| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. மஹாபுண்ணமஸுத்தவண்ணனா
9. Mahāpuṇṇamasuttavaṇṇanā
85. ஏவங் மே ஸுதந்தி மஹாபுண்ணமஸுத்தங். தத்த² தத³ஹூதி தஸ்மிங் அஹு, தஸ்மிங் தி³வஸேதி அத்தோ². உபவஸந்தி எத்தா²தி உபோஸதோ². உபவஸந்தீதி ஸீலேன வா அனஸனேன வா உபேதா ஹுத்வா வஸந்தீதி அத்தோ². அயங் பனெத்த² அத்து²த்³தா⁴ரோ – ‘‘ஆயாம, ஆவுஸோ, கப்பின, உபோஸத²ங் க³மிஸ்ஸாமா’’திஆதீ³ஸு ஹி பாதிமொக்கு²த்³தே³ஸோ உபோஸதோ². ‘‘அட்ட²ங்க³ஸமன்னாக³தோ கோ² விஸாகே² உபோஸதோ² உபவுத்தோ²’’திஆதீ³ஸு (அ॰ நி॰ 8.53) ஸீலங். ‘‘ஸுத்³த⁴ஸ்ஸ வே ஸதா³ ப²க்³கு³, ஸுத்³த⁴ஸ்ஸுபோஸதோ² ஸதா³’’திஆதீ³ஸு (ம॰ நி॰ 1.79) உபவாஸோ. ‘‘உபோஸதோ² நாம நாக³ராஜா’’திஆதீ³ஸு (தீ³॰ நி॰ 2.246) பஞ்ஞத்தி. ‘‘ந, பி⁴க்க²வே, தத³ஹுபோஸதே² ஸபி⁴க்கு²கா ஆவாஸா’’திஆதீ³ஸு (மஹாவ॰ 181) உபவஸிதப்³ப³தி³வஸோ. இதா⁴பி ஸோயேவ அதி⁴ப்பேதோ . ஸோ பனேஸ அட்ட²மீசாதுத்³த³ஸீபன்னரஸீபே⁴தே³ன திவிதோ⁴. தஸ்மா ஸேஸத்³வயனிவாரணத்த²ங் பன்னரஸேதி வுத்தங். தேன வுத்தங் ‘‘உபவஸந்தி எத்தா²தி உபோஸதோ²’’தி. மாஸபுண்ணதாய புண்ணா ஸங்புண்ணாதி புண்ணா. மா-இதி சந்தோ³ வுச்சதி, ஸோ எத்த² புண்ணோதி புண்ணமா. ஏவங் புண்ணாய புண்ணமாயாதி இமஸ்மிங் பத³த்³வயே அத்தோ² வேதி³தப்³போ³.
85.Evaṃme sutanti mahāpuṇṇamasuttaṃ. Tattha tadahūti tasmiṃ ahu, tasmiṃ divaseti attho. Upavasanti etthāti uposatho. Upavasantīti sīlena vā anasanena vā upetā hutvā vasantīti attho. Ayaṃ panettha atthuddhāro – ‘‘āyāma, āvuso, kappina, uposathaṃ gamissāmā’’tiādīsu hi pātimokkhuddeso uposatho. ‘‘Aṭṭhaṅgasamannāgato kho visākhe uposatho upavuttho’’tiādīsu (a. ni. 8.53) sīlaṃ. ‘‘Suddhassa ve sadā phaggu, suddhassuposatho sadā’’tiādīsu (ma. ni. 1.79) upavāso. ‘‘Uposatho nāma nāgarājā’’tiādīsu (dī. ni. 2.246) paññatti. ‘‘Na, bhikkhave, tadahuposathe sabhikkhukā āvāsā’’tiādīsu (mahāva. 181) upavasitabbadivaso. Idhāpi soyeva adhippeto . So panesa aṭṭhamīcātuddasīpannarasībhedena tividho. Tasmā sesadvayanivāraṇatthaṃ pannaraseti vuttaṃ. Tena vuttaṃ ‘‘upavasanti etthāti uposatho’’ti. Māsapuṇṇatāya puṇṇā saṃpuṇṇāti puṇṇā. Mā-iti cando vuccati, so ettha puṇṇoti puṇṇamā. Evaṃ puṇṇāya puṇṇamāyāti imasmiṃ padadvaye attho veditabbo.
