| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
7. நளகலாபீஸுத்தவண்ணனா
7. Naḷakalāpīsuttavaṇṇanā
67. ஸத்தமே கஸ்மா புச்ச²தீதி மஹாகொட்டி²கத்தே²ரோ ஸயங் தத்த² நிக்கங்கோ² ஸமானோ கஸ்மா புச்ச²தீதி அதி⁴ப்பாயோ. அஜ்ஜா²ஸயஜானநத்த²ந்தி இத³ம்பி தஸ்ஸ மஹாஸாவகஸ்ஸ பரசித்தஜானநேன அப்பாடிஹீரங் ஸியா, தேன தங் அபரிதுஸ்ஸந்தோ ‘‘அபிசா’’திஆதி³மாஹ. தத்த² த்³வே அக்³க³ஸாவகாதி ஸீலாதி³கு³ணேஹி உத்தமஸாவகாதி அத்தோ², ந ஹி மஹாகொட்டி²கத்தே²ரோ அக்³க³ஸாவகலக்க²ணப்பத்தோ, அத² கோ² மஹாஸாவகலக்க²ணப்பத்தோ. இதா³னேவ கோ² மயந்திஆதி³ ஹெட்டா² பச்சயுப்பன்னங் அனாலோளெந்தேன த³ஸ்ஸெத்வா தே³ஸனா ஆஹடா, ந அஞ்ஞமஞ்ஞபச்சயதாவஸேன, இத⁴ பன யேனாதி⁴ப்பாயேன தங் ஆலோளெத்வா நிவத்தெத்வா கதி²தங் மஹாதே²ரேன, தமேவஸ்ஸ அதி⁴ப்பாயங் தேனேவ பகாஸேதுகாமோ மஹாகொட்டி²கத்தே²ரோ ஆஹ ‘‘இதா³னேவ கோ² மய’’ந்திஆதி³. தேனாஹ ‘‘இத³ங் தே²ரோ’’திஆதி³.
67. Sattame kasmā pucchatīti mahākoṭṭhikatthero sayaṃ tattha nikkaṅkho samāno kasmā pucchatīti adhippāyo. Ajjhāsayajānanatthanti idampi tassa mahāsāvakassa paracittajānanena appāṭihīraṃ siyā, tena taṃ aparitussanto ‘‘apicā’’tiādimāha. Tattha dve aggasāvakāti sīlādiguṇehi uttamasāvakāti attho, na hi mahākoṭṭhikatthero aggasāvakalakkhaṇappatto, atha kho mahāsāvakalakkhaṇappatto. Idāneva kho mayantiādi heṭṭhā paccayuppannaṃ anāloḷentena dassetvā desanā āhaṭā, na aññamaññapaccayatāvasena, idha pana yenādhippāyena taṃ āloḷetvā nivattetvā kathitaṃ mahātherena, tamevassa adhippāyaṃ teneva pakāsetukāmo mahākoṭṭhikatthero āha ‘‘idāneva kho maya’’ntiādi. Tenāha ‘‘idaṃ thero’’tiādi.
