| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
8. மானபரிஞ்ஞாஸுத்தவண்ணனா
8. Mānapariññāsuttavaṇṇanā
8. அட்ட²மே அபுப்³ப³ங் நத்தி², கேவலங் மானவஸேன தே³ஸனா பவத்தா. கா³தா²ஸு பன மானுபேதா அயங் பஜாதி கம்மகிலேஸேஹி பஜாயதீதி பஜாதி லத்³த⁴னாமா இமே ஸத்தா மஞ்ஞனலக்க²ணேன மானேன உபேதா உபக³தா. மானக³ந்தா² ப⁴வே ரதாதி கிமிகீடபடங்கா³தி³அத்தபா⁴வேபி மானேன க³ந்தி²தா மானஸங்யோஜனேன ஸங்யுத்தா. ததோ ஏவ தீ³க⁴ரத்தங் பரிபா⁴விதாஹங்காரவஸேன ‘‘ஏதங் மமா’’தி ஸங்கா²ரேஸு அஜ்ஜோ²ஸானப³ஹுலத்தா தத்த² நிச்சஸுக²அத்தாதி³விபல்லாஸவஸேன ச காமாதி³ப⁴வே ரதா. மானங் அபரிஜானந்தாதி மானங் தீஹி பரிஞ்ஞாஹி ந பரிஜானந்தா. அரஹத்தமக்³க³ஞாணேன வா அனதிக்கமந்தா, ‘‘மானங் அபரிஞ்ஞாயா’’தி கேசி பட²ந்தி. ஆக³ந்தாரோ புனப்³ப⁴வந்தி புன ஆயாதிங் உபபத்திப⁴வங். புனப்புனங் ப⁴வனதோ வா புனப்³ப⁴வஸங்கா²தங் ஸங்ஸாரங் அபராபரங் பரிவத்தனவஸேன க³ந்தாரோ உபக³ந்தாரோ ஹொந்தி, ப⁴வதோ ந பரிமுச்சந்தீதி அத்தோ². யே ச மானங் பஹந்த்வான, விமுத்தா மானஸங்க²யேதி யே பன அரஹத்தமக்³கே³ன ஸப்³ப³ஸோ மானங் பஜஹித்வா மானஸ்ஸ அச்சந்தஸங்க²யபூ⁴தே அரஹத்தப²லே நிப்³பா³னே வா ததே³கட்ட²ஸப்³ப³கிலேஸவிமுத்தியா விமுத்தா ஸுட்டு² முத்தா. தே மானக³ந்தா²பி⁴பு⁴னோ, ஸப்³ப³து³க்க²முபச்சகு³ந்தி தே பரிக்கீ²ணப⁴வஸங்யோஜனா அரஹந்தோ ஸப்³ப³ஸோ மானக³ந்த²ங் மானஸங்யோஜனங் ஸமுச்சே²த³ப்பஹானேன அபி⁴ப⁴வித்வா டி²தா, அனவஸேஸங் வட்டது³க்க²ங் அதிக்கமிங்ஸூதி அத்தோ². ஏவமேதஸ்மிங் ஸத்தமஸுத்தே ச அரஹத்தங் கதி²தந்தி.
8. Aṭṭhame apubbaṃ natthi, kevalaṃ mānavasena desanā pavattā. Gāthāsu pana mānupetā ayaṃ pajāti kammakilesehi pajāyatīti pajāti laddhanāmā ime sattā maññanalakkhaṇena mānena upetā upagatā. Mānaganthā bhave ratāti kimikīṭapaṭaṅgādiattabhāvepi mānena ganthitā mānasaṃyojanena saṃyuttā. Tato eva dīgharattaṃ paribhāvitāhaṃkāravasena ‘‘etaṃ mamā’’ti saṅkhāresu ajjhosānabahulattā tattha niccasukhaattādivipallāsavasena ca kāmādibhave ratā. Mānaṃ aparijānantāti mānaṃ tīhi pariññāhi na parijānantā. Arahattamaggañāṇena vā anatikkamantā, ‘‘mānaṃ apariññāyā’’ti keci paṭhanti. Āgantāro punabbhavanti puna āyātiṃ upapattibhavaṃ. Punappunaṃ bhavanato vā punabbhavasaṅkhātaṃ saṃsāraṃ aparāparaṃ parivattanavasena gantāro upagantāro honti, bhavato na parimuccantīti attho. Ye ca mānaṃ pahantvāna, vimuttā mānasaṅkhayeti ye pana arahattamaggena sabbaso mānaṃ pajahitvā mānassa accantasaṅkhayabhūte arahattaphale nibbāne vā tadekaṭṭhasabbakilesavimuttiyā vimuttā suṭṭhu muttā. Te mānaganthābhibhuno, sabbadukkhamupaccagunti te parikkhīṇabhavasaṃyojanā arahanto sabbaso mānaganthaṃ mānasaṃyojanaṃ samucchedappahānena abhibhavitvā ṭhitā, anavasesaṃ vaṭṭadukkhaṃ atikkamiṃsūti attho. Evametasmiṃ sattamasutte ca arahattaṃ kathitanti.
அட்ட²மஸுத்தவண்ணனா நிட்டி²தா.
Aṭṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 8. மானபரிஞ்ஞாஸுத்தங் • 8. Mānapariññāsuttaṃ
