| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
4. நந்த³கோவாத³ஸுத்தவண்ணனா
4. Nandakovādasuttavaṇṇanā
398. ஏவங் மே ஸுதந்தி நந்த³கோவாத³ஸுத்தங். தத்த² தேன கோ² பன ஸமயேனாதி ப⁴க³வா மஹாபஜாபதியா யாசிதோ பி⁴க்கு²னிஸங்க⁴ங் உய்யோஜெத்வா பி⁴க்கு²ஸங்க⁴ங் ஸன்னிபாதெத்வா – ‘‘தே²ரா பி⁴க்கூ² வாரேன பி⁴க்கு²னியோ ஓவத³ந்தூ’’தி ஸங்க⁴ஸ்ஸ பா⁴ரங் அகாஸி. தங் ஸந்தா⁴யேதங் வுத்தங். தத்த² பரியாயேனாதி வாரேன. ந இச்ச²தீதி அத்தனோ வாரே ஸம்பத்தே தூ³ரங் கா³மங் வா க³ந்த்வா ஸூசிகம்மாதீ³னி வா ஆரபி⁴த்வா ‘‘அயங் நாமஸ்ஸ பபஞ்சோ’’தி வதா³பேஸி. இமங் பன பரியாயேன ஓவாத³ங் ப⁴க³வா நந்த³கத்தே²ரஸ்ஸேவ காரணா அகாஸி. கஸ்மா? இமாஸஞ்ஹி பி⁴க்கு²னீனங் தே²ரங் தி³ஸ்வா சித்தங் ஏகக்³க³ங் ஹோதி பஸீத³தி. தேன தா தஸ்ஸ ஓவாத³ங் ஸம்படிச்சி²துகாமா, த⁴ம்மகத²ங் ஸோதுகாமா. தஸ்மா ப⁴க³வா – ‘‘நந்த³கோ அத்தனோ வாரே ஸம்பத்தே ஓவாத³ங் த³ஸ்ஸதி, த⁴ம்மகத²ங் கதெ²ஸ்ஸதீ’’தி வாரேன ஓவாத³ங் அகாஸி. தே²ரோ பன அத்தனோ வாரங் ந கரோதி, கஸ்மாதி சே? தா கிர பி⁴க்கு²னியோ புப்³பே³ தே²ரஸ்ஸ ஜம்பு³தீ³பே ரஜ்ஜங் காரெந்தஸ்ஸ ஓரோதா⁴ அஹேஸுங். தே²ரோ புப்³பே³னிவாஸஞாணேன தங் காரணங் ஞத்வா சிந்தேஸி – ‘‘மங் இமஸ்ஸ பி⁴க்கு²னிஸங்க⁴ஸ்ஸ மஜ்ஜே² நிஸின்னங் உபமாயோ ச காரணானி ச ஆஹரித்வா த⁴ம்மங் கத²யமானங் தி³ஸ்வா அஞ்ஞோ புப்³பே³னிவாஸஞாணலாபீ⁴ பி⁴க்கு² இமங் காரணங் ஓலோகெத்வா ‘ஆயஸ்மா நந்த³கோ யாவஜ்ஜதி³வஸா ஓரோதே⁴ ந விஸ்ஸஜ்ஜேதி, ஸோப⁴தாயமாயஸ்மா ஓரோத⁴பரிவுதோ’தி வத்தப்³ப³ங் மஞ்ஞெய்யா’’தி. ஏதமத்த²ங் ஸம்பஸ்ஸமானோ தே²ரோ அத்தனோ வாரங் ந கரோதி. இமாஸஞ்ச கிர பி⁴க்கு²னீனங் தே²ரஸ்ஸேவ தே³ஸனா ஸப்பாயா ப⁴விஸ்ஸதீதி ஞத்வா அத² கோ² ப⁴க³வா ஆயஸ்மந்தங் நந்த³கங் ஆமந்தேஸி.
