிபன்னோ ஹோதி பரஹிதாய சா’’தி? ‘‘யதோ கோ², மஹானாம, உபாஸகோ அத்தனா ச ஸத்³தா⁴ஸம்பன்னோ ஹோதி, பரஞ்ச ஸத்³தா⁴ஸம்பதா³ய ஸமாத³பேதி; அத்தனா ச ஸீலஸம்பன்னோ ஹோதி, பரஞ்ச ஸீலஸம்பதா³ய ஸமாத³பேதி; அத்தனா ச சாக³ஸம்பன்னோ ஹோதி, பரஞ்ச சாக³ஸம்பதா³ய ஸமாத³பேதி; அத்தனா ச பி⁴க்கூ²னங் த³ஸ்ஸனகாமோ ஹோதி, பரஞ்ச பி⁴க்கூ²னங் த³ஸ்ஸனே ஸமாத³பேதி; அத்தனா ச ஸத்³த⁴ம்மங் ஸோதுகாமோ ஹோதி, பரஞ்ச ஸத்³த⁴ம்மஸ்ஸவனே ஸமாத³பேதி; அத்தனா ச ஸுதானங் த⁴ம்மானங் தா⁴ரணஜாதிகோ ஹோதி, பரஞ்ச த⁴ம்மதா⁴ரணாய ஸமாத³பேதி; அத்தனா ச ஸுதானங் த⁴ம்மானங் அத்தூ²பபரிக்கி²தா ஹோதி, பரஞ்ச அத்தூ²பபரிக்கா²ய ஸமாத³பேதி, அத்தனா ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி, பரஞ்ச த⁴ம்மானுத⁴ம்மப்படிபத்தியா ஸமாத³பேதி. எத்தாவதா கோ², மஹானாம, உபாஸகோ அத்தஹிதாய ச படிபன்னோ ஹோதி பரஹிதாய சா’’தி. பஞ்சமங்.
‘‘Kittāvatā pana, bhante, upāsako attahitāya ca paṭipanno hoti parahitāya cā’’ti? ‘‘Yato kho, mahānāma, upāsako attanā ca saddhāsampanno hoti, parañca saddhāsampadāya samādapeti; attanā ca sīlasampanno hoti, parañca sīlasampadāya samādapeti; attanā ca cāgasampanno hoti, parañca cāgasampadāya samādapeti; attanā ca bhikkhūnaṃ dassanakāmo hoti, parañca bhikkhūnaṃ dassane samādapeti; attanā ca saddhammaṃ sotukāmo hoti, parañca saddhammassavane samādapeti; attanā ca sutānaṃ dhammānaṃ dhāraṇajātiko hoti, parañca dhammadhāraṇāya samādapeti; attanā ca sutānaṃ dhammānaṃ atthūpaparikkhitā hoti, parañca atthūpaparikkhāya samādapeti, attanā ca atthamaññāya dhammamaññāya dhammānudhammappaṭipanno hoti, parañca dhammānudhammappaṭipattiyā samādapeti. Ettāvatā kho, mahānāma, upāsako attahitāya ca paṭipanno hoti parahitāya cā’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-6. மஹானாமஸுத்தாதி³வண்ணனா • 5-6. Mahānāmasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. பட²மஉக்³க³ஸுத்தாதி³வண்ணனா • 1-7. Paṭhamauggasuttādivaṇṇanā
