| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஞாதிகஸுத்தவண்ணனா
5. Ñātikasuttavaṇṇanā
45. அஞ்ஞமஞ்ஞங் த்³வின்னங் ஞாதீனங் கா³மோ ஞாதிகோதி வுத்தோதி ஆஹ ‘‘த்³வின்னங் ஞாதகானங் கா³மே’’தி. கி³ஞ்ஜகா வுச்சந்தி இட்ட²கா, கி³ஞ்ஜகாஹி ஏவ கதோ ஆவஸதோ² கி³ஞ்ஜகாவஸதோ². ஸோ கிர ஆவாஸோ யதா² ஸுதா⁴பரிகம்மேன பயோஜனங் நத்தி², ஏவங் இட்ட²காஹி ஏவ சினித்வா சா²தெ³த்வா கதோ. தாதி³ஸஞ்ஹி ச²த³னங் ஸந்தா⁴ய ப⁴க³வதா இட்ட²காச²த³னங் அனுஞ்ஞாதங். தேன வுத்தங் ‘‘இட்ட²காஹி கதே மஹாபாஸாதே³’’தி. தத்த² த்³வாரப³ந்த⁴கவாடப²லகாதீ³னி பன தா³ருமயானியேவ. பரியாயதி அத்தனோ ப²லங் பரிக்³க³ஹெத்வா வத்ததீதி பரியாயோ, காரணந்தி ஆஹ ‘‘த⁴ம்மபரியாயந்தி த⁴ம்மகாரண’’ந்தி, பரியத்தித⁴ம்மபூ⁴தங் விஸேஸாதி⁴க³மஸ்ஸ ஹேதுந்தி அத்தோ². உபேச்ச ஸுய்யதி எத்தா²தி உபஸ்ஸுதீதி வுத்தங் ‘‘உபஸ்ஸுதீதி உபஸ்ஸுதிட்டா²ன’’ந்தி. அத்தனோ கம்மந்தி யத³த்த²ங் தத்த² க³தோ, தங் பரிவேணஸமஜ்ஜனகிரியங். பஹாயாதி அகத்வா. ஏவங் மஹத்த²ஞ்ஹி விமுத்தாயதனஸீஸே ட²த்வா ஸுணந்தஸ்ஸ மஹதோ அத்தா²ய ஸங்வத்ததி. ஏகங்க³ணங் அஹோஸீதி ஸப்³ப³ங் விவடங் அஹோஸி. தீஸு ஹி ப⁴வேஸு ஸங்கா²ரக³தங் பச்சயுப்பன்னவஸேன மனஸிகரோதோ ப⁴க³வதோ கிஞ்சி அஸேஸெத்வா ஸப்³ப³ம்பி தங் ஞாணமுகே² ஆபாத²ங் உபக³ச்சி². தேன வுத்தங் ‘‘யாவப⁴வக்³கா³ ஏகங்க³ணங் அஹோஸீ’’தி. தந்திவஸேன தமத்த²ங் வாசாய நிச்சா²ரெந்தோ ‘‘வசஸா ஸஜ்ஜா²யங் கரொந்தோ’’தி வுத்தோ. பச்சயபச்சயுப்பன்னவஸேன ச அத்த²ங் ஆஹரித்வா தேஸங் நிரோதே⁴ன விவட்டஸ்ஸ ஆஹதத்தா ‘‘யதா²னுஸந்தி⁴னா’’தி வுத்தங். அத்³த³ஸ ஞாணசக்கு²னா.
