| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
8. மஹாதண்ஹாஸங்க²யஸுத்தங்
8. Mahātaṇhāsaṅkhayasuttaṃ
396. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாதிஸ்ஸ நாம பி⁴க்கு²னோ கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் ஹோதி – ‘‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி அனஞ்ஞ’’ந்தி. அஸ்ஸோஸுங் கோ² ஸம்ப³ஹுலா பி⁴க்கூ² – ‘‘ஸாதிஸ்ஸ கிர நாம பி⁴க்கு²னோ கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’’ந்தி. அத² கோ² தே பி⁴க்கூ² யேன ஸாதி பி⁴க்கு² கேவட்டபுத்தோ தேனுபஸங்கமிங்ஸு; உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோசுங் – ‘‘ஸச்சங் கிர தே, ஆவுஸோ ஸாதி, ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’’ந்தி? ‘‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’ந்தி. அத² கோ² தே பி⁴க்கூ² ஸாதிங் பி⁴க்கு²ங் கேவட்டபுத்தங் ஏதஸ்மா பாபகா தி³ட்டி²க³தா விவேசேதுகாமா ஸமனுயுஞ்ஜந்தி ஸமனுகா³ஹந்தி ஸமனுபா⁴ஸந்தி – ‘‘மா ஏவங், ஆவுஸோ ஸாதி, அவச, மா ப⁴க³வந்தங் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னங், ந ஹி ப⁴க³வா ஏவங் வதெ³ய்ய. அனேகபரியாயேனாவுஸோ ஸாதி, படிச்சஸமுப்பன்னங் விஞ்ஞாணங் வுத்தங் ப⁴க³வதா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோ’’தி. ஏவம்பி கோ² ஸாதி பி⁴க்கு² கேவட்டபுத்தோ தேஹி பி⁴க்கூ²ஹி ஸமனுயுஞ்ஜியமானோ ஸமனுகா³ஹியமானோ ஸமனுபா⁴ஸியமானோ ததே³வ பாபகங் தி³ட்டி²க³தங் தா²மஸா பராமாஸா அபி⁴னிவிஸ்ஸ வோஹரதி – ‘‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி அனஞ்ஞ’’ந்தி.
396. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sātissa nāma bhikkhuno kevaṭṭaputtassa evarūpaṃ pāpakaṃ diṭṭhigataṃ uppannaṃ hoti – ‘‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati anañña’’nti. Assosuṃ kho sambahulā bhikkhū – ‘‘sātissa kira nāma bhikkhuno kevaṭṭaputtassa evarūpaṃ pāpakaṃ diṭṭhigataṃ uppannaṃ – ‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’’nti. Atha kho te bhikkhū yena sāti bhikkhu kevaṭṭaputto tenupasaṅkamiṃsu; upasaṅkamitvā sātiṃ bhikkhuṃ kevaṭṭaputtaṃ etadavocuṃ – ‘‘saccaṃ kira te, āvuso sāti, evarūpaṃ pāpakaṃ diṭṭhigataṃ uppannaṃ – ‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’’nti? ‘‘Evaṃ byā kho ahaṃ, āvuso, bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’nti. Atha kho te bhikkhū sātiṃ bhikkhuṃ kevaṭṭaputtaṃ etasmā pāpakā diṭṭhigatā vivecetukāmā samanuyuñjanti samanugāhanti samanubhāsanti – ‘‘mā evaṃ, āvuso sāti, avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya. Anekapariyāyenāvuso sāti, paṭiccasamuppannaṃ viññāṇaṃ vuttaṃ bhagavatā, aññatra paccayā natthi viññāṇassa sambhavo’’ti. Evampi kho sāti bhikkhu kevaṭṭaputto tehi bhikkhūhi samanuyuñjiyamāno samanugāhiyamāno samanubhāsiyamāno tadeva pāpakaṃ diṭṭhigataṃ thāmasā parāmāsā abhinivissa voharati – ‘‘evaṃ byā kho ahaṃ, āvuso, bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati anañña’’nti.
397. யதோ கோ² தே பி⁴க்கூ² நாஸக்கி²ங்ஸு ஸாதிங் பி⁴க்கு²ங் கேவட்டபுத்தங் ஏதஸ்மா பாபகா தி³ட்டி²க³தா விவேசேதுங், அத² கோ² தே பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘ஸாதிஸ்ஸ நாம, ப⁴ந்தே, பி⁴க்கு²னோ கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’ந்தி. அஸ்ஸும்ஹ கோ² மயங், ப⁴ந்தே, ஸாதிஸ்ஸ கிர நாம பி⁴க்கு²னோ கேவட்டபுத்தஸ்ஸ ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’ந்தி. அத² கோ² மயங், ப⁴ந்தே, யேன ஸாதி பி⁴க்கு² கேவட்டபுத்தோ தேனுபஸங்கமிம்ஹ; உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோசும்ஹ – ‘ஸச்சங் கிர தே, ஆவுஸோ ஸாதி, ஏவரூபங் பாபகங் தி³ட்டி²க³தங் உப்பன்னங் – ‘‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’ந்தி? ஏவங் வுத்தே, ப⁴ந்தே, ஸாதி பி⁴க்கு² கேவட்டபுத்தோ அம்ஹே ஏதத³வோச – ‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’ந்தி. அத² கோ² மயங், ப⁴ந்தே, ஸாதிங் பி⁴க்கு²ங் கேவட்டபுத்தங் ஏதஸ்மா பாபகா தி³ட்டி²க³தா விவேசேதுகாமா ஸமனுயுஞ்ஜிம்ஹ ஸமனுகா³ஹிம்ஹ ஸமனுபா⁴ஸிம்ஹ – ‘மா ஏவங், ஆவுஸோ ஸாதி, அவச, மா ப⁴க³வந்தங் அப்³பா⁴சிக்கி², ந ஹி ஸாது⁴ ப⁴க³வதோ அப்³ப⁴க்கா²னங், ந ஹி ப⁴க³வா ஏவங் வதெ³ய்ய. அனேகபரியாயேனாவுஸோ ஸாதி, படிச்சஸமுப்பன்னங் விஞ்ஞாணங் வுத்தங் ப⁴க³வதா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோ’தி. ஏவம்பி கோ², ப⁴ந்தே, ஸாதி பி⁴க்கு² கேவட்டபுத்தோ அம்ஹேஹி ஸமனுயுஞ்ஜியமானோ ஸமனுகா³ஹியமானோ ஸமனுபா⁴ஸியமானோ ததே³வ பாபகங் தி³ட்டி²க³தங் தா²மஸா பராமஸா அபி⁴னிவிஸ்ஸ வோஹரதி – ‘ஏவங் ப்³யா கோ² அஹங், ஆவுஸோ, ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’ந்தி. யதோ கோ² மயங், ப⁴ந்தே, நாஸக்கி²ம்ஹ ஸாதிங் பி⁴க்கு²ங் கேவட்டபுத்தங் ஏதஸ்மா பாபகா தி³ட்டி²க³தா விவேசேதுங், அத² மயங் ஏதமத்த²ங் ப⁴க³வதோ ஆரோசேமா’’தி.
397. Yato kho te bhikkhū nāsakkhiṃsu sātiṃ bhikkhuṃ kevaṭṭaputtaṃ etasmā pāpakā diṭṭhigatā vivecetuṃ, atha kho te bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘sātissa nāma, bhante, bhikkhuno kevaṭṭaputtassa evarūpaṃ pāpakaṃ diṭṭhigataṃ uppannaṃ – ‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’nti. Assumha kho mayaṃ, bhante, sātissa kira nāma bhikkhuno kevaṭṭaputtassa evarūpaṃ pāpakaṃ diṭṭhigataṃ uppannaṃ – ‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’nti. Atha kho mayaṃ, bhante, yena sāti bhikkhu kevaṭṭaputto tenupasaṅkamimha; upasaṅkamitvā sātiṃ bhikkhuṃ kevaṭṭaputtaṃ etadavocumha – ‘saccaṃ kira te, āvuso sāti, evarūpaṃ pāpakaṃ diṭṭhigataṃ uppannaṃ – ‘‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’nti? Evaṃ vutte, bhante, sāti bhikkhu kevaṭṭaputto amhe etadavoca – ‘evaṃ byā kho ahaṃ, āvuso, bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’nti. Atha kho mayaṃ, bhante, sātiṃ bhikkhuṃ kevaṭṭaputtaṃ etasmā pāpakā diṭṭhigatā vivecetukāmā samanuyuñjimha samanugāhimha samanubhāsimha – ‘mā evaṃ, āvuso sāti, avaca, mā bhagavantaṃ abbhācikkhi, na hi sādhu bhagavato abbhakkhānaṃ, na hi bhagavā evaṃ vadeyya. Anekapariyāyenāvuso sāti, paṭiccasamuppannaṃ viññāṇaṃ vuttaṃ bhagavatā, aññatra paccayā natthi viññāṇassa sambhavo’ti. Evampi kho, bhante, sāti bhikkhu kevaṭṭaputto amhehi samanuyuñjiyamāno samanugāhiyamāno samanubhāsiyamāno tadeva pāpakaṃ diṭṭhigataṃ thāmasā parāmasā abhinivissa voharati – ‘evaṃ byā kho ahaṃ, āvuso, bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’nti. Yato kho mayaṃ, bhante, nāsakkhimha sātiṃ bhikkhuṃ kevaṭṭaputtaṃ etasmā pāpakā diṭṭhigatā vivecetuṃ, atha mayaṃ etamatthaṃ bhagavato ārocemā’’ti.
398. அத² கோ² ப⁴க³வா அஞ்ஞதரங் பி⁴க்கு²ங் ஆமந்தேஸி – ‘‘ஏஹி த்வங் பி⁴க்கு², மம வசனேன ஸாதிங் பி⁴க்கு²ங் கேவட்டபுத்தங் ஆமந்தேஹி – ‘ஸத்தா² தங், ஆவுஸோ ஸாதி, ஆமந்தேதீ’’’தி. ‘‘ஏவங், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேன ஸாதி பி⁴க்கு² கேவட்டபுத்தோ தேனுபஸங்கமி; உபஸங்கமித்வா ஸாதிங் பி⁴க்கு²ங் கேவட்டபுத்தங் ஏதத³வோச – ‘‘ஸத்தா² தங், ஆவுஸோ ஸாதி, ஆமந்தேதீ’’தி. ‘‘ஏவமாவுஸோ’’தி கோ² ஸாதி பி⁴க்கு² கேவட்டபுத்தோ தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஸாதிங் பி⁴க்கு²ங் கேவட்டபுத்தங் ப⁴க³வா ஏதத³வோச – ‘‘ஸச்சங் கிர, தே, ஸாதி, ஏவரூபங் பாபகங் தி³ட்டி²க³தங் உப்பன்னங் – ‘ததா²ஹங் ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’’ந்தி? ‘‘ஏவங் ப்³யா கோ² அஹங், ப⁴ந்தே, ப⁴க³வதா த⁴ம்மங் தே³ஸிதங் ஆஜானாமி யதா² ததே³வித³ங் விஞ்ஞாணங் ஸந்தா⁴வதி ஸங்ஸரதி, அனஞ்ஞ’’ந்தி. ‘‘கதமங் தங், ஸாதி, விஞ்ஞாண’’ந்தி? ‘‘ய்வாயங், ப⁴ந்தே, வதோ³ வேதெ³ய்யோ தத்ர தத்ர கல்யாணபாபகானங் கம்மானங் விபாகங் படிஸங்வேதே³தீ’’தி. ‘‘கஸ்ஸ நு கோ² நாம த்வங், மோக⁴புரிஸ, மயா ஏவங் த⁴ம்மங் தே³ஸிதங் ஆஜானாஸி? நனு மயா, மோக⁴புரிஸ, அனேகபரியாயேன படிச்சஸமுப்பன்னங் விஞ்ஞாணங் வுத்தங், அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோதி? அத² ச பன த்வங், மோக⁴புரிஸ, அத்தனா து³க்³க³ஹிதேன அம்ஹே சேவ அப்³பா⁴சிக்க²ஸி, அத்தானஞ்ச க²ணஸி, ப³ஹுஞ்ச அபுஞ்ஞங் பஸவஸி. தஞ்ஹி தே, மோக⁴புரிஸ, ப⁴விஸ்ஸதி தீ³க⁴ரத்தங் அஹிதாய து³க்கா²யா’’தி.
