| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. நானாதித்தி²யஸாவகஸுத்தவண்ணனா
10. Nānātitthiyasāvakasuttavaṇṇanā
111. நானாதித்தி²யஸாவகாதி புது²தித்தி²யானங் ஸாவகா. சி²ந்தி³தேதி ஹத்த²ச்சே²தா³தி³வஸேன சே²தே³. மாரிதேதி மாரணே. ந பாபங் ஸமனுபஸ்ஸதீதி கிஞ்சி பாபங் அத்தீ²தி ந பஸ்ஸதி, பரேஸஞ்ச ததா² பவேதே³தி. விஸ்ஸாஸந்தி விஸ்ஸத்த²பா⁴வங். ‘‘கதகம்மானம்பி விபாகோ நத்தீ²’’தி வத³ந்தோ கதபாபானங் அகதபுஞ்ஞானஞ்ச விஸ்ஸத்த²தங் நிராஸங்கதங் ஜனேதி.
111.Nānātitthiyasāvakāti puthutitthiyānaṃ sāvakā. Chinditeti hatthacchedādivasena chede. Māriteti māraṇe. Na pāpaṃ samanupassatīti kiñci pāpaṃ atthīti na passati, paresañca tathā pavedeti. Vissāsanti vissatthabhāvaṃ. ‘‘Katakammānampi vipāko natthī’’ti vadanto katapāpānaṃ akatapuññānañca vissatthataṃ nirāsaṅkataṃ janeti.
தபோஜிகு³ச்சா²யாதி தபஸா அசேலவதாதி³னா பாபதோ ஜிகு³ச்ச²னேன, ‘‘பாபங் விராஜயாமா’’தி அசேலவதாதி³ஸமாதா³னேனாதி அத்தோ². தஸ்மிஞ்ஹி ஸமாதா³னே டி²தேன ஸங்வரேன ஸங்வுதசித்தோ ஸமன்னாக³தோ பிஹிதோ ச நாம ஹோதீதி ‘‘ஸுஸங்வுதத்தோ’’திஆதி³ வுத்தங். சத்தாரோ யாமா பா⁴கா³ சதுயாமா, சதுயாமா ஏவ சாதுயாமா. பா⁴க³த்தோ² ஹி இத⁴ யாம-ஸத்³தோ³ யதா² ‘‘ரத்தியங் பட²மோ யாமோ’’தி. ஸோ பனெத்த² பா⁴கோ³ ஸங்வரலக்க²ணோதி ஆஹ ‘‘சாதுயாமேன ஸுஸங்வுதோ’’தி, சதுகொட்டா²ஸேன ஸங்வரேன ஸுட்டு² ஸங்வுதோதி அத்தோ². படிக்கி²த்தஸப்³ப³ஸீதோத³கோதி படிக்கி²த்தஸப்³ப³ஸீதுத³கபரிபோ⁴கோ³. ஸப்³பே³ன பாபவாரணேன யுத்தோதி ஸப்³ப³ப்பகாரேன ஸங்வரலக்க²ணேன பாபவாரணேன ஸமன்னாக³தோ. து⁴தபாபோதி ஸப்³பே³ன நிஜ்ஜரலக்க²ணேன பாபவாரணேனபி து⁴தபாபோ. பு²ட்டோ²தி அட்ட²ன்னம்பி கம்மானங் கே²பனேன விக்கே²பப்பத்தியா கம்மக்க²யலக்க²ணேன ஸப்³பே³ன பாபவாரணேன பு²ட்டோ², தங் பு²ஸித்வா டி²தோ. ந நிகு³ஹந்தோதி ந நிகு³ஹனஹேது தி³ட்ட²ஸுதே ததே²வ கதெ²ந்தோ.