தே³ஸந்தி காரணங். தேன ஹி த்வங் பி⁴க்கு² ஸகே ஆஸனே நிஸீதி³த்வா புச்சா²தி கஸ்மா ப⁴க³வா டி²தஸ்ஸ அகதெ²த்வா நிஸீதா³பேஸீதி. அயங் கிர பி⁴க்கு² ஸட்டி²மத்தானங் பதா⁴னியபி⁴க்கூ²னங் ஸங்க⁴த்தே²ரோ ஸட்டி² பி⁴க்கூ² க³ஹெத்வா அரஞ்ஞே வஸதி, தே தஸ்ஸ ஸந்திகே கம்மட்டா²னங் க³ஹெத்வா க⁴டெந்தி வாயமந்தி. மஹாபூ⁴தானி பரிக்³க³ண்ஹந்தி உபாதா³ரூபானி, நாமரூபபச்சயலக்க²ணாரம்மணிகவிபஸ்ஸனங் பரிக்³க³ண்ஹந்தி. அத² நே ஆசரியுபட்டா²னங் ஆக³ந்த்வா வந்தி³த்வா நிஸின்னே தே²ரோ மஹாபூ⁴தபரிக்³க³ஹாதீ³னி புச்ச²தி. தே ஸப்³ப³ங் கதெ²ந்தி, மக்³க³ப²லபஞ்ஹங் புச்சி²தா பன கதே²துங் ந ஸக்கொந்தி. அத² தே²ரோ சிந்தேஸி – ‘‘மம ஸந்திகே ஏதேஸங் ஓவாத³ஸ்ஸ பரிஹானி நத்தி², இமே ச ஆரத்³த⁴வீரியா விஹரந்தி. குக்குடஸ்ஸ பானீயபிவனகாலமத்தம்பி நேஸங் பமாத³கிரியா நத்தி². ஏவங் ஸந்தேபி மக்³க³ப²லானி நிப்³ப³த்தேதுங் ந ஸக்கொந்தி. அஹங் இமேஸங் அஜ்ஜா²ஸயங் ந ஜானாமி, பு³த்³த⁴வேனெய்யா ஏதே ப⁴விஸ்ஸந்தி , க³ஹெத்வா நே ஸத்து² ஸந்திகங் க³ச்சா²மி, அத² நேஸங் ஸத்தா² சரியவஸேன த⁴ம்மங் தே³ஸெஸ்ஸதீ’’தி, தே பி⁴க்கூ² க³ஹெத்வா ஸத்து² ஸந்திகங் ஆக³தோ.
Desanti kāraṇaṃ. Tena hi tvaṃ bhikkhu sake āsane nisīditvā pucchāti kasmā bhagavā ṭhitassa akathetvā nisīdāpesīti. Ayaṃ kira bhikkhu saṭṭhimattānaṃ padhāniyabhikkhūnaṃ saṅghatthero saṭṭhi bhikkhū gahetvā araññe vasati, te tassa santike kammaṭṭhānaṃ gahetvā ghaṭenti vāyamanti. Mahābhūtāni pariggaṇhanti upādārūpāni, nāmarūpapaccayalakkhaṇārammaṇikavipassanaṃ pariggaṇhanti. Atha ne ācariyupaṭṭhānaṃ āgantvā vanditvā nisinne thero mahābhūtapariggahādīni pucchati. Te sabbaṃ kathenti, maggaphalapañhaṃ pucchitā pana kathetuṃ na sakkonti. Atha thero cintesi – ‘‘mama santike etesaṃ ovādassa parihāni natthi, ime ca āraddhavīriyā viharanti. Kukkuṭassa pānīyapivanakālamattampi nesaṃ pamādakiriyā natthi. Evaṃ santepi maggaphalāni nibbattetuṃ na sakkonti. Ahaṃ imesaṃ ajjhāsayaṃ na jānāmi, buddhaveneyyā ete bhavissanti , gahetvā ne satthu santikaṃ gacchāmi, atha nesaṃ satthā cariyavasena dhammaṃ desessatī’’ti, te bhikkhū gahetvā satthu santikaṃ āgato.
