| Library / Tipiṭaka / તિપિટક • Tipiṭaka / અપદાન-અટ્ઠકથા • Apadāna-aṭṭhakathā |
૨. ઞાણસઞ્ઞિકત્થેરઅપદાનવણ્ણના
2. Ñāṇasaññikattheraapadānavaṇṇanā
સુવણ્ણવણ્ણં સમ્બુદ્ધન્તિઆદિકં આયસ્મતો ઞાણસઞ્ઞિકત્થેરસ્સ અપદાનં. કા ઉપ્પત્તિ? અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે કુલગેહે નિબ્બત્તો વુદ્ધિમન્વાય સદ્ધાજાતો સદ્ધમ્મસ્સવને સાદરો સાલયો ભગવતો ધમ્મદેસનાનુસારેન ઞાણં પેસેત્વા ઘોસપમાણત્તા ભગવતો ઞાણે પસન્નો પઞ્ચઙ્ગઅટ્ઠઙ્ગનમક્કારવસેન પણામં કત્વા પક્કામિ. સો તતો ચુતો દેવલોકેસુ ઉપ્પન્નો તત્થ છ કામાવચરે દિબ્બસમ્પત્તિમનુભવન્તો તતો ચવિત્વા મનુસ્સલોકે જાતો તત્થગ્ગભૂતા ચક્કવત્તિસમ્પદાદયો અનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો નચિરસ્સેવ અરહા અહોસિ.
Suvaṇṇavaṇṇaṃsambuddhantiādikaṃ āyasmato ñāṇasaññikattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhimanvāya saddhājāto saddhammassavane sādaro sālayo bhagavato dhammadesanānusārena ñāṇaṃ pesetvā ghosapamāṇattā bhagavato ñāṇe pasanno pañcaṅgaaṭṭhaṅganamakkāravasena paṇāmaṃ katvā pakkāmi. So tato cuto devalokesu uppanno tattha cha kāmāvacare dibbasampattimanubhavanto tato cavitvā manussaloke jāto tatthaggabhūtā cakkavattisampadādayo anubhavitvā imasmiṃ buddhuppāde vibhavasampanne ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
૭. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તં વુત્તત્થમેવ. નિસભાજાનિયં યથાતિ ગવસતસહસ્સજેટ્ઠો નિસભો, નિસભો ચ સો આજાનિયો સેટ્ઠો ઉત્તમો ચેતિ નિસભાજાનિયો. યથા નિસભાજાનિયો, તથેવ ભગવાતિ અત્થો. લોકવિસયસઞ્ઞાતં પઞ્ઞત્તિવસેન એવં વુત્તં. અનુપમેય્યો હિ ભગવા. સેસં સબ્બત્થ ઉત્તાનત્થમેવાતિ.
7. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ vuttatthameva. Nisabhājāniyaṃ yathāti gavasatasahassajeṭṭho nisabho, nisabho ca so ājāniyo seṭṭho uttamo ceti nisabhājāniyo. Yathā nisabhājāniyo, tatheva bhagavāti attho. Lokavisayasaññātaṃ paññattivasena evaṃ vuttaṃ. Anupameyyo hi bhagavā. Sesaṃ sabbattha uttānatthamevāti.
ઞાણસઞ્ઞિકત્થેરઅપદાનવણ્ણના સમત્તા.
Ñāṇasaññikattheraapadānavaṇṇanā samattā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / અપદાનપાળિ • Apadānapāḷi / ૨. ઞાણસઞ્ઞિકત્થેરઅપદાનં • 2. Ñāṇasaññikattheraapadānaṃ