398. Atha kho bhagavā aññataraṃ bhikkhuṃ āmantesi – ‘‘ehi tvaṃ bhikkhu, mama vacanena sātiṃ bhikkhuṃ kevaṭṭaputtaṃ āmantehi – ‘satthā taṃ, āvuso sāti, āmantetī’’’ti. ‘‘Evaṃ, bhante’’ti kho so bhikkhu bhagavato paṭissutvā yena sāti bhikkhu kevaṭṭaputto tenupasaṅkami; upasaṅkamitvā sātiṃ bhikkhuṃ kevaṭṭaputtaṃ etadavoca – ‘‘satthā taṃ, āvuso sāti, āmantetī’’ti. ‘‘Evamāvuso’’ti kho sāti bhikkhu kevaṭṭaputto tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho sātiṃ bhikkhuṃ kevaṭṭaputtaṃ bhagavā etadavoca – ‘‘saccaṃ kira, te, sāti, evarūpaṃ pāpakaṃ diṭṭhigataṃ uppannaṃ – ‘tathāhaṃ bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’’nti? ‘‘Evaṃ byā kho ahaṃ, bhante, bhagavatā dhammaṃ desitaṃ ājānāmi yathā tadevidaṃ viññāṇaṃ sandhāvati saṃsarati, anañña’’nti. ‘‘Katamaṃ taṃ, sāti, viññāṇa’’nti? ‘‘Yvāyaṃ, bhante, vado vedeyyo tatra tatra kalyāṇapāpakānaṃ kammānaṃ vipākaṃ paṭisaṃvedetī’’ti. ‘‘Kassa nu kho nāma tvaṃ, moghapurisa, mayā evaṃ dhammaṃ desitaṃ ājānāsi? Nanu mayā, moghapurisa, anekapariyāyena paṭiccasamuppannaṃ viññāṇaṃ vuttaṃ, aññatra paccayā natthi viññāṇassa sambhavoti? Atha ca pana tvaṃ, moghapurisa, attanā duggahitena amhe ceva abbhācikkhasi, attānañca khaṇasi, bahuñca apuññaṃ pasavasi. Tañhi te, moghapurisa, bhavissati dīgharattaṃ ahitāya dukkhāyā’’ti.
399. அத² கோ² ப⁴க³வா பி⁴க்கூ² ஆமந்தேஸி – ‘‘தங் கிங் மஞ்ஞத², பி⁴க்க²வே, அபி நாயங் ஸாதி பி⁴க்கு² கேவட்டபுத்தோ உஸ்மீகதோபி இமஸ்மிங் த⁴ம்மவினயே’’தி? ‘‘கிஞ்ஹி ஸியா ப⁴ந்தே? நோ ஹேதங், ப⁴ந்தே’’தி. ஏவங் வுத்தே, ஸாதி பி⁴க்கு² கேவட்டபுத்தோ துண்ஹீபூ⁴தோ மங்குபூ⁴தோ பத்தக்க²ந்தோ⁴ அதோ⁴முகோ² பஜ்ஜா²யந்தோ அப்படிபா⁴னோ நிஸீதி³. அத² கோ² ப⁴க³வா ஸாதிங் பி⁴க்கு²ங் கேவட்டபுத்தங் துண்ஹீபூ⁴தங் மங்குபூ⁴தங் பத்தக்க²ந்த⁴ங் அதோ⁴முக²ங் பஜ்ஜா²யந்தங் அப்படிபா⁴னங் விதி³த்வா ஸாதிங் பி⁴க்கு²ங் கேவட்டபுத்தங் ஏதத³வோச – ‘‘பஞ்ஞாயிஸ்ஸஸி கோ² த்வங், மோக⁴புரிஸ, ஏதேன ஸகேன பாபகேன தி³ட்டி²க³தேன. இதா⁴ஹங் பி⁴க்கூ² படிபுச்சி²ஸ்ஸாமீ’’தி. அத² கோ² ப⁴க³வா பி⁴க்கூ² ஆமந்தேஸி – ‘‘தும்ஹேபி மே, பி⁴க்க²வே, ஏவங் த⁴ம்மங் தே³ஸிதங் ஆஜானாத² யதா²யங் ஸாதி பி⁴க்கு² கேவட்டபுத்தோ அத்தனா து³க்³க³ஹிதேன அம்ஹே சேவ அப்³பா⁴சிக்க²தி, அத்தானஞ்ச க²ணதி, ப³ஹுஞ்ச அபுஞ்ஞங் பஸவதீ’’தி? ‘‘நோ ஹேதங், ப⁴ந்தே! அனேகபரியாயேன ஹி நோ, ப⁴ந்தே, படிச்சஸமுப்பன்னங் விஞ்ஞாணங் வுத்தங் ப⁴க³வதா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோ’’தி. ‘‘ஸாது⁴ ஸாது⁴, பி⁴க்க²வே! ஸாது⁴ கோ² மே தும்ஹே, பி⁴க்க²வே, ஏவங் த⁴ம்மங் தே³ஸிதங் ஆஜானாத². அனேகபரியாயேன ஹி வோ, பி⁴க்க²வே, படிச்சஸமுப்பன்னங் விஞ்ஞாணங் வுத்தங் மயா, அஞ்ஞத்ர பச்சயா நத்தி² விஞ்ஞாணஸ்ஸ ஸம்ப⁴வோதி. அத² ச பனாயங் ஸாதி பி⁴க்கு² கேவட்டபுத்தோ அத்தனா து³க்³க³ஹிதேன அம்ஹே சேவ அப்³பா⁴சிக்க²தி, அத்தானஞ்ச க²ணதி, ப³ஹுஞ்ச அபுஞ்ஞங் பஸவதி பஸவதி. தஞ்ஹி தஸ்ஸ மோக⁴புரிஸஸ்ஸ ப⁴விஸ்ஸதி தீ³க⁴ரத்தங் அஹிதாய து³க்கா²ய.
399. Atha kho bhagavā bhikkhū āmantesi – ‘‘taṃ kiṃ maññatha, bhikkhave, api nāyaṃ sāti bhikkhu kevaṭṭaputto usmīkatopi imasmiṃ dhammavinaye’’ti? ‘‘Kiñhi siyā bhante? No hetaṃ, bhante’’ti. Evaṃ vutte, sāti bhikkhu kevaṭṭaputto tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi. Atha kho bhagavā sātiṃ bhikkhuṃ kevaṭṭaputtaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhānaṃ viditvā sātiṃ bhikkhuṃ kevaṭṭaputtaṃ etadavoca – ‘‘paññāyissasi kho tvaṃ, moghapurisa, etena sakena pāpakena diṭṭhigatena. Idhāhaṃ bhikkhū paṭipucchissāmī’’ti. Atha kho bhagavā bhikkhū āmantesi – ‘‘tumhepi me, bhikkhave, evaṃ dhammaṃ desitaṃ ājānātha yathāyaṃ sāti bhikkhu kevaṭṭaputto attanā duggahitena amhe ceva abbhācikkhati, attānañca khaṇati, bahuñca apuññaṃ pasavatī’’ti? ‘‘No hetaṃ, bhante! Anekapariyāyena hi no, bhante, paṭiccasamuppannaṃ viññāṇaṃ vuttaṃ bhagavatā, aññatra paccayā natthi viññāṇassa sambhavo’’ti. ‘‘Sādhu sādhu, bhikkhave! Sādhu kho me tumhe, bhikkhave, evaṃ dhammaṃ desitaṃ ājānātha. Anekapariyāyena hi vo, bhikkhave, paṭiccasamuppannaṃ viññāṇaṃ vuttaṃ mayā, aññatra paccayā natthi viññāṇassa sambhavoti. Atha ca panāyaṃ sāti bhikkhu kevaṭṭaputto attanā duggahitena amhe ceva abbhācikkhati, attānañca khaṇati, bahuñca apuññaṃ pasavati pasavati. Tañhi tassa moghapurisassa bhavissati dīgharattaṃ ahitāya dukkhāya.
400. ‘‘யங் யதே³வ, பி⁴க்க²வே, பச்சயங் படிச்ச உப்பஜ்ஜதி விஞ்ஞாணங், தேன தேனேவ விஞ்ஞாணங்த்வேவ ஸங்க்²யங் க³ச்ச²தி 1. சக்கு²ஞ்ச படிச்ச ரூபே ச உப்பஜ்ஜதி விஞ்ஞாணங், சக்கு²விஞ்ஞாணங்த்வேவ ஸங்க்²யங் க³ச்ச²தி; ஸோதஞ்ச படிச்ச ஸத்³தே³ ச உப்பஜ்ஜதி விஞ்ஞாணங், ஸோதவிஞ்ஞாணங்த்வேவ ஸங்க்²யங் க³ச்ச²தி; கா⁴னஞ்ச படிச்ச க³ந்தே⁴ ச உப்பஜ்ஜதி விஞ்ஞாணங், கா⁴னவிஞ்ஞாணங்த்வேவ ஸங்க்²யங் க³ச்ச²தி; ஜிவ்ஹஞ்ச படிச்ச ரஸே ச உப்பஜ்ஜதி விஞ்ஞாணங், ஜிவ்ஹாவிஞ்ஞாணங்த்வேவ ஸங்க்²யங் க³ச்ச²தி; காயஞ்ச படிச்ச பொ²ட்ட²ப்³பே³ ச உப்பஜ்ஜதி விஞ்ஞாணங், காயவிஞ்ஞாணங்த்வேவ ஸங்க்²யங் க³ச்ச²தி; மனஞ்ச படிச்ச த⁴ம்மே ச உப்பஜ்ஜதி விஞ்ஞாணங், மனோவிஞ்ஞாணங்த்வேவ ஸங்க்²யங் க³ச்ச²தி.
400. ‘‘Yaṃ yadeva, bhikkhave, paccayaṃ paṭicca uppajjati viññāṇaṃ, tena teneva viññāṇaṃtveva saṅkhyaṃ gacchati 2. Cakkhuñca paṭicca rūpe ca uppajjati viññāṇaṃ, cakkhuviññāṇaṃtveva saṅkhyaṃ gacchati; sotañca paṭicca sadde ca uppajjati viññāṇaṃ, sotaviññāṇaṃtveva saṅkhyaṃ gacchati; ghānañca paṭicca gandhe ca uppajjati viññāṇaṃ, ghānaviññāṇaṃtveva saṅkhyaṃ gacchati; jivhañca paṭicca rase ca uppajjati viññāṇaṃ, jivhāviññāṇaṃtveva saṅkhyaṃ gacchati; kāyañca paṭicca phoṭṭhabbe ca uppajjati viññāṇaṃ, kāyaviññāṇaṃtveva saṅkhyaṃ gacchati; manañca paṭicca dhamme ca uppajjati viññāṇaṃ, manoviññāṇaṃtveva saṅkhyaṃ gacchati.
‘‘ஸெய்யதா²பி, பி⁴க்க²வே, யங் யதே³வ பச்சயங் படிச்ச அக்³கி³ ஜலதி தேன தேனேவ ஸங்க்²யங் க³ச்ச²தி. கட்ட²ஞ்ச படிச்ச அக்³கி³ ஜலதி, கட்ட²க்³கி³த்வேவ ஸங்க்²யங் க³ச்ச²தி; ஸகலிகஞ்ச படிச்ச அக்³கி³ ஜலதி, ஸகலிகக்³கி³த்வேவ ஸங்க்²யங் க³ச்ச²தி; திணஞ்ச படிச்ச அக்³கி³ ஜலதி, திணக்³கி³த்வேவ ஸங்க்²யங் க³ச்ச²தி; கோ³மயஞ்ச படிச்ச அக்³கி³ ஜலதி, கோ³மயக்³கி³த்வேவ ஸங்க்²யங் க³ச்ச²தி; து²ஸஞ்ச படிச்ச அக்³கி³ ஜலதி, து²ஸக்³கி³த்வேவ ஸங்க்²யங் க³ச்ச²தி; ஸங்காரஞ்ச படிச்ச அக்³கி³ ஜலதி, ஸங்காரக்³கி³த்வேவ ஸங்க்²யங் க³ச்ச²தி. ஏவமேவ கோ², பி⁴க்க²வே, யங் யதே³வ பச்சயங் படிச்ச உப்பஜ்ஜதி விஞ்ஞாணங், தேன தேனேவ ஸங்க்²யங் க³ச்ச²தி. சக்கு²ஞ்ச படிச்ச ரூபே ச உப்பஜ்ஜதி விஞ்ஞாணங், சக்கு²விஞ்ஞாணங்த்வேவ ஸங்க்²யங் க³ச்ச²தி; ஸோதஞ்ச படிச்ச ஸத்³தே³ ச உப்பஜ்ஜதி விஞ்ஞாணங், ஸோதவிஞ்ஞாணங்த்வேவ ஸங்க்²யங் க³ச்ச²தி, கா⁴னஞ்ச படிச்ச க³ந்தே⁴ ச உப்பஜ்ஜதி விஞ்ஞாணங் , கா⁴ணவிஞ்ஞாணங்த்வேவ ஸங்க்²யங் க³ச்ச²தி, ஜிவ்ஹஞ்ச படிச்ச ரஸே ச உப்பஜ்ஜதி விஞ்ஞாணங், ஜிவ்ஹாவிஞ்ஞாணங்த்வேவ ஸங்க்²யங் க³ச்ச²தி. காயஞ்ச படிச்ச பொ²ட்ட²ப்³பே³ ச உப்பஜ்ஜதி விஞ்ஞாணங், காயவிஞ்ஞாணங்த்வேவ ஸங்க்²யங் க³ச்ச²தி. மனஞ்ச படிச்ச த⁴ம்மே ச உப்பஜ்ஜதி விஞ்ஞாணங், மனோவிஞ்ஞாணங்த்வேவ ஸங்க்²யங் க³ச்ச²தி.
