| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. மஹாதண்ஹாஸங்க²யஸுத்தவண்ணனா
8. Mahātaṇhāsaṅkhayasuttavaṇṇanā
396. ஏவங் மே ஸுதந்தி மஹாதண்ஹாஸங்க²யஸுத்தங். தத்த² தி³ட்டி²க³தந்தி அலக³த்³தூ³பமஸுத்தே லத்³தி⁴மத்தங் தி³ட்டி²க³தந்தி வுத்தங், இத⁴ ஸஸ்ஸததி³ட்டி². ஸோ ச பி⁴க்கு² ப³ஹுஸ்ஸுதோ, அயங் அப்பஸ்ஸுதோ, ஜாதகபா⁴ணகோ ப⁴க³வந்தங் ஜாதகங் கதெ²த்வா, ‘‘அஹங், பி⁴க்க²வே, தேன ஸமயேன வெஸ்ஸந்தரோ அஹோஸிங், மஹோஸதோ⁴, விது⁴ரபண்டி³தோ, ஸேனகபண்டி³தோ, மஹாஜனகோ ராஜா அஹோஸி’’ந்தி ஸமோதா⁴னெந்தங் ஸுணாதி. அத²ஸ்ஸ ஏதத³ஹோஸி – ‘‘இமே ரூபவேத³னாஸஞ்ஞாஸங்கா²ரா தத்த² தத்தே²வ நிருஜ்ஜ²ந்தி, விஞ்ஞாணங் பன இத⁴லோகதோ பரலோகங், பரலோகதோ இமங் லோகங் ஸந்தா⁴வதி ஸங்ஸரதீ’’தி ஸஸ்ஸதத³ஸ்ஸனங் உப்பன்னங். தேனாஹ – ‘‘ததே³வித³ங் விஞ்ஞாணங் ஸந்தா⁴வதி ஸங்ஸரதி அனஞ்ஞ’’ந்தி.
396.Evaṃme sutanti mahātaṇhāsaṅkhayasuttaṃ. Tattha diṭṭhigatanti alagaddūpamasutte laddhimattaṃ diṭṭhigatanti vuttaṃ, idha sassatadiṭṭhi. So ca bhikkhu bahussuto, ayaṃ appassuto, jātakabhāṇako bhagavantaṃ jātakaṃ kathetvā, ‘‘ahaṃ, bhikkhave, tena samayena vessantaro ahosiṃ, mahosadho, vidhurapaṇḍito, senakapaṇḍito, mahājanako rājā ahosi’’nti samodhānentaṃ suṇāti. Athassa etadahosi – ‘‘ime rūpavedanāsaññāsaṅkhārā tattha tattheva nirujjhanti, viññāṇaṃ pana idhalokato paralokaṃ, paralokato imaṃ lokaṃ sandhāvati saṃsaratī’’ti sassatadassanaṃ uppannaṃ. Tenāha – ‘‘tadevidaṃ viññāṇaṃ sandhāvati saṃsarati anañña’’nti.
ஸம்மாஸம்பு³த்³தே⁴ன பன, ‘‘விஞ்ஞாணங் பச்சயஸம்ப⁴வங், ஸதி பச்சயே உப்பஜ்ஜதி, வினா பச்சயங் நத்தி² விஞ்ஞாணஸ்ஸ ஸம்ப⁴வோ’’தி வுத்தங். தஸ்மா அயங் பி⁴க்கு² பு³த்³தே⁴ன அகதி²தங் கதே²தி, ஜினசக்கே பஹாரங் தே³தி, வேஸாரஜ்ஜஞாணங் படிபா³ஹதி, ஸோதுகாமங் ஜனங் விஸங்வாதே³தி, அரியபதே² திரியங் நிபதித்வா மஹாஜனஸ்ஸ அஹிதாய து³க்கா²ய படிபன்னோ. யதா² நாம ரஞ்ஞோ ரஜ்ஜே மஹாசோரோ உப்பஜ்ஜமானோ மஹாஜனஸ்ஸ அஹிதாய து³க்கா²ய உப்பஜ்ஜதி, ஏவங் ஜினஸாஸனே சோரோ ஹுத்வா மஹாஜனஸ்ஸ அஹிதாய து³க்கா²ய உப்பன்னோதி வேதி³தப்³போ³. ஸம்ப³ஹுலா பி⁴க்கூ²தி ஜனபத³வாஸினோ பிண்ட³பாதிகபி⁴க்கூ². தேனுபஸங்கமிங்ஸூதி அயங் பரிஸங் லபி⁴த்வா ஸாஸனம்பி அந்தரதா⁴பெய்ய, யாவ பக்க²ங் ந லப⁴தி, தாவதே³வ நங் தி³ட்டி²க³தா விவேசேமாதி ஸுதஸுதட்டா²னதோயேவ அட்ட²த்வா அனிஸீதி³த்வா உபஸங்கமிங்ஸு.
Sammāsambuddhena pana, ‘‘viññāṇaṃ paccayasambhavaṃ, sati paccaye uppajjati, vinā paccayaṃ natthi viññāṇassa sambhavo’’ti vuttaṃ. Tasmā ayaṃ bhikkhu buddhena akathitaṃ katheti, jinacakke pahāraṃ deti, vesārajjañāṇaṃ paṭibāhati, sotukāmaṃ janaṃ visaṃvādeti, ariyapathe tiriyaṃ nipatitvā mahājanassa ahitāya dukkhāya paṭipanno. Yathā nāma rañño rajje mahācoro uppajjamāno mahājanassa ahitāya dukkhāya uppajjati, evaṃ jinasāsane coro hutvā mahājanassa ahitāya dukkhāya uppannoti veditabbo. Sambahulā bhikkhūti janapadavāsino piṇḍapātikabhikkhū. Tenupasaṅkamiṃsūti ayaṃ parisaṃ labhitvā sāsanampi antaradhāpeyya, yāva pakkhaṃ na labhati, tāvadeva naṃ diṭṭhigatā vivecemāti sutasutaṭṭhānatoyeva aṭṭhatvā anisīditvā upasaṅkamiṃsu.
398. கதமங் தங் ஸாதி விஞ்ஞாணந்தி ஸாதி யங் த்வங் விஞ்ஞாணங் ஸந்தா⁴ய வதே³ஸி, கதமங் தங் விஞ்ஞாணந்தி? ய்வாயங், ப⁴ந்தே, வதோ³ வேதெ³ய்யோ தத்ர தத்ர கல்யாணபாபகானங் கம்மானங் விபாகங் படிஸங்வேதே³தீதி, ப⁴ந்தே, யோ அயங் வத³தி வேத³யதி, யோ சாயங் தஹிங் தஹிங் குஸலாகுஸலகம்மானங் விபாகங் பச்சனுபோ⁴தி. இத³ங், ப⁴ந்தே, விஞ்ஞாணங், யமஹங் ஸந்தா⁴ய வதே³மீதி . கஸ்ஸ நு கோ² நாமாதி கஸ்ஸ க²த்தியஸ்ஸ வா ப்³ராஹ்மணஸ்ஸ வா வெஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானங் வா அஞ்ஞதரஸ்ஸ.