45. Aññamaññaṃ dvinnaṃ ñātīnaṃ gāmo ñātikoti vuttoti āha ‘‘dvinnaṃ ñātakānaṃ gāme’’ti. Giñjakā vuccanti iṭṭhakā, giñjakāhi eva kato āvasatho giñjakāvasatho. So kira āvāso yathā sudhāparikammena payojanaṃ natthi, evaṃ iṭṭhakāhi eva cinitvā chādetvā kato. Tādisañhi chadanaṃ sandhāya bhagavatā iṭṭhakāchadanaṃ anuññātaṃ. Tena vuttaṃ ‘‘iṭṭhakāhi kate mahāpāsāde’’ti. Tattha dvārabandhakavāṭaphalakādīni pana dārumayāniyeva. Pariyāyati attano phalaṃ pariggahetvā vattatīti pariyāyo, kāraṇanti āha ‘‘dhammapariyāyanti dhammakāraṇa’’nti, pariyattidhammabhūtaṃ visesādhigamassa hetunti attho. Upecca suyyati etthāti upassutīti vuttaṃ ‘‘upassutīti upassutiṭṭhāna’’nti. Attano kammanti yadatthaṃ tattha gato, taṃ pariveṇasamajjanakiriyaṃ. Pahāyāti akatvā. Evaṃ mahatthañhi vimuttāyatanasīse ṭhatvā suṇantassa mahato atthāya saṃvattati. Ekaṅgaṇaṃ ahosīti sabbaṃ vivaṭaṃ ahosi. Tīsu hi bhavesu saṅkhāragataṃ paccayuppannavasena manasikaroto bhagavato kiñci asesetvā sabbampi taṃ ñāṇamukhe āpāthaṃ upagacchi. Tena vuttaṃ ‘‘yāvabhavaggā ekaṅgaṇaṃ ahosī’’ti. Tantivasena tamatthaṃ vācāya nicchārento ‘‘vacasā sajjhāyaṃ karonto’’ti vutto. Paccayapaccayuppannavasena ca atthaṃ āharitvā tesaṃ nirodhena vivaṭṭassa āhatattā ‘‘yathānusandhinā’’ti vuttaṃ. Addasa ñāṇacakkhunā.
மனஸா ஸஜ்ஜா²யங் கரொந்தோ ‘‘துண்ஹீபூ⁴தோவ பகு³ணங் கரொந்தோ’’தி வுத்தோ. பதா³னுபத³ந்தி பத³ஞ்ச அனுபத³ஞ்ச. புரிமஞ்ஹி பத³ங் நாம, தத³னந்தரங் அனுபத³ங். க⁴டெத்வா ஸம்ப³ந்த⁴ங் கத்வா அவிச்சி²ந்தி³த்வா. பரியாபுணாதீதி அஜ்ஜ²யதி. ஆதா⁴ரப்பத்தந்தி ஆதா⁴ரங் சித்தஸந்தானப்பத்தங் அப்பமுட்ட²ங் க³தத்தா ஆதா⁴ரப்பத்தங் நாம. காரணனிஸ்ஸிதோதி லோகுத்தரத⁴ம்மஸ்ஸ காரணஸன்னிஸ்ஸிதோ. ஆதி³ப்³ரஹ்மசரியகோதி ஆதி³ப்³ரஹ்மசரியங், ததே³வ ஆதி³ப்³ரஹ்மசரியகங். த⁴ம்மபரியாயாபெக்கா²ய புல்லிங்க³னித்³தே³ஸோ. தீஸுபி இமேஸூதி ததியசதுத்த²பஞ்சமேஸு தீஸு ஸுத்தேஸு.
Manasā sajjhāyaṃ karonto ‘‘tuṇhībhūtova paguṇaṃ karonto’’ti vutto. Padānupadanti padañca anupadañca. Purimañhi padaṃ nāma, tadanantaraṃ anupadaṃ. Ghaṭetvā sambandhaṃ katvā avicchinditvā. Pariyāpuṇātīti ajjhayati. Ādhārappattanti ādhāraṃ cittasantānappattaṃ appamuṭṭhaṃ gatattā ādhārappattaṃ nāma. Kāraṇanissitoti lokuttaradhammassa kāraṇasannissito. Ādibrahmacariyakoti ādibrahmacariyaṃ, tadeva ādibrahmacariyakaṃ. Dhammapariyāyāpekkhāya pulliṅganiddeso. Tīsupi imesūti tatiyacatutthapañcamesu tīsu suttesu.
ஞாதிகஸுத்தவண்ணனா நிட்டி²தா.
Ñātikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஞாதிகஸுத்தங் • 5. Ñātikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஞாதிகஸுத்தவண்ணனா • 5. Ñātikasuttavaṇṇanā