ஸத்தா²பி ஸாயன்ஹஸமயே ஆனந்த³த்தே²ரேன உபனீதங் உத³கங் ஆதா³ய ஸரீரங் உதுங் க³ண்ஹாபெத்வா மிகா³ரமாதுபாஸாத³பரிவேணே பஞ்ஞத்தவரபு³த்³தா⁴ஸனே நிஸீதி³, பி⁴க்கு²ஸங்கோ⁴பி நங் பரிவாரெத்வா நிஸீதி³.
Satthāpi sāyanhasamaye ānandattherena upanītaṃ udakaṃ ādāya sarīraṃ utuṃ gaṇhāpetvā migāramātupāsādapariveṇe paññattavarabuddhāsane nisīdi, bhikkhusaṅghopi naṃ parivāretvā nisīdi.
தஸ்மிங் ஸமயே ஸூரியோ அத்த²ங்க³மேதி, சந்தோ³ உக்³க³ச்ச²தி, மஜ்ஜ²ட்டா²னே ச ப⁴க³வா நிஸின்னோ. சந்த³ஸ்ஸ பபா⁴ நத்தி², ஸூரியஸ்ஸ பபா⁴ நத்தி², சந்தி³மஸூரியானங் பப⁴ங் மக்கெ²த்வா ச²ப்³ப³ண்ணா யமகபு³த்³த⁴ரஸ்மியோ விஜ்ஜோதமானா புஞ்ஜா புஞ்ஜா ஹுத்வா தி³ஸாவிதி³ஸாஸு தா⁴வந்தீதி ஸப்³ப³ங் ஹெட்டா² வுத்தனயேன வித்தா²ரேதப்³ப³ங். வண்ணபூ⁴மி நாமேஸா, த⁴ம்மகதி²கஸ்ஸேவெத்த² தா²மோ பமாணங், யத்தகங் ஸக்கோதி, தத்தகங் கதே²தப்³ப³ங். து³க்கதி²தந்தி ந வத்தப்³ப³ங். ஏவங் ஸன்னிஸின்னாய பரிஸாய தே²ரோ உட்ட²ஹித்வா ஸத்தா²ரங் பஞ்ஹஸ்ஸ ஓகாஸங் காரேஸி. ததோ ப⁴க³வா – ‘‘ஸசே இமஸ்மிங் டி²தகே புச்ச²ந்தே ‘ஆசரியோ நோ உட்டி²தோ’தி ஸேஸபி⁴க்கூ² உட்ட²ஹிஸ்ஸந்தி, ஏவங் ததா²க³தே அகா³ரவோ கதோ ப⁴விஸ்ஸதி. அத² நிஸின்னாவ புச்சி²ஸ்ஸந்தி, ஆசரியே அகா³ரவோ கதோ ப⁴விஸ்ஸதி, ஏகக்³கா³ ஹுத்வா த⁴ம்மதே³ஸனங் படிச்சி²துங் ந ஸக்குணிஸ்ஸந்தி. ஆசரியே பன நிஸின்னே தேபி நிஸீதி³ஸ்ஸந்தி. ததோ ஏகக்³கா³ த⁴ம்மதே³ஸனங் படிச்சி²துங் ஸக்குணிஸ்ஸந்தீ’’தி இமினா காரணேன ப⁴க³வா டி²தஸ்ஸ அகதெ²த்வா நிஸீதா³பேதீதி.