398.Katamaṃ taṃ sāti viññāṇanti sāti yaṃ tvaṃ viññāṇaṃ sandhāya vadesi, katamaṃ taṃ viññāṇanti? Yvāyaṃ, bhante, vado vedeyyo tatra tatra kalyāṇapāpakānaṃ kammānaṃ vipākaṃ paṭisaṃvedetīti, bhante, yo ayaṃ vadati vedayati, yo cāyaṃ tahiṃ tahiṃ kusalākusalakammānaṃ vipākaṃ paccanubhoti. Idaṃ, bhante, viññāṇaṃ, yamahaṃ sandhāya vademīti . Kassa nu kho nāmāti kassa khattiyassa vā brāhmaṇassa vā vessasuddagahaṭṭhapabbajitadevamanussānaṃ vā aññatarassa.
399. அத² கோ² ப⁴க³வா பி⁴க்கூ² ஆமந்தேஸீதி கஸ்மா ஆமந்தேஸி? ஸாதிஸ்ஸ கிர ஏவங் அஹோஸி – ‘‘ஸத்தா² மங் ‘மோக⁴புரிஸோ’தி வத³தி, ந ச மோக⁴புரிஸோதி வுத்தமத்தேனேவ மக்³க³ப²லானங் உபனிஸ்ஸயோ ந ஹோதி. உபஸேனம்பி ஹி வங்க³ந்தபுத்தங், ‘அதிலஹுங் கோ² த்வங் மோக⁴புரிஸ பா³ஹுல்லாய ஆவத்தோ’தி (மஹாவ॰ 75) ப⁴க³வா மோக⁴புரிஸவாதே³ன ஓவதி³. தே²ரோ அபரபா⁴கே³ க⁴டெந்தோ வாயமந்தோ ச² அபி⁴ஞ்ஞா ஸச்சா²காஸி. அஹம்பி ததா²ரூபங் வீரியங் பக்³க³ண்ஹித்வா மக்³க³ப²லானி நிப்³ப³த்தெஸ்ஸாமீ’’தி. அத²ஸ்ஸ ப⁴க³வா சி²ன்னபச்சயோ அயங் ஸாஸனே அவிருள்ஹத⁴ம்மோதி த³ஸ்ஸெந்தோ பி⁴க்கூ² ஆமந்தேஸி. உஸ்மீகதோதிஆதி³ ஹெட்டா² வுத்தாதி⁴ப்பாயமேவ. அத² கோ² ப⁴க³வாதி அயம்பி பாடியேக்கோ அனுஸந்தி⁴. ஸாதிஸ்ஸ கிர ஏதத³ஹோஸி – ‘‘ப⁴க³வா மய்ஹங் மக்³க³ப²லானங் உபனிஸ்ஸயோ நத்தீ²தி வத³தி, கிங் ஸக்கா உபனிஸ்ஸயே அஸதி காதுங்? ந ஹி ததா²க³தா ஸஉபனிஸ்ஸயஸ்ஸேவ த⁴ம்மங் தே³ஸெந்தி, யஸ்ஸ கஸ்ஸசி தே³ஸெந்தியேவ. அஹங் பு³த்³த⁴ஸ்ஸ ஸந்திகா ஸுக³தோவாத³ங் லபி⁴த்வா ஸக்³க³ஸம்பத்தூபக³ங் குஸலங் கரிஸ்ஸாமீ’’தி. அத²ஸ்ஸ ப⁴க³வா, ‘‘நாஹங், மோக⁴புரிஸ, துய்ஹங் ஓவாத³ங் வா அனுஸாஸனிங் வா தே³மீ’’தி ஸுக³தோவாத³ங் படிப்பஸ்ஸம்பெ⁴ந்தோ இமங் தே³ஸனங் ஆரபி⁴. தஸ்ஸத்தோ² ஹெட்டா² வுத்தனயேனேவ வேதி³தப்³போ³. இதா³னி பரிஸாய லத்³தி⁴ங் ஸோதெ⁴ந்தோ, ‘‘இதா⁴ஹங் பி⁴க்கூ² படிபுச்சி²ஸ்ஸாமீ’’திஆதி³மாஹ. தங் ஸப்³ப³ம்பி ஹெட்டா² வுத்தனயேனேவ வேதி³தப்³ப³ங்.
399.Atha kho bhagavā bhikkhū āmantesīti kasmā āmantesi? Sātissa kira evaṃ ahosi – ‘‘satthā maṃ ‘moghapuriso’ti vadati, na ca moghapurisoti vuttamatteneva maggaphalānaṃ upanissayo na hoti. Upasenampi hi vaṅgantaputtaṃ, ‘atilahuṃ kho tvaṃ moghapurisa bāhullāya āvatto’ti (mahāva. 75) bhagavā moghapurisavādena ovadi. Thero aparabhāge ghaṭento vāyamanto cha abhiññā sacchākāsi. Ahampi tathārūpaṃ vīriyaṃ paggaṇhitvā maggaphalāni nibbattessāmī’’ti. Athassa bhagavā chinnapaccayo ayaṃ sāsane aviruḷhadhammoti dassento bhikkhū āmantesi. Usmīkatotiādi heṭṭhā vuttādhippāyameva. Atha kho bhagavāti ayampi pāṭiyekko anusandhi. Sātissa kira etadahosi – ‘‘bhagavā mayhaṃ maggaphalānaṃ upanissayo natthīti vadati, kiṃ sakkā upanissaye asati kātuṃ? Na hi tathāgatā saupanissayasseva dhammaṃ desenti, yassa kassaci desentiyeva. Ahaṃ buddhassa santikā sugatovādaṃ labhitvā saggasampattūpagaṃ kusalaṃ karissāmī’’ti. Athassa bhagavā, ‘‘nāhaṃ, moghapurisa, tuyhaṃ ovādaṃ vā anusāsaniṃ vā demī’’ti sugatovādaṃ paṭippassambhento imaṃ desanaṃ ārabhi. Tassattho heṭṭhā vuttanayeneva veditabbo. Idāni parisāya laddhiṃ sodhento, ‘‘idhāhaṃ bhikkhū paṭipucchissāmī’’tiādimāha. Taṃ sabbampi heṭṭhā vuttanayeneva veditabbaṃ.
