| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. மஹாஸளாயதனிகஸுத்தவண்ணனா
7. Mahāsaḷāyatanikasuttavaṇṇanā
428. ஏவங் மே ஸுதந்தி மஹாஸளாயதனிகஸுத்தங். தத்த² மஹாஸளாயதனிகந்தி மஹந்தானங் ச²ன்னங் ஆயதனானங் ஜோதகங் த⁴ம்மபரியாயங்.
428.Evaṃme sutanti mahāsaḷāyatanikasuttaṃ. Tattha mahāsaḷāyatanikanti mahantānaṃ channaṃ āyatanānaṃ jotakaṃ dhammapariyāyaṃ.
429. அஜானந்தி ஸஹவிபஸ்ஸனேன மக்³கே³ன அஜானந்தோ. உபசயங் க³ச்ச²ந்தீதி வுட்³டி⁴ங் க³ச்ச²ந்தி, வஸிபா⁴வங் க³ச்ச²ந்தீதி அத்தோ². காயிகாதி பஞ்சத்³வாரிகத³ரதா². சேதஸிகாதி மனொத்³வாரிகத³ரதா². ஸந்தாபாதீ³ஸுபி ஏஸேவ நயோ.
429.Ajānanti sahavipassanena maggena ajānanto. Upacayaṃ gacchantīti vuḍḍhiṃ gacchanti, vasibhāvaṃ gacchantīti attho. Kāyikāti pañcadvārikadarathā. Cetasikāti manodvārikadarathā. Santāpādīsupi eseva nayo.
430. காயஸுக²ந்தி பஞ்சத்³வாரிகஸுக²ங். சேதோஸுக²ந்தி மனொத்³வாரிகஸுக²ங். எத்த² ச பஞ்சத்³வாரிகஜவனேன ஸமாபஜ்ஜனங் வா வுட்டா²னங் வா நத்தி², உப்பன்னமத்தகமேவ ஹோதி. மனொத்³வாரிகேன ஸப்³ப³ங் ஹோதி. அயஞ்ச மக்³க³வுட்டா²னஸ்ஸ பச்சயபூ⁴தா ப³லவவிபஸ்ஸனா, ஸாபி மனொத்³வாரிகேனேவ ஹோதி.
430.Kāyasukhanti pañcadvārikasukhaṃ. Cetosukhanti manodvārikasukhaṃ. Ettha ca pañcadvārikajavanena samāpajjanaṃ vā vuṭṭhānaṃ vā natthi, uppannamattakameva hoti. Manodvārikena sabbaṃ hoti. Ayañca maggavuṭṭhānassa paccayabhūtā balavavipassanā, sāpi manodvārikeneva hoti.
431. ததா²பூ⁴தஸ்ஸாதி குஸலசித்தஸம்பயுத்தசேதோஸுக²ஸமங்கீ³பூ⁴தஸ்ஸ. புப்³பே³வ கோ² பனஸ்ஸாதி அஸ்ஸ பி⁴க்கு²னோ வாசாகம்மந்தாஜீவா புப்³ப³ஸுத்³தி⁴கா நாம ஆதி³தோ பட்டா²ய பரிஸுத்³தா⁴வ ஹொந்தி. தி³ட்டி²ஸங்கப்பவாயாமஸதிஸமாதி⁴ஸங்கா²தானி பன பஞ்சங்கா³னி ஸப்³ப³த்த²ககாராபகங்கா³னி நாம. ஏவங் லோகுத்தரமக்³கோ³ அட்ட²ங்கி³கோ வா ஸத்தங்கி³கோ வா ஹோதி.
431.Tathābhūtassāti kusalacittasampayuttacetosukhasamaṅgībhūtassa. Pubbeva kho panassāti assa bhikkhuno vācākammantājīvā pubbasuddhikā nāma ādito paṭṭhāya parisuddhāva honti. Diṭṭhisaṅkappavāyāmasatisamādhisaṅkhātāni pana pañcaṅgāni sabbatthakakārāpakaṅgāni nāma. Evaṃ lokuttaramaggo aṭṭhaṅgiko vā sattaṅgiko vā hoti.
