| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. அபி⁴ஸமயஸங்யுத்தங்
2. Abhisamayasaṃyuttaṃ
1. நக²ஸிகா²ஸுத்தவண்ணனா
1. Nakhasikhāsuttavaṇṇanā
74. ஸுகு²மாதி தருணா பரித்தா கேஸக்³க³மத்தபா⁴வதோ. யதா² கேஸா தீ³க⁴ஸோ த்³வங்கு³லமத்தாய ஸப்³ப³ஸ்மிங் காலே ஏதப்பமாணாவ, ந தச்சி²ந்த³னங், ஏவங் நக²க்³கா³பி கேஸக்³க³மத்தாவ, ந தேஸங் சி²ந்த³னங் அவட்³ட⁴னதோ. பரதோதி ‘‘ஸஹஸ்ஸிமங் ஸதஸஹஸ்ஸிம’’ந்தி வுத்தட்டா²னே. அபி⁴ஸமெத்வாதி படிவிஜ்ஜி²த்வா, தஸ்மா அபி⁴ஸமேதாவினோ படிவித்³த⁴ஸச்சஸ்ஸாதி அத்தோ². காமங் புரிமபத³ங் து³க்க²க்க²ந்த⁴ஸ்ஸ அதீதபா⁴வங் உபாதா³யபி வத்துங் யுத்தங். புரேதரங்யேவ பன வுத்தபா⁴வங் உபாதா³ய வுத்தந்தி த³ஸ்ஸேதுங் ‘‘புரிமங் து³க்க²க்க²ந்த⁴’’ந்திஆதி³ வுத்தங். புரிமங் நாம பச்சி²மங் அபெக்கி²த்வா. புரிமபச்சி²மதா ஹி தங் தங் உபாதா³ய வுச்சதீதி இதா⁴தி⁴ப்பேதங் புரிமங் நீஹரித்வா த³ஸ்ஸேதுங் ‘‘கதமங் பனா’’திஆதி³ வுத்தங். ‘‘அதீதம்பி பரிக்கீ²ண’’ந்தி இதா⁴தி⁴ப்பேதங் பரிக்கீ²ணமேவ விபா⁴வேதுங் ‘‘கதமங் பன பரிக்கீ²ண’’ந்திஆதி³ வுத்தங். ஸோதாபன்னஸ்ஸ து³க்க²க்க²யோ இத⁴ சோதி³தோதி தங் த³ஸ்ஸேதுங் ‘‘பட²மமக்³க³ஸ்ஸ அபா⁴விதத்தா உப்பஜ்ஜெய்யா’’தி வத்வா இதா³னி தங் ஸரூபதோ த³ஸ்ஸேதுங் புன ‘‘கதம’’ந்திஆதி³ வுத்தங். ஸத்தஸு அத்தபா⁴வேஸு யங் அபாயே உப்பஜ்ஜெய்ய அட்ட²மங் படிஸந்தி⁴ங் ஆதி³ங் கத்வா யத்த² கத்த²சி அபாயேஸு சாதி யங் து³க்க²ங் உப்பஜ்ஜெய்ய, தங் ஸப்³ப³ங் பரிக்கீ²ணந்தி த³ட்ட²ப்³ப³ங். அஸ்ஸாதி ஸோதாபன்னஸ்ஸ, யங் பரிமாணங், ததோ உத்³த⁴ஞ்ச உபபாதங் அத்தீ²தி அதி⁴ப்பாயோ. மஹா அத்தோ² கு³ணோ மஹத்தோ², ஸோ ஏதஸ்ஸ அத்தீ²தி மஹத்தி²யோ க-காரஸ்ஸ ய-காரங் கத்வா. தேனாஹ ‘‘மஹதோ அத்த²ஸ்ஸ நிப்பா²த³கோ’’தி.
74.Sukhumāti taruṇā parittā kesaggamattabhāvato. Yathā kesā dīghaso dvaṅgulamattāya sabbasmiṃ kāle etappamāṇāva, na tacchindanaṃ, evaṃ nakhaggāpi kesaggamattāva, na tesaṃ chindanaṃ avaḍḍhanato. Paratoti ‘‘sahassimaṃ satasahassima’’nti vuttaṭṭhāne. Abhisametvāti paṭivijjhitvā, tasmā abhisametāvino paṭividdhasaccassāti attho. Kāmaṃ purimapadaṃ dukkhakkhandhassa atītabhāvaṃ upādāyapi vattuṃ yuttaṃ. Puretaraṃyeva pana vuttabhāvaṃ upādāya vuttanti dassetuṃ ‘‘purimaṃ dukkhakkhandha’’ntiādi vuttaṃ. Purimaṃ nāma pacchimaṃ apekkhitvā. Purimapacchimatā hi taṃ taṃ upādāya vuccatīti idhādhippetaṃ purimaṃ nīharitvā dassetuṃ ‘‘katamaṃ panā’’tiādi vuttaṃ. ‘‘Atītampi parikkhīṇa’’nti idhādhippetaṃ parikkhīṇameva vibhāvetuṃ ‘‘katamaṃ pana parikkhīṇa’’ntiādi vuttaṃ. Sotāpannassa dukkhakkhayo idha coditoti taṃ dassetuṃ ‘‘paṭhamamaggassa abhāvitattā uppajjeyyā’’ti vatvā idāni taṃ sarūpato dassetuṃ puna ‘‘katama’’ntiādi vuttaṃ. Sattasu attabhāvesu yaṃ apāye uppajjeyya aṭṭhamaṃ paṭisandhiṃ ādiṃ katvā yattha katthaci apāyesu cāti yaṃ dukkhaṃ uppajjeyya, taṃ sabbaṃ parikkhīṇanti daṭṭhabbaṃ. Assāti sotāpannassa, yaṃ parimāṇaṃ, tato uddhañca upapātaṃ atthīti adhippāyo. Mahā attho guṇo mahattho, so etassa atthīti mahatthiyo ka-kārassa ya-kāraṃ katvā. Tenāha ‘‘mahato atthassa nipphādako’’ti.
நக²ஸிகா²ஸுத்தவண்ணனா நிட்டி²தா.
Nakhasikhāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நக²ஸிகா²ஸுத்தங் • 1. Nakhasikhāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. நக²ஸிகா²ஸுத்தவண்ணனா • 1. Nakhasikhāsuttavaṇṇanā