400. இதா³னி விஞ்ஞாணஸ்ஸ ஸப்பச்சயபா⁴வங் த³ஸ்ஸேதுங் யங் யதே³வ, பி⁴க்க²வேதிஆதி³மாஹ. தத்த² மனஞ்ச படிச்ச த⁴ம்மே சாதி ஸஹாவஜ்ஜனேன ப⁴வங்க³மனஞ்ச தேபூ⁴மகத⁴ம்மே ச படிச்ச. கட்ட²ஞ்ச படிச்சாதிஆதி³ ஓபம்மனித³ஸ்ஸனத்த²ங் வுத்தங். தேன கிங் தீ³பேதி? த்³வாரஸங்கந்தியா அபா⁴வங். யதா² ஹி கட்ட²ங் படிச்ச ஜலமானோ அக்³கி³ உபாதா³னபச்சயே ஸதியேவ ஜலதி, தஸ்மிங் அஸதி பச்சயவேகல்லேன தத்தே²வ வூபஸம்மதி, ந ஸகலிகாதீ³னி ஸங்கமித்வா ஸகலிகக்³கீ³திஆதி³ஸங்க்²யங் க³ச்ச²தி, ஏவமேவ சக்கு²ஞ்ச படிச்ச ரூபே ச உப்பன்னங் விஞ்ஞாணங் தஸ்மிங் த்³வாரே சக்கு²ரூபஆலோகமனஸிகாரஸங்கா²தே பச்சயம்ஹி ஸதியேவ உப்பஜ்ஜதி, தஸ்மிங் அஸதி பச்சயவேகல்லேன தத்தே²வ நிருஜ்ஜ²தி, ந ஸோதாதீ³னி ஸங்கமித்வா ஸோதவிஞ்ஞாணந்திஆதி³ஸங்க்²யங் க³ச்ச²தி . ஏஸ நயோ ஸப்³ப³வாரேஸு. இதி ப⁴க³வா நாஹங் விஞ்ஞாணப்பவத்தே த்³வாரஸங்கந்திமத்தம்பி வதா³மி, அயங் பன ஸாதி மோக⁴புரிஸோ ப⁴வஸங்கந்திங் வத³தீதி ஸாதிங் நிக்³க³ஹேஸி.
400. Idāni viññāṇassa sappaccayabhāvaṃ dassetuṃ yaṃ yadeva, bhikkhavetiādimāha. Tattha manañca paṭicca dhamme cāti sahāvajjanena bhavaṅgamanañca tebhūmakadhamme ca paṭicca. Kaṭṭhañca paṭiccātiādi opammanidassanatthaṃ vuttaṃ. Tena kiṃ dīpeti? Dvārasaṅkantiyā abhāvaṃ. Yathā hi kaṭṭhaṃ paṭicca jalamāno aggi upādānapaccaye satiyeva jalati, tasmiṃ asati paccayavekallena tattheva vūpasammati, na sakalikādīni saṅkamitvā sakalikaggītiādisaṅkhyaṃ gacchati, evameva cakkhuñca paṭicca rūpe ca uppannaṃ viññāṇaṃ tasmiṃ dvāre cakkhurūpaālokamanasikārasaṅkhāte paccayamhi satiyeva uppajjati, tasmiṃ asati paccayavekallena tattheva nirujjhati, na sotādīni saṅkamitvā sotaviññāṇantiādisaṅkhyaṃ gacchati . Esa nayo sabbavāresu. Iti bhagavā nāhaṃ viññāṇappavatte dvārasaṅkantimattampi vadāmi, ayaṃ pana sāti moghapuriso bhavasaṅkantiṃ vadatīti sātiṃ niggahesi.
401. ஏவங் விஞ்ஞாணஸ்ஸ ஸப்பச்சயபா⁴வங் த³ஸ்ஸெத்வா இதா³னி பன பஞ்சன்னம்பி க²ந்தா⁴னங் ஸப்பச்சயபா⁴வங் த³ஸ்ஸெந்தோ, பூ⁴தமித³ந்திஆதி³மாஹ. தத்த² பூ⁴தமித³ந்தி இத³ங் க²ந்த⁴பஞ்சகங் ஜாதங் பூ⁴தங் நிப்³ப³த்தங், தும்ஹேபி தங் பூ⁴தமித³ந்தி, பி⁴க்க²வே, பஸ்ஸதா²தி. ததா³ஹாரஸம்ப⁴வந்தி தங் பனேதங் க²ந்த⁴பஞ்சகங் ஆஹாரஸம்ப⁴வங் பச்சயஸம்ப⁴வங், ஸதி பச்சயே உப்பஜ்ஜதி ஏவங் பஸ்ஸதா²தி புச்ச²தி. ததா³ஹாரனிரோதா⁴தி தஸ்ஸ பச்சயஸ்ஸ நிரோதா⁴. பூ⁴தமித³ங் நொஸ்ஸூதி பூ⁴தங் நு கோ² இத³ங், ந நு கோ² பூ⁴தந்தி. ததா³ஹாரஸம்ப⁴வங் நொஸ்ஸூதி தங் பூ⁴தங் க²ந்த⁴பஞ்சகங் பச்சயஸம்ப⁴வங் நு கோ², ந நு கோ²தி. ததா³ஹாரனிரோதா⁴தி தஸ்ஸ பச்சயஸ்ஸ நிரோதா⁴. நிரோத⁴த⁴ம்மங் நொஸ்ஸூதி தங் த⁴ம்மங் நிரோத⁴த⁴ம்மங் நு கோ², ந நு கோ²தி. ஸம்மப்பஞ்ஞாய பஸ்ஸதோதி இத³ங் க²ந்த⁴பஞ்சகங் ஜாதங் பூ⁴தங் நிப்³ப³த்தந்தி யாதா²வஸரஸலக்க²ணதோ விபஸ்ஸனாபஞ்ஞாய ஸம்மா பஸ்ஸந்தஸ்ஸ. பஞ்ஞாய ஸுதி³ட்ட²ந்தி வுத்தனயேனேவ விபஸ்ஸனாபஞ்ஞாய ஸுட்டு² தி³ட்ட²ங். ஏவங் யே யே தங் புச்ச²ங் ஸல்லக்கே²ஸுங், தேஸங் தேஸங் படிஞ்ஞங் க³ண்ஹந்தோ பஞ்சன்னங் க²ந்தா⁴னங் ஸப்பச்சயபா⁴வங் த³ஸ்ஸேதி.