398.Evaṃme sutanti nandakovādasuttaṃ. Tattha tena kho pana samayenāti bhagavā mahāpajāpatiyā yācito bhikkhunisaṅghaṃ uyyojetvā bhikkhusaṅghaṃ sannipātetvā – ‘‘therā bhikkhū vārena bhikkhuniyo ovadantū’’ti saṅghassa bhāraṃ akāsi. Taṃ sandhāyetaṃ vuttaṃ. Tattha pariyāyenāti vārena. Na icchatīti attano vāre sampatte dūraṃ gāmaṃ vā gantvā sūcikammādīni vā ārabhitvā ‘‘ayaṃ nāmassa papañco’’ti vadāpesi. Imaṃ pana pariyāyena ovādaṃ bhagavā nandakattherasseva kāraṇā akāsi. Kasmā? Imāsañhi bhikkhunīnaṃ theraṃ disvā cittaṃ ekaggaṃ hoti pasīdati. Tena tā tassa ovādaṃ sampaṭicchitukāmā, dhammakathaṃ sotukāmā. Tasmā bhagavā – ‘‘nandako attano vāre sampatte ovādaṃ dassati, dhammakathaṃ kathessatī’’ti vārena ovādaṃ akāsi. Thero pana attano vāraṃ na karoti, kasmāti ce? Tā kira bhikkhuniyo pubbe therassa jambudīpe rajjaṃ kārentassa orodhā ahesuṃ. Thero pubbenivāsañāṇena taṃ kāraṇaṃ ñatvā cintesi – ‘‘maṃ imassa bhikkhunisaṅghassa majjhe nisinnaṃ upamāyo ca kāraṇāni ca āharitvā dhammaṃ kathayamānaṃ disvā añño pubbenivāsañāṇalābhī bhikkhu imaṃ kāraṇaṃ oloketvā ‘āyasmā nandako yāvajjadivasā orodhe na vissajjeti, sobhatāyamāyasmā orodhaparivuto’ti vattabbaṃ maññeyyā’’ti. Etamatthaṃ sampassamāno thero attano vāraṃ na karoti. Imāsañca kira bhikkhunīnaṃ therasseva desanā sappāyā bhavissatīti ñatvā atha kho bhagavā āyasmantaṃ nandakaṃ āmantesi.
தாஸங் பி⁴க்கு²னீனங் புப்³பே³ தஸ்ஸ ஓரோத⁴பா⁴வஜானநத்த²ங் இத³ங் வத்து²ங் – புப்³பே³ கிர பா³ராணஸியங் பஞ்ச தா³ஸஸதானி பஞ்ச தா³ஸிஸதானி சாதி ஜங்க⁴ஸஹஸ்ஸங் ஏகதோவ கம்மங் கத்வா ஏகஸ்மிங் டா²னே வஸி. அயங் நந்த³கத்தே²ரோ தஸ்மிங் காலே ஜெட்ட²கதா³ஸோ ஹோதி , கோ³தமீ ஜெட்ட²கதா³ஸீ. ஸா ஜெட்ட²கதா³ஸஸ்ஸ பாத³பரிசாரிகா அஹோஸி பண்டி³தா ப்³யத்தா. ஜங்க⁴ஸஹஸ்ஸம்பி புஞ்ஞகம்மங் கரொந்தங் ஏகதோ கரோதி. அத² வஸ்ஸூபனாயிகஸமயே பஞ்ச பச்சேகபு³த்³தா⁴ நந்த³மூலகபப்³பா⁴ரதோ இஸிபதனே ஓதரித்வா நக³ரே பிண்டா³ய சரித்வா இஸிபதனமேவ க³ந்த்வா – ‘‘வஸ்ஸூபனாயிககுடியா அத்தா²ய ஹத்த²கம்மங் யாசிஸ்ஸாமா’’தி சீவரங் பாருபித்வா ஸாயன்ஹஸமயே நக³ரங் பவிஸித்வா ஸெட்டி²ஸ்ஸ க⁴ரத்³வாரே அட்ட²ங்ஸு. ஜெட்ட²கதா³ஸீ குடங் க³ஹெத்வா உத³கதித்த²ங் க³ச்ச²ந்தீ பச்சேகபு³த்³தே⁴ நக³ரங் பவிஸந்தே அத்³த³ஸ. ஸெட்டி² தேஸங் ஆக³தகாரணங் ஸுத்வா ‘‘அம்ஹாகங் ஓகாஸோ நத்தி², க³ச்ச²ந்தூ’’தி ஆஹ.