Tasmiṃ samaye sūriyo atthaṅgameti, cando uggacchati, majjhaṭṭhāne ca bhagavā nisinno. Candassa pabhā natthi, sūriyassa pabhā natthi, candimasūriyānaṃ pabhaṃ makkhetvā chabbaṇṇā yamakabuddharasmiyo vijjotamānā puñjā puñjā hutvā disāvidisāsu dhāvantīti sabbaṃ heṭṭhā vuttanayena vitthāretabbaṃ. Vaṇṇabhūmi nāmesā, dhammakathikassevettha thāmo pamāṇaṃ, yattakaṃ sakkoti, tattakaṃ kathetabbaṃ. Dukkathitanti na vattabbaṃ. Evaṃ sannisinnāya parisāya thero uṭṭhahitvā satthāraṃ pañhassa okāsaṃ kāresi. Tato bhagavā – ‘‘sace imasmiṃ ṭhitake pucchante ‘ācariyo no uṭṭhito’ti sesabhikkhū uṭṭhahissanti, evaṃ tathāgate agāravo kato bhavissati. Atha nisinnāva pucchissanti, ācariye agāravo kato bhavissati, ekaggā hutvā dhammadesanaṃ paṭicchituṃ na sakkuṇissanti. Ācariye pana nisinne tepi nisīdissanti. Tato ekaggā dhammadesanaṃ paṭicchituṃ sakkuṇissantī’’ti iminā kāraṇena bhagavā ṭhitassa akathetvā nisīdāpetīti.
இமே நு கோ², ப⁴ந்தேதி விமதிபுச்சா² விய கதி²தா. தே²ரோ பன பஞ்சக்க²ந்தா⁴னங் உத³யப்³ப³யங் பரிக்³க³ண்ஹித்வா அரஹத்தங் பத்தோ மஹாகீ²ணாஸவோ, நத்தி² ஏதஸ்ஸ விமதி. ஜானந்தேனபி பன அஜானந்தேன விய ஹுத்வா புச்சி²துங் வட்டதி. ஸசே ஹி ஜானந்தோ விய புச்ச²தி, ‘‘ஜானாதி அய’’ந்தி தஸ்ஸ தஸ்ஸ விஸ்ஸஜ்ஜெந்தோ ஏகதே³ஸமேவ கதே²தி. அஜானந்தேன விய புச்சி²தே பன கதெ²ந்தோ இதோ ச எத்தோ ச காரணங் ஆஹரித்வா பாகடங் கத்வா கதே²தி. கோசி பன அஜானந்தோபி ஜானந்தோ விய புச்ச²தி. தே²ரோ ஏவரூபங் வசனங் கிங் கரிஸ்ஸதி, ஜானந்தோயேவ பன அஜானந்தோ விய புச்ச²தீதி வேதி³தப்³போ³.
Ime nu kho, bhanteti vimatipucchā viya kathitā. Thero pana pañcakkhandhānaṃ udayabbayaṃ pariggaṇhitvā arahattaṃ patto mahākhīṇāsavo, natthi etassa vimati. Jānantenapi pana ajānantena viya hutvā pucchituṃ vaṭṭati. Sace hi jānanto viya pucchati, ‘‘jānāti aya’’nti tassa tassa vissajjento ekadesameva katheti. Ajānantena viya pucchite pana kathento ito ca etto ca kāraṇaṃ āharitvā pākaṭaṃ katvā katheti. Koci pana ajānantopi jānanto viya pucchati. Thero evarūpaṃ vacanaṃ kiṃ karissati, jānantoyeva pana ajānanto viya pucchatīti veditabbo.