401. Evaṃ viññāṇassa sappaccayabhāvaṃ dassetvā idāni pana pañcannampi khandhānaṃ sappaccayabhāvaṃ dassento, bhūtamidantiādimāha. Tattha bhūtamidanti idaṃ khandhapañcakaṃ jātaṃ bhūtaṃ nibbattaṃ, tumhepi taṃ bhūtamidanti, bhikkhave, passathāti. Tadāhārasambhavanti taṃ panetaṃ khandhapañcakaṃ āhārasambhavaṃ paccayasambhavaṃ, sati paccaye uppajjati evaṃ passathāti pucchati. Tadāhāranirodhāti tassa paccayassa nirodhā. Bhūtamidaṃ nossūti bhūtaṃ nu kho idaṃ, na nu kho bhūtanti. Tadāhārasambhavaṃ nossūti taṃ bhūtaṃ khandhapañcakaṃ paccayasambhavaṃ nu kho, na nu khoti. Tadāhāranirodhāti tassa paccayassa nirodhā. Nirodhadhammaṃ nossūti taṃ dhammaṃ nirodhadhammaṃ nu kho, na nu khoti. Sammappaññāya passatoti idaṃ khandhapañcakaṃ jātaṃ bhūtaṃ nibbattanti yāthāvasarasalakkhaṇato vipassanāpaññāya sammā passantassa. Paññāya sudiṭṭhanti vuttanayeneva vipassanāpaññāya suṭṭhu diṭṭhaṃ. Evaṃ ye ye taṃ pucchaṃ sallakkhesuṃ, tesaṃ tesaṃ paṭiññaṃ gaṇhanto pañcannaṃ khandhānaṃ sappaccayabhāvaṃ dasseti.
இதா³னி யாய பஞ்ஞாய தேஹி தங் ஸப்பச்சயங் ஸனிரோத⁴ங் க²ந்த⁴பஞ்சகங் ஸுதி³ட்ட²ங், தத்த² நித்தண்ஹபா⁴வங் புச்ச²ந்தோ இமங் சே தும்ஹேதிஆதி³மாஹ. தத்த² தி³ட்டி²ந்தி விபஸ்ஸனாஸம்மாதி³ட்டி²ங் . ஸபா⁴வத³ஸ்ஸனேன பரிஸுத்³த⁴ங். பச்சயத³ஸ்ஸனேன பரியோதா³தங். அல்லீயேதா²தி தண்ஹாதி³ட்டீ²ஹி அல்லீயித்வா விஹரெய்யாத². கேலாயேதா²தி தண்ஹாதி³ட்டீ²ஹி கீளமானா விஹரெய்யாத² . த⁴னாயேதா²தி த⁴னங் விய இச்ச²ந்தா கே³த⁴ங் ஆபஜ்ஜெய்யாத². மமாயேதா²தி தண்ஹாதி³ட்டீ²ஹி மமத்தங் உப்பாதெ³ய்யாத². நித்த²ரணத்தா²ய நோ க³ஹணத்தா²யாதி யோ ஸோ மயா சதுரோக⁴னித்த²ரணத்தா²ய குல்லூபமோ த⁴ம்மோ தே³ஸிதோ, நோ நிகந்திவஸேன க³ஹணத்தா²ய. அபி நு தங் தும்ஹே ஆஜானெய்யாதா²தி. விபரியாயேன ஸுக்கபக்கோ² வேதி³தப்³போ³.
Idāni yāya paññāya tehi taṃ sappaccayaṃ sanirodhaṃ khandhapañcakaṃ sudiṭṭhaṃ, tattha nittaṇhabhāvaṃ pucchanto imaṃ ce tumhetiādimāha. Tattha diṭṭhinti vipassanāsammādiṭṭhiṃ . Sabhāvadassanena parisuddhaṃ. Paccayadassanena pariyodātaṃ. Allīyethāti taṇhādiṭṭhīhi allīyitvā vihareyyātha. Kelāyethāti taṇhādiṭṭhīhi kīḷamānā vihareyyātha . Dhanāyethāti dhanaṃ viya icchantā gedhaṃ āpajjeyyātha. Mamāyethāti taṇhādiṭṭhīhi mamattaṃ uppādeyyātha. Nittharaṇatthāya no gahaṇatthāyāti yo so mayā caturoghanittharaṇatthāya kullūpamo dhammo desito, no nikantivasena gahaṇatthāya. Api nu taṃ tumhe ājāneyyāthāti. Vipariyāyena sukkapakkho veditabbo.
402. இதா³னி தேஸங் க²ந்தா⁴னங் பச்சயங் த³ஸ்ஸெந்தோ, சத்தாரோமே, பி⁴க்க²வே, ஆஹாராதிஆதி³மாஹ, தம்பி வுத்தத்த²மேவ. யதா² பன ஏகோ இமங் ஜானாஸீதி வுத்தோ, ‘‘ந கேவலங் இமங், மாதரம்பிஸ்ஸ ஜானாமி, மாது மாதரம்பீ’’தி ஏவங் பவேணிவஸேன ஜானந்தோ ஸுட்டு² ஜானாதி நாம. ஏவமேவங் ப⁴க³வா ந கேவலங் க²ந்த⁴மத்தமேவ ஜானாதி, க²ந்தா⁴னங் பச்சயம்பி தேஸம்பி பச்சயானங் பச்சயந்தி ஏவங் ஸப்³ப³பச்சயபரம்பரங் ஜானாதி. ஸோ தங், பு³த்³த⁴ப³லங் தீ³பெந்தோ இதா³னி பச்சயபரம்பரங் த³ஸ்ஸேதுங், இமே ச, பி⁴க்க²வே, சத்தாரோ ஆஹாராதிஆதி³மாஹ. தங் வுத்தத்த²மேவ. இதி கோ², பி⁴க்க²வே, அவிஜ்ஜாபச்சயா ஸங்கா²ரா…பே॰… து³க்க²க்க²ந்த⁴ஸ்ஸ ஸமுத³யோ ஹோதீதி எத்த² பன படிச்சஸமுப்பாத³கதா² வித்தா²ரேதப்³பா³ ப⁴வெய்ய, ஸா விஸுத்³தி⁴மக்³கே³ வித்தா²ரிதாவ.
402. Idāni tesaṃ khandhānaṃ paccayaṃ dassento, cattārome, bhikkhave, āhārātiādimāha, tampi vuttatthameva. Yathā pana eko imaṃ jānāsīti vutto, ‘‘na kevalaṃ imaṃ, mātarampissa jānāmi, mātu mātarampī’’ti evaṃ paveṇivasena jānanto suṭṭhu jānāti nāma. Evamevaṃ bhagavā na kevalaṃ khandhamattameva jānāti, khandhānaṃ paccayampi tesampi paccayānaṃ paccayanti evaṃ sabbapaccayaparamparaṃ jānāti. So taṃ, buddhabalaṃ dīpento idāni paccayaparamparaṃ dassetuṃ, ime ca, bhikkhave, cattāro āhārātiādimāha. Taṃ vuttatthameva. Iti kho, bhikkhave, avijjāpaccayā saṅkhārā…pe… dukkhakkhandhassa samudayo hotīti ettha pana paṭiccasamuppādakathā vitthāretabbā bhaveyya, sā visuddhimagge vitthāritāva.
