| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. மஹாஸாலஸுத்தவண்ணனா
4. Mahāsālasuttavaṇṇanā
200. யஸ்மா தஸ்ஸ ப்³ராஹ்மணஸ்ஸ அனிஸ்ஸயஸ்ஸ ஜிண்ணபா⁴வேன விஸேஸதோ காயோ லூகோ² ஜாதோ, ஜிண்ணபிலோதிகக²ண்டே³ஹி ஸங்க⁴டிதங் பாவுரணங், தஸ்மா ‘‘லூக²பாவுரணோ’’தி பத³ஸ்ஸ ‘‘ஜிண்ணபாவுரணோ’’தி அத்தோ² வுத்தோ. பாடியேக்கந்தி புத்தேஸு ஏகமேகோ ஏகமேகாய வாசாய விஸுங் விஸுங்.
200. Yasmā tassa brāhmaṇassa anissayassa jiṇṇabhāvena visesato kāyo lūkho jāto, jiṇṇapilotikakhaṇḍehi saṅghaṭitaṃ pāvuraṇaṃ, tasmā ‘‘lūkhapāvuraṇo’’ti padassa ‘‘jiṇṇapāvuraṇo’’ti attho vutto. Pāṭiyekkanti puttesu ekameko ekamekāya vācāya visuṃ visuṃ.
ஸம்புச்ச²னங் நாம இத⁴ ஸம்மந்தனந்தி ஆஹ ‘‘ஸத்³தி⁴ங் மந்தயித்வா’’தி. நந்தி³ஸ்ஸந்தி அபி⁴னந்தி³ங். அதீதத்தே² ஹி இத³ங் அனாக³தவசனங். தேனாஹ ‘‘நந்தி³ஜாதோ…பே॰… அஹோஸி’’ந்தி. பு⁴ஸ்ஸந்தாதி நிப்³பு⁴ஸ்ஸனவஸேன ரவந்தா.
Sampucchanaṃ nāma idha sammantananti āha ‘‘saddhiṃ mantayitvā’’ti. Nandissanti abhinandiṃ. Atītatthe hi idaṃ anāgatavacanaṃ. Tenāha ‘‘nandijāto…pe… ahosi’’nti. Bhussantāti nibbhussanavasena ravantā.
வயோக³தந்தி பச்சி²மவயங் உபக³தங். ஸோ பன யஸ்மா புரிமே த்³வே வயே அதிக்கமவஸேன க³தோ. பச்சி²மங் ஏகதே³ஸதோ அதிக்கமனவஸேன, தஸ்மா வுத்தங் – ‘‘தயோ வயே க³தங் அதிக்கந்தங் பச்சி²மவயே டி²த’’ந்தி.
Vayogatanti pacchimavayaṃ upagataṃ. So pana yasmā purime dve vaye atikkamavasena gato. Pacchimaṃ ekadesato atikkamanavasena, tasmā vuttaṃ – ‘‘tayo vaye gataṃ atikkantaṃ pacchimavaye ṭhita’’nti.
நிப்பரிபோ⁴கோ³தி ஜிண்ணபா⁴வேன ஜவபரக்கமஹானியா அபரிபோ⁴கோ³ ந பு⁴ஞ்ஜிதப்³போ³. கா²த³னா அபனீயதீதி யவஸங் அத³த³ந்தா ததோ நீஹரந்தி நாம. தே²ரோதி வுட்³டோ⁴.
Nipparibhogoti jiṇṇabhāvena javaparakkamahāniyā aparibhogo na bhuñjitabbo. Khādanā apanīyatīti yavasaṃ adadantā tato nīharanti nāma. Theroti vuḍḍho.
அனஸ்ஸவாதி ந வசனகரா. அப்பதிஸ்ஸாதி பதிஸ்ஸயரஹிதா. அவஸவத்தினோதி ந மய்ஹங் வஸேன வத்தனகா. ஸுந்த³ரதரோதி உபத்த²ம்ப⁴காரிபா⁴வேன ஸுந்த³ரதரோ.
