| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. நத்தி²தி³ன்னஸுத்தவண்ணனா
5. Natthidinnasuttavaṇṇanā
210. தி³ன்னந்தி தெ³ய்யத⁴ம்மஸீஸேன தா³னங் வுத்தந்தி ஆஹ ‘‘தி³ன்னஸ்ஸ ப²லாபா⁴வங் ஸந்தா⁴யா’’தி, தி³ன்னங் பன அன்னாதி³வத்து²ங் கத²ங் படிக்கி²பந்தி. ஏஸ நயோ ‘‘யிட்ட²ங் ஹுத’’ந்தி எத்தா²பி. மஹாயாகோ³தி ஸப்³ப³ஸாதா⁴ரணங் மஹாதா³னங். பஹேணகஸக்காரோதி பாஹுனகானங் காதப்³ப³ஸக்காரோ. ப²லந்தி ஆனிஸங்ஸப²லங் நிஸ்ஸந்த³ப²லஞ்ச. விபாகோதி ஸதி³ஸப²லங். பரலோகே டி²தஸ்ஸ அயங் லோகோ நத்தீ²தி பரலோகே டி²தஸ்ஸ கம்முனா லத்³த⁴ப்³போ³ அயங் லோகோ ந ஹோதி. இத⁴லோகே டி²தஸ்ஸபி பரலோகோ நத்தீ²தி இத⁴லோகே டி²தஸ்ஸ கம்முனா லத்³த⁴ப்³போ³ பரலோகோ ந ஹோதி. தத்த² காரணமாஹ – ‘‘ஸப்³பே³ தத்த² தத்தே²வ உச்சி²ஜ்ஜந்தீ’’தி. இமே ஸத்தா யத்த² யத்த² ப⁴வே யோனிஆதீ³ஸு ச டி²தா, தத்த² தத்தே²வ உச்சி²ஜ்ஜந்தி நிருத³யவினாஸவஸேன நஸ்ஸந்தி. ப²லாபா⁴வவஸேனாதி மாதாபிதூஸு ஸம்மாபடிபத்திமிச்சா²படிபத்தீனங் ப²லஸ்ஸ அபா⁴வவஸேன ‘‘நத்தி² மாதா, நத்தி² பிதா’’தி வத³ந்தி, ந மாதாபிதூனங், நாபி தேஸு இதா³னி கரியமானஸக்காராஸக்காரானங் அபா⁴வவஸேன தேஸங் லோகபச்சக்க²த்தா. புப்³பு³ளகஸ்ஸ விய இமேஸங் ஸத்தானங் உப்பாதோ³ நாம கேவலோ, ந ப⁴வதோ சவித்வா ஆக³மனபுப்³ப³கோதி த³ஸ்ஸனத்த²ங் ‘‘நத்தி² ஸத்தா ஓபபாதிகா’’தி வுத்தந்தி ஆஹ – ‘‘சவித்வா உப்பஜ்ஜனகஸத்தா நாம நத்தீ²’’தி. ஸமணேன நாம யாதா²வதோ ஜானந்தேன கஸ்ஸசி அகதெ²த்வா ஸஞ்ஞதேன ப⁴விதப்³ப³ங், அஞ்ஞதா² ஆஹோபுரிஸிகா நாம ஸியா. கிஞ்ஹி பரோ பரஸ்ஸ கரிஸ்ஸதி, ததா² ச அத்தனோ ஸம்பாத³னஸ்ஸ கஸ்ஸசி அவஸ்ஸயோ ஏவ ந ஸியா தத்த² தத்தே²வ உச்சி²ஜ்ஜனதோதி ஆஹ ‘‘யே இமஞ்ச…பே॰… பவேதெ³ந்தீ’’தி.
210.Dinnanti deyyadhammasīsena dānaṃ vuttanti āha ‘‘dinnassa phalābhāvaṃ sandhāyā’’ti, dinnaṃ pana annādivatthuṃ kathaṃ paṭikkhipanti. Esa nayo ‘‘yiṭṭhaṃ huta’’nti etthāpi. Mahāyāgoti sabbasādhāraṇaṃ mahādānaṃ. Paheṇakasakkāroti pāhunakānaṃ kātabbasakkāro. Phalanti ānisaṃsaphalaṃ nissandaphalañca. Vipākoti sadisaphalaṃ. Paraloke ṭhitassa ayaṃ loko natthīti paraloke ṭhitassa kammunā laddhabbo ayaṃ loko na hoti. Idhaloke ṭhitassapi paraloko natthīti idhaloke ṭhitassa kammunā laddhabbo paraloko na hoti. Tattha kāraṇamāha – ‘‘sabbe tattha tattheva ucchijjantī’’ti. Ime sattā yattha yattha bhave yoniādīsu ca ṭhitā, tattha tattheva ucchijjanti nirudayavināsavasena nassanti. Phalābhāvavasenāti mātāpitūsu sammāpaṭipattimicchāpaṭipattīnaṃ phalassa abhāvavasena ‘‘natthi mātā, natthi pitā’’ti vadanti, na mātāpitūnaṃ, nāpi tesu idāni kariyamānasakkārāsakkārānaṃ abhāvavasena tesaṃ lokapaccakkhattā. Pubbuḷakassa viya imesaṃ sattānaṃ uppādo nāma kevalo, na bhavato cavitvā āgamanapubbakoti dassanatthaṃ ‘‘natthi sattā opapātikā’’ti vuttanti āha – ‘‘cavitvā uppajjanakasattā nāma natthī’’ti. Samaṇena nāma yāthāvato jānantena kassaci akathetvā saññatena bhavitabbaṃ, aññathā āhopurisikā nāma siyā. Kiñhi paro parassa karissati, tathā ca attano sampādanassa kassaci avassayo eva na siyā tattha tattheva ucchijjanatoti āha ‘‘ye imañca…pe… pavedentī’’ti.
