| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
10. மாரதெ⁴ய்யஸுத்தவண்ணனா
10. Māradheyyasuttavaṇṇanā
59. த³ஸமஸ்ஸ கா உப்பத்தி? ஏகதி³வஸங் கிர ஸத்தா² ஸெக்க²ப³ஹுலாய பரிஸாய பரிவுதோ நிஸின்னோ தேஸங் அஜ்ஜா²ஸயங் ஓலோகெத்வா உபரி விஸேஸாதி⁴க³மாய உஸ்ஸாஹங் ஜனேதுங் அஸெக்க²பூ⁴மிங் தோ²மெந்தோ இத³ங் ஸுத்தங் அபா⁴ஸி. தத்த² அதிக்கம்மாதிஆதீ³ஸு அயங் ஸங்கே²பத்தோ² – அதிக்கம்ம அதிக்கமித்வா அபி⁴ப⁴வித்வா. மாரதெ⁴ய்யங் மாரஸ்ஸ விஸயங் இஸ்ஸரியட்டா²னங். ஆதி³ச்சோவ யதா² ஆதி³ச்சோ அப்³பா⁴தி³உபக்கிலேஸவிமுத்தோ அத்தனோ இத்³தி⁴யா ஆனுபா⁴வேன தேஜஸாதி தீஹி கு³ணேஹி ஸமன்னாக³தோ நப⁴ங் அப்³பு⁴ஸ்ஸக்கமானோ ஸப்³ப³ங் ஆகாஸக³தங் தமங் அதிக்கம்ம அதிக்கமித்வா அபி⁴ப⁴வித்வா வித⁴மித்வா விரோசதி, ஓபா⁴ஸதி, தபதி; ஏவமேவ கீ²ணாஸவோ பி⁴க்கு² தீஹி த⁴ம்மேஹி ஸமன்னாக³தோ ஸப்³பு³பக்கிலேஸவிமுத்தோ மாரதெ⁴ய்யஸங்கா²தங் தேபூ⁴மகத⁴ம்மப்பவத்தங் அபி⁴ப⁴வித்வா விரோசதீதி.
59. Dasamassa kā uppatti? Ekadivasaṃ kira satthā sekkhabahulāya parisāya parivuto nisinno tesaṃ ajjhāsayaṃ oloketvā upari visesādhigamāya ussāhaṃ janetuṃ asekkhabhūmiṃ thomento idaṃ suttaṃ abhāsi. Tattha atikkammātiādīsu ayaṃ saṅkhepattho – atikkamma atikkamitvā abhibhavitvā. Māradheyyaṃ mārassa visayaṃ issariyaṭṭhānaṃ. Ādiccova yathā ādicco abbhādiupakkilesavimutto attano iddhiyā ānubhāvena tejasāti tīhi guṇehi samannāgato nabhaṃ abbhussakkamāno sabbaṃ ākāsagataṃ tamaṃ atikkamma atikkamitvā abhibhavitvā vidhamitvā virocati, obhāsati, tapati; evameva khīṇāsavo bhikkhu tīhi dhammehi samannāgato sabbupakkilesavimutto māradheyyasaṅkhātaṃ tebhūmakadhammappavattaṃ abhibhavitvā virocatīti.