‘‘Seyyathāpi, bhikkhave, yaṃ yadeva paccayaṃ paṭicca aggi jalati tena teneva saṅkhyaṃ gacchati. Kaṭṭhañca paṭicca aggi jalati, kaṭṭhaggitveva saṅkhyaṃ gacchati; sakalikañca paṭicca aggi jalati, sakalikaggitveva saṅkhyaṃ gacchati; tiṇañca paṭicca aggi jalati, tiṇaggitveva saṅkhyaṃ gacchati; gomayañca paṭicca aggi jalati, gomayaggitveva saṅkhyaṃ gacchati; thusañca paṭicca aggi jalati, thusaggitveva saṅkhyaṃ gacchati; saṅkārañca paṭicca aggi jalati, saṅkāraggitveva saṅkhyaṃ gacchati. Evameva kho, bhikkhave, yaṃ yadeva paccayaṃ paṭicca uppajjati viññāṇaṃ, tena teneva saṅkhyaṃ gacchati. Cakkhuñca paṭicca rūpe ca uppajjati viññāṇaṃ, cakkhuviññāṇaṃtveva saṅkhyaṃ gacchati; sotañca paṭicca sadde ca uppajjati viññāṇaṃ, sotaviññāṇaṃtveva saṅkhyaṃ gacchati, ghānañca paṭicca gandhe ca uppajjati viññāṇaṃ , ghāṇaviññāṇaṃtveva saṅkhyaṃ gacchati, jivhañca paṭicca rase ca uppajjati viññāṇaṃ, jivhāviññāṇaṃtveva saṅkhyaṃ gacchati. Kāyañca paṭicca phoṭṭhabbe ca uppajjati viññāṇaṃ, kāyaviññāṇaṃtveva saṅkhyaṃ gacchati. Manañca paṭicca dhamme ca uppajjati viññāṇaṃ, manoviññāṇaṃtveva saṅkhyaṃ gacchati.
401. ‘‘பூ⁴தமித³ந்தி , பி⁴க்க²வே, பஸ்ஸதா²’’தி?
401. ‘‘Bhūtamidanti , bhikkhave, passathā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரஸம்ப⁴வந்தி, பி⁴க்க²வே, பஸ்ஸதா²’’தி?
‘‘Tadāhārasambhavanti, bhikkhave, passathā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மந்தி, பி⁴க்க²வே, பஸ்ஸதா²’’தி?
‘‘Tadāhāranirodhā yaṃ bhūtaṃ, taṃ nirodhadhammanti, bhikkhave, passathā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘பூ⁴தமித³ங் நொஸ்ஸூதி, பி⁴க்க²வே, கங்க²தோ உப்பஜ்ஜதி விசிகிச்சா²’’தி?
‘‘Bhūtamidaṃ nossūti, bhikkhave, kaṅkhato uppajjati vicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரஸம்ப⁴வங் நொஸ்ஸூதி, பி⁴க்க²வே , கங்க²தோ உப்பஜ்ஜதி விசிகிச்சா²’’தி?
‘‘Tadāhārasambhavaṃ nossūti, bhikkhave , kaṅkhato uppajjati vicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மங் நொஸ்ஸூதி, பி⁴க்க²வே, கங்க²தோ உப்பஜ்ஜதி விசிகிச்சா²’’தி?
‘‘Tadāhāranirodhā yaṃ bhūtaṃ, taṃ nirodhadhammaṃ nossūti, bhikkhave, kaṅkhato uppajjati vicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘பூ⁴தமித³ந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதோ யா விசிகிச்சா² ஸா பஹீயதீ’’தி?
‘‘Bhūtamidanti, bhikkhave, yathābhūtaṃ sammappaññāya passato yā vicikicchā sā pahīyatī’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரஸம்ப⁴வந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதாஏ யா விசிகிச்சா² ஸா பஹீயதீ’’தி?
‘‘Tadāhārasambhavanti, bhikkhave, yathābhūtaṃ sammappaññāya passatāe yā vicikicchā sā pahīyatī’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரனிரோதா⁴ யங் பூ⁴தங், தங் நிரோத⁴த⁴ம்மந்தி, பி⁴க்க²வே, யதா²பூ⁴தங் ஸம்மப்பஞ்ஞாய பஸ்ஸதாஏ யா விசிகிச்சா² ஸா பஹீயதீ’’தி?
‘‘Tadāhāranirodhā yaṃ bhūtaṃ, taṃ nirodhadhammanti, bhikkhave, yathābhūtaṃ sammappaññāya passatāe yā vicikicchā sā pahīyatī’’ti?
‘‘ஏவங் , ப⁴ந்தே’’.
‘‘Evaṃ , bhante’’.
‘‘பூ⁴தமித³ந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘Bhūtamidanti, bhikkhave, itipi vo ettha nibbicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரஸம்ப⁴வந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘Tadāhārasambhavanti, bhikkhave, itipi vo ettha nibbicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரனிரோதா⁴ யங் பூ⁴தங் தங் நிரோத⁴த⁴ம்மந்தி, பி⁴க்க²வே, இதிபி வோ எத்த² நிப்³பி³சிகிச்சா²’’தி?
‘‘Tadāhāranirodhā yaṃ bhūtaṃ taṃ nirodhadhammanti, bhikkhave, itipi vo ettha nibbicikicchā’’ti?
‘‘ஏவங், ப⁴ந்தே’’.
‘‘Evaṃ, bhante’’.
‘‘பூ⁴தமித³ந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘Bhūtamidanti, bhikkhave, yathābhūtaṃ sammappaññāya sudiṭṭha’’nti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரஸம்ப⁴வந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘Tadāhārasambhavanti, bhikkhave, yathābhūtaṃ sammappaññāya sudiṭṭha’’nti?
‘‘ஏவங், ப⁴ந்தே’’.
‘‘Evaṃ, bhante’’.
‘‘ததா³ஹாரனிரோதா⁴ யங் பூ⁴தங் தங் நிரோத⁴த⁴ம்மந்தி, பி⁴க்க²வே, யதா²பூ⁴தங் ஸம்மப்பஞ்ஞாய ஸுதி³ட்ட²’’ந்தி?
‘‘Tadāhāranirodhā yaṃ bhūtaṃ taṃ nirodhadhammanti, bhikkhave, yathābhūtaṃ sammappaññāya sudiṭṭha’’nti?
‘‘ஏவங், ப⁴ந்தே’’.
‘‘Evaṃ, bhante’’.
‘‘இமங் சே தும்ஹே, பி⁴க்க²வே, தி³ட்டி²ங் ஏவங் பரிஸுத்³த⁴ங் ஏவங் பரியோதா³தங் அல்லீயேத² கேலாயேத² த⁴னாயேத² மமாயேத², அபி நு மே தும்ஹே, பி⁴க்க²வே, குல்லூபமங் த⁴ம்மங் தே³ஸிதங் ஆஜானெய்யாத² நித்த²ரணத்தா²ய நோ க³ஹணத்தா²யா’’தி?
‘‘Imaṃ ce tumhe, bhikkhave, diṭṭhiṃ evaṃ parisuddhaṃ evaṃ pariyodātaṃ allīyetha kelāyetha dhanāyetha mamāyetha, api nu me tumhe, bhikkhave, kullūpamaṃ dhammaṃ desitaṃ ājāneyyātha nittharaṇatthāya no gahaṇatthāyā’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘இமங் சே தும்ஹே, பி⁴க்க²வே, தி³ட்டி²ங் ஏவங் பரிஸுத்³த⁴ங் ஏவங் பரியோதா³தங் ந அல்லீயேத² ந கேலாயேத² ந த⁴னாயேத² ந மமாயேத², அபி நு மே தும்ஹே, பி⁴க்க²வே, குல்லூபமங் த⁴ம்மங் தே³ஸிதங் ஆஜானெய்யாத² நித்த²ரணத்தா²ய நோ க³ஹணத்தா²யா’’தி?
‘‘Imaṃ ce tumhe, bhikkhave, diṭṭhiṃ evaṃ parisuddhaṃ evaṃ pariyodātaṃ na allīyetha na kelāyetha na dhanāyetha na mamāyetha, api nu me tumhe, bhikkhave, kullūpamaṃ dhammaṃ desitaṃ ājāneyyātha nittharaṇatthāya no gahaṇatthāyā’’ti?
‘‘ஏவங், ப⁴ந்தே’’.
‘‘Evaṃ, bhante’’.
402. ‘‘சத்தாரோமே, பி⁴க்க²வே, ஆஹாரா பூ⁴தானங் வா ஸத்தானங் டி²தியா, ஸம்ப⁴வேஸீனங் வா அனுக்³க³ஹாய. கதமே சத்தாரோ? கப³ளீகாரோ ஆஹாரோ ஓளாரிகோ வா ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணங் சதுத்த²ங்.
402. ‘‘Cattārome, bhikkhave, āhārā bhūtānaṃ vā sattānaṃ ṭhitiyā, sambhavesīnaṃ vā anuggahāya. Katame cattāro? Kabaḷīkāro āhāro oḷāriko vā sukhumo vā, phasso dutiyo, manosañcetanā tatiyā, viññāṇaṃ catutthaṃ.
‘‘இமே ச, பி⁴க்க²வே, சத்தாரோ ஆஹாரா கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘Ime ca, bhikkhave, cattāro āhārā kiṃnidānā kiṃsamudayā kiṃjātikā kiṃpabhavā?
‘‘இமே சத்தாரோ ஆஹாரா தண்ஹானிதா³னா தண்ஹாஸமுத³யா தண்ஹாஜாதிகா தண்ஹாபப⁴வா.
‘‘Ime cattāro āhārā taṇhānidānā taṇhāsamudayā taṇhājātikā taṇhāpabhavā.
‘‘தண்ஹா சாயங், பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘Taṇhā cāyaṃ, bhikkhave, kiṃnidānā kiṃsamudayā kiṃjātikā kiṃpabhavā?
‘‘தண்ஹா வேத³னானிதா³னா வேத³னாஸமுத³யா வேத³னாஜாதிகா வேத³னாபப⁴வா.
‘‘Taṇhā vedanānidānā vedanāsamudayā vedanājātikā vedanāpabhavā.
‘‘வேத³னா சாயங், பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘Vedanā cāyaṃ, bhikkhave, kiṃnidānā kiṃsamudayā kiṃjātikā kiṃpabhavā?
‘‘வேத³னா ப²ஸ்ஸனிதா³னா ப²ஸ்ஸஸமுத³யா ப²ஸ்ஸஜாதிகா ப²ஸ்ஸபப⁴வா .
‘‘Vedanā phassanidānā phassasamudayā phassajātikā phassapabhavā .
‘‘ப²ஸ்ஸோ சாயங், பி⁴க்க²வே, கிங்னிதா³னோ கிங்ஸமுத³யோ கிங்ஜாதிகோ கிங்பப⁴வோ?
‘‘Phasso cāyaṃ, bhikkhave, kiṃnidāno kiṃsamudayo kiṃjātiko kiṃpabhavo?
‘‘ப²ஸ்ஸோ ஸளாயதனநிதா³னோ ஸளாயதனஸமுத³யோ ஸளாயதனஜாதிகோ ஸளாயதனபப⁴வோ.
‘‘Phasso saḷāyatananidāno saḷāyatanasamudayo saḷāyatanajātiko saḷāyatanapabhavo.
‘‘ஸளாயதனங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘Saḷāyatanaṃ cidaṃ, bhikkhave, kiṃnidānaṃ kiṃsamudayaṃ kiṃjātikaṃ kiṃpabhavaṃ?
‘‘ஸளாயதனங் நாமரூபனிதா³னங் நாமரூபஸமுத³யங் நாமரூபஜாதிகங் நாமரூபபப⁴வங்.