404. இமஸ்மிங் ஸதி இத³ங் ஹோதீதி இமஸ்மிங் அவிஜ்ஜாதி³கே பச்சயே ஸதி இத³ங் ஸங்கா²ராதி³கங் ப²லங் ஹோதி. இமஸ்ஸுப்பாதா³ இத³ங் உப்பஜ்ஜதீதி இமஸ்ஸ அவிஜ்ஜாதி³கஸ்ஸ பச்சயஸ்ஸ உப்பாதா³ இத³ங் ஸங்கா²ராதி³கங் ப²லங் உப்பஜ்ஜதி, தேனேவாஹ – ‘‘யதி³த³ங் அவிஜ்ஜாபச்சயா ஸங்கா²ரா…பே॰… ஸமுத³யோ ஹோதீ’’தி. ஏவங் வட்டங் த³ஸ்ஸெத்வா இதா³னி விவட்டங் த³ஸ்ஸெந்தோ, அவிஜ்ஜாய த்வேவ அஸேஸவிராக³னிரோதா⁴திஆதி³மாஹ. தத்த² அவிஜ்ஜாய த்வேவாதி அவிஜ்ஜாய ஏவ து. அஸேஸவிராக³னிரோதா⁴தி விராக³ஸங்கா²தேன மக்³கே³ன அஸேஸனிரோதா⁴ அனுப்பாத³னிரோதா⁴. ஸங்கா²ரனிரோதோ⁴தி ஸங்கா²ரானங் அனுப்பாத³னிரோதோ⁴ ஹோதி, ஏவங் நிருத்³தா⁴னங் பன ஸங்கா²ரானங் நிரோதா⁴ விஞ்ஞாணனிரோதோ⁴ ஹோதி, விஞ்ஞாணாதீ³னஞ்ச நிரோதா⁴ நாமரூபாதீ³னி நிருத்³தா⁴னியேவ ஹொந்தீதி த³ஸ்ஸேதுங் ஸங்கா²ரனிரோதா⁴ விஞ்ஞாணனிரோதோ⁴திஆதி³ங் வத்வா ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீதி வுத்தங். தத்த² கேவலஸ்ஸாதி ஸகலஸ்ஸ, ஸுத்³த⁴ஸ்ஸ வா, ஸத்தவிரஹிதஸ்ஸாதி அத்தோ². து³க்க²க்க²ந்த⁴ஸ்ஸாதி து³க்க²ராஸிஸ்ஸ. நிரோதோ⁴ ஹோதீதி அனுப்பாதோ³ ஹோதி.
404.Imasmiṃ sati idaṃ hotīti imasmiṃ avijjādike paccaye sati idaṃ saṅkhārādikaṃ phalaṃ hoti. Imassuppādā idaṃ uppajjatīti imassa avijjādikassa paccayassa uppādā idaṃ saṅkhārādikaṃ phalaṃ uppajjati, tenevāha – ‘‘yadidaṃ avijjāpaccayā saṅkhārā…pe… samudayo hotī’’ti. Evaṃ vaṭṭaṃ dassetvā idāni vivaṭṭaṃ dassento, avijjāya tveva asesavirāganirodhātiādimāha. Tattha avijjāya tvevāti avijjāya eva tu. Asesavirāganirodhāti virāgasaṅkhātena maggena asesanirodhā anuppādanirodhā. Saṅkhāranirodhoti saṅkhārānaṃ anuppādanirodho hoti, evaṃ niruddhānaṃ pana saṅkhārānaṃ nirodhā viññāṇanirodho hoti, viññāṇādīnañca nirodhā nāmarūpādīni niruddhāniyeva hontīti dassetuṃ saṅkhāranirodhā viññāṇanirodhotiādiṃ vatvā evametassa kevalassa dukkhakkhandhassa nirodhohotīti vuttaṃ. Tattha kevalassāti sakalassa, suddhassa vā, sattavirahitassāti attho. Dukkhakkhandhassāti dukkharāsissa. Nirodho hotīti anuppādo hoti.
406. இமஸ்மிங் அஸதீதிஆதி³ வுத்தபடிபக்க²னயேன வேதி³தப்³ப³ங்.
406.Imasmiṃ asatītiādi vuttapaṭipakkhanayena veditabbaṃ.
407. ஏவங் வட்டவிவட்டங் கதெ²த்வா இதா³னி இமங் த்³வாத³ஸங்க³பச்சயவட்டங் ஸஹ விபஸ்ஸனாய மக்³கே³ன ஜானந்தஸ்ஸ யா படிதா⁴வனா பஹீயதி, தஸ்ஸா அபா⁴வங் புச்ச²ந்தோ அபி நு தும்ஹே, பி⁴க்க²வேதிஆதி³மாஹ. தத்த² ஏவங் ஜானந்தாதி ஏவங் ஸஹவிபஸ்ஸனாய மக்³கே³ன ஜானந்தா. ஏவங் பஸ்ஸந்தாதி தஸ்ஸேவ வேவசனங். புப்³ப³ந்தந்தி புரிமகொட்டா²ஸங், அதீதக²ந்த⁴தா⁴துஆயதனானீதி அத்தோ². படிதா⁴வெய்யாதா²தி தண்ஹாதி³ட்டி²வஸேன படிதா⁴வெய்யாத². ஸேஸங் ஸப்³பா³ஸவஸுத்தே வித்தா²ரிதமேவ.
407. Evaṃ vaṭṭavivaṭṭaṃ kathetvā idāni imaṃ dvādasaṅgapaccayavaṭṭaṃ saha vipassanāya maggena jānantassa yā paṭidhāvanā pahīyati, tassā abhāvaṃ pucchanto api nu tumhe, bhikkhavetiādimāha. Tattha evaṃ jānantāti evaṃ sahavipassanāya maggena jānantā. Evaṃ passantāti tasseva vevacanaṃ. Pubbantanti purimakoṭṭhāsaṃ, atītakhandhadhātuāyatanānīti attho. Paṭidhāveyyāthāti taṇhādiṭṭhivasena paṭidhāveyyātha. Sesaṃ sabbāsavasutte vitthāritameva.