அஸெக்கே²னாதி எத்த² ஸிக்கா²ஸு ஜாதாதி ஸெக்கா², ஸத்தன்னங் ஸெக்கா²னங் ஏதேதி வா ஸெக்கா², அபரியோஸிதஸிக்க²த்தா ஸயமேவ ஸிக்க²ந்தீதி வா ஸெக்கா² மக்³க³த⁴ம்மா ஹெட்டி²மப²லத்தயத⁴ம்மா ச. அக்³க³ப²லத⁴ம்மா பன உபரி ஸிக்கி²தப்³பா³பா⁴வேன ந ஸெக்கா²தி அஸெக்கா². யத்த² ஹி ஸெக்க²பா⁴வாஸங்கா அத்தி², தத்தா²யங் படிஸேதோ⁴தி லோகியத⁴ம்மேஸு நிப்³பா³னே ச அஸெக்க²பா⁴வானாபத்தி த³ட்ட²ப்³பா³. ஸீலஸமாதி⁴பஞ்ஞாஸங்கா²தா ஹி ஸிக்கா² அத்தனோ படிபக்க²கிலேஸேஹி விப்பயுத்தா பரிஸுத்³தா⁴ உபக்கிலேஸானங் ஆரம்மணபா⁴வம்பி அனுபக³மனதோ ஸாதிஸயங் ஸிக்கா²தி வத்துங் யுத்தா, அட்ட²ஸுபி மக்³க³ப²லேஸு விஜ்ஜந்தி; தஸ்மா சதுமக்³க³ஹெட்டி²மப²லத்தயத⁴ம்மா விய அரஹத்தப²லத⁴ம்மாபி ‘‘தாஸு ஸிக்கா²ஸு ஜாதா’’தி ச, தங்ஸிக்கா²ஸமங்கி³னோ அரஹதோ இதரேஸங் விய ஸெக்க²த்தே ஸதி ‘‘ஸெக்க²ஸ்ஸ ஏதே’’தி ச ‘‘ஸிக்கா² ஸீலங் ஏதேஸ’’ந்தி ச ஸெக்கா²தி ஆஸங்கா ஸியுந்தி ததா³ஸங்கானிவத்தனத்த²ங் அஸெக்கா²தி யதா²வுத்தஸெக்க²பா⁴வப்படிஸேத⁴ங் கத்வா வுத்தங். அரஹத்தப²லே பவத்தமானா ஹி ஸிக்கா² பரினிட்டி²தகிச்சத்தா ந ஸிக்கா²கிச்சங் கரொந்தி, கேவலங் ஸிக்கா²ப²லபா⁴வேன பவத்தந்தி. தஸ்மா தா ந ஸிக்கா²வசனங் அரஹந்தி, நாபி தங்ஸமங்கி³னோ ஸெக்க²வசனங், ந ச தங்ஸம்பயுத்தத⁴ம்மா ஸிக்க²னஸீலா. ‘‘ஸிக்கா²ஸு ஜாதா’’தி ஏவமாதி³அத்தே²ஹி அக்³க³ப²லத⁴ம்மா ஸெக்கா² ந ஹொந்தி. ஹெட்டி²மப²லேஸு பன ஸிக்கா² ஸகதா³கா³மிமக்³க³விபஸ்ஸனாதீ³னங் உபனிஸ்ஸயபா⁴வதோ ஸிக்கா²கிச்சங் கரொந்தீதி ஸிக்கா²வசனங் அரஹந்தி, தங்ஸமங்கி³னோ ச ஸெக்க²வசனங், தங்ஸம்பயுத்தா த⁴ம்மா ச ஸிக்க²னஸீலா. ஸெக்க²த⁴ம்மா யதா²வுத்தேஹி அத்தே²ஹி ஸெக்கா² ஹொந்தியேவ.
Asekkhenāti ettha sikkhāsu jātāti sekkhā, sattannaṃ sekkhānaṃ eteti vā sekkhā, apariyositasikkhattā sayameva sikkhantīti vā sekkhā maggadhammā heṭṭhimaphalattayadhammā ca. Aggaphaladhammā pana upari sikkhitabbābhāvena na sekkhāti asekkhā. Yattha hi sekkhabhāvāsaṅkā atthi, tatthāyaṃ paṭisedhoti lokiyadhammesu nibbāne ca asekkhabhāvānāpatti daṭṭhabbā. Sīlasamādhipaññāsaṅkhātā hi sikkhā attano paṭipakkhakilesehi vippayuttā parisuddhā upakkilesānaṃ ārammaṇabhāvampi anupagamanato sātisayaṃ sikkhāti vattuṃ yuttā, aṭṭhasupi maggaphalesu vijjanti; tasmā catumaggaheṭṭhimaphalattayadhammā viya arahattaphaladhammāpi ‘‘tāsu sikkhāsu jātā’’ti ca, taṃsikkhāsamaṅgino arahato itaresaṃ viya sekkhatte sati ‘‘sekkhassa ete’’ti ca ‘‘sikkhā sīlaṃ etesa’’nti ca sekkhāti āsaṅkā siyunti tadāsaṅkānivattanatthaṃ asekkhāti yathāvuttasekkhabhāvappaṭisedhaṃ katvā vuttaṃ. Arahattaphale pavattamānā hi sikkhā pariniṭṭhitakiccattā na sikkhākiccaṃ karonti, kevalaṃ sikkhāphalabhāvena pavattanti. Tasmā tā na sikkhāvacanaṃ arahanti, nāpi taṃsamaṅgino sekkhavacanaṃ, na ca taṃsampayuttadhammā sikkhanasīlā. ‘‘Sikkhāsu jātā’’ti evamādiatthehi aggaphaladhammā sekkhā na honti. Heṭṭhimaphalesu pana sikkhā sakadāgāmimaggavipassanādīnaṃ upanissayabhāvato sikkhākiccaṃ karontīti sikkhāvacanaṃ arahanti, taṃsamaṅgino ca sekkhavacanaṃ, taṃsampayuttā dhammā ca sikkhanasīlā. Sekkhadhammā yathāvuttehi atthehi sekkhā hontiyeva.
