| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. மாரதீ⁴துஸுத்தவண்ணனா
5. Māradhītusuttavaṇṇanā
161. சிந்தேஸீதி ஸோகவஸிகோ ஹுத்வா சிந்தயி. க³ணிகாரஹத்தி²னியோதி தீ³பககரேணுயோ. ஏகஸதங் ஏகஸதந்தி ஏகஸதங் ஏகஸதங் பச்சேகங் ஸதங் ஸதந்தி அத்தோ². தேனாஹ ‘‘ஏகேகங் ஸதங் ஸதங் கத்வா’’தி. குமாரிவண்ணஸதந்தி குமாரித்தீ²னங் அத்தபா⁴வானங் ஸதங். தா கிர பட²மங் கஞ்ஞாரூபேன அத்தானங் த³ஸ்ஸேஸுங். அனுபக³தபுப்பா²னஞ்ஹி ஸமஞ்ஞா கஞ்ஞாதி. புன யதா²வுத்தகுமாரிரூபேன உபக³தபுப்பா² ஹி குமாரீ. புன வது⁴காரூபேன. தங் ஸந்தா⁴ய வுத்தங் ‘‘அவிஜாதவண்ணஸத’’ந்தி . ததியவாரே யுவதிரூபேன. விஜாதா ஹி இத்தீ² அனதிக்கந்தமஜ்ஜி²மவயா யுவதீ. எத்தாவதா பா³லா தருணீ போரீதி திவிதா⁴ஸு இத்தீ²ஸு புரிமா த்³வே த³ஸ்ஸிதா, பரியோஸானவாரேஸு மனுஸ்ஸஜாதிகானங் மனுஸ்ஸித்தி²யோவ ருச்சந்தீதி தேன மனுஸ்ஸரூபேன தா அத்தானங் த³ஸ்ஸேஸுங்.
161.Cintesīti sokavasiko hutvā cintayi. Gaṇikārahatthiniyoti dīpakakareṇuyo. Ekasataṃ ekasatanti ekasataṃ ekasataṃ paccekaṃ sataṃ satanti attho. Tenāha ‘‘ekekaṃ sataṃ sataṃ katvā’’ti. Kumārivaṇṇasatanti kumāritthīnaṃ attabhāvānaṃ sataṃ. Tā kira paṭhamaṃ kaññārūpena attānaṃ dassesuṃ. Anupagatapupphānañhi samaññā kaññāti. Puna yathāvuttakumārirūpena upagatapupphā hi kumārī. Puna vadhukārūpena. Taṃ sandhāya vuttaṃ ‘‘avijātavaṇṇasata’’nti . Tatiyavāre yuvatirūpena. Vijātā hi itthī anatikkantamajjhimavayā yuvatī. Ettāvatā bālā taruṇī porīti tividhāsu itthīsu purimā dve dassitā, pariyosānavāresu manussajātikānaṃ manussitthiyova ruccantīti tena manussarūpena tā attānaṃ dassesuṃ.
அத்த²ஸ்ஸ பத்திந்தி ஏகந்ததோ ஹிதானுப்பத்திங். ஹத³யஸ்ஸ ஸந்திந்தி பரமசித்துபஸமங். கிலேஸஸேனந்தி காமகு³ணஸங்கா²தங் பட²மங் கிலேஸஸேனங். ஸா ஹி கிலேஸஸேனா அச்ச²ராஸங்கா⁴தஸபா⁴வாபி படிபத்த²யமானா பியாயிதப்³ப³இச்சி²தப்³ப³ரூபபா⁴வதோ பியரூபஸாதரூபா நாம அத்தனோ கிச்சவஸேன. ஏகோ அஹங் ஜா²யந்தோதி க³ணஸங்க³ணிகாய கிலேஸஸங்க³ணிகாய ச அபா⁴வதோ ஏகோ அஸஹாயோ அஹங் லக்க²ணூபனிஜ்ஜா²னேன நிஜ்ஜா²யந்தோ. அனுபு³ஜ்ஜி²ந்தி அனுக்கமேன மக்³க³படிபாடியா பு³ஜ்ஜி²ங் படிபு³ஜ்ஜி²ங். தஸ்மாதி யதா²வுத்தவிவேகஸுக²ஸமதி⁴க³மனிமித்தங். அகரணேனாதி மித்தஸந்த²வஸ்ஸ அகரணேன. ஸக்கீ²தி ஸக்கி²பா⁴வோ.
