| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
3. மஹாவச்ச²ஸுத்தவண்ணனா
3. Mahāvacchasuttavaṇṇanā
193. ஏவங் மே ஸுதந்தி மஹாவச்ச²ஸுத்தங். தத்த² ஸஹகதீ²தி ஸத்³தி⁴ங்வாதோ³, ப³ஹுங் மயா தும்ஹேஹி ஸத்³தி⁴ங் கதி²தபுப்³ப³ந்தி கத²ங் ஸாரேதி மெத்திங் க⁴டேதி. புரிமானி ஹி த்³வே ஸுத்தானி ஏதஸ்ஸேவ கதி²தானி, ஸங்யுத்தகே அப்³யாகதஸங்யுத்தங் (ஸங்॰ நி॰ 4.416 ஆத³யோ) நாம ஏதஸ்ஸேவ கதி²தங் – ‘‘கிங் நு கோ², போ⁴ கோ³தம, ஸஸ்ஸதோ லோகோ இத³மேவ ஸச்சங் மோக⁴மஞ்ஞந்தி அப்³யாகதமேத’’ந்தி ஏவங் ஏகுத்தரனிகாயேபி இமினா ஸத்³தி⁴ங் கதி²தங் அத்தி²யேவ. தஸ்மா ஏவமாஹ. ஸம்மாஸம்பு³த்³தோ⁴பி தஸ்ஸ ஆக³தாக³தஸ்ஸ ஸங்க³ஹங் கத்வா ஓகாஸமகாஸியேவ. கஸ்மா? அயஞ்ஹி ஸஸ்ஸததி³ட்டி²கோ, ஸஸ்ஸததி³ட்டி²கா ச ஸீக⁴ங் லத்³தி⁴ங் ந விஸ்ஸஜ்ஜெந்தி, வஸாதேலமக்கி²தபிலோதிகா விய சிரேன ஸுஜ்ஜ²ந்தி. பஸ்ஸதி ச ப⁴க³வா – ‘‘அயங் பரிப்³பா³ஜகோ காலே க³ச்ச²ந்தே க³ச்ச²ந்தே லத்³தி⁴ங் விஸ்ஸஜ்ஜெத்வா மம ஸந்திகே பப்³ப³ஜித்வா ச² அபி⁴ஞ்ஞாயோ ஸச்சி²கத்வா அபி⁴ஞ்ஞாதஸாவகோ ப⁴விஸ்ஸதீ’’தி. தஸ்மா தஸ்ஸ ஆக³தாக³தஸ்ஸ ஸங்க³ஹங் கத்வா ஓகாஸமகாஸியேவ. இத³ங் பனஸ்ஸ பச்சி²மக³மனங். ஸோ ஹி இமஸ்மிங் ஸுத்தே தரணங் வா ஹோது அதரணங் வா, யட்டி²ங் ஓதரித்வா உத³கே பதமானோ விய ஸமணஸ்ஸ கோ³தமஸ்ஸ ஸந்திகங் க³ந்த்வா பப்³ப³ஜிஸ்ஸாமீதி ஸன்னிட்டா²னங் கத்வா ஆக³தோ. தஸ்மா த⁴ம்மதே³ஸனங் யாசந்தோ ஸாது⁴ மே ப⁴வங் கோ³தமோதிஆதி³மாஹ. தஸ்ஸ ப⁴க³வா மூலவஸேன ஸங்கி²த்ததே³ஸனங், கம்மபத²வஸேன வித்தா²ரதே³ஸனங் தே³ஸேஸி. மூலவஸேன செத்த² அதிஸங்கி²த்தா தே³ஸனா, கம்மபத²வஸேன ஸங்கி²த்தா வித்தா²ரஸதி³ஸா. பு³த்³தா⁴னங் பன நிப்பரியாயேன வித்தா²ரதே³ஸனா நாம நத்தி². சதுவீஸதிஸமந்தபட்டா²னம்பி ஹி ஸத்தபகரணே அபி⁴த⁴ம்மபிடகே ச ஸப்³ப³ங் ஸங்கி²த்தமேவ. தஸ்மா மூலவஸேனாபி கம்மபத²வஸேனாபி ஸங்கி²த்தமேவ தே³ஸேஸீதி வேதி³தப்³போ³.