Tāsaṃ bhikkhunīnaṃ pubbe tassa orodhabhāvajānanatthaṃ idaṃ vatthuṃ – pubbe kira bārāṇasiyaṃ pañca dāsasatāni pañca dāsisatāni cāti jaṅghasahassaṃ ekatova kammaṃ katvā ekasmiṃ ṭhāne vasi. Ayaṃ nandakatthero tasmiṃ kāle jeṭṭhakadāso hoti , gotamī jeṭṭhakadāsī. Sā jeṭṭhakadāsassa pādaparicārikā ahosi paṇḍitā byattā. Jaṅghasahassampi puññakammaṃ karontaṃ ekato karoti. Atha vassūpanāyikasamaye pañca paccekabuddhā nandamūlakapabbhārato isipatane otaritvā nagare piṇḍāya caritvā isipatanameva gantvā – ‘‘vassūpanāyikakuṭiyā atthāya hatthakammaṃ yācissāmā’’ti cīvaraṃ pārupitvā sāyanhasamaye nagaraṃ pavisitvā seṭṭhissa gharadvāre aṭṭhaṃsu. Jeṭṭhakadāsī kuṭaṃ gahetvā udakatitthaṃ gacchantī paccekabuddhe nagaraṃ pavisante addasa. Seṭṭhi tesaṃ āgatakāraṇaṃ sutvā ‘‘amhākaṃ okāso natthi, gacchantū’’ti āha.
அத² தே நக³ரா நிக்க²மந்தே ஜெட்ட²கதா³ஸீ குடங் க³ஹெத்வா பவிஸந்தீ தி³ஸ்வா குடங் ஓதாரெத்வா வந்தி³த்வா ஓனமித்வா முக²ங் பிதா⁴ய – ‘‘அய்யா நக³ரங் பவிட்ட²மத்தாவ நிக்க²ந்தா, கிங் நு கோ²’’தி புச்சி². வஸ்ஸூபனாயிககுடியா ஹத்த²கம்மங் யாசிதுங் ஆக³மிம்ஹாதி. லத்³த⁴ங், ப⁴ந்தேதி. ந லத்³த⁴ங் உபாஸிகேதி? கிங் பனேஸா குடி இஸ்ஸரேஹேவ காதப்³பா³, து³க்³க³தேஹிபி ஸக்கா காதுந்தி. யேன கேனசி ஸக்காதி? ஸாது⁴, ப⁴ந்தே, மயங் கரிஸ்ஸாம. ஸ்வே மய்ஹங் பி⁴க்க²ங் க³ண்ஹதா²தி நிமந்தெத்வா உத³கங் நெத்வா புன குடங் க³ஹெத்வா ஆக³ம்ம தித்த²மக்³கே³ ட²த்வா ஆக³தா அவஸேஸதா³ஸியோ ‘‘எத்தே²வ ஹோதா²’’தி வத்வா ஸப்³பா³ஸங் ஆக³தகாலே ஆஹ – ‘‘அம்ம கிங் நிச்சமேவ பரஸ்ஸ தா³ஸகம்மங் கரிஸ்ஸத², உதா³ஹு தா³ஸபா⁴வதோ முச்சிதுங் இச்ச²தா²’’தி? அஜ்ஜேவ முச்சிதுமிச்சா²ம அய்யேதி. யதி³ ஏவங் மயா பஞ்ச பச்சேகபு³த்³தா⁴ ஹத்த²கம்மங் அலப⁴ந்தா ஸ்வாதனாய நிமந்திதா, தும்ஹாகங் ஸாமிகேஹி ஏகதி³வஸங் ஹத்த²கம்மங் தா³பேதா²தி. தா ஸாதூ⁴தி ஸம்படிச்சி²த்வா ஸாயங் அடவிதோ ஆக³தகாலே ஸாமிகானங் ஆரோசேஸுங். தே ஸாதூ⁴தி ஜெட்ட²கதா³ஸஸ்ஸ கே³ஹத்³வாரே ஸன்னிபதிங்ஸு.