ச²ந்த³மூலகாதி தண்ஹாமூலகா. ஏவங்ரூபோ ஸியந்தி ஸசே ஓதா³தோ ஹோதுகாமோ, ஹரிதாலவண்ணோ வா மனோஸிலாவண்ணோ வா ஸியந்தி பத்தே²தி . ஸசே காளோ ஹோதுகாமோ, நீலுப்பலவண்ணோ வா அஞ்ஜனவண்ணோ வா அதஸீபுப்ப²வண்ணோ வா ஸியந்தி பத்தே²தி. ஏவங்வேத³னோதி குஸலவேத³னோ வா ஸுக²வேத³னோ வா ஸியந்தி பத்தே²தி. ஸஞ்ஞாதீ³ஸுபி ஏஸேவ நயோ. யஸ்மா பன அதீதே பத்த²னா நாம நத்தி², பத்தெ²ந்தேனாபி ச ந ஸக்கா தங் லத்³து⁴ங், பச்சுப்பன்னேபி ந ஹோதி, ந ஹி ஓதா³தோ காளபா⁴வங் பத்தெ²த்வா பச்சுப்பன்னே காளோ ஹோதி, ந காளோ வா ஓதா³தோ, தீ³கோ⁴ வா ரஸ்ஸோ, ரஸ்ஸோ வா தீ³கோ⁴, தா³னங் பன த³த்வா ஸீலங் வா ஸமாதி³யித்வா ‘‘அனாக³தே க²த்தியோ வா ஹோமி ப்³ராஹ்மணோ வா’’தி பத்தெ²ந்தஸ்ஸ பத்த²னா ஸமிஜ்ஜ²தி. தஸ்மா அனாக³தமேவ க³ஹிதங்.
Chandamūlakāti taṇhāmūlakā. Evaṃrūpo siyanti sace odāto hotukāmo, haritālavaṇṇo vā manosilāvaṇṇo vā siyanti pattheti . Sace kāḷo hotukāmo, nīluppalavaṇṇo vā añjanavaṇṇo vā atasīpupphavaṇṇo vā siyanti pattheti. Evaṃvedanoti kusalavedano vā sukhavedano vā siyanti pattheti. Saññādīsupi eseva nayo. Yasmā pana atīte patthanā nāma natthi, patthentenāpi ca na sakkā taṃ laddhuṃ, paccuppannepi na hoti, na hi odāto kāḷabhāvaṃ patthetvā paccuppanne kāḷo hoti, na kāḷo vā odāto, dīgho vā rasso, rasso vā dīgho, dānaṃ pana datvā sīlaṃ vā samādiyitvā ‘‘anāgate khattiyo vā homi brāhmaṇo vā’’ti patthentassa patthanā samijjhati. Tasmā anāgatameva gahitaṃ.
க²ந்தா⁴தி⁴வசனந்தி க²ந்தா⁴னங் க²ந்த⁴பண்ணத்தி கித்தகேன ஹோதீதி புச்ச²தி.
Khandhādhivacananti khandhānaṃ khandhapaṇṇatti kittakena hotīti pucchati.
மஹாபூ⁴தா ஹேதூதி ‘‘தயோ குஸலஹேதூ’’திஆதீ³ஸு (த⁴॰ ஸ॰ 1441) ஹி ஹேதுஹேது வுத்தோ. அவிஜ்ஜா புஞ்ஞாபி⁴ஸங்கா²ராதீ³னங் ஸாதா⁴ரணத்தா ஸாதா⁴ரணஹேது. குஸலாகுஸலங் அத்தனோ அத்தனோ விபாகதா³னே உத்தமஹேது. இத⁴ பச்சயஹேது அதி⁴ப்பேதோ. தத்த² பத²வீதா⁴து மஹாபூ⁴தங் இதரேஸங் திண்ணங் பூ⁴தானங் உபாதா³ரூபஸ்ஸ ச பஞ்ஞாபனாய த³ஸ்ஸனத்தா²ய ஹேது சேவ பச்சயோ ச. ஏவங் ஸேஸேஸுபி யோஜனா வேதி³தப்³பா³.
Mahābhūtā hetūti ‘‘tayo kusalahetū’’tiādīsu (dha. sa. 1441) hi hetuhetu vutto. Avijjā puññābhisaṅkhārādīnaṃ sādhāraṇattā sādhāraṇahetu. Kusalākusalaṃ attano attano vipākadāne uttamahetu. Idha paccayahetu adhippeto. Tattha pathavīdhātu mahābhūtaṃ itaresaṃ tiṇṇaṃ bhūtānaṃ upādārūpassa ca paññāpanāya dassanatthāya hetu ceva paccayo ca. Evaṃ sesesupi yojanā veditabbā.