விதண்ட³வாதீ³ பன ‘‘யா யதா²பூ⁴தஸ்ஸ தி³ட்டீ²’’தி இமமேவ ஸுத்தபதே³ஸங் க³ஹெத்வா ‘‘லோகுத்தரமக்³கோ³ பஞ்சங்கி³கோ’’தி வத³தி. ஸோ – ‘‘ஏவமஸ்ஸாயங் அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீ’’தி இமினா அனந்தரவசனேனேவ படிஸேதி⁴தப்³போ³. உத்தரி ச ஏவங் ஸஞ்ஞாபேதப்³போ³ – லோகுத்தரமக்³கோ³ பஞ்சங்கி³கோ நாம நத்தி², இமானி பன பஞ்ச ஸப்³ப³த்த²ககாராபகங்கா³னி மக்³க³க்க²ணே விரதிவஸேன பூரெந்தி. ‘‘யா சதூஹி வசீது³ச்சரிதேஹி ஆரதி விரதீ’’தி ஏவங் வுத்தவிரதீஸு ஹி மிச்சா²வாசங் பஜஹதி, ஸம்மாவாசங் பா⁴வேதி, ஏவங் ஸம்மாவாசங் பா⁴வெந்தஸ்ஸ இமானி பஞ்சங்கி³கானி ந வினா, ஸஹேவ விரதியா பூரெந்தி. ஸம்மாகம்மந்தாஜீவேஸுபி ஏஸேவ நயோ. இதி வசீகம்மாதீ³னி ஆதி³தோ பட்டா²ய பரிஸுத்³தா⁴னேவ வட்டந்தி. இமானி பன பஞ்ச ஸப்³ப³த்த²ககாராபகங்கா³னி விரதிவஸேன பரிபூரெந்தீதி பஞ்சங்கி³கோ மக்³கோ³ நாம நத்தி². ஸுப⁴த்³த³ஸுத்தேபி (தீ³॰ நி॰ 2.214) சேதங் வுத்தங் – ‘‘யஸ்மிங் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³’’தி. அஞ்ஞேஸு ச அனேகேஸு ஸுத்தஸதேஸு அட்ட²ங்கி³கோவ மக்³கோ³ ஆக³தோதி.
Vitaṇḍavādī pana ‘‘yā yathābhūtassa diṭṭhī’’ti imameva suttapadesaṃ gahetvā ‘‘lokuttaramaggo pañcaṅgiko’’ti vadati. So – ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti iminā anantaravacaneneva paṭisedhitabbo. Uttari ca evaṃ saññāpetabbo – lokuttaramaggo pañcaṅgiko nāma natthi, imāni pana pañca sabbatthakakārāpakaṅgāni maggakkhaṇe virativasena pūrenti. ‘‘Yā catūhi vacīduccaritehi ārati viratī’’ti evaṃ vuttaviratīsu hi micchāvācaṃ pajahati, sammāvācaṃ bhāveti, evaṃ sammāvācaṃ bhāventassa imāni pañcaṅgikāni na vinā, saheva viratiyā pūrenti. Sammākammantājīvesupi eseva nayo. Iti vacīkammādīni ādito paṭṭhāya parisuddhāneva vaṭṭanti. Imāni pana pañca sabbatthakakārāpakaṅgāni virativasena paripūrentīti pañcaṅgiko maggo nāma natthi. Subhaddasuttepi (dī. ni. 2.214) cetaṃ vuttaṃ – ‘‘yasmiṃ kho, subhadda, dhammavinaye ariyo aṭṭhaṅgiko maggo’’ti. Aññesu ca anekesu suttasatesu aṭṭhaṅgikova maggo āgatoti.
433. சத்தாரோபி ஸதிபட்டா²னாதி மக்³க³ஸம்பயுத்தாவ சத்தாரோ ஸதிபட்டா²னா. ஸம்மப்பதா⁴னாதீ³ஸுபி ஏஸேவ நயோ. யுக³னந்தா⁴தி ஏகக்க²ணிகயுக³னந்தா⁴. ஏதேஹி அஞ்ஞஸ்மிங் க²ணே ஸமாபத்தி, அஞ்ஞஸ்மிங் விபஸ்ஸனாதி. ஏவங் நானாக²ணிகாபி ஹொந்தி, அரியமக்³கே³ பன ஏகக்க²ணிகா.
433.Cattāropi satipaṭṭhānāti maggasampayuttāva cattāro satipaṭṭhānā. Sammappadhānādīsupi eseva nayo. Yuganandhāti ekakkhaṇikayuganandhā. Etehi aññasmiṃ khaṇe samāpatti, aññasmiṃ vipassanāti. Evaṃ nānākhaṇikāpi honti, ariyamagge pana ekakkhaṇikā.
விஜ்ஜா ச விமுத்தி சாதி அரஹத்தமக்³க³விஜ்ஜா ச ப²லவிமுத்தி ச. ஸேஸங் ஸப்³ப³த்த² உத்தானமேவாதி.
Vijjā ca vimutti cāti arahattamaggavijjā ca phalavimutti ca. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாஸளாயதனிகஸுத்தவண்ணனா நிட்டி²தா.
Mahāsaḷāyatanikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. மஹாஸளாயதனிகஸுத்தங் • 7. Mahāsaḷāyatanikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. மஹாஸளாயதனிகஸுத்தவண்ணனா • 7. Mahāsaḷāyatanikasuttavaṇṇanā