Atha te nagarā nikkhamante jeṭṭhakadāsī kuṭaṃ gahetvā pavisantī disvā kuṭaṃ otāretvā vanditvā onamitvā mukhaṃ pidhāya – ‘‘ayyā nagaraṃ paviṭṭhamattāva nikkhantā, kiṃ nu kho’’ti pucchi. Vassūpanāyikakuṭiyā hatthakammaṃ yācituṃ āgamimhāti. Laddhaṃ, bhanteti. Na laddhaṃ upāsiketi? Kiṃ panesā kuṭi issareheva kātabbā, duggatehipi sakkā kātunti. Yena kenaci sakkāti? Sādhu, bhante, mayaṃ karissāma. Sve mayhaṃ bhikkhaṃ gaṇhathāti nimantetvā udakaṃ netvā puna kuṭaṃ gahetvā āgamma titthamagge ṭhatvā āgatā avasesadāsiyo ‘‘ettheva hothā’’ti vatvā sabbāsaṃ āgatakāle āha – ‘‘amma kiṃ niccameva parassa dāsakammaṃ karissatha, udāhu dāsabhāvato muccituṃ icchathā’’ti? Ajjeva muccitumicchāma ayyeti. Yadi evaṃ mayā pañca paccekabuddhā hatthakammaṃ alabhantā svātanāya nimantitā, tumhākaṃ sāmikehi ekadivasaṃ hatthakammaṃ dāpethāti. Tā sādhūti sampaṭicchitvā sāyaṃ aṭavito āgatakāle sāmikānaṃ ārocesuṃ. Te sādhūti jeṭṭhakadāsassa gehadvāre sannipatiṃsu.
அத² நே ஜெட்ட²கதா³ஸீ ஸ்வே தாதா பச்சேகபு³த்³தா⁴னங் ஹத்த²கம்மங் தே³தா²தி ஆனிஸங்ஸங் ஆசிக்கி²த்வா யேபி ந காதுகாமா, தே கா³ள்ஹேன ஓவாதே³ன தஜ்ஜெத்வா படிச்சா²பேஸி. ஸா புனதி³வஸே பச்சேகபு³த்³தா⁴னங் ப⁴த்தங் த³த்வா ஸப்³பே³ஸங் தா³ஸபுத்தானங் ஸஞ்ஞங் அதா³ஸி. தே தாவதே³வ அரஞ்ஞங் பவிஸித்வா த³ப்³ப³ஸம்பா⁴ரே ஸமோதா⁴னெத்வா ஸதங் ஸதங் ஹுத்வா ஏகேககுடிங் ஏகேகசங்கமனாதி³பரிவாரங் கத்வா மஞ்சபீட²பானீயபரிபோ⁴ஜனீயபா⁴ஜனாதீ³னி ட²பெத்வா பச்சேகபு³த்³தே⁴ தேமாஸங் தத்த² வஸனத்தா²ய படிஞ்ஞங் காரெத்வா வாரபி⁴க்க²ங் பட்ட²பேஸுங். யோ அத்தனோ வாரதி³வஸே ந ஸக்கோதி. தஸ்ஸ ஜெட்ட²கதா³ஸீ ஸககே³ஹதோ ஆஹரித்வா தே³தி. ஏவங் தேமாஸங் ஜக்³கி³த்வா ஜெட்ட²கதா³ஸீ ஏகேகங் தா³ஸங் ஏகேகங் ஸாடகங் விஸ்ஸஜ்ஜாபேஸி. பஞ்ச தூ²லஸாடகஸதானி அஹேஸுங். தானி பரிவத்தாபெத்வா பஞ்சன்னங் பச்சேகபு³த்³தா⁴னங் திசீவரானி கத்வா அதா³ஸி. பச்சேகபு³த்³தா⁴ யதா²பா²ஸுகங் அக³மங்ஸு. தம்பி ஜங்க⁴ஸஹஸ்ஸங் ஏகதோ குஸலங் கத்வா காயஸ்ஸ பே⁴தா³ தே³வலோகே நிப்³ப³த்தி. தானி பஞ்ச மாதுகா³மஸதானி காலேன காலங் தேஸங் பஞ்சன்னங் புரிஸஸதானங் கே³ஹே ஹொந்தி, காலேன காலங் ஸப்³பா³பி ஜெட்ட²கதா³ஸபுத்தஸ்ஸேவ கே³ஹே ஹொந்தி. அத² ஏகஸ்மிங் காலே ஜெட்ட²கதா³ஸபுத்தோ தே³வலோகதோ சவித்வா ராஜகுலே நிப்³ப³த்தோ. தாபி பஞ்சஸதா தே³வகஞ்ஞா மஹாபோ⁴க³குலேஸு நிப்³ப³த்தித்வா தஸ்ஸ ரஜ்ஜே டி²தஸ்ஸ கே³ஹங் அக³மங்ஸு. ஏதேன நியாமேன ஸங்ஸரந்தியோ அம்ஹாகங் ப⁴க³வதோ காலே கோலியனக³ரே தே³வத³ஹனக³ரே ச க²த்தியகுலேஸு நிப்³ப³த்தா.
