| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. மூலகஸுத்தங்
3. Mūlakasuttaṃ
83. 1 ‘‘ஸசே, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கிங்மூலகா, ஆவுஸோ, ஸப்³பே³ த⁴ம்மா, கிங்ஸம்ப⁴வா ஸப்³பே³ த⁴ம்மா, கிங்ஸமுத³யா ஸப்³பே³ த⁴ம்மா, கிங்ஸமோஸரணா ஸப்³பே³ த⁴ம்மா, கிங்பமுகா² ஸப்³பே³ த⁴ம்மா, கிங்அதி⁴பதெய்யா ஸப்³பே³ த⁴ம்மா, கிங்உத்தரா ஸப்³பே³ த⁴ம்மா, கிங்ஸாரா ஸப்³பே³ த⁴ம்மா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் கிந்தி ப்³யாகரெய்யாதா²’’தி? ‘‘ப⁴க³வங்மூலகா நோ, ப⁴ந்தே, த⁴ம்மா, ப⁴க³வங்னெத்திகா ப⁴க³வங்படிஸரணா. ஸாது⁴, ப⁴ந்தே , ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி.
83.2 ‘‘Sace, bhikkhave, aññatitthiyā paribbājakā evaṃ puccheyyuṃ – ‘kiṃmūlakā, āvuso, sabbe dhammā, kiṃsambhavā sabbe dhammā, kiṃsamudayā sabbe dhammā, kiṃsamosaraṇā sabbe dhammā, kiṃpamukhā sabbe dhammā, kiṃadhipateyyā sabbe dhammā, kiṃuttarā sabbe dhammā, kiṃsārā sabbe dhammā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ kinti byākareyyāthā’’ti? ‘‘Bhagavaṃmūlakā no, bhante, dhammā, bhagavaṃnettikā bhagavaṃpaṭisaraṇā. Sādhu, bhante , bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti.
‘‘தேன ஹி, பி⁴க்க²வே, தே³ஸெஸ்ஸாமி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி . ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘ஸசே, பி⁴க்க²வே, அஞ்ஞதித்தி²யா பரிப்³பா³ஜகா ஏவங் புச்செ²ய்யுங் – ‘கிங்மூலகா, ஆவுஸோ, ஸப்³பே³ த⁴ம்மா, கிங்ஸம்ப⁴வா ஸப்³பே³ த⁴ம்மா, கிங்ஸமுத³யா ஸப்³பே³ த⁴ம்மா, கிங்ஸமோஸரணா ஸப்³பே³ த⁴ம்மா, கிங்பமுகா² ஸப்³பே³ த⁴ம்மா , கிங்அதி⁴பதெய்யா ஸப்³பே³ த⁴ம்மா, கிங்உத்தரா ஸப்³பே³ த⁴ம்மா, கிங்ஸாரா ஸப்³பே³ த⁴ம்மா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாத² – ‘ச²ந்த³மூலகா, ஆவுஸோ, ஸப்³பே³ த⁴ம்மா, மனஸிகாரஸம்ப⁴வா ஸப்³பே³ த⁴ம்மா, ப²ஸ்ஸஸமுத³யா ஸப்³பே³ த⁴ம்மா, வேத³னாஸமோஸரணா ஸப்³பே³ த⁴ம்மா, ஸமாதி⁴ப்பமுகா² ஸப்³பே³ த⁴ம்மா, ஸதாதி⁴பதெய்யா ஸப்³பே³ த⁴ம்மா, பஞ்ஞுத்தரா ஸப்³பே³ த⁴ம்மா, விமுத்திஸாரா ஸப்³பே³ த⁴ம்மா’தி, ஏவங் புட்டா² தும்ஹே, பி⁴க்க²வே, தேஸங் அஞ்ஞதித்தி²யானங் பரிப்³பா³ஜகானங் ஏவங் ப்³யாகரெய்யாதா²’’தி. ததியங்.
‘‘Tena hi, bhikkhave, desessāmi. Taṃ suṇātha, sādhukaṃ manasi karotha; bhāsissāmī’’ti . ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca – ‘‘sace, bhikkhave, aññatitthiyā paribbājakā evaṃ puccheyyuṃ – ‘kiṃmūlakā, āvuso, sabbe dhammā, kiṃsambhavā sabbe dhammā, kiṃsamudayā sabbe dhammā, kiṃsamosaraṇā sabbe dhammā, kiṃpamukhā sabbe dhammā , kiṃadhipateyyā sabbe dhammā, kiṃuttarā sabbe dhammā, kiṃsārā sabbe dhammā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyātha – ‘chandamūlakā, āvuso, sabbe dhammā, manasikārasambhavā sabbe dhammā, phassasamudayā sabbe dhammā, vedanāsamosaraṇā sabbe dhammā, samādhippamukhā sabbe dhammā, satādhipateyyā sabbe dhammā, paññuttarā sabbe dhammā, vimuttisārā sabbe dhammā’ti, evaṃ puṭṭhā tumhe, bhikkhave, tesaṃ aññatitthiyānaṃ paribbājakānaṃ evaṃ byākareyyāthā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. மூலகஸுத்தவண்ணனா • 3. Mūlakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. ஸத்³தா⁴ஸுத்தாதி³வண்ணனா • 1-10. Saddhāsuttādivaṇṇanā