‘‘Saḷāyatanaṃ nāmarūpanidānaṃ nāmarūpasamudayaṃ nāmarūpajātikaṃ nāmarūpapabhavaṃ.
‘‘நாமரூபங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘Nāmarūpaṃ cidaṃ, bhikkhave, kiṃnidānaṃ kiṃsamudayaṃ kiṃjātikaṃ kiṃpabhavaṃ?
‘‘நாமரூபங் விஞ்ஞாணனிதா³னங் விஞ்ஞாணஸமுத³யங் விஞ்ஞாணஜாதிகங் விஞ்ஞாணபப⁴வங்.
‘‘Nāmarūpaṃ viññāṇanidānaṃ viññāṇasamudayaṃ viññāṇajātikaṃ viññāṇapabhavaṃ.
‘‘விஞ்ஞாணங் சித³ங், பி⁴க்க²வே, கிங்னிதா³னங் கிங்ஸமுத³யங் கிங்ஜாதிகங் கிங்பப⁴வங்?
‘‘Viññāṇaṃ cidaṃ, bhikkhave, kiṃnidānaṃ kiṃsamudayaṃ kiṃjātikaṃ kiṃpabhavaṃ?
‘‘விஞ்ஞாணங் ஸங்கா²ரனிதா³னங் ஸங்கா²ரஸமுத³யங் ஸங்கா²ரஜாதிகங் ஸங்கா²ரபப⁴வங்.
‘‘Viññāṇaṃ saṅkhāranidānaṃ saṅkhārasamudayaṃ saṅkhārajātikaṃ saṅkhārapabhavaṃ.
‘‘ஸங்கா²ரா சிமே, பி⁴க்க²வே, கிங்னிதா³னா கிங்ஸமுத³யா கிங்ஜாதிகா கிங்பப⁴வா?
‘‘Saṅkhārā cime, bhikkhave, kiṃnidānā kiṃsamudayā kiṃjātikā kiṃpabhavā?
‘‘ஸங்கா²ரா அவிஜ்ஜானிதா³னா அவிஜ்ஜாஸமுத³யா அவிஜ்ஜாஜாதிகா அவிஜ்ஜாபப⁴வா.
‘‘Saṅkhārā avijjānidānā avijjāsamudayā avijjājātikā avijjāpabhavā.
‘‘இதி கோ², பி⁴க்க²வே, அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங், உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.’’’
‘‘Iti kho, bhikkhave, avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.’’’
403. ‘‘ஜாதிபச்சயா ஜராமரணந்தி இதி கோ² பனேதங் வுத்தங்; ஜாதிபச்சயா நு கோ², பி⁴க்க²வே, ஜராமரணங், நோ வா, கத²ங் வா எத்த² 3 ஹோதீ’’தி? ‘‘ஜாதிபச்சயா, ப⁴ந்தே, ஜராமரணங்; ஏவங் நோ எத்த² ஹோதி 4 – ஜாதிபச்சயா ஜராமரண’’ந்தி. ‘‘ப⁴வபச்சயா ஜாதீதி இதி கோ² பனேதங் வுத்தங்; ப⁴வபச்சயா நு கோ², பி⁴க்க²வே, ஜாதி, நோ வா, கத²ங் வா எத்த² ஹோதீ’’தி? ‘‘ப⁴வபச்சயா, ப⁴ந்தே , ஜாதி; ஏவங் நோ எத்த² ஹோதி – ப⁴வபச்சயா ஜாதீ’’தி . ‘‘உபாதா³னபச்சயா ப⁴வோதி இதி கோ² பனேதங் வுத்தங்; உபாதா³னபச்சயா நு கோ², பி⁴க்க²வே, ப⁴வோ, நோ வா, கத²ங் வா எத்த² ஹோதீ’’தி? ‘‘உபாதா³னபச்சயா, ப⁴ந்தே, ப⁴வோ; ஏவங் நோ எத்த² ஹோதி – உபாதா³னபச்சயா ப⁴வோ’’தி. ‘‘தண்ஹாபச்சயா உபாதா³னந்தி இதி கோ² பனேதங் வுத்தங், தண்ஹாபச்சயா நு கோ², பி⁴க்க²வே, உபாதா³னங், நோ வா, கத²ங் வா எத்த² ஹோதீ’’தி? ‘‘தண்ஹாபச்சயா, ப⁴ந்தே, உபாதா³னங்; ஏவங் நோ எத்த² ஹோதி – தண்ஹாபச்சயா உபாதா³ன’’ந்தி. ‘‘வேத³னாபச்சயா தண்ஹாதி இதி கோ² பனேதங் வுத்தங்; வேத³னாபச்சயா நு கோ², பி⁴க்க²வே, தண்ஹா, நோ வா, கத²ங் வா எத்த² ஹோதீ’’தி? ‘‘வேத³னாபச்சயா, ப⁴ந்தே, தண்ஹா; ஏவங் நோ எத்த² ஹோதி – வேத³னாபச்சயா தண்ஹா’’தி. ‘‘ப²ஸ்ஸபச்சயா வேத³னாதி இதி கோ² பனேதங் வுத்தங்; ப²ஸ்ஸபச்சயா நு கோ², பி⁴க்க²வே, வேத³னா, நோ வா, கத²ங் வா எத்த² ஹோதீ’’தி? ‘‘ப²ஸ்ஸபச்சயா, ப⁴ந்தே, வேத³னா; ஏவங் நோ எத்த² ஹோதி – ப²ஸ்ஸபச்சயா வேத³னா’’தி. ‘‘ஸளாயதனபச்சயா ப²ஸ்ஸோதி இதி கோ² பனேதங் வுத்தங்; ஸளாயதனபச்சயா நு கோ², பி⁴க்க²வே, ப²ஸ்ஸோ, நோ வா, கத²ங் வா எத்த² ஹோதீ’’தி? ‘‘ஸளாயதனபச்சயா, ப⁴ந்தே, ப²ஸ்ஸோ; ஏவங் நோ எத்த² ஹோதி – ஸளாயதனபச்சயா ப²ஸ்ஸோ’’தி. ‘‘நாமரூபபச்சயா ஸளாயதனந்தி இதி கோ² பனேதங் வுத்தங்; நாமரூபபச்சயா நு கோ², பி⁴க்க²வே, ஸளாயதனங், நோ வா, கத²ங் வா எத்த² ஹோதீ’’தி? ‘‘நாமரூபபச்சயா, ப⁴ந்தே, ஸளாயதனங்; ஏவங் நோ எத்த² ஹோதி – நாமரூபபச்சயா ஸளாயதன’’ந்தி. ‘‘விஞ்ஞாணபச்சயா நாமரூபந்தி இதி கோ² பனேதங் வுத்தங்; விஞ்ஞாணபச்சயா நு கோ², பி⁴க்க²வே, நாமரூபங், நோ வா, கத²ங் வா எத்த² ஹோதீ’’தி? ‘‘விஞ்ஞாணபச்சயா, ப⁴ந்தே, நாமரூபங்; ஏவங் நோ எத்த² ஹோதி – விஞ்ஞாணபச்சயா நாமரூப’’ந்தி. ‘‘ஸங்கா²ரபச்சயா விஞ்ஞாணந்தி இதி கோ² பனேதங் வுத்தங்; ஸங்கா²ரபச்சயா நு கோ², பி⁴க்க²வே, விஞ்ஞாணங், நோ வா, கத²ங் வா எத்த² ஹோதீ’’தி? ‘‘ஸங்கா²ரபச்சயா, ப⁴ந்தே, விஞ்ஞாணங்; ஏவங் நோ எத்த² ஹோதி – ஸங்கா²ரபச்சயா விஞ்ஞாண’’ந்தி. ‘‘அவிஜ்ஜாபச்சயா ஸங்கா²ராதி இதி கோ² பனேதங் வுத்தங்; அவிஜ்ஜாபச்சயா நு கோ², பி⁴க்க²வே, ஸங்கா²ரா, நோ வா, கத²ங் வா எத்த² ஹோதீ’’தி? ‘‘அவிஜ்ஜாபச்சயா, ப⁴ந்தே, ஸங்கா²ரா; ஏவங் நோ எத்த² ஹோதி – அவிஜ்ஜாபச்சயா ஸங்கா²ரா’’தி.
403. ‘‘Jātipaccayā jarāmaraṇanti iti kho panetaṃ vuttaṃ; jātipaccayā nu kho, bhikkhave, jarāmaraṇaṃ, no vā, kathaṃ vā ettha 5 hotī’’ti? ‘‘Jātipaccayā, bhante, jarāmaraṇaṃ; evaṃ no ettha hoti 6 – jātipaccayā jarāmaraṇa’’nti. ‘‘Bhavapaccayā jātīti iti kho panetaṃ vuttaṃ; bhavapaccayā nu kho, bhikkhave, jāti, no vā, kathaṃ vā ettha hotī’’ti? ‘‘Bhavapaccayā, bhante , jāti; evaṃ no ettha hoti – bhavapaccayā jātī’’ti . ‘‘Upādānapaccayā bhavoti iti kho panetaṃ vuttaṃ; upādānapaccayā nu kho, bhikkhave, bhavo, no vā, kathaṃ vā ettha hotī’’ti? ‘‘Upādānapaccayā, bhante, bhavo; evaṃ no ettha hoti – upādānapaccayā bhavo’’ti. ‘‘Taṇhāpaccayā upādānanti iti kho panetaṃ vuttaṃ, taṇhāpaccayā nu kho, bhikkhave, upādānaṃ, no vā, kathaṃ vā ettha hotī’’ti? ‘‘Taṇhāpaccayā, bhante, upādānaṃ; evaṃ no ettha hoti – taṇhāpaccayā upādāna’’nti. ‘‘Vedanāpaccayā taṇhāti iti kho panetaṃ vuttaṃ; vedanāpaccayā nu kho, bhikkhave, taṇhā, no vā, kathaṃ vā ettha hotī’’ti? ‘‘Vedanāpaccayā, bhante, taṇhā; evaṃ no ettha hoti – vedanāpaccayā taṇhā’’ti. ‘‘Phassapaccayā vedanāti iti kho panetaṃ vuttaṃ; phassapaccayā nu kho, bhikkhave, vedanā, no vā, kathaṃ vā ettha hotī’’ti? ‘‘Phassapaccayā, bhante, vedanā; evaṃ no ettha hoti – phassapaccayā vedanā’’ti. ‘‘Saḷāyatanapaccayā phassoti iti kho panetaṃ vuttaṃ; saḷāyatanapaccayā nu kho, bhikkhave, phasso, no vā, kathaṃ vā ettha hotī’’ti? ‘‘Saḷāyatanapaccayā, bhante, phasso; evaṃ no ettha hoti – saḷāyatanapaccayā phasso’’ti. ‘‘Nāmarūpapaccayā saḷāyatananti iti kho panetaṃ vuttaṃ; nāmarūpapaccayā nu kho, bhikkhave, saḷāyatanaṃ, no vā, kathaṃ vā ettha hotī’’ti? ‘‘Nāmarūpapaccayā, bhante, saḷāyatanaṃ; evaṃ no ettha hoti – nāmarūpapaccayā saḷāyatana’’nti. ‘‘Viññāṇapaccayā nāmarūpanti iti kho panetaṃ vuttaṃ; viññāṇapaccayā nu kho, bhikkhave, nāmarūpaṃ, no vā, kathaṃ vā ettha hotī’’ti? ‘‘Viññāṇapaccayā, bhante, nāmarūpaṃ; evaṃ no ettha hoti – viññāṇapaccayā nāmarūpa’’nti. ‘‘Saṅkhārapaccayā viññāṇanti iti kho panetaṃ vuttaṃ; saṅkhārapaccayā nu kho, bhikkhave, viññāṇaṃ, no vā, kathaṃ vā ettha hotī’’ti? ‘‘Saṅkhārapaccayā, bhante, viññāṇaṃ; evaṃ no ettha hoti – saṅkhārapaccayā viññāṇa’’nti. ‘‘Avijjāpaccayā saṅkhārāti iti kho panetaṃ vuttaṃ; avijjāpaccayā nu kho, bhikkhave, saṅkhārā, no vā, kathaṃ vā ettha hotī’’ti? ‘‘Avijjāpaccayā, bhante, saṅkhārā; evaṃ no ettha hoti – avijjāpaccayā saṅkhārā’’ti.