சதூஸு மஹாபூ⁴தேஸு நியுத்தோதி சாதுமஹாபூ⁴திகோ. யதா² பன மத்திகாய நிப்³ப³த்தங் பா⁴ஜனங் மத்திகாமயங், ஏவமயங் சதூஹி மஹாபூ⁴தேஹி நிப்³ப³த்தோதி ஆஹ ‘‘சதுமஹாபூ⁴தமயோ’’தி. அஜ்ஜ²த்திகா பத²வீதா⁴தூதி ஸத்தஸந்தானக³தா பத²வீதா⁴து. பா³ஹிரங் பத²வீதா⁴துந்தி ப³ஹித்³தா⁴ மஹாபத²விங். அனுயாதீதி தஸ்ஸ அனுரூபபா⁴வேன யாதி உபேதி. உபக³ச்ச²தீதி புப்³பே³ பா³ஹிரபத²வீகாயதோ ததே³கதே³ஸபூ⁴தா பத²வீ ஆக³ந்த்வா அஜ்ஜ²த்திகபா⁴வப்பத்தியா ஸத்தபா⁴வேன ஸண்டி²தா இதா³னி க⁴டாதி³பத²வீ விய தமேவ பா³ஹிரபத²வீகாயங் உபேதி உபக³ச்ச²தி, ஸப்³ப³ஸோ தேன நிப்³பி³ஸேஸதங் ஏகீபா⁴வமேவ க³ச்ச²தீதி அத்தோ². ஆபாதீ³ஸுபி ஏஸேவ நயோதி எத்த² பஜ்ஜுன்னேன மஹாஸமுத்³த³தோ க³ஹிதஆபோ விய வஸ்ஸோத³கபா⁴வேன புனபி மஹாஸமுத்³த³ங், ஸூரியரங்ஸிதோ க³ஹிதஇந்த³க்³கி³ஸங்கா²ததேஜோ விய புனபி ஸூரியரங்ஸிங், மஹாவாயுக²ந்த⁴தோ நிக்³க³தமஹாவாயோ விய தமேவ வாயுக²ந்த⁴ங் உபேதி உபக³ச்ச²தீதி தி³ட்டி²க³திகோ ஸயமேவ அத்தனோ வாத³ங் பி⁴ந்த³தி. உம்மத்தகபச்சி²ஸதி³ஸஞ்ஹி தி³ட்டி²க³திகத³ஸ்ஸனங். மனச்ச²ட்டா²னி இந்த்³ரியானி ஆகாஸங் பக்க²ந்த³ந்தி தேஸங் விஸயபா⁴வா விஸயாபீதி வத³தி. விஸயிக்³க³ஹணேன ஹி விஸயா க³ஹிதா ஏவ ஹொந்தீதி. கு³ணாகு³ணபதா³னீதி கு³ணதோ³ஸகொட்டா²ஸா. ஸரீரமேவ பதா³னீதி அதி⁴ப்பேதங் ஸரீரேன தங்தங்கிரியாய பஜ்ஜிதப்³ப³தோ. த³ப்³ப³ந்தி முய்ஹந்தீதி த³த்தூ, மூள்ஹபுக்³க³லா. தேஹி த³த்தூஹி பா³லமனுஸ்ஸேஹி பஞ்ஞத்தங்.
Catūsu mahābhūtesu niyuttoti cātumahābhūtiko. Yathā pana mattikāya nibbattaṃ bhājanaṃ mattikāmayaṃ, evamayaṃ catūhi mahābhūtehi nibbattoti āha ‘‘catumahābhūtamayo’’ti. Ajjhattikā pathavīdhātūti sattasantānagatā pathavīdhātu. Bāhiraṃ pathavīdhātunti bahiddhā mahāpathaviṃ. Anuyātīti tassa anurūpabhāvena yāti upeti. Upagacchatīti pubbe bāhirapathavīkāyato tadekadesabhūtā pathavī āgantvā ajjhattikabhāvappattiyā sattabhāvena saṇṭhitā idāni ghaṭādipathavī viya tameva bāhirapathavīkāyaṃ upeti upagacchati, sabbaso tena nibbisesataṃ ekībhāvameva gacchatīti attho. Āpādīsupi eseva nayoti ettha pajjunnena mahāsamuddato gahitaāpo viya vassodakabhāvena punapi mahāsamuddaṃ, sūriyaraṃsito gahitaindaggisaṅkhātatejo viya punapi sūriyaraṃsiṃ, mahāvāyukhandhato niggatamahāvāyo viya tameva vāyukhandhaṃ upeti upagacchatīti diṭṭhigatiko sayameva attano vādaṃ bhindati. Ummattakapacchisadisañhi diṭṭhigatikadassanaṃ. Manacchaṭṭhāni indriyāni ākāsaṃ pakkhandanti tesaṃ visayabhāvā visayāpīti vadati. Visayiggahaṇena hi visayā gahitā eva hontīti. Guṇāguṇapadānīti guṇadosakoṭṭhāsā. Sarīrameva padānīti adhippetaṃ sarīrena taṃtaṃkiriyāya pajjitabbato. Dabbanti muyhantīti dattū, mūḷhapuggalā. Tehi dattūhi bālamanussehi paññattaṃ.
நத்தி²தி³ன்னஸுத்தவண்ணனா நிட்டி²தா.
Natthidinnasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. நத்தி²தி³ன்னஸுத்தங் • 5. Natthidinnasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. நத்தி²தி³ன்னஸுத்தவண்ணனா • 5. Natthidinnasuttavaṇṇanā
