| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. நஸந்திஸுத்தவண்ணனா
4. Nasantisuttavaṇṇanā
34. கமனீயானீதி கந்தானி. ததோ ஏவ ஏதானி இட்டா²ரம்மணானி ஸுகா²ரம்மணானி ரூபாதீ³னி, தே பன வத்து²காமா, ததா³ரம்மணகிலேஸகாமா வா. ‘‘ந ஸந்தி காமா மனுஜேஸூ’’தி தே³ஸனாஸீஸமேதங், நிச்ச²யேன காமா அனிச்சாயேவ. மச்சு தீ⁴யதி எத்தா²தி மச்சுதெ⁴ய்யங். ந புன ஆக³ச்ச²தி எத்த² தங் அபுனாக³மனங். அபுனாக³மனஸங்கா²தங் நிப்³பா³னங் அனுபக³ச்ச²னதோ. நிப்³பா³னங் ஹீதிஆதி³ வுத்தஸ்ஸேவத்த²ஸ்ஸ விவரணங். ப³த்³தோ⁴தி படிப³த்³த⁴சித்தோ. பமத்தோதி வொஸ்ஸக்³க³பமாத³ங் ஆபன்னோ.
34.Kamanīyānīti kantāni. Tato eva etāni iṭṭhārammaṇāni sukhārammaṇāni rūpādīni, te pana vatthukāmā, tadārammaṇakilesakāmā vā. ‘‘Na santi kāmā manujesū’’ti desanāsīsametaṃ, nicchayena kāmā aniccāyeva. Maccu dhīyati etthāti maccudheyyaṃ. Na puna āgacchati ettha taṃ apunāgamanaṃ. Apunāgamanasaṅkhātaṃ nibbānaṃ anupagacchanato. Nibbānaṃ hītiādi vuttassevatthassa vivaraṇaṃ. Baddhoti paṭibaddhacitto. Pamattoti vossaggapamādaṃ āpanno.
தண்ஹாச²ந்த³தோ ஜாதங் தஸ்ஸ விஸேஸபச்சயத்தா. இச்சி²தங் ஹனதீதி அக⁴ங், து³க்க²ங். இத⁴ பன அனவஸேஸபரியாதா³னவஸேன பஞ்சுபாதா³னக்க²ந்தா⁴ து³க்க²ந்தி. ச²ந்த³வினயா அக⁴வினயோதி ஹேதுனிரோதே⁴ன ஹி ப²லனிரோதோ⁴, ஏவங் ஸஉபாதி³ஸேஸனிப்³பா³னங் வத்வா அக⁴வினயா து³க்க²வினயோதி அனுபாதி³ஸேஸனிப்³பா³னங் வத³தி.
Taṇhāchandatojātaṃ tassa visesapaccayattā. Icchitaṃ hanatīti aghaṃ, dukkhaṃ. Idha pana anavasesapariyādānavasena pañcupādānakkhandhā dukkhanti. Chandavinayā aghavinayoti hetunirodhena hi phalanirodho, evaṃ saupādisesanibbānaṃ vatvā aghavinayā dukkhavinayoti anupādisesanibbānaṃ vadati.
சித்ரானீதி கிலேஸகாமாபி வேத³னாதி³ட்டி²ஸம்பயோக³பே⁴தே³ன ஹொந்தி, ஆகாரபே⁴தே³ன ச அத்தி² ஸவிகா⁴தாவிகா⁴தாதி ததோ விஸேஸேதுங் ‘‘ஆரம்மணசித்தானீ’’தி வுத்தங். ஸங்கப்பிதராகோ³தி ஸுபா⁴தி³வஸேன ஸங்கப்பிதவத்து²ம்ஹி ராகோ³. கிலேஸகாமோ காமோதி வுத்தோ தஸ்ஸேவித⁴ விஸேஸதோ காமபா⁴வஸித்³தி⁴தோ. பஸூரஸுத்தேன விபா⁴வேதப்³போ³ ‘‘ந தே காமா’’திஆதி³னா தஸ்ஸ வத்து²ம்ஹி ஆக³தத்தா. இதா³னி தமத்த²ங் ஸங்கே²பேனேவ விபா⁴வெந்தோ ‘‘பஸூரபரிப்³பா³ஜகோ ஹீ’’திஆதி³மாஹ. ந தே காமா யானி சித்ரானி லோகேதி தே சே காமா ந ஹொந்தி, யானி லோகே சித்ரானி ரூபாதி³ஆரம்மணானி. வேதே³ஸீதி கேவலங் ஸங்கப்பராக³ஞ்ச காமங் கத்வா வதே³ஸி சே. ஹேஹிந்தீதி ப⁴வெய்யுந்தி அத்தோ². ஸுணந்தோ ஸத்³தா³னி மனோரமானி, ஸத்தா²பி தே ஹேஹிதி காமபோ⁴கீ³தி பச்சேகங் கா³தா², இத⁴ பன ஸங்கி²பித்வா த³ஸ்ஸிதா. தீ⁴ரா நாம தி⁴திஸம்பன்னாதி ஆஹ ‘‘பண்டி³தா’’தி.
Citrānīti kilesakāmāpi vedanādiṭṭhisampayogabhedena honti, ākārabhedena ca atthi savighātāvighātāti tato visesetuṃ ‘‘ārammaṇacittānī’’ti vuttaṃ. Saṅkappitarāgoti subhādivasena saṅkappitavatthumhi rāgo. Kilesakāmo kāmoti vutto tassevidha visesato kāmabhāvasiddhito. Pasūrasuttena vibhāvetabbo ‘‘na te kāmā’’tiādinā tassa vatthumhi āgatattā. Idāni tamatthaṃ saṅkhepeneva vibhāvento ‘‘pasūraparibbājako hī’’tiādimāha. Na te kāmā yāni citrāni loketi te ce kāmā na honti, yāni loke citrāni rūpādiārammaṇāni. Vedesīti kevalaṃ saṅkapparāgañca kāmaṃ katvā vadesi ce. Hehintīti bhaveyyunti attho. Suṇanto saddāni manoramāni, satthāpi te hehiti kāmabhogīti paccekaṃ gāthā, idha pana saṃkhipitvā dassitā. Dhīrā nāma dhitisampannāti āha ‘‘paṇḍitā’’ti.
தஸ்ஸாதி யோ பஹீனகோத⁴மானோ ஸப்³ப³ஸோ ஸங்யோஜனாதிகோ³ நாமரூபஸ்மிங் அஸஜ்ஜந்தோ ராகா³தி³கிஞ்சனரஹிதோ, தஸ்ஸ. மோக⁴ராஜா நாம தே²ரோ பா³வரீப்³ராஹ்மணஸ்ஸ பரிசாரகானங் ஸோளஸன்னங் அஞ்ஞதரோ. யதா²னுஸந்தி⁴ங் அப்பத்தோ ஸாவஸேஸ-அத்தோ², கிஞ்சி வத்தப்³ப³ங் அத்தீ²தி அதி⁴ப்பாயோ . ஸப்³ப³ஸோ விமுத்தத்தாவ தே³வமனுஸ்ஸா நமஸ்ஸந்தி, யே தங் படிபஜ்ஜந்தி. தேஸங் கிங் ஹோதி? கிஞ்சிபி ந ஸியாதி அயமெத்த² அத்த²விஸேஸோ? த³ஸப³லங் ஸந்தா⁴யேவமாஹ உக்கட்ட²னித்³தே³ஸேன. அனுபடிபத்தியாதி படிபத்திங் அனுக³ந்த்வா படிபஜ்ஜனேன. நமஸ்ஸந்தி தங் பூஜெந்தி.
Tassāti yo pahīnakodhamāno sabbaso saṃyojanātigo nāmarūpasmiṃ asajjanto rāgādikiñcanarahito, tassa. Mogharājā nāma thero bāvarībrāhmaṇassa paricārakānaṃ soḷasannaṃ aññataro. Yathānusandhiṃ appatto sāvasesa-attho, kiñci vattabbaṃ atthīti adhippāyo . Sabbaso vimuttattāva devamanussā namassanti, ye taṃ paṭipajjanti. Tesaṃ kiṃ hoti? Kiñcipi na siyāti ayamettha atthaviseso? Dasabalaṃ sandhāyevamāha ukkaṭṭhaniddesena. Anupaṭipattiyāti paṭipattiṃ anugantvā paṭipajjanena. Namassanti taṃ pūjenti.
சதுஸச்சத⁴ம்மங் ஜானித்வாதி தேன படிவித்³த⁴ங் சதுஸச்சத⁴ம்மங் படிவிஜ்ஜி²த்வா. ததா² ச பு³த்³த⁴ஸுபு³த்³த⁴தாய நிப்³பே³மதிகா ஹொந்தீதி ஆஹ ‘‘விசிகிச்ச²ங் பஹாயா’’தி. ததோ பரங் பன அனுக்கமேன அக்³க³மக்³கா³தி⁴க³மேன ஸங்கா³திகா³பி ஹொந்தி. அஸெக்க²த⁴ம்மபாரிபூரியா பஸங்ஸியா விஞ்ஞூனங் பஸங்ஸாபி ஹொந்தீதி.
Catusaccadhammaṃ jānitvāti tena paṭividdhaṃ catusaccadhammaṃ paṭivijjhitvā. Tathā ca buddhasubuddhatāya nibbematikā hontīti āha ‘‘vicikicchaṃ pahāyā’’ti. Tato paraṃ pana anukkamena aggamaggādhigamena saṅgātigāpi honti. Asekkhadhammapāripūriyā pasaṃsiyā viññūnaṃ pasaṃsāpi hontīti.
நஸந்திஸுத்தவண்ணனா நிட்டி²தா.
Nasantisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. நஸந்திஸுத்தங் • 4. Nasantisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. நஸந்திஸுத்தவண்ணனா • 4. Nasantisuttavaṇṇanā