இதா³னி நேஸங் தத்த² நிச்சலபா⁴வங் புச்ச²ந்தோ, அபி நு தும்ஹே, பி⁴க்க²வே, ஏவங் ஜானந்தா ஏவங் பஸ்ஸந்தா ஏவங் வதெ³ய்யாத², ஸத்தா² நோ க³ரூதிஆதி³மாஹ. தத்த² க³ரூதி பா⁴ரிகோ அகாமா அனுவத்திதப்³போ³ . ஸமணோதி பு³த்³த⁴ஸமணோ. அஞ்ஞங் ஸத்தா²ரங் உத்³தி³ஸெய்யாதா²தி அயங் ஸத்தா² அம்ஹாகங் கிச்சங் ஸாதே⁴துங் ந ஸக்கோதீதி அபி நு ஏவங்ஸஞ்ஞினோ ஹுத்வா அஞ்ஞங் பா³ஹிரகங் ஸத்தா²ரங் உத்³தி³ஸெய்யாத². புது²ஸமணப்³ராஹ்மணானந்தி ஏவங்ஸஞ்ஞினோ ஹுத்வா புதூ²னங் தித்தி²யஸமணானங் சேவ ப்³ராஹ்மணானஞ்ச. வதகோதூஹலமங்க³லானீதி வதஸமாதா³னானி ச தி³ட்டி²குதூஹலானி ச தி³ட்ட²ஸுதமுதமங்க³லானி ச. தானி ஸாரதோ பச்சாக³ச்செ²ய்யாதா²தி ஏதானி ஸாரந்தி ஏவங்ஸஞ்ஞினோ ஹுத்வா படிஆக³ச்செ²ய்யாத². ஏவங் நிஸ்ஸட்டா²னி ச புன க³ண்ஹெய்யாதா²தி அத்தோ². ஸாமங் ஞாதந்தி ஸயங் ஞாணேன ஞாதங். ஸாமங் தி³ட்ட²ந்தி ஸயங் பஞ்ஞாசக்கு²னா தி³ட்ட²ங். ஸாமங் விதி³தந்தி ஸயங் விபா⁴விதங் பாகடங் கதங். உபனீதா கோ² மே தும்ஹேதி மயா, பி⁴க்க²வே, தும்ஹே இமினா ஸந்தி³ட்டி²காதி³ஸபா⁴வேன த⁴ம்மேன நிப்³பா³னங் உபனீதா, பாபிதாதி அத்தோ². ஸந்தி³ட்டி²கோதிஆதீ³னமத்தோ² விஸுத்³தி⁴மக்³கே³ வித்தா²ரிதோ. இத³மேதங் படிச்ச வுத்தந்தி ஏதங் வசனமித³ங் தும்ஹேஹி ஸாமங் ஞாதாதி³பா⁴வங் படிச்ச வுத்தங்.
Idāni nesaṃ tattha niccalabhāvaṃ pucchanto, api nu tumhe, bhikkhave, evaṃ jānantā evaṃ passantā evaṃ vadeyyātha, satthā no garūtiādimāha. Tattha garūti bhāriko akāmā anuvattitabbo . Samaṇoti buddhasamaṇo. Aññaṃ satthāraṃ uddiseyyāthāti ayaṃ satthā amhākaṃ kiccaṃ sādhetuṃ na sakkotīti api nu evaṃsaññino hutvā aññaṃ bāhirakaṃ satthāraṃ uddiseyyātha. Puthusamaṇabrāhmaṇānanti evaṃsaññino hutvā puthūnaṃ titthiyasamaṇānaṃ ceva brāhmaṇānañca. Vatakotūhalamaṅgalānīti vatasamādānāni ca diṭṭhikutūhalāni ca diṭṭhasutamutamaṅgalāni ca. Tāni sārato paccāgaccheyyāthāti etāni sāranti evaṃsaññino hutvā paṭiāgaccheyyātha. Evaṃ nissaṭṭhāni ca puna gaṇheyyāthāti attho. Sāmaṃ ñātanti sayaṃ ñāṇena ñātaṃ. Sāmaṃ diṭṭhanti sayaṃ paññācakkhunā diṭṭhaṃ. Sāmaṃ viditanti sayaṃ vibhāvitaṃ pākaṭaṃ kataṃ. Upanītā kho me tumheti mayā, bhikkhave, tumhe iminā sandiṭṭhikādisabhāvena dhammena nibbānaṃ upanītā, pāpitāti attho. Sandiṭṭhikotiādīnamattho visuddhimagge vitthārito. Idametaṃ paṭicca vuttanti etaṃ vacanamidaṃ tumhehi sāmaṃ ñātādibhāvaṃ paṭicca vuttaṃ.
408. திண்ணங் கோ² பன, பி⁴க்க²வேதி கஸ்மா ஆரபி⁴? நனு ஹெட்டா² வட்டவிவட்டவஸேன தே³ஸனா மத்த²கங் பாபிதாதி? ஆம பாபிதா. அயங் பன பாடிஏக்கோ அனுஸந்தி⁴ , ‘‘அயஞ்ஹி லோகஸன்னிவாஸோ படிஸந்தி⁴ஸம்மூள்ஹோ, தஸ்ஸ ஸம்மோஹட்டா²னங் வித்³த⁴ங்ஸெத்வா பாகடங் கரிஸ்ஸாமீ’’தி இமங் தே³ஸனங் ஆரபி⁴. அபிச வட்டமூலங் அவிஜ்ஜா, விவட்டமூலங் பு³த்³து⁴ப்பாதோ³, இதி வட்டமூலங் அவிஜ்ஜங் விவட்டமூலஞ்ச பு³த்³து⁴ப்பாத³ங் த³ஸ்ஸெத்வாபி, ‘‘புன ஏகவாரங் வட்டவிவட்டவஸேன தே³ஸனங் மத்த²கங் பாபெஸ்ஸாமீ’’தி இமங் தே³ஸனங் ஆரபி⁴. தத்த² ஸன்னிபாதாதி ஸமோதா⁴னேன பிண்ட³பா⁴வேன. க³ப்³ப⁴ஸ்ஸாதி க³ப்³பே⁴ நிப்³ப³த்தனகஸத்தஸ்ஸ. அவக்கந்தி ஹோதீதி நிப்³ப³த்தி ஹோதி. கத்த²சி ஹி க³ப்³போ⁴தி மாதுகுச்சி² வுத்தோ. யதா²ஹ –
408.Tiṇṇaṃ kho pana, bhikkhaveti kasmā ārabhi? Nanu heṭṭhā vaṭṭavivaṭṭavasena desanā matthakaṃ pāpitāti? Āma pāpitā. Ayaṃ pana pāṭiekko anusandhi , ‘‘ayañhi lokasannivāso paṭisandhisammūḷho, tassa sammohaṭṭhānaṃ viddhaṃsetvā pākaṭaṃ karissāmī’’ti imaṃ desanaṃ ārabhi. Apica vaṭṭamūlaṃ avijjā, vivaṭṭamūlaṃ buddhuppādo, iti vaṭṭamūlaṃ avijjaṃ vivaṭṭamūlañca buddhuppādaṃ dassetvāpi, ‘‘puna ekavāraṃ vaṭṭavivaṭṭavasena desanaṃ matthakaṃ pāpessāmī’’ti imaṃ desanaṃ ārabhi. Tattha sannipātāti samodhānena piṇḍabhāvena. Gabbhassāti gabbhe nibbattanakasattassa. Avakkanti hotīti nibbatti hoti. Katthaci hi gabbhoti mātukucchi vutto. Yathāha –
‘‘யமேகரத்திங் பட²மங், க³ப்³பே⁴ வஸதி மாணவோ;
‘‘Yamekarattiṃ paṭhamaṃ, gabbhe vasati māṇavo;
அப்³பு⁴ட்டி²தோவ ஸோ யாதி, ஸ க³ச்ச²ங் ந நிவத்ததீ’’தி. (ஜா॰ 1.15.363);
Abbhuṭṭhitova so yāti, sa gacchaṃ na nivattatī’’ti. (jā. 1.15.363);
கத்த²சி க³ப்³பே⁴ நிப்³ப³த்தனஸத்தோ. யதா²ஹ – ‘‘யதா² கோ², பனானந்த³, அஞ்ஞா இத்தி²கா நவ வா த³ஸ வா மாஸே க³ப்³ப⁴ங் குச்சி²னா பரிஹரித்வா விஜாயந்தீ’’தி (ம॰ நி॰ 3.205). இத⁴ ஸத்தோ அதி⁴ப்பேதோ, தங் ஸந்தா⁴ய வுத்தங் ‘‘க³ப்³ப⁴ஸ்ஸ அவக்கந்தி ஹோதீ’’தி.
