| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
9. நந்த³ஸுத்தங்
9. Nandasuttaṃ
9. ‘‘‘குலபுத்தோ’தி, பி⁴க்க²வே, நந்த³ங் ஸம்மா வத³மானோ வதெ³ய்ய. ‘ப³லவா’தி, பி⁴க்க²வே, நந்த³ங் ஸம்மா வத³மானோ வதெ³ய்ய. ‘பாஸாதி³கோ’தி, பி⁴க்க²வே, நந்த³ங் ஸம்மா வத³மானோ வதெ³ய்ய. ‘திப்³ப³ராகோ³’தி, பி⁴க்க²வே, நந்த³ங் ஸம்மா வத³மானோ வதெ³ய்ய. கிமஞ்ஞத்ர, பி⁴க்க²வே, நந்தோ³ இந்த்³ரியேஸு கு³த்தத்³வாரோ, போ⁴ஜனே மத்தஞ்ஞூ, ஜாக³ரியங் அனுயுத்தோ, ஸதிஸம்பஜஞ்ஞேன ஸமன்னாக³தோ, யேஹி 1 நந்தோ³ ஸக்கோதி பரிபுண்ணங் பரிஸுத்³த⁴ங் ப்³ரஹ்மசரியங் சரிதுங்! தத்ரித³ங், பி⁴க்க²வே, நந்த³ஸ்ஸ இந்த்³ரியேஸு கு³த்தத்³வாரதாய ஹோதி. ஸசே , பி⁴க்க²வே, நந்த³ஸ்ஸ புரத்தி²மா தி³ஸா ஆலோகேதப்³பா³ ஹோதி, ஸப்³ப³ங் சேதஸா ஸமன்னாஹரித்வா நந்தோ³ புரத்தி²மங் தி³ஸங் ஆலோகேதி – ‘ஏவங் மே புரத்தி²மங் தி³ஸங் ஆலோகயதோ நாபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவிஸ்ஸந்தீ’தி. இதிஹ தத்த² ஸம்பஜானோ ஹோதி.
9. ‘‘‘Kulaputto’ti, bhikkhave, nandaṃ sammā vadamāno vadeyya. ‘Balavā’ti, bhikkhave, nandaṃ sammā vadamāno vadeyya. ‘Pāsādiko’ti, bhikkhave, nandaṃ sammā vadamāno vadeyya. ‘Tibbarāgo’ti, bhikkhave, nandaṃ sammā vadamāno vadeyya. Kimaññatra, bhikkhave, nando indriyesu guttadvāro, bhojane mattaññū, jāgariyaṃ anuyutto, satisampajaññena samannāgato, yehi 2 nando sakkoti paripuṇṇaṃ parisuddhaṃ brahmacariyaṃ carituṃ! Tatridaṃ, bhikkhave, nandassa indriyesu guttadvāratāya hoti. Sace , bhikkhave, nandassa puratthimā disā āloketabbā hoti, sabbaṃ cetasā samannāharitvā nando puratthimaṃ disaṃ āloketi – ‘evaṃ me puratthimaṃ disaṃ ālokayato nābhijjhādomanassā pāpakā akusalā dhammā anvāssavissantī’ti. Itiha tattha sampajāno hoti.
‘‘ஸசே , பி⁴க்க²வே, நந்த³ஸ்ஸ பச்சி²மா தி³ஸா ஆலோகேதப்³பா³ ஹோதி…பே॰… உத்தரா தி³ஸா ஆலோகேதப்³பா³ ஹோதி… த³க்கி²ணா தி³ஸா ஆலோகேதப்³பா³ ஹோதி… உத்³த⁴ங் உல்லோகேதப்³பா³ ஹோதி… அதோ⁴ ஓலோகேதப்³பா³ ஹோதி… அனுதி³ஸா அனுவிலோகேதப்³பா³ ஹோதி, ஸப்³ப³ங் சேதஸா ஸமன்னாஹரித்வா நந்தோ³ அனுதி³ஸங் அனுவிலோகேதி – ‘ஏவங் மே அனுதி³ஸங் அனுவிலோகயதோ நாபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவிஸ்ஸந்தீ’தி. இதிஹ தத்த² ஸம்பஜானோ ஹோதி. இத³ங் கோ², பி⁴க்க²வே, நந்த³ஸ்ஸ இந்த்³ரியேஸு கு³த்தத்³வாரதாய ஹோதி.
‘‘Sace , bhikkhave, nandassa pacchimā disā āloketabbā hoti…pe… uttarā disā āloketabbā hoti… dakkhiṇā disā āloketabbā hoti… uddhaṃ ulloketabbā hoti… adho oloketabbā hoti… anudisā anuviloketabbā hoti, sabbaṃ cetasā samannāharitvā nando anudisaṃ anuviloketi – ‘evaṃ me anudisaṃ anuvilokayato nābhijjhādomanassā pāpakā akusalā dhammā anvāssavissantī’ti. Itiha tattha sampajāno hoti. Idaṃ kho, bhikkhave, nandassa indriyesu guttadvāratāya hoti.