193.Evaṃme sutanti mahāvacchasuttaṃ. Tattha sahakathīti saddhiṃvādo, bahuṃ mayā tumhehi saddhiṃ kathitapubbanti kathaṃ sāreti mettiṃ ghaṭeti. Purimāni hi dve suttāni etasseva kathitāni, saṃyuttake abyākatasaṃyuttaṃ (saṃ. ni. 4.416 ādayo) nāma etasseva kathitaṃ – ‘‘kiṃ nu kho, bho gotama, sassato loko idameva saccaṃ moghamaññanti abyākatameta’’nti evaṃ ekuttaranikāyepi iminā saddhiṃ kathitaṃ atthiyeva. Tasmā evamāha. Sammāsambuddhopi tassa āgatāgatassa saṅgahaṃ katvā okāsamakāsiyeva. Kasmā? Ayañhi sassatadiṭṭhiko, sassatadiṭṭhikā ca sīghaṃ laddhiṃ na vissajjenti, vasātelamakkhitapilotikā viya cirena sujjhanti. Passati ca bhagavā – ‘‘ayaṃ paribbājako kāle gacchante gacchante laddhiṃ vissajjetvā mama santike pabbajitvā cha abhiññāyo sacchikatvā abhiññātasāvako bhavissatī’’ti. Tasmā tassa āgatāgatassa saṅgahaṃ katvā okāsamakāsiyeva. Idaṃ panassa pacchimagamanaṃ. So hi imasmiṃ sutte taraṇaṃ vā hotu ataraṇaṃ vā, yaṭṭhiṃ otaritvā udake patamāno viya samaṇassa gotamassa santikaṃ gantvā pabbajissāmīti sanniṭṭhānaṃ katvā āgato. Tasmā dhammadesanaṃ yācanto sādhu me bhavaṃ gotamotiādimāha. Tassa bhagavā mūlavasena saṃkhittadesanaṃ, kammapathavasena vitthāradesanaṃ desesi. Mūlavasena cettha atisaṃkhittā desanā, kammapathavasena saṃkhittā vitthārasadisā. Buddhānaṃ pana nippariyāyena vitthāradesanā nāma natthi. Catuvīsatisamantapaṭṭhānampi hi sattapakaraṇe abhidhammapiṭake ca sabbaṃ saṃkhittameva. Tasmā mūlavasenāpi kammapathavasenāpi saṃkhittameva desesīti veditabbo.
194. தத்த² பாணாதிபாதா வேரமணீ குஸலந்திஆதீ³ஸு படிபாடியா ஸத்தத⁴ம்மா காமாவசரா, அனபி⁴ஜ்ஜா²த³யோ தயோ சதுபூ⁴மிகாபி வட்டந்தி.
194. Tattha pāṇātipātā veramaṇī kusalantiādīsu paṭipāṭiyā sattadhammā kāmāvacarā, anabhijjhādayo tayo catubhūmikāpi vaṭṭanti.
யதோ கோ², வச்ச², பி⁴க்கு²னோதி கிஞ்சாபி அனியமெத்வா வுத்தங், யதா² பன ஜீவகஸுத்தே ச சங்கீஸுத்தே ச, ஏவங் இமஸ்மிங் ஸுத்தே ச அத்தானமேவ ஸந்தா⁴யேதங் ப⁴க³வதா வுத்தந்தி வேதி³தப்³ப³ங்.
Yatokho, vaccha, bhikkhunoti kiñcāpi aniyametvā vuttaṃ, yathā pana jīvakasutte ca caṅkīsutte ca, evaṃ imasmiṃ sutte ca attānameva sandhāyetaṃ bhagavatā vuttanti veditabbaṃ.
195. அத்தி² பனாதி கிங் புச்சா²மீதி புச்ச²தி? அயங் கிரஸ்ஸ லத்³தி⁴ – ‘‘தஸ்மிங் தஸ்மிங் ஸாஸனே ஸத்தா²வ அரஹா ஹோதி, ஸாவகோ பன அரஹத்தங் பத்துங் ஸமத்தோ² நத்தி². ஸமணோ ச கோ³தமோ ‘யதோ கோ², வச்ச², பி⁴க்கு²னோ’தி ஏகங் பி⁴க்கு²ங் கதெ²ந்தோ விய கதே²தி, அத்தி² நு கோ² ஸமணஸ்ஸ கோ³தமஸ்ஸ ஸாவகோ அரஹத்தப்பத்தோ’’தி. ஏதமத்த²ங் புச்சி²ஸ்ஸாமீதி புச்ச²தி. தத்த² திட்ட²தூதி ப⁴வங் தாவ கோ³தமோ திட்ட²து, ப⁴வஞ்ஹி லோகே பாகடோ அரஹாதி அத்தோ². தஸ்மிங் ப்³யாகதே உத்தரி பி⁴க்கு²னீஆதீ³னங் வஸேன பஞ்ஹங் புச்சி², ப⁴க³வாபிஸ்ஸ ப்³யாகாஸி.