Tapojigucchāyāti tapasā acelavatādinā pāpato jigucchanena, ‘‘pāpaṃ virājayāmā’’ti acelavatādisamādānenāti attho. Tasmiñhi samādāne ṭhitena saṃvarena saṃvutacitto samannāgato pihito ca nāma hotīti ‘‘susaṃvutatto’’tiādi vuttaṃ. Cattāro yāmā bhāgā catuyāmā, catuyāmā eva cātuyāmā. Bhāgattho hi idha yāma-saddo yathā ‘‘rattiyaṃ paṭhamo yāmo’’ti. So panettha bhāgo saṃvaralakkhaṇoti āha ‘‘cātuyāmena susaṃvuto’’ti, catukoṭṭhāsena saṃvarena suṭṭhu saṃvutoti attho. Paṭikkhittasabbasītodakoti paṭikkhittasabbasītudakaparibhogo. Sabbena pāpavāraṇena yuttoti sabbappakārena saṃvaralakkhaṇena pāpavāraṇena samannāgato. Dhutapāpoti sabbena nijjaralakkhaṇena pāpavāraṇenapi dhutapāpo. Phuṭṭhoti aṭṭhannampi kammānaṃ khepanena vikkhepappattiyā kammakkhayalakkhaṇena sabbena pāpavāraṇena phuṭṭho, taṃ phusitvā ṭhito. Na niguhantoti na niguhanahetu diṭṭhasute tatheva kathento.
நானாதித்தி²யானங்யேவ உபட்டா²கோதி பரவாதீ³னங் ஸப்³பே³ஸங்யேவ தித்தி²யானங் உபட்டா²கோ, தேஸு ஸாதா⁴ரணவஸேன அபி⁴ப்பஸன்னோ. கோடிப்பத்தாதி மொக்கா²தி⁴க³மேன ஸமணத⁴ம்மே பத்தப்³ப³மரியாத³ப்பத்தா.
Nānātitthiyānaṃyevaupaṭṭhākoti paravādīnaṃ sabbesaṃyeva titthiyānaṃ upaṭṭhāko, tesu sādhāraṇavasena abhippasanno. Koṭippattāti mokkhādhigamena samaṇadhamme pattabbamariyādappattā.
ஸஹசரிதமத்தேனாதி ஸீஹனாதே³ன ஸஹ வஸ்ஸகரணமத்தேன. ஸீஹேன ஸீஹனாத³ங் நத³ந்தேன ஸஹேவ ஸிங்கா³லேன அத்தனோ ஸிங்கா³லரவகரணமத்தேன. கொத்து²கோதி கு²த்³த³ககொத்து². ஆஸங்கிதஸமாசாரோதி அத்தனா ச பரேஹி ச ஆஸங்கிதப்³ப³ஸமாசாரோ. ஸப்புரிஸானந்தி பு³த்³தா⁴தீ³னங்.
Sahacaritamattenāti sīhanādena saha vassakaraṇamattena. Sīhena sīhanādaṃ nadantena saheva siṅgālena attano siṅgālaravakaraṇamattena. Kotthukoti khuddakakotthu. Āsaṅkitasamācāroti attanā ca parehi ca āsaṅkitabbasamācāro. Sappurisānanti buddhādīnaṃ.
தஸ்ஸாதி வேக³ப்³ப⁴ரிஸ்ஸ தே³வபுத்தஸ்ஸ. ஸரீரே அனுஆவிஸீதி ஸரீரே அனுபவிஸித்வா விய ஆவிஸி. அதி⁴முச்சீதி யதா² க³ஹிதஸ்ஸ வஸேன சித்தங் ந வத்ததி, அத்தனோ ஏவ வஸே வத்ததி, ஏவங் அதி⁴ட்ட²ஹி. ஆயுத்தாதி த³ஸ்ஸனேன ஸங்யுத்தா . பவிவேகியந்தி கப்பகவத்த²பு⁴ஞ்ஜனஸேனாஸனேஹி பவிவித்தபா⁴வங். தேனாஹ ‘‘தே கிரா’’திஆதி³. ரூபே நிவிட்டா²தி சக்கு²ரூபத⁴ம்மே அபி⁴னிவிட்டா². தேனாஹ ‘‘தண்ஹாதி³ட்டீ²ஹி பதிட்டி²தா’’தி. தே³வலோகபத்த²னகாமாதி தே³வலோகஸ்ஸேவ அபி⁴பத்த²னகாமா. மரணத⁴ம்மதாய மாதியா. தேனாஹ ‘‘மாதியாதி மச்சா’’தி. பரலோகத்தா²யாதி பரஸம்பத்திபா⁴வாய லோகஸ்ஸ அத்தா²ய.
