| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. மஹாஸாரோபமஸுத்தவண்ணனா
9. Mahāsāropamasuttavaṇṇanā
307. ஏவங் மே ஸுதந்தி மஹாஸாரோபமஸுத்தங். தத்த² அசிரபக்கந்தேதி ஸங்க⁴ங் பி⁴ந்தி³த்வா ருஹிருப்பாத³கம்மங் கத்வா நசிரபக்கந்தே ஸலிங்கே³னேவ பாடியேக்கே ஜாதே.
307.Evaṃme sutanti mahāsāropamasuttaṃ. Tattha acirapakkanteti saṅghaṃ bhinditvā ruhiruppādakammaṃ katvā nacirapakkante saliṅgeneva pāṭiyekke jāte.
இத⁴, பி⁴க்க²வே, ஏகச்சோ குலபுத்தோதி கிஞ்சாபி அஸுககுலபுத்தோதி ந நியாமிதோ, தே³வத³த்தங்யேவ பன ஸந்தா⁴ய இத³ங் வுத்தந்தி வேதி³தப்³ப³ங். ஸோ ஹி அஸம்பி⁴ன்னாய மஹாஸம்மதபவேணியா ஓக்காகவங்ஸே ஜாதத்தா ஜாதிகுலபுத்தோ. ஓதிண்ணோதி யஸ்ஸ ஜாதி அந்தோ அனுபவிட்டா², ஸோ ஜாதியா ஓதிண்ணோ நாம. ஜராதீ³ஸுபி ஏஸேவ நயோ. லாப⁴ஸக்காராதீ³ஸுபி லாபோ⁴தி சத்தாரோ பச்சயா. ஸக்காரோதி தேஸங்யேவ ஸுகதபா⁴வோ. ஸிலோகோதி வண்ணப⁴ணனங். அபி⁴னிப்³ப³த்தேதீதி உப்பாதே³தி. அபஞ்ஞாதாதி த்³வின்னங் ஜனானங் டி²தட்டா²னே ந பஞ்ஞாயந்தி, கா⁴ஸச்சா²த³னமத்தம்பி ந லப⁴ந்தி. அப்பேஸக்கா²தி அப்பபரிவாரா, புரதோ வா பச்ச²தோ வா க³ச்ச²ந்தங் ந லப⁴ந்தி.
Idha, bhikkhave, ekacco kulaputtoti kiñcāpi asukakulaputtoti na niyāmito, devadattaṃyeva pana sandhāya idaṃ vuttanti veditabbaṃ. So hi asambhinnāya mahāsammatapaveṇiyā okkākavaṃse jātattā jātikulaputto. Otiṇṇoti yassa jāti anto anupaviṭṭhā, so jātiyā otiṇṇo nāma. Jarādīsupi eseva nayo. Lābhasakkārādīsupi lābhoti cattāro paccayā. Sakkāroti tesaṃyeva sukatabhāvo. Silokoti vaṇṇabhaṇanaṃ. Abhinibbattetīti uppādeti. Apaññātāti dvinnaṃ janānaṃ ṭhitaṭṭhāne na paññāyanti, ghāsacchādanamattampi na labhanti. Appesakkhāti appaparivārā, purato vā pacchato vā gacchantaṃ na labhanti.
ஸாரேன ஸாரகரணீயந்தி ருக்க²ஸாரேன கத்தப்³ப³ங் அக்க²சக்கயுக³னங்க³லாதி³கங் யங்கிஞ்சி. ஸாகா²பலாஸங் அக்³க³ஹேஸி ப்³ரஹ்மசரியஸ்ஸாதி மக்³க³ப²லஸாரஸ்ஸ ஸாஸனப்³ரஹ்மசரியஸ்ஸ சத்தாரோ பச்சயா ஸாகா²பலாஸங் நாம, தங் அக்³க³ஹேஸி. தேன ச வோஸானங் ஆபாதீ³தி தேனேவ ச அலமெத்தாவதா ஸாரோ மே பத்தோதி வோஸானங் ஆபன்னோ.
Sārena sārakaraṇīyanti rukkhasārena kattabbaṃ akkhacakkayuganaṅgalādikaṃ yaṃkiñci. Sākhāpalāsaṃ aggahesi brahmacariyassāti maggaphalasārassa sāsanabrahmacariyassa cattāro paccayā sākhāpalāsaṃ nāma, taṃ aggahesi. Tena ca vosānaṃ āpādīti teneva ca alamettāvatā sāro me pattoti vosānaṃ āpanno.
310. ஞாணத³ஸ்ஸனங் ஆராதே⁴தீதி தே³வத³த்தோ பஞ்சாபி⁴ஞ்ஞோ, தி³ப்³ப³சக்கு² ச பஞ்சன்னங் அபி⁴ஞ்ஞானங் மத்த²கே டி²தங், தங் இமஸ்மிங் ஸுத்தே ‘‘ஞாணத³ஸ்ஸன’’ந்தி வுத்தங் . அஜானங் அபஸ்ஸங் விஹரந்தீதி கிஞ்சி ஸுகு²மங் ரூபங் அஜானந்தா அந்தமஸோ பங்ஸுபிஸாசகம்பி அபஸ்ஸந்தா விஹரந்தி.