Atthassa pattinti ekantato hitānuppattiṃ. Hadayassa santinti paramacittupasamaṃ. Kilesasenanti kāmaguṇasaṅkhātaṃ paṭhamaṃ kilesasenaṃ. Sā hi kilesasenā accharāsaṅghātasabhāvāpi paṭipatthayamānā piyāyitabbaicchitabbarūpabhāvato piyarūpasātarūpā nāma attano kiccavasena. Eko ahaṃ jhāyantoti gaṇasaṅgaṇikāya kilesasaṅgaṇikāya ca abhāvato eko asahāyo ahaṃ lakkhaṇūpanijjhānena nijjhāyanto. Anubujjhinti anukkamena maggapaṭipāṭiyā bujjhiṃ paṭibujjhiṃ. Tasmāti yathāvuttavivekasukhasamadhigamanimittaṃ. Akaraṇenāti mittasanthavassa akaraṇena. Sakkhīti sakkhibhāvo.
கதமேன விஹாரேனாதி ஜா²னஸமாபத்தீனங் கதமேன விஹாரேன. இத⁴ து³தியபத³ஸ்ஸ அத்தோ² விஸ்ஸஜ்ஜனகா³தா²வண்ணனாயமேவ ஆவி ப⁴விஸ்ஸதி. அனாமந்தேன ‘‘தங் புக்³க³ல’’ந்தி ஸம்முகா² டி²தம்பி ப⁴க³வந்தங் அஸம்முகா² விய கத்வா வத³தி, கத²ங் த்வந்தி அத்தோ².
Katamenavihārenāti jhānasamāpattīnaṃ katamena vihārena. Idha dutiyapadassa attho vissajjanagāthāvaṇṇanāyameva āvi bhavissati. Anāmantena ‘‘taṃ puggala’’nti sammukhā ṭhitampi bhagavantaṃ asammukhā viya katvā vadati, kathaṃ tvanti attho.
‘‘அவிதக்கஜா²யீ’’தி வக்க²மானத்தா அயமேவெத்த² காயபஸ்ஸத்³தி⁴ வேதி³தப்³பா³தி ஆஹ ‘‘சதுத்த²ஜ்ஜா²னேன அஸ்ஸாஸபஸ்ஸாஸகாயஸ்ஸ பஸ்ஸத்³த⁴த்தா பஸ்ஸத்³த⁴காயோ’’தி. புஞ்ஞாபி⁴ஸங்கா²ராதி³கே கம்மாபி⁴ஸங்கா²ரே. காமாலயாதீ³னங் அபா⁴வதோ அனாலயோ. ந ஸரதீதி ந ஸவதி. ராக³வஸேன ஹி ஸத்தா ஸங்ஸாரமனுஸவந்தி. ந தி²னோதி ந தி²னமித்³த⁴சித்தோ. மோஹவஸேன ஹி ஸத்தா தி²னமித்³த⁴ங் ஆபஜ்ஜந்தீதி. தி³யட்³ட⁴கிலேஸஸஹஸ்ஸந்தி கு²த்³த³கவத்து²விப⁴ங்கே³ (விப⁴॰ 842, 976) ஆக³தேஸு அட்ட²ஸு கிலேஸஸதேஸு அட்ட²ஸதங் தண்ஹாவிசரிதானி அபனெத்வா ஸேஸா பஞ்ஞாஸாதி⁴கங் ஸதங் கிலேஸா, தே ப்³ரஹ்மஜாலே (தீ³॰ நி॰ 1.31) ஆக³தாஹி த்³வாஸட்டி²யா தி³ட்டீ²ஹி ஸஹ பஞ்சபஞ்ஞாஸாதி⁴கங் ஸத்தஸதங் ஹோதி; தா ச உப்பன்னானுப்பன்னபா⁴வேன தி³கு³ணிதா தி³யட்³ட⁴கிலேஸஸஹஸ்ஸங் த³ஸாதி⁴கங் ஹோதி; தங் அப்பகங் பன ஊனமதி⁴கங் வா க³ணனுபக³ங் ந ஹோதீதி ‘‘தி³யட்³ட⁴கிலேஸஸஹஸ்ஸ’’ந்தி வுத்தங். இதரேஸங் அதீதாதி³பா⁴வாமஸனதோ அக்³க³ஹணங் பஹானஸ்ஸ அதி⁴ப்பேதத்தா. அயமெத்த² ஸங்கே²போ, வித்தா²ரோ பன அபி⁴த⁴ம்மடீகாயங் (த⁴॰ ஸ॰ அனுடீ॰ நிதா³னகதா²வண்ணனா) வுத்தனயேன வேதி³தப்³போ³. பட²மபதே³னாதி ‘‘ந குப்பதீ’’தி இமினா பதே³ன. து³தியேனாதி ‘‘ந ஸரதீ’’தி பதே³ன. ததியேனாதி ‘‘ந தி²னோ’’தி பதே³ன. நீவரணப்பஹானேன கீ²ணாஸவதங் த³ஸ்ஸேதி, அனவஸேஸதோ நீவரணானங் அச்சந்தப்பஹானங் அதி⁴ப்பேதங்.
‘‘Avitakkajhāyī’’ti vakkhamānattā ayamevettha kāyapassaddhi veditabbāti āha ‘‘catutthajjhānena assāsapassāsakāyassa passaddhattā passaddhakāyo’’ti. Puññābhisaṅkhārādike kammābhisaṅkhāre. Kāmālayādīnaṃ abhāvato anālayo. Na saratīti na savati. Rāgavasena hi sattā saṃsāramanusavanti. Na thinoti na thinamiddhacitto. Mohavasena hi sattā thinamiddhaṃ āpajjantīti. Diyaḍḍhakilesasahassanti khuddakavatthuvibhaṅge (vibha. 842, 976) āgatesu aṭṭhasu kilesasatesu aṭṭhasataṃ taṇhāvicaritāni apanetvā sesā paññāsādhikaṃ sataṃ kilesā, te brahmajāle (dī. ni. 1.31) āgatāhi dvāsaṭṭhiyā diṭṭhīhi saha pañcapaññāsādhikaṃ sattasataṃ hoti; tā ca uppannānuppannabhāvena diguṇitā diyaḍḍhakilesasahassaṃ dasādhikaṃ hoti; taṃ appakaṃ pana ūnamadhikaṃ vā gaṇanupagaṃ na hotīti ‘‘diyaḍḍhakilesasahassa’’nti vuttaṃ. Itaresaṃ atītādibhāvāmasanato aggahaṇaṃ pahānassa adhippetattā. Ayamettha saṅkhepo, vitthāro pana abhidhammaṭīkāyaṃ (dha. sa. anuṭī. nidānakathāvaṇṇanā) vuttanayena veditabbo. Paṭhamapadenāti ‘‘na kuppatī’’ti iminā padena. Dutiyenāti ‘‘na saratī’’ti padena. Tatiyenāti ‘‘na thino’’ti padena. Nīvaraṇappahānena khīṇāsavataṃ dasseti, anavasesato nīvaraṇānaṃ accantappahānaṃ adhippetaṃ.
பஞ்சத்³வாரிககிலேஸோக⁴ங் திண்ணோதி ச²ன்னங் த்³வாரானங் வஸேன பவத்தனகிலேஸோக⁴ங் தரித்வா டி²தோ. காமோக⁴தி³ட்டோ²க⁴ப⁴வோக⁴ட்ட²கிலேஸபா⁴வதோ ‘‘பஞ்சோக⁴க்³க³ஹணேன வா பஞ்சோரம்பா⁴கி³யானி ஸங்யோஜனானி வேதி³தப்³பா³னீ’’தி ஆஹ. ரூபராகா³த³யோ விஸேஸதோ ந பஞ்சத்³வாரிகாதி வுத்தங் ‘‘ச²ட்ட²க்³க³ஹணேன பஞ்சுத்³த⁴ம்பா⁴கி³யானி வேதி³தப்³பா³னீ’’தி.
