| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
3. ததியவக்³கோ³
3. Tatiyavaggo
1. மிச்சா²தி³ட்டி²கஸுத்தவண்ணனா
1. Micchādiṭṭhikasuttavaṇṇanā
70. ததியவக்³க³ஸ்ஸ பட²மே தி³ட்டா² மயாதி மயா தி³ட்டா², மம ஸமந்தசக்கு²னா தி³ப்³ப³சக்கு²னா சாதி த்³வீஹிபி சக்கூ²ஹி தி³ட்டா² பச்சக்க²தோ விதி³தா. தேன அனுஸ்ஸவாதி³ங் படிக்கி²பதி, அயஞ்ச அத்தோ² இதா³னேவ பாளியங் ஆக³மிஸ்ஸதி. காயது³ச்சரிதேன ஸமன்னாக³தாதி காயது³ச்சரிதேன ஸமங்கீ³பூ⁴தா. அரியானங் உபவாத³காதி பு³த்³தா⁴தீ³னங் அரியானங் அந்தமஸோ கி³ஹிஸோதாபன்னானம்பி கு³ணபரித⁴ங்ஸனேன அபூ⁴தப்³ப⁴க்கா²னேன உபவாத³கா அக்கோஸகா க³ரஹகா. மிச்சா²தி³ட்டி²காதி விபரீதத³ஸ்ஸனா. மிச்சா²தி³ட்டி²கம்மஸமாதா³னாதி மிச்சா²த³ஸ்ஸனஹேது ஸமாதி³ன்னநானாவித⁴கம்மா யே ச, மிச்சா²தி³ட்டி²மூலகேஸு காயகம்மாதீ³ஸு அஞ்ஞேபி ஸமாத³பெந்தி. எத்த² ச வசீமனோது³ச்சரிதக்³க³ஹணேனேவ அரியூபவாத³மிச்சா²தி³ட்டீ²ஸு க³ஹிதாஸு புனவசனங் மஹாஸாவஜ்ஜபா⁴வத³ஸ்ஸனத்த²ங் நேஸங். மஹாஸாவஜ்ஜோ ஹி அரியூபவாதோ³ ஆனந்தரியஸதி³ஸோ. யதா²ஹ –
70. Tatiyavaggassa paṭhame diṭṭhā mayāti mayā diṭṭhā, mama samantacakkhunā dibbacakkhunā cāti dvīhipi cakkhūhi diṭṭhā paccakkhato viditā. Tena anussavādiṃ paṭikkhipati, ayañca attho idāneva pāḷiyaṃ āgamissati. Kāyaduccaritena samannāgatāti kāyaduccaritena samaṅgībhūtā. Ariyānaṃ upavādakāti buddhādīnaṃ ariyānaṃ antamaso gihisotāpannānampi guṇaparidhaṃsanena abhūtabbhakkhānena upavādakā akkosakā garahakā. Micchādiṭṭhikāti viparītadassanā. Micchādiṭṭhikammasamādānāti micchādassanahetu samādinnanānāvidhakammā ye ca, micchādiṭṭhimūlakesu kāyakammādīsu aññepi samādapenti. Ettha ca vacīmanoduccaritaggahaṇeneva ariyūpavādamicchādiṭṭhīsu gahitāsu punavacanaṃ mahāsāvajjabhāvadassanatthaṃ nesaṃ. Mahāsāvajjo hi ariyūpavādo ānantariyasadiso. Yathāha –
‘‘ஸெய்யதா²பி, ஸாரிபுத்த, பி⁴க்கு² ஸீலஸம்பன்னோ, ஸமாதி⁴ஸம்பன்னோ, பஞ்ஞாஸம்பன்னோ, தி³ட்டே²வ த⁴ம்மே அஞ்ஞங் ஆராதெ⁴ய்ய; ஏவங்ஸம்பத³மித³ங், ஸாரிபுத்த, வதா³மி தங் வாசங் அப்பஹாய, தங் சித்தங் அப்பஹாய, தங் தி³ட்டி²ங் அப்படினிஸ்ஸஜ்ஜித்வா யதா²ப⁴தங் நிக்கி²த்தோ ஏவங் நிரயே’’தி (ம॰ நி॰ 1.149).
‘‘Seyyathāpi, sāriputta, bhikkhu sīlasampanno, samādhisampanno, paññāsampanno, diṭṭheva dhamme aññaṃ ārādheyya; evaṃsampadamidaṃ, sāriputta, vadāmi taṃ vācaṃ appahāya, taṃ cittaṃ appahāya, taṃ diṭṭhiṃ appaṭinissajjitvā yathābhataṃ nikkhitto evaṃ niraye’’ti (ma. ni. 1.149).
மிச்சா²தி³ட்டி²தோ ச மஹாஸாவஜ்ஜதரங் நாம அஞ்ஞங் நத்தி². யதா²ஹ –
Micchādiṭṭhito ca mahāsāvajjataraṃ nāma aññaṃ natthi. Yathāha –
‘‘நாஹங், பி⁴க்க²வே, அஞ்ஞங் ஏகத⁴ம்மம்பி ஸமனுபஸ்ஸாமி, யங் ஏவங் மஹாஸாவஜ்ஜதரங் யத²யித³ங், பி⁴க்க²வே, மிச்சா²தி³ட்டி². மிச்சா²தி³ட்டி²பரமானி, பி⁴க்க²வே, வஜ்ஜானீ’’தி (அ॰ நி॰ 1.310).