195.Atthipanāti kiṃ pucchāmīti pucchati? Ayaṃ kirassa laddhi – ‘‘tasmiṃ tasmiṃ sāsane satthāva arahā hoti, sāvako pana arahattaṃ pattuṃ samattho natthi. Samaṇo ca gotamo ‘yato kho, vaccha, bhikkhuno’ti ekaṃ bhikkhuṃ kathento viya katheti, atthi nu kho samaṇassa gotamassa sāvako arahattappatto’’ti. Etamatthaṃ pucchissāmīti pucchati. Tattha tiṭṭhatūti bhavaṃ tāva gotamo tiṭṭhatu, bhavañhi loke pākaṭo arahāti attho. Tasmiṃ byākate uttari bhikkhunīādīnaṃ vasena pañhaṃ pucchi, bhagavāpissa byākāsi.
196. ஆராத⁴கோதி ஸம்பாத³கோ பரிபூரகோ.
196.Ārādhakoti sampādako paripūrako.
197. ஸேகா²ய விஜ்ஜாய பத்தப்³ப³ந்தி ஹெட்டி²மப²லத்தயங் பத்தப்³ப³ங். தங் ஸப்³ப³ங் மயா அனுப்பத்தந்தி வத³தி. விதண்ட³வாதீ³ பனாஹ – ‘‘கதமே த⁴ம்மா ஸெக்கா²? சத்தாரோ மக்³கா³ அபரியாபன்னா ஹெட்டி²மானி ச தீணி ஸாமஞ்ஞப²லானீ’’தி (த⁴॰ ஸ॰ 1023) வசனதோ அரஹத்தமக்³கோ³பி அனேன பத்தோயேவ. ப²லங் பன அபத்தங், தஸ்ஸ பத்தியா உத்தரி யோக³ங் கதா²பேதீதி. ஸோ ஏவங் ஸஞ்ஞாபேதப்³போ³ –
197.Sekhāya vijjāya pattabbanti heṭṭhimaphalattayaṃ pattabbaṃ. Taṃ sabbaṃ mayā anuppattanti vadati. Vitaṇḍavādī panāha – ‘‘katame dhammā sekkhā? Cattāro maggā apariyāpannā heṭṭhimāni ca tīṇi sāmaññaphalānī’’ti (dha. sa. 1023) vacanato arahattamaggopi anena pattoyeva. Phalaṃ pana apattaṃ, tassa pattiyā uttari yogaṃ kathāpetīti. So evaṃ saññāpetabbo –
‘‘யோ வே கிலேஸானி பஹாய பஞ்ச,
‘‘Yo ve kilesāni pahāya pañca,
பரிபுண்ணஸேகோ² அபரிஹானத⁴ம்மோ;
Paripuṇṇasekho aparihānadhammo;
சேதோவஸிப்பத்தோ ஸமாஹிதிந்த்³ரியோ,
Cetovasippatto samāhitindriyo,
ஸ வே டி²தத்தோதி நரோ பவுச்சதீ’’தி. (அ॰ நி॰ 4.5);
Sa ve ṭhitattoti naro pavuccatī’’ti. (a. ni. 4.5);
அனாகா³மிபுக்³க³லோ ஹி ஏகந்தபரிபுண்ணஸேகோ². தங் ஸந்தா⁴ய ‘‘ஸேகா²ய விஜ்ஜாய பத்தப்³ப³’’ந்தி ஆஹ. மக்³க³ஸ்ஸ பன ஏகசித்தக்க²ணிகத்தா தத்த² டி²தஸ்ஸ புச்சா² நாம நத்தி². இமினா ஸுத்தேன மக்³கோ³பி ப³ஹுசித்தக்க²ணிகோ ஹோதூதி சே. ஏதங் ந பு³த்³த⁴வசனங், வுத்தகா³தா²ய ச அத்தோ² விருஜ்ஜ²தி. தஸ்மா அனாகா³மிப²லே ட²த்வா அரஹத்தமக்³க³ஸ்ஸ விபஸ்ஸனங் கதா²பேதீதி வேதி³தப்³போ³. யஸ்மா பனஸ்ஸ ந கேவலங் ஸுத்³த⁴அரஹத்தஸ்ஸேவ உபனிஸ்ஸயோ, ச²ன்னம்பி அபி⁴ஞ்ஞானங் உபனிஸ்ஸயோ அத்தி², தஸ்மா ப⁴க³வா – ‘‘ஏவமயங் ஸமதே² கம்மங் கத்வா பஞ்ச அபி⁴ஞ்ஞா நிப்³ப³த்தெஸ்ஸதி , விபஸ்ஸனாய கம்மங் கத்வா அரஹத்தங் பாபுணிஸ்ஸதி. ஏவங் ச²ளபி⁴ஞ்ஞோ மஹாஸாவகோ ப⁴விஸ்ஸதீ’’தி விபஸ்ஸனாமத்தங் அகதெ²த்வா ஸமத²விபஸ்ஸனா ஆசிக்கி².