Pañcadvārikakilesoghaṃ tiṇṇoti channaṃ dvārānaṃ vasena pavattanakilesoghaṃ taritvā ṭhito. Kāmoghadiṭṭhoghabhavoghaṭṭhakilesabhāvato ‘‘pañcoghaggahaṇena vā pañcorambhāgiyāni saṃyojanāni veditabbānī’’ti āha. Rūparāgādayo visesato na pañcadvārikāti vuttaṃ ‘‘chaṭṭhaggahaṇena pañcuddhambhāgiyāni veditabbānī’’ti.
மச்சுராஜஸ்ஸாதி ஸம்ப³ந்தே⁴ ஸாமிவசனந்தி த³ஸ்ஸெந்தோ ‘‘மச்சுராஜஸ்ஸ ஹத்த²தோ’’தி ஆஹ. நயமானானந்தி அனாத³ரே ஸாமிவசனந்தி கத்வா வுத்தங் ‘‘நயமானேஸூ’’தி.
Maccurājassāti sambandhe sāmivacananti dassento ‘‘maccurājassa hatthato’’ti āha. Nayamānānanti anādare sāmivacananti katvā vuttaṃ ‘‘nayamānesū’’ti.
ஊஹச்சாதி பு³த்³த⁴ங் நிஸ்ஸாய. ‘‘இத³மவோசா’’தி தே³ஸனங் நிட்டா²பெத்வாதி ஏதேன ஸங்யுத்தேஸு அயங் நிக³மனபாளி, ஹெட்டா² அனாக³தனயத்தா பன கேஸுசி பொத்த²கேஸு ந லிகீ²யதீதி த³ஸ்ஸேதி. த³த்³த³ல்லமானாதி ஜஜ்ஜகாரஸ்ஸ ஹி த³த்³த³காரங் கத்வா நித்³தே³ஸோ. தேனாஹ ‘‘அதிவிய ஜலமானா’’தி. நீஹரீதி தாஸங் காயவசீவிகாரங் ந மனஸிகரொந்தோ திணாயபி அமஞ்ஞமானோவ அனபெக்கே²னேவ நீஹரி. ப²லதோ ப⁴ட்ட²ந்தி ப²லஸிபாடிகதோ ப⁴ட்ட²ங். குண்ட³திணாதி³க³ச்ச²தூலங் போடகிதூலங்.
Ūhaccāti buddhaṃ nissāya. ‘‘Idamavocā’’ti desanaṃ niṭṭhāpetvāti etena saṃyuttesu ayaṃ nigamanapāḷi, heṭṭhā anāgatanayattā pana kesuci potthakesu na likhīyatīti dasseti. Daddallamānāti jajjakārassa hi daddakāraṃ katvā niddeso. Tenāha ‘‘ativiya jalamānā’’ti. Nīharīti tāsaṃ kāyavacīvikāraṃ na manasikaronto tiṇāyapi amaññamānova anapekkheneva nīhari. Phalato bhaṭṭhanti phalasipāṭikato bhaṭṭhaṃ. Kuṇḍatiṇādigacchatūlaṃ poṭakitūlaṃ.
மாரதீ⁴துஸுத்தவண்ணனா நிட்டி²தா.
Māradhītusuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
Sāratthappakāsiniyā saṃyuttanikāya-aṭṭhakathāya
மாரஸங்யுத்தவண்ணனாய லீனத்த²ப்பகாஸனா ஸமத்தா.
Mārasaṃyuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. மாரதீ⁴துஸுத்தங் • 5. Māradhītusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. மாரதீ⁴துஸுத்தவண்ணனா • 5. Māradhītusuttavaṇṇanā