404. ‘‘ஸாது⁴, பி⁴க்க²வே. இதி கோ², பி⁴க்க²வே, தும்ஹேபி ஏவங் வதே³த², அஹம்பி ஏவங் வதா³மி – இமஸ்மிங் ஸதி இத³ங் ஹோதி, இமஸ்ஸுப்பாதா³ இத³ங் உப்பஜ்ஜதி, யதி³த³ங் – அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங், உபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
404. ‘‘Sādhu, bhikkhave. Iti kho, bhikkhave, tumhepi evaṃ vadetha, ahampi evaṃ vadāmi – imasmiṃ sati idaṃ hoti, imassuppādā idaṃ uppajjati, yadidaṃ – avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘அவிஜ்ஜாயத்வேவ அஸேஸவிராக³னிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴ ஸளாயதனநிரோதோ⁴ , ஸளாயதனநிரோதா⁴ ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴, வேத³னானிரோதா⁴ தண்ஹானிரோதோ⁴, தண்ஹானிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
‘‘Avijjāyatveva asesavirāganirodhā saṅkhāranirodho, saṅkhāranirodhā viññāṇanirodho, viññāṇanirodhā nāmarūpanirodho, nāmarūpanirodhā saḷāyatananirodho , saḷāyatananirodhā phassanirodho, phassanirodhā vedanānirodho, vedanānirodhā taṇhānirodho, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
405. ‘‘ஜாதினிரோதா⁴ ஜராமரணனிரோதோ⁴தி இதி கோ² பனேதங் வுத்தங்; ஜாதினிரோதா⁴ நு கோ², பி⁴க்க²வே, ஜராமரணனிரோதோ⁴, நோ வா, கத²ங் வா எத்த² ஹோதீ’’தி? ‘‘ஜாதினிரோதா⁴, ப⁴ந்தே, ஜராமரணனிரோதோ⁴; ஏவங் நோ எத்த² ஹோதி – ஜாதினிரோதா⁴ ஜராமரணனிரோதோ⁴’’தி. ‘‘ப⁴வனிரோதா⁴ ஜாதினிரோதோ⁴தி இதி கோ² பனேதங் வுத்தங்; ப⁴வனிரோதா⁴ நு கோ², பி⁴க்க²வே, ஜாதினிரோதோ⁴, நோ வா, கத²ங் வா எத்த² ஹோதீ’’தி? ‘‘ப⁴வனிரோதா⁴, ப⁴ந்தே, ஜாதினிரோதோ⁴; ஏவங் நோ எத்த² ஹோதி – ப⁴வனிரோதா⁴ ஜாதினிரோதோ⁴’’தி. ‘‘உபாதா³னநிரோதா⁴ ப⁴வனிரோதோ⁴தி இதி கோ² பனேதங் வுத்தங்; உபாதா³னநிரோதா⁴ நு கோ², பி⁴க்க²வே, ப⁴வனிரோதோ⁴, நோ வா, கத²ங் வா எத்த² ஹோதீ’’தி? ‘‘உபாதா³னநிரோதா⁴, ப⁴ந்தே, ப⁴வனிரோதோ⁴; ஏவங் நோ எத்த² ஹோதி – உபாதா³னநிரோதா⁴ ப⁴வனிரோதோ⁴’’தி. ‘‘தண்ஹானிரோதா⁴ உபாதா³னநிரோதோ⁴தி இதி கோ² பனேதங் வுத்தங்; தண்ஹானிரோதா⁴ நு கோ², பி⁴க்க²வே, உபாதா³னநிரோதோ⁴, நோ வா, கத²ங் வா எத்த² ஹோதீ’’தி? ‘‘தண்ஹானிரோதா⁴, ப⁴ந்தே, உபாதா³னநிரோதோ⁴; ஏவங் நோ எத்த² ஹோதி – தண்ஹானிரோதா⁴ உபாதா³னநிரோதோ⁴’’தி. ‘‘வேத³னானிரோதா⁴ தண்ஹானிரோதோ⁴தி இதி கோ² பனேதங் வுத்தங்; வேத³னானிரோதா⁴ நு கோ², பி⁴க்க²வே, தண்ஹானிரோதோ⁴, நோ வா, கத²ங் வா எத்த² ஹோதீ’’தி? ‘‘வேத³னானிரோதா⁴, ப⁴ந்தே, தண்ஹானிரோதோ⁴; ஏவங் நோ எத்த² ஹோதி – வேத³னானிரோதா⁴ தண்ஹானிரோதோ⁴’’தி. ‘‘ப²ஸ்ஸனிரோதா⁴ வேத³னானிரோதோ⁴தி இதி கோ² பனேதங் வுத்தங்; ப²ஸ்ஸனிரோதா⁴ நு கோ², பி⁴க்க²வே, வேத³னானிரோதோ⁴, நோ வா, கத²ங் வா எத்த² ஹோதீ’’தி? ‘‘ப²ஸ்ஸனிரோதா⁴, ப⁴ந்தே, வேத³னானிரோதோ⁴; ஏவங் நோ எத்த² ஹோதி – ப²ஸ்ஸனிரோதா⁴ வேத³னானிரோதோ⁴’’தி. ‘‘ஸளாயதனநிரோதா⁴ ப²ஸ்ஸனிரோதோ⁴தி இதி கோ² பனேதங் வுத்தங்; ஸளாயதனநிரோதா⁴ நு கோ², பி⁴க்க²வே, ப²ஸ்ஸனிரோதோ⁴, நோ வா , கத²ங் வா எத்த² ஹோதீதி? ஸளாயதனநிரோதா⁴, ப⁴ந்தே, ப²ஸ்ஸனிரோதோ⁴; ஏவங் நோ எத்த² ஹோதி – ஸளாயதனநிரோதா⁴ ப²ஸ்ஸனிரோதோ⁴’’தி. ‘‘நாமரூபனிரோதா⁴ ஸளாயதனநிரோதோ⁴தி இதி கோ² பனேதங் வுத்தங்; நாமரூபனிரோதா⁴ நு கோ², பி⁴க்க²வே, ஸளாயதனநிரோதோ⁴, நோ வா, கத²ங் வா எத்த² ஹோதீ’’தி? ‘‘நாமரூபனிரோதா⁴, ப⁴ந்தே, ஸளாயதனநிரோதோ⁴; ஏவங் நோ எத்த² ஹோதி – நாமரூபனிரோதா⁴ ஸளாயதனநிரோதோ⁴’’தி. ‘‘விஞ்ஞாணனிரோதா⁴ நாமரூபனிரோதோ⁴தி இதி கோ² பனேதங் வுத்தங்; விஞ்ஞாணனிரோதா⁴ நு கோ², பி⁴க்க²வே, நாமரூபனிரோதோ⁴, நோ வா, கத²ங் வா எத்த² ஹோதீ’’தி? ‘‘விஞ்ஞாணனிரோதா⁴, ப⁴ந்தே, நாமரூபனிரோதோ⁴; ஏவங் நோ எத்த² ஹோதி – விஞ்ஞாணனிரோதா⁴ நாமரூபனிரோதோ⁴’’தி. ‘‘ஸங்கா²ரனிரோதா⁴ விஞ்ஞாணனிரோதோ⁴தி இதி கோ² பனேதங் வுத்தங்; ஸங்கா²ரனிரோதா⁴ நு கோ², பி⁴க்க²வே, விஞ்ஞாணனிரோதோ⁴, நோ வா, கத²ங் வா எத்த² ஹோதீ’’தி? ‘‘ஸங்கா²ரனிரோதா⁴, ப⁴ந்தே , விஞ்ஞாணனிரோதோ⁴; ஏவங் நோ எத்த² ஹோதி – ஸங்கா²ரனிரோதா⁴ விஞ்ஞாணனிரோதோ⁴’’தி. ‘‘அவிஜ்ஜானிரோதா⁴ ஸங்கா²ரனிரோதோ⁴தி இதி கோ² பனேதங் வுத்தங்; அவிஜ்ஜானிரோதா⁴ நு கோ², பி⁴க்க²வே, ஸங்கா²ரனிரோதோ⁴, நோ வா, கத²ங் வா எத்த² ஹோதீ’’தி? ‘‘அவிஜ்ஜானிரோதா⁴, ப⁴ந்தே, ஸங்கா²ரனிரோதோ⁴; ஏவங் நோ எத்த² ஹோதி – அவிஜ்ஜானிரோதா⁴ ஸங்கா²ரனிரோதோ⁴’’தி.
405. ‘‘Jātinirodhā jarāmaraṇanirodhoti iti kho panetaṃ vuttaṃ; jātinirodhā nu kho, bhikkhave, jarāmaraṇanirodho, no vā, kathaṃ vā ettha hotī’’ti? ‘‘Jātinirodhā, bhante, jarāmaraṇanirodho; evaṃ no ettha hoti – jātinirodhā jarāmaraṇanirodho’’ti. ‘‘Bhavanirodhā jātinirodhoti iti kho panetaṃ vuttaṃ; bhavanirodhā nu kho, bhikkhave, jātinirodho, no vā, kathaṃ vā ettha hotī’’ti? ‘‘Bhavanirodhā, bhante, jātinirodho; evaṃ no ettha hoti – bhavanirodhā jātinirodho’’ti. ‘‘Upādānanirodhā bhavanirodhoti iti kho panetaṃ vuttaṃ; upādānanirodhā nu kho, bhikkhave, bhavanirodho, no vā, kathaṃ vā ettha hotī’’ti? ‘‘Upādānanirodhā, bhante, bhavanirodho; evaṃ no ettha hoti – upādānanirodhā bhavanirodho’’ti. ‘‘Taṇhānirodhā upādānanirodhoti iti kho panetaṃ vuttaṃ; taṇhānirodhā nu kho, bhikkhave, upādānanirodho, no vā, kathaṃ vā ettha hotī’’ti? ‘‘Taṇhānirodhā, bhante, upādānanirodho; evaṃ no ettha hoti – taṇhānirodhā upādānanirodho’’ti. ‘‘Vedanānirodhā taṇhānirodhoti iti kho panetaṃ vuttaṃ; vedanānirodhā nu kho, bhikkhave, taṇhānirodho, no vā, kathaṃ vā ettha hotī’’ti? ‘‘Vedanānirodhā, bhante, taṇhānirodho; evaṃ no ettha hoti – vedanānirodhā taṇhānirodho’’ti. ‘‘Phassanirodhā vedanānirodhoti iti kho panetaṃ vuttaṃ; phassanirodhā nu kho, bhikkhave, vedanānirodho, no vā, kathaṃ vā ettha hotī’’ti? ‘‘Phassanirodhā, bhante, vedanānirodho; evaṃ no ettha hoti – phassanirodhā vedanānirodho’’ti. ‘‘Saḷāyatananirodhā phassanirodhoti iti kho panetaṃ vuttaṃ; saḷāyatananirodhā nu kho, bhikkhave, phassanirodho, no vā , kathaṃ vā ettha hotīti? Saḷāyatananirodhā, bhante, phassanirodho; evaṃ no ettha hoti – saḷāyatananirodhā phassanirodho’’ti. ‘‘Nāmarūpanirodhā saḷāyatananirodhoti iti kho panetaṃ vuttaṃ; nāmarūpanirodhā nu kho, bhikkhave, saḷāyatananirodho, no vā, kathaṃ vā ettha hotī’’ti? ‘‘Nāmarūpanirodhā, bhante, saḷāyatananirodho; evaṃ no ettha hoti – nāmarūpanirodhā saḷāyatananirodho’’ti. ‘‘Viññāṇanirodhā nāmarūpanirodhoti iti kho panetaṃ vuttaṃ; viññāṇanirodhā nu kho, bhikkhave, nāmarūpanirodho, no vā, kathaṃ vā ettha hotī’’ti? ‘‘Viññāṇanirodhā, bhante, nāmarūpanirodho; evaṃ no ettha hoti – viññāṇanirodhā nāmarūpanirodho’’ti. ‘‘Saṅkhāranirodhā viññāṇanirodhoti iti kho panetaṃ vuttaṃ; saṅkhāranirodhā nu kho, bhikkhave, viññāṇanirodho, no vā, kathaṃ vā ettha hotī’’ti? ‘‘Saṅkhāranirodhā, bhante , viññāṇanirodho; evaṃ no ettha hoti – saṅkhāranirodhā viññāṇanirodho’’ti. ‘‘Avijjānirodhā saṅkhāranirodhoti iti kho panetaṃ vuttaṃ; avijjānirodhā nu kho, bhikkhave, saṅkhāranirodho, no vā, kathaṃ vā ettha hotī’’ti? ‘‘Avijjānirodhā, bhante, saṅkhāranirodho; evaṃ no ettha hoti – avijjānirodhā saṅkhāranirodho’’ti.