‘‘Nāhaṃ, bhikkhave, aññaṃ ekadhammampi samanupassāmi, yaṃ evaṃ mahāsāvajjataraṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, vajjānī’’ti (a. ni. 1.310).
தங் கோ² பனாதிஆதி³ யதா²வுத்தஸ்ஸ அத்த²ஸ்ஸ அத்தபச்சக்க²பா⁴வங் த³ள்ஹதரங் கத்வா த³ஸ்ஸேதுங் ஆரத்³த⁴ங். தம்பி ஸுவிஞ்ஞெய்யமேவ.
Taṃkho panātiādi yathāvuttassa atthassa attapaccakkhabhāvaṃ daḷhataraṃ katvā dassetuṃ āraddhaṃ. Tampi suviññeyyameva.
கா³தா²ஸு மிச்சா² மனங் பணிதா⁴யாதி அபி⁴ஜ்ஜா²தீ³னங் வஸேன சித்தங் அயோனிஸோ ட²பெத்வா. மிச்சா² வாசஞ்ச பா⁴ஸியாதி மிச்சா² முஸாவாதா³தி³வஸேன வாசங் பா⁴ஸித்வா. மிச்சா² கம்மானி கத்வானாதி பாணாதிபாதாதி³வஸேன காயகம்மானி கத்வா. அத² வா மிச்சா² மனங் பணிதா⁴யாதி மிச்சா²தி³ட்டி²வஸேன சித்தங் விபரீதங் ட²பெத்வா. ஸேஸபத³த்³வயேபி ஏஸேவ நயோ. இதா³னிஸ்ஸ ததா² து³ச்சரிதசரணே காரணங் த³ஸ்ஸேதி அப்பஸ்ஸுதோதி, அத்தனோ பரேஸஞ்ச ஹிதாவஹேன ஸுதேன விரஹிதோதி அத்தோ². அபுஞ்ஞகரோதி ததோ ஏவ அரியத⁴ம்மஸ்ஸ அகோவித³தாய கிப்³பி³ஸகாரீ பாபத⁴ம்மோ. அப்பஸ்மிங் இத⁴ ஜீவிதேதி இத⁴ மனுஸ்ஸலோகே ஜீவிதே அதிபரித்தே. ததா² சாஹ ‘‘யோ சிரங் ஜீவதி, ஸோ வஸ்ஸஸதங் அப்பங் வா பி⁴ய்யோ’’தி (தீ³॰ நி॰ 2.93; ஸங்॰ நி॰ 1.145), ‘‘அப்பமாயு மனுஸ்ஸான’’ந்தி (ஸங்॰ நி॰ 1.145; மஹானி॰ 10) ச. தஸ்மா ப³ஹுஸ்ஸுதோ ஸப்பஞ்ஞோ ஸீக⁴ங் புஞ்ஞானி கத்வா ஸக்³கூ³பகோ³ நிப்³பா³னபதிட்டோ² வா ஹோதி. யோ பன அப்பஸ்ஸுதோ அபுஞ்ஞகரோ, காயஸ்ஸ பே⁴தா³ து³ப்பஞ்ஞோ நிரயங் ஸோ உபபஜ்ஜதீதி.
Gāthāsu micchā manaṃ paṇidhāyāti abhijjhādīnaṃ vasena cittaṃ ayoniso ṭhapetvā. Micchāvācañca bhāsiyāti micchā musāvādādivasena vācaṃ bhāsitvā. Micchā kammāni katvānāti pāṇātipātādivasena kāyakammāni katvā. Atha vā micchā manaṃ paṇidhāyāti micchādiṭṭhivasena cittaṃ viparītaṃ ṭhapetvā. Sesapadadvayepi eseva nayo. Idānissa tathā duccaritacaraṇe kāraṇaṃ dasseti appassutoti, attano paresañca hitāvahena sutena virahitoti attho. Apuññakaroti tato eva ariyadhammassa akovidatāya kibbisakārī pāpadhammo. Appasmiṃ idha jīviteti idha manussaloke jīvite atiparitte. Tathā cāha ‘‘yo ciraṃ jīvati, so vassasataṃ appaṃ vā bhiyyo’’ti (dī. ni. 2.93; saṃ. ni. 1.145), ‘‘appamāyu manussāna’’nti (saṃ. ni. 1.145; mahāni. 10) ca. Tasmā bahussuto sappañño sīghaṃ puññāni katvā saggūpago nibbānapatiṭṭho vā hoti. Yo pana appassuto apuññakaro, kāyassa bhedā duppañño nirayaṃ so upapajjatīti.
பட²மஸுத்தவண்ணனா நிட்டி²தா.
Paṭhamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 1. மிச்சா²தி³ட்டி²கஸுத்தங் • 1. Micchādiṭṭhikasuttaṃ
