| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. நஜீரதிஸுத்தவண்ணனா
6. Najīratisuttavaṇṇanā
76. நாமகொ³த்தந்தி திஸ்ஸோ கஸ்ஸபோ கோ³தமோதி ஏவரூபங் நாமஞ்ச கொ³த்தஞ்ச. நித³ஸ்ஸனமத்தமேதங், தஸ்மா ஸப்³ப³ஸ்ஸ பஞ்ஞத்தியா லக்க²ணவசனந்தி த³ட்ட²ப்³ப³ங். ந ஜீரதீதி அஸபா⁴வத⁴ம்மத்தா உப்பாத³வயாபா⁴வதோ ஜரங் ந பாபுணாதி. தேனாஹ ‘‘ஜீரணஸபா⁴வோ ந ஹோதீ’’தி. யஸ்மா ஸமஞ்ஞாபா⁴வதோ காலந்தரேபி தங் ஸமஞ்ஞாயதேவ, தஸ்மா ‘‘அதீதபு³த்³தா⁴னங்…பே॰… ந ஜீரதீதி வுச்சதீ’’தி ஆஹ.
76.Nāmagottanti tisso kassapo gotamoti evarūpaṃ nāmañca gottañca. Nidassanamattametaṃ, tasmā sabbassa paññattiyā lakkhaṇavacananti daṭṭhabbaṃ. Na jīratīti asabhāvadhammattā uppādavayābhāvato jaraṃ na pāpuṇāti. Tenāha ‘‘jīraṇasabhāvo na hotī’’ti. Yasmā samaññābhāvato kālantarepi taṃ samaññāyateva, tasmā ‘‘atītabuddhānaṃ…pe… na jīratīti vuccatī’’ti āha.
ஆலஸியந்தி அலஸபா⁴வோ த³ள்ஹகோஸஜ்ஜங். தேனாஹ ‘‘யேனா’’திஆதி³. டி²திந்தி ப்³யாபாரங். நித்³தா³வஸேன பமஜ்ஜனங் கத்தப்³ப³ஸ்ஸ அகரணங். கிலேஸவஸேன பமஜ்ஜனங் அகத்தப்³ப³ஸ்ஸ கரணம்பி. கம்மஸமயேதி கம்மங் காதுங் யுத்தகாலே. கம்மகரணவீரியாபா⁴வோதி தங்கம்மகிரியஸமுட்டா²பகவீரியாபா⁴வோ. ஸோ பன அத்த²தோ வீரியபடிபக்கோ² அகுஸலசித்துப்பாதோ³, ந வீரியஸ்ஸ அபா⁴வமத்தங். ஸீலஸஞ்ஞமாபா⁴வோ து³ஸ்ஸீல்யங். விஸ்ஸட்டா²சாரதா நாம அனாசாரோ. ஸொப்பப³ஹுலதாதி நித்³தா³லுதா . யதோ க³ஹணஹத்தோ²பி ந கிலாஸுபி புரிஸோ நித்³தா³ய அபி⁴பு⁴ய்யதி. தேனாஹ ‘‘தாயா’’திஆதி³. அதிச்சா²தாதீ³னீதி ஆதி³-ஸத்³தே³ன அபி⁴பு⁴ய்யதாதி³ங் ஸங்க³ண்ஹாதி. ஆக³ந்துகாலஸியங் ந புப்³பே³ வுத்தஆலஸ்யங் விய பகதிஸித்³த⁴ங். ‘‘தே சி²த்³தே³’’தி பாளியங் லிங்க³விபல்லாஸேன வுத்தந்தி ஆஹ ‘‘தானி ச² சி²த்³தா³னீ’’தி. குஸலசித்தப்பவத்தியா அனோகாஸபா⁴வதோ சி²த்³தா³னி. தேனாஹ ப⁴க³வா – ‘‘யத்த² வித்தங் ந திட்ட²தீ’’தி. ஸப்³பா³காரேன லேஸமத்தங் அஸேஸெத்வாதி அதி⁴ப்பாயோ.
Ālasiyanti alasabhāvo daḷhakosajjaṃ. Tenāha ‘‘yenā’’tiādi. Ṭhitinti byāpāraṃ. Niddāvasena pamajjanaṃ kattabbassa akaraṇaṃ. Kilesavasena pamajjanaṃ akattabbassa karaṇampi. Kammasamayeti kammaṃ kātuṃ yuttakāle. Kammakaraṇavīriyābhāvoti taṃkammakiriyasamuṭṭhāpakavīriyābhāvo. So pana atthato vīriyapaṭipakkho akusalacittuppādo, na vīriyassa abhāvamattaṃ. Sīlasaññamābhāvo dussīlyaṃ. Vissaṭṭhācāratā nāma anācāro. Soppabahulatāti niddālutā . Yato gahaṇahatthopi na kilāsupi puriso niddāya abhibhuyyati. Tenāha ‘‘tāyā’’tiādi. Aticchātādīnīti ādi-saddena abhibhuyyatādiṃ saṅgaṇhāti. Āgantukālasiyaṃ na pubbe vuttaālasyaṃ viya pakatisiddhaṃ. ‘‘Te chidde’’ti pāḷiyaṃ liṅgavipallāsena vuttanti āha ‘‘tāni cha chiddānī’’ti. Kusalacittappavattiyā anokāsabhāvato chiddāni. Tenāha bhagavā – ‘‘yattha vittaṃ na tiṭṭhatī’’ti. Sabbākārena lesamattaṃ asesetvāti adhippāyo.
நஜீரதிஸுத்தவண்ணனா நிட்டி²தா.
Najīratisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. நஜீரதிஸுத்தங் • 6. Najīratisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. நஜீரதிஸுத்தவண்ணனா • 6. Najīratisuttavaṇṇanā
