| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
9. மானகாமஸுத்தவண்ணனா
9. Mānakāmasuttavaṇṇanā
9. ஸெய்யாதி³பே⁴த³ங் மானங் அப்பஹாய தங் பக்³க³ய்ஹ விசரந்தோ காமெந்தோ நாம ஹோதீதி ஆஹ ‘‘மானங் காமெந்தஸ்ஸ இச்ச²ந்தஸ்ஸா’’தி. த³மதி சித்தங் ஏதேனாதி த³மோ, ஸதிஸம்பொ³ஜ்ஜ²ங்கா³தி³கோ ஸமாதி⁴பக்கி²கோ த³மோ. மனச்ச²ட்டா²னி இந்த்³ரியானி த³மேதீதி த³மோ, இந்த்³ரியஸங்வரோ. கிலேஸே த³மேதி பஜஹதீதி த³மோ, பஞ்ஞா. உபவஸனவஸேன காயகம்மாதி³ங் த³மேதீதி த³மோ, உபோஸத²கம்மங். கோதூ⁴பனாஹமக்க²மானாதி³கே த³மேதி வினேதீதி த³மோ, அதி⁴வாஸனக²ந்தி. தேனேவாதி ‘‘த³மோ’’தி ஸமாதி⁴பக்கி²கத⁴ம்மானங் ஏவ அதி⁴ப்பேதத்தா . ‘‘ந மோனங் அத்தீ²’’தி ச பாடோ². அஸமாஹிதஸ்ஸாதி ஸமாதி⁴படிக்கே²போ ஜோதிதோ.
9. Seyyādibhedaṃ mānaṃ appahāya taṃ paggayha vicaranto kāmento nāma hotīti āha ‘‘mānaṃ kāmentassa icchantassā’’ti. Damati cittaṃ etenāti damo, satisambojjhaṅgādiko samādhipakkhiko damo. Manacchaṭṭhāni indriyāni dametīti damo, indriyasaṃvaro. Kilese dameti pajahatīti damo, paññā. Upavasanavasena kāyakammādiṃ dametīti damo, uposathakammaṃ. Kodhūpanāhamakkhamānādike dameti vinetīti damo, adhivāsanakhanti. Tenevāti ‘‘damo’’ti samādhipakkhikadhammānaṃ eva adhippetattā . ‘‘Na monaṃ atthī’’ti ca pāṭho. Asamāhitassāti samādhipaṭikkhepo jotito.
மச்சுதெ⁴ய்யஸ்ஸ பாரதரணஸ்ஸ வுச்சமானத்தா ‘‘மோனந்தி சதுமக்³க³ஞாண’’ந்தி வுத்தங். ந ஹி ததோ அஞ்ஞேன தங் ஸம்ப⁴வதி. ஜானாதி அஸம்மோஹபடிவேத⁴வஸேன படிவிஜ்ஜ²தீதி அத்தோ². மச்சு தீ⁴யதி எத்தா²தி மச்சுதெ⁴ய்யங், க²ந்த⁴பஞ்சகங் மரணத⁴ம்மத்தா. தஸ்ஸேவாதி மச்சுதெ⁴ய்யஸ்ஸேவ. பாரங் பரதீரபூ⁴தங் நிப்³பா³னங். தரெய்யாதி எத்த² தரணங் நாம அரியமக்³க³ப்³யாபாரோதி ஆஹ ‘‘படிவிஜ்ஜெ²ய்ய பாபுணெய்யா’’தி. ததா² ஹி வக்க²தி ‘‘படிவேத⁴தரணங் நாம வுத்த’’ந்தி. ‘‘ந தரெய்ய ந படிவிஜ்ஜெ²ய்ய ந பாபுணெய்ய வா’’தி அயமெத்த² பாடோ² யுத்தோ. அஞ்ஞதா² ‘‘இத³ங் வுத்தங் ஹோதீ’’திஆதி³வசனங் விருஜ்ஜெ²ய்ய. ஏகோ அரஞ்ஞே விஹரந்தோதி ஏகாகீ ஹுத்வா அரஞ்ஞே விஹரந்தோதி அத்தோ².
