| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૩. નાગસુત્તવણ્ણના
3. Nāgasuttavaṇṇanā
૧૫૧. બલં ગાહેન્તીતિ બલં ગણ્હન્તિ, ગહિતબલા થિરસરીરા હોન્તિ. કુસોબ્ભે ઓતરન્તીતિઆદીસુ અયમનુપુબ્બિકથા – નાગિનિયો કિર ઉતુસમયે પતિટ્ઠિતગબ્ભા ચિન્તેન્તિ – ‘‘સચે મયં ઇધ વિજાયિસ્સામ, એવં નો દારકા ઊમિવેગઞ્ચ સુપણ્ણસ્સ ચ પક્ખન્દિત્વા આગતસ્સ વેગં સહિતું ન સક્ખિસ્સન્તી’’તિ તા મહાસમુદ્દે નિમુજ્જિત્વા સમ્ભજ્જમુખદ્વારં પત્વા પઞ્ચ મહાનદિયો પવિસિત્વા હિમવન્તં ગચ્છન્તિ. તત્થ સુપણ્ણેહિ અપક્ખન્દનીયાસુ સુવણ્ણરજતમણિગુહાસુ વસમાના વિજાયિત્વા નાગપોતકે ગોપ્ફકાદિપમાણેસુ ઉદકેસુ ઓતારેત્વા ઉદકતરણં સિક્ખાપેન્તિ.
151.Balaṃgāhentīti balaṃ gaṇhanti, gahitabalā thirasarīrā honti. Kusobbhe otarantītiādīsu ayamanupubbikathā – nāginiyo kira utusamaye patiṭṭhitagabbhā cintenti – ‘‘sace mayaṃ idha vijāyissāma, evaṃ no dārakā ūmivegañca supaṇṇassa ca pakkhanditvā āgatassa vegaṃ sahituṃ na sakkhissantī’’ti tā mahāsamudde nimujjitvā sambhajjamukhadvāraṃ patvā pañca mahānadiyo pavisitvā himavantaṃ gacchanti. Tattha supaṇṇehi apakkhandanīyāsu suvaṇṇarajatamaṇiguhāsu vasamānā vijāyitvā nāgapotake gopphakādipamāṇesu udakesu otāretvā udakataraṇaṃ sikkhāpenti.
અથ યદા અનુક્કમેન તે નાગા ગઙ્ગાદીનં નદીનં ઓરિમતીરતો પરતીરં, પરતીરતો ઓરિમતીરન્તિ તરણપટિતરણં કાતું સક્કોન્તિ, તદા ‘‘ઇદાનિ નો દારકા ઊમિવેગઞ્ચ ગરુળવેગઞ્ચ સહિતું સક્ખિસ્સન્તી’’તિ ઞત્વા અત્તનો આનુભાવેન મહામેઘં સમુટ્ઠાપેત્વા સકલહિમવન્તં એકોદકં વિય કુરુમાના દેવં વસ્સાપેત્વા સુવણ્ણરજતાદિમયા નાવા માપેત્વા ઉપરિ સુવણ્ણતારકવિચિત્તં સમોસરિતગન્ધપુપ્ફદામં ચેલવિતાનં બન્ધિત્વા સુરભિચન્દનગન્ધપુપ્ફાદીનિ આદાય તાહિ નાવાહિ પઞ્ચ મહાનદિયો ઓગાહિત્વા અનુક્કમેન મહાસમુદ્દં પાપુણન્તિ. તત્થ ચ વસન્તા દસબ્યામ-સતબ્યામ-સહસ્સબ્યામ-સતસહસ્સબ્યામ-પમાણતં આપજ્જન્તા મહન્તત્તં વેપુલ્લત્તં આપજ્જન્તિ નામ.
Atha yadā anukkamena te nāgā gaṅgādīnaṃ nadīnaṃ orimatīrato paratīraṃ, paratīrato orimatīranti taraṇapaṭitaraṇaṃ kātuṃ sakkonti, tadā ‘‘idāni no dārakā ūmivegañca garuḷavegañca sahituṃ sakkhissantī’’ti ñatvā attano ānubhāvena mahāmeghaṃ samuṭṭhāpetvā sakalahimavantaṃ ekodakaṃ viya kurumānā devaṃ vassāpetvā suvaṇṇarajatādimayā nāvā māpetvā upari suvaṇṇatārakavicittaṃ samosaritagandhapupphadāmaṃ celavitānaṃ bandhitvā surabhicandanagandhapupphādīni ādāya tāhi nāvāhi pañca mahānadiyo ogāhitvā anukkamena mahāsamuddaṃ pāpuṇanti. Tattha ca vasantā dasabyāma-satabyāma-sahassabyāma-satasahassabyāma-pamāṇataṃ āpajjantā mahantattaṃ vepullattaṃ āpajjanti nāma.
એવમેવ ખોતિ એત્થ હિમવન્તપબ્બતો વિય ચતુપારિસુદ્ધિસીલં દટ્ઠબ્બં, નાગપોતકા વિય યોગાવચરા, કુસોબ્ભાદયો વિય અરિયમગ્ગો, મહાસમુદ્દો વિય નિબ્બાનં. યથા નાગપોતકા હિમવન્તે પતિટ્ઠાય કુસોબ્ભાદીહિ મહાસમુદ્દં પત્વા કાયમહન્તત્તં આપજ્જન્તિ, એવં યોગિનો સીલં નિસ્સાય સીલે પતિટ્ઠાય અરિયમગ્ગેન નિબ્બાનં પત્વા અરહત્તમગ્ગેનેવ આગતેસુ છસુ અભિઞ્ઞાધમ્મેસુ ગુણસરીરમહન્તત્તં પાપુણન્તીતિ.
Evameva khoti ettha himavantapabbato viya catupārisuddhisīlaṃ daṭṭhabbaṃ, nāgapotakā viya yogāvacarā, kusobbhādayo viya ariyamaggo, mahāsamuddo viya nibbānaṃ. Yathā nāgapotakā himavante patiṭṭhāya kusobbhādīhi mahāsamuddaṃ patvā kāyamahantattaṃ āpajjanti, evaṃ yogino sīlaṃ nissāya sīle patiṭṭhāya ariyamaggena nibbānaṃ patvā arahattamaggeneva āgatesu chasu abhiññādhammesu guṇasarīramahantattaṃ pāpuṇantīti.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૩. નાગસુત્તં • 3. Nāgasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૩. નાગસુત્તવણ્ણના • 3. Nāgasuttavaṇṇanā
