| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. மாலுக்யபுத்தஸுத்தவண்ணனா
2. Mālukyaputtasuttavaṇṇanā
95. அபஸாதே³தீதி தஜ்ஜேதி. உஸ்ஸாதே³தீதி உக்கங்ஸேதி. அயங் கிர தே²ரோ மாலுக்யபுத்தோ. பமஜ்ஜித்வாதி யோனிஸோமனஸிகாரஸ்ஸ அனநுயுஜ்ஜனேன பமஜ்ஜித்வா.
95.Apasādetīti tajjeti. Ussādetīti ukkaṃseti. Ayaṃ kira thero mālukyaputto. Pamajjitvāti yonisomanasikārassa ananuyujjanena pamajjitvā.
யத்ராதி பச்சத்தங் வசனாலங்காரே. நாமாதி அஸம்பா⁴வனே அபஸாத³னபக்கே², உஸ்ஸாத³னபக்கே² பன ஸம்பா⁴வனே. கிங் ஜாதந்தி கிங் தேன மஹல்லகபா⁴வேன ஜாதந்தி மஹல்லகபா⁴வங் திணாயபி அமஞ்ஞமானோ வத³தி. தேனாஹ ‘‘யதி³…பே॰… அனுக்³க³ண்ஹந்தோ’’தி. அனுக்³க³ண்ஹந்தோதி அசிந்தெந்தோ. மாதி³ஸானங் ப⁴க³வதோ ஓவாதோ³ உபகாராவஹோதி ஏதரஹி ஓவாத³ஞ்ச பஸங்ஸந்தோ.
Yatrāti paccattaṃ vacanālaṅkāre. Nāmāti asambhāvane apasādanapakkhe, ussādanapakkhe pana sambhāvane. Kiṃ jātanti kiṃ tena mahallakabhāvena jātanti mahallakabhāvaṃ tiṇāyapi amaññamāno vadati. Tenāha ‘‘yadi…pe… anuggaṇhanto’’ti. Anuggaṇhantoti acintento. Mādisānaṃ bhagavato ovādo upakārāvahoti etarahi ovādañca pasaṃsanto.
‘‘அதி³ட்டா² அதி³ட்ட²புப்³பா³’’திஆதி³னா பரிகப்பவஸேன வுத்தனித³ஸ்ஸனங் ‘‘யதா² ஏதேஸு ச²ந்தா³த³யோ ந ஹொந்தி, ஏவமிதரேஸுபி பரிஞ்ஞாதேஸூ’’தி நயபடிபஜ்ஜனத்த²ங், தேஸம்பி இமேஹி ஸமானேதப்³ப³த்தா. தேன வுத்தங் ‘‘ஸுபினகூபமா காமா’’தி (ம॰ நி॰ 1.234; 2.46; பாசி॰ 417; சூளவ॰ 65).
‘‘Adiṭṭhā adiṭṭhapubbā’’tiādinā parikappavasena vuttanidassanaṃ ‘‘yathā etesu chandādayo na honti, evamitaresupi pariññātesū’’ti nayapaṭipajjanatthaṃ, tesampi imehi samānetabbattā. Tena vuttaṃ ‘‘supinakūpamā kāmā’’ti (ma. ni. 1.234; 2.46; pāci. 417; cūḷava. 65).
சக்கு²விஞ்ஞாணேன தி³ட்டே² தி³ட்ட²மத்தந்தி சக்கு²விஞ்ஞாணஸ்ஸ ரூபாயதனங் யத்தகோ க³ஹணாகாரோ, தத்தகங். கித்தகங் பமாணந்தி அத்தஸங்வேதி³யங் பரஸ்ஸ ந தி³ஸிதப்³ப³ங், கப்பனாமத்தங் ரூபங். தேனாஹ ‘‘சக்கு²விஞ்ஞாணங் ஹீ’’திஆதி³. ரூபேதி ரூபாயதனே. ரூபமத்தமேவாதி நீலாதி³பே⁴த³ங் ரூபாயதனமத்தங், ந நீலாதி³. விஸேஸனிவத்தனத்தோ² ஹி அயங் மத்த-ஸத்³தோ³. யதி³ ஏவங், ஏவ-காரோ கிமத்தி²யோ? சக்கு²விஞ்ஞாணஞ்ஹி ரூபாயதனே லப்³ப⁴மானம்பி நீலாதி³விஸேஸங் ‘‘இத³ங் நீலங் நாம, இத³ங் பீதங் நாமா’’தி ந க³ண்ஹாதி. குதோ நிச்சானிச்சாதி³ஸபா⁴வத்த²ந்தி ஸங்ஹிதஸ்ஸபி நிவத்தனத்த²ங் ஏவகாரக்³க³ஹணங். தேனாஹ ‘‘ந நிச்சாதி³ஸபா⁴வ’’ந்தி. ஸேஸவிஞ்ஞாணேஹிபீதி ஜவனவிஞ்ஞாணேஹிபி.