Atha ne jeṭṭhakadāsī sve tātā paccekabuddhānaṃ hatthakammaṃ dethāti ānisaṃsaṃ ācikkhitvā yepi na kātukāmā, te gāḷhena ovādena tajjetvā paṭicchāpesi. Sā punadivase paccekabuddhānaṃ bhattaṃ datvā sabbesaṃ dāsaputtānaṃ saññaṃ adāsi. Te tāvadeva araññaṃ pavisitvā dabbasambhāre samodhānetvā sataṃ sataṃ hutvā ekekakuṭiṃ ekekacaṅkamanādiparivāraṃ katvā mañcapīṭhapānīyaparibhojanīyabhājanādīni ṭhapetvā paccekabuddhe temāsaṃ tattha vasanatthāya paṭiññaṃ kāretvā vārabhikkhaṃ paṭṭhapesuṃ. Yo attano vāradivase na sakkoti. Tassa jeṭṭhakadāsī sakagehato āharitvā deti. Evaṃ temāsaṃ jaggitvā jeṭṭhakadāsī ekekaṃ dāsaṃ ekekaṃ sāṭakaṃ vissajjāpesi. Pañca thūlasāṭakasatāni ahesuṃ. Tāni parivattāpetvā pañcannaṃ paccekabuddhānaṃ ticīvarāni katvā adāsi. Paccekabuddhā yathāphāsukaṃ agamaṃsu. Tampi jaṅghasahassaṃ ekato kusalaṃ katvā kāyassa bhedā devaloke nibbatti. Tāni pañca mātugāmasatāni kālena kālaṃ tesaṃ pañcannaṃ purisasatānaṃ gehe honti, kālena kālaṃ sabbāpi jeṭṭhakadāsaputtasseva gehe honti. Atha ekasmiṃ kāle jeṭṭhakadāsaputto devalokato cavitvā rājakule nibbatto. Tāpi pañcasatā devakaññā mahābhogakulesu nibbattitvā tassa rajje ṭhitassa gehaṃ agamaṃsu. Etena niyāmena saṃsarantiyo amhākaṃ bhagavato kāle koliyanagare devadahanagare ca khattiyakulesu nibbattā.
நந்த³கத்தே²ரோபி பப்³ப³ஜித்வா அரஹத்தங் பத்தோ, ஜெட்ட²கதா³ஸிதீ⁴தா வயங் ஆக³ம்ம ஸுத்³தோ⁴த³னமஹாராஜஸ்ஸ அக்³க³மஹேஸிட்டா²னே டி²தா, இதராபி தேஸங் தேஸங் ராஜபுத்தானங்யேவ க⁴ரங் க³தா. தாஸங் ஸாமிகா பஞ்சஸதா ராஜகுமாரா உத³கசும்ப³டகலஹே ஸத்து² த⁴ம்மதே³ஸனங் ஸுத்வா பப்³ப³ஜிதா, ராஜதீ⁴தரோ தேஸங் உக்கண்ட²னத்த²ங் ஸாஸனங் பேஸேஸுங். தே உக்கண்டி²தே ப⁴க³வா குணாலத³ஹங் நெத்வா ஸோதாபத்திப²லே பதிட்ட²பெத்வா மஹாஸமயதி³வஸே அரஹத்தே பதிட்டா²பேஸி. தாபி பஞ்சஸதா ராஜதீ⁴தரோ நிக்க²மித்வா மஹாபஜாபதியா ஸந்திகே பப்³ப³ஜிங்ஸு. அயமாயஸ்மா நந்த³கோ எத்தாவ தா பி⁴க்கு²னியோதி ஏவமேதங் வத்து² தீ³பேதப்³ப³ங்.