406. ‘‘ஸாது⁴, பி⁴க்க²வே. இதி கோ², பி⁴க்க²வே, தும்ஹேபி ஏவங் வதே³த², அஹம்பி ஏவங் வதா³மி – இமஸ்மிங் அஸதி இத³ங் ந ஹோதி, இமஸ்ஸ நிரோதா⁴ இத³ங் நிருஜ்ஜ²தி, யதி³த³ங் – அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴, விஞ்ஞாணனிரோதா⁴ நாமரூபனிரோதோ⁴, நாமரூபனிரோதா⁴ ஸளாயதனநிரோதோ⁴, ஸளாயதனநிரோதா⁴ ப²ஸ்ஸனிரோதோ⁴, ப²ஸ்ஸனிரோதா⁴ வேத³னானிரோதோ⁴, வேத³னானிரோதா⁴ தண்ஹானிரோதோ⁴, தண்ஹானிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
406. ‘‘Sādhu, bhikkhave. Iti kho, bhikkhave, tumhepi evaṃ vadetha, ahampi evaṃ vadāmi – imasmiṃ asati idaṃ na hoti, imassa nirodhā idaṃ nirujjhati, yadidaṃ – avijjānirodhā saṅkhāranirodho, saṅkhāranirodhā viññāṇanirodho, viññāṇanirodhā nāmarūpanirodho, nāmarūpanirodhā saḷāyatananirodho, saḷāyatananirodhā phassanirodho, phassanirodhā vedanānirodho, vedanānirodhā taṇhānirodho, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
407. ‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா புப்³ப³ந்தங் வா படிதா⁴வெய்யாத² – ‘அஹேஸும்ஹ நு கோ² மயங் அதீதமத்³தா⁴னங், நனு கோ² அஹேஸும்ஹ அதீதமத்³தா⁴னங், கிங் நு கோ² அஹேஸும்ஹ அதீதமத்³தா⁴னங், கத²ங் நு கோ² அஹேஸும்ஹ அதீதமத்³தா⁴னங், கிங் ஹுத்வா கிங் அஹேஸும்ஹ நு கோ² மயங் அதீதமத்³தா⁴ன’’’ந்தி?
407. ‘‘Api nu tumhe, bhikkhave, evaṃ jānantā evaṃ passantā pubbantaṃ vā paṭidhāveyyātha – ‘ahesumha nu kho mayaṃ atītamaddhānaṃ, nanu kho ahesumha atītamaddhānaṃ, kiṃ nu kho ahesumha atītamaddhānaṃ, kathaṃ nu kho ahesumha atītamaddhānaṃ, kiṃ hutvā kiṃ ahesumha nu kho mayaṃ atītamaddhāna’’’nti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா அபரந்தங் வா படிதா⁴வெய்யாத² – ப⁴விஸ்ஸாம நு கோ² மயங் அனாக³தமத்³தா⁴னங், நனு கோ² ப⁴விஸ்ஸாம அனாக³தமத்³தா⁴னங், கிங் நு கோ² ப⁴விஸ்ஸாம அனாக³தமத்³தா⁴னங், கத²ங் நு கோ² ப⁴விஸ்ஸாம அனாக³தமத்³தா⁴னங், கிங் ஹுத்வா கிங் ப⁴விஸ்ஸாம நு கோ² மயங் அனாக³தமத்³தா⁴ன’’ந்தி?
‘‘Api nu tumhe, bhikkhave, evaṃ jānantā evaṃ passantā aparantaṃ vā paṭidhāveyyātha – bhavissāma nu kho mayaṃ anāgatamaddhānaṃ, nanu kho bhavissāma anāgatamaddhānaṃ, kiṃ nu kho bhavissāma anāgatamaddhānaṃ, kathaṃ nu kho bhavissāma anāgatamaddhānaṃ, kiṃ hutvā kiṃ bhavissāma nu kho mayaṃ anāgatamaddhāna’’nti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏதரஹி வா பச்சுப்பன்னமத்³தா⁴னங் அஜ்ஜ²த்தங் கத²ங்கதீ² அஸ்ஸத² – அஹங் நு கொ²ஸ்மி, நோ நு கொ²ஸ்மி, கிங் நு கொ²ஸ்மி, கத²ங் நு கொ²ஸ்மி, அயங் நு கோ² ஸத்தோ குதோ ஆக³தோ, ஸோ குஹிங்கா³மீ ப⁴விஸ்ஸதீ’’தி?
‘‘Api nu tumhe, bhikkhave, evaṃ jānantā evaṃ passantā etarahi vā paccuppannamaddhānaṃ ajjhattaṃ kathaṃkathī assatha – ahaṃ nu khosmi, no nu khosmi, kiṃ nu khosmi, kathaṃ nu khosmi, ayaṃ nu kho satto kuto āgato, so kuhiṃgāmī bhavissatī’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏவங் வதெ³ய்யாத² – ஸத்தா² நோ க³ரு, ஸத்து²கா³ரவேன ச மயங் ஏவங் வதே³மா’’தி?
‘‘Api nu tumhe, bhikkhave, evaṃ jānantā evaṃ passantā evaṃ vadeyyātha – satthā no garu, satthugāravena ca mayaṃ evaṃ vademā’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏவங் வதெ³ய்யாத² – ஸமணோ ஏவமாஹ, ஸமணா ச நாம மயங் ஏவங் வதே³மா’’தி?
‘‘Api nu tumhe, bhikkhave, evaṃ jānantā evaṃ passantā evaṃ vadeyyātha – samaṇo evamāha, samaṇā ca nāma mayaṃ evaṃ vademā’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா அஞ்ஞங் ஸத்தா²ரங் உத்³தி³ஸெய்யாதா²’’தி?
‘‘Api nu tumhe, bhikkhave, evaṃ jānantā evaṃ passantā aññaṃ satthāraṃ uddiseyyāthā’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா யானி தானி புது²ஸமணப்³ராஹ்மணானங் வத கோதூஹலமங்க³லானி தானி ஸாரதோ பச்சாக³ச்செ²ய்யாதா²’’தி?
‘‘Api nu tumhe, bhikkhave, evaṃ jānantā evaṃ passantā yāni tāni puthusamaṇabrāhmaṇānaṃ vata kotūhalamaṅgalāni tāni sārato paccāgaccheyyāthā’’ti?
‘‘நோ ஹேதங், ப⁴ந்தே’’.
‘‘No hetaṃ, bhante’’.
‘‘நனு, பி⁴க்க²வே, யதே³வ தும்ஹாகங் ஸாமங் ஞாதங் ஸாமங் தி³ட்ட²ங் ஸாமங் விதி³தங், ததே³வ தும்ஹே வதே³தா²’’தி.
‘‘Nanu, bhikkhave, yadeva tumhākaṃ sāmaṃ ñātaṃ sāmaṃ diṭṭhaṃ sāmaṃ viditaṃ, tadeva tumhe vadethā’’ti.
‘‘ஏவங், ப⁴ந்தே’’.
‘‘Evaṃ, bhante’’.
‘‘ஸாது⁴, பி⁴க்க²வே, உபனீதா கோ² மே தும்ஹே, பி⁴க்க²வே, இமினா ஸந்தி³ட்டி²கேன த⁴ம்மேன அகாலிகேன ஏஹிபஸ்ஸிகேன ஓபனெய்யிகேன பச்சத்தங் வேதி³தப்³பே³ன விஞ்ஞூஹி. ஸந்தி³ட்டி²கோ அயங், பி⁴க்க²வே, த⁴ம்மோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹி – இதி யந்தங் வுத்தங், இத³மேதங் படிச்ச வுத்த’’ந்தி.
‘‘Sādhu, bhikkhave, upanītā kho me tumhe, bhikkhave, iminā sandiṭṭhikena dhammena akālikena ehipassikena opaneyyikena paccattaṃ veditabbena viññūhi. Sandiṭṭhiko ayaṃ, bhikkhave, dhammo akāliko ehipassiko opaneyyiko paccattaṃ veditabbo viññūhi – iti yantaṃ vuttaṃ, idametaṃ paṭicca vutta’’nti.
408. ‘‘திண்ணங் கோ² பன, பி⁴க்க²வே, ஸன்னிபாதா க³ப்³ப⁴ஸ்ஸாவக்கந்தி ஹோதி. இத⁴ மாதாபிதரோ ச ஸன்னிபதிதா ஹொந்தி, மாதா ச ந உதுனீ ஹோதி, க³ந்த⁴ப்³போ³ ச ந பச்சுபட்டி²தோ ஹோதி, நேவ தாவ க³ப்³ப⁴ஸ்ஸாவக்கந்தி ஹோதி. இத⁴ மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி, க³ந்த⁴ப்³போ³ ச ந பச்சுபட்டி²தோ ஹோதி, நேவ தாவ க³ப்³ப⁴ஸ்ஸாவக்கந்தி ஹோதி. யதோ ச கோ², பி⁴க்க²வே, மாதாபிதரோ ச ஸன்னிபதிதா ஹொந்தி, மாதா ச உதுனீ ஹோதி, க³ந்த⁴ப்³போ³ ச பச்சுபட்டி²தோ ஹோதி – ஏவங் திண்ணங் ஸன்னிபாதா க³ப்³ப⁴ஸ்ஸாவக்கந்தி ஹோதி. தமேனங், பி⁴க்க²வே, மாதா நவ வா த³ஸ வா மாஸே க³ப்³ப⁴ங் குச்சி²னா பரிஹரதி மஹதா ஸங்ஸயேன க³ருபா⁴ரங் 7. தமேனங், பி⁴க்க²வே, மாதா நவன்னங் வா த³ஸன்னங் வா மாஸானங் அச்சயேன விஜாயதி மஹதா ஸங்ஸயேன க³ருபா⁴ரங். தமேனங் ஜாதங் ஸமானங் ஸகேன லோஹிதேன போஸேதி. லோஹிதஞ்ஹேதங், பி⁴க்க²வே, அரியஸ்ஸ வினயே யதி³த³ங் மாதுத²ஞ்ஞங். ஸ கோ² ஸோ, பி⁴க்க²வே, குமாரோ வுத்³தி⁴மன்வாய இந்த்³ரியானங் பரிபாகமன்வாய யானி தானி குமாரகானங் கீளாபனகானி தேஹி கீளதி, ஸெய்யதி²த³ங் – வங்ககங் க⁴டிகங் மொக்க²சிகங் சிங்கு³லகங் பத்தாள்ஹகங் ரத²கங் த⁴னுகங். ஸ கோ² ஸோ, பி⁴க்க²வே, குமாரோ வுத்³தி⁴மன்வாய இந்த்³ரியானங் பரிபாகமன்வாய பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி – சக்கு²விஞ்ஞெய்யேஹி ரூபேஹி இட்டே²ஹி கந்தேஹி மனாபேஹி பியரூபேஹி காமூபஸங்ஹிதேஹி ரஜனீயேஹி, ஸோதவிஞ்ஞெய்யேஹி ஸத்³தே³ஹி… கா⁴னவிஞ்ஞெய்யேஹி க³ந்தே⁴ஹி… ஜிவ்ஹாவிஞ்ஞெய்யேஹி ரஸேஹி… காயவிஞ்ஞெய்யேஹி பொ²ட்ட²ப்³பே³ஹி இட்டே²ஹி கந்தேஹி மனாபேஹி பியரூபேஹி காமூபஸங்ஹிதேஹி ரஜனீயேஹி.
408. ‘‘Tiṇṇaṃ kho pana, bhikkhave, sannipātā gabbhassāvakkanti hoti. Idha mātāpitaro ca sannipatitā honti, mātā ca na utunī hoti, gandhabbo ca na paccupaṭṭhito hoti, neva tāva gabbhassāvakkanti hoti. Idha mātāpitaro ca sannipatitā honti, mātā ca utunī hoti, gandhabbo ca na paccupaṭṭhito hoti, neva tāva gabbhassāvakkanti hoti. Yato ca kho, bhikkhave, mātāpitaro ca sannipatitā honti, mātā ca utunī hoti, gandhabbo ca paccupaṭṭhito hoti – evaṃ tiṇṇaṃ sannipātā gabbhassāvakkanti hoti. Tamenaṃ, bhikkhave, mātā nava vā dasa vā māse gabbhaṃ kucchinā pariharati mahatā saṃsayena garubhāraṃ 8. Tamenaṃ, bhikkhave, mātā navannaṃ vā dasannaṃ vā māsānaṃ accayena vijāyati mahatā saṃsayena garubhāraṃ. Tamenaṃ jātaṃ samānaṃ sakena lohitena poseti. Lohitañhetaṃ, bhikkhave, ariyassa vinaye yadidaṃ mātuthaññaṃ. Sa kho so, bhikkhave, kumāro vuddhimanvāya indriyānaṃ paripākamanvāya yāni tāni kumārakānaṃ kīḷāpanakāni tehi kīḷati, seyyathidaṃ – vaṅkakaṃ ghaṭikaṃ mokkhacikaṃ ciṅgulakaṃ pattāḷhakaṃ rathakaṃ dhanukaṃ. Sa kho so, bhikkhave, kumāro vuddhimanvāya indriyānaṃ paripākamanvāya pañcahi kāmaguṇehi samappito samaṅgībhūto paricāreti – cakkhuviññeyyehi rūpehi iṭṭhehi kantehi manāpehi piyarūpehi kāmūpasaṃhitehi rajanīyehi, sotaviññeyyehi saddehi… ghānaviññeyyehi gandhehi… jivhāviññeyyehi rasehi… kāyaviññeyyehi phoṭṭhabbehi iṭṭhehi kantehi manāpehi piyarūpehi kāmūpasaṃhitehi rajanīyehi.