அத² வா ஸெக்கா²தி அபரியோஸிதஸிக்கா²னங் வசனந்தி, அஸெக்கா²தி பத³ங் பரியோஸிதஸிக்கா²னங் த³ஸ்ஸனந்தி ந லோகியத⁴ம்மனிப்³பா³னானங் அஸெக்க²பா⁴வாபத்தி. வுட்³டி⁴ப்பத்தா ஸெக்கா² அஸெக்கா² ச ஸெக்க²த⁴ம்மேஸு ஏவ கேஸஞ்சி வுட்³டி⁴ப்பத்தானங் அஸெக்க²தா ஆபஜ்ஜதீதி அரஹத்தமக்³க³த⁴ம்மா வுட்³டி⁴ப்பத்தா. யதா²வுத்தேஹி ச அத்தே²ஹி ஸெக்கா²தி கத்வா அஸெக்கா² ஆபன்னாதி சே? தங் ந, ஸதி³ஸேஸு தப்³போ³ஹாரதோ. அரஹத்தமக்³க³தோ ஹி நின்னானாகரணங் அரஹத்தப²லங் ட²பெத்வா பரிஞ்ஞாதி³கிச்சகரணங் விபாகபா⁴வஞ்ச, தஸ்மா தே ஏவ ஸெக்கா² த⁴ம்மா அரஹத்தப²லபா⁴வங் ஆபன்னாதி ஸக்கா வத்துங். குஸலஸுக²தோ ச விபாகஸுக²ங் ஸந்ததரதாய பணீததரந்தி வுட்³டி⁴ப்பத்தாவ தே த⁴ம்மா ஹொந்தீதி ‘‘அஸெக்கா²’’தி வுச்சந்தி.
Atha vā sekkhāti apariyositasikkhānaṃ vacananti, asekkhāti padaṃ pariyositasikkhānaṃ dassananti na lokiyadhammanibbānānaṃ asekkhabhāvāpatti. Vuḍḍhippattā sekkhā asekkhā ca sekkhadhammesu eva kesañci vuḍḍhippattānaṃ asekkhatā āpajjatīti arahattamaggadhammā vuḍḍhippattā. Yathāvuttehi ca atthehi sekkhāti katvā asekkhā āpannāti ce? Taṃ na, sadisesu tabbohārato. Arahattamaggato hi ninnānākaraṇaṃ arahattaphalaṃ ṭhapetvā pariññādikiccakaraṇaṃ vipākabhāvañca, tasmā te eva sekkhā dhammā arahattaphalabhāvaṃ āpannāti sakkā vattuṃ. Kusalasukhato ca vipākasukhaṃ santataratāya paṇītataranti vuḍḍhippattāva te dhammā hontīti ‘‘asekkhā’’ti vuccanti.