‘‘தத்ரித³ங், பி⁴க்க²வே, நந்த³ஸ்ஸ போ⁴ஜனே மத்தஞ்ஞுதாய ஹோதி. இத⁴, பி⁴க்க²வே, நந்தோ³ படிஸங்கா² யோனிஸோ ஆஹாரங் ஆஹாரேதி – ‘நேவ த³வாய ந மதா³ய ந மண்ட³னாய ந விபூ⁴ஸனாய, யாவதே³வ இமஸ்ஸ காயஸ்ஸ டி²தியா யாபனாய விஹிங்ஸூபரதியா ப்³ரஹ்மசரியானுக்³க³ஹாய இதி புராணஞ்ச வேத³னங் படிஹங்கா²மி, நவஞ்ச வேத³னங் ந உப்பாதெ³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ சா’தி. இத³ங் கோ², பி⁴க்க²வே, நந்த³ஸ்ஸ போ⁴ஜனே மத்தஞ்ஞுதாய ஹோதி.
‘‘Tatridaṃ, bhikkhave, nandassa bhojane mattaññutāya hoti. Idha, bhikkhave, nando paṭisaṅkhā yoniso āhāraṃ āhāreti – ‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya iti purāṇañca vedanaṃ paṭihaṅkhāmi, navañca vedanaṃ na uppādessāmi, yātrā ca me bhavissati anavajjatā ca phāsuvihāro cā’ti. Idaṃ kho, bhikkhave, nandassa bhojane mattaññutāya hoti.
‘‘தத்ரித³ங், பி⁴க்க²வே, நந்த³ஸ்ஸ ஜாக³ரியானுயோக³ஸ்மிங் ஹோதி. இத⁴ , பி⁴க்க²வே, நந்தோ³ தி³வஸங் சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதே⁴தி; ரத்தியா பட²மங் யாமங் சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதே⁴தி ; ரத்தியா மஜ்ஜி²மங் யாமங் த³க்கி²ணேன பஸ்ஸேன ஸீஹஸெய்யங் கப்பேதி பாதே³ பாத³ங் அச்சாதா⁴ய ஸதோ ஸம்பஜானோ உட்டா²னஸஞ்ஞங் மனஸி கரித்வா; ரத்தியா பச்சி²மங் யாமங் பச்சுட்டா²ய சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதே⁴தி. இத³ங் கோ², பி⁴க்க²வே, நந்த³ஸ்ஸ ஜாக³ரியானுயோக³ஸ்மிங் ஹோதி.
‘‘Tatridaṃ, bhikkhave, nandassa jāgariyānuyogasmiṃ hoti. Idha , bhikkhave, nando divasaṃ caṅkamena nisajjāya āvaraṇīyehi dhammehi cittaṃ parisodheti; rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheti ; rattiyā majjhimaṃ yāmaṃ dakkhiṇena passena sīhaseyyaṃ kappeti pāde pādaṃ accādhāya sato sampajāno uṭṭhānasaññaṃ manasi karitvā; rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodheti. Idaṃ kho, bhikkhave, nandassa jāgariyānuyogasmiṃ hoti.
‘‘தத்ரித³ங், பி⁴க்க²வே, நந்த³ஸ்ஸ ஸதிஸம்பஜஞ்ஞஸ்மிங் ஹோதி. இத⁴, பி⁴க்க²வே, நந்த³ஸ்ஸ விதி³தா வேத³னா உப்பஜ்ஜந்தி, விதி³தா உபட்ட²ஹந்தி, விதி³தா அப்³ப⁴த்த²ங் க³ச்ச²ந்தி; விதி³தா ஸஞ்ஞா…பே॰… விதி³தா விதக்கா…பே॰… அப்³ப⁴த்த²ங் க³ச்ச²ந்தி. இத³ங் கோ², பி⁴க்க²வே, நந்த³ஸ்ஸ ஸதிஸம்பஜஞ்ஞஸ்மிங் ஹோதி.
‘‘Tatridaṃ, bhikkhave, nandassa satisampajaññasmiṃ hoti. Idha, bhikkhave, nandassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā…pe… viditā vitakkā…pe… abbhatthaṃ gacchanti. Idaṃ kho, bhikkhave, nandassa satisampajaññasmiṃ hoti.
‘‘கிமஞ்ஞத்ர, பி⁴க்க²வே, நந்தோ³ இந்த்³ரியேஸு கு³த்தத்³வாரோ, போ⁴ஜனே மத்தஞ்ஞூ, ஜாக³ரியங் அனுயுத்தோ , ஸதிஸம்பஜஞ்ஞேன ஸமன்னாக³தோ, யேஹி நந்தோ³ ஸக்கோதி பரிபுண்ணங் பரிஸுத்³த⁴ங் ப்³ரஹ்மசரியங் சரிது’’ந்தி! நவமங்.
‘‘Kimaññatra, bhikkhave, nando indriyesu guttadvāro, bhojane mattaññū, jāgariyaṃ anuyutto , satisampajaññena samannāgato, yehi nando sakkoti paripuṇṇaṃ parisuddhaṃ brahmacariyaṃ caritu’’nti! Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. நந்த³ஸுத்தவண்ணனா • 9. Nandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. நந்த³ஸுத்தவண்ணனா • 9. Nandasuttavaṇṇanā