Nandakattheropi pabbajitvā arahattaṃ patto, jeṭṭhakadāsidhītā vayaṃ āgamma suddhodanamahārājassa aggamahesiṭṭhāne ṭhitā, itarāpi tesaṃ tesaṃ rājaputtānaṃyeva gharaṃ gatā. Tāsaṃ sāmikā pañcasatā rājakumārā udakacumbaṭakalahe satthu dhammadesanaṃ sutvā pabbajitā, rājadhītaro tesaṃ ukkaṇṭhanatthaṃ sāsanaṃ pesesuṃ. Te ukkaṇṭhite bhagavā kuṇāladahaṃ netvā sotāpattiphale patiṭṭhapetvā mahāsamayadivase arahatte patiṭṭhāpesi. Tāpi pañcasatā rājadhītaro nikkhamitvā mahāpajāpatiyā santike pabbajiṃsu. Ayamāyasmā nandako ettāva tā bhikkhuniyoti evametaṃ vatthu dīpetabbaṃ.
ராஜகாராமோதி பஸேனதி³னா காரிதோ நக³ரஸ்ஸ த³க்கி²ணதி³ஸாபா⁴கே³ தூ²பாராமஸதி³ஸே டா²னே விஹாரோ.
Rājakārāmoti pasenadinā kārito nagarassa dakkhiṇadisābhāge thūpārāmasadise ṭhāne vihāro.
399. ஸம்மப்பஞ்ஞாய ஸுதி³ட்ட²ந்தி ஹேதுனா காரணேன விபஸ்ஸனாபஞ்ஞாய யாதா²வஸரஸதோ தி³ட்ட²ங்.
399.Sammappaññāya sudiṭṭhanti hetunā kāraṇena vipassanāpaññāya yāthāvasarasato diṭṭhaṃ.
401. தஜ்ஜங் தஜ்ஜந்தி தங்ஸபா⁴வங் தங்ஸபா⁴வங், அத்த²தோ பன தங் தங் பச்சயங் படிச்ச தா தா வேத³னா உப்பஜ்ஜந்தீதி வுத்தங் ஹோதி.
401.Tajjaṃ tajjanti taṃsabhāvaṃ taṃsabhāvaṃ, atthato pana taṃ taṃ paccayaṃ paṭicca tā tā vedanā uppajjantīti vuttaṃ hoti.
402. பகே³வஸ்ஸ சா²யாதி மூலாதீ³னி நிஸ்ஸாய நிப்³ப³த்தா சா²யா பட²மதரங்யேவ அனிச்சா.
402.Pagevassa chāyāti mūlādīni nissāya nibbattā chāyā paṭhamataraṃyeva aniccā.
413. அனுபஹச்சாதி அனுபஹனித்வா. தத்த² மங்ஸங் பிண்ட³ங் பிண்ட³ங் கத்வா சம்மங் அல்லியாபெந்தோ மங்ஸகாயங் உபஹனதி நாம. சம்மங் ப³த்³த⁴ங் ப³த்³த⁴ங் கத்வா மங்ஸே அல்லியாபெந்தோ மங்ஸகாயங் உபஹனதி நாம. ஏவங் அகத்வா. விலிமங்ஸங் ந்ஹாருப³ந்த⁴னந்தி ஸப்³ப³சம்மே லக்³க³விலீபனமங்ஸமேவ. அந்தராகிலேஸஸங்யோஜனப³ந்த⁴னந்தி ஸப்³ப³ங் அந்தரகிலேஸமேவ ஸந்தா⁴ய வுத்தங்.
413.Anupahaccāti anupahanitvā. Tattha maṃsaṃ piṇḍaṃ piṇḍaṃ katvā cammaṃ alliyāpento maṃsakāyaṃ upahanati nāma. Cammaṃ baddhaṃ baddhaṃ katvā maṃse alliyāpento maṃsakāyaṃ upahanati nāma. Evaṃ akatvā. Vilimaṃsaṃ nhārubandhananti sabbacamme laggavilīpanamaṃsameva. Antarākilesasaṃyojanabandhananti sabbaṃ antarakilesameva sandhāya vuttaṃ.
