| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. நந்த³திஸுத்தவண்ணனா
2. Nandatisuttavaṇṇanā
12. நந்த³தீதி எத்த² நந்த³னங் ஸப்பீதிககாமதண்ஹாகிச்சந்தி ஆஹ – ‘‘துஸ்ஸதீ’’தி, தஸ்மா காமபரிதோஸேன ஹட்ட²துட்டோ² ஹோதீதி அத்தோ². புத்திமாதி புத்தவா. பஹூதே சாயங் மா-ஸத்³தோ³தி ஆஹ ‘‘ப³ஹுபுத்தோ’’தி. ப³ஹுபுத்ததாக³ஹணேன இத³ங் பயோஜனந்தி த³ஸ்ஸெந்தோ ‘‘தஸ்ஸ ஹீ’’திஆதி³மாஹ. பூரெந்தீதி பத³ங் அபெக்கி²த்வா த⁴ஞ்ஞஸ்ஸாதி ஸாமிவசனங். இதி ஆஹாதி இமமத்த²ங் ஸந்தா⁴யாஹ, ஏவங்அதி⁴ப்பாயோ ஹுத்வாதி அத்தோ². கோ³ஸாமிகோதி கோ³மா. இதா⁴பி பஹூதே மா-ஸத்³தோ³. கோ³ரஸஸம்பத்திந்தி கோ³ரஸேஹி நிப்ப²ஜ்ஜனஸம்பத்திங். உபதீ⁴தி பச்சத்தப³ஹுவசனங். ஹீதி ஹேதுஅத்தே² நிபாதோ. நந்த³யந்தி பீதிஸோமனஸ்ஸங் ஜனயந்தீதி நந்த³னா. காமங் து³க்க²ஸ்ஸ அதி⁴ட்டா²னபா⁴வதோ நிப்பரியாயதோ காமா ‘‘உபதீ⁴’’தி வத்தப்³ப³தங் அரஹந்தி, தஸ்ஸா பன தே³வதாய அதி⁴ப்பாயவஸேனாஹ ‘‘ஸுக²ஸ்ஸ அதி⁴ட்டா²னபா⁴வதோ’’தி. கிலேஸவத்து²ஹேதுகத்தா ஸேஸபத³த்³வயஸ்ஸ கிஞ்சாபி ஸப்³ப³ங் ஸங்ஸாரது³க்க²ங் கிலேஸஹேதுகங், விஸேஸதோ பன பாபத⁴ம்மா அபாயூபபத்திங் நிப்³ப³த்தெந்தீதி ஆஹ – ‘‘கிலேஸாபி அபாயது³க்க²ஸ்ஸ அதி⁴ட்டா²னபா⁴வதோ’’தி. உபஸங்ஹரமானாதி உபனெந்தா உப்பாதெ³ந்தா. மனுஸ்ஸஜாதிகோபி து³ல்லப⁴கா⁴ஸச்சா²த³னதாய து³க்க²ப³ஹுலோ பேதோ வியாதி மனுஸ்ஸபேதோ. மனுஸ்ஸஜாதிகோபி வுத்தரூபோ அனத்த²பாதிதோ பரேஹி ஹிங்ஸிதோ ஸமானோ நேரயிகோ வியாதி மனுஸ்ஸனேரயிகோ.