Maccudheyyassa pārataraṇassa vuccamānattā ‘‘monanti catumaggañāṇa’’nti vuttaṃ. Na hi tato aññena taṃ sambhavati. Jānāti asammohapaṭivedhavasena paṭivijjhatīti attho. Maccu dhīyati etthāti maccudheyyaṃ, khandhapañcakaṃ maraṇadhammattā. Tassevāti maccudheyyasseva. Pāraṃ paratīrabhūtaṃ nibbānaṃ. Tareyyāti ettha taraṇaṃ nāma ariyamaggabyāpāroti āha ‘‘paṭivijjheyya pāpuṇeyyā’’ti. Tathā hi vakkhati ‘‘paṭivedhataraṇaṃ nāma vutta’’nti. ‘‘Na tareyya na paṭivijjheyya na pāpuṇeyya vā’’ti ayamettha pāṭho yutto. Aññathā ‘‘idaṃ vuttaṃ hotī’’tiādivacanaṃ virujjheyya. Eko araññe viharantoti ekākī hutvā araññe viharantoti attho.
காமங் ஹெட்டி²மமக்³கே³ஹிபி ஏகச்சஸ்ஸ மானஸ்ஸ பஹானங் லப்³ப⁴தி. அக்³க³மக்³கே³னேவ பன தஸ்ஸ அனவஸேஸதோ பஹானந்தி ஆஹ – ‘‘அரஹத்தமக்³கே³ன நவவித⁴மானங் பஜஹித்வா’’தி. உபசாரஸமாதி⁴புப்³ப³கோ அப்பனாஸமாதீ⁴தி வுத்தங் ‘‘உபசாரப்பனாஸமாதீ⁴ஹீ’’தி, ந உபசாரஸமாதி⁴மத்தேன ஸமாதி⁴மத்தங் ஸந்தா⁴ய பச்சேகங் வாக்யபரிஸமாபனஸ்ஸ அயுஜ்ஜனதோ. ந ஹி அப்பனங் அப்பத்தங் லோகுத்தரஜ்ஜா²னங் அத்தி². ‘‘ஸுசேதஸோ’’தி சித்தஸ்ஸ ஞாணஸஹிததாய லக்க²ணவசனந்தி ஆஹ ‘‘ஞாணஸம்பயுத்ததாயா’’திஆதி³. ததா² ஹி வக்க²தி ‘‘ஸுசேதஸோதி எத்த² சித்தேன பஞ்ஞா த³ஸ்ஸிதா’’தி. ‘‘ஸப்³ப³தி⁴ விப்பமுத்தோ’’தி ஸப்³பே³ஸு ப⁴வாதீ³ஸு விஸங்ஸட்ட²சித்தோ ஸப்³ப³ஸோ க²ந்தா⁴தீ³ஹி விஸங்யுத்தோ ஹோதீதி வுத்தங் ‘‘ஸப்³பே³ஸு க²ந்தா⁴யதனாதீ³ஸு விப்பமுத்தோ ஹுத்வா’’தி. பரிஞ்ஞாபடிவேதோ⁴ ஸச்சி²கிரியபடிவேதே⁴ன வினா நத்தீ²தி ஆஹ ‘‘தேபூ⁴மக…பே॰… வுத்த’’ந்தி.
Kāmaṃ heṭṭhimamaggehipi ekaccassa mānassa pahānaṃ labbhati. Aggamaggeneva pana tassa anavasesato pahānanti āha – ‘‘arahattamaggena navavidhamānaṃ pajahitvā’’ti. Upacārasamādhipubbako appanāsamādhīti vuttaṃ ‘‘upacārappanāsamādhīhī’’ti, na upacārasamādhimattena samādhimattaṃ sandhāya paccekaṃ vākyaparisamāpanassa ayujjanato. Na hi appanaṃ appattaṃ lokuttarajjhānaṃ atthi. ‘‘Sucetaso’’ti cittassa ñāṇasahitatāya lakkhaṇavacananti āha ‘‘ñāṇasampayuttatāyā’’tiādi. Tathā hi vakkhati ‘‘sucetasoti ettha cittena paññā dassitā’’ti. ‘‘Sabbadhi vippamutto’’ti sabbesu bhavādīsu visaṃsaṭṭhacitto sabbaso khandhādīhi visaṃyutto hotīti vuttaṃ ‘‘sabbesu khandhāyatanādīsu vippamutto hutvā’’ti. Pariññāpaṭivedho sacchikiriyapaṭivedhena vinā natthīti āha ‘‘tebhūmaka…pe… vutta’’nti.