ப²ஸ்ஸோதி ‘‘பு²ட்டோ², பி⁴க்க²வே, வேதே³தி, பு²ட்டோ² ஸஞ்ஜானாதி, பு²ட்டோ² சேதேதீ’’தி (ஸங்॰ நி॰ 4.93) வசனதோ ப²ஸ்ஸோ திண்ணங் க²ந்தா⁴னங் பஞ்ஞாபனாய ஹேது சேவ பச்சயோ ச. விஞ்ஞாணக்க²ந்த⁴ஸ்ஸாதி எத்த² படிஸந்தி⁴விஞ்ஞாணேன தாவ ஸத்³தி⁴ங் க³ப்³ப⁴ஸெய்யகானங் உபரிமபரிச்சே²தே³ன ஸமதிங்ஸ ரூபானி ஸம்பயுத்தா ச தயோ க²ந்தா⁴ உப்பஜ்ஜந்தி, தங் நாமரூபங் படிஸந்தி⁴விஞ்ஞாணஸ்ஸ பஞ்ஞாபனாய ஹேது சேவ பச்சயோ ச. சக்கு²த்³வாரே சக்கு²பஸாதோ³ சேவ ரூபாரம்மணஞ்ச ரூபங், ஸம்பயுத்தா தயோ க²ந்தா⁴ நாமங். தங் நாமரூபங் சக்கு²விஞ்ஞாணஸ்ஸ பஞ்ஞாபனாய ஹேது சேவ பச்சயோ ச. ஏஸேவ நயோ ஸேஸவிஞ்ஞாணேஸு.
Phassoti ‘‘phuṭṭho, bhikkhave, vedeti, phuṭṭho sañjānāti, phuṭṭho cetetī’’ti (saṃ. ni. 4.93) vacanato phasso tiṇṇaṃ khandhānaṃ paññāpanāya hetu ceva paccayo ca. Viññāṇakkhandhassāti ettha paṭisandhiviññāṇena tāva saddhiṃ gabbhaseyyakānaṃ uparimaparicchedena samatiṃsa rūpāni sampayuttā ca tayo khandhā uppajjanti, taṃ nāmarūpaṃ paṭisandhiviññāṇassa paññāpanāya hetu ceva paccayo ca. Cakkhudvāre cakkhupasādo ceva rūpārammaṇañca rūpaṃ, sampayuttā tayo khandhā nāmaṃ. Taṃ nāmarūpaṃ cakkhuviññāṇassa paññāpanāya hetu ceva paccayo ca. Eseva nayo sesaviññāṇesu.
87. கத²ங் பன, ப⁴ந்தேதி இத³ங் கித்தகேன நு கோ²தி வட்டங் புச்ச²ந்தோ ஏவமாஹ. ஸக்காயதி³ட்டி² ந ஹோதீதி இத³ங் விவட்டங் புச்ச²ந்தோ ஏவமாஹ.
87.Kathaṃ pana, bhanteti idaṃ kittakena nu khoti vaṭṭaṃ pucchanto evamāha. Sakkāyadiṭṭhi na hotīti idaṃ vivaṭṭaṃ pucchanto evamāha.
88. அயங் ரூபே அஸ்ஸாதோ³தி இமினா பரிஞ்ஞாபடிவேதோ⁴ சேவ து³க்க²ஸச்சஞ்ச கதி²தங். அயங் ரூபே ஆதீ³னவோதி இமினா பஹானபடிவேதோ⁴ சேவ ஸமுத³யஸச்சஞ்ச. இத³ங் ரூபே நிஸ்ஸரணந்தி இமினா ஸச்சி²கிரியாபடிவேதோ⁴ சேவ நிரோத⁴ஸச்சஞ்ச. யே இமேஸு தீஸு டா²னேஸு ஸம்மாதி³ட்டி²ஆத³யோ த⁴ம்மா, அயங் பா⁴வனாபடிவேதோ⁴ மக்³க³ஸச்சங். ஸேஸபதே³ஸுபி ஏஸேவ நயோ.