310.Ñāṇadassanaṃ ārādhetīti devadatto pañcābhiñño, dibbacakkhu ca pañcannaṃ abhiññānaṃ matthake ṭhitaṃ, taṃ imasmiṃ sutte ‘‘ñāṇadassana’’nti vuttaṃ . Ajānaṃ apassaṃ viharantīti kiñci sukhumaṃ rūpaṃ ajānantā antamaso paṃsupisācakampi apassantā viharanti.
311. அஸமயவிமொக்க²ங் ஆராதே⁴தீதி, ‘‘கதமோ அஸமயவிமொக்கோ²? சத்தாரோ ச அரியமக்³கா³ சத்தாரி ச ஸாமஞ்ஞப²லானி, நிப்³பா³னஞ்ச, அயங் அஸமயவிமொக்கோ²’’தி (படி॰ ம॰ 1.213) ஏவங் வுத்தே நவலோகுத்தரத⁴ம்மே ஆராதே⁴தி ஸம்பாதே³தி படிலப⁴தி. லோகியஸமாபத்தியோ ஹி அப்பிதப்பிதக்க²ணேயேவ பச்சனீகத⁴ம்மேஹி விமுச்சந்தி, தஸ்மா, ‘‘கதமோ ஸமயவிமொக்கோ²? சத்தாரி ச ஜா²னானி சதஸ்ஸோ ச அரூபாவசரஸமாபத்தியோ, அயங் ஸமயவிமொக்கோ²’’தி ஏவங் ஸமயவிமொக்கோ²தி வுத்தா. லோகுத்தரத⁴ம்மா பன காலேன காலங் விமுச்சந்தி, ஸகிங் விமுத்தானி ஹி மக்³க³ப²லானி விமுத்தானேவ ஹொந்தி. நிப்³பா³னங் ஸப்³ப³கிலேஸேஹி அச்சந்தங் விமுத்தமேவாதி இமே நவ த⁴ம்மா அஸமயவிமொக்கோ²தி வுத்தா.
311.Asamayavimokkhaṃ ārādhetīti, ‘‘katamo asamayavimokkho? Cattāro ca ariyamaggā cattāri ca sāmaññaphalāni, nibbānañca, ayaṃ asamayavimokkho’’ti (paṭi. ma. 1.213) evaṃ vutte navalokuttaradhamme ārādheti sampādeti paṭilabhati. Lokiyasamāpattiyo hi appitappitakkhaṇeyeva paccanīkadhammehi vimuccanti, tasmā, ‘‘katamo samayavimokkho? Cattāri ca jhānāni catasso ca arūpāvacarasamāpattiyo, ayaṃ samayavimokkho’’ti evaṃ samayavimokkhoti vuttā. Lokuttaradhammā pana kālena kālaṃ vimuccanti, sakiṃ vimuttāni hi maggaphalāni vimuttāneva honti. Nibbānaṃ sabbakilesehi accantaṃ vimuttamevāti ime nava dhammā asamayavimokkhoti vuttā.
அகுப்பா சேதோவிமுத்தீதி அரஹத்தப²லவிமுத்தி. அயமத்தோ² ஏதஸ்ஸாதி ஏதத³த்த²ங், அரஹத்தப²லத்த²மித³ங் ப்³ரஹ்மசரியங். அயங் ஏதஸ்ஸ அத்தோ²தி வுத்தங் ஹோதி. ஏதங் ஸாரந்தி ஏதங் அரஹத்தப²லங் ப்³ரஹ்மசரியஸ்ஸ ஸாரங். ஏதங் பரியோஸானந்தி ஏதங் அரஹத்தப²லங் ப்³ரஹ்மசரியஸ்ஸ பரியோஸானங், ஏஸா கோடி, ந இதோ பரங் பத்தப்³ப³ங் அத்தீ²தி யதா²னுஸந்தி⁴னாவ தே³ஸனங் நிட்ட²பேஸீதி.
Akuppā cetovimuttīti arahattaphalavimutti. Ayamattho etassāti etadatthaṃ, arahattaphalatthamidaṃ brahmacariyaṃ. Ayaṃ etassa atthoti vuttaṃ hoti. Etaṃ sāranti etaṃ arahattaphalaṃ brahmacariyassa sāraṃ. Etaṃ pariyosānanti etaṃ arahattaphalaṃ brahmacariyassa pariyosānaṃ, esā koṭi, na ito paraṃ pattabbaṃ atthīti yathānusandhināva desanaṃ niṭṭhapesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாஸாரோபமஸுத்தவண்ணனா நிட்டி²தா.
Mahāsāropamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. மஹாஸாரோபமஸுத்தங் • 9. Mahāsāropamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. மஹாஸாரோபமஸுத்தவண்ணனா • 9. Mahāsāropamasuttavaṇṇanā