Katthaci gabbhe nibbattanasatto. Yathāha – ‘‘yathā kho, panānanda, aññā itthikā nava vā dasa vā māse gabbhaṃ kucchinā pariharitvā vijāyantī’’ti (ma. ni. 3.205). Idha satto adhippeto, taṃ sandhāya vuttaṃ ‘‘gabbhassa avakkanti hotī’’ti.
இதா⁴தி இமஸ்மிங் ஸத்தலோகே. மாதா ச உதுனீ ஹோதீதி இத³ங் உதுஸமயங் ஸந்தா⁴ய வுத்தங். மாதுகா³மஸ்ஸ கிர யஸ்மிங் ஓகாஸே தா³ரகோ நிப்³ப³த்ததி, தத்த² மஹதீ லோஹிதபீளகா ஸண்ட²ஹித்வா பி⁴ஜ்ஜித்வா பக்³க⁴ரதி, வத்து² ஸுத்³த⁴ங் ஹோதி, ஸுத்³தே⁴ வத்து²ம்ஹி மாதாபிதூஸு ஏகவாரங் ஸன்னிபதிதேஸு யாவ ஸத்த தி³வஸானி கெ²த்தமேவ ஹோதி. தஸ்மிங் ஸமயே ஹத்த²க்³கா³ஹவேணிக்³கா³ஹாதி³னா அங்க³பராமஸனேனபி தா³ரகோ நிப்³ப³த்ததியேவ. க³ந்த⁴ப்³போ³தி தத்ரூபக³ஸத்தோ. பச்சுபட்டி²தோ ஹோதீதி ந மாதாபிதூனங் ஸன்னிபாதங் ஓலோகயமானோ ஸமீபே டி²தோ பச்சுபட்டி²தோ நாம ஹோதி. கம்மயந்தயந்திதோ பன ஏகோ ஸத்தோ தஸ்மிங் ஓகாஸே நிப்³ப³த்தனகோ ஹோதீதி அயமெத்த² அதி⁴ப்பாயோ. ஸங்ஸயேனாதி ‘‘அரோகோ³ நு கோ² ப⁴விஸ்ஸாமி அஹங் வா, புத்தோ வா மே’’தி ஏவங் மஹந்தேன ஜீவிதஸங்ஸயேன. லோஹிதஞ்ஹேதங், பி⁴க்க²வேதி ததா³ கிர மாதுலோஹிதங் தங் டா²னங் ஸம்பத்தங் புத்தஸினேஹேன பண்ட³ரங் ஹோதி. தஸ்மா ஏவமாஹ. வங்ககந்தி கா³மதா³ரகானங் கீளனகங் கு²த்³த³கனங்க³லங். க⁴டிகா வுச்சதி தீ³க⁴த³ண்டே³ன ரஸ்ஸத³ண்ட³கங் பஹரணகீளா. மொக்க²சிகந்தி ஸம்பரிவத்தககீளா, ஆகாஸே வா த³ண்ட³கங் க³ஹெத்வா பூ⁴மியங் வா ஸீஸங் ட²பெத்வா ஹெட்டு²பரியபா⁴வேன பரிவத்தனகீளனந்தி வுத்தங் ஹோதி. சிங்கு³லகங் வுச்சதி தாலபண்ணாதீ³ஹி கதங் வாதப்பஹாரேன பரிப்³ப⁴மனசக்கங் . பத்தாள்ஹகங் வுச்சதி பண்ணனாளிகா, தாய வாலிகாதீ³னி மினந்தா கீளந்தி. ரத²கந்தி கு²த்³த³கரத²ங். த⁴னுகம்பி கு²த்³த³கத⁴னுமேவ.
Idhāti imasmiṃ sattaloke. Mātā ca utunī hotīti idaṃ utusamayaṃ sandhāya vuttaṃ. Mātugāmassa kira yasmiṃ okāse dārako nibbattati, tattha mahatī lohitapīḷakā saṇṭhahitvā bhijjitvā paggharati, vatthu suddhaṃ hoti, suddhe vatthumhi mātāpitūsu ekavāraṃ sannipatitesu yāva satta divasāni khettameva hoti. Tasmiṃ samaye hatthaggāhaveṇiggāhādinā aṅgaparāmasanenapi dārako nibbattatiyeva. Gandhabboti tatrūpagasatto. Paccupaṭṭhito hotīti na mātāpitūnaṃ sannipātaṃ olokayamāno samīpe ṭhito paccupaṭṭhito nāma hoti. Kammayantayantito pana eko satto tasmiṃ okāse nibbattanako hotīti ayamettha adhippāyo. Saṃsayenāti ‘‘arogo nu kho bhavissāmi ahaṃ vā, putto vā me’’ti evaṃ mahantena jīvitasaṃsayena. Lohitañhetaṃ, bhikkhaveti tadā kira mātulohitaṃ taṃ ṭhānaṃ sampattaṃ puttasinehena paṇḍaraṃ hoti. Tasmā evamāha. Vaṅkakanti gāmadārakānaṃ kīḷanakaṃ khuddakanaṅgalaṃ. Ghaṭikā vuccati dīghadaṇḍena rassadaṇḍakaṃ paharaṇakīḷā. Mokkhacikanti samparivattakakīḷā, ākāse vā daṇḍakaṃ gahetvā bhūmiyaṃ vā sīsaṃ ṭhapetvā heṭṭhupariyabhāvena parivattanakīḷananti vuttaṃ hoti. Ciṅgulakaṃ vuccati tālapaṇṇādīhi kataṃ vātappahārena paribbhamanacakkaṃ . Pattāḷhakaṃ vuccati paṇṇanāḷikā, tāya vālikādīni minantā kīḷanti. Rathakanti khuddakarathaṃ. Dhanukampi khuddakadhanumeva.