12.Nandatīti ettha nandanaṃ sappītikakāmataṇhākiccanti āha – ‘‘tussatī’’ti, tasmā kāmaparitosena haṭṭhatuṭṭho hotīti attho. Puttimāti puttavā. Pahūte cāyaṃ mā-saddoti āha ‘‘bahuputto’’ti. Bahuputtatāgahaṇena idaṃ payojananti dassento ‘‘tassa hī’’tiādimāha. Pūrentīti padaṃ apekkhitvā dhaññassāti sāmivacanaṃ. Iti āhāti imamatthaṃ sandhāyāha, evaṃadhippāyo hutvāti attho. Gosāmikoti gomā. Idhāpi pahūte mā-saddo. Gorasasampattinti gorasehi nipphajjanasampattiṃ. Upadhīti paccattabahuvacanaṃ. Hīti hetuatthe nipāto. Nandayanti pītisomanassaṃ janayantīti nandanā. Kāmaṃ dukkhassa adhiṭṭhānabhāvato nippariyāyato kāmā ‘‘upadhī’’ti vattabbataṃ arahanti, tassā pana devatāya adhippāyavasenāha ‘‘sukhassa adhiṭṭhānabhāvato’’ti. Kilesavatthuhetukattā sesapadadvayassa kiñcāpi sabbaṃ saṃsāradukkhaṃ kilesahetukaṃ, visesato pana pāpadhammā apāyūpapattiṃ nibbattentīti āha – ‘‘kilesāpi apāyadukkhassa adhiṭṭhānabhāvato’’ti. Upasaṃharamānāti upanentā uppādentā. Manussajātikopi dullabhaghāsacchādanatāya dukkhabahulo peto viyāti manussapeto. Manussajātikopi vuttarūpo anatthapātito parehi hiṃsito samāno nerayiko viyāti manussanerayiko.
ப²லேன ருக்க²தோ ப²லங் பாதெந்தோ விய. ததே²வ நவஹாகாரேஹீதி யதா² தீஸு காலேஸு நாஸமரணபே⁴த³னவஸேன புத்திமா புத்தனிமித்தங், ததே²வ கோ³மா கோ³னிமித்தங் ஸோசதி நவப்பகாரேஹி. பஞ்ச காமகு³ணோபதீ⁴பி நரங் ஸோசெந்தீதி யோஜனா. தஸ்ஸாதி யோ உத்தரி அனுகி³ஜ்ஜ²தி தஸ்ஸ. காமயானஸ்ஸாதி ஜாதகாமச்ச²ந்த³ஸ்ஸ. ஜந்துனோதி ஸத்தஸ்ஸ. பரிஹாயந்தி சே வினஸ்ஸந்தி சே. ஸல்லவித்³தோ⁴வாதி ஸல்லேன வித்³தோ⁴ விய. ருப்பதீதி விகாரங் ஆபஜ்ஜதி, ஸோசதீதி அத்தோ². நரஸ்ஸ ஸோசனா ஸோகக⁴ட்டனபச்சயோ. உபத⁴யோ நத்தீ²தி காமங் கிலேஸாபி⁴ஸங்கா²ரூபத⁴யோ தாவ கீ²ணாஸவஸ்ஸ நத்தே²வ மக்³கா³தி⁴க³மேன நிரோதி⁴தத்தா, க²ந்தூ⁴பத⁴யோ பன கத²ந்தி? தேபி தஸ்ஸ ஸஉபாதி³ஸேஸகாலேபி அட்டு²ப்பத்திஹேதுபூ⁴தா ந ஸந்தேவ, அயஞ்ச அனுபாதி³ஸேஸகாலே. தேனாஹ ‘‘ஸோ நிருபதி⁴ மஹாகீ²ணாஸவோ’’தி.
Phalena rukkhato phalaṃ pātento viya. Tatheva navahākārehīti yathā tīsu kālesu nāsamaraṇabhedanavasena puttimā puttanimittaṃ, tatheva gomā gonimittaṃ socati navappakārehi. Pañca kāmaguṇopadhīpi naraṃ socentīti yojanā. Tassāti yo uttari anugijjhati tassa. Kāmayānassāti jātakāmacchandassa. Jantunoti sattassa. Parihāyanti ce vinassanti ce. Sallaviddhovāti sallena viddho viya. Ruppatīti vikāraṃ āpajjati, socatīti attho. Narassa socanā sokaghaṭṭanapaccayo. Upadhayo natthīti kāmaṃ kilesābhisaṅkhārūpadhayo tāva khīṇāsavassa nattheva maggādhigamena nirodhitattā, khandhūpadhayo pana kathanti? Tepi tassa saupādisesakālepi aṭṭhuppattihetubhūtā na santeva, ayañca anupādisesakāle. Tenāha ‘‘so nirupadhi mahākhīṇāsavo’’ti.
நந்த³திஸுத்தவண்ணனா நிட்டி²தா.
Nandatisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. நந்த³திஸுத்தங் • 2. Nandatisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. நந்த³திஸுத்தவண்ணனா • 2. Nandatisuttavaṇṇanā