414. ஸத்த கோ² பனிமேதி கஸ்மா ஆஹாதி? யா ஹி ஏஸா பஞ்ஞா கிலேஸே சி²ந்த³தீதி வுத்தா, ஸா ந ஏகிகாவ அத்தனோ த⁴ம்மதாய சி²ந்தி³துங் ஸக்கோதி. யதா² பன குடா²ரீ ந அத்தனோ த⁴ம்மதாய சே²ஜ்ஜங் சி²ந்த³தி, புரிஸஸ்ஸ தஜ்ஜங் வாயாமங் படிச்சேவ சி²ந்த³தி, ஏவங் ந வினா ச²ஹி பொ³ஜ்ஜ²ங்கே³ஹி பஞ்ஞா கிலேஸே சி²ந்தி³துங் ஸக்கோதி. தஸ்மா ஏவமாஹ. தேன ஹீதி யேன காரணேன தயா ச² அஜ்ஜ²த்திகானி ஆயதனானி, ச² பா³ஹிரானி , ச² விஞ்ஞாணகாயே, தீ³போபமங், ருக்கோ²பமங், கா³வூபமஞ்ச த³ஸ்ஸெத்வா ஸத்தஹி பொ³ஜ்ஜ²ங்கே³ஹி ஆஸவக்க²யேன தே³ஸனா நிட்ட²பிதா, தேன காரணேன த்வங் ஸ்வேபி தா பி⁴க்கு²னியோ தேனேவ ஓவாதே³ன ஓவதெ³ய்யாஸீதி.
414.Satta kho panimeti kasmā āhāti? Yā hi esā paññā kilese chindatīti vuttā, sā na ekikāva attano dhammatāya chindituṃ sakkoti. Yathā pana kuṭhārī na attano dhammatāya chejjaṃ chindati, purisassa tajjaṃ vāyāmaṃ paṭicceva chindati, evaṃ na vinā chahi bojjhaṅgehi paññā kilese chindituṃ sakkoti. Tasmā evamāha. Tena hīti yena kāraṇena tayā cha ajjhattikāni āyatanāni, cha bāhirāni , cha viññāṇakāye, dīpopamaṃ, rukkhopamaṃ, gāvūpamañca dassetvā sattahi bojjhaṅgehi āsavakkhayena desanā niṭṭhapitā, tena kāraṇena tvaṃ svepi tā bhikkhuniyo teneva ovādena ovadeyyāsīti.
415. ஸா ஸோதாபன்னாதி யா ஸா கு³ணேஹி ஸப்³ப³பச்சி²மிகா, ஸா ஸோதாபன்னா. ஸேஸா பன ஸகதா³கா³மிஅனாகா³மினியோ ச கீ²ணாஸவா ச. யதி³ ஏவங் கத²ங் பரிபுண்ணஸங்கப்பாதி. அஜ்ஜா²ஸயபாரிபூரியா. யஸ்ஸா ஹி பி⁴க்கு²னியா ஏவமஹோஸி – ‘‘கதா³ நு கோ² அஹங் அய்யஸ்ஸ நந்த³கஸ்ஸ த⁴ம்மதே³ஸனங் ஸுணந்தீ தஸ்மிங்யேவ ஆஸனே ஸோதாபத்திப²லங் ஸச்சி²கரெய்ய’’ந்தி, ஸா ஸோதாபத்திப²லங் ஸச்சா²காஸி. யஸ்ஸா அஹோஸி ‘‘ஸகதா³கா³மிப²லங் அனாகா³மிப²லங் அரஹத்த’’ந்தி, ஸா அரஹத்தங் ஸச்சா²காஸி. தேனாஹ ப⁴க³வா ‘‘அத்தமனா சேவ பரிபுண்ணஸங்கப்பா சா’’தி.
415.Sā sotāpannāti yā sā guṇehi sabbapacchimikā, sā sotāpannā. Sesā pana sakadāgāmianāgāminiyo ca khīṇāsavā ca. Yadi evaṃ kathaṃ paripuṇṇasaṅkappāti. Ajjhāsayapāripūriyā. Yassā hi bhikkhuniyā evamahosi – ‘‘kadā nu kho ahaṃ ayyassa nandakassa dhammadesanaṃ suṇantī tasmiṃyeva āsane sotāpattiphalaṃ sacchikareyya’’nti, sā sotāpattiphalaṃ sacchākāsi. Yassā ahosi ‘‘sakadāgāmiphalaṃ anāgāmiphalaṃ arahatta’’nti, sā arahattaṃ sacchākāsi. Tenāha bhagavā ‘‘attamanā ceva paripuṇṇasaṅkappā cā’’ti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
நந்த³கோவாத³ஸுத்தவண்ணனா நிட்டி²தா.
Nandakovādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. நந்த³கோவாத³ஸுத்தங் • 4. Nandakovādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 4. நந்த³கோவாத³ஸுத்தவண்ணனா • 4. Nandakovādasuttavaṇṇanā