409. ஸாரஜ்ஜதீதி ராக³ங் உப்பாதே³தி. ப்³யாபஜ்ஜதீதி ப்³யாபாத³ங் உப்பாதே³தி. அனுபட்டி²தகாயஸதீதி காயே ஸதி காயஸதி, தங் அனுபட்ட²பெத்வாதி அத்தோ². பரித்தசேதஸோதி அகுஸலசித்தோ. யத்த²ஸ்ஸ தே பாபகாதி யஸ்ஸங் ப²லஸமாபத்தியங் ஏதே நிருஜ்ஜ²ந்தி, தங் ந ஜானாதி நாதி⁴க³ச்ச²தீதி அத்தோ². அனுரோத⁴விரோத⁴ந்தி ராக³ஞ்சேவ தோ³ஸஞ்ச. அபி⁴னந்த³தீதி தண்ஹாவஸேன அபி⁴னந்த³தி, தண்ஹாவஸேனேவ அஹோ ஸுக²ந்திஆதீ³னி வத³ந்தோ அபி⁴வத³தி. அஜ்ஜோ²ஸாய திட்ட²தீதி தண்ஹாஅஜ்ஜோ²ஸானக³ஹணேன கி³லித்வா பரினிட்ட²பெத்வா க³ண்ஹாதி. ஸுக²ங் வா அது³க்க²மஸுக²ங் வா அபி⁴னந்த³து, து³க்க²ங் கத²ங் அபி⁴னந்த³தீதி? ‘‘அஹங் து³க்கி²தோ மம து³க்க²’’ந்தி க³ண்ஹந்தோ அபி⁴னந்த³தி நாம. உப்பஜ்ஜதி நந்தீ³தி தண்ஹா உப்பஜ்ஜதி. தது³பாதா³னந்தி ஸாவ தண்ஹா க³ஹணட்டே²ன உபாதா³னங் நாம. தஸ்ஸ உபாதா³னபச்சயா ப⁴வோ…பே॰… ஸமுத³யோ ஹோதீதி, இத³ஞ்ஹி ப⁴க³வதா புன ஏகவாரங் த்³விஸந்தி⁴ திஸங்கே²பங் பச்சயாகாரவட்டங் த³ஸ்ஸிதங்.
409.Sārajjatīti rāgaṃ uppādeti. Byāpajjatīti byāpādaṃ uppādeti. Anupaṭṭhitakāyasatīti kāye sati kāyasati, taṃ anupaṭṭhapetvāti attho. Parittacetasoti akusalacitto. Yatthassa te pāpakāti yassaṃ phalasamāpattiyaṃ ete nirujjhanti, taṃ na jānāti nādhigacchatīti attho. Anurodhavirodhanti rāgañceva dosañca. Abhinandatīti taṇhāvasena abhinandati, taṇhāvaseneva aho sukhantiādīni vadanto abhivadati. Ajjhosāya tiṭṭhatīti taṇhāajjhosānagahaṇena gilitvā pariniṭṭhapetvā gaṇhāti. Sukhaṃ vā adukkhamasukhaṃ vā abhinandatu, dukkhaṃ kathaṃ abhinandatīti? ‘‘Ahaṃ dukkhito mama dukkha’’nti gaṇhanto abhinandati nāma. Uppajjati nandīti taṇhā uppajjati. Tadupādānanti sāva taṇhā gahaṇaṭṭhena upādānaṃ nāma. Tassa upādānapaccayā bhavo…pe… samudayo hotīti, idañhi bhagavatā puna ekavāraṃ dvisandhi tisaṅkhepaṃ paccayākāravaṭṭaṃ dassitaṃ.
410-4. இதா³னி விவட்டங் த³ஸ்ஸேதுங் இத⁴, பி⁴க்க²வே, ததா²க³தோ லோகே உப்பஜ்ஜதீதிஆதி³மாஹ. தத்த² அப்பமாணசேதஸோதி அப்பமாணங் லோகுத்தரங் சேதோ அஸ்ஸாதி அப்பமாணசேதஸோ, மக்³க³சித்தஸமங்கீ³தி அத்தோ². இமங் கோ² மே தும்ஹே, பி⁴க்க²வே, ஸங்கி²த்தேன தண்ஹாஸங்க²யவிமுத்திங் தா⁴ரேதா²தி, பி⁴க்க²வே, இமங் ஸங்கி²த்தேன தே³ஸிதங் மய்ஹங், தண்ஹாஸங்க²யவிமுத்திதே³ஸனங் தும்ஹே நிச்சகாலங் தா⁴ரெய்யாத² மா பமஜ்ஜெய்யாத². தே³ஸனா ஹி எத்த² விமுத்திபடிலாப⁴ஹேதுதோ விமுத்தீதி வுத்தா. மஹாதண்ஹாஜாலதண்ஹாஸங்கா⁴டபடிமுக்கந்தி தண்ஹாவ ஸங்ஸிப்³பி³தட்டே²ன மஹாதண்ஹாஜாலங், ஸங்க⁴டிதட்டே²ன ஸங்கா⁴டந்தி வுச்சதி; இதி இமஸ்மிங் மஹாதண்ஹாஜாலே தண்ஹாஸங்கா⁴டே ச இமங் ஸாதிங் பி⁴க்கு²ங் கேவட்டபுத்தங் படிமுக்கங் தா⁴ரேத². அனுபவிட்டோ² அந்தோக³தோ⁴தி நங் தா⁴ரேதா²தி அத்தோ². ஸேஸங் ஸப்³ப³த்த² உத்தானத்த²மேவாதி.
410-4. Idāni vivaṭṭaṃ dassetuṃ idha, bhikkhave, tathāgato loke uppajjatītiādimāha. Tattha appamāṇacetasoti appamāṇaṃ lokuttaraṃ ceto assāti appamāṇacetaso, maggacittasamaṅgīti attho. Imaṃ kho me tumhe, bhikkhave, saṃkhittena taṇhāsaṅkhayavimuttiṃ dhārethāti, bhikkhave, imaṃ saṃkhittena desitaṃ mayhaṃ, taṇhāsaṅkhayavimuttidesanaṃ tumhe niccakālaṃ dhāreyyātha mā pamajjeyyātha. Desanā hi ettha vimuttipaṭilābhahetuto vimuttīti vuttā. Mahātaṇhājālataṇhāsaṅghāṭapaṭimukkanti taṇhāva saṃsibbitaṭṭhena mahātaṇhājālaṃ, saṅghaṭitaṭṭhena saṅghāṭanti vuccati; iti imasmiṃ mahātaṇhājāle taṇhāsaṅghāṭe ca imaṃ sātiṃ bhikkhuṃ kevaṭṭaputtaṃ paṭimukkaṃ dhāretha. Anupaviṭṭho antogadhoti naṃ dhārethāti attho. Sesaṃ sabbattha uttānatthamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாதண்ஹாஸங்க²யஸுத்தவண்ணனா நிட்டி²தா.
Mahātaṇhāsaṅkhayasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. மஹாதண்ஹாஸங்க²யஸுத்தங் • 8. Mahātaṇhāsaṅkhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. மஹாதண்ஹாஸங்க²யஸுத்தவண்ணனா • 8. Mahātaṇhāsaṅkhayasuttavaṇṇanā
