| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૬. નજીરતિસુત્તવણ્ણના
6. Najīratisuttavaṇṇanā
૭૬. છટ્ઠે નામગોત્તં ન જીરતીતિ અતીતબુદ્ધાનં યાવજ્જદિવસા નામગોત્તં કથિયતિ, તસ્મા ન જીરતીતિ વુચ્ચતિ. પોરાણા પન ‘‘અદ્ધાને ગચ્છન્તે ન પઞ્ઞાયિસ્સતિ, જીરણસભાવો પન ન હોતિયેવા’’તિ વદન્તિ. આલસ્યન્તિ આલસિયં, યેન ઠિતટ્ઠાને ઠિતોવ, નિસિન્નટ્ઠાને નિસિન્નોવ હોતિ, તેલેપિ ઉત્તરન્તે ઠિતિં ન કરોતિ. પમાદોતિ નિદ્દાય વા કિલેસવસેન વા પમાદો. અનુટ્ઠાનન્તિ કમ્મસમયે કમ્મકરણવીરિયાભાવો. અસંયમોતિ સીલસઞ્ઞમાભાવો વિસ્સટ્ઠાચારતા. નિદ્દાતિ સોપ્પબહુલતા. તાય ગચ્છન્તોપિ ઠિતોપિ નિસિન્નોપિ નિદ્દાયતિ, પગેવ નિપન્નો. તન્દીતિ અતિચ્છાતાદિવસેન આગન્તુકાલસિયં. તે છિદ્દેતિ તાનિ છ છિદ્દાનિ વિવરાનિ. સબ્બસોતિ સબ્બાકારેન. તન્તિ નિપાતમત્તં. વિવજ્જયેતિ વજ્જેય્ય જહેય્ય. છટ્ઠં.
76. Chaṭṭhe nāmagottaṃ na jīratīti atītabuddhānaṃ yāvajjadivasā nāmagottaṃ kathiyati, tasmā na jīratīti vuccati. Porāṇā pana ‘‘addhāne gacchante na paññāyissati, jīraṇasabhāvo pana na hotiyevā’’ti vadanti. Ālasyanti ālasiyaṃ, yena ṭhitaṭṭhāne ṭhitova, nisinnaṭṭhāne nisinnova hoti, telepi uttarante ṭhitiṃ na karoti. Pamādoti niddāya vā kilesavasena vā pamādo. Anuṭṭhānanti kammasamaye kammakaraṇavīriyābhāvo. Asaṃyamoti sīlasaññamābhāvo vissaṭṭhācāratā. Niddāti soppabahulatā. Tāya gacchantopi ṭhitopi nisinnopi niddāyati, pageva nipanno. Tandīti aticchātādivasena āgantukālasiyaṃ. Te chiddeti tāni cha chiddāni vivarāni. Sabbasoti sabbākārena. Tanti nipātamattaṃ. Vivajjayeti vajjeyya jaheyya. Chaṭṭhaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૬. નજીરતિસુત્તં • 6. Najīratisuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૬. નજીરતિસુત્તવણ્ણના • 6. Najīratisuttavaṇṇanā