Anassavāti na vacanakarā. Appatissāti patissayarahitā. Avasavattinoti na mayhaṃ vasena vattanakā. Sundarataroti upatthambhakāribhāvena sundarataro.
புரதோதி உபத்த²ம்ப⁴கபா⁴வேன புரதோ கத்வா. உத³கே பதிட்ட²ங் லப⁴தி தத்த² பதிட்ட²தோ தி²ரபதிட்ட²பா⁴வதோ. அத்³த⁴பதிட்டோ² ஹி த³ண்டோ³ த³ண்ட³த⁴ரபுரிஸஸ்ஸ பதிட்ட²ங் லபா⁴பேதி.
Puratoti upatthambhakabhāvena purato katvā. Udake patiṭṭhaṃ labhati tattha patiṭṭhato thirapatiṭṭhabhāvato. Addhapatiṭṭho hi daṇḍo daṇḍadharapurisassa patiṭṭhaṃ labhāpeti.
ப்³ராஹ்மணியோதி அத்தனோ ப்³ராஹ்மணியோ. பாடியேக்கந்தி ‘‘அஸுகஸ்ஸ கே³ஹே அஸுகஸ்ஸ கே³ஹே’’தி ஏவங் உத்³தே³ஸிகங் கத்வா விஸுங் விஸுங். மா நிய்யாதே³ஹி, அம்ஹாகங் ருச்சனட்டா²னமேவாதி தவ புத்தானங் கே³ஹேஸு யங் அம்ஹாகங் ருச்சனட்டா²னங். தத்த²மேவ க³மிஸ்ஸாமாதி ஸப்³பே³ஸம்பி ஏதேஸங் அனுக்³க³ஹங் காதுகாமோ ப⁴க³வா ஏவமாஹ.
Brāhmaṇiyoti attano brāhmaṇiyo. Pāṭiyekkanti ‘‘asukassa gehe asukassa gehe’’ti evaṃ uddesikaṃ katvā visuṃ visuṃ. Mā niyyādehi, amhākaṃ ruccanaṭṭhānamevāti tava puttānaṃ gehesu yaṃ amhākaṃ ruccanaṭṭhānaṃ. Tatthameva gamissāmāti sabbesampi etesaṃ anuggahaṃ kātukāmo bhagavā evamāha.
ததோ பட்டா²யாதி ஸோதாபத்திப²லபடிலாப⁴தோ பட்டா²ய. யத³த்த²ங் மயங் இமஸ்ஸ ப்³ராஹ்மணஸ்ஸ மஹாஸம்பத்திதா³னாதி³னா அனுக்³க³ஹோ கதோ, ஸோ சஸ்ஸ புத்தபரிஜனஸ்ஸபி அத்தோ² ஸித்³தோ⁴தி ஸத்தா² ந ஸப்³ப³காலங் தஸ்ஸ ப்³ராஹ்மணஸ்ஸ புத்தானங் கே³ஹங் அக³மாஸி, தே ஏவ பன காலேன காலங் ஸத்து² ஸந்திகங் க³ந்த்வா யதா²விப⁴வங் ஸக்காரஸம்மானங் அகங்ஸூதி அதி⁴ப்பாயோ.
Tato paṭṭhāyāti sotāpattiphalapaṭilābhato paṭṭhāya. Yadatthaṃ mayaṃ imassa brāhmaṇassa mahāsampattidānādinā anuggaho kato, so cassa puttaparijanassapi attho siddhoti satthā na sabbakālaṃ tassa brāhmaṇassa puttānaṃ gehaṃ agamāsi, te eva pana kālena kālaṃ satthu santikaṃ gantvā yathāvibhavaṃ sakkārasammānaṃ akaṃsūti adhippāyo.
மஹாஸாலஸுத்தவண்ணனா நிட்டி²தா.
Mahāsālasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. மஹாஸாலஸுத்தங் • 4. Mahāsālasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. மஹாஸாலஸுத்தவண்ணனா • 4. Mahāsālasuttavaṇṇanā