409. ‘‘ஸோ சக்கு²னா ரூபங் தி³ஸ்வா பியரூபே ரூபே ஸாரஜ்ஜதி, அப்பியரூபே ரூபே ப்³யாபஜ்ஜதி, அனுபட்டி²தகாயஸதி ச விஹரதி பரித்தசேதஸோ. தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் நப்பஜானாதி – யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴ங் ஸமாபன்னோ யங் கிஞ்சி வேத³னங் வேதே³தி ஸுக²ங் வா து³க்க²ங் வா அது³க்க²மஸுக²ங் வா, ஸோ தங் வேத³னங் அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் வேத³னங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³ . யா வேத³னாஸு நந்தீ³ தது³பாதா³னங், தஸ்ஸுபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய பியரூபே த⁴ம்மே ஸாரஜ்ஜதி, அப்பியரூபே த⁴ம்மே ப்³யாபஜ்ஜதி, அனுபட்டி²தகாயஸதி ச விஹரதி பரித்தசேதஸோ. தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் நப்பஜானாதி – யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴ங் ஸமாபன்னோ யங் கிஞ்சி வேத³னங் வேதே³தி ஸுக²ங் வா து³க்க²ங் வா அது³க்க²மஸுக²ங் வா, ஸோ தங் வேத³னங் அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் வேத³னங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ உப்பஜ்ஜதி நந்தீ³. யா வேத³னாஸு நந்தீ³ தது³பாதா³னங், தஸ்ஸுபாதா³னபச்சயா ப⁴வோ, ப⁴வபச்சயா ஜாதி, ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
409. ‘‘So cakkhunā rūpaṃ disvā piyarūpe rūpe sārajjati, appiyarūpe rūpe byāpajjati, anupaṭṭhitakāyasati ca viharati parittacetaso. Tañca cetovimuttiṃ paññāvimuttiṃ yathābhūtaṃ nappajānāti – yatthassa te pāpakā akusalā dhammā aparisesā nirujjhanti. So evaṃ anurodhavirodhaṃ samāpanno yaṃ kiñci vedanaṃ vedeti sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhati. Tassa taṃ vedanaṃ abhinandato abhivadato ajjhosāya tiṭṭhato uppajjati nandī . Yā vedanāsu nandī tadupādānaṃ, tassupādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya piyarūpe dhamme sārajjati, appiyarūpe dhamme byāpajjati, anupaṭṭhitakāyasati ca viharati parittacetaso. Tañca cetovimuttiṃ paññāvimuttiṃ yathābhūtaṃ nappajānāti – yatthassa te pāpakā akusalā dhammā aparisesā nirujjhanti. So evaṃ anurodhavirodhaṃ samāpanno yaṃ kiñci vedanaṃ vedeti sukhaṃ vā dukkhaṃ vā adukkhamasukhaṃ vā, so taṃ vedanaṃ abhinandati abhivadati ajjhosāya tiṭṭhati. Tassa taṃ vedanaṃ abhinandato abhivadato ajjhosāya tiṭṭhato uppajjati nandī. Yā vedanāsu nandī tadupādānaṃ, tassupādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
410. ‘‘இத⁴, பி⁴க்க²வே, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங்; கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. தங் த⁴ம்மங் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிங் வா குலே பச்சாஜாதோ. ஸோ தங் த⁴ம்மங் ஸுத்வா ததா²க³தே ஸத்³த⁴ங் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜாபதோ², அப்³போ⁴காஸோ பப்³ப³ஜ்ஜா. நயித³ங் ஸுகரங் அகா³ரங் அஜ்ஜா²வஸதா ஏகந்தபரிபுண்ணங் ஏகந்தபரிஸுத்³த⁴ங் ஸங்க²லிகி²தங் ப்³ரஹ்மசரியங் சரிதுங். யங்னூனாஹங் கேஸமஸ்ஸுங் ஓஹாரெத்வா, காஸாயானி வத்தா²னி அச்சா²தெ³த்வா, அகா³ரஸ்மா அனகா³ரியங் பப்³ப³ஜெய்ய’’’ந்தி. ஸோ அபரேன ஸமயேன அப்பங் வா போ⁴க³க்க²ந்த⁴ங் பஹாய, மஹந்தங் வா போ⁴க³க்க²ந்த⁴ங் பஹாய, அப்பங் வா ஞாதிபரிவட்டங் பஹாய, மஹந்தங் வா ஞாதிபரிவட்டங் பஹாய, கேஸமஸ்ஸுங் ஓஹாரெத்வா, காஸாயானி வத்தா²னி அச்சா²தெ³த்வா, அகா³ரஸ்மா அனகா³ரியங் பப்³ப³ஜதி.
410. ‘‘Idha, bhikkhave, tathāgato loke uppajjati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ; kevalaparipuṇṇaṃ parisuddhaṃ brahmacariyaṃ pakāseti. Taṃ dhammaṃ suṇāti gahapati vā gahapatiputto vā aññatarasmiṃ vā kule paccājāto. So taṃ dhammaṃ sutvā tathāgate saddhaṃ paṭilabhati. So tena saddhāpaṭilābhena samannāgato iti paṭisañcikkhati – ‘sambādho gharāvāso rajāpatho, abbhokāso pabbajjā. Nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ. Yaṃnūnāhaṃ kesamassuṃ ohāretvā, kāsāyāni vatthāni acchādetvā, agārasmā anagāriyaṃ pabbajeyya’’’nti. So aparena samayena appaṃ vā bhogakkhandhaṃ pahāya, mahantaṃ vā bhogakkhandhaṃ pahāya, appaṃ vā ñātiparivaṭṭaṃ pahāya, mahantaṃ vā ñātiparivaṭṭaṃ pahāya, kesamassuṃ ohāretvā, kāsāyāni vatthāni acchādetvā, agārasmā anagāriyaṃ pabbajati.
411. ‘‘ஸோ ஏவங் பப்³ப³ஜிதோ ஸமானோ பி⁴க்கூ²னங் ஸிக்கா²ஸாஜீவஸமாபன்னோ பாணாதிபாதங் பஹாய பாணாதிபாதா படிவிரதோ ஹோதி, நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹரதி.
411. ‘‘So evaṃ pabbajito samāno bhikkhūnaṃ sikkhāsājīvasamāpanno pāṇātipātaṃ pahāya pāṇātipātā paṭivirato hoti, nihitadaṇḍo nihitasattho lajjī dayāpanno sabbapāṇabhūtahitānukampī viharati.
‘‘அதி³ன்னாதா³னங் பஹாய அதி³ன்னாதா³னா படிவிரதோ ஹோதி, தி³ன்னாதா³யீ தி³ன்னபாடிகங்கீ² அதே²னேன ஸுசிபூ⁴தேன அத்தனா விஹரதி.
‘‘Adinnādānaṃ pahāya adinnādānā paṭivirato hoti, dinnādāyī dinnapāṭikaṅkhī athenena sucibhūtena attanā viharati.
‘‘அப்³ரஹ்மசரியங் பஹாய ப்³ரஹ்மசாரீ ஹோதி, ஆராசாரீ விரதோ மேது²னா கா³மத⁴ம்மா.
‘‘Abrahmacariyaṃ pahāya brahmacārī hoti, ārācārī virato methunā gāmadhammā.
‘‘முஸாவாத³ங் பஹாய முஸாவாதா³ படிவிரதோ ஹோதி, ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸங்வாத³கோ லோகஸ்ஸ.
‘‘Musāvādaṃ pahāya musāvādā paṭivirato hoti, saccavādī saccasandho theto paccayiko avisaṃvādako lokassa.
‘‘பிஸுணங் வாசங் பஹாய பிஸுணாய வாசாய படிவிரதோ ஹோதி – இதோ ஸுத்வா ந அமுத்ர அக்கா²தா இமேஸங் பே⁴தா³ய, அமுத்ர வா ஸுத்வா ந இமேஸங் அக்கா²தா அமூஸங் பே⁴தா³ய. இதி பி⁴ன்னானங் வா ஸந்தா⁴தா, ஸஹிதானங் வா அனுப்பதா³தா ஸமக்³கா³ராமோ ஸமக்³க³ரதோ ஸமக்³க³னந்தீ³, ஸமக்³க³கரணிங் வாசங் பா⁴ஸிதா ஹோதி.
‘‘Pisuṇaṃ vācaṃ pahāya pisuṇāya vācāya paṭivirato hoti – ito sutvā na amutra akkhātā imesaṃ bhedāya, amutra vā sutvā na imesaṃ akkhātā amūsaṃ bhedāya. Iti bhinnānaṃ vā sandhātā, sahitānaṃ vā anuppadātā samaggārāmo samaggarato samagganandī, samaggakaraṇiṃ vācaṃ bhāsitā hoti.
‘‘ப²ருஸங் வாசங் பஹாய ப²ருஸாய வாசாய படிவிரதோ ஹோதி – யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா ததா²ரூபிங் வாசங் பா⁴ஸிதா ஹோதி.
‘‘Pharusaṃ vācaṃ pahāya pharusāya vācāya paṭivirato hoti – yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti.
‘‘ஸம்ப²ப்பலாபங் பஹாய ஸம்ப²ப்பலாபா படிவிரதோ ஹோதி, காலவாதீ³ பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, நிதா⁴னவதிங் வாசங் பா⁴ஸிதா காலேன, ஸாபதே³ஸங் பரியந்தவதிங் அத்த²ஸங்ஹிதங்.
‘‘Samphappalāpaṃ pahāya samphappalāpā paṭivirato hoti, kālavādī bhūtavādī atthavādī dhammavādī vinayavādī, nidhānavatiṃ vācaṃ bhāsitā kālena, sāpadesaṃ pariyantavatiṃ atthasaṃhitaṃ.
‘‘ஸோ பீ³ஜகா³மபூ⁴தகா³மஸமாரம்பா⁴ படிவிரதோ ஹோதி, ஏகப⁴த்திகோ ஹோதி ரத்தூபரதோ, விரதோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனா படிவிரதோ ஹோதி, மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி, உச்சாஸயனமஹாஸயனா படிவிரதோ ஹோதி, ஜாதரூபரஜதபடிக்³க³ஹணா படிவிரதோ ஹோதி, ஆமகத⁴ஞ்ஞபடிக்³க³ஹணா படிவிரதோ ஹோதி, ஆமகமங்ஸபடிக்³க³ஹணா படிவிரதோ ஹோதி, இத்தி²குமாரிகபடிக்³க³ஹணா படிவிரதோ ஹோதி, தா³ஸிதா³ஸபடிக்³க³ஹணா படிவிரதோ ஹோதி, அஜேளகபடிக்³க³ஹணா படிவிரதோ ஹோதி, குக்குடஸூகரபடிக்³க³ஹணா படிவிரதோ ஹோதி, ஹத்தி²க³வாஸ்ஸவளவபடிக்³க³ஹணா படிவிரதோ ஹோதி, கெ²த்தவத்து²படிக்³க³ஹணா படிவிரதோ ஹோதி, தூ³தெய்யபஹிணக³மனானுயோகா³ படிவிரதோ ஹோதி, கயவிக்கயா படிவிரதோ ஹோதி, துலாகூடகங்ஸகூடமானகூடா படிவிரதோ ஹோதி, உக்கோடனவஞ்சன-நிகதி-ஸாசியோகா³ படிவிரதோ ஹோதி, சே²த³ன-வத⁴ப³ந்த⁴னவிபராமோஸ-ஆலோப-ஸஹஸாகாரா படிவிரதோ ஹோதி 9.