Cakkhuviññāṇena diṭṭhe diṭṭhamattanti cakkhuviññāṇassa rūpāyatanaṃ yattako gahaṇākāro, tattakaṃ. Kittakaṃ pamāṇanti attasaṃvediyaṃ parassa na disitabbaṃ, kappanāmattaṃ rūpaṃ. Tenāha ‘‘cakkhuviññāṇaṃ hī’’tiādi. Rūpeti rūpāyatane. Rūpamattamevāti nīlādibhedaṃ rūpāyatanamattaṃ, na nīlādi. Visesanivattanattho hi ayaṃ matta-saddo. Yadi evaṃ, eva-kāro kimatthiyo? Cakkhuviññāṇañhi rūpāyatane labbhamānampi nīlādivisesaṃ ‘‘idaṃ nīlaṃ nāma, idaṃ pītaṃ nāmā’’ti na gaṇhāti. Kuto niccāniccādisabhāvatthanti saṃhitassapi nivattanatthaṃ evakāraggahaṇaṃ. Tenāha ‘‘na niccādisabhāva’’nti. Sesaviññāṇehipīti javanaviññāṇehipi.
தி³ட்ட²ங் நாம சக்கு²விஞ்ஞாணங் ரூபாயதனஸ்ஸ த³ஸ்ஸனந்தி கத்வா. தேனாஹ ‘‘ரூபே ரூபவிஜானந’’ந்தி. சக்கு²விஞ்ஞாணமத்தமேவாதி யத்தகங் சக்கு²விஞ்ஞாணங் ரூபாயதனே க³ஹணமத்தங், தங்மத்தமேவ மே ஸப்³ப³ங் சித்தங் ப⁴விஸ்ஸதீதி அத்தோ². ‘‘ராகா³தி³ரஹேனா’’தி வா பாடோ². தி³ட்ட²ங் நாம பத³த்த²தோ சக்கு²விஞ்ஞாணேன தி³ட்ட²ங் ரூபங். தத்தே²வாதி சக்கு²விஞ்ஞாணேன தி³ட்ட²மத்தே ரூபே. சித்தத்தயங் தி³ட்ட²மத்தங் நாம சக்கு²விஞ்ஞாணங் விய ராகா³தி³விரஹேன பவத்தனதோ. தேனாஹ ‘‘யதா² த’’ந்தி ஆதி³.
Diṭṭhaṃ nāma cakkhuviññāṇaṃ rūpāyatanassa dassananti katvā. Tenāha ‘‘rūpe rūpavijānana’’nti. Cakkhuviññāṇamattamevāti yattakaṃ cakkhuviññāṇaṃ rūpāyatane gahaṇamattaṃ, taṃmattameva me sabbaṃ cittaṃ bhavissatīti attho. ‘‘Rāgādirahenā’’ti vā pāṭho. Diṭṭhaṃ nāma padatthato cakkhuviññāṇena diṭṭhaṃ rūpaṃ. Tatthevāti cakkhuviññāṇena diṭṭhamatte rūpe. Cittattayaṃ diṭṭhamattaṃ nāma cakkhuviññāṇaṃ viya rāgādivirahena pavattanato. Tenāha ‘‘yathā ta’’nti ādi.
மனொத்³வாராவஜ்ஜனேன விஞ்ஞாதாரம்மணங் விஞ்ஞாதந்தி அதி⁴ப்பேதங் ராகா³தி³விரஹேன விஞ்ஞெய்யதோ. தேனாஹ ‘‘யதா² ஆவஜ்ஜனேனா’’திஆதி³.