தே பன அஸெக்க²த⁴ம்மே க²ந்த⁴வஸேன இத⁴ திதா⁴ விப⁴ஜித்வா தேஹி ஸமன்னாக³மேன கீ²ணாஸவஸ்ஸ ஆனுபா⁴வங் விபா⁴வெந்தோ ப⁴க³வா ‘‘அஸெக்கே²ன ஸீலக்க²ந்தே⁴னா’’திஆதி³மாஹ. தத்த² ஸீலஸத்³த³ஸ்ஸ அத்தோ² ஹெட்டா² வுத்தோ. க²ந்த⁴ஸத்³தோ³ பன ராஸிம்ஹி பஞ்ஞத்தியங் ருள்ஹியங் கு³ணேதி ப³ஹூஸு அத்தே²ஸு தி³ட்ட²ப்பயோகோ³. ததா² ஹி ‘‘அஸங்கெ²ய்யோ அப்பமெய்யோ மஹாஉத³கக்க²ந்தொ⁴த்வேவ ஸங்க்²யங் க³ச்ச²தீ’’திஆதீ³ஸு (அ॰ நி॰ 4.51; 6.37) ராஸிம்ஹி ஆக³தோ. ‘‘அத்³த³ஸா கோ² ப⁴க³வா மஹந்தங் தா³ருக்க²ந்த⁴ங் க³ங்கா³ய நதி³யா ஸோதேன வுய்ஹமான’’ந்திஆதீ³ஸு (ஸங்॰ நி॰ 4.241) பஞ்ஞத்தியங். ‘‘சித்தங் மனோ மானஸங் ஹத³யங் பண்ட³ரங் மனோ மனாயதனங் விஞ்ஞாணங் விஞ்ஞாணக்க²ந்தோ⁴’’திஆதீ³ஸு (த⁴॰ ஸ॰ 63, 65) ருள்ஹியங். ‘‘ந கோ², ஆவுஸோ விஸாக², அரியேன அட்ட²ங்கி³கேன மக்³கே³ன தயோ க²ந்தா⁴ ஸங்க³ஹிதா, தீஹி ச கோ², ஆவுஸோ விஸாக², க²ந்தே⁴ஹி அரியோ அட்ட²ங்கி³கோ மக்³கோ³ ஸங்க³ஹிதோ’’திஆதீ³ஸு (ம॰ நி॰ 1.462) கு³ணே. இதா⁴பி கு³ணேயேவ த³ட்ட²ப்³போ³. தஸ்மா அஸெக்கே²ன ஸீலஸங்கா²தேன கு³ணேனாதி அத்தோ². ஸமன்னாக³தோதி ஸம்பயுத்தோ ஸமங்கீ³பூ⁴தோ. ஸமாத³ஹதி ஏதேன, ஸயங் வா ஸமாத³ஹதி, ஸமாதா⁴னமேவ வாதி ஸமாதி⁴. பகாரேஹி ஜானாதி யதா²ஸபா⁴வங் படிவிஜ்ஜ²தீதி பஞ்ஞா. ஸீலமேவ க²ந்தோ⁴ ஸீலக்க²ந்தோ⁴. ஸேஸேஸுபி ஏஸேவ நயோ.
Te pana asekkhadhamme khandhavasena idha tidhā vibhajitvā tehi samannāgamena khīṇāsavassa ānubhāvaṃ vibhāvento bhagavā ‘‘asekkhena sīlakkhandhenā’’tiādimāha. Tattha sīlasaddassa attho heṭṭhā vutto. Khandhasaddo pana rāsimhi paññattiyaṃ ruḷhiyaṃ guṇeti bahūsu atthesu diṭṭhappayogo. Tathā hi ‘‘asaṅkheyyo appameyyo mahāudakakkhandhotveva saṅkhyaṃ gacchatī’’tiādīsu (a. ni. 4.51; 6.37) rāsimhi āgato. ‘‘Addasā kho bhagavā mahantaṃ dārukkhandhaṃ gaṅgāya nadiyā sotena vuyhamāna’’ntiādīsu (saṃ. ni. 4.241) paññattiyaṃ. ‘‘Cittaṃ mano mānasaṃ hadayaṃ paṇḍaraṃ mano manāyatanaṃ viññāṇaṃ viññāṇakkhandho’’tiādīsu (dha. sa. 63, 65) ruḷhiyaṃ. ‘‘Na kho, āvuso visākha, ariyena aṭṭhaṅgikena maggena tayo khandhā saṅgahitā, tīhi ca kho, āvuso visākha, khandhehi ariyo aṭṭhaṅgiko maggo saṅgahito’’tiādīsu (ma. ni. 1.462) guṇe. Idhāpi guṇeyeva daṭṭhabbo. Tasmā asekkhena sīlasaṅkhātena guṇenāti attho. Samannāgatoti sampayutto samaṅgībhūto. Samādahati etena, sayaṃ vā samādahati, samādhānameva vāti samādhi. Pakārehi jānāti yathāsabhāvaṃ paṭivijjhatīti paññā. Sīlameva khandho sīlakkhandho. Sesesupi eseva nayo.