Tassāti vegabbharissa devaputtassa. Sarīre anuāvisīti sarīre anupavisitvā viya āvisi. Adhimuccīti yathā gahitassa vasena cittaṃ na vattati, attano eva vase vattati, evaṃ adhiṭṭhahi. Āyuttāti dassanena saṃyuttā . Pavivekiyanti kappakavatthabhuñjanasenāsanehi pavivittabhāvaṃ. Tenāha ‘‘te kirā’’tiādi. Rūpe niviṭṭhāti cakkhurūpadhamme abhiniviṭṭhā. Tenāha ‘‘taṇhādiṭṭhīhi patiṭṭhitā’’ti. Devalokapatthanakāmāti devalokasseva abhipatthanakāmā. Maraṇadhammatāya mātiyā. Tenāha ‘‘mātiyāti maccā’’ti. Paralokatthāyāti parasampattibhāvāya lokassa atthāya.
பபா⁴ஸவண்ணாதி பபா⁴ய ஸமானவண்ணா. கேஸங் பபா⁴யாதி ஆஹ ‘‘சந்தோ³பா⁴ஸா’’திஆதி³. ஸஜ்ஜா²ராக³பபா⁴ஸவண்ணா இந்த³த⁴னுபபா⁴ஸவண்ணாதி பச்சேகங் யோஜனா. ஆமோ ஆமக³ந்தோ⁴ ஏதஸ்ஸ அத்தீ²தி ஆமிஸங். வதா⁴யாதி வித்³த⁴ங்ஸிதுங். ரூபாதி ரூபாயதனாதி³ரூபித⁴ம்மா.
Pabhāsavaṇṇāti pabhāya samānavaṇṇā. Kesaṃ pabhāyāti āha ‘‘candobhāsā’’tiādi. Sajjhārāgapabhāsavaṇṇā indadhanupabhāsavaṇṇāti paccekaṃ yojanā. Āmo āmagandho etassa atthīti āmisaṃ. Vadhāyāti viddhaṃsituṃ. Rūpāti rūpāyatanādirūpidhammā.
ராஜக³ஹஸமீபப்பவத்தீனங் ராஜக³ஹியானங். ‘‘ஸேதோ’’தி கேலாஸகூடோ அதி⁴ப்பேதோதி ஆஹ ‘‘ஸேதோதி கேலாஸோ’’தி. கேனசி ந க⁴ட்டேதீதி அக⁴ங், அந்தலிக்க²ந்தி ஆஹ ‘‘அக⁴கா³மீனந்தி ஆகாஸகா³மீன’’ந்தி. உத³கங் தீ⁴யதி எத்தா²தி உத³தி⁴, மஹோத³தி⁴. விபுலோதி வேபுல்லபப்³ப³தோ. ஹிமவந்தபப்³ப³தானந்தி ஹிமவந்தபப்³ப³தபா⁴கா³னங். பு³த்³தோ⁴ ஸெட்டோ² ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனாதீ³ஹி ஸப்³ப³கு³ணேஹி.
Rājagahasamīpappavattīnaṃ rājagahiyānaṃ. ‘‘Seto’’ti kelāsakūṭo adhippetoti āha ‘‘setoti kelāso’’ti. Kenaci na ghaṭṭetīti aghaṃ, antalikkhanti āha ‘‘aghagāmīnanti ākāsagāmīna’’nti. Udakaṃ dhīyati etthāti udadhi, mahodadhi. Vipuloti vepullapabbato. Himavantapabbatānanti himavantapabbatabhāgānaṃ. Buddho seṭṭho sīlasamādhipaññāvimuttivimuttiñāṇadassanādīhi sabbaguṇehi.
நானாதித்தி²யஸாவகஸுத்தவண்ணனா நிட்டி²தா.
Nānātitthiyasāvakasuttavaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
Sāratthappakāsiniyā saṃyuttanikāya-aṭṭhakathāya
தே³வபுத்தஸங்யுத்தவண்ணனாய லீனத்த²ப்பகாஸனா ஸமத்தா.
Devaputtasaṃyuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. நானாதித்தி²யஸாவகஸுத்தங் • 10. Nānātitthiyasāvakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. நானாதித்தி²யஸாவகஸுத்தவண்ணனா • 10. Nānātitthiyasāvakasuttavaṇṇanā