Manodvārāvajjanenaviññātārammaṇaṃ viññātanti adhippetaṃ rāgādivirahena viññeyyato. Tenāha ‘‘yathā āvajjanenā’’tiādi.
ததா³தி தஸ்மிங் காலே, ந ததோ பட்டா²யாதி அயமெத்த² அத்தோ²தி த³ஸ்ஸேதி. ‘‘தி³ட்ட²மத்த’’ந்திஆதி³னா யேஸங் ராகா³தீ³னங் நிவத்தனங் அதி⁴ப்பேதங், தே ‘‘தேனா’’தி எத்த² த-ஸத்³தே³ன பச்சாமஸீயந்தீதி ‘‘தேன ராகே³ன வா ரத்தோ’’திஆதி³ வுத்தங். தத்தா²தி விஸயே பு⁴ம்மங், விஸயபா⁴வோ ச விஸயினா ஸம்ப³ந்த⁴வஸேன இச்சி²தப்³போ³தி வுத்தங் ‘‘படிப³த்³தோ⁴’’திஆதி³.
Tadāti tasmiṃ kāle, na tato paṭṭhāyāti ayamettha atthoti dasseti. ‘‘Diṭṭhamatta’’ntiādinā yesaṃ rāgādīnaṃ nivattanaṃ adhippetaṃ, te ‘‘tenā’’ti ettha ta-saddena paccāmasīyantīti ‘‘tena rāgena vā ratto’’tiādi vuttaṃ. Tatthāti visaye bhummaṃ, visayabhāvo ca visayinā sambandhavasena icchitabboti vuttaṃ ‘‘paṭibaddho’’tiādi.
ஸதீதி ரூபஸ்ஸ யதா²ஸபா⁴வஸல்லக்க²ணா ஸதி முட்டா² பியனிமித்தமனஸிகாரேன அனுப்பஜ்ஜனதோ ந தி³ஸ்ஸதி நப்பவத்ததி. அஜ்ஜோ²ஸாதி அஜ்ஜோ²ஸாய. கி³லித்வா பரினிட்ட²பெத்வா அத்தனியகரணேன.
Satīti rūpassa yathāsabhāvasallakkhaṇā sati muṭṭhā piyanimittamanasikārena anuppajjanato na dissati nappavattati. Ajjhosāti ajjhosāya. Gilitvā pariniṭṭhapetvā attaniyakaraṇena.
அபி⁴ஜ்ஜா² ச விஹேஸா சாதி கரணத்தே² பச்சத்தவசனந்தி ஆஹ – ‘‘அபி⁴ஜ்ஜா²ய ச விஹேஸாய சா’’தி. அத்த²வஸேன விப⁴த்திபரிணாமோதி ஆஹ – ‘‘அபி⁴ஜ்ஜா²விஹேஸாஹீ’’தி. ஆசினந்தஸ்ஸாதி வட்³டெ⁴ந்தஸ்ஸ. படிஸ்ஸதோதி பதிஸ்ஸதோ ஸப்³ப³த்த² ஸதியா யுத்தோ. ஸேவதோ சாபீதி எத்த² ச-ஸத்³தோ³ அபி-ஸத்³தோ³ ச நிபாதமத்தந்தி ‘‘ஸேவந்தஸ்ஸ’’இச்சேவ அத்தோ² வுத்தோ.
Abhijjhā ca vihesā cāti karaṇatthe paccattavacananti āha – ‘‘abhijjhāya ca vihesāya cā’’ti. Atthavasena vibhattipariṇāmoti āha – ‘‘abhijjhāvihesāhī’’ti. Ācinantassāti vaḍḍhentassa. Paṭissatoti patissato sabbattha satiyā yutto. Sevato cāpīti ettha ca-saddo api-saddo ca nipātamattanti ‘‘sevantassa’’icceva attho vutto.
மாலுக்யபுத்தஸுத்தவண்ணனா நிட்டி²தா.
Mālukyaputtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. மாலுக்யபுத்தஸுத்தங் • 2. Mālukyaputtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. மாலுக்யபுத்தஸுத்தவண்ணனா • 2. Mālukyaputtasuttavaṇṇanā