தத்த² அக்³க³ப²லபூ⁴தா ஸம்மாவாசா, ஸம்மாகம்மந்தோ, ஸம்மாஆஜீவோ ச ஸபா⁴வேனேவ அஸெக்கோ² ஸீலக்க²ந்தோ⁴ நாம, ததா² ஸம்மாஸமாதி⁴ அஸெக்கோ² ஸமாதி⁴க்க²ந்தோ⁴. தது³பகாரகதோ பன ஸம்மாவாயாமஸம்மாஸதியோ ஸமாதி⁴க்க²ந்தே⁴ ஸங்க³ஹங் க³ச்ச²ந்தி. ததா² ஸம்மாதி³ட்டி² அஸெக்கோ² பஞ்ஞாக்க²ந்தோ⁴. தது³பகாரகதோ ஸம்மாஸங்கப்போ பஞ்ஞாக்க²ந்தே⁴ ஸங்க³ஹங் க³ச்ச²தீதி ஏவமெத்த² அட்ட²பி அரஹத்தப²லத⁴ம்மா தீஹி க²ந்தே⁴ஹி ஸங்க³ஹெத்வா த³ஸ்ஸிதாதி வேதி³தப்³ப³ங்.
Tattha aggaphalabhūtā sammāvācā, sammākammanto, sammāājīvo ca sabhāveneva asekkho sīlakkhandho nāma, tathā sammāsamādhi asekkho samādhikkhandho. Tadupakārakato pana sammāvāyāmasammāsatiyo samādhikkhandhe saṅgahaṃ gacchanti. Tathā sammādiṭṭhi asekkho paññākkhandho. Tadupakārakato sammāsaṅkappo paññākkhandhe saṅgahaṃ gacchatīti evamettha aṭṭhapi arahattaphaladhammā tīhi khandhehi saṅgahetvā dassitāti veditabbaṃ.
யஸ்ஸ ஏதே ஸுபா⁴விதாதி யேன அரஹதா ஏதே ஸீலாத³யோ அஸெக்க²த⁴ம்மக்க²ந்தா⁴ ஸுபா⁴விதா ஸுட்டு² வட்³டி⁴தா, ஸோ ஆதி³ச்சோவ விரோசதீதி ஸம்ப³ந்தோ⁴. ‘‘யஸ்ஸ சேதே’’திபி பட²ந்தி. தேஸஞ்ச ஸத்³தோ³ நிபாதமத்தங். ஏவமேதஸ்மிங் வக்³கே³ பட²மஸுத்தே வட்டங், பரியோஸானஸுத்தே விவட்டங், இதரேஸு வட்டவிவட்டங் கதி²தங்.
Yassa ete subhāvitāti yena arahatā ete sīlādayo asekkhadhammakkhandhā subhāvitā suṭṭhu vaḍḍhitā, so ādiccova virocatīti sambandho. ‘‘Yassa cete’’tipi paṭhanti. Tesañca saddo nipātamattaṃ. Evametasmiṃ vagge paṭhamasutte vaṭṭaṃ, pariyosānasutte vivaṭṭaṃ, itaresu vaṭṭavivaṭṭaṃ kathitaṃ.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
பட²மவக்³க³வண்ணனா நிட்டி²தா.
Paṭhamavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 10. மாரதெ⁴ய்யஸுத்தங் • 10. Māradheyyasuttaṃ