‘‘So bījagāmabhūtagāmasamārambhā paṭivirato hoti, ekabhattiko hoti rattūparato, virato vikālabhojanā. Naccagītavāditavisūkadassanā paṭivirato hoti, mālāgandhavilepanadhāraṇamaṇḍanavibhūsanaṭṭhānā paṭivirato hoti, uccāsayanamahāsayanā paṭivirato hoti, jātarūparajatapaṭiggahaṇā paṭivirato hoti, āmakadhaññapaṭiggahaṇā paṭivirato hoti, āmakamaṃsapaṭiggahaṇā paṭivirato hoti, itthikumārikapaṭiggahaṇā paṭivirato hoti, dāsidāsapaṭiggahaṇā paṭivirato hoti, ajeḷakapaṭiggahaṇā paṭivirato hoti, kukkuṭasūkarapaṭiggahaṇā paṭivirato hoti, hatthigavāssavaḷavapaṭiggahaṇā paṭivirato hoti, khettavatthupaṭiggahaṇā paṭivirato hoti, dūteyyapahiṇagamanānuyogā paṭivirato hoti, kayavikkayā paṭivirato hoti, tulākūṭakaṃsakūṭamānakūṭā paṭivirato hoti, ukkoṭanavañcana-nikati-sāciyogā paṭivirato hoti, chedana-vadhabandhanaviparāmosa-ālopa-sahasākārā paṭivirato hoti 10.
‘‘ஸோ ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி ஸமாதா³யேவ பக்கமதி . ஸெய்யதா²பி நாம பக்கீ² ஸகுணோ யேன யேனேவ டே³தி ஸபத்தபா⁴ரோவ டே³தி, ஏவமேவ பி⁴க்கு² ஸந்துட்டோ² ஹோதி காயபரிஹாரிகேன சீவரேன, குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி ஸமாதா³யேவ பக்கமதி. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தங் அனவஜ்ஜஸுக²ங் படிஸங்வேதே³தி.
‘‘So santuṭṭho hoti kāyaparihārikena cīvarena kucchiparihārikena piṇḍapātena. So yena yeneva pakkamati samādāyeva pakkamati . Seyyathāpi nāma pakkhī sakuṇo yena yeneva ḍeti sapattabhārova ḍeti, evameva bhikkhu santuṭṭho hoti kāyaparihārikena cīvarena, kucchiparihārikena piṇḍapātena. So yena yeneva pakkamati samādāyeva pakkamati. So iminā ariyena sīlakkhandhena samannāgato ajjhattaṃ anavajjasukhaṃ paṭisaṃvedeti.
‘‘ஸோ சக்கு²னா ரூபங் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங் தஸ்ஸ ஸங்வராய படிபஜ்ஜதி, ரக்க²தி மனிந்த்³ரியங் மனிந்த்³ரியே ஸங்வரங் ஆபஜ்ஜதி. ஸோ இமினா அரியேன இந்த்³ரியஸங்வரேன ஸமன்னாக³தோ அஜ்ஜ²த்தங் அப்³யாஸேகஸுக²ங் படிஸங்வேதே³தி.
‘‘So cakkhunā rūpaṃ disvā na nimittaggāhī hoti nānubyañjanaggāhī. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ tassa saṃvarāya paṭipajjati, rakkhati cakkhundriyaṃ, cakkhundriye saṃvaraṃ āpajjati. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya na nimittaggāhī hoti nānubyañjanaggāhī. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ tassa saṃvarāya paṭipajjati, rakkhati manindriyaṃ manindriye saṃvaraṃ āpajjati. So iminā ariyena indriyasaṃvarena samannāgato ajjhattaṃ abyāsekasukhaṃ paṭisaṃvedeti.
‘‘ஸோ அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி , ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி.
‘‘So abhikkante paṭikkante sampajānakārī hoti, ālokite vilokite sampajānakārī hoti , samiñjite pasārite sampajānakārī hoti, saṅghāṭipattacīvaradhāraṇe sampajānakārī hoti, asite pīte khāyite sāyite sampajānakārī hoti, uccārapassāvakamme sampajānakārī hoti, gate ṭhite nisinne sutte jāgarite bhāsite tuṇhībhāve sampajānakārī hoti.
412. ‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, (இமாய ச அரியாய ஸந்துட்டி²யா ஸமன்னாக³தோ) 11, இமினா ச அரியேன இந்த்³ரியஸங்வரேன ஸமன்னாக³தோ, இமினா ச அரியேன ஸதிஸம்பஜஞ்ஞேன ஸமன்னாக³தோ, விவித்தங் ஸேனாஸனங் ப⁴ஜதி – அரஞ்ஞங் ருக்க²மூலங் பப்³ப³தங் கந்த³ரங் கி³ரிகு³ஹங் ஸுஸானங் வனபத்த²ங் அப்³போ⁴காஸங் பலாலபுஞ்ஜங். ஸோ பச்சா²ப⁴த்தங் பிண்ட³பாதபடிக்கந்தோ நிஸீத³தி பல்லங்கங் ஆபு⁴ஜித்வா, உஜுங் காயங் பணிதா⁴ய, பரிமுக²ங் ஸதிங் உபட்ட²பெத்வா. ஸோ அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தங் பரிஸோதே⁴தி; ப்³யாபாத³பதோ³ஸங் பஹாய அப்³யாபன்னசித்தோ விஹரதி, ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தங் பரிஸோதே⁴தி; தீ²னமித்³த⁴ங் பஹாய விக³ததீ²னமித்³தோ⁴ விஹரதி ஆலோகஸஞ்ஞீ, ஸதோ ஸம்பஜானோ, தீ²னமித்³தா⁴ சித்தங் பரிஸோதே⁴தி; உத்³த⁴ச்சகுக்குச்சங் பஹாய அனுத்³த⁴தோ விஹரதி அஜ்ஜ²த்தங் வூபஸந்தசித்தோ, உத்³த⁴ச்சகுக்குச்சா சித்தங் பரிஸோதே⁴தி; விசிகிச்ச²ங் பஹாய திண்ணவிசிகிச்சோ² விஹரதி அகத²ங்கதீ² குஸலேஸு த⁴ம்மேஸு, விசிகிச்சா²ய சித்தங் பரிஸோதே⁴தி.
412. ‘‘So iminā ca ariyena sīlakkhandhena samannāgato, (imāya ca ariyāya santuṭṭhiyā samannāgato) 12, iminā ca ariyena indriyasaṃvarena samannāgato, iminā ca ariyena satisampajaññena samannāgato, vivittaṃ senāsanaṃ bhajati – araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ. So pacchābhattaṃ piṇḍapātapaṭikkanto nisīdati pallaṅkaṃ ābhujitvā, ujuṃ kāyaṃ paṇidhāya, parimukhaṃ satiṃ upaṭṭhapetvā. So abhijjhaṃ loke pahāya vigatābhijjhena cetasā viharati, abhijjhāya cittaṃ parisodheti; byāpādapadosaṃ pahāya abyāpannacitto viharati, sabbapāṇabhūtahitānukampī, byāpādapadosā cittaṃ parisodheti; thīnamiddhaṃ pahāya vigatathīnamiddho viharati ālokasaññī, sato sampajāno, thīnamiddhā cittaṃ parisodheti; uddhaccakukkuccaṃ pahāya anuddhato viharati ajjhattaṃ vūpasantacitto, uddhaccakukkuccā cittaṃ parisodheti; vicikicchaṃ pahāya tiṇṇavicikiccho viharati akathaṃkathī kusalesu dhammesu, vicikicchāya cittaṃ parisodheti.
413. ‘‘ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே, விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. புன சபரங், பி⁴க்க²வே, பி⁴க்கு² விதக்கவிசாரானங் வூபஸமா அஜ்ஜ²த்தங் ஸம்பஸாத³னங் சேதஸோ ஏகோதி³பா⁴வங் அவிதக்கங் அவிசாரங் ஸமாதி⁴ஜங் பீதிஸுக²ங் து³தியங் ஜா²னங்…பே॰… ததியங் ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி.
413. ‘‘So ime pañca nīvaraṇe pahāya cetaso upakkilese paññāya dubbalīkaraṇe, vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Puna caparaṃ, bhikkhave, bhikkhu vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati.
414. ‘‘ஸோ சக்கு²னா ரூபங் தி³ஸ்வா பியரூபே ரூபே ந ஸாரஜ்ஜதி, அப்பியரூபே ரூபே ந ப்³யாபஜ்ஜதி, உபட்டி²தகாயஸதி ச விஹரதி அப்பமாணசேதஸோ. தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் பஜானாதி – யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴விப்பஹீனோ யங் கிஞ்சி வேத³னங் வேதே³தி, ஸுக²ங் வா து³க்க²ங் வா அது³க்க²மஸுக²ங் வா, ஸோ தங் வேத³னங் நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் வேத³னங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ யா வேத³னாஸு நந்தீ³ ஸா நிருஜ்ஜ²தி. தஸ்ஸ நந்தீ³னிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி. ஸோதேன ஸத்³த³ங் ஸுத்வா…பே॰… கா⁴னேன க³ந்த⁴ங் கா⁴யித்வா…பே॰… ஜிவ்ஹாய ரஸங் ஸாயித்வா…பே॰… காயேன பொ²ட்ட²ப்³ப³ங் பு²ஸித்வா…பே॰… மனஸா த⁴ம்மங் விஞ்ஞாய பியரூபே த⁴ம்மே ந ஸாரஜ்ஜதி, அப்பியரூபே த⁴ம்மே ந ப்³யாபஜ்ஜதி, உபட்டி²தகாயஸதி ச விஹரதி அப்பமாணசேதஸோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் பஜானாதி – யத்த²ஸ்ஸ தே பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோ ஏவங் அனுரோத⁴விரோத⁴விப்பஹீனோ யங் கிஞ்சி வேத³னங் வேதே³தி, ஸுக²ங் வா து³க்க²ங் வா அது³க்க²மஸுக²ங் வா, ஸோ தங் வேத³னங் நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் வேத³னங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ யா வேத³னாஸு நந்தீ³ ஸா நிருஜ்ஜ²தி. தஸ்ஸ நந்தீ³னிரோதா⁴ உபாதா³னநிரோதோ⁴, உபாதா³னநிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி. இமங் கோ² மே தும்ஹே, பி⁴க்க²வே, ஸங்கி²த்தேன தண்ஹாஸங்க²யவிமுத்திங் தா⁴ரேத², ஸாதிங் பன பி⁴க்கு²ங் கேவட்டபுத்தங் மஹாதண்ஹாஜாலதண்ஹாஸங்கா⁴டப்படிமுக்க’’ந்தி.
414. ‘‘So cakkhunā rūpaṃ disvā piyarūpe rūpe na sārajjati, appiyarūpe rūpe na byāpajjati, upaṭṭhitakāyasati ca viharati appamāṇacetaso. Tañca cetovimuttiṃ paññāvimuttiṃ yathābhūtaṃ pajānāti – yatthassa te pāpakā akusalā dhammā aparisesā nirujjhanti. So evaṃ anurodhavirodhavippahīno yaṃ kiñci vedanaṃ vedeti, sukhaṃ vā dukkhaṃ vā adukkhamasukhaṃ vā, so taṃ vedanaṃ nābhinandati nābhivadati nājjhosāya tiṭṭhati. Tassa taṃ vedanaṃ anabhinandato anabhivadato anajjhosāya tiṭṭhato yā vedanāsu nandī sā nirujjhati. Tassa nandīnirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya piyarūpe dhamme na sārajjati, appiyarūpe dhamme na byāpajjati, upaṭṭhitakāyasati ca viharati appamāṇacetaso, tañca cetovimuttiṃ paññāvimuttiṃ yathābhūtaṃ pajānāti – yatthassa te pāpakā akusalā dhammā aparisesā nirujjhanti. So evaṃ anurodhavirodhavippahīno yaṃ kiñci vedanaṃ vedeti, sukhaṃ vā dukkhaṃ vā adukkhamasukhaṃ vā, so taṃ vedanaṃ nābhinandati nābhivadati nājjhosāya tiṭṭhati. Tassa taṃ vedanaṃ anabhinandato anabhivadato anajjhosāya tiṭṭhato yā vedanāsu nandī sā nirujjhati. Tassa nandīnirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti. Imaṃ kho me tumhe, bhikkhave, saṃkhittena taṇhāsaṅkhayavimuttiṃ dhāretha, sātiṃ pana bhikkhuṃ kevaṭṭaputtaṃ mahātaṇhājālataṇhāsaṅghāṭappaṭimukka’’nti.
இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
Idamavoca bhagavā. Attamanā te bhikkhū bhagavato bhāsitaṃ abhinandunti.
மஹாதண்ஹாஸங்க²யஸுத்தங் நிட்டி²தங் அட்ட²மங்.
Mahātaṇhāsaṅkhayasuttaṃ niṭṭhitaṃ aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. மஹாதண்ஹாஸங்க²யஸுத்தவண்ணனா • 8. Mahātaṇhāsaṅkhayasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. மஹாதண்ஹாஸங்க²யஸுத்தவண்ணனா • 8. Mahātaṇhāsaṅkhayasuttavaṇṇanā