88.Ayaṃrūpe assādoti iminā pariññāpaṭivedho ceva dukkhasaccañca kathitaṃ. Ayaṃ rūpe ādīnavoti iminā pahānapaṭivedho ceva samudayasaccañca. Idaṃ rūpe nissaraṇanti iminā sacchikiriyāpaṭivedho ceva nirodhasaccañca. Ye imesu tīsu ṭhānesu sammādiṭṭhiādayo dhammā, ayaṃ bhāvanāpaṭivedho maggasaccaṃ. Sesapadesupi eseva nayo.
89. ப³ஹித்³தா⁴தி பரஸ்ஸ ஸவிஞ்ஞாணகே காயே. ஸப்³ப³னிமித்தேஸூதி இமினா பன அனிந்த்³ரியப³த்³த⁴ம்பி ஸங்க³ண்ஹாதி. ‘‘ஸவிஞ்ஞாணகே காயே’’தி வசனேன வா அத்தனோ ச பரஸ்ஸ ச காயோ க³ஹிதோவ, ப³ஹித்³தா⁴ ச ஸப்³ப³னிமித்தக்³க³ஹணேன அனிந்த்³ரியப³த்³த⁴ங் க³ண்ஹாதி.
89.Bahiddhāti parassa saviññāṇake kāye. Sabbanimittesūti iminā pana anindriyabaddhampi saṅgaṇhāti. ‘‘Saviññāṇake kāye’’ti vacanena vā attano ca parassa ca kāyo gahitova, bahiddhā ca sabbanimittaggahaṇena anindriyabaddhaṃ gaṇhāti.
90. அனத்தகதானீதி அனத்தனி ட²த்வா கதானி. கமத்தானங் பு²ஸிஸ்ஸந்தீதி கதரஸ்மிங் அத்தனி ட²த்வா விபாகங் த³ஸ்ஸெந்தீதி ஸஸ்ஸதத³ஸ்ஸனங் ஓக்கமந்தோ ஏவமாஹ. தண்ஹாதி⁴பதெய்யேனாதி தண்ஹாஜெட்ட²கேன. தத்ர தத்ராதி தேஸு தேஸு த⁴ம்மேஸு. ஸட்டி²மத்தானந்தி இமே பி⁴க்கூ² பகதிகம்மட்டா²னங் ஜஹித்வா அஞ்ஞங் நவகம்மட்டா²னங் ஸம்மஸந்தா பல்லங்கங் அபி⁴ந்தி³த்வா தஸ்மிங்யேவ ஆஸனே அரஹத்தங் பாபுணிங்ஸு. ஸேஸங் ஸப்³ப³த்த² உத்தானமேவாதி.
90.Anattakatānīti anattani ṭhatvā katāni. Kamattānaṃ phusissantīti katarasmiṃ attani ṭhatvā vipākaṃ dassentīti sassatadassanaṃ okkamanto evamāha. Taṇhādhipateyyenāti taṇhājeṭṭhakena. Tatra tatrāti tesu tesu dhammesu. Saṭṭhimattānanti ime bhikkhū pakatikammaṭṭhānaṃ jahitvā aññaṃ navakammaṭṭhānaṃ sammasantā pallaṅkaṃ abhinditvā tasmiṃyeva āsane arahattaṃ pāpuṇiṃsu. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாபுண்ணமஸுத்தவண்ணனா நிட்டி²தா.
Mahāpuṇṇamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. மஹாபுண்ணமஸுத்தங் • 9. Mahāpuṇṇamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. மஹாபுண்ணமஸுத்தவண்ணனா • 9. Mahāpuṇṇamasuttavaṇṇanā