மானங் நிஸ்ஸாய து³ச்சரிதசரணதோ மானோ நாமாயங் ஸீலபே⁴த³னோ. தஸ்மாதி மானஸ்ஸ ஸீலபடிபக்க²பா⁴வதோ. இமினா படிபக்க²ப்பஹானகித்தனேன. அதி⁴சித்தஸிக்கா² கதி²தா ஸரூபதோ ஏவாதி அதி⁴ப்பாயோ. எத்த² சித்தேனாதி ஸு-ஸத்³தே³ன விஸேஸிதசித்தேன. தஸ்மாதி பஞ்ஞாய த³ஸ்ஸிதத்தா. இமினாதி ‘‘ஸுசேதஸோ’’தி இமினா பதே³ன. அதி⁴ஸீலஸிக்கா² அதி⁴சித்தஸிக்கா² அதி⁴பஞ்ஞாஸிக்கா²தி ஸீலாதீ³னிபி விஸேஸெத்வா வுத்தானி. ஸம்ப⁴வே ப்³யபி⁴சாரே ச விஸேஸனவிஸேஸிதப்³ப³தாதி தங் த³ஸ்ஸெந்தோ ‘‘அதி⁴ஸீலஞ்ச நாம ஸீலே ஸதி ஹோதீ’’திஆதி³ங் வத்வா தது³ப⁴யங் விபா⁴கே³ன த³ஸ்ஸேதுங் ‘‘தஸ்மா’’திஆதி³ வுத்தங். பட²மனயோ ஸங்கரவஸேன பவத்தோதி அஸங்கரவஸேன த³ஸ்ஸேதுங் ‘‘அபிசா’’திஆதி³னா து³தியனயோ வுத்தோ. ‘‘ஸமாபன்னா’’தி எத்தா²பி ‘‘நிப்³பா³னங் பத்த²யந்தேனா’’தி ஆனெத்வா ஸம்ப³ந்தோ⁴. விபஸ்ஸனாய பாத³கபா⁴வங் அனுபக³தாபி தத³த்த²ங் நிப்³ப³த்தனாதி³வஸேன ஸமாபன்னாதி அயமத்தோ² புரிமனயதோ விஸேஸோ. அதி⁴பஞ்ஞாய பனெத்த² புரிமனயதோ விஸேஸோ நத்தீ²தி ஸா அனுத்³த⁴டா. ஸமோதா⁴னெத்வாதி பரியாயதோ ஸரூபதோ ச ஸங்க³ஹெத்வா. ஸகலஸாஸனந்தி திஸ்ஸன்னங் கதி²தத்தா ஏவ ஸிக்க²த்தயஸங்க³ஹங் ஸகலஸாஸனங் கதி²தங் ஹோதீதி.
Mānaṃ nissāya duccaritacaraṇato māno nāmāyaṃ sīlabhedano. Tasmāti mānassa sīlapaṭipakkhabhāvato. Iminā paṭipakkhappahānakittanena. Adhicittasikkhā kathitā sarūpato evāti adhippāyo. Ettha cittenāti su-saddena visesitacittena. Tasmāti paññāya dassitattā. Imināti ‘‘sucetaso’’ti iminā padena. Adhisīlasikkhā adhicittasikkhā adhipaññāsikkhāti sīlādīnipi visesetvā vuttāni. Sambhave byabhicāre ca visesanavisesitabbatāti taṃ dassento ‘‘adhisīlañca nāma sīle sati hotī’’tiādiṃ vatvā tadubhayaṃ vibhāgena dassetuṃ ‘‘tasmā’’tiādi vuttaṃ. Paṭhamanayo saṅkaravasena pavattoti asaṅkaravasena dassetuṃ ‘‘apicā’’tiādinā dutiyanayo vutto. ‘‘Samāpannā’’ti etthāpi ‘‘nibbānaṃ patthayantenā’’ti ānetvā sambandho. Vipassanāya pādakabhāvaṃ anupagatāpi tadatthaṃ nibbattanādivasena samāpannāti ayamattho purimanayato viseso. Adhipaññāya panettha purimanayato viseso natthīti sā anuddhaṭā. Samodhānetvāti pariyāyato sarūpato ca saṅgahetvā. Sakalasāsananti tissannaṃ kathitattā eva sikkhattayasaṅgahaṃ sakalasāsanaṃ kathitaṃ hotīti.
மானகாமஸுத்தவண்ணனா நிட்டி²தா.
Mānakāmasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. மானகாமஸுத்தங் • 9. Mānakāmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. மானகாமஸுத்தவண்ணனா • 9. Mānakāmasuttavaṇṇanā