Anāgāmipuggalo hi ekantaparipuṇṇasekho. Taṃ sandhāya ‘‘sekhāya vijjāya pattabba’’nti āha. Maggassa pana ekacittakkhaṇikattā tattha ṭhitassa pucchā nāma natthi. Iminā suttena maggopi bahucittakkhaṇiko hotūti ce. Etaṃ na buddhavacanaṃ, vuttagāthāya ca attho virujjhati. Tasmā anāgāmiphale ṭhatvā arahattamaggassa vipassanaṃ kathāpetīti veditabbo. Yasmā panassa na kevalaṃ suddhaarahattasseva upanissayo, channampi abhiññānaṃ upanissayo atthi, tasmā bhagavā – ‘‘evamayaṃ samathe kammaṃ katvā pañca abhiññā nibbattessati , vipassanāya kammaṃ katvā arahattaṃ pāpuṇissati. Evaṃ chaḷabhiñño mahāsāvako bhavissatī’’ti vipassanāmattaṃ akathetvā samathavipassanā ācikkhi.
198. ஸதி ஸதிஆயதனேதி ஸதி ஸதிகாரணே. கிஞ்செத்த² காரணங்? அபி⁴ஞ்ஞா வா அபி⁴ஞ்ஞாபாத³கஜ்ஜா²னங் வா அவஸானே பன அரஹத்தங் வா காரணங் அரஹத்தஸ்ஸ விபஸ்ஸனா வாதி வேதி³தப்³ப³ங்.
198.Satisatiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā avasāne pana arahattaṃ vā kāraṇaṃ arahattassa vipassanā vāti veditabbaṃ.
200. பரிசிண்ணோ மே ப⁴க³வாதி ஸத்த ஹி ஸேகா² ப⁴க³வந்தங் பரிசரந்தி நாம, கீ²ணாஸவேன ப⁴க³வா பரிசிண்ணோ ஹோதி. இதி ஸங்கே²பேன அரஹத்தங் ப்³யாகரொந்தோ தே²ரோ ஏவமாஹ. தே பன பி⁴க்கூ² தமத்த²ங் ந ஜானிங்ஸு, அஜானந்தாவ தஸ்ஸ வசனங் ஸம்படிச்சி²த்வா. ப⁴க³வதோ ஆரோசேஸுங். தே³வதாதி தேஸங் கு³ணானங் லாபீ⁴ தே³வதா. ஸேஸங் ஸப்³ப³த்த² உத்தானமேவாதி.
200.Pariciṇṇo me bhagavāti satta hi sekhā bhagavantaṃ paricaranti nāma, khīṇāsavena bhagavā pariciṇṇo hoti. Iti saṅkhepena arahattaṃ byākaronto thero evamāha. Te pana bhikkhū tamatthaṃ na jāniṃsu, ajānantāva tassa vacanaṃ sampaṭicchitvā. Bhagavato ārocesuṃ. Devatāti tesaṃ guṇānaṃ lābhī devatā. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மஹாவச்ச²ஸுத்தவண்ணனா நிட்டி²தா.
Mahāvacchasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மஹாவச்ச²ஸுத்தங் • 3. Mahāvacchasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 3. மஹாவச்ச²ஸுத்தவண்ணனா • 3. Mahāvacchasuttavaṇṇanā