எத்தகே டா²னேதி ‘‘கிங் நு கோ² ஆவுஸோ’’திஆதி³னா பட²மாரம்ப⁴தோ பட்டா²ய யாவ ‘‘நிரோதோ⁴ ஹோதீ’’தி பத³ங், எத்தகே டா²னே. அவிஜ்ஜாஸங்கா²ரே அக்³க³ஹெத்வா ‘‘நாமரூபபச்சயா விஞ்ஞாண’’ந்தி தே³ஸனாய பவத்தத்தா ‘‘பச்சயுப்பன்னபஞ்சவோகாரப⁴வவஸேன தே³ஸனா கதி²தா’’தி வுத்தங். ‘‘ப²லே க³ஹிதே காரணங் க³ஹிதமேவா’’தி விஞ்ஞாணே க³ஹிதே ஸங்கா²ரா, தேஸஞ்ச காரணபூ⁴தா அவிஜ்ஜா க³ஹிதா ஏவ ஹோதீதி வுத்தங் ‘‘ஹெட்டா² விஸ்ஸஜ்ஜிதேஸு த்³வாத³ஸஸு பதே³ஸூ’’தி. ஏகேகஸ்மிந்தி ஏகேகஸ்மிங் பதே³. திண்ணங் திண்ணங் வஸேனாதி ‘‘நிரோதா⁴ய த⁴ம்மங் தே³ஸேஸி, நிரோதா⁴ய படிபன்னோ ஹோதி, நிரோதா⁴ அனுபாதா³வினிமுத்தோ ஹோதீ’’தி ஏவமாக³தானங் திண்ணங் திண்ணங் வாரானங் வஸேன. ‘‘அட்டா²ரஸஹி வத்தூ²ஹீ’’திஆதீ³ஸு (மஹாவ॰ 468) விய இத⁴ வத்து²ஸத்³தோ³ காரணபரியாயோதி ஆஹ ‘‘ச²த்திங்ஸாய காரணேஹீ’’தி. பட²மோ அனுமோத³னாவிதி⁴. த⁴ம்மகதி²ககு³ணோதி விபஸ்ஸனாவிஸயோ அபே⁴தோ³பசாரேன வுத்தோ. ஸேஸத்³வயேஸுபி ஏஸேவ நயோ. து³தியோ அனுமோத³னா, ததியங் அனுமோத³னந்தி அபி⁴தெ⁴ய்யானுரூபங் வத்தப்³ப³ங். தே³ஸனாஸம்பத்தி கதி²தா ‘‘நிப்³பி³தா³ய…பே॰… த⁴ம்மங் தே³ஸேதீ’’தி வுத்தத்தா. ஸெக்க²பூ⁴மி கதி²தா ‘‘நிப்³பி³தா³ய…பே॰… படிபன்னோ ஹோதீ’’தி வுத்தத்தா. அஸெக்க²பூ⁴மி கதி²தா ‘‘நிப்³பி³தா³ …பே॰… அனுபாதா³விமுத்தோ ஹோதீ’’தி வுத்தத்தா.
Ettake ṭhāneti ‘‘kiṃ nu kho āvuso’’tiādinā paṭhamārambhato paṭṭhāya yāva ‘‘nirodho hotī’’ti padaṃ, ettake ṭhāne. Avijjāsaṅkhāre aggahetvā ‘‘nāmarūpapaccayā viññāṇa’’nti desanāya pavattattā ‘‘paccayuppannapañcavokārabhavavasena desanā kathitā’’ti vuttaṃ. ‘‘Phale gahite kāraṇaṃ gahitamevā’’ti viññāṇe gahite saṅkhārā, tesañca kāraṇabhūtā avijjā gahitā eva hotīti vuttaṃ ‘‘heṭṭhā vissajjitesu dvādasasu padesū’’ti. Ekekasminti ekekasmiṃ pade. Tiṇṇaṃ tiṇṇaṃ vasenāti ‘‘nirodhāya dhammaṃ desesi, nirodhāya paṭipanno hoti, nirodhā anupādāvinimutto hotī’’ti evamāgatānaṃ tiṇṇaṃ tiṇṇaṃ vārānaṃ vasena. ‘‘Aṭṭhārasahi vatthūhī’’tiādīsu (mahāva. 468) viya idha vatthusaddo kāraṇapariyāyoti āha ‘‘chattiṃsāya kāraṇehī’’ti. Paṭhamo anumodanāvidhi. Dhammakathikaguṇoti vipassanāvisayo abhedopacārena vutto. Sesadvayesupi eseva nayo. Dutiyo anumodanā, tatiyaṃ anumodananti abhidheyyānurūpaṃ vattabbaṃ. Desanāsampatti kathitā ‘‘nibbidāya…pe… dhammaṃ desetī’’ti vuttattā. Sekkhabhūmi kathitā ‘‘nibbidāya…pe… paṭipanno hotī’’ti vuttattā. Asekkhabhūmi kathitā ‘‘nibbidā …pe… anupādāvimutto hotī’’ti vuttattā.
நளகலாபீஸுத்தவண்ணனா நிட்டி²தா.
Naḷakalāpīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. நளகலாபீஸுத்தங் • 7. Naḷakalāpīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. நளகலாபீஸுத்தவண்ணனா • 7. Naḷakalāpīsuttavaṇṇanā
